សហរដ្ឋអាមេរិក បានបើកការិយាល័យដំបូងរបស់ក្រុមស៊ើបអង្កេត FBI នៅប្រទេសអេក្វាទ័រ ។ នេះបើយោងតាមការអះអាងរបស់ស្ថានទូតសហរដ្ឋអាមេរិកប្រចាំនៅទីក្រុង Quito បានឲ្យដឹងកាលពីថ្ងៃពុធ ។

ស្ថានទូតអាមេរិកនៅប្រទេសអេក្វាទ័រ និយាយនៅក្នុងសារបង្ហោះលើបណ្តាញព័ត៌មានសង្គមថា ការិយាល័យនេះ មានគោលបំណងធ្វើការជាមួយក្រុមមន្រ្តីអេក្វាទ័រ ដើម្បីប្រយុទ្ធប្រឆាំងនឹងការជួយដូរគ្រឿងញៀន ហើយនិងអាវុធខុសច្បាប់ រួមទាំងការលាងលុយកខ្វក់ និងភេរវកម្មហិរញ្ញវត្ថុផងដែរ ។

រដ្ឋមន្រ្តីក្រសួងមហាផ្ទៃអេក្វាទ័រលោក John Reimber និយាយប្រាប់ក្រុមអ្នកសារព័ត៌មានថា ការសម្របសម្រួលជាមួយការិយាល័យ FBI នឹងចាប់ផ្តើមភ្លាមៗ ក្រោយកិច្ចខិតខំរួមគ្នាជាមុនជាមួយសហរដ្ឋអាមេរិក ។

លោកបន្តថា ភាពជាដៃគូជាមួយក្រុម FBI នឹងពង្រឹងសមត្ថភាពបច្ចេកទេស និងប្រតិបត្តិការរបស់នគរបាលជាតិអេក្វាទ័រ ជំរុញយុទ្ធសាស្រ្តរដ្ឋ ដើម្បីចូលរួមស៊ើបអង្កេត និងកម្ទេចរចនាសម្ព័ន្ធឧក្រិដ្ឋកម្មទាំងអស់នេះ ៕