រាជរដ្ឋាភិបាលកម្ពុជាបានសម្រេចចេញអនុក្រឹត្យបង្កើតតំបន់សេដ្ឋកិច្ចពិសេសថ្មីមួយទៀត នៅលើផ្លូវជាតិលេខ៥១ នៅលើផ្ទៃដីជាង ៥០០ហិកតា ស្ថិតក្នុងភូមិសាស្ត្រនៃស្រុកសំរោងទង និងស្រុកសាមគ្គីមុនីជ័យ ខេត្តកំពង់ស្ពឺ។ ដោយតំបន់សេដ្ឋកិច្ចពិសេសថ្មីនេះ គឺមានឈ្មោះថា «តំបន់សេដ្ឋកិច្ចពិសេសកាណាឌីយ៉ាផ្លូវជាតិលេខ៥១»។

 យោងតាមអនុក្រឹត្យ ដែលបានចុះថ្ងៃទី១១ ខែមីនា ឆ្នាំ២០២៦នេះ បានឲ្យដឹងថា «តំបន់សេដ្ឋកិច្ចពិសេស កាណាឌីយ៉ា ផ្លូវជាតិលេខ៥១ គឺមានទីតាំងស្ថិតនៅភូមិចំនួន១២ ក្នុងស្រុកចំនួនពីរនៃខេត្តកំពង់ស្ពឺ ហើយតំបន់សេដ្ឋកិច្ចថ្មីនេះគឺមានផ្ទៃដីចំនួន៥១៨ហិកតា៤០អា និង១៧សង់ទីអាដូចមានប្លង់បង្ហាញទីតាំង ក្បាលដី និងតារាងនិយាមកាចំណុចព្រំដីភ្ជាប់ជាឧបសម្ព័ន្ធ ដែលមានការឯកភាពពីក្រសួងមានសមត្ថកិច្ច ជាចំណែកភ្ជាប់នូវអនុក្រឹត្យនេះ។

 បើតាមអនុក្រឹត្យរបស់រាជរដ្ឋាភិបាលបានបញ្ជាក់ផងដែរថា ផ្ទៃដីទាំងអស់ដែលស្ថិតក្នុងបរិវេណ តំបន់សេដ្ឋកិច្ចពិសេសកាណាឌីយ៉ាផ្លូវជាតិលេខ៥១នេះ គឺជាកម្មសិទ្ធិឯកជនស្របតាមច្បាប់របស់ក្រុម ហ៊ុន សម្រាប់ការអភិវឌ្ឍជាតំបន់សេដ្ឋកិច្ចពិសេស ហើយការរៀបចំ និងការប្រព្រឹត្តទៅនៃតំបន់សេដ្ឋកិច្ច ពិសេសថ្មីខាងលើនេះ នឹងស្ថិតក្រោមវិសាលភាពនៃច្បាប់ និងបទបញ្ញត្តិនានានៃព្រះរាជាណាចក្រកម្ពុជា។

បើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាដែលហៅកាត់ថាCDC បានឲ្យដឹងថា គិតត្រឹមឆ្នាំ២០២៤ កម្ពុជាមានតំបន់សេដ្ឋកិច្ចពិសេសសរុបចំនួន៣០ ដោយតំបន់សេដ្ឋកិច្ចពិសេសទាំង៣០នោះ មានទីតាំងនៅ ១២រាជធានី-ខេត្ត ដោយ៩ ស្ថិតក្នុងខេត្តស្វាយរៀង, ៥ ក្នុងខេត្តព្រះសីហនុ, ៣ ក្នុងខេត្តបន្ទាយមានជ័យ កោះកុង និងកណ្តាល, និងចំនួន១ នៅក្នុងរាជធានីភ្នំពេញ ខេត្តពោធិ៍សាត់ ក្រចេះ កំពត កំពង់ស្ពឺ កំពង់ឆ្នាំង និងខេត្តកំពង់ចាមជាដើម៕