អង្គការសហប្រជាជាតិនិយាយថា មនុស្សជាង៣លាននាក់ត្រូវបានរត់ចេញពីផ្ទះសម្បែងគេចពីការទម្លាក់គ្រាប់បែកក្នុងប្រទេសអ៊ីរ៉ង់ ចាប់តាំងពីអាមេរិក និងអ៊ីស្រាអែល បានចាប់ផ្តើមសង្គ្រាមប្រឆាំងប្រទេសនេះកាលពីចុងខែមុន ខណៈការព្រួយបារម្ភកើនឡើងលើវិបត្តិមនុស្សធម៌កាន់តែធ្ងន់ធ្ងរ។

ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បាននិយាយកាលពីថ្ងៃព្រហស្បតិ៍ ១២មីនាសប្ដាហ៍នេះ ថា មនុស្សរហូតដល់ ៣,២ លាននាក់ ដែលតំណាងឱ្យគ្រួសារអ៊ីរ៉ង់ចន្លោះពី ៦០០.០០០ ទៅ១លានគ្រួសារ ត្រូវបានផ្លាស់ទីលំនៅដោយបង្ខំចាប់តាំងពីសង្គ្រាមបានចាប់ផ្តើមនៅថ្ងៃទី ២៨ ខែកុម្ភៈ ២០២៦នេះ។

មន្ត្រី UNHCR លោកAyaki Ito បាននិយាយនៅក្នុងសេចក្តីថ្លែងការណ៍មួយថា ពួកគេភាគច្រើនត្រូវបានគេរាយការណ៍ថាកំពុងរត់ចេញពីទីក្រុងតេអេរ៉ង់ និងតំបន់ទីក្រុងសំខាន់ៗផ្សេងទៀត ឆ្ពោះទៅភាគខាងជើងប្រទេស និងតំបន់ជនបទ ដើម្បីស្វែងរកសុវត្ថិភាព។ 

តួលេខនេះទំនងជានឹងបន្តកើនឡើង ខណៈការប្រយុទ្ធគ្នានៅតែបន្ត ដែលជាសញ្ញានៃការកើនឡើងគួរឱ្យព្រួយបារម្ភនៃតម្រូវការមនុស្សធម៌។ 

នៅថ្ងៃទី២៨កុម្ភៈ ក្នុងអំឡុងពេលបើកការវាយប្រហារលើអ៊ីរ៉ង់ មីស៊ីលមួយគ្រាប់បានវាយប្រហារសាលារៀនសិស្សស្រីមួយកន្លែងនៅភាគខាងត្បូងប្រទេសអ៊ីរ៉ង់ ដោយបានសម្លាប់មនុស្សជាង ១៧០ នាក់ ដែលភាគច្រើនជាសិស្ស។

យោងតាមតួលេខចុងក្រោយបំផុតពីមន្ត្រីអ៊ីរ៉ង់ មនុស្សជាង ១.៣០០ នាក់ត្រូវបានសម្លាប់ក្នុងការវាយប្រហាររួមគ្នារបស់អាមេរិក និងអ៊ីស្រាអែលនៅទូទាំងប្រទេសរហូតមកដល់បច្ចុប្បន្ន។ 

យោធាអាមេរិក និងអ៊ីស្រាអែលបានបន្តទម្លាក់គ្រាប់បែកលើអ៊ីរ៉ង់ ទោះបីជាមានការថ្កោលទោសពីអន្តរជាតិ និងការអំពាវនាវឱ្យមានការបន្ធូរបន្ថយភាពតានតឹងកាន់តែច្រើនក៏ដោយ៕