ភ្នំពេញ៖ កម្ពុជាបានចាក់វ៉ាក់សាំងបង្ការជំងឺកូវីដ-១៩ដល់ប្រជាពលរដ្ឋខ្លួនបានជាង ១៣លាន ៥៤ម៉ឺននាក់ហើយគិតត្រឹមថ្ងៃនេះ ដែលស្ទើតែ ១០០ភាគរយនៃគោលដៅរបស់រាជរដ្ឋាភិបាល។
ក្នុងរបាយការណ៍របស់ខ្លួនចេញនៅយប់នេះ គណៈកម្មការចំពោះកិច្ចចាក់វ៉ាក់សាំងកូវីដ-១៩ បានបញ្ជាក់ថា ពលរដ្ឋអាយុចាប់ពី ១៨ឆ្នាំឡើងចំនួនជាង ១៣លាន ៥៤ម៉ឺននាក់ បានទទួលវ៉ាក់សាំងដូសទី១រួចរាល់ ឬស្មើនឹង ៩៩.៣២ភាគរយនៃគោលដៅរបស់រាជរដ្ឋាភិបាល។
បើតាមរបាយការណ៍ដដែលនេះ ពលរដ្ឋកម្ពុជាជាង ១២លាន ១៣ម៉ឺននាក់ហើយ បានទទួលវ៉ាក់សាំងបង្ការជំងឺកូវីដ-១៩ទាំងពីរដូសរួចរាល់ហើយ ខណៈដែលមនុស្សជាង ១លាន ១៤ម៉ឺននាក់ទៀត ក៏បានទទួលវ៉ាក់សាំងដូសទី៣ ឬដូសជំរុញផងដែរ។
របាយការណ៍បានឱ្យដឹងផងដែរថា ក្រុមមនុស្សអាយុចន្លោះពី ១២ ទៅ ១៨ឆ្នាំរហូតដល់ទៅ ៩០.០៧ភាគរយហើយ បានទទួលវ៉ាក់សាំង បើធៀបនឹងចំនួនមនុស្សគោលដៅមានចំនួនជិត ២លាននាក់។
ចំណែកឯការចាក់វ៉ាក់សាំងជូនកុមារអាយុចន្លោះពី ៦ ទៅ ១២ឆ្នាំវិញ របាយការណ៍បានបង្ហាញថា សម្រេចបាន ៩៧.០៨ភាគរយហើយ បើធៀបនឹងចំនួនកុមារសរុបជាង ១លាន ៨៩ម៉ឺននាក់នៅទូទាំងប្រទេស។
ជារួម កម្ពុជាបានផ្ដល់វ៉ាក់សាំងដល់ប្រជាពលរដ្ឋបាន ៨៤.៦៦ភាគរយហើយនៅក្នុងចំណោមប្រជាជនសរុប ១៦លាននាក់។
កម្ពុជាបានចាប់ផ្ដើមយុទ្ធនាការចាក់វ៉ាក់សាំងជូនប្រជាពលរដ្ឋរបស់ខ្លួនចាប់តាំងពីថ្ងៃទី១០ ខែកុម្ភៈកន្លងមកនេះ ដោយបានដំណើរការអស់រយៈពេលជាង ៩ខែមកហើយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
