ជម្លោះដែលកំពុងរីករាលដាលនៅតំបន់មជ្ឈិមបូព៌ា ត្រូវបានគេរំពឹងថា នឹងគ្របដណ្ដប់លើការពិភាក្សា នៅក្នុងកិច្ចប្រជុំពិសេសរបស់រដ្ឋមន្ត្រីសេដ្ឋកិច្ចសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) នៅថ្ងៃសុក្រ (ទី១៣ ខែមីនា ឆ្នាំ២០២៦) ដោយរដ្ឋមន្ត្រីការបរទេស ក៏នឹងបើកកិច្ចប្រជុំអនឡាញ នៅថ្ងៃដដែលនោះ ដើម្បីដោះស្រាយវិបត្តិកាន់តែធ្ងន់ធ្ងរឡើងដែលបានធ្វើឲ្យទីផ្សារពិភពលោកប្រែប្រួល។

ប្រទេសហ្វីលីពីន ដែលជាប្រធានអាស៊ានឆ្នាំនេះ កំពុងធ្វើជាម្ចាស់ផ្ទះនៃកិច្ចប្រជុំនេះ ខណៈដែលរដ្ឋមន្ត្រីទាំងអស់ កំពុងថ្លឹងថ្លែងពីផលប៉ះពាល់ និងការឆ្លើយតបទៅនឹងការហក់ឡើងតម្លៃប្រេង ក៏ដូចជាការរំខានដល់ការដឹកជញ្ជូន ភស្តុភារ និងលំហូរពាណិជ្ជកម្ម នៅទូទាំងសេដ្ឋកិច្ចដែលពឹងផ្អែកលើការនាំចេញរបស់តំបន់។

អនុរដ្ឋមន្ត្រីពាណិជ្ជកម្មហ្វីលីពីន លោក Allan Gepty បានប្រាប់អ្នកសារព័ត៌មានថា «ក្ដីបារម្ភគឺជារឿងជាក់ស្ដែង» ដោយលោកបន្ថែមថា តំបន់មិនអាចព្រងើយកន្តើយនឹងផលប៉ះពាល់នៃវិបត្តិនេះ លើអតិផរណា និងការងារបានឡើយ។

គួរបញ្ជាក់ថា ការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ ដែលបានចាប់ផ្តើមជិត ២សប្តាហ៍មុន បានសម្លាប់មនុស្សប្រហែល ២.០០០នាក់ រហូតមកដល់ពេលនេះ ហើយបានធ្វើឲ្យទីផ្សារថាមពល និងការដឹកជញ្ជូនសកលស្ថិតក្នុងភាពវឹកវរ។ ជម្លោះនេះបានបិទច្រកសមុទ្រ Hormuz ជាផ្លូវទឹកដ៏តូចចង្អៀតដែលដឹកជញ្ជូនប្រេង និងឧស្ម័នធម្មជាតិរាវ (LNG) ១ភាគ៥ របស់ពិភពលោក ទៅកាន់តំបន់អាស៊ី ដោយធ្វើឲ្យតម្លៃប្រេងឆៅឡើងដល់ជាង ១០០ដុល្លារ ក្នុងមួយបារ៉ែល។

វិបត្តិនេះបានបង្ខំឲ្យរដ្ឋមន្ត្រីការបរទេសអាស៊ានកោះប្រជុំពិសេសមួយ តាមប្រព័ន្ធអ៊ីនធឺណិត ដើម្បីវាយតម្លៃពីផលប៉ះពាល់ ចំពោះតំបន់អាស៊ីអាគ្នេយ៍ ជាកន្លែងដែលសេដ្ឋកិច្ចជាច្រើនពឹងផ្អែកយ៉ាងខ្លាំងទៅលើការដឹកជញ្ជូនប្រេងឆៅ និងឧស្ម័នធម្មជាតិរាវ (LNG) ពីឈូងសមុទ្រនេះ៕