គំនរសំរាមមានពេលពេញឆ្នេរសមុទ្រ នៅលើតំបន់ឆ្នេរ Kedonganan កោះបាលី ប្រទេសឥណ្ឌូនេស៊ី ធ្វើឲ្យតំបន់ទេសចរណ៍ដ៏ទាក់ទាញមួយនេះ គ្របដណ្តប់ដោយដបប្លាស្ទិក និងកម្ទេចកម្ទីផ្សេងទៀត ។

កាកសំណល់សំរាមបង្កឡើងដោយសារភ្លៀងធ្លាក់មូសុង និងចរន្តទឹកមហាសមុទ្រទាំងនេះ បានធ្វើឲ្យក្រុមប្រជានេសាទពិបាកចេញដំណើរទៅនេសាទក្នុងសមុទ្រ ។

លោក Arifin គឺជាអ្នកនេសាទវ័យ ៤២ឆ្នាំម្នាក់ និយាយថា វាពិតជារំខានដល់ពួកយើងខ្លាំងណាស់ ក្នុងនាមជាអ្នកនេសាទ ពេលដែលពួកយើងចង់ទៅធ្វើការ ។ មុនពេលពួកយើងចេញទូកចូលទៅក្នុងសមុទ្រ ពួកយើងត្រូវតែសម្អាតសំរាមទាំងអស់នេះជាមុនសិន ។

លោកនិយាយប្រាប់ទីភ្នាក់ងារព័ត៌មានរ៉យទ័រ ពេលដែលលោករៀបចំឧបករណ៍ចេញទៅនេសាទថា កាកសំណល់ទាំងនេះ មិនត្រឹមតែពន្យឺតការងារប្រចាំថ្ងៃរបស់ពួកយើងប៉ុណ្ណោះទេ ប៉ុន្តែវាបានធ្វើឲ្យប៉ះពាល់ដល់ការចាប់ត្រីរបស់ពួកយើងផងដែរ ។

ដោយឡែក ភ្ញៀវទេសចជាច្រើន និយាយដែរថា ការបំពុលនេះ បានធ្វើឲ្យប៉ះពាល់ដល់កោះបាលីផងដែរ ។ លោក Terry West គឺជាភ្ញៀវទេសចរវ័យ ៦៥ឆ្នាំម្នាក់មកពីអូស្រ្តាលី និយាយថា លោកសង្ស័យថា ទឹកជោរបាននាំសំរាមទាំងអស់នេះមក ហើយវាដូចជាសម្លាប់វិស័យទេសចរណ៍អញ្ចឹងដែរ ។

ក្រុមអាជ្ញាធរក្នុងស្រុក តែងតែដាក់ពង្រាយក្រុមបោសស្អាត ប៉ុន្តែរលកសមុទ្រធំៗ បន្តធ្វើគំនរសំរាមទាំងនេះ ហូរមកទើនលើតំបន់ឆ្នេរ ៕