បញ្ជាការកណ្តាលរបស់សហរដ្ឋអាមេរិក (CENTCOM) បានឱ្យដឹងកាលពីថ្ងៃពុធ (១១ មីនា) ថា យោធាអាមេរិក បានវាយប្រហារលើគោលដៅជាង ៥.៥០០កន្លែងក្នុងប្រទេសអ៊ីរ៉ង់ រួមទាំងកម្ទេចនាវាជាង ៦០គ្រឿង ចាប់តាំងពីប្រតិបត្តិការប្រឆាំងនឹងទីក្រុងតេអេរ៉ង់ បានចាប់ផ្តើមកាលពីចុងខែមុនមក ដោយក្នុងនោះក៏មានការវាយប្រហារលើរោងចក្រផលិតមីស៊ីលបាលីស្ទីកដ៏ធំរបស់អ៊ីរ៉ង់ផងដែរ។

មេបញ្ជាការ CENTCOM លោកឧត្តមនាវីឯក Brad Cooper បានផ្តល់បច្ចុប្បន្នភាពពីប្រតិបត្តិការ «Operation Epic Fury» របស់អាមេរិក ដោយបញ្ជាក់ជាថ្មីថា ប្រតិបត្តិការនេះមានបំណង «បញ្ចប់សមត្ថភាពរបស់អ៊ីរ៉ង់» ក្នុងការបង្អួតអំណាច និង «រំខានយាយី» ដល់ការដឹកជញ្ជូនតាមនាវាក្នុងច្រកសមុទ្រហ័រមូស ដែលជាផ្លូវទឹកយុទ្ធសាស្ត្រដ៏សំខាន់ សម្រាប់ការផ្គត់ផ្គង់ប្រេងប្រហែលមួយភាគប្រាំរបស់ពិភពលោក។ ដោយលើកឡើងពីការគ្រប់គ្រងដែនអាកាសអ៊ីរ៉ង់ លោក Cooper សង្កត់ធ្ងន់ថា អ៊ីរ៉ង់ កំពុងតែបាត់បង់សមត្ថភាពដែនអាកាសហើយ។

យោងតាមប្រព័ន្ធផ្សព្វផ្សាយអ៊ីរ៉ង់ សមាជិកជាន់ខ្ពស់មួយរូបនៃកងកម្លាំងឆ្មាំបដិវត្តន៍អ៊ិស្លាមអ៊ីរ៉ង់ បានព្រមានថា រាល់នាវាដែលធ្វើដំណើរឆ្លងកាត់ច្រកសមុទ្រដែលមានប្រវែងជាង ១៦០គីឡូម៉ែត្រនេះ នឹងត្រូវក្លាយជាគោលដៅវាយប្រហារ និងប្រឈមនឹងការប្រើប្រាស់កម្លាំងយោធាដ៏កាចសាហាវ។

លោក Cooper បានបន្ថែមថា យោធាអាមេរិក បានកម្ទេចនាវាចម្បាំងប្រភេទ Soleimani ចុងក្រោយគេបង្អស់ ក្នុងចំណោមនាវាប្រភេទនេះទាំង ៤គ្រឿងរបស់អ៊ីរ៉ង់។ ការវាយប្រហារយោធា ដែលមេបញ្ជាការរូបនេះពណ៌នាថា «មិនអាចស្មានទុកជាមុនបាន មានភាពរស់រវើក និងម៉ឺងម៉ាត់» នឹងនៅតែបន្តដាក់គោលដៅលើមូលដ្ឋានឧស្សាហកម្មការពារជាតិរបស់អ៊ីរ៉ង់។ ទីភ្នាក់ងារសារព័ត៌មាន Bloomberg បានរាយការណ៍ដោយដកស្រង់សម្តីមន្ត្រីអាមេរិកថា អ៊ីរ៉ង់បានបាត់បង់ជើងទម្របាញ់មីស៊ីលជាង ៩០% ក្នុងអំឡុងប្រតិបត្តិការយោធារបស់អាមេរិក និងអ៊ីស្រាអែល៕