រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយនៅថ្ងៃព្រហស្បតិ៍ (ទី១២ ខែមីនា ឆ្នាំ២០២៦) នេះថា លោកបានបញ្ជាឲ្យយោធាត្រៀម សម្រាប់ការពង្រីកប្រតិបត្តិការ នៅក្នុងប្រទេសលីបង់ ជាកន្លែងដែលកងកម្លាំងអ៊ីស្រាអែល កំពុងប្រយុទ្ធជាមួយក្រុមប្រដាប់អាវុធហេបូឡា ដែលគាំទ្រដោយអ៊ីរ៉ង់។

លោក Katz ត្រូវបានដកស្រង់សម្តី ដែលបាននិយាយនៅក្នុងសេចក្តីថ្លែងការណ៍មួយថា៖ «នាយករដ្ឋមន្ត្រី និងខ្ញុំ បានណែនាំ IDF (កងកម្លាំងការពារជាតិអ៊ីស្រាអែល) ឲ្យត្រៀម សម្រាប់ការពង្រីកប្រតិបត្តិការរបស់ IDF នៅក្នុងប្រទេសលីបង់ និងសម្រាប់ការស្តារភាពស្ងប់ស្ងាត់ និងសន្តិសុខឡើងវិញដល់សហគមន៍ភាគខាងជើង»។

យោងតាមសេចក្តីថ្លែងការណ៍ពីក្រសួងរបស់លោក បានឲ្យដឹងថា នៅក្នុងការវាយតម្លៃពីស្ថានភាព លោក Katz បានបញ្ជាក់ថា៖ «ខ្ញុំបានព្រមានប្រធានាធិបតីលីបង់ថា ប្រសិនបើរដ្ឋាភិបាលលីបង់ មិនដឹងពីរបៀបគ្រប់គ្រងទឹកដី និងរារាំងក្រុមហេសបូឡាកុំឲ្យគំរាមកំហែងសហគមន៍ភាគខាងជើង និងបាញ់ទៅអ៊ីស្រាអែលទេនោះ យើងនឹងដណ្ដើមកាន់កាប់ទឹកដីនោះ ហើយធ្វើកិច្ចការនោះដោយខ្លួនឯង»។

យោធាអ៊ីស្រាអែលបានឲ្យដឹងនៅថ្ងៃព្រហស្បតិ៍នេះថា ក្រុមហេសបូឡាបានបាញ់រ៉ូកែតប្រហែល ២០០គ្រាប់ទៅអ៊ីស្រាអែល កាលពីយប់មុន ជាអ្វីដែលខ្លួនបានពិពណ៌នាថា ជា «ការបាញ់ស្រោចដ៏ធំបំផុត» របស់ក្រុមប្រដាប់អាវុធនៅលីបង់មួយនេះ ចាប់តាំងពីសង្គ្រាមបានចាប់ផ្តើមឡើង៕