សារព័ត៌មានរ៉យទ័របានរាយការណ៍កាលពីថ្ងៃពុធ (១១ មីនា) ដោយយោងតាមប្រភពស្និទ្ធនឹងបញ្ហានេះថា របាយការណ៍ចារកម្មអាមេរិក បានបង្ហាញថា ថ្នាក់ដឹកនាំរបស់អ៊ីរ៉ង់ ភាគច្រើននៅតែមានសាមគ្គីភាព ហើយមិនស្ថិតក្នុងហានិភ័យនៃការដួលរលំនាពេលឆាប់ៗទេ បន្ទាប់ពីការទម្លាក់គ្រាប់បែកឥតឈប់ឈរពីសំណាក់សហរដ្ឋអាមេរិក និងអ៊ីស្រាអែល អស់រយៈពេលជិតពីរសប្តាហ៍មកនេះ។

ប្រភពដែលសុំមិនបញ្ចេញឈ្មោះទាំងនោះ បានលើកឡើងថា របាយការណ៍ចារកម្ម «ដ៏ច្រើនសន្ធឹកសន្ធាប់» បានផ្តល់នូវ «ការវិភាគស្របគ្នាថា របបនេះមិនស្ថិតក្នុងគ្រោះថ្នាក់» នៃការដួលរលំឡើយ ហើយ «នៅតែរក្សាការគ្រប់គ្រងលើសាធារណជនអ៊ីរ៉ង់បានដដែល»។ ប្រភពបន្តថា របាយការណ៍ចុងក្រោយបំផុតនេះធ្វើឡើងក្នុងរយៈពេលប៉ុន្មានថ្ងៃចុងក្រោយនេះ។

ស្របពេលសម្ពាធនយោបាយកាន់តែខ្លាំងឡើងជុំវិញការហក់ឡើងនៃតម្លៃប្រេង លោកប្រធានាធិបតីអាមេរិក Donald Trump បានបង្ហើបថា លោកនឹងបញ្ចប់ប្រតិបត្តិការយោធានេះ ក្នុងពេល «ឆាប់ៗ»។ យ៉ាងណាមិញ ការស្វែងរកចុងបញ្ចប់ដែលអាចទទួលយកបានសម្រាប់សង្គ្រាមនេះ អាចនឹងមានការលំបាក បើក្រុមមេដឹកនាំប្រកាន់ជំហរតឹងរបស់អ៊ីរ៉ង់ នៅតែបន្តកាន់អំណាចយ៉ាងរឹងមាំបែបនេះ។

របាយការណ៍ចារកម្ម បានសង្កត់ធ្ងន់លើសាមគ្គីភាពនៃថ្នាក់ដឹកនាំបែបសាសនារបស់អ៊ីរ៉ង់ បើទោះបីជាមានការធ្វើឃាតមេដឹកនាំកំពូល Ayatollah Ali Khamenei កាលពីថ្ងៃទី២៨ ខែកុម្ភៈ ដែលជាថ្ងៃដំបូងនៃការវាយប្រហាររបស់អាមេរិក និងអ៊ីស្រាអែលក៏ដោយ និងបានលើកឡើងពីមេដឹកនាំកំពូលថ្មី ដែលនៅតែប្រកាន់ជំហរតឹង។ មន្ត្រីជាន់ខ្ពស់អ៊ីស្រាអែលមួយរូបបានប្រាប់សារព័ត៌មានរ៉យទ័រថា សូម្បីតែមន្ត្រីអ៊ីស្រាអែលក៏បានទទួលស្គាល់ដែរថា មិនមានភាពប្រាកដប្រជាឡើយថា សង្គ្រាមនេះនឹងនាំទៅដល់ការដួលរលំនៃរបបអ៊ីរ៉ង់។

យ៉ាងណាក៏ដោយ ប្រភពអ៊ីស្រាអែលបានបញ្ជាក់យ៉ាងមុតមាំថា អ៊ីស្រាអែលគ្មានបំណងអនុញ្ញាតឱ្យ «សំណល់នៃរដ្ឋាភិបាលចាស់» នៅមានវត្តមានឡើយ។ អ្នកជំនាញក៏នៅមិនទាន់ច្បាស់ឡើយថា តើយុទ្ធនាការយោធារបស់អាមេរិក និងអ៊ីស្រាអែលនាពេលបច្ចុប្បន្ន នឹងអាចផ្តួលរំលំរដ្ឋាភិបាលអ៊ីរ៉ង់ បានដោយរបៀបណា៕