នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម

នយោបាយ​ និង ការអភិវឌ្ឍន៍

អបអរព្រះរាជពិធីបុណ្យចម្រើនព្រះជន្មសម្ដេចម៉ែ សារមន្ទីរជាតិដាក់តាំងពិព័រណ៍រូបចម្លាក់ខ្មែរយៈពេល៦ខែ

2024/06/18 06:30:28 pm        243
Facebook Telegram Linkin
ក្នុងឱកាសព្រះរាជពិធីបុណ្យចំរើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សារមន្ទីរជាតិកម្ពុជា បានបើកការតាំងពិព័រណ៍ «រូបចម្លាក់ខ្មែរដែលប្រគល់ត្រឡប់មកព្រះរាជាណាចក្រកម្ពុជាវិញ» រយៈពេល៦ខែ ចាប់ពីថ្ងៃទី១៨ ខែមិថុនា ដល់ថ្ងៃទី១៨ ខែធ្នូ ឆ្នាំ២០២៤។លោក មួង ច័ន្ទរស្មី ប្រធានការិយាល័យអប់រំ និងផ្សព្វផ្សាយ នាយកដ្ឋានសារមន្ទីរ បានថ្លែងប្រាប់ BTV នាព្រឹកថ្ងៃទី១៨ ខែមិថុនានេះ ពិព័រណ៍មិនអចិន្ត្រៃយ៍ស្តីពី «រូបចម្លាក់ខ្មែរដែលប្រគល់ត្រឡប់មកមាតុប្រទេសវិញ» ដែលកំពុងដាក់តាំងបង្ហាញនៅពេលនេះ ធ្វើឡើងដើម្បីចូលរួមផ្សព្វផ្សាយ អំពីការខិតខំប្រឹងប្រែងរបស់រាជរដ្ឋាភិបាលក្នុងការងារពុះពារចរចាទាមទារត្រឡប់មកវិញនូវសម្បត្តិវប្បធម៌ខ្មែរ ដែលបានលួចនាំយកចេញពីទីតាំងបេតិកភណ្ឌប្រវត្តិសាស្ត្ររបស់ប្រជាជនកម្ពុជា។ លោកបន្តថា កត្តាសង្គ្រាម និងអស្ថិរភាពនយោបាយនៅក្នុងប្រទេសចាប់ពីទសវត្សរ៍ឆ្នាំ១៩៧០មកជាពិសេសនៅសម័យខ្មែរក្រហមបានរុញច្រានឲ្យកម្ពុជារស់នៅឯកា និងទទួលរងផលប៉ះពាល់យ៉ាងធ្ងន់ធ្ងរស្ទើរគ្រប់វិស័យ រួមទាំងវិស័យវប្បធម៌។ នាអំឡុងសង្គ្រាមស៊ីវិលជិតបីទសវត្សរ៍ វត្ថុបុរាណខ្មែរត្រូវបានជនទុច្ចរិត គាស់កកាយ ចល័តចេញពីទីតាំងដើម និងចរាចរលក់ដូរនៅជុំវិញពិភពលោកយ៉ាងផុសផុល។ លោកបញ្ជាក់ថា ដូច្នេះតាមរយៈការតាំងពិព័រណ៍ស្តីពី «រូបចម្លាក់ខ្មែរដែលប្រគល់ត្រឡប់មកព្រះរាជាណាចក្រកម្ពុជាវិញ» រយៈពេល៦ខែ ចាប់ពីថ្ងៃទី១៨ ខែមិថុនា ដល់ថ្ងៃទី១៨ ខែធ្នូ ឆ្នាំ២០២៤នេះ។ ចំណែក លោក លោក ប្រ៊ែតលី ជែមស៍ ហ្គ័រដុន (Bradley James Gordon) តំណាងស្របច្បាប់សម្រាប់ការទទួលត្រឡប់មកព្រះរាជាណាចក្រកម្ពុជាវិញនូវរូបចម្លាក់ខ្មែរនៃក្រសួងវប្បធម៌ (Legal representative for repatriations for the Ministry of Culture and Fine Arts» (ដែលបានចូលរួមចចារទាមទាវត្ថុសិល្បៈមកជូនប្រទេសកម្ពុជា តាំងពីឆ្នាំ២០១២) រួមនឹងប្រជាពលរដ្ឋ សិស្ស ដែលបានចូលរួមទស្សនាការតាំងបង្ហាញ រូបចម្លាក់ខ្មែរក្នុងការតាំងពិព័រណ៌នេះបានបង្ហាញចំណាប់រំភើបដែលបានឃើញរូបចម្លាក់ខ្មែរដែលបាត់បង់ត្រូវបានទទួលត្រឡប់ និងដាក់តាំងបង្ហាញរួមគ្នាបែបនេះ។ សូមបញ្ជាក់ផងដែរថា ក្នុងរយៈកាលពីរទសវត្សរ៍ចុងក្រោយនេះវត្ថុបុរាណខ្មែរជាច្រើន បានប្រគល់មកមាតុភូមិវិញតាមរយៈសប្បុរសជន ស្ថាប័នរដ្ឋ នឹងឯកជន ការចរចា និងការទាមទារតាមផ្លូវច្បាប់ ។ បច្ចុប្បន្នមានបុរាណវត្ថុខ្មែរចំនួន ៥៦៩ វត្ថុ ទទួឡបានមកពី១៤ប្រទេសបានប្រគល់មកកម្ពុជាវិញនារវាងឆ្នាំ១៩៩៦និងឆ្នាំ២០២៣៕អត្ថបទ រដ្ឋា

ប្រធានក្រុមអ្នកនាំពាក្យរបស់នាយករដ្ឋមន្រ្តី បញ្ជាក់ពីដំណើរអញ្ជើញបំពេញទស្សនកិច្ចផ្លូវការ របស់សម្តេចធិបតីនាយករដ្ឋមន្ត្រី នៅសិង្ហបុរី

2024/06/18 05:29:31 pm        125
Facebook Telegram Linkin
នាព្រឹកថ្ងៃទី១៨ខែមិថុនា ឆ្នាំ២០២៤ ឯកឧត្តម មាស សុភ័ណ្ឌ ប្រធានក្រុមអ្នកនាំពាក្យរបស់នាយករដ្ឋមន្រ្តី បានផ្តល់បទសម្ភាសដល់អ្នកសារព័ត៌មាន ស្តីពីដំណើរអញ្ជើញបំពេញទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅសាធារណរដ្ឋសិង្ហបុរី។នាឱកាសនោះឯកឧត្តម មាស សុភ័ណ្ឌ បានបញ្ជាក់ថា តបតាមការអញ្ជើញរបស់សមភាគីសិង្ហបុរី សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ​អញ្ជើញបំពេញទស្សនកិច្ចផ្លូវការ នៅ​សាធារណរដ្ឋសិង្ហបុរី ដែលនឹងប្រព្រឹត្តទៅចាប់ពីថ្ងៃទី១៨ ដល់ថ្ងៃទី១៩ ខែមិថុនា ឆ្នាំ២០២៤។គណៈប្រតិភូជាន់ខ្ពស់ដែលអញ្ជើញអមដំណើរសម្ដេចធិបតី ក្នុងឱកាសនេះ រួមមាន៖ ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, ឯកឧត្តម លោកជំទាវ រដ្ឋមន្ត្រីក្រសួងពាក់ព័ន្ធ ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី និងមន្ត្រីជាន់ខ្ពស់ក្រសួង-ស្ថាប័នពាក់ព័ន្ធមួយចំនួនទៀត រួមនឹងគណៈប្រតិភូសភាពាណិជ្ជកម្មកម្ពុជា ដឹកនាំដោយអ្នកឧកញ៉ា គិត ម៉េង។ក្នុងដំណើរអញ្ជើញទស្សនកិច្ចផ្លូវការនៅសាធារណរដ្ឋសិង្ហបុរី សម្តេចធិបតី នឹងមានជំនួប​ទ្វេភាគី​ជាមួយ ឯកឧត្តមនាយករដ្ឋមន្ត្រី ឡរ៉េន វ៉ុង (Lawrence Wong) ដែលក្នុងឱកាសនោះ ថ្នាក់ដឹកនាំទាំង​ពីរ នឹងផ្លាស់ប្តូរទស្សនៈគ្នាអំពីមធ្យោបាយនានា ក្នុងការធ្វើឱ្យកាន់តែស៊ីជម្រៅនូវទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យជាច្រើន ខណៈដែលប្រទេសទាំងពីរ​នឹងប្រារព្ធខួប​អនុស្សាវរីយ៍​លើកទី៦០ នៃការបង្កើតទំនាក់ទំនងការទូតនៅឆ្នាំក្រោយ។ ថ្នាក់ដឹកនាំទាំងពីរ ក៏រំពឹងថា នឹងពិភាក្សាលើបញ្ហាតំបន់ និងអន្តរជាតិ ដែលជាផលប្រយោជន៍ និងក្តីបារម្ភរួមផងដែរ។ ថ្នាក់ដឹកនាំទាំងពីរ ក៏នឹងអញ្ជើញធ្វើជាអធិបតីក្នុងពិធីចុះហត្ថលេខាលើឯកសារមួយចំនួន និង​ដាក់ឱ្យដំណើរការជាផ្លូវការគម្រោងច្រករបៀងតម្លាភាពហិរញ្ញវត្ថុផងដែរ។ឯកឧត្តម មាស សុភ័ណ្ឌ បានបន្តថា សម្តេចធិបតី ក៏នឹងមានកម្មវិធីសំខាន់ៗមួយចំនួនទៀត រួមមាន៖ (១). ជំនួបសម្តែងការគួរសម ជាមួយ ឯកឧត្តម ថាមេន ស្ហ្សានមូហ្គារ៉ាត់ណាម (Tharman Shanmugaratnam) ប្រធានាធិបតី នៃសាធារណរដ្ឋសិង្ហបុរី (២). ជំនួបសម្តែងការគួរសម ដោយ ឯកឧត្តម លី ស៊ាងឡុង (Lee Hsien Loong) ទេសរដ្ឋមន្ត្រី នៃសាធារណរដ្ឋសិង្ហបុរី (៣). អញ្ជើញជាអធិបតី បើកវេទិកាធុរកិច្ចកម្ពុជា-សិង្ហបុរី និង (៤).អញ្ជើញទស្សនាវិទ្យាស្ថានពហុបច្ចេកទេសណានយ៉ាង និងមជ្ឈមណ្ឌលនវានុវត្តន៍សម្រាប់ឧបករណ៍អេឡិចត្រូនិក និងអ៊ីនធឺណិត ព្រមទាំងអញ្ជើញទស្សនាអគារហេដ្ឋរចនាសម្ព័ន្ធរបស់ក្រុមហ៊ុន Keppel (Keppel’s Infrastructure@Changi)។ឯកឧត្តម មាស សុភ័ណ្ឌ បានគូសបញ្ជាក់ថា សម្ដេចធិបតី នឹងដឹកនាំគណៈប្រតិភូជាន់ខ្ពស់​រាជ​រដ្ឋាភិបាលកម្ពុជា ធ្វើមាតុភូមិនិវត្តន៍មកដល់ព្រះរាជាណាកម្ពុជាវិញ នៅថ្ងៃទី១៩ ខែមិថុនា ឆ្នាំ២០២៤៕

អគារសិក្សាថ្មីកម្ពស់៥ជាន់របស់វិទ្យាស្ថានពហុបច្ចេកទេសខេត្តពោធិ៍សាត់ សម្រេចការសាងសង់បាន ៦០ភាគរយ

2024/06/18 05:19:29 pm        190
Facebook Telegram Linkin
ពោធិ៍សាត់៖ ដំណើរការសាងសង់អគារសិក្សាថ្មីដ៏ទំនើប​កម្ពស់​៥ជាន់​របស់វិទ្យាស្ថាន​ពហុបច្ចេកទេស​ខេត្តពោធិ៍សាត់ ដែលមានឈ្មោះថា “អគារមរតកតេជោសែនឌីជីថល” រហូត​ដល់​ពេល​នេះសម្រេចបាន៦០ភគរយហើយ ដោយគ្រោងសាងសង់ឱ្យរួចរាលនៅចុងឆ្នាំ២០២៤ នេះ​បើ​តាមការលើកឡើងរបស់លោក ង៉ែត តាត នាយកវិទ្យាស្ថានពហុបច្ចេកទេសខេត្តពោធិ៍សាត់ ។ អគារមរតកតេជោសែនឌីជីថល ដែលកំពុងសាងសង់នេះ មានទីតាំងនៅក្នុងបរិវេណ វិទ្យា​ស្ថាន​ពហុ​បច្ចេក​ទេសខេត្តពោធិ៍សាត់ ស្ថិតក្នុងសង្កាត់ផ្ទះព្រៃ ក្រុងពោធិ៍សាត់ មានកម្ពស់​សរុប​២៤.៥​ម៉ែត្រស្មើរ និង​​៥ជាន់ មានទំហំ៤៨ម៉ែត្រ គុណនិង៤៨ម៉ែត្រ បែងចែកជា៧៨បន្ទប់ ក្នុ​ង​នោះ​បន្ទប់​សិក្សា​២០បន្ទប់ -បន្ទប់ពិសោធន៍ធន់ធ្ងន់១១បន្ទប់ -បន្ទប់ពិសោធន៍ធន់ស្រាល១០បន្ទប់ -បន្ទប់​កុំព្យូទ័រ៣បន្ទប់ -សាលសិក្សា២បន្ទប់ បន្ទប់សាស្ត្រាចារ្យ៧បន្ទប់ -បន្ទប់MOP៤បន្ទប់ -បន្ទប់​MEP៤បន្ទប់ រួមនិងឃ្លាំងចំនួន៤បន្ទប់ ។ ក្រោយសាងសង់រួច “អគារមរតកតេជោសែន​ឌីជីថល”​ នឹងមានបំពាក់នូវសម្ភារៈសិក្សា ម៉ាស៊ីនឬឧបករន៍ពិសោធន៍ទំនើបៗ ដែលនឹង​ជួយ​បង្កើន​សមត្ថភាពវិទ្យាស្ថានពហុបច្ចេកទេសខេត្តពោធិ៍សាត់ ក្នុងការបណ្តុះ​បណ្តាល​ធន​ធាន​មនុស្ស​បាន​ប្រមាណ១៥០០នាក់ក្នុង១ឆ្នាំ ខណៈពេលបច្ចុប្បន្ន​វិទ្យាស្ថាន​មាន​លទ្ធភាព​បណ្តុះ​បណ្តាល​សិស្ស​បានត្រឹមតែ៥០០នាក់ក្នុង១ឆ្នាំ ។ក្នុងឱកាសអញ្ជើញចុះពិនិត្យវឌ្ឍនភាពការងារសាងសង់“អគារមរតកតេជោសែនឌីជីថល”នេះ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ មានប្រសាសន៍លើកឡើងថា អគារ​សិក្សា​កម្ពស់៥ជាន់ដ៏ទំនើបនេះ ដែលជាការផ្តល់ជូនដោយរាជរដ្ឋាភិបាលកម្ពុជា តាមរយៈ​ក្រសួងការងារ និង​បណ្តុះបណ្តាលវិជ្ជាជីវៈ គឺជាក្តីសង្ឃឹមមួយថ្មី​សម្រាប់​ប្រជាពលរដ្ឋ​ក្នុង​ខេត្ត​ពោធិ៍សាត់ ជាពិសេសគឺយុវជនក្នុងខេត្ត អាចចូលរៀនជំនាញ់បច្ចេកទេសផ្សេងៗ ស្រប​ពេល​ដែល​ក្រុម​ហ៊ុនមីនីបៀ (Minebea Mitsumi) របស់ប្រទេសជប៉ុន គ្រោងនឹង​បើក​ដំណើរ​ការ​រោង​ចក្រ​ដ៏​ធំទី​២​ របស់ខ្លួនក្នុងពេលឆាប់ៗខាងមុខនេះ នៅស្រុកក្រគរ ដោយត្រូវ​ការ​បុគ្គលិក​ជំនាញ​ជា​ច្រើន​ពាន់​នាក់​ចូលបម្រើការងារ ហើយបច្ចុប្បន្ន ក្រុមហ៊ុនមីនីបៀ និងវិទ្យាស្ថាន​ពហុបច្ចេកទេស​ខេត្តពោធិ៍សាត់ កំពុងពិភាក្សាចុះ​កិច្ច​ព្រម​ព្រៀង​ក្នុងការ​បណ្តុះ​បណ្តាល​ធន​ធាន​មនុស្ស​ស្រប​តាម​ជំនាញ និង​តម្រូវការរបស់ក្រុមហ៊ុន ។ ហើយ“អគារមរតកតេជោសែនឌីជីថល”នេះ ក៏នឹងរួម​ចំណែក ជួយឱ្យខេត្តពោធិ៍សាត់អាចសម្រេចបានតាមផែនការ បណ្តុះបណ្តាលជំនាញវិជ្ជាជីវៈ និង​បច្ចេកទេសទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១,៥ លាននាក់ ដែល​ជា​កម្មវិធីថ្នាក់ជាតិរបស់រាជរដ្ឋាភិបាលកម្ពុជាក្នុងអាណត្តិទី៧នេះ សម្រាប់វិទ្យា​ស្ថាន​ពហុបច្ចេកទេស​ខេត្តពោធិ៍សាត់ គឺមានផែនការបណ្តុះបណ្តាលចំនួន១២៣៣០នាក់ ក្នុង​រយៈពេល​៥ឆ្នាំ ។គួរឱ្យដឹងដែរថា វិទ្យាស្ថានពហុបច្ចេកទេសខេត្តពោធិ៍សាត់ ដែលជាគ្រឹះស្ថានសិក្សារបស់រដ្ឋ មាន​បណ្តុះបណ្តាលមុខជំនាញ់ជាច្រើន មានគ្រប់កម្រិតចាប់ពី វីញ្ញាបនបត្រ(វគ្គខ្លី) រហូត​ដល់​កម្រិត​បរិញ្ញាបត្របច្ចេកវិទ្យា/ឯកទេស/វិស្វករ ក្នុងនោះជំនាញផ្នែកអគ្គិសនី និងផ្នែករថយន្ត សិស្ស​មាន​ការ​ចាប់អារម្មណ៍ចូលរៀនច្រើនជាងគេ ហើយក្រោយ​បញ្ចប់​ការ​សិក្សា​ភាគ​ច្រើន​សិស្ស​មានការងារធ្វើ ជាពិសេសនោក្នុងខេត្តពោធិ៍សាត់ផ្ទាល់ដូចជា រោងចក្រដំឡើងរថយន្តFord រោងចក្រ​ដំឡើង​ត្រង់ហ្វូរ រោងចក្រផលិតនិងដំឡើងបរិក្ខាអគ្គីសនី ជាដើម៕ អត្ថបទ៖ ភិរុណ ពៅ

KCNA ៖ លោក Putin និយាយថា កូរ៉េខាងជើងគាំទ្រយ៉ាងពេញទំហឹង ចំពោះប្រតិបត្តិការរុស្ស៊ីនៅអ៊ុយក្រែន

2024/06/18 05:02:03 pm        163
Facebook Telegram Linkin
លោកប្រធានាធិបតីរុស្ស៊ី Vladimir Putin នៅថ្ងៃអង្គារ ទី១៨ ខែមិថុនា នេះ បានសរសើរប្រទេសកូរ៉េខាងជើង ចំពោះការគាំទ្រយ៉ាងពេញទំហឹង សម្រាប់សង្គ្រាមរបស់ទីក្រុងមូស្គូក្នុងប្រទេសអ៊ុយក្រែន មុនពេលដំណើរទស្សនកិច្ចរបស់លោកទៅកាន់ទីក្រុងព្យុងយ៉ាង ក្នុងគោលបំណងជំរុញទំនាក់ទំនងរវាងសម្ព័ន្ធមិត្តមហាអំណាចអាវុធនុយក្លេអ៊ែរទាំង២។លោក Putin បានសរសេរនៅក្នុងអត្ថបទមួយ ចេញផ្សាយដោយទីភ្នាក់ងារសារព័ត៌មានកណ្តាលផ្លូវការរបស់កូរ៉េខាងជើង KCNA ថា យើងសូមកោតសរសើរយ៉ាងខ្លាំងដែលកូរ៉េខាងជើងកំពុងគាំទ្រយ៉ាងពេញទំហឹងចំពោះប្រតិបត្តិការសឹកពិសេសរបស់រុស្ស៊ី ដែលកំពុងបន្តក្នុងប្រទេសអ៊ុយក្រែន។ លោកបានសរសេរថា ប្រទេសទាំងពីរ ឥឡូវនេះកំពុងអភិវឌ្ឍយ៉ាងសកម្មនូវភាពជាដៃគូពហុភាគីដោយចង្អុលទៅឧទាហរណ៍ ការពិតដែលថារបបក្រុងមូស្គូ និងរបបដឹកនាំកូរ៉េខាងជើង លោក Kim Jong Un បាននឹងកំពុង រក្សាខ្សែបន្ទាត់រួម និងជួយការពារគ្នានៅអង្គការសហប្រជាជាតិ។ ក្រុមអ្នកជំនាញបាននិយាយថា សម្ព័ន្ធមិត្តជាប្រវត្តិសាស្ត្របានរីកដុះដាលចាប់តាំងពីការបង្កើតកូរ៉េខាងជើង បន្ទាប់ពីសង្គ្រាមលោកលើកទី ២ ហើយបច្ចុប្បន្នគេមើលឃើញថាទីក្រុងមូស្គូ និងទីក្រុងព្យុងយ៉ាង បានខិតជិតគ្នាកាន់តែខ្លាំង ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ ២០២២ ខណៈលោក Putin កាន់តែឯកោខ្លាំង និងកំពុងស្វែងរកមិត្ត៕

ប្រមុខណាតូ អំពាវនាវឱ្យមានទំនាក់ទំនងជិតស្និទ្ធជាមួយដៃគូឥណ្ឌូ-ប៉ាស៊ីហ្វិក ព្រោះរុស្ស៊ីមានទំនាក់ទំនងល្អជាមួយកូរ៉េខាងជើង និងចិន

2024/06/18 04:57:58 pm        133
Facebook Telegram Linkin
ប្រមុខអង្គការសន្ធិសញ្ញាអាត្លង់ទិកខាងជើង ឬហៅថាសម្ព័ន្ធយោធា ណាតូ (NATO) បាននិយាយកាលពីថ្ងៃចន្ទសប្ដាហ៍នេះថា ទំនាក់ទំនងដែលកំពុងរីកចម្រើនរបស់រុស្ស៊ីជាមួយកូរ៉េខាងជើង ចិន និងមិត្តផ្សេងទៀត ធ្វើឱ្យកាន់តែមានសារៈសំខាន់សម្រាប់សម្ព័ន្ធភាពឆ្លងមហាសាគរអាត្លង់ទិក ត្រូវធ្វើការយ៉ាងជិតស្និទ្ធជាមួយដៃគូឥណ្ឌូ-ប៉ាស៊ីហ្វិករបស់ខ្លួន។ថ្លែងនៅក្នុងវេទិកាមួយ អគ្គលេខាធិការអង្គការណាតូ លោក Jens Stoltenberg ក៏បានរិះគន់ការគាំទ្ររបស់ចិនសម្រាប់មូលដ្ឋានឧស្សាហកម្មការពារជាតិរបស់រុស្ស៊ីផងដែរ ព្រមទាំងការបញ្ជូនគ្រាប់រំសេវរបស់កូរ៉េខាងជើង និងការផ្តល់យានដ្រូនវាយប្រហាររបស់អ៊ីរ៉ង់ទៅឱ្យរុស្ស៊ីសម្រាប់ប្រើប្រាស់ក្នុងប្រទេសអ៊ុយក្រែន។ការអត្ថាធិប្បាយរបស់លោកធ្វើឡើង ស្របពេលលោកប្រធានាធិបតីរុស្ស៊ីលោក Vladimir Putin គ្រោងទៅបំពេញទស្សនកិច្ចនៅទីក្រុងព្យុងយ៉ាងនៅថ្ងៃអង្គារ និងថ្ងៃពុធ សប្ដាហ៍នេះ ក្នុងដំណើរមួយដែលទំនងជាពង្រឹងកិច្ចសហប្រតិបត្តិការយោធាបន្ថែមទៀតរវាងកូរ៉េខាងជើង និងរុស្ស៊ី។លោកបាននិយាយនៅក្នុងវេទិការៀបចំដោយមជ្ឈមណ្ឌល Wilson Center ថា ការពង្រឹងទំនាក់ទំនងរវាងរុស្ស៊ី និងបណ្ដាមិត្តរបស់ខ្លួននៅអាស៊ី ធ្វើឱ្យកាន់តែមានសារៈសំខាន់ដែលយើងត្រូវធ្វើការយ៉ាងជិតស្និទ្ធជាមួយមិត្តរបស់យើងនៅក្នុងឥណ្ឌូ-ប៉ាស៊ីហ្វិក៕

លោក Netanyahu រំលាយគណៈរដ្ឋមន្ត្រីសង្គ្រាម ខណៈមន្ត្រីជំនិតលោក Biden ទៅកាន់អ៊ីស្រាអែល ដើម្បីទប់ស្កាត់សង្គ្រាមជាមួយក្រុមហេសបេឡា

2024/06/18 03:27:42 pm        144
Facebook Telegram Linkin
លោកនាយករដ្ឋមន្ត្រីអ៊ីស្រាអែល Benjamin Netanyahu បានរំលាយគណៈរដ្ឋមន្ត្រីសង្គ្រាម ដែលត្រូវបានបង្កើតឡើងកាលពីថ្ងៃទី ១១ ខែតុលា ដើម្បីគ្រប់គ្រងយុទ្ធនាការប្រឆាំងក្រុមហាម៉ាស និងក្រុមហេសបូឡា បន្ទាប់ពីការលាលែងរបស់សមាជិកសំខាន់ គឺឧត្តមសេនីយ៍ចូលនិវត្តន៍ បេននីហ្គានស៍ (Benny Gantz)។ប្រភពពីប្រព័ន្ធផ្សព្វផ្សាយក្នុងស្រុកបានឲ្យដឹងថា លោក Netanyahu បាននិយាយថា គណៈរដ្ឋមន្ត្រីនេះ ស្ថិតនៅក្នុងកិច្ចព្រមព្រៀងចម្រុះជាមួយលោក ហ្គានស៍ តាមសំណើរបស់លោក ដូច្នេះបើ លោក Gantz បានចាកចេញទៅហើយនោះ មិនចាំបាច់មានគណៈរដ្ឋមន្ត្រីទៀតទេ។ ភ្លាមៗបន្ទាប់ពីការលាលែងពីតំណែងរបស់លោក Gantz រដ្ឋមន្ត្រីមួយរូបផ្សេងទៀតដែលគ្មានមុខតំណែក្នុងជួររដ្ឋាភិបាល គឺ អតីតប្រធានបុគ្គលិកកងកម្លាំងការពារជាតិ IDF លោក ហ្គាឌី អ៊ីសិនកុត (Gadi Eisenkot) ក៏បានលាលែងពីគណៈរដ្ឋមន្ត្រីផងដែរ ជាទីដែលលោកបម្រើការជាអ្នកសង្កេតការណ៍មួយរូបក្នុងចំណោមអ្នកសង្កេតការណ៍បីរូប ។ ទាំង លោក ហ្គានស៍ ទាំងលោក អ៊ីសិនកុត បានលើកឡើងពីការបរាជ័យរបស់លោក Netanyahu ក្នុងការបង្កើតយុទ្ធសាស្ត្រសម្រាប់សង្គ្រាមនៅដែនដីហ្កាហ្សា ដែលជាហេតុផលសម្រាប់ការលាលែងពីតំណែងរបស់លោកទាំង២។ទីប្រឹក្សាជាន់ខ្ពស់មួយរូបរបស់លោក Biden បានទៅកាន់អ៊ីស្រាអែលកាលពីថ្ងៃចន្ទដើមសប្ដាហ៍នេះដើម្បីជួបមេដឹកនាំអ៊ីស្រាអែល ពិភាក្សាពីវិធានការបន្ថែមទៀតក្នុងការទប់ស្កាត់ការរីកធំនៃជម្លោះរវាងអ៊ីស្រាអែល និងក្រុមហេសបូឡា៕

របាយការណ៍ UN៖ ពិភពលោកកំពុងឃ្លាតចេញពីគោលដៅអភិវឌ្ឍន៍ប្រកបដោយនិរន្តរភាព

2024/06/17 08:44:44 pm        163
Facebook Telegram Linkin
របាយការណ៍របស់អង្គការសហប្រជាជាតិ ដែលលើកឡើងពីកង្វះថវិកា ភាពតានតឹងភូមិសាស្ត្រនយោបាយ និងជំងឺរាតត្បាតកូវីដ-១៩ បានឱ្យដឹងថា ពិភពលោកកំពុងដើរចេញពីទិសដៅអភិវឌ្ឍន៍ប្រកបដោយចីរភាពភាគច្រើនដែលបានព្រមព្រៀងគ្នាក្នុងឆ្នាំ២០១៥ ដូចជាការដោះស្រាយភាពក្រីក្រ និងភាពអត់ឃ្លានជាដើម។របាយការណ៍អភិវឌ្ឍន៍ប្រកបដោយនិរន្តរភាពប្រចាំឆ្នាំរបស់អង្គការសហប្រជាជាតិ បានចាត់ចំណាត់ថ្នាក់ការអនុវត្តនៃរដ្ឋសមាជិកចំនួន ១៩៣ របស់ខ្លួនក្នុងការអនុវត្ត «គោលដៅអភិវឌ្ឍន៍ប្រកបដោយនិរន្តរភាព» (SDGs) ចំនួន ១៧ ចំណុច ដែលរួមបញ្ចូលផងដែរនូវការកែលម្អលទ្ធភាពទទួលបានការអប់រំ និងការថែទាំសុខភាព ការផ្តល់ថាមពលស្អាត និងការការពារជីវចម្រុះ។របាយការណ៍បានរកឃើញថា ពុំមានគោលដៅណាមួយក្នុងចំណោម ១៧ ចំណុចនោះដែលនឹងត្រូវសម្រេចនៅឆ្នាំ២០៣០ នោះទេ ដោយគោលដៅភាគច្រើនបង្ហាញថា «នៅមានកម្រិត ឬដើរថយក្រោយ»។ របាយការណ៍ក៏ជំរុញឱ្យប្រទេសនានាដោះស្រាយបញ្ហាកង្វះថវិការ៉ាំរ៉ៃ ហើយឱ្យអង្គការសហប្រជាជាតិកែប្រែប្រព័ន្ធរបស់ខ្លួន។របាយការណ៍នេះបានកំណត់ការដោះស្រាយភាពអត់ឃ្លាន ការបង្កើតទីក្រុងប្រកបដោយនិរន្តរភាព និងការការពារជីវៈចម្រុះនៅលើដី និងទឹក គឺជាចំណុចកំពុងចុះខ្សោយខ្លាំង។ គោលដៅនយោបាយដូចជាសេរីភាពសារព័ត៌មានក៏បានមើលឃើញពី «ជំហានថយក្រោយ» ផងដែរ។ របាយការណ៍បាននិយាយថា ហ្វាំងឡង់ ស៊ុយអែត និងដាណឺម៉ាក ជាប់ចំណាត់ថ្នាក់កំពូលនៃបញ្ជី SDGs ហើយចិន មានការរីកចម្រើនលឿនជាងមធ្យម ប៉ុន្តែប្រទេសក្រីក្របំផុតនៅលើពិភពលោកកំពុងតែអនុវត្តក្នុងល្បឿនដ៏យឺតយ៉ាវនៃគោលដៅទាំង ១៧ ចំណុចនោះ៕

អាមេរិក រិះគន់វៀតណាម ខ្លាំងៗជុំវិញការរំពឹងទុកនៃដំណើរទស្សនកិច្ចលោក ពូទីន

2024/06/17 08:40:41 pm        179
Facebook Telegram Linkin
មន្ត្រីជាច្រើនបាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នឹងធ្វើទស្សនកិច្ចនៅទីក្រុងហាណូយ នៅសប្តាហ៍នេះ ដោយបង្ហាញពីភាពស្មោះត្រង់របស់វៀតណាម ចំពោះរុស្ស៊ី និងបង្កឱ្យមានការស្តីបន្ទោសពីសហរដ្ឋអាមេរិក។ ដំណើរទស្សនកិច្ចនេះធ្វើឡើងបន្ទាប់ពីទីក្រុងហាណូយ មិនចូលរួមកិច្ចប្រជុំកំពូលសន្តិភាពអ៊ុយក្រែន ក្នុងប្រទេសស្វីស កាលពីចុងសប្តាហ៍ ប៉ុន្តែបានបញ្ជូនអនុរដ្ឋមន្ត្រីការបរទេសរបស់ខ្លួនទៅកិច្ចប្រជុំ ប្រ៊ីកស៍ (BRICS) នៅរុស្ស៊ី កាលពីដើមសប្តាហ៍មុន។ក្រុមមន្ត្រីបាននិយាយថា លោក ពូទីន ដែលបានស្បថចូលកាន់តំណែងជាលើកទីប្រាំកាលពីជាងមួយខែមុន ត្រូវបានគេរំពឹងថានឹងជួបជាមួយប្រធានាធិបតីថ្មីរបស់វៀតណាម លោក តូ ឡាំ (To Lam) និងមេដឹកនាំផ្សេងទៀតក្នុងអំឡុងដំណើរទស្សនកិច្ចរយៈពេលពីរថ្ងៃទៅកាន់ទីក្រុងហាណូយ នៅថ្ងៃពុធ (១៩ មិថុនា) និងថ្ងៃព្រហស្បតិ៍ (២០ មិថុនា) ខាងមុខនេះ។ សហរដ្ឋអាមេរិក ដែលបានធ្វើឱ្យប្រសើរឡើងនូវទំនាក់ទំនងជាមួយទីក្រុងហាណូយកាលពីឆ្នាំមុន និងជាដៃគូពាណិជ្ជកម្មកំពូលរបស់វៀតណាម បានបញ្ចេញប្រតិកម្មយ៉ាងខ្លាំងចំពោះដំណើរនោះ។អ្នកនាំពាក្យស្ថានទូតអាមេរិក នៅទីក្រុងហាណូយ បានប្រាប់សារព័ត៌មានរ៉យទ័រ នៅពេលត្រូវសាកសួរពីផលប៉ះពាល់នៃដំណើរទស្សនកិច្ចនោះលើទំនាក់ទំនងជាមួយអាមេរិក ថា «គ្រប់ប្រទេសទាំងអស់មិនគួរផ្តល់ឱ្យលោក ពូទីន នូវវេទិកាដើម្បីលើកកម្ពស់សង្រ្គាម ឬអនុញ្ញាតឱ្យលោកធ្វើឱ្យមានភាពឃោរឃៅរបស់ខ្លួនក្លាយជារឿងធម្មតានោះទេ»។ ក្រសួងការបរទេសវៀតណាម មិនបានឆ្លើយតបទៅនឹងសំណើសុំការអត្ថាធិប្បាយទេ។ តុលាការព្រហ្មទណ្ឌអន្តរជាតិ (ICC) ដែលមានមូលដ្ឋាននៅទីក្រុងឡាអេ ក្នុងខែមីនា ឆ្នាំ២០២៣ បានចេញដីកាចាប់ខ្លួនប្រធានាធិបតីរុស្ស៊ីរូបនេះ ជុំវិញបទឧក្រិដ្ឋកម្មសង្រ្គាមនៅក្នុងប្រទេសអ៊ុយក្រែន ប៉ុន្តែវៀតណាម រុស្ស៊ី និងអាមេរិក មិនមែនជាសមាជិកតុលាការ ICC ទេ៕

របាយការណ៍៖ សហរដ្ឋអាមេរិក ដើរយឺតជាងចិន រហូតដល់ ១៥ឆ្នាំ លើថាមពលនុយក្លេអ៊ែរ

2024/06/17 08:35:55 pm        122
Facebook Telegram Linkin
របាយការណ៍មួយបាននិយាយនៅថ្ងៃចន្ទ (១៧ មិថុនា) នេះថា សហរដ្ឋអាមេរិក កំពុងដើរយឺតជាងប្រទេសចិន រហូតដល់ ១៥ ឆ្នាំលើការអភិវឌ្ឍថាមពលនុយក្លេអ៊ែរបច្ចេកវិទ្យាខ្ពស់ ខណៈវិធីសាស្រ្តបច្ចេកវិទ្យាដែលគាំទ្រដោយរដ្ឋរបស់ទីក្រុងប៉េកាំង និងការផ្តល់ហិរញ្ញប្បទានយ៉ាងទូលំទូលាយធ្វើឱ្យចិន មានប្រៀបជាងអាមេរិក។ការសិក្សាដោយមូលនិធិព័ត៌មានវិទ្យា និងនវានុវត្តន៍ (ITIF) ដែលជាវិទ្យាស្ថានស្រាវជ្រាវមានមូលដ្ឋាននៅទីក្រុងវ៉ាស៊ីនតោន បាននិយាយថា ប្រទេសចិន មានម៉ាស៊ីនរ៉េអាក់ទ័រនុយក្លេអ៊ែរចំនួន ២៧ គ្រឿងដែលកំពុងសាងសង់ ជាមួយនឹងរយៈពេលសាងសង់ជាមធ្យមប្រហែល ៧ ឆ្នាំ ពោលគឺលឿនខ្លាំងជាងប្រទេសដទៃទៀត។សហរដ្ឋអាមេរិក មានរោងចក្រថាមពលនុយក្លេអ៊ែរដ៏ធំបំផុតរបស់ពិភពលោក ហើយរដ្ឋបាលរបស់ប្រធានាធិបតី ចូ បៃដិន (Joe Biden) ចាត់ទុកប្រភពអគ្គិសនីដែលស្ទើរតែគ្មានការបំភាយឧស្ម័ននេះ ថាមានសារៈសំខាន់ក្នុងការទប់ស្កាត់បម្រែបម្រួលអាកាសធាតុ។ ប៉ុន្តែបន្ទាប់ពីរោងចក្រធំៗចំនួនពីរនៅរដ្ឋ ចចា (Georgia) បានដំណើរការក្នុងឆ្នាំ២០២៣ ហើយឆ្នាំ ២០២៤ ត្រូវការចំណាយទឹកប្រាក់រាប់ពាន់លានដុល្លារលើសគម្រោងថវិកា រួមទាំងការពន្យារពេលជាច្រើនឆ្នាំ ពុំមានម៉ាស៊ីនរ៉េអាក់ទ័រនុយក្លេអ៊ែររបស់អាមេរិក ណាមួយកំពុងត្រូវបានសាងសង់ទេ។ធនាគារគ្រប់គ្រងដោយរដ្ឋរបស់ចិន អាចផ្តល់ប្រាក់កម្ចីដល់កម្រិតទាបបំផុតចំនួន ១,៤ ភាគរយ ដែលទាបខ្លាំងជាងលោកខាងលិច។ ឧស្សាហកម្មថាមពលនុយក្លេអ៊ែររបស់ចិន បានទទួលអត្ថប្រយោជន៍ពីការគាំទ្ររបស់រដ្ឋបែបនោះ រួមទាំងការគាំទ្រប្រកបដោយនិរន្តរភាព និងយុទ្ធសាស្ត្រធ្វើមូលដ្ឋានីយកម្ម ដែលបានអនុញ្ញាតឱ្យចិន នាំមុខលើវិស័យជាច្រើនដូចជាថាមពលកកើតឡើងវិញ និងរថយន្តអគ្គិសនី (EVs) ជាដើម៕

សម្តេចធិបតី ហ៊ុន ម៉ាណែត ផ្តល់អនុសាសន័៦ចំណុច ដើម្បីការអភិវឌ្ឍប្រកបដោយសោភ័ណភាពរាជធានីភ្នំពេញ

2024/06/17 08:18:59 pm        236
Facebook Telegram Linkin
ក្នុងឱកាសអញ្ជើញជាអធិបតីក្នុងពិធីបើកការដ្ឋានស្ថាបនាស្ពានអាកាសភ្លោះតាមបណ្តោយមហាវិថីសម្តេចតេជោ ហ៊ុន សែន ប្រសព្វជាមួយនឹងផ្លូវជាតិលេខ២ត្រង់ចំណុចព្រំប្រទល់រវាងរាជធានីភ្នំពេញនិងខេត្តកណ្តាល នាព្រឹកថ្ងៃទី១៧មិថុនា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្តល់អនុសាសន៍ណែនាំ៦ចំណុចទៅកាន់រដ្ឋបាលរាជធានីភ្នំពេញ និងបណ្តាក្រសួងស្ថាប័នពាក់ព័ន្ធ ក្នុងការរៀបចំផែនការមេ សម្រាប់ការអភិវឌ្ឍហេដ្ឋារចនាសម្ព័ន្ធក្នុងរាជធានីភ្នំពេញ ឱ្យបានល្អប្រកបដោយសោភ័ណភាព ។សម្តេចធិបតីបានមានប្រសាសន៍ថា ដើម្បីជំរុញការអភិវឌ្ឍទីក្រុងឲ្យកាន់តែទំនើប និងឆ្លើយតបទៅនឹងការកើនឡើងនៃនគររូបនីយកម្ម សម្តេចបានផ្តល់នូវទស្សនៈនិងអនុសាសន៍៦ចំណុច៖ទី១. ចំពោះការស្ថាបនាហេដ្ឋារចនាសម្ព័ន្ធរូបវន្តក្នុងទីក្រុង, ក្រសួង-ស្ថាប័នជំនាញ និងរដ្ឋបាលរាជធានីភ្នំពេញត្រូវបន្តអនុវត្តដោយឈរលើគោលការណ៍ជាអាទិភាព ២ គឺ ១).បង្កើនល្បឿនការ អភិវឌ្ឍទីក្រុងដោយត្រូវដើរឱ្យបានមុនសេចក្តីត្រូវការរបស់ប្រជាជន និងបង្កើនការវិនិយោគស្របតាមប្លង់គោលប្រើប្រាស់ដីធ្លីរាជធានីភ្នំពេញឆ្នាំ២០៣៥, និង ២). ផ្តើមគិតពីកិច្ចការសាងសង់ សំណង់នីមួយៗឱ្យស្របតាមការវិវត្តនៃតម្រូវការអភិវឌ្ឍសេដ្ឋកិច្ច និងសង្គមជាតិ ។ទី២. រដ្ឋបាលរាជធានីភ្នំពេញ ត្រូវបន្តសិក្សាបន្ថែមអំពីការប្រើប្រាស់បច្ចេកវិទ្យាថ្មីៗ ដែលមាន​លក្ខណៈទំនើប, វ័យឆ្លាត និងសន្សំសំចៃខ្ពស់ ក្នុងគម្រោងហេដ្ឋារចនាសម្ព័ន្ធ​រូបវន្តនានា​ក្នុងរាជធានីភ្នំពេញ, ដូចជាការបំពាក់កាមេរ៉ាសុវត្ថិភាព, អំពូលសូឡា និងប្រព័ន្ធស្រោចស្រព​ស្វ័យប្រវត្តិ​នៅតាមសួនច្បារសាធារណៈ ដើម្បីឱ្យទីក្រុងរបស់យើងកាន់តែមានភាពទាក់ទាញ និងប្រណីត ស័ក្តិសមជាទីក្រុងឆ្លាត។​ទី៣. រដ្ឋបាលរាជធានីភ្នំពេញ ត្រូវបង្កើនការដាំដុះគម្របបៃតងក្នុងទីក្រុង ដើម្បីកាត់បន្ថយកម្ដៅ និងឧស្ម័នផ្ទះកញ្ចក់ ជាពិសេសនៅតាមតំបន់ការដ្ឋានដែលត្រូវស្ថាបនាហេដ្ឋារចនាសម្ព័ន្ធរូបវន្តថ្មីៗ,ដូចក្នុងករណីការដាំដើមឈើបន្ថែមនៅចំណុចគល់ស្ពានជ្រោយចង្វារត្រើយខាងលិច និងគម្រោង «ស្ពានអាកាសមរតកតេជោ» ជាដើម។ទី៤. រដ្ឋបាលរាជធានីភ្នំពេញ ត្រូវខិតខំជំរុញការអនុវត្តផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចដោយទឹកភ្លៀង នៅតំបន់ភូមិសាស្ដ្ររាជធានី​ភ្នំពេញ សំដៅធ្វើយ៉ាងណាឱ្យទីក្រុងរបស់យើងកាន់តែមានភាពធន់ទៅនឹងការប្រែប្រួល​អាកាសធាតុ។ ទន្ទឹមនេះ រដ្ឋបាលរាជធានីភ្នំពេញត្រូវបន្តចុះពិនិត្យដោះស្រាយប្រព័ន្ធបណ្តាញលូ អណ្ដូងលូ និងប្រឡាយរំដោះទឹកព្រមទាំងត្រៀមជាស្រេច ដើម្បីធ្វើអន្តរាគមន៍​ចំពោះករណី​ជំនន់ទឹកភ្លៀង និងប្រធានសក្ដិនានា ដែលអាចកើតមានជាយថាហេតុ។ទី៥. រដ្ឋបាលរាជធានីភ្នំពេញ ត្រូវបន្តយកចិត្តទុកដាក់អនុវត្តគោលនយោបាយ«ភូមិ ឃុំ សង្កាត់ មានសុវត្ថិភាព» ដែលជាអាទិភាពគន្លឹះមួយរបស់រាជរដ្ឋាភិបាល ដើម្បីពង្រឹងការងារសន្តិសុខ និងសណ្ដាប់ធ្នាប់សាធារណៈ (បង្ក្រាបចោរឆក់ ចោរលួច ចោរប្លន់ និងក្មេងទំនើងទាំង​តាមសាលារៀន និង ក្នុងសហគមន៍​ធានាការពារសុវត្ថិភាពជូនបងប្អូនប្រជាពលរដ្ឋ និង ភ្ញៀវទេសចរ​ជាតិ-អន្តរជាតិ ឱ្យបានល្អប្រសើរ ពោលគឺត្រូវបន្តចាត់វិធានការឱ្យបានជាប្រចាំ​ជាប់មិនដាច់ដូចភ្លៀងរលឹម ដោយមិនត្រូវ លើកលែងឡើយ។ទី៦. រដ្ឋបាលរាជធានីភ្នំពេញ ត្រូវយកចិត្តទុកដាក់រំដោះចញ្ចើមផ្លូវក្នុងទីក្រុងឱ្យខាងតែបាន ដើម្បីសម្រួលចរាចរណ៍ និងកាត់បន្ថយការកកស្ទះចរាចរណ៍សំដៅ​, ម្យ៉ាងកាត់បន្ថយថ្លៃនៃការធ្វើដំណើរ (ចំណេញពេល និង សេដ្ឋកិច្ច), បង្កើនសេវាកម្មជិះរថយន្តក្រុង និង ម៉្យាងទៀតកាត់បន្ថយ ផលប៉ះពាល់ដល់បរិស្ថាននៅក្នុងទីក្រុង ជាមួយនឹងការ​បង្កើន​សម្រស់របស់រាជធានីយើង។ បន្ថែមលើនេះ​ ចំពោះការកកស្ទះចរាចរណ៍នៅម៉ោងទៅ និងចេញ​ពីបម្រើការងារ (Rush Hours)​ រដ្ឋបាលរាជធានី ភ្នំពេញត្រូវដាក់កម្លាំងនគរបាលសម្រួលចរាចរណ៍ ជូនប្រជាពលរដ្ឋរហូតដល់ស្ថានភាពចរាចរណ៍ត្រឡប់មកសភាពធម្មតាវិញទើបកម្លាំងចេញ ដើម្បីកាត់បន្ថយផលប៉ះពាល់ដល់ចរាចរធ្វើដំណើររបស់ប្រជាជន។សម្តេចក៏បាន អំពាវនាវដល់ប្រជាពលរដ្ឋដែលរស់នៅជុំវិញតំបន់ការដ្ឋាន​និងអ្នកដំណើរឆ្លងកាត់​ទាំងឡាយ សូមមេត្តាចូលរួមសហការផ្ដល់ភាពអធ្យាស្រ័យ​យោគយល់​និងអត់ធ្មត់​ចំពោះផលប៉ះពាល់ និងការរំខាននានាដែលអាចកើតឡើង ដោយសារការដ្ឋានស្ថាបនាស្ពានអាកាសថ្មីដែលនឹងចាប់ផ្ដើមនៅពេលនេះ៕

បណ្ដាញសង្គម

ព័ត៌មានថ្មីៗ

រុស្ស៊ីបង្កើនវោហារសាស្ត្រជុំវិញតំបន់ Kaliningrad ដោយគំរាមប្រើអាវុធនុយក្លេអ៊ែរប្រឆាំងនឹងអង្គការ NATO
09/30/2026 01:09 PM
Facebook Telegram Linkin
សម្ដេចធិបតី៖ ប្រាក់ឈ្នួលគោលរួមប្រាក់អត្ថប្រយោជន៍ផ្សេងទៀតឆ្នាំ២០២៧ កម្មករនិយោជិត ត្រូវ​ទទួលបានចន្លោះពី ២៣១,៥ដុល្លារ ដល់ ២៤២,៥ ដុល្លារក្នុងមួយខែ
09/30/2026 01:09 PM
Facebook Telegram Linkin
មេដឹកនាំអ៊ុយក្រែន៖ ប្រទេសបែលហ្ស៊ិកនឹងផ្ទេរយន្តហោះF-16 បីគ្រឿងទៅឱ្យអ៊ុយក្រែននៅឆ្នាំនេះ
09/30/2026 01:09 PM
Facebook Telegram Linkin
សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេង សំរិន អញ្ជើញកាន់បិណ្ឌវេនទី៤នៅវត្តក្រពើហា
09/30/2026 01:09 PM
Facebook Telegram Linkin
ឯកឧត្តម អូន ព័ន្ធមុនីរ័ត្ន អញ្ជើញដាក់ដំណើរការផែនការប្រតិបត្តិសម្រាប់អនុវត្តន៍គោលការណ៍ណែនាំក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្នឆ្នាំ២០២៦-២០៣០
09/30/2026 12:09 PM
Facebook Telegram Linkin
គ.ជ.ប នឹងរៀបចំសម្រួលដល់ពលរដ្ឋភៀសសឹក ​សម្រាប់ការពិនិត្យបញ្ជីឈ្មោះ និង​ចុះ​ឈ្មោះ​បោះឆ្នោត​ឆ្នាំ២០២៦
09/30/2026 12:09 PM
Facebook Telegram Linkin
សម្តេច ម៉ែន សំអន អញ្ជើញរាប់បាត្រវេនកាន់បិណ្ឌទី៤ ឧទ្ទិសកុសលជូនដល់ដួងវិញ្ញាណក្ខន្ធអ្នកស្នេហាជាតិ បុព្វការីជន កម្មាភិបាល យុទ្ធជន យុទ្ធនារី ញាតិកាទាំង​៧សន្ដាន ដែលបានពលី ជីវិតដើម្បីបុព្វហេតុជាតិ មាតុភូមិ
09/30/2026 12:09 PM
Facebook Telegram Linkin
ប្រាក់ឈ្នួលអប្បបរមាកម្មករនិយោជិតក្នុងវិស័យកាត់ដេរសម្រាប់ឆ្នាំ២០២៧ ឡើងដល់ ២១២ ដុល្លារ
09/30/2026 12:09 PM
Facebook Telegram Linkin
សម្ដេចកិត្តិព្រឹទ្ធបណ្ឌិត ចាត់មន្ត្រីនាំ​អំណោយ​មនុស្ស​ធម៌​ជូន​ពលរដ្ឋ​រង​គ្រោះ​ទឹកជំនន់​នៅ​ខេត្តបន្ទាយមានជ័យ
09/30/2026 12:09 PM
Facebook Telegram Linkin
វត្តអារាមបន្តយកចិត្តទុកដាក់លើការរក្សាអនាម័យ ក្នុងអំឡុងពេលបុណ្យកាន់បិណ្ឌ
09/30/2026 11:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.