យន្តហោះចាក់ប្រេងយោធារបស់សហរដ្ឋអាមេរិក មួយគ្រឿង បានធ្លាក់នៅភាគខាងលិចប្រទេសអ៊ីរ៉ាក់ កាលពីថ្ងៃព្រហស្បតិ៍ (១២ មីនា) ក្នុងហេតុការណ៍មួយដែលបញ្ជាការកណ្តាលរបស់សហរដ្ឋអាមេរិក បានបញ្ជាក់ថា គ្រោះថ្នាក់នេះមានពាក់ព័ន្ធនឹងយន្តហោះមួយគ្រឿងទៀត ប៉ុន្តែមិនមែនជាលទ្ធផលនៃការវាយប្រហារពីសត្រូវ ឬការបាញ់ច្រឡំគ្នាឯងនោះទេ។

គួរឱ្យដឹងថា អាមេរិក បានដាក់ពង្រាយយន្តហោះយ៉ាងច្រើនសន្ធឹកសន្ធាប់ទៅកាន់មជ្ឈិមបូព៌ា ដើម្បីចូលរួមក្នុងប្រតិបត្តិការប្រឆាំងនឹងអ៊ីរ៉ង់ ហើយហេតុការណ៍នេះបានគូសបញ្ជាក់ពីហានិភ័យនៃប្រតិបត្តិការ ទោះបីជាស្ថិតនៅលើដែនអាកាសមិត្តភាពក៏ដោយ។

ក្នុងសេចក្តីថ្លែងការណ៍មួយ បញ្ជាការកណ្តាលអាមេរិក បានឱ្យដឹងថា ខ្លួនកំពុងអនុវត្តកិច្ចប្រឹងប្រែងសង្គ្រោះ បន្ទាប់ពីយន្តហោះចាក់ប្រេងប្រភេទ KC-135 របស់អាមេរិក បានធ្លាក់។ ចំណែកឯយន្តហោះទីពីរបានចុះចតដោយសុវត្ថិភាព។ សេចក្តីថ្លែងការណ៍បន្តថា៖ «ហេតុការណ៍នេះកើតឡើងក្នុងដែនអាកាសមិត្តភាព អំឡុងពេលប្រតិបត្តិការ Epic Fury» ដែលនេះជាឈ្មោះយោធានៃប្រតិបត្តិការរបស់អាមេរិក ប្រឆាំងនឹងអ៊ីរ៉ង់។

ប្រភពពីមន្ត្រីអាមេរិកម្នាក់ដែលសុំមិនបញ្ចេញឈ្មោះបាននិយាយថា យន្តហោះមួយគ្រឿងទៀតដែលពាក់ព័ន្ធក្នុងហេតុការណ៍នេះក៏ជាប្រភេទ KC-135 ដែរ ហើយយន្តហោះដែលបានធ្លាក់នោះ មានសមាជិកយោធារហូតដល់ ៦នាក់នៅលើនោះ។ យ៉ាងណាមិញ ក្រុមតស៊ូឥស្លាមនៅអ៊ីរ៉ាក់ ដែលជាក្រុមចម្រុះនៃបក្ខពួកប្រដាប់អាវុធគាំទ្រដោយអ៊ីរ៉ង់ បានអះអាងថា ខ្លួនជាអ្នកបាញ់ទម្លាក់យន្តហោះចាក់ប្រេងយោធាអាមេរិកមួយគ្រឿងនោះ។

យន្តហោះ KC-135 ដែលផលិតដោយក្រុមហ៊ុនប៊ូអ៊ីង អំឡុងទសវត្សរ៍ឆ្នាំ១៩៥០ និងដើមទសវត្សរ៍ឆ្នាំ១៩៦០ គឺជាឆ្អឹងខ្នងនៃកងយន្តហោះចាក់ប្រេងតាមអាកាសរបស់យោធាអាមេរិក និងមានសារៈសំខាន់ខ្លាំងណាស់ក្នុងការអនុញ្ញាតឱ្យយន្តហោះផ្សេងទៀតបំពេញបេសកកម្មបានដោយមិនចាំបាច់ចុះចត៕