ការតម្រង់ជួរយ៉ាងវែង កើតមាននៅក្រៅទីភ្នាក់ងារហ្គាសនាថ្ងៃព្រហស្បតិ៍នេះ ស្ថិតនៅទីក្រុងភាគខាងជើង Noida ប្រទេសឥណ្ឌា ស្របពេលក្តីបារម្ភកើនឡើងចំពោះការអាក់ខានផ្គត់ផ្គង់ថាមពល និងការព្រួយបារម្ភពីកង្វះខាតឧស្ម័នធម្មជាតិ ។

ឥណ្ឌាដែលជាសមាជិករបស់ទីភ្នាក់ងារថាមពលអន្តរជាតិ(IEA)នោះ បានមើលឃើញការផ្គត់ផ្គង់ប្រេងឆៅ ហ្គាស(LPG) និងឧស្ម័នធម្មជាតិរាវ (LNG) ត្រូវបានអាក់ខានដោយសារវិបត្តិដឹកជញ្ជូនសកលបង្កឡើងដោយសារសង្រ្គាមនៅតំបន់មជ្ឈិមបូព៌ា ។

ឥណ្ឌានាំចូលប្រេងរបស់ខ្លួនប្រហែល ៤០ភាគរយពីតំបន់មជ្ឈិមបូព៌ា កាត់តាមច្រកសមុទ្រ Hormuz ។ ពួកគេគឺជាប្រទេសនាំចូលហ្គាស LPG ធំបំផុតលំដាប់ទី ២របស់ពិភពលោក ។

កាលពីថ្ងៃពុធម្សិលមិញ ប្រទេសនៅអាស៊ីខាងត្បូងមួយនេះ បានស្នើសុំឲ្យអ្នកប្រើប្រាស់មិនត្រូវតក់ស្លត់នោះទេ ពីការផ្គត់ផ្គង់ហ្គាស ហើយត្រូវចេះសន្សំសំចៃថាមពល ស្របពេលឥណ្ឌាពិបាកឈានដល់តម្រូវការក្នុងស្រុក ។

រដ្ឋាភិបាលបានប្រើប្រាស់អំណាចបន្ទាន់ផងដែរ បញ្ជាឲ្យរោងចក្រចម្រាញ់ប្រេង ផលិតហ្គាស LPGក្នុងកម្រិតអតិបរមា ហើយនិងកាត់បន្ថយការលក់ដល់ឧស្សាហកម្ម ៕