សារព័ត៌មានក្នុងស្រុក រាយការណ៍នៅថ្ងៃព្រហស្បតិ៍នេះថា នគរបាលអូស្រ្តាលី បានរកឃើញសាកសពមនុស្ស ២នាក់ អំឡុងប្រតិបត្តិការស្វែងរកភ្ញៀវទេសចរចិន ២នាក់ ដែលបានបាត់ខ្លួន នៅក្នុងទឹកជំនន់ដែលបានវាយប្រហារតំបន់ភាគកើតអូស្រ្តាលី ។

ទូរទស្សន៍រដ្ឋអូស្រ្តាលី ABC រាយការណ៍ដោយលើកប្រភពពីនគរបាលថា សាកសពមនុស្សដែលគេជឿថាជាភ្ញៀវទេសចរចិនបាត់ខ្លួន ត្រូវបានរកឃើញនៅក្នុងរថយន្ត ១គ្រឿង ។

នគរបាលអូស្រ្តាលី និយាយនៅក្នុងសេចក្តីថ្លែងការណ៍ថា ភ្ញៀវទេសចរបាត់ខ្លួន គឺជាបុរស វ័យ ២៦ឆ្នាំម្នាក់ និងស្រ្តីវ័យ ២៣ឆ្នាំម្នាក់ ដែលបានធ្វើដំណើរទៅកាន់ទីក្រុង North Burnett ស្ថិតក្នុងរដ្ឋ Queensland ដែលមានចម្ងាយប្រហែល ៣៨០គ.មភាគពាយព្យទីក្រុង Brisbane ។

ការព្រមានពីទឹកជំនន់ធំ នៅតែបន្តកើតមាននៅតាមតំបន់មួយចំនួនក្នុងរដ្ឋ Queensland ហើយនិងតំបន់ Northern Territory ក្រោយភ្លៀងធ្លាក់ខ្លាំងបណ្តាលឲ្យទឹកហូរប្រៀបច្រាំងទន្លេ ធ្វើឲ្យកាត់ផ្តាច់ទំនាក់ទំនងជាមួយទីក្រុងជនបទ និងបង្ខំឲ្យអ្នកស្រុករាប់រយនាក់ជម្លៀសខ្លួន ៕