ម្ចាស់នាវាបាននិយាយថា សមាជិកនាវិក ៣នាក់ ដែល «ត្រូវបានគេជឿថា ជាប់» នៅលើនាវាដឹកទំនិញថៃ ដែលរងការវាយប្រហារដោយមីស៊ីល ខណៈពេលកំពុងធ្វើដំណើរឆ្លងកាត់ច្រកសមុទ្រ Hormuz ដ៏សំខាន់ មិនទាន់ត្រូវបានជួយសង្គ្រោះនៅឡើយទេ គិតត្រឹមថ្ងៃព្រហស្បតិ៍ (ទី១២ ខែមីនា) នេះស។

ឆ្មាំបដិវត្តន៍អ៊ីរ៉ង់ បានឲ្យដឹងកាលពីថ្ងៃពុធថា ពួកគេបានវាយប្រហារនាវា Mayuree Naree ដែលចុះបញ្ជីជាជនជាតិថៃ ក៏ដូចជានាវាដែលមានទង់ជាតិលីបេរីយ៉ា នៅក្នុងច្រកសមុទ្រ ដោយសារតែនាវាទាំងនេះមិនបានអើពើនឹង «ការព្រមាន»។

នាវាថៃត្រូវបានវាយប្រហារកាលពីព្រឹកថ្ងៃពុធ ខណៈពេលកំពុងធ្វើដំណើរឆ្លងកាត់ផ្លូវទឹកឈូងសមុទ្រ ក្រោយចាកចេញពីកំពង់ផែ Khalifa ក្នុងប្រទេសអេមីរ៉ាតអារ៉ាប់រួម។ ក្រុមហ៊ុនដឹកជញ្ជូនថៃ Precious Shipping បានឲ្យដឹងនៅក្នុងសេចក្តីថ្លែងការណ៍មួយកាលពីល្ងាចថ្ងៃពុធថា មីស៊ីល ២គ្រាប់ បានបំផ្លាញបន្ទប់ម៉ាស៊ីនរបស់នាវា Mayuree Naree និងបង្កឲ្យមានអគ្គិភ័យ។

ក្រុមហ៊ុននេះបានបញ្ជាក់ថា «សមាជិកនាវិក ៣នាក់ត្រូវបានរាយការណ៍ថា បាត់ខ្លួន ហើយត្រូវបានគេជឿថា ជាប់នៅក្នុងបន្ទប់ម៉ាស៊ីន» ដោយបន្ថែមថា អាជ្ញាធរកំពុងធ្វើការ ដើម្បីជួយសង្គ្រោះពួកគេ។ តែនាយកគ្រប់គ្រងក្រុមហ៊ុន លោក Khalid Hashim បានប្រាប់សារប័ត៌មាន AFP នៅថ្ងៃព្រហស្បតិ៍នេះថា «គួរឲ្យសោកស្ដាយ វានៅតែរកមិនឃើញនាវិកទាំងនោះដដែល»។

កងទ័ពជើងទឹកថៃ បានប្រាប់កាលពីថ្ងៃពុធថា កងទ័ពជើងទឹកអូម៉ង់ បានជួយសង្គ្រោះនាវិកចំនួន ២០នាក់ ហើយកិច្ចប្រឹងប្រែងកំពុងដំណើរការ ដើម្បីជួយសង្គ្រោះនាវិក ៣នាក់ទៀត។ ក្រសួងការបរទេសថៃ បានបញ្ជាក់ថា សមាជិកនាវិកទាំង ២៣នាក់នោះ គឺជាជនជាតិថៃ៕