ទិន្នន័យចរាចរណ៍សមុទ្រ បង្ហាញថា នាវាពាណិជ្ជកម្មមួយចំនួន ទាំងនៅជិត ឬនៅក្នុងច្រកសមុទ្រ Hormuz និងឈូងសមុទ្រអារ៉ាប់ បានប្រកាសខ្លួនឯងថា មានទំនាក់ទំនងជាមួយប្រទេសចិន ចាប់តាំងពីសង្គ្រាម នៅអ៊ីរ៉ង់ បានចាប់ផ្តើមផ្ទុះ ខណៈដែលប្រតិបត្តិកររបស់នាវាទាំងនោះ ហាក់ដូចជាព្យាយាមកាត់បន្ថយហានិភ័យពីការក្លាយជាគោលដៅក្នុងការវាយប្រហារ។

យ៉ាងហោចណាស់មាននាវាចំនួន ៨គ្រឿង នៅក្នុង ឬនៅជិតឈូងសមុទ្រអារ៉ាប់ និងឈូងសមុទ្រអូម៉ង់ បានផ្លាស់ប្តូរសញ្ញាគោលដៅដែលបានប្រកាសរបស់ពួកគេ ទៅជាសារខ្លីៗ ដូចជា «CHINA OWNER» (ម្ចាស់ចិន) ឬ «CHINA OWNER&CREW» (ម្ចាស់ និងនាវិកចិន)។ នេះបើយោងតាមទិន្នន័យនៅលើវេទិកាតាមដាននាវា MarineTraffic ដែលត្រូវបានវិភាគដោយសារព័ត៌មាន AP។

លោកស្រី Ana Subasic អ្នកវិភាគហានិភ័យពាណិជ្ជកម្ម នៅក្រុមហ៊ុនទិន្នន័យ និងវិភាគ Kpler ដែលជាម្ចាស់ MarineTraffic បាននិយាយថា៖ «គោលដៅចម្បងនៃនាវាដែលកំណត់អត្តសញ្ញាណជាសាធារណៈថា ជា «ជនជាតិចិន» ខណៈពេលកំពុងឆ្លងកាត់ឈូងសមុទ្រ ឬច្រកសមុទ្រ Hormuz គឺដើម្បីកាត់បន្ថយហានិភ័យពីការត្រូវបានវាយប្រហារ មិនមែនជាការសម្រួលដល់ការឆ្លងកាត់ច្រកសមុទ្រខ្លួនឯងឡើយ»។

នាវាមួយចំនួនបានឆ្លងកាត់ច្រកសមុទ្រ ហើយឆ្ពោះទៅកាន់គោលដៅរបស់ពួកគេ។ នាវាផ្សេងទៀតនៅតែស្ថិតនៅក្នុងតំបន់នោះ។ លោកស្រី Subasic បានបន្ថែមថា អ៊ីរ៉ង់ និងក្រុមពាក់ព័ន្ធជាទូទៅ បានចៀសវាងកំណត់គោលដៅលើនាវាដែលមានទំនាក់ទំនងជាមួយចិន ដោយសារតែជំហរអព្យាក្រឹតរបស់ប្រទេសចិន និងទំនាក់ទំនងសេដ្ឋកិច្ចកាន់តែរឹងមាំជាមួយអ៊ីរ៉ង់។

ការវាយប្រហាររបស់អ៊ីរ៉ង់លើនាវា នៅក្នុងឈូងសមុទ្រអារ៉ាប់ និងតំបន់យ៉ាងទូលំទូលាយ បានធ្វើឲ្យក្ដីបារម្ភកាន់តែខ្លាំងឡើង ជាពិសេសក្នុងចំណោមអ្នកដឹកជញ្ជូន។ យ៉ាងហោចណាស់មាននាវាពាណិជ្ជកម្មចំនួន ១៩គ្រឿង នៅជុំវិញតំបន់ ត្រូវរងខូចខាត នៅក្នុងសង្គ្រាមនេះ គិតត្រឹមថ្ងៃព្រហស្បតិ៍ (ទី១២ ខែមីនា ឆ្នាំ២០២៦) នេះ៕