អ៊ីរ៉ង់ បានព្រមានថា ខ្លួនអាចធ្វើសង្គ្រាមយូរអង្វែងជាមួយសហរដ្ឋអាមេរិកនិងអ៊ីស្រាអែល ដែលនឹង «បំផ្លាញ» សេដ្ឋកិច្ចពិភពលោក ទោះបីជាប្រធានាធិបតីសហរដ្ឋអាមេរិក លោក Donald Trump បានសន្យានៅថ្ងៃព្រហស្បតិ៍ ទី១២ ខែមីនានេះថា នឹង «បញ្ចប់ការងារនេះ» ដោយនិយាយថានៅសល់តិចតួចណាស់សម្រាប់កងកម្លាំងអាមេរិកក្នុងការវាយប្រហារ។

សេចក្តីថ្លែងការណ៍ពីទីក្រុងតេអេរ៉ង់ បានធ្វើឡើង ខណៈមានការប្រយុទ្ធគ្នានៅជុំវិញច្រកសមុទ្រយុទ្ធសាស្ត្រ Hormuz ជាផ្លូវទឹកដឹកជញ្ជូនប្រេងមួយភាគប្រាំរបស់ពិភពលោក ដែលបានបញ្ជូនរលករង្គោះរង្គើឆ្លងកាត់ទីផ្សារថាមពល ជំរុញឱ្យមានការបញ្ចេញប្រេងបម្រុងសកលបន្ទាន់ និងការប្រើប្រាស់ស្តុកប្រេងរបស់សហរដ្ឋអាមេរិក។ តម្លៃប្រេងបានកើនឡើងចាប់តាំងពីថ្ងៃទី២៨ ខែកុម្ភៈ នៅពេលសហរដ្ឋអាមេរិក និងអ៊ីស្រាអែល បានបើកការវាយប្រហារតាមអាកាសលើអ៊ីរ៉ង់ ដែលបានសម្លាប់មេដឹកនាំកំពូលរបស់អ៊ីរ៉ង់ និងបានធ្វើឱ្យតំបន់មជ្ឈិមបូព៌ាធ្លាក់ចូលទៅក្នុងជម្លោះ។ ការវាយប្រហារដោយមីស៊ីល និងការវាយប្រហារដោយយានដ្រូនរបស់អ៊ីរ៉ង់ បានធ្វើឱ្យការដឹកជញ្ជូនឆ្លងកាត់ច្រកសមុទ្រ Hormuz ស្ទើរតែឈប់ដំណើរការ ដោយបង្ខំឱ្យរដ្ឋាភិបាលនានាប្រញាប់ប្រញាល់ទប់ស្កាត់ផលវិបាក ប៉ុន្តែលោក Trump បាននិយាយថា សហរដ្ឋអាមេរិកត្រូវតែ «បញ្ចប់ការងារនេះ»។

លោក Trump បាននិយាយ ខណៈកំពុងលើកឡើងអំពីប្រតិបត្តិការរបស់សហរដ្ឋអាមេរិក និងអ៊ីស្រាអែលថា «យើងមិនចង់ចាកចេញមុនទេ ហើយទីក្រុងវ៉ាស៊ីនតោន នឹងប្រើប្រាស់ប្រេងបម្រុងយុទ្ធសាស្ត្ររបស់សហរដ្ឋអាមេរិក«បន្តិចបន្តួច» ដើម្បីជួយធ្វើឱ្យទីផ្សារមានស្ថិរភាព ខណៈទីភ្នាក់ងារថាមពលអន្តរជាតិបានព្រមព្រៀងបញ្ចេញប្រេងចំនួន ៤០០ លានបារ៉ែល។ លោកប្រធានាធិបតី បាននិយាយថា «សង្គ្រាមអាចនឹងបញ្ចប់ក្នុងពេលឆាប់ៗនេះ។ កងកម្លាំងអាមេរិក បានវាយប្រហារនាវាដាក់មីនអ៊ីរ៉ង់ចំនួន២៨គ្រឿង ហើយ «គ្មានអ្វីនៅសល់ដើម្បីកំណត់គោលដៅទៀតទេ»។ លោកបាននិយាយនៅក្នុងបទសម្ភាសន៍ជាមួយ Axios ថា «នៅពេលណាដែលខ្ញុំចង់ឱ្យវាបញ្ចប់ វានឹងចប់»។ ទោះជាយ៉ាងណាក៏ដោយ យោធាអ៊ីស្រាអែលបានបង្ហាញសញ្ញាថា យុទ្ធនាការនេះមិនទាន់ចប់នៅឡើយទេ ហើយវានៅតែមានគោលដៅជាច្រើនទៀត។