ភាគហ៊ុននៅអាស៊ីបានធ្លាក់ចុះយ៉ាងទូលំទូលាយនៅថ្ងៃព្រហស្បតិ៍ ១២ មីនានេះ ខណៈតម្លៃប្រេងបានកើនឡើង ៩% ដល់ជាង១០០ ដុល្លារក្នុងមួយបារ៉ែល ដោយសាររបាយការណ៍អំពីនាវាជាច្រើនទៀតត្រូវបានវាយប្រហារនៅក្នុងដែនទឹកឈូងសមុទ្រ និងការបិទផ្លូវដឹកប្រេង ជាការកើនឡើងដែល នឹងជំរុញអតិផរណា និងរុញឱ្យមានកម្ចីប្រាក់ កើនឡើងខ្ពស់នៅទូទាំងពិភពលោក។

ក្រុមវិនិយោគិន មានការធូរស្រាលតិចតួចពីផែនការរបស់ទីភ្នាក់ងារថាមពលអន្តរជាតិក្នុងការបញ្ចេញប្រេងចំនួន៤០០លានបារ៉ែលពីប្រេងបម្រុងរបស់ខ្លួន ដែលជាចំណាត់ការដ៏ធំបំផុតនៅក្នុងប្រវត្តិសាស្ត្ររបស់ខ្លួន។ ជាផ្នែកមួយនៃរឿងនោះ សហរដ្ឋអាមេរិកបាននិយាយថា ខ្លួននឹងបញ្ចេញប្រេងចំនួន ១៧២ លានបារ៉ែលចាប់ពីសប្តាហ៍ក្រោយទៅ។

តម្លៃប្រេងគោលទាំងពីរបានកើនឡើង ៩% ដោយប្រេងឆៅ Brent មានតម្លៃ ១០០,២២ ដុល្លារក្នុងមួយបារ៉ែល ដោយបន្តកើនឡើងជាង ៤% នៅយប់រំលងអធ្រាត្រ ចំណែកតម្លៃប្រេង WTI របស់សហរដ្ឋអាមេរិកដែរ នោះ មានតម្លៃ ៩៥ ,៤១ ដុល្លារក្នុងមួយបារ៉ែល។

ភាគហ៊ុនបានធ្លាក់ចុះ ដោយសន្ទស្សន៍ភាគហ៊ុនអាស៊ីប៉ាស៊ីហ្វិកដ៏ធំទូលាយបំផុតរបស់ MSCI នៅខាងក្រៅប្រទេសជប៉ុនបានធ្លាក់ចុះ១,៦% ខណៈNikkei (.N225) បានធ្លាក់ចុះ១,៥%។

ភាគហ៊ុនចិន (.CSI300) បានធ្លាក់ចុះ ០,៦ % និងសន្ទស្សន៍ហ៊ុន Hang Seng របស់ហុងកុង         (.HSI) បានធ្លាក់ចុះ ១,២%។

ទាំងភាគហ៊ុន S&P 500 ទាំងភាគហ៊ុនNasdaq បានធ្លាក់ចុះ ១%។ ចំណែកភាគហ៊ុន EUROSTOXX 50 បានធ្លាក់ចុះ ១ % និងភាគហ៊ុន DAX របស់អាល្លឺម៉ង់ បានធ្លាក់ចុះ១,១%។

មន្ត្រីសន្តិសុខអ៊ីរ៉ាក់បាននិយាយនៅព្រឹកថ្ងៃព្រហស្បតិ៍នេះថា នាវាដឹកប្រេងឥន្ធនៈពីរគ្រឿងនៅក្នុងដែនទឹកអ៊ីរ៉ាក់ត្រូវបានវាយប្រហារដោយទូកអ៊ីរ៉ង់ដែលផ្ទុកដោយគ្រឿងផ្ទុះ ខណៈមន្ត្រីអ៊ីរ៉ាក់ម្នាក់បានប្រាប់ប្រព័ន្ធផ្សព្វផ្សាយរដ្ឋថា កំពង់ផែប្រេងរបស់ខ្លួន បានបញ្ឈប់ប្រតិបត្តិការទាំងស្រុង៕