ប្រមុខកងទ័ពអាល្លឺម៉ង់ បាននិយាយថា ក្រុមគ្រូបង្វឹកយោធាអ៊ុយក្រែន នឹងជួយដល់យោធាអាល្លឺម៉ង់ ឱ្យសម្រេចបាននូវគោលដៅនៃការត្រៀមខ្លួនការពារប្រឆាំងនឹងការវាយប្រហារណាមួយរបស់រុស្ស៊ី ទៅលើអង្គការណាតូ នៅឆ្នាំ២០២៩ ដែលនេះបង្ហាញពីការផ្លាស់ប្ដូរតួនាទី ដោយសារកាលពីមុន គឺកងទ័ពលោកខាងលិចទេដែលជាអ្នកបង្វឹកកងកម្លាំងអ៊ុយក្រែន។

ទីក្រុងប៊ែរឡាំង និងទីក្រុងគីវ បានព្រមព្រៀងគ្នាកាលពីខែកុម្ភៈថា អ៊ុយក្រែននឹងបញ្ជូនគ្រូបង្វឹកយោធាទៅកាន់សាលាយោធាអាល្លឺម៉ង់ ដើម្បីបង្រៀននូវមេរៀនដែលពួកគេបានរៀនសូត្រពីការប្រយុទ្ធប្រឆាំងនឹងសង្រ្គាមរបស់រុស្ស៊ី អស់រយៈពេលជាច្រើនឆ្នាំមកនេះ។

លោកឧត្តមសេនីយ៍ឯក Christian Freuding ប្រធានកងទ័ពអាល្លឺម៉ង់ បានប្រាប់សារព័ត៌មានរ៉យទ័រនៅក្នុងបទសម្ភាសន៍មួយថា «អាល្លឺម៉ង់មានការរំពឹងទុកខ្ពស់ ព្រោះថាយោធាអ៊ុយក្រែនបច្ចុប្បន្ន គឺជាយោធាតែមួយគត់នៅលើពិភពលោក ដែលមានបទពិសោធជួរមុខប្រឆាំងនឹងរុស្ស៊ី»។

នៅពេលត្រូវសាកសួរថា តើគ្រូបង្វឹកអ៊ុយក្រែននឹងចូលរួមចំណែកដល់អ្វីខ្លះ លោកបានសំដៅទៅលើការវាយតម្លៃដោយទីភ្នាក់ងារចារកម្មអាល្លឺម៉ង់ និងលោកខាងលិចផ្សេងទៀតដែលថា រុស្ស៊ីអាចត្រៀមខ្លួនរួចរាល់សម្រាប់ការវាយប្រហារទ្រង់ទ្រាយធំលើសម្ព័ន្ធយោធាណាតូ នៅឆ្នាំ២០២៩។

មិនមែនមានតែអាល្លឺម៉ង់ទេ ដែលទាញយកបទពិសោធរបស់ទីក្រុងគីវ ដោយលោកប្រធានាធិបតីអ៊ុយក្រែន Volodymyr Zelenskyy កាលពីថ្ងៃព្រហស្បតិ៍សប្ដាហ៍មុន បានសន្យាថានឹងផ្តល់ជំនួយឱ្យសហរដ្ឋអាមេរិក ក្នុងការទប់ទល់ជាមួយយានដ្រូនរបស់អ៊ីរ៉ង់ នៅមជ្ឈិមបូព៌ា៕