ចិនបានបញ្ជូនយន្តហោះយោធាបន្ថែមទៀតទៅកាន់តំបន់រសើបមួយក្បែរកោះតៃវ៉ាន់បន្ទាប់ពីគេបានមើលឃើញការផ្អាកការហោះហើរដោយអាថ៌កំបាំងមួយរយៈពេលខ្លី។

អាជ្ញាធរការពារជាតិទីក្រុងតៃប៉ិ បាននិយាយក្នុងសេចក្តីថ្លែងការណ៍មួយថា យន្តហោះកងទ័ពរំដោះប្រជាជនចិន (PLA) ចំនួនប្រាំគ្រឿងត្រូវបានគេប្រទះឃើញនៅក្នុងតំបន់កំណត់អត្តសញ្ញាណការពារដែនអាកាសរបស់កោះតៃវ៉ាន់ ជាតំបន់ដែលត្រូវបានត្រួតពិនិត្យយ៉ាងយកចិត្តទុកដាក់ដោយយោធា ចាប់ពីម៉ោង ៦ ព្រឹកថ្ងៃពុធដល់ម៉ោង ៦ ព្រឹកថ្ងៃព្រហស្បតិ៍ ១២មីនា សប្ដាហ៍នេះ ។

យន្តហោះចំនួនបីគ្រឿងបានឆ្លងកាត់ខ្សែបន្ទាត់មេដ្យាននៅក្នុងច្រកសមុទ្រ ដែលបម្រើជាព្រំដែនក្រៅផ្លូវការរវាងតំបន់តៃវ៉ាន់ និងប្រទេសចិន។

ការហោះហើររបស់ PLA នៅជុំវិញតំបន់កំណត់អត្តសញ្ញាណការពារដែនអាកាសរបស់កោះតៃវ៉ាន់ (ADIZ) និងខ្សែបន្ទាត់មេដ្យាន បានធ្លាក់ចុះនាពេលថ្មីៗនេះដោយគ្មានហេតុផលច្បាស់លាស់។ កោះតៃវ៉ាន់បាននិយាយថាការផ្អាកនេះអាចជាយុទ្ធសាស្ត្ររបស់ទីក្រុងប៉េកាំងដើម្បីបន្ធូរបន្ថយភាពតានតឹងមុនពេលកិច្ចប្រជុំដែលរំពឹងទុករវាងប្រធានាធិបតី Donald Trump និងមេដឹកនាំចិន Xi Jinping នៅទីក្រុងប៉េកាំងក្នុងរយៈពេលពីរបីសប្តាហ៍ទៀត។ រដ្ឋបាលលោក Trump កំពុងពន្យារពេលការលក់អាវុធមានតម្លៃរាប់ពាន់លានដុល្លារឱ្យទៅកោះតៃវ៉ាន់ដើម្បីធានាថាដំណើរទស្សនកិច្ចនេះទទួលបានជោគជ័យ នេះបើយោងតាមការចុះផ្សាយរបស់សារព័ត៌មាន New York Times ថ្មីៗនេះ។

ឋានៈរបស់កោះតៃវ៉ាន់គឺជាបញ្ហាដ៏លំបាកបំផុតមួយនៅក្នុងទំនាក់ទំនងរវាងអាមេរិក និងចិន។ លោក Xi បានប្រាប់លោក Trump នៅក្នុងការសន្ទនាតាមទូរស័ព្ទកាលពីខែកុម្ភៈថា ទីក្រុងប៉េកាំងនឹងមិនអនុញ្ញាតឱ្យកោះតៃវ៉ាន់ត្រូវបានបំបែកចេញឡើយ ហើយបានព្រមានថា សហរដ្ឋអាមេរិកគួរតែដោះស្រាយការលក់អាវុធទៅឱ្យទីក្រុងតៃប៉ិដោយការប្រុងប្រយ័ត្នបំផុត៕