សភាកូរ៉េខាងត្បូង បានអនុម័តសេចក្តីព្រាងច្បាប់ពិសេសមួយ នៅថ្ងៃព្រហស្បតិ៍ (ទី ១២ ខែមីនា ឆ្នាំ២០២៦) នេះ ដើម្បីបើកផ្លូវដល់ការប្តេជ្ញាចិត្តវិនិយោគនូវទឹកប្រាក់ ៣៥០ពាន់លានដុល្លាររបស់ទីក្រុងសេអ៊ូល នៅក្នុងឧស្សាហកម្មយុទ្ធសាស្ត្ររបស់សហរដ្ឋអាមេរិក ក្រោមកិច្ចព្រមព្រៀងពាណិជ្ជកម្មដែលបានឈានដល់កាលពីឆ្នាំមុន។

ច្បាប់នេះអនុវត្តកិច្ចព្រមព្រៀងពាណិជ្ជកម្មដែលបានចុះហត្ថលេខាក្នុងខែវិច្ឆិកា ឆ្នាំ២០២៥ ដែលកូរ៉េខាងត្បូង បានយល់ព្រមវិនិយោគ ២០០ពាន់លានដុល្លារ នៅក្នុងឧស្សាហកម្មយុទ្ធសាស្ត្ររបស់សហរដ្ឋអាមេរិក និង ១៥០ពាន់លានដុល្លារ នៅក្នុងកិច្ចសហប្រតិបត្តិការ ទាក់ទងនឹងការសាងសង់នាវា ជាថ្នូរនឹងការទទួលបានលក្ខខណ្ឌពន្ធអំណោយផលបន្ថែមទៀត។

រដ្ឋសភាបានអនុម័តសេចក្ដីព្រាងច្បាប់នេះ ដោយមានការគាំទ្រពីគណបក្សមានទាំង២ នៅក្នុងសម័យប្រជុំពេញអង្គ នាថ្ងៃព្រហស្បតិ៍នេះ។ ដោយត្រូវចូលជាធរមាន ក្រោយរយៈពេលប្រហែល ៣ខែ ច្បាប់នេះនឹងបម្រើជាមូលដ្ឋានដល់ការបង្កើតសាជីវកម្មវិនិយោគគាំទ្រដោយរដ្ឋដែលមានដើមទុន ២សែនកោដិវ៉ុន (១,៤ពាន់លានដុល្លារ) និងមូលនិធិវិនិយោគយុទ្ធសាស្ត្រ។

សេចក្តីព្រាងច្បាប់នេះ យកការសាងសង់នាវា សម្ភារៈអេឡិចត្រូនិក ឱសថ រ៉ែសំខាន់ៗ ថាមពល បញ្ញាសិប្បនិម្មិត (AI) និងកុំព្យួទ័រកង់ទិច ជាវិស័យវិនិយោគអាទិភាព ខណៈដែលវិស័យផ្សេងទៀត អាចត្រូវបានបន្ថែមដោយក្រឹត្យប្រធានាធិបតី៕