នៅថ្ងៃព្រហស្បតិ៍ (ទី១២ ខែមីនា ឆ្នាំ២០២៦) នេះ ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា សារដំបូងពីមេដឹកនាំកំពូលថ្មីរបស់អ៊ីរ៉ង់ គឺលោក Mojtaba Khamenei នឹងចេញជាសាធារណៈ ក្នុងពេលឆាប់ៗនេះ។

សារនេះនឹងថ្លែងអំពី «មេដឹកនាំបដិវត្តន៍ពលីជីវិត (លោក Ali Khamenei) តួនាទី និងកាតព្វកិច្ចរបស់ប្រជាជន កងកម្លាំងប្រដាប់អាវុធ ស្ថាប័នប្រតិបត្តិ រណសិរ្សតស៊ូ ក៏ដូចជាប្រទេសនានា ក្នុងតំបន់ និងការដោះស្រាយជាមួយសត្រូវ»។ នេះបើយោងតាមឆានែល Telegram ផ្លូវការរបស់លោក។

ក្រុមអ្នកជំនាញសាសនា ដែលជាក្រុមបព្វជិតជាន់ខ្ពស់នៃសាសនាឥស្លាមនិកាយស៊ីអ៊ីត កាលពីដើមសប្តាហ៍នេះ បានប្រកាសថា លោកជាមេដឹកនាំកំពូលថ្មី បន្ទាប់ពីឪពុករបស់លោក គឺលោក Ali Khamenei ត្រូវបានសម្លាប់។

លោក Mojtaba មិនទាន់ត្រូវបានគេឃើញជាសាធារណៈនៅឡើយទេ ហើយមានរបាយការណ៍ថា លោកបានរងរបួសនៅក្នុងសង្គ្រាមអាកាសរួមគ្នា រវាងអ៊ីស្រាអែល និងសហរដ្ឋអាមេរិក ប្រឆាំងនឹងអ៊ីរ៉ង់៕