ស្ថាប័នគ្រប់គ្រងប្រព័ន្ធផ្សព្វផ្សាយ និងឯកជនភាពរបស់ចក្រភពអង់គ្លេស នៅថ្ងៃព្រហស្បតិ៍ (១២ មីនា) នេះ បានទាមទារឱ្យវេទិកាប្រព័ន្ធផ្សព្វផ្សាយសង្គមធំៗ ដូចជាក្រុមហ៊ុន Meta ក្រុមហ៊ុន TikTok ក្រុមហ៊ុន Snap និងក្រុមហ៊ុន YouTube ជាដើម ត្រូវតែប្រឹងប្រែងបន្ថែមទៀតដើម្បីរារាំងកុមារមិនឱ្យប្រើប្រាស់សេវាកម្មរបស់ពួកគេ ដោយព្រមានថា ក្រុមហ៊ុននានាកំពុងតែបរាជ័យក្នុងការអនុវត្តច្បាប់អាយុអប្បបរមារបស់ខ្លួន ហើយបើនៅតែដូច្នេះ រដ្ឋាភិបាលនឹងចាត់វិធានការ។

អង់គ្លេស បាននិងកំពុងថ្លឹងថ្លែងការរឹតបន្តឹងលើកុមារ ក្នុងការប្រើប្រាស់ប្រព័ន្ធផ្សព្វផ្សាយសង្គម ដោយរដ្ឋាភិបាលកំពុងពិចារណាហាមឃាត់កុមារអាយុក្រោម ១៦ឆ្នាំ មិនឱ្យប្រើប្រាស់វេទិកាបែបនេះ ដែលចង់ដើរតាមជំហានរបស់អូស្ត្រាលី។ ការិយាល័យទំនាក់ទំនងរបស់អង់គ្លេស (ហៅកាត់ថា Ofcom) និងការិយាល័យស្នងការព័ត៌មាន បាននិយាយថា ពួកគេបារម្ភកាន់តែខ្លាំងឡើងអំពីមុខងារបណ្ដាញសង្គមដែលធ្វើឱ្យកុមារប្រឈមនឹងខ្លឹមសារដែលបង្កគ្រោះថ្នាក់ ឬធ្វើឱ្យញៀន។

លោកស្រី Melanie Dawes ប្រធានការិយាល័យ Ofcom បាននិយាយថា «សេវាកម្មអនឡាញទាំងនេះគឺជាឈ្មោះដែលគ្រប់គ្នាស្គាល់ ប៉ុន្តែពួកគេកំពុងបរាជ័យក្នុងការដាក់សុវត្ថិភាពរបស់កុមារជាសំខាន់ ហើយបណ្ដាញសង្គមទាំងនោះត្រូវតែកែប្រែឱ្យឆាប់ បើមិនដូច្នោះទេ Ofcom នឹងចាត់វិធានការ»។

នៅក្នុងដំណាក់កាលអនុវត្តចុងក្រោយបំផុតនៃច្បាប់សុវត្ថិភាពអនឡាញរបស់ចក្រភពអង់គ្លេស ការិយាល័យ Ofcom បានទុកពេលដល់ថ្ងៃទី៣០ ខែមេសា សម្រាប់បណ្ដាញសង្គមដូចជា Facebook និង Instagram ដែលទាំងពីរនេះជាកម្មសិទ្ធិរបស់ក្រុមហ៊ុន Meta ក៏ដូចជាកម្មវិធី Roblox កម្មវិធី Snapchat កម្មវិធី TikTok របស់ក្រុមហ៊ុន ByteDance និងកម្មវិធី YouTube របស់ Alphabet ឱ្យបង្ហាញពីមធ្យោបាយនានាដែលពួកគេនឹងរឹតបន្តឹងការត្រួតពិនិត្យអាយុ និងវិធានការដាក់កម្រិតផ្សេងទៀត ដើម្បីការពារអនីតិជននៅក្នុងបណ្ដាញសង្គម៕