នៅថ្ងៃពុធ (ទី១១ ខែមីនា ឆ្នាំ២០២៦) នេះ កងទ័ពអ៊ីរ៉ង់ បានឲ្យដឹងថា ខ្លួនបានកំណត់គោលដៅលើទីភ្នាក់ងារស៊ើបការណ៍សម្ងាត់យោធា មូលដ្ឋានទ័ពជើងទឹកមួយ ក្នុងទីក្រុង Haifa និងប្រព័ន្ធរ៉ាដារបស់អ៊ីស្រាអែល។

កងទ័ពបានឲ្យដឹងនៅក្នុងសេចក្តីថ្លែងការណ៍មួយដែលចាក់ផ្សាយដោយទូរទស្សន៍រដ្ឋថា៖ «ចាប់តាំងពីព្រឹកថ្ងៃនេះ កងទ័ពនៃសាធារណរដ្ឋឥស្លាម បានកំណត់គោលដៅទៅលើនាយកដ្ឋានស៊ើបការណ៍សម្ងាត់យោធាអ៊ីស្រាអែល ដែលមានឈ្មោះថា Aman ក៏ដូចជាអង្គភាពយោធាអ៊ីស្រាអែល 8200 រ៉ាដា Green Pine និងអគារទីស្នាក់ការកណ្តាលនាវាមុជទឹក នៅមូលដ្ឋានទ័ពជើងទឹកទីក្រុង Haifa»។

កងទ័ពបានបន្ថែមថា ការវាយប្រហារកំពុងបន្តមាន។ ឆ្មាំបដិវត្តន៍អ៊ីរ៉ង់ បានឲ្យដឹងនៅក្នុងសេចក្តីថ្លែងការណ៍មួយថា ខ្លួននឹងបន្តប្រយុទ្ធ រហូតដល់លែងមាន «ស្រមោលនៃសង្គ្រាម» គ្របដណ្ដប់លើប្រទេសអ៊ីរ៉ង់។

នៅព្រឹកថ្ងៃពុធនេះ ទូរទស្សន៍រដ្ឋអ៊ីរ៉ង់ IRIB បានរាយការណ៍ថា អ៊ីរ៉ង់បានបើកការវាយប្រហារថ្មីលើគោលដៅអ៊ីស្រាអែល និងសហរដ្ឋអាមេរិក នៅតំបន់មជ្ឈិមបូព៌ា។ ដោយដកស្រង់សេចក្តីថ្លែងការណ៍ពីឥស្សរជនឆ្មាំបដិវត្តន៍របស់អ៊ីរ៉ង់ ទូរទស្សន៍នេះ បានឲ្យដឹងថា ការបាញ់ស្រោចនេះ គឺជា «ការវាយប្រហារដ៏ខ្លាំងក្លា និងធ្ងន់ធ្ងរបំផុត ចាប់តាំងពីសង្គ្រាមផ្ទុះឡើង ដោយមានរយៈពេល ៣ម៉ោង។

ការបាញ់នេះបានកំណត់គោលដៅទីក្រុងអ៊ីស្រាអែល រួមទាំងទីក្រុង Tel Aviv និង Haifa ក៏ដូចជា «West Jerusalem» ដោយសំដៅទៅលើតំបន់នៃទីក្រុងមានជម្លោះ ដែលស្ថិតនៅក្រោមការគ្រប់គ្រងទាំងស្រុងរបស់អ៊ីស្រាអែល។ យោធាអ៊ីស្រាអែលបានប្រាប់ថា ខ្លួនបានរកឃើញមីស៊ីលដែលហោះឆ្ពោះទៅកាន់ប្រទេស ហើយបានធ្វើឲ្យប្រព័ន្ធការពារដែនអាកាសរបស់ខ្លួនដំណើរការ៕