ក្រសួងការបរទេសរុស្ស៊ី កាលពីថ្ងៃពុធ (ទី១១ ខែមីនា ឆ្នាំ២០២៦) បានថ្កោលទោសការវាយប្រហារបណ្ដាលឲ្យមានអ្នកស្លាប់ដោយអ៊ុយក្រែន ទៅលើទីក្រុង Bryansk ភាគខាងលិចនៃប្រទេសរុស្ស៊ីថា ជា «ការវាយប្រហារភេរវកម្ម» ហើយបានចោទប្រកាន់ចក្រភពអង់គ្លេសដែលមីស៊ីលរបស់ខ្លួនត្រូវបានប្រើប្រាស់ ថា បានបំពានលើបទដ្ឋានច្បាប់អន្តរជាតិ។

នៅក្នុងសេចក្តីថ្លែងការណ៍មួយ ក្រសួងបានលើកឡើងថា ការវាយប្រហារនេះមានបំណងបំផ្លាញកិច្ចខិតខំប្រឹងប្រែងឆ្ពោះទៅរកដំណើរការសន្តិភាព និងធ្វើឲ្យជម្លោះកាន់តែរីកធំឡើង។

អភិបាលតំបន់ Bryansk លោក Alexander Bogomaz បាននិយាយកាលពីថ្ងៃទី១១ ខែមីនាថា មនុស្សម្នាក់ទៀត បានបាត់បង់ជីវិតនៅក្នុងការវាយប្រហារនេះ ដែលនាំឲ្យចំនួនអ្នកស្លាប់កើនឡើងដល់ ៧នាក់យ៉ាងតិច។

លោក Bogomaz បានប្រាប់ឲ្យដឹងមុននេះថា ការវាយប្រហារកាលពីថ្ងៃទី១០ ខែមីនា បានបណ្ដាលឲ្យមនុស្ស ៤២នាក់រងរបួស តែមិនបាននិយាយថា អ្វីត្រូវបានវាយប្រហារឡើយ។

អ៊ុយក្រែនបានឲ្យដឹងថា ខ្លួនបានវាយប្រហាររោងចក្រសំខាន់មួយ ដែលផលិតគ្រឿងបន្លាស់មីស៊ីល។ ទីក្រុងមូស្គូបានចោទប្រកាន់ទីក្រុងគីវថា មានចេតនាកំណត់គោលដៅលើជនស៊ីវិល៕