លោក Liu Zhongmin សាស្ត្រាចារ្យនៅវិទ្យាស្ថានសិក្សាមជ្ឈិមបូព៌ានៃសាកលវិទ្យាល័យសិក្សាអន្តរជាតិសៀងហៃ បានប្រាប់កាសែត Global Timesថា ភាពតានតឹងនៅច្រកសមុទ្រ Hormuz ដែលបណ្តាលមកពីប្រតិបត្តិការរបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ ទំនងជាមិនផ្តល់ផលប្រយោជន៍ដល់ទីក្រុងវ៉ាស៊ីនតោន ឬទីក្រុងតេអេរ៉ង់ទេ។ 

លោក Liu បានចង្អុលបង្ហាញថា៖«ភាពតានតឹងជាបន្តបន្ទាប់នៅច្រកសមុទ្រ Hormuz គឺជាដាវមុខពីរសម្រាប់ភាគីទាំងពីរ៖ សម្រាប់សហរដ្ឋអាមេរិក វាគំរាមកំហែងដល់សន្តិសុខថាមពល និងសេដ្ឋកិច្ច។ ចំណែកអ៊ីរ៉ង់ វាប៉ះពាល់ដល់ទំនាក់ទំនងរបស់ខ្លួន ជាមួយបណ្តាប្រទេសឈូងសមុទ្រ»។

យោងតាមអ្នកជំនាញរូបនេះ ជម្លោះដែលមានតម្លៃខ្ពស់ប្រភេទនេះ មិនអាចស្ថិតស្ថេរសម្រាប់ភាគីទាំងពីរ និងសម្រាប់ប្រទេសនៅក្នុងតំបន់នោះទេ។ លោក Liu បានសង្កត់ធ្ងន់ថា ទីក្រុងប៉េកាំងរក្សាទំនាក់ទំនងមិត្តភាពជាមួយទាំងអ៊ីរ៉ង់ និងបណ្តាប្រទេសអារ៉ាប់។ ដោយនិយាយដូច្នេះ ប្រទេសចិនអាច «ដើរតួនាទីយ៉ាងសំខាន់ ក្នុងការជួយបន្ធូរបន្ថយភាពតានតឹង និងបញ្ហាប្រឈមមួយចំនួន ជាមួយភាគីផ្សេងៗ»។

លោក Zhu Yongbiao អ្នកជំនាញមជ្ឈិមបូព៌ានៅសាកលវិទ្យាល័យ Lanzhou បានសង្កេតឃើញថា ការទូតរបស់ចិននៅមជ្ឈិមបូព៌ាមាន «វិសាលភាពធំទូលាយ និងស៊ីជម្រៅ»។ យោងតាមអ្នកវិភាគរូបនេះ     «ប្រទេសចិនមានមូលដ្ឋានរឹងមាំនៃការជឿទុកចិត្តជាមួយបណ្តាប្រទេសមជ្ឈិមបូព៌ាពាក់ព័ន្ធ»។ លោក Zhu បានពន្យល់ថា៖«ប្រទេសចិនបានប្រកាន់ខ្ជាប់ជានិច្ចក្នុងការលើកកម្ពស់ការចរចាសន្តិភាព និងការផ្សះផ្សាក្នុងបញ្ហាតំបន់ និងអន្តរជាតិ ដោយទទួលបានភាពជឿជាក់កម្រិតខ្ពស់»៕