អគ្គនាយកក្រុមហ៊ុនដឹកជញ្ជូនធំជាងគេទីពីររបស់ពិភពលោក បានប្រាប់សារព័ត៌មាន BBC ក្នុងបទសម្ភាសន៍មួយថា កំណើនយ៉ាងគំហុកក្នុងថ្លៃដឹកជញ្ជូន ដោយសារតែជម្លោះនៅអ៊ីរ៉ង់ នឹងត្រូវរ៉ាប់រងដោយអ្នកប្រើប្រាស់ ក្នុងសញ្ញាមួយដែលបង្ហាញពីផលប៉ះពាល់ផ្នែកសេដ្ឋកិច្ចកាន់តែទូលំទូលាយ។

លោក Vincent Clerc នាយកប្រតិបត្តិក្រុមហ៊ុនដឹកជញ្ជូនលំដាប់ថ្នាក់ពិភពលោក Maersk របស់ដាណឺម៉ាក បាននិយាយថា ក្រុមហ៊ុនដឹកជញ្ជូនខ្នាតយក្សមួយនេះមានយន្តការរួចហើយ ដូច្នេះប្រសិនបើតម្លៃប្រេងឥន្ធនៈឡើងឬចុះ នោះការខាតបង់នឹងត្រូវបញ្ជូនទៅឱ្យអតិថិជនរបស់ក្រុមហ៊ុន។

លោកបន្តថា «ដូច្នេះនៅទីបំផុត ការកើនឡើងនៃថ្លៃចំណាយទាំងនេះនឹងបញ្ជូនទៅឱ្យអតិថិជន ហើយនឹងបន្តធ្លាក់ទៅលើអ្នកប្រើប្រាស់»។ គួរឱ្យដឹងថា ចាប់តាំងពីសង្គ្រាមរវាងអាមេរិក និងអ៊ីស្រាអែលជាមួយអ៊ីរ៉ង់ បានចាប់ផ្តើមមក តម្លៃប្រេងបានកើនឡើងជិតដល់ ១២០ ដុល្លារក្នុងមួយបារ៉ែល ក្រោយមកក៏បានធ្លាក់ចុះនៅចន្លោះលើឬក្រោម ១០០ដុល្លារ ដែលអត្រាប្រេងឆៅនេះគឺខ្ពស់ជាងជិត ២០% បើធៀបនឹងមុនពេលមានអរិភាព។

ក្រុមហ៊ុន Maersk បានដើរតួនាទីយ៉ាងសំខាន់ក្នុងការដឹកជញ្ជូនទំនិញនានា នៅជុំវិញពិភពលោក។ សង្គ្រាមបានធ្វើឱ្យការដឹកជញ្ជូនតាមរយៈផ្លូវសមុទ្រហ័រមូសដ៏សំខាន់ ត្រូវជាប់គាំង។ មុនពេលមានជម្លោះ ចំណែកប្រហែលមួយភាគប្រាំនៃការផ្គត់ផ្គង់ប្រេងទូទាំងពិភពលោក បានធ្វើដំណើរតាមផ្លូវទឹនោះ។

ក្នុងពេលជាមួយគ្នានេះ ក្រុមហ៊ុនដឹកជញ្ជូនតាមផ្លូវទឹកធំៗបំផុតផ្សេងទៀតរបស់ពិភពលោក ក៏កំពុងជៀសវាងការឆ្លងកាត់សមុទ្រក្រហម ដោយសារតែការគំរាមកំហែងសន្តិសុខ។ បញ្ហានេះកំពុងបង្កឱ្យមានការរំខានយ៉ាងទូលំទូលាយដល់សេដ្ឋកិច្ចពិភពលោក ដោយក្រុមហ៊ុនដូចជា Maersk បានបញ្ជូននាវារបស់ខ្លួនឱ្យធ្វើដំណើរទៅផ្លូវដែលឆ្ងាយជាង និងចំណាយប្រាក់ច្រើនជាងមុន នៅជុំវិញឆ្នេរសមុទ្រអាត្លង់ទិកនៃឧបទ្វីប Cape របស់អាហ្វ្រិកខាងត្បូង៕