លោកយាយ Mariam Hassan Rida វ័យ ៧៣ឆ្នាំ បានរត់ភៀសខ្លួនចេញពីទីក្រុងកំណើត Hannawiyah ស្ថិតនៅតំបន់ភាគខាងត្បូងលីបង់កាលពីសប្តាហ៍មុន ។ លោកយាយបាននិយាយរៀបរាប់ពីស្ថានភាពដែលគាត់បានចាកចេញពីផ្ទះនៅពេលយប់ ជាមួយនឹងអ្នកជិតខាងរបស់គាត់ ។

លោកយាយ Rida និយាយថា គាត់បានចំណាយពេលមួយយប់ ក្នុងសណ្ឋាគារ ប៉ុន្តែគាត់គ្មានប្រាក់បន្តស្នាក់នៅទីនោះបានទៀតទេ ដូច្នេះហើយគាត់សុខចិត្តសម្រាកតាមផ្លូវជាច្រើនថ្ងៃ មុនពេលគាត់ទៅដល់ជម្រក ។

លោកយាយ Rida មកតែម្នាក់ឯងទេ ដោយសារគាត់គ្មានប្តី និងកូន ។ ផ្ទះរបស់គាត់ បានរងការខូចខាតរួចទៅហើយ អំឡុងសង្រ្គាមឆ្នាំ ២០២៤ រវាងក្រុមហេសបូឡា និងអ៊ីស្រាអែល ។ លោកយាយនិយាយថា គាត់បានជួសជុលផ្ទះរបស់គាត់តាមលទ្ធភាពដែលអាចធ្វើទៅបាន ប៉ុន្តែក្រោយពីជម្លៀសខ្លួនម្តងទៀត គាត់មិនដឹងថា ផ្ទះរបស់ក្លាយទៅជាយ៉ាងណានោះទេ ។

បច្ចុប្បន្នលោកយាយសម្រាកនៅលើពូកក្រាលលើឥដ្ឋក្នុងសាលារៀនដែលធ្វើជាជម្រក ដោយគ្មានខ្នើយ ឬសាច់ញាតិនៅក្បែរគាត់នោះទេ ។

លោកយាយ Rida និយាយទាំងទឹកភ្នែកថា គាត់ចង់ត្រឡប់ទៅកាន់ទីក្រុងកំណើតរបស់គាត់វិញ ។ ខ្ញុំនៅតាមផ្លូវបែបនេះ វាមិនល្អនោះទេ ។

លោកយាយបន្តថា គាត់ខ្លាចក្រែងមានការវាយប្រហារនៅទីនេះ ហើយនិងការវាយប្រហារនៅទីនោះ ។ គាត់មិនដឹងថា កន្លែងណាគួរទៅនោះទេ សូមអ្នកប្រាប់គាត់ផង ទុក្ខលំបាក និងភាពអត់ឃ្លានកើតមាននៅទីនេះ ។

អ៊ីស្រាអែលបានបើកការវាយប្រហារលើក្រុមហេសបូឡាគាំទ្រដោយអ៊ីរ៉ង់ ក្រោយក្រុមមួយនេះ បើកការវាយប្រហារកាលពីថ្ងៃទី ២ ខែមីនា ជាការសងសឹកចំពោះការសម្លាប់មេដឹកនាំកំពូលអ៊ីរ៉ង់នៅពេលចាប់ផ្តើមសង្រ្គាមអាមេរិក-អ៊ីស្រាអែលលើអ៊ីរ៉ង់ ។

យោងតាមការអះអាងរបស់អាជ្ញាធរលីបង់ បានឲ្យដឹងថា ការវាយប្រហាររបស់អ៊ីស្រាអែល បានសម្លាប់មនុស្ស ៦០០នាក់ នៅលីបង់ និងមនុស្ស ៧០ម៉ឺននាក់ផ្សេងទៀត ជម្លៀសខ្លួន ៕