នៅថ្ងៃព្រហស្បតិ៍ (ទី១២ ខែមីនា ឆ្នាំ២០២៦) នេះ ប្រភពមួយពីរដ្ឋាភិបាលឥណ្ឌា បាននិយាយថា អ៊ីរ៉ង់នឹងអនុញ្ញាតឲ្យនាវាដឹកប្រេងមានទង់ជាតិឥណ្ឌា ឆ្លងកាត់ច្រកសមុទ្រ Hormuz ដែលជាផ្លូវសម្រាប់ការដឹកជញ្ជូន ៤០ភាគរយនៃការនាំចូលប្រេងឆៅរបស់ប្រទេសអាស៊ីខាងត្បូង ប៉ុន្តែប្រភពខាងក្រៅមួយពីអ៊ីរ៉ង់ បានបដិសេធថា កិច្ចព្រមព្រៀងបែបនេះ មិនត្រូវបានធ្វើឡើងឡើយ។

ក្រសួងការបរទេសឥណ្ឌា និងស្ថានទូតអ៊ីរ៉ង់ ប្រចាំទីក្រុងញូវដេលី មិនបានឆ្លើយតបភ្លាមៗនោះទេ ចំពោះសំណើសុំការអត្ថាធិប្បាយ។ ហើយប្រភពឥណ្ឌាដែលត្រូវបានផ្ដល់ព័ត៌មានអំពីបញ្ហានេះ បានបដិសេធមិនបង្ហាញអត្តសញ្ញាណ ដោយលើកឡើងពីការមិនមានការអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ ខណៈដែលប្រភពពីអ៊ីរ៉ង់ បានបញ្ជាក់ថា បញ្ហានេះជាករណីរសើប។

ប្រភពពីឥណ្ឌា បានឲ្យដឹងទៀតថា នាវាដឹកប្រេងមានទង់ជាតិបរទេស ២គ្រឿង ដែលគេជឿថា មានគោលដៅទៅកាន់ប្រទេសឥណ្ឌា ទើបតែបានឆ្លងកាត់ច្រកសមុទ្រនេះ ហើយអ៊ីរ៉ង់ បានផ្តល់ការធានាដល់ការឆ្លងកាត់ដោយសុវត្ថិភាព សម្រាប់នាវាមានទង់ជាតិឥណ្ឌា បន្ទាប់ពីរដ្ឋមន្ត្រីការបរទេសនៃប្រទេសទាំង២ បានជជែកតាមទូរស័ព្ទ កាលពីយប់ថ្ងៃទី១០ ខែមីនា។

យ៉ាងណាក្ដី ប្រភពដដែលបានឲ្យដឹងបន្ថែមថា ស្ថានភាពនៅតែមិនប្រាកដប្រជាឡើយ ដោយមិនមានព័ត៌មានច្បាស់លាស់ អំពីរបៀបដែលការណែនាំត្រូវបានបញ្ជូនបន្តទៅទូទាំងកម្រិតនៃរដ្ឋបាលអ៊ីរ៉ង់។

នៅក្នុងសេចក្តីថ្លែងការណ៍មួយបន្ទាប់ពីមានការចរចា រវាងលោក S. Jaishankar របស់ឥណ្ឌា និងសមភាគីរបស់លោក គឺលោក Seyed Abbas Araghchi ក្រសួងការបរទេសអ៊ីរ៉ង់ បានឲ្យដឹងថា សហរដ្ឋអាមេរិកគួរតែទទួលខុសត្រូវ ចំពោះ «ស្ថានភាពអសន្តិសុខ និងបញ្ហាដែលកើតឡើង សម្រាប់ការដឹកជញ្ជូនទំនិញនៅក្នុងឈូងសមុទ្រពែរ្ស»។ ភាគីទាំង២ មិនបានលើកឡើងពីកិច្ចព្រមព្រៀងណាមួយ ស្ដីពីការអនុញ្ញាតឲ្យមានការឆ្លងកាត់ដោយសុវត្ថិភាព សម្រាប់នាវាឥណ្ឌាឡើយ៕