នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម
ក្រុមហ៊ុន Huawei វាយតម្លៃខ្ពស់ចំពោះកិច្ចសហការល្អប្រសើររបស់ក្រសួងស្ថាប័នពាក់ព័ន្ធ ក្នុងវិស័យបច្ចេកវិទ្យា

នយោបាយ​ និង ការអភិវឌ្ឍន៍

ក្រសួងសាធារណការ៖ ការកែលម្អផ្លូវជាតិលេខ៤ នៅតែបន្តធ្វើរាល់ថ្ងៃ តែកន្លែងខ្លះផ្អាកសិន​ដោយសារ​បញ្ហាភ្លៀង

2024/09/16 09:35:17 pm        631
Facebook Telegram Linkin
ភ្នំពេញ៖ ក្រសួងសាធារណការ និងដឹកជញ្ជូន បានប្រកាសថា សកម្មភាពការពង្រីក និង​ថែទាំ​ផ្លូវ​ជាតិ​លេខ៤ នៅតែបន្តរាល់ថ្ងៃ ប៉ុន្តែដោយសារតំបន់ខ្លះមានភ្លៀងធ្លាក់ជោគជាំស្ទើររាល់ថ្ងៃ ទើប​បណ្ដាល​ឲ្យ​ក្រុម​ការងារការដ្ឋាន នៅតាមចំណុចមួយចំនួន ត្រូវបានផ្អាក​ដំណើរ​ការ​ជា​បណ្ដោះ​អាសន្ន ដោយត្រូវរង់ចាំស្ថានភាពអាកាសធាតុល្អប្រសើរឡើងវិញ។ក្នុងសេចក្តីជូនដំណឹងរបស់ក្រសួងសាធារណការ និងដឹកជញ្ជូន កាលពីពេលថ្មីៗនេះ បាន​ឲ្យ​ដឹង​ថា ថ្មីៗនេះ មានការចុះផ្សាយនូវព័ត៌មានមិនពិត អំពីគម្រោងលើកកម្រិតពង្រីក និងថែទាំ​ផ្លូវ​ជាតិ​លេខ​៤ ដែលខ្លឹមសារផ្សាយ មានភាពប្រាសចាកពីភាពពិតរបស់គម្រោង ដែលបាន​និង​កំពុង​ដំណើរ​ការ​អនុវត្ត ស្ថិតក្រោមការគ្រប់គ្រង របស់ក្រសួងសាធារណការ និងដឹកជញ្ជូន ។សេចក្តីជូនដំណឹងបន្តថា គម្រោងលើកកម្រិត និងថែទាំផ្លូវជាតិលេខ៤ មានប្រវែងសរុប ១៩៦,១​គីឡូម៉ែត្រ ប្រើប្រាស់ហិរញ្ញប្បទានពីធនាគារពិភពលោក បាននិងកំពុង​បន្ត​បេសកកម្ម​ការងារ​សាង​សង់​ជា​រៀង​រាល់​ថ្ងៃ ។ ការអវឌ្ឍនេះ អាចធានាបានប្រសិទ្ធភាព និងការការពារការជន់លិចផ្លូវ​ជាតិ​លេខ​៤ ពីជំនន់ទឹកភ្លៀងដូចនាឆ្នាំកន្លងមក ហើយក្រសួង ជាមួយក្រុមហ៊ុនម៉ៅការសាងសង់ និង​ក្រុមហ៊ុនទីប្រឹក្សាបច្ចេកទេស នឹងខិតខំបន្តជំរុញសកម្មភាពសាងសងបន្ថែមទៀត បន្ទាប់​ពី​ផុត​រដូវ​វស្សា​នេះ។បើតាមសេចក្តីបំភ្លឺរបស់ក្រុមហ៊ុន ប៉ូលី ចាងដា អេនជីនារីង ឯ.ក បានឲ្យដឹងថា គម្រោងស្ថាបនា​ស្ពាន​តាម​បណ្តោយផ្លូវជាតិលេខ៤ បានចាប់ផ្ដើមពីខែឧសភា ឆ្នាំ២០២៣ ត្រូវស្ថាបនាសរុប ៩១២​ថ្ងៃ ហើយនឹងបញ្ចប់នៅខែវិច្ឆិកា ឆ្នាំ២០២៥ ។ គម្រោងនេះ មានស្ពានចំនួន៣៧ ក្នុងនោះ​ស្ពាន​ធ្វើ​ថ្មី​៨ និងពង្រីក២៩ ហើយរហូតមកដល់ពេលនេះ គម្រោងបានបញ្ចប់ការងារជាង ៥០​ភាគរយ។ភាគីក្រុមហ៊ុន បន្តថា ក្រុមហ៊ុនតែងអនុវត្តការគ្រងគ្រងចរាចរណ៍ ធ្វើផ្លូវវៀងដោយ​មាន​ការ​ត្រួត​ពិនិត្យ និងអនុម័តដោយក្រុមហ៊ុន ប្រឹក្សារបច្ចេកទេសអន្តរជាតិ ដើម្បីពង្រឹងសុវត្ថិភាពកម្មករ និង​សាធារណជនដែលប្រើប្រាស់ផ្លូវ ហើយក្រុមហ៊ុនតែងតែអនុវត្តជារៀងរាល់ខែការថែទាំ និង​ជួស​ជុល​ផ្លូវ​វៀង និងផ្លូវដែលមានស្រាប់ នៅតាមទីតាំងស្ថិតក្រោមកុងត្រា របស់ខ្លួន ដើម្បីធា​នា​នូវ​សុវត្ថិភាព និងដើម្បីបង្ហាញការប្តេជ្ញារបស់ក្រុមហ៊ុន ក្នុងការអនុវត្តន៍គម្រោងយ៉ាងជាប់លាប់ ។គួរ​បញ្ជាក់ថា ផ្លូវជាតិលេខ៤ ជាផ្លូវសេដ្ឋកិច្ចសំខាន់ និងមានចរាចរណ៍មមាញឹក ហើយ​អាកាស​ធាតុ មានការបម្រែបម្រួលខុស ពីតំបន់មួយចំនួនផ្សេងទៀត ជាពិសេសក្នុងរដូវវស្សា ដែល​តម្រូវ​ឱ្យមា​ន​ការខិតខំបន្ថែមទ្វេរដង ក្នុងការជួសជុល និងថែរក្សាផ្ផ្លូវបណ្ដោះអាសន្ន ទាំងនោះ ដូច​នេះ​ក្រុម​ហ៊ុន​ទទួលការសាងសង់ បាបស្នើសុំការយោគយល់ និងអធ្យាស្រ័យខ្ពស់ពីប្រជាពលរដ្ឋ ក្នុង​ករណី​មាន​ផលរំខានណាមួយក្នុងកំឡុងពេលសាងសង់នេះ៕ អត្ថបទ បាន សុខរិទ្ធិ 

អ្នកនយោបាយអាមេរិក ធូរចិត្តដែលលោក Trump មានសុវត្ថិភាព ក្រោយការប៉ុនប៉ងធ្វើឃាតលើកទីពីរ

2024/09/16 07:02:26 pm        142
Facebook Telegram Linkin
ប្រធានាធិបតីសហរដ្ឋអាមេរិក លោក Joe Biden និងអ្នកនយោបាយជាន់ខ្ពស់ជាច្រើនរូបទៀតកាលពីថ្ងៃអាទិត្យ (១៥ កញ្ញា) បានសម្ដែង «ការធូរចិត្ត» និងត្រេកអរដែលបេក្ខជនប្រធានាធិបតីនៃបក្សសាធារណរដ្ឋ លោក Donald Trump មិនមានគ្រោះថ្នាក់ បន្ទាប់ពីអង្គភាព FBI បានរារាំងអ្វីដែលហាក់ដូចជាការប៉ុនប៉ងធ្វើឃាត ខណៈពេលលោកកំពុងលេងកីឡាវាយកូនហ្គោលនៅក្រុង West Palm Beach រដ្ឋ Florida ។នៅក្នុងការបង្ហោះជាបន្តបន្ទាប់នៅលើគណនី X ផ្លូវការរបស់ខ្លួន លោក Biden បាននិយាយថា លោកបានបញ្ជាក្រុមការងារដើម្បីធានាថាសេវាសម្ងាត់មានធនធានដែលត្រូវការដើម្បីធានាសុវត្ថិភាពរបស់លោក Trump ហើយមានអារម្មណ៍ធូចិត្តដែលលោកមិនមានគ្រោះថ្នាក់។ បេក្ខភាពប្រធានាធិបតីនៃបក្សប្រជាធិបតេយ្យ លោកស្រី Kamala Harris បានលើកឡើងថា «ខ្ញុំរីករាយដែលគាត់មានសុវត្ថិភាព»។ ដៃគូរបស់លោកស្រី Harris គឺលោក Tim Walz និងមិត្តរួមដំណែងរបស់លោក Trump គឺលោក JD Vance បានសម្ដែងក្ដីរីករាយដែលលោក Trump ពុំមានគ្រោះថ្នាក់ ខណៈអ្នកនយោបាយផ្សេងទៀតក៏បានបង្ហាញក្ដីបារម្ភរបស់ពួកគេផងដែរ។ គួររម្លឹកថា ភ្នាក់ងារសេវាសម្ងាត់បានប្រទះឃើញ និងបាញ់ទៅលើខ្មាន់កាំភ្លើងម្នាក់នៅក្នុងគុម្ពោតព្រៃក្បែរទីលានវាយកូនហ្គោលនោះ ដែលមានចម្ងាយពីរបីរយម៉ែត្រប៉ុណ្ណោះពីទីតាំងលោក Trump។ ជនសង្ស័យបានបន្សល់ទុកកាំភ្លើង AK-47 មួយដើម និងសម្ភារមួយចំនួនទៀតនៅកន្លែងកើតហេតុ ហើយជិះរថយន្តគេចខ្លួន ប៉ុន្តែក្រោយមកត្រូវបានចាប់ខ្លួន។ការប៉ុនប៉ងធ្វើឃាតលើលោក Trump នេះបានកើតឡើងត្រឹមតែ ២ខែប៉ុណ្ណោះ បន្ទាប់ពីលោកបានរួចរស់ជីវិតពីការបាញ់ប្រហារក្នុងឯការជួបជុំយុទ្ធនាការមួយនៅរដ្ឋ Pennsylvania ដោយបានរងរបួសតិចតួចនៅត្រចៀកខាងស្តាំ៕

សម្ដេចធិបតី៖ រាជរដ្ឋាភិបាលបាននឹងកំពុងផ្ទេរធនធានសុខាភិបាលទៅមូលដ្ឋាន ដើម្បីផ្ដល់សេវាមានគុណដល់ពលរដ្ឋ

2024/09/16 06:25:00 pm        166
Facebook Telegram Linkin
ក្នុងឱកាសអញ្ជើញជាអធិបតីពិធីបញ្ចុះបឋមសិលាបើកការដ្ឋានសាងសង់អគារបន្ថែមនៅមន្ទីរពេទ្យកាល់ម៉ែត រាជធានីភ្នំពេញ នៅព្រឹកថ្ងៃ ទី១៦ ខែកញ្ញា ឆ្នាំ២០២៤នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍បញ្ជាក់ថា បច្ចុប្បន្នរាជរដ្ឋាភិបាលបាន នឹងកំពុងផ្ទេរធនធាននានា ក្នុងវិស័យសុខាភិបាលឱ្យបានទៅដល់មូលដ្ឋាន ដើម្បីផ្ដល់សេវាមានគុណល្អជូនដល់ពលរដ្ឋ។សម្ដេចធិបតី នាយករដ្ឋមន្រ្ដីមានប្រសាសណ៍ថា រាជរដ្ឋាភិបាលជាច្រើនអាណត្តិមកហើយ បានយកចិត្តទុកដាក់ជាសំខាន់ដើម្បីឱ្យប្រជាពលរដ្ឋមានលទ្ធភាពទទួលបានសេវាសុខាភិបាល ក្នុងនោះលទ្ធភាពទី១ គឺការពង្រីកសេវាសុខាភិបាល តាមរយៈការជំរុញសេវាសុខាភិបាល​ទៅ​មូលដ្ឋាន ការកសាងប៉ុស្ដិ៍សុខភាព មណ្ឌលសុខភាព ពេទ្យបង្អែកស្រុក ដែលការងារនេះ​បានពង្រីកជាប្រចាំ បូកផ្សំជាមួយនឹងការកសាងពង្រឹងហេដ្ឋារចនាសមព័ន្ធតភ្ជាប់ ដែលនេះជាកិច្ចការងារដ៏សំខាន់សម្រាប់គាំទ្រដល់ពលរដ្ឋនៅមូលដ្ឋានដោយផ្ទាល់។ សម្ដេចធិបតីមានប្រសាសន៍ថា រាជរដ្ឋភិបាល បាននឹងកំពុងធ្វើការកែលម្អហេដ្ឋារចនាសម្ព័ន្ធរូបវន្ត ការបំពាក់ឧបករណ៍ពេទ្យ ការបណ្ដុះបណ្ដាល ការជ្រើសរើស និងការពង្រាយគ្រូពេទ្យ និង​បុគ្គលិកបច្ចេកទេស ក៏ដូចជាការផ្គត់ផ្គង់ឱសថជាសារវន្ត នៅតាមមណ្ឌលសុខភាព និងមន្ទីរពេទ្យ​បង្អែក ស្រុក ខេត្ត ដើម្បីពង្រឹងសមត្ថភាពផ្ដល់សេវាថែទាំសុខភាពដោយគុណភាពជូន​ប្រជាពលរដ្ឋនៅមូលដ្ឋាន។ សម្ដេចបន្តថា លើសនេះរាជរដ្ឋាភិបាលបានពង្រីកបន្ថែមនៃការគ្រប់ដណ្ឌប់នៃកម្មវិធីមូល​និធិសមធម៌​សង្គមសុខាភិបាលជូនដល់គ្រួសារងាយរងគ្រោះ និងក្រុមគោលដៅក្នុងសេដ្ឋកិច្ច​ក្រៅប្រព័ន្ធ របបសន្ដិសុខសង្គមផ្នែកថែទាំសុខភាព ប.ស.ស. ដល់សមាជិកគ្រួសារ និងអ្នកនៅ​ក្នុងបន្ទុកសមាជិក ប.ស.ស និងប្រជាជនស្វ័យនិយោជន៍ ដែលឈរលើគោលការណ៍​ស្ម័គ្រចិត្ត​ ព្រមទាំងវិធីជំនួយ​សង្គមផ្សេងទៀត ​ដល់ប្រជាជនគោលដៅ។សម្ដេចធិបតី បញ្ជាក់ថា រាជរដ្ឋាភិបាលនីតិកាលទី៧ ក៏ដូចជានីកាលមុនៗនៃរដ្ឋសភា ចាត់ទុការអភិវឌ្ឍធនធានមនុស្សប្រកបដោយគុណភាពខ្ពស់ នៅក្នុងនោះសុខភាពល្អរួមចំណែក​យ៉ាងសំខាន់​ដល់សមត្ថភាពក្នុងការស្រូបយកចំណេះដឹងទូលំទូលាយ និងជំនាញឯកទេសពិតប្រាកដប្រកបដោយសីលធម៌វិជ្ជាជីវ ដែលទាំងនេះ គឺជាអាទិភាពគន្លឹះទីមួយដែល ដើម្បីជំរុញការអភិវឌ្ឍសង្គម សេដ្ឋកិច្ចប្រកបដោយប្រសិទ្ធភាព និងបរិយាបន្ន ភាពធន់ និងចីរភាព។ សម្ដេចបន្តថា ក្នុងន័យនេះ រាជរដ្ឋាភិបាលតែងតែខិតខំរិះរកយន្តការចាំបាច់នានា ដែលមានប្រសិទ្ធភាព និងការវិភាជថវិកាយ៉ាងច្រើនជាបន្តបន្ទាប់ដើម្បីលើកកម្ពស់សុខភាព និងសុខុមាលភាពរបស់ប្រជាជនគ្រប់រូបឱ្យកាន់តែប្រសើរជាលំដាប់ ដោយផ្ដោតជាសំខាន់​លើការកាត់​បន្ថយការឈឺ និងការស្លាប់ដែលបណ្ដាលមកពីជំងឺជាពិសេសជំងឺមិនឆ្លងចំបងៗ ការលើកកម្ពស់សុខភាពបន្តពូជ សុខភាពមាតា​ និងទារកកម្ពុជា ​និងអាហារូបត្ថម្ភ ការការពារ​សុខភាពសាធារណៈ និងការការពារ និងគ្រប់គ្រងគ្រោះអាសន្នសុខភាពជាដើម។សូមជម្រាបថា រាជរដ្ឋាភិបាលអាណត្តិទី៧ បានដាក់ចេញគោលនយោបាយអាទិភាពចំនួន ៦ ចំណុច​សម្រាប់ចាប់ផ្ដើមអនុវត្តភ្លាមៗនៅក្នុងឆ្នាំ ២០២៣ នៅក្នុងនោះកម្មវិធីគោលនយោបាយ​អាទិភាពទី១ ​គឺការពង្រីកសេវាសុខភាពសុខាភិបាល ឆ្ពោះទៅរកការគ្រប់ដណ្ដប់សុខភាព​ជា​សកលដោយចាប់ផ្ដើមពីទី១ ​ការផ្គត់ផ្គង់សេវាជូនគ្រោះសារងាយរងហានិភ័យប្រមាណជាង ៤០ ម៉ឺនគ្រួសារ ដែលមានសមាជិកសរុប​ចំនួន ១,៥ លាននាក់ តាមរយៈការប្រើប្រាស់​មូលនិធិសមធម៌​សុខាភិបាល។ ទី២ ការពង្រីករបបថែទាំសុខភាព ប.ស.ស. ទាំងសម្រាប់​កម្មករនិយោជិត និងមន្រ្ដីសាធារណៈដែលគ្រប់ដណ្ដប់បន្ថែមដោយសមាជិក​គ្រួសារនៅក្នុងបន្ទុកប្រមាណ ៣ លាននាក់តាមគោលការណ៍ស្ម័គ្រចិត្ត។ សរុប គម្រោងទាំងពីរនឹងធ្វើឱ្យប្រជាជនប្រមាណ ៧,៤ លាននាក់ ទទួលបានរបបសន្ដិសុខសង្គមផ្នែកថែទាំសុខភាព៕

រាជរដ្ឋាភិបាលអាណត្តិទី៧ នឹងខិតខំពង្រឹងគុណភាពតាមមណ្ឌលសុខភាព ឲ្យកាន់តែល្អប្រសើរបន្ថែមទៀត

2024/09/16 06:07:04 pm        147
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងជាថ្មីម្តងទៀតថា រាជរដ្ឋាភិបាល​អាណត្តិទី៧ នីតិកាលរដ្ឋសភានេះ នឹងខិតខំពង្រឹងគុណភាពនៅតាមមណ្ឌលសុខភាព​នៅ​ទូទាំងប្រទេសទាំងអស់ ​ឲ្យកាន់តែល្អប្រសើរបន្ថែមទៀត ពោលគឺត្រូវតែផ្តល់សេវាជូនបងប្អូន​ប្រជាពលរដ្ឋ ២៤ម៉ោងលើ២៤ម៉ោង។ក្នុងឱកាសអញ្ជើញជាអធិបតីបើកការដ្ឋានសាងសង់អគារមជ្ឈមណ្ឌលកណ្តាល អគារ​ចំណតរោងជាង និងអគារវេជ្ជសាស្ត្រស៊ីក្លូត្រុង​ នៃមន្ទីរពេទ្យកាល់ម៉ែត​ នៅព្រឹកច្ងៃទី១៦ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានថ្លែងថា នឹងបន្តយកចិត្តទុកដាក់ និង​ពង្រឹងគុណភាពមណ្ឌលសុខភាព​នៅតាមមូលដ្ឋានទូទាំងប្រទេស ដោយពង្រឹងការពង្រាយ​គ្រូពេទ្យ​បន្ថែមទៀត គ្រប់ពេល វេលាទាំងអស់ ​ហើយចំពោះវិស័យសុខាភិបាលនេះ ​រាជរដ្ឋាភិបាលមិនអាច​ទម្លាក់ស្តង់ដានោះទេ​ គឺត្រូវតែ ពង្រឹងគុណភាព​ និងស្តង់ដាឲ្យកាន់តែច្បាស់លាស់ ដែលត្រូវតែធ្វើការបណ្តុះបណ្តាលគ្រូពេទ្យប្រកប​ ដោយស្តង់ដា និងជាក់លាក់បំផុត និងគ្រប់ទីកន្លែងទាំងអស់។សម្តេចធិបតី ហ៊ុន ម៉ាណែត នាយករដ្ឋមន្រ្តីបានបន្ថែមទៀតថា ដើម្បីទទួលបានជំនឿ​ទុកចិត្តពី​ប្រជាពលរដ្ឋ​មកលើប្រព័ន្ធសុខាភិបាលក្នុងស្រុក រាជរដ្ឋាភិបាលត្រូវតែបង្កើន​សមត្ថភាព​នៃការព្យាបាល​ និង​ គុណភាពពេទ្យ ដោយ​ក្រសួងសុខាភិបាលត្រូវតែធ្វើទំនើបកម្មនូវ​វិស័យ​សុខាភិបាលនេះឲ្យកាន់តែខ្លាំងក្លា ​បន្ថែមទៀតតាំងពីថ្នាក់ជាតិរហូតដល់មូលដ្ឋាន។ សម្តេចធិបតី ​បានលើកឡើងទៀតថា ​យើងសុខចិត្តមាន ​ពេទ្យ១០នាក់ ដែលមានជំនាញ​ច្បាស់​លាស់ វាប្រសើរជាជាងមានពេទ្យច្រើនតែមិនមានជំនាញជាក់លាក់ ​និងក្រមសីលធម៌។សូមបញ្ជាក់ថា អគារមន្ទីរពេទ្យដែលបើកការដ្ឋាន សាងសង់ថ្មីដែលស្ថិតនៅបរិវេនមន្ទីរពេទ្យ​កាល​ម៉ែតនេះ អាចចត​ឧទ្ធម្ភាគចក្រ​បាន ​ខណៈអគារនេះ មានកម្ពស់២៥ជាន់ ដោយចំណាយ​ថវិកា​រាប់សិបលានដុល្លារអាមេរិក។ បើតាមការអះអាងរបស់នាយករដ្ឋមន្រ្តីអគារសាងសង់ថ្មីនេះ ​គឺជាការឆ្លើយ ​តបទៅនឹងការរីកចម្រើន នៃបច្ចេកវិទ្យា​ និងត្រូវបម្រើដល់សេវាសុខភាពជូនបងប្អូន​ប្រជាពលរដ្ឋទាំង អស់គ្រប់ពេល​វេលា​ប្រកបដោយគុណភាព ​និងក្រមសីលធម៌៕អត្ថបទបាន ចក់

លោក Zelenskyy ជំរុញឱ្យលោកខាងលិច យល់ព្រមចំពោះការទាមទារវាយលុកចូលក្នុងទឹកដីរុស្ស៊ី

2024/09/16 05:33:52 pm        212
Facebook Telegram Linkin
ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃអាទិត្យ ទី ១៥ ខែកញ្ញា ជាថ្មីម្តងទៀត បានជំរុញឱ្យសម្ព័ន្ធប្រទេសមិត្តលោកខាងលិច អនុញ្ញាតឱ្យទីក្រុងគីវ វាយប្រហារលើគោលដៅយោធាចូលជ្រៅនៅក្នុងប្រទេសរុស្ស៊ី ជាពិសេសមូលដ្ឋានទ័ពអាកាស បន្ទាប់ពីការវាយប្រហារដ៏បង្ហូរឈាមលើទីក្រុង Kharkiv ។លោក Zelenskyy បាននិយាយនៅក្នុងសុន្ទរកថាប្រចាំថ្ងៃរបស់លោកថា «មានតែដំណោះស្រាយជាប្រព័ន្ធទេ ដែលធ្វើឱ្យខ្លួនអាចធ្វើទៅបានដើម្បីប្រឆាំងភេរវកម្មនេះ រួមមានដំណោះស្រាយមីស៊ីលរយៈចម្ងាយឆ្ងាយដើម្បីបំផ្លាញមូលដ្ឋានអាកាសយោធារុស្ស៊ី។ យើងកំពុងរង់ចាំការសម្រេចចិត្តសមស្របណាមួយ ចេញមកពីសហរដ្ឋអាមេរិក ចក្រភពអង់គ្លេស បារាំង អាល្លឺម៉ង់ និងប្រទេសអ៊ីតាលី។គ្រាប់បែកស៊ីបគោលដៅរបស់រុស្ស៊ី បានវាយប្រហារធ្លាក់លើអគារលំនៅឋានមួយក្នុងទីក្រុង Kharkiv ដែលជាការវាយប្រហារជាបន្តបន្ទាប់ចុងក្រោយលើទីក្រុងភាគឦសាន បង្កការឆាបឆេះ ដែលក្រុមអ្នកពន្លត់អគ្គីភ័យ បានពន្លត់។អភិបាលក្រុង Kharkiv លោក Igor Terekhov បាននិយាយនៅលើបណ្តាញ Telegram ថាក្រុមអ្នកជួយសង្គ្រោះ បានទាញយកសាកសពអ្នកស្លាប់ជាស្ត្រីចំណាស់ម្នាក់ចេញពីកម្ទេចកម្ទី និងបាននិយាយថា មនុស្ស៤២នាក់ បានរងរបួស។នៅក្នុងសុន្ទរកថា លោក Zelenskyy បាននិយាយថា ប្រទេសរុស្ស៊ីក៏បានវាយប្រហារតំបន់ Sumy និង Donetsk កាលពីថ្ងៃអាទិត្យដោយគ្រាប់បែកស៊ីបគោលដៅ។លោក និយាយថា កងទ័ពរុស្ស៊ី បានធ្វើការវាយប្រហារតាមអាកាសយ៉ាងហោចណាស់ ១០០ លើក ជារៀងរាល់ថ្ងៃ។ ខ្លួនត្រូវការពារការវាយប្រហារប្រភេទនេះ ដែលអ៊ុយក្រែនកំពុងស្នើសុំការអនុញ្ញាតការវាយប្រហារលើគោលដៅយោធា ចូលជ្រៅនៅខាងក្នុងប្រទេសរុស្ស៊ី ពីសម្ព័ន្ធមិត្តប្រទេសលោកខាងលិច ដែលនៅតែស្ទាក់ស្ទើរ ព្រោះតែព្រួយបារម្ភថាជម្លោះរីកកាន់តែធំ។

លោក Zelenskiy និយាយថា អ៊ុយក្រែន រងការខាតបង់យ៉ាងខ្លាំងដោយសារការផ្គត់ផ្គង់អាវុធយឺត

2024/09/16 05:29:16 pm        246
Facebook Telegram Linkin
លោកប្រធានាធិបតី Volodymyr Zelenskiy បានប្រាប់ទូរទស្សន៍ CNN នៅក្នុងបទសម្ភាសន៍មួយដែលបានចាក់ផ្សាយកាលពីថ្ងៃអាទិត្យថា កងទ័ពអ៊ុយក្រែន កំពុងទទួលរងការខាតបង់ធ្ងន់ធ្ងរ ដោយសារតែការមកដល់នៃអាវុធរបស់លោកខាងលិចយឺតយ៉ាវពេក មិនទាន់ពេលវេលាសម្រាប់ការបំពាក់ដល់កងកម្លាំងប្រដាប់អាវុធឱ្យបានត្រឹមត្រូវ។ រុស្ស៊ី បាននិងកំពុងដណ្តើមយកទឹកដីនៅផ្នែកខ្លះនៃភាគខាងកើតអ៊ុយក្រែន រួមទាំងជុំវិញតំបន់ ប៉ូក្រូវស៍(Pokrovsk)។ ការដណ្ដើមយកមជ្ឈមណ្ឌលដឹកជញ្ជូន អាចធ្វើឱ្យទីក្រុងមូស្គូមានលទ្ធភាពបើកការវាយប្រហារថ្មី។ លោក Zelenskiy បាននិយាយថាស្ថានភាពនៅភាគខាងកើតគឺ តឹងតែងណាស់ ដោយបន្ថែមថាពាក់កណ្តាលនៃកងពលតូចរបស់អ៊ុយក្រែននៅទីនោះពុំត្រូវបានបំពាក់អាវុធគ្រប់គ្រាន់ទេ។ ក្នុងបទសម្ភាសន៍ ធ្វើឡើងកាលពីថ្ងៃសុក្រជាមួយទូរទស្សន៍ CNN លោក Zelenskiy បាននិយាយថា យើងបាត់បង់មនុស្សជាច្រើន។ យើងបាត់បង់មនុស្សដោយសារតែពួកគេមិននៅក្នុងរថយន្តប្រយុទ្ធ ។ពួកគេមិនមានកាំភ្លើងធំ និងគ្រាប់ទេ។ ប្រធានាធិបតីអ៊ុយក្រែនរូបនេះបាននិយាយថា កញ្ចប់ជំនួយសព្វាវុធដែលសន្យាដោយសហរដ្ឋអាមេរិក និងប្រជាជាតិអឺរ៉ុបបានមកដល់យឺតណាស់។ លោកថាយើងត្រូវការកងពលតូចចំនួន ១៤ ត្រៀមខ្លួន។ រហូតមកដល់ពេលនេះ យើងមិនបានបំពាក់អាវុធដល់ពួកគេសូម្បីតែ៤កងពលតូច។ ទីប្រឹក្សាសន្តិសុខជាតិរបស់សេតវិមានលោក Jake Sullivan កាលពីថ្ងៃសៅរ៍បាននិយាយថា ទីក្រុងវ៉ាស៊ីនតោន កំពុងធ្វើការលើកញ្ចប់ជំនួយថ្មីសម្រាប់អ៊ុយក្រែន៕

អ្នកនយោបាយ៖ ការបំភ្លឺជុំវិញស្ថានភាពព្រំដែន ជាការបង្ហាញរឹតតែច្បាស់ នៃ​អត្ថប្រយោជន៍​បង្គោល​ព្រំដែន

2024/09/13 09:14:15 pm        383
Facebook Telegram Linkin
បណ្តាមេដឹកនាំគណបក្សនយោបាយមួយចំនួន លើកឡើងថា ការបំភ្លឺជុំវិ​ញ​ស្ថានភាព​ព្រំដែន​ដែល​នឹង​ប្រព្រឹត្តទៅនាសប្តាហ៍ក្រោយនេះ ជាការបង្ហាញរឹតតែ​ច្បាស់​នៃ​អត្ថប្រ​យោជន៍​បង្គោល​ព្រំដែន​របស់កម្ពុជា។ ស្របពេលឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន នឹងអញ្ជើញ​ធ្វើ​បទ​បង្ហាញ​ជូនប្រតិភូគណបក្សនយោបាលដែលជាសមាជិកនៃឧត្តមក្រុមប្រឺក្សាពិគ្រោះ និង​ផ្តល់​យោបល់ នៅថ្ងៃទី១៨ ខែកញ្ញា ឆ្នាំ២០២៤ខាងមុខ មានមេដឹកនាំ​គណបក្ស​នយោបាយ​មួយ​ចំនួន​ក្នុង​ចំណោមសមាជិកទាំង២៨គណបក្សនយោបាយ បានប្រាប់BTV ឱ្យដឹងនៅថ្ងៃទី១៣ ខែ​កញ្ញា ឆ្នាំ២០២៤ថា ក្នុង​នាម​គណបក្ស​នយោបាយ​ពិត​មាន​ការ​ពេញ​ចិត្ត​ចំពោះ​ការ​បន្ត​បង្ហាញ​ពី​ភាព​ពិត និងអត្ថប្រយោជន៍នៃស្ថានភាពតាមក្រវាត់ព្រំដែន ជាពិសេស​បង្គោល​ព្រំដែន​ជា​មួយ​ប្រទេស​ជិតខាង។ ក្នុងនោះ ឯកឧត្តម ហ៊ាង គឹមស្រឿន ប្រធានគណបក្សមហាសាមគ្គីជាតិខ្មែរ លើកឡើងថា កិច្ច​ប្រជុំ​ដើម្បី​បំភ្លឺពាក់ព័ន្ធនឹងព្រំដែននាពេលខាងមុខពិតជាមានសារៈសំខាន់ ក្នុងការបង្ហាញពី​លទ្ធផល​នៃ​ការបោះបង្គោលព្រំដែនជូនជាតិ និងប្រជាជន ជាពិសេសនេះក៏ជា​ឱកាស​រំលេច​ពី​អត្ថ​ប្រយោជន៍​នៃ​កិច្ចការបោះបង្គោលព្រំដែនសំដៅឱ្យក្លាយជាព្រំដែនសន្តិភាព។ជាមួយគ្នា ឯកឧត្តម គង់ ប៊ុនធឿន ប្រធានគណបក្សចលនាប្រជាធិបតេយ្យ ចាត់ទុកការ​អញ្ជើញ​បំភ្លឺ​ជុំវិញ​កិច្ចការព្រំដែន គឺមិនមែនជារឿង​ថ្មី​សម្រាប់​កម្ពុជា​នោះ​ទេ​ដែល​ក្រុម​ជ្រុល​និយម​មួយ​ចំនួន​ចោទ​ប្រកាន់​ដដែលៗពីបញ្ហាព្រំដែនក្នុងន័យជាលេសបង្កភាពច្របូកច្របល់។សូមជម្រាបថា ការធ្វើបទបង្ហាញរបស់ឯកឧត្តម ឡាំ ជា រដ្ឋមន្ត្រីទទួលប​ន្ទុក​រដ្ឋ​លេខា​ធិការដ្ឋាន​​កិច្ចការ​ព្រំដែន អំពីព្រំដែនស្របច្បាប់របស់ព្រះរាជាណាចក្រកម្ពុជា រវាងប្រទេសឡាវ-វៀតណាម និងថៃនេះ តបតាមការស្នើសរបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់។ យ៉ាង​ណាមិញ ក្រៅពីការបំភ្លឺរបស់មន្រ្តីជំនាញកិច្ចការព្រំដែន ក៏មានប្រជាពលរដ្ឋគ្រប់មជ្ឈដ្ឋាន ជា​ពិសេស​យុវជនបានធ្វើទស្សនកិច្ចសិក្សាជាបន្តបន្ទាប់ទៅកាន់ព្រំដែន ដើម្បីស្វែង​យល់​ពី​ការ​អភិវឌ្ឍន៍​តាម​ក្រវាត់ព្រំដែន ការរស់នៅ ឬអាស្រ័យផលរបស់ប្រជាពលរដ្ឋ ព្រមទាំងពិនិត្យ​លើត​ថភា​ព​ពិត​នៃបង្គោលព្រំដែននីមួយៗផងដែរ៕ អត្ថបទ សេក ឧត្តម 

ការស្ទង់មតិថ្មីរបស់ Reuters/Ipsos៖ លោកស្រី Harris នាំមុខដាច់លោកTrump ក្រោយពិភាក្សាដេញដោល

2024/09/13 07:34:52 pm        462
Facebook Telegram Linkin
លោកស្រីអនុប្រធានាធិបតី Harris បានពង្រីកការនាំមុខលើអតីតប្រធានាធិបតីលោកTrump បន្ទាប់ពីការពិភាក្សាដេញដោលប្រធានាធិបតីកាលពីរាត្រីថ្ងៃអង្គារសប្ដាហ៍នេះ នៅក្នុងការស្ទង់មតិថ្មីរបស់សារព័ត៌មាន Reuters និងស្ថាប័នតាមដានការបោះឆ្នោតអាមេរិក Ipsos ។ ការស្ទង់មតិធ្វើឡើងនៅថ្ងៃទី ១០ ដល់ថ្ងៃទី ១២ ខែកញ្ញា បានរកឃើញថាលោកស្រី Harris កើនឡើង ៥ ពិន្ទុលើសលោក Trump ដោយលោកស្រី Harris ទទួលបានការគាំទ្រ ៤៧ % ទល់នឹងលោក Trump ៤២% ។ការស្ទង់មតិរបស់ Reuters/Ipsos មួយផ្សេងទៀតដែលបានកើតឡើងកាលពីចុងខែមុនបានរកឃើញថា Harris ទទួលបានការគាំទ្រ៤៥%ធៀបនឹងលោកTrump ៤១ ក្នុងចំណោមអ្នកបោះឆ្នោតដែលបានចុះឈ្មោះ។ លោកស្រី Harris ត្រូវបានមនុស្សជាច្រើនមើលឃើញថាទទួលបានជោគជ័យក្នុងការពិភាក្សាដេញដោលកាលពីថ្ងៃអង្គារ ដោយ៦៣%នៃអ្នកបោះឆ្នោតដែលបានចុះឈ្មោះនៅក្នុងការស្ទង់មតិមួយបាននិយាយថា អនុប្រធានាធិបតីធ្វើបានល្អជាងនៅលើវេទិកា ខណៈមានតែប្រហែល ៣៧% ប៉ុណ្ណោះដែលនិយាយថាលោកTrumpធ្វើបានល្អដូចគ្នា។ ការស្ទង់មតិរបស់ Reuters/Ipsos បានរកឃើញថា អនុប្រធានាធិបតីឈរលើកំពូលតារាងក្នុងការជជែកដេញដោលនាពេលថ្មីៗនេះ ដោយមានអ្នកបោះឆ្នោតចំនួន ៥៣ %ដែលបាននិយាយថាពួកគេបានឮអំពីការជជែកដេញដោលជ្រើសរើសលោកស្រីជាអ្នកឈ្នះ។ មានតែ២៤%នៃក្រុមនេះដែលជ្រើសរើសអតីតប្រធានាធិបតីជាអ្នកឈ្នះក្នុងការជជែកដេញដោលនោះ៕

សម្តេចតេជោ ហ៊ុន សែន បានដឹកនាំប្រតិភូ​និវត្តមកដល់កម្ពុជាវិញហើយដោយសុវត្ថិភាព ក្រោយបំពេញបេសកកម្មនៅសាធារណរដ្ឋកូរ៉េ

2024/09/13 06:52:49 pm        482
Facebook Telegram Linkin
សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានមាតុភូមិនិវត្តវិញដោយសុវត្ថិភាព ក្រោយបំពេញ បេសកកម្មប្រកបដោយភាពជោគជ័យនៅសាធារណរដ្ឋកូរ៉េអស់រយៈពេលបួនថ្ងៃ ដើម្បីចូលរួមវេទិកាចំណេះដឹងពិភពលោក លើកទី២៥នៅកូរ៉េនោះ។សម្តេចតេជោ ហ៊ុន សែន បានអញ្ជើញទៅបំពេញបេសកកម្មនៅកូរ៉េខាងត្បូងចាប់ពីថ្ងៃទី៩ ដល់ថ្ងៃ ទី១៣ ខែកញ្ញា ឆ្នាំ២០២៤នេះ តបតាមការអញ្ជើញរបស់ស្ថាបនិកវេទិកាចំណេះដឹងពិភពលោក ដើម្បី ចូលរួមវេទិកាចំណេះដឹងពិភពលោកលើកទី២៥ ក្រោមមូលបទ«មាគ៌ាឆ្ពោះទៅរកសហត្ថិភាព»ព្រមទាំង អញ្ជើញចូលរួមកម្មវិធីផ្លូវការសំខាន់ៗផ្សេងទៀតនៅសាធារណរដ្ឋកូរ៉េ។ក្នុងឱកាសចូលរួមវេទិកាខាងលើនេះសម្តេចតេជោ ហ៊ុន សែន ប្រធានព្រឹទ្ធសភា បានអញ្ជើញថ្លែង សុន្ទរកថាពិសេស ក្រោមប្រធានបទ«មាគ៌ាឆ្ពោះទៅកាន់សហត្ថិភាព និងវិបុលភាពក្នុងអាស៊ាន» ដោយវេទិកានេះ មានការចូលរួមពីមជ្ឈដ្ឋានរដ្ឋាភិបាល អ្នកនយោបាយ អ្នកសិក្សាអប់រំ សាជីវកម្ម និងវិស័យផ្សេង ៗ ជុំវិញពិភពលោក ក្នុងគោលបំណងចែករំលែកចំណេះដឹង ដើម្បីរួមចំណែកជំរុញកំណើនសេដ្ឋកិច្ច និងវិបុលភាពសកលប្រកបដោយតុល្យភាពជាដើម។សូមបញ្ជាក់ថា ក្នុងអំឡុងបំពេញបេសកកម្មនៅកូរ៉េនេះ សម្តេចតេជោ ហ៊ុន សែន បានជួបពិភាក្សា ការងារជាច្រើនជាមួយថ្នាក់ដឹកនាំរបស់សាធារណរដ្ឋកូរ៉េ រួមមានប្រធានាធិបតី និងប្រធានរដ្ឋសភា និង ទទួលជួបតំណាងក្រុមហ៊ុនធំៗរបស់កូរ៉េជាដើម។ ក្នុងអំឡុងពេលនោះដែរ សម្តេចតេជោ ហ៊ុន សែន ស្ថាប និកសន្តិភាពរបស់កម្ពុជា ក៏បានធ្វើដំណើរទៅកាន់ខេត្តឃ្យុងសាងបុកដូ ដើម្បីទទួលសញ្ញាបត្របណ្ឌិតកិត្តិ យស«ភាពជាអ្នកដឹកនាំ និងការកសាងសន្តិភាព» ដែលបានរៀបចំដោយសាកលវិទ្យាល័យ Dongguk University WISEនិងបានផ្តល់កិត្តិយសធ្វើបាឋកថាស្តីពី«បទពិសោធន៍របស់ប្រទេសកម្ពុជា ក្នុងការរំដោះ ជាតិ ការកសាងសន្តិភាព ការផ្សះផ្សា និងការកសាងជាតិឡើងវិញ» ពីប្រទេសដែលហែកហួរ ដោយ សង្រ្គាម និងវាលពិឃាត មកជាប្រទេសជាតិដែលពោពេញដោយសន្តិភាព ការរួមរស់ជាមួយគ្នា (សហត្ថិភាព) និងការអត់ឱនជាដើម។ក្រៅពីជំនួបផ្លូវការជាមួយថ្នាក់ដឹកនាំ និងតំណាងក្រុមហ៊ុនធំៗរបស់កូរ៉េ សម្តេចតេជោ ហ៊ុន សែន ក៏បានអញ្ជើញទស្សនាតំបន់ទេសចរណ៍«បូមុន» និងមជ្ឈមណ្ឌលពិព័រណ៍វប្បធម៌ពិភពលោកឃ្យុងយូ នៅខេត្តឃ្យុងសាបុកដូផងដែរ៕អត្ថបទបាន ចក់

សម្ដេចធិបតី៖ «សន្ដិភាពជាមូលដ្ឋានគ្រឹះដ៏សំខាន់ក្នុងការកសាង និងសម្រេចបាន​នូវវឌ្ឍនភាពនានា»

2024/09/13 05:59:33 pm        472
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មាន​ប្រសាសន៍​បញ្ជាក់​ថា សន្ដិភាពជាមូលដ្ឋានគ្រឹះដ៏សំខាន់ក្នុងការកសាង និងសម្រេចបាននូវវឌ្ឍនភាពនានា។ សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ តាមរយៈសុន្ទរកថាពិសេសរបស់ នៅ​ក្នុង«កិច្ចប្រជុំអំពាវនាវជាសកលនៃកិច្ចប្រជុំកំពូល ស្តីពីអនាគត» នៅអង្គការសហប្រជាជាតិ នាទី​ក្រុងញូវយ៉ក សហរដ្ឋអាមេរិក កាលពីថ្ងៃទី១២ ខែកញ្ញា ឆ្នាំ២០២៤។ តាមរយៈសុន្ទរកថាដដែល សម្ដេចធិបតី នាយករដ្ឋមន្រ្ដីមានប្រសាសន៍ថា កម្ពុជា​ពិត​ជា​មាន​កិត្តិយស​ដែល​បានចូលរួមក្នុងការអំពាវនាវជាសកលនាពេលនេះ ខណៈការមករួមគ្នានេះ គឺ​ដើម្បី​រៀប​ចំ​អនាគតសម្រាប់ពិភពលោកទាំងមូល។ សម្ដេចបន្តថា កិច្ចប្រជុំកំពូលស្ដីពីអនាគតនេះ គឺ​ជា​វេលា​ដ៏​សំខាន់មួយ ក្នុងការបង្ហាញពីការប្ដេជ្ញាចិត្តរួមគ្នាជាថ្មី ដើម្បីដោះស្រាយ​បញ្ហា​ប្រឈម​ថ្ងៃ​មុខ​។ បញ្ហាប្រឈមដែលប៉ះពាល់ដល់គ្រប់ប្រជាជាតិទាំងអស់។ សម្ដេចធិបតីបញ្ជាក់ថា កម្ពុជាចូលរួមចំណែកជាមួយកិច្ចព្រមព្រៀងសម្រាប់អនាគតនូវទស្សនៈ ស្ដែង​ចេញ​ពីដំណើរ​ដែលប្រទេសកម្ពុជាបានឆ្លងកាត់បន្ទាប់ពីបានងើ​ប​ចេញ​ពី​ស្រមោល​នៃ​ជម្លោះ​។ សម្ដេចធិបតីបន្តថា មនុស្សទាំងអស់គ្នាបានដឹងហើយថា សន្ដិភាពជាមូលដ្ឋានគ្រឹះដ៏សំខាន់ ក្នុង​ការកសាង និងសម្រេចបាននូវវឌ្ឍនភាពនានា។ ប្រវត្តិសាស្រ្ដក៏បានបង្ហាញឱ្យឃើញថា ប្រសិន​បើ​គ្មានសន្ដិភាពនោះទេ នោះគោលដៅនៃការលុបបំបាត់ភាពក្រីក្រ ការផ្ដល់នូវ​ការ​អប់រំ​ប្រកប​ដោយ​គុណភាព ការដោះស្រាយបញ្ហាបម្រែបម្រួលអាកាសធាតុ និងការអភិវឌ្ឍ​សេដ្ឋកិច្ច​ប្រកប​ដោយ​ចីរភាពនឹងកាន់តែពិបាកសម្រេចបានផងដែរ។ សម្ដេចធិបតីបញ្ជាក់ថា បទពិសោធន៍ទាំងនេះ បានក្រើនឭកយើង​អំពី​សារៈ​សំខាន់​នៃ​ការ​ធ្វើ​ការ​រួមគ្នា ឆ្ពោះទៅកាន់គោលដៅសកលរួមរបស់យើង។ កម្ពុជា ក៏មានមោទនភាពផងដែរ ដែល​បាន​ដើរ​តួនាទី​យ៉ាងសំខាន់ នៅក្នុងការថែរក្សាសន្ដិភាពសកលលោក។ ចាប់តាំងពីឆ្នាំ ២០០៦ មក យើង​បានបញ្ជូនកងកម្លាំងរក្សាសន្ដិភាពរបស់កម្ពុជាជាង ៩ ០០០ នាក់ ទៅ​បម្រើ​ការងារ​នៅ​ក្នុង​បេសក​កម្មរបស់អង្គការសហប្រជាជាតិចំនួន ១១ ដែលក្នុងនោះមានស្រ្ដីចំនួន ៨០០ នាក់។ សម្ដេច​បានបញ្ជាក់ថា «កងរក្សាសន្ដិភាពរបស់យើងបានដើរតួនាទីផ្ដល់នូវសេវាសារវន្តនានា ជាពិសេស នៅក្នុងកិច្ចខិតខំប្រឹងប្រែងបោសសម្អាតមីន។ ការចូលរួមចំណែកនេះ មិនត្រឹមតែ​បង្ហាញ​ពី​ការ​ប្ដេជ្ញាចិត្តរបស់យើង ចំពោះសន្ដិភាពពិភពលោកប៉ុណ្ណោះទេ ប៉ុន្ដែថែម​ទាំង​បាន​បង្ហាញ​អំពី​សារៈសំខាន់នៃការចូលរួមប្រកបដោយបរិយាបន្ន ក្នុងការថែរក្សាសុខសុវត្ថិភាព និង​ស្ថិរភាព​នៅ​ទូទាំងពិភពលោកផងដែរ»។ សម្ដេចធិបតី បន្ថែមថា ការប្ដេជ្ញាចិត្តរបស់កម្ពុជា ក្នុងការការពារបរិស្ថាន ក៏មានភាពរឹងមាំដូចគ្នា តាម​រយៈ​កម្មវិថីរេដបូក (REDD+) កម្ពុជាបានចូលរួមយ៉ាងសកម្ម ក្នុងកិច្ចខិតខំ​ប្រឹងប្រែង​ជា​សកល​ទប់ទល់​នឹងការប្រែប្រួលអាកាសធាតុ លើសពីនេះផែនការយុទ្ធសាស្ត្រ​​ឆ្លើយ​តប​ការ​ប្រែ​ប្រួល​​អាកាសធាតុកម្ពុជា (២០១៤-២០២៣) បង្ហាញពីអភិក្រម​ក្នុង​ការ​ដោះ​ស្រាយ​បញ្ហា​ប្រែ​ប្រួល​​អាកាសធាតុរបស់យើង ដោយផ្ដោតសំខាន់លើវិស័យសំខាន់ៗដូចជា វិស័យកសិកម្ម ធនធានទឹក និងសុខភាពសាធារណៈ។ កិច្ចខិតខំប្រឹងប្រែងាំអនេះ គឺជាផ្នែកមួយ​នៃ​យុទ្ធសាស្រ្ដ​ដ៏​ទូលាយ​របស់កម្ពុជា ដើម្បីធានាបានថា ការអភិវឌ្ឍសេដ្ឋកិច្ចប្រកបដោយចីរភាព ត្រូវបានសម្រេច​ស្រប​ជា​មួយនឹងការការពារបរិស្ថានផងដែរ៕

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ ​យុវជនមាន​តួនាទីសំខាន់​​ក្នុង​ការ​រួម​ចំណែក​ពង្រឹង​ទំនាក់​ទំនង​រវាង​កម្ពុជា​-ជប៉ុន ឱ្យកាន់តែរឹងមាំថែមទៀត
09/26/2026 05:09 PM
Facebook Telegram Linkin
អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់
09/26/2026 05:09 PM
Facebook Telegram Linkin
សិស្សានុសិស្ស​ លោកគ្រូអ្នកគ្រូ រួមទាំង​អាណាព្យាបាល​ នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA
09/26/2026 05:09 PM
Facebook Telegram Linkin
ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង
09/26/2026 05:09 PM
Facebook Telegram Linkin
ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់
09/26/2026 05:09 PM
Facebook Telegram Linkin
ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត
09/26/2026 05:09 PM
Facebook Telegram Linkin
ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច
09/26/2026 04:09 PM
Facebook Telegram Linkin
មនុស្ស​រាប់លាននាក់នៅភាគឦសានរបស់​សហរដ្ឋអាមេរិក ត្រៀមប្រឈម​នឹង​ព្យុះដ៏ខ្លាំងក្លា
09/26/2026 04:09 PM
Facebook Telegram Linkin
កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល
09/26/2026 04:09 PM
Facebook Telegram Linkin
UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤
09/26/2026 04:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.