ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធ ទី១១ ខែមីនា បានបរាជ័យក្នុងការអនុម័តសេចក្តីសម្រេច ព្រាងដោយរុស្ស៊ី ដែលអំពាវនាវឱ្យបញ្ឈប់អរិភាពជាបន្ទាន់នៅមជ្ឈិមបូព៌ា បន្ទាប់ពីវិធានការនេះខ្វះសំឡេងឆ្នោតដែលត្រូវការដើម្បីអនុម័ត ដោយមានសំឡេងគាំទ្រចំនួនបួន ប្រឆាំងចំនួនពីរ និង អនុប្បវាទចំនួនប្រាំបួន។

បន្ទាប់ពីការបោះឆ្នោត ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vassily Nebenzia បានចោទប្រកាន់ប្រទេសដែលប្រឆាំង ឬអនុប្បវាទ ថា បានបដិសេធការអំពាវនាវច្បាស់លាស់ដើម្បីបញ្ឈប់ការប្រយុទ្ធ និងដោះស្រាយជម្លោះដោយសន្តិវិធី។

លោកបាននិយាយថា ការប្តេជ្ញាចិត្តរបស់ពួកគេចំពោះច្បាប់អន្តរជាតិ និងសន្តិភាព គឺស្មើនឹង «គ្មានវោហាសាស្ត្រ» ហើយបានអះអាងថាឯកសាររបស់រុស្ស៊ីមិនផ្ទុយទៅនឹងគំនិតផ្តួចផ្តើមដាច់ដោយឡែកដែលគាំទ្រដោយប្រទេសបារ៉ែន និងរដ្ឋឈូងសមុទ្រ នោះទេ។

លោក Mike Waltz ប្រធានក្រុមប្រឹក្សាសន្តិសុខអង្គការសហប្រជាជាតិសម្រាប់ខែមីនា និងជាឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ បាននិយាយថា ទីក្រុងមូស្គូកំពុងធ្វើសកម្មភាពដើម្បីការពារអ៊ីរ៉ង់ ដោយច្រានចោលអ្វីដែលលោកហៅថាជាការប៉ុនប៉ងរបស់រុស្ស៊ីក្នុងការប្រដូចសកម្មភាពរបស់សហរដ្ឋអាមេរិកជាមួយនឹងការប្រព្រឹត្តរបស់អ៊ីរ៉ង់ នៅក្នុងតំបន់។ លោកបាននិយាយថា ទីក្រុងវ៉ាស៊ីនតោន នឹងបន្តកិច្ចខិតខំប្រឹងប្រែងដើម្បីឲ្យទីក្រុងតេអេរ៉ង់ទទួលខុសត្រូវចំពោះសកម្មភាពបង្កអស្ថិរភាព។