ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានឧបត្ថម្ភទឹកប្រាក់ចំនួន ១សែនដុល្លារទៅដល់ក្រុមបាល់ទាត់ជម្រើសជាតិកម្ពុជា ក្រោយពីយកឈ្នះលើក្រុមបាល់ទាត់កោះហ្គាំ ហើយឡើងទៅជុំបន្ទាប់នៃពានរង្វាន់បាល់ទាត់ទ្វីបអាស៊ីឆ្នាំ២០២៣។
ក្រុមបាល់ទាត់ជម្រើសជាតិកម្ពុជា បានប្រកួតឈ្នះក្រុមបាល់ទាត់កោះហ្គាំជាមួយលទ្ធផល ២ ទល់នឹង ១ នៅរាត្រីថ្ងៃទី១២ឈានចូលថ្ងៃទី១៣ ខែតុលានេះ។
នៅលើទំព័រហ្វេសប៊ុកផ្លូវការ សម្ដេចតេជោ ហ៊ុន សែន បានអបអរសាទរទៅដល់ក្រុមបាល់ទាត់ជម្រើសជាតិកម្ពុជាសម្រាប់ជ័យជម្នះនេះ ហើយសម្ដេចក៏ប្រកាសពីការផ្ដល់ប្រាក់ឧបត្ថម្ភចំនួន ១០ម៉ឺនដុល្លារទៅដល់ក្រុមគោព្រៃកម្ពុជាផងដែរ។
ប្រមុខរាជរដ្ឋាភិបាលកម្ពុជា បានបញ្ជាក់ថា ថវិកាចំនួន ១០ម៉ឺនដុល្លារនេះ គឺជាការលើកទឹកចិត្តទៅដល់ក្រុមបាល់ទាត់ជម្រើសជាតិកម្ពុជា ក្រោយប្រកួតឈ្នះក្រុមកោះហ្គាំ។
ជាងនេះទៅទៀត សម្ដេចតេជោ ហ៊ុន សែន ក៏បានកោតសរសើរដល់លោក Keisuke Honda ផងដែរ ដែលបានដឹកនាំក្រុមជម្រើសជាតិកម្ពុជាឱ្យទទួលបានជ័យជម្នះនេះ។
ក្រុមបាល់ទាត់ជម្រើសជាតិកម្ពុជា និងក្រុមបាល់ទាត់កោះហ្គាំ ត្រូវជួបប្រកួតគ្នានៅឯកីឡដ្ឋាន Khalifa Sport City ស្ថិតនៅក្នុងប្រទេសបារ៉ែន សម្រាប់វគ្គជម្រុះនៃពានរង្វាន់ទ្វីបអាស៊ីឆ្នាំ២០២៣ ឬ AFC Asian Cup ដែលគ្រោងធ្វើឡើងនៅក្នុងប្រទេសចិននៅឆ្នាំ២០២៣។
សម្រាប់ជំនួបជើងទី១ កាលពីរាត្រីថ្ងៃទី០៩ឈានចូលថ្ងៃទី១០ ខែតុលា កម្ពុជាបានប្រកួតឈ្នះក្រុមកោះហ្គាំជាមួយលទ្ធផល ១ ទល់ ០ ដែលគ្រាប់បាល់ ១គ្រាប់នោះ រកបានដោយកីឡាករខ្សែប្រយុទ្ធ ចាន់ វឌ្ឍនាការ។
ចំណែកឯជំនួបជើងទី២ ដែលធ្វើឡើងនៅកីឡដ្ឋាន Khalifa Sport City ដដែល កម្ពុជាបន្តឈ្នះកោះហ្គាំជាមួយលទ្ធផល ២ ទល់ ១ ដែលរកគ្រាប់បាល់បានដោយកីឡាករចាស់វស្សា សុះ ស៊ូហាណា និងកីឡាករ កែវ សុខផេង។
ជ័យជម្នះទាំងពីរជើងនេះ បានធានាឱ្យកម្ពុជាមានឱកាសឡើងទៅវគ្គជម្រុះជុំបន្តទៀតនៃពានរង្វាន់ AFC Asian Cup ដែលគ្រោងរៀបចំធ្វើឡើងនៅក្នុងឆ្នាំ២០២៣ខាងមុខ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
