នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម
ក្រុមហ៊ុន Huawei វាយតម្លៃខ្ពស់ចំពោះកិច្ចសហការល្អប្រសើររបស់ក្រសួងស្ថាប័នពាក់ព័ន្ធ ក្នុងវិស័យបច្ចេកវិទ្យា

នយោបាយ​ និង ការអភិវឌ្ឍន៍

លោកស្រី Harris រៃអង្គាសប្រាក់បាន ៥៤០លានដុល្លារ តាំងពីចាប់ផ្តើមយុទ្ធនាការប្រធានាធិបតី

2024/08/26 06:14:28 pm        176
Facebook Telegram Linkin
យុទ្ធនាការបោះឆ្នោតរបស់លោកស្រី Kamala Harris បាននិយាយកាលពីថ្ងៃអាទិត្យ (២៥ សីហា) ថា បេក្ខភាពប្រធានាធិបតីមកពីគណបក្សប្រជាធិបតេយ្យរូបនេះបានរៃអង្គាសប្រាក់បានចំនួន ៥៤០លានដុល្លារ ក្នុងរយៈពេលជាងមួយខែប៉ុណ្ណោះចាប់តាំងពីលោកស្រីបានចាប់ផ្តើមការប្រជែងតំណែងប្រធានាធិបតីសហរដ្ឋអាមេរិក ជាមួយនឹងការកើនឡើងនៃការបរិច្ចាគដែលហូរចូលក្នុងអំឡុងពេលសន្និបាតជាតិបក្សប្រជាធិបតេយ្យកាលពីសប្តាហ៍មុន។អនុស្សរណៈដែលបានចេញផ្សាយដោយអ្នកគ្រប់គ្រងយុទ្ធនាការរបស់លោកស្រី Harris គឺលោកស្រី ជេន អូម៉ាលី ឌីលឡុន (Jen O'Malley Dillon) បាននិយាយថា ថវិកាចំនួន ៥៤០លានដុល្លារដែលរៃអង្គាសបានរួមបញ្ចូល ៨២លានដុល្លារដែលបានហូរចូលមកក្នុងអំឡុងពេលសប្តាហ៍នៃសន្និបាត ហើយជាសញ្ញានៃភាពសាទររបស់អ្នកប្រជាធិបតេយ្យសម្រាប់បេក្ខភាពរបស់លោកស្រី Harris។ លោកស្រី Dillon បាននិយាយថា៖ នេះជាតួលេខការរៃអង្គាសច្រើនបំផុតមិនធ្លាប់មានសម្រាប់យុទ្ធនាការបោះឆ្នោតប្រធានាធិបតី ក្នុងរយៈពេលខ្លីបែបនេះ»។លោកស្រី Harris បានក្លាយជាបេក្ខភាពប្រធានាធិបតីនៅថ្ងៃទី២១ ខែកក្កដា នៅពេលដែលលោកប្រធានាធិបតី Joe Biden ដកខ្លួនមិនប្រជែងអាណត្តិថ្មី ក្រោមសម្ពាធពីសមាជិកបក្សប្រជាធិបតេយ្យដែលបារម្ភអំពីសមត្ថភាពស្មារតី និងវ័យរបស់លោក បន្ទាប់ពីការជជែកដេញដោលដ៏រអាក់រអួលថ្ងៃទី២៧ ខែមិថុនា ប្រឆាំងនឹងលោក Donald Trump។បេក្ខភាពលោកស្រី Harris បានបង្កើតសន្ទុះនៃការគាំទ្រដែលធ្វើឱ្យលោក Trump ស្ថិតក្នុងជំហរការពារ ហើយលោកបានជួបការលំបាកក្នុងការរក្សាចំណាប់អារម្មណ៍របស់ប្រព័ន្ធផ្សព្វផ្សាយ។ លោកស្រី Harris និងបេក្ខភាពអនុប្រធានាធិបតី លោក ធីម វ៉លស៍ (Tim Walz) បានបន្តដំណើរយុទ្ធនាការតាមរថយន្តក្រុងឆ្លងកាត់រដ្ឋ ចចា (Georgia) ក្នុងសប្តាហ៍នេះ ដើម្បីស្វែងរកការគាំទ្រនៅក្នុងរដ្ឋដែលប្រកួតប្រជែងខ្លាំងក្នុងការបោះឆ្នោតកាលពីថ្ងៃទី០៥ ខែវិច្ឆិកា៕

បញ្ហាធំៗចំនួនប្រាំ ដែលជាក្ដីកង្វល់សំខាន់សម្រាប់អ្នកបោះឆ្នោតអាមេរិក

2024/08/23 08:06:06 pm        142
Facebook Telegram Linkin
គណបក្សប្រជាធិបតេយ្យគិតថា ក្តីសង្ឃឹមកំពុងវិលត្រលប់មកវិញ ដូចដែលអតីតស្ត្រីទីមួយ Michelle Obama បាននិយាយនៅក្នុងសុន្ទរកថារបស់លោកស្រីទៅកាន់សន្និបាតបក្សប្រជាធិបតេយ្យ (DNC) ដែលបានបញ្ចប់កាលពីថ្ងៃព្រហស្បតិ៍សប្ដាហ៍នេះ។ ថ្មីៗនេះ គណបក្សនេះ បានចាប់ផ្តើមប្រមូលសន្លឹកឆ្នោតកាន់តែច្រើននៅក្នុងរដ្ឋប្រទាញប្រទង់ដ៏សំខាន់មិនធ្លាប់មាន ដែលជារឿយៗ ប្រែប្រួលរវាងគណបក្សសាធារណរដ្ឋ និងគណបក្សប្រជាធិបតេយ្យ ដែលនឹងកំណត់លទ្ធផលនៃការបោះឆ្នោតប្រធានាធិបតីសហរដ្ឋអាមេរិកក្នុងខែវិច្ឆិកា។ប៉ុន្តែដូចដែលលោក Barack Obama បានចង្អុលបង្ហាញនៅក្នុងសុន្ទរកថាសន្និបាតជាតិបក្សប្រជាធិបតេយ្យ ការប្រកួតប្រជែងនៅតែតឹងតែង ហើយគណបក្សនេះមានការងារជាច្រើនដែលត្រូវធ្វើដើម្បីឈ្នះការបោះឆ្នោត។បញ្ហាធំៗ៥ ដែលជាក្ដីកង្វល់សំខាន់សម្រាប់អ្នកបោះឆ្នោតអាមេរិកនៅក្នុងរដ្ឋមានភាពប្រទាញប្រទង់គ្នា ដូចជានៅរដ្ឋ Pennsylvania រដ្ឋ North Carolina និង Wisconsin។ ទី១ គឺបញ្ហាសេដ្ឋកិច្ច -ប្រសិនបើសេដ្ឋកិច្ចរឹងមាំ អ្នកបោះឆ្នោតនឹងលើកលែងឱ្យច្រើន។ ស្ថានភាពសេដ្ឋកិច្ចប៉ះពាល់ដល់ការចំណាយប្រចាំថ្ងៃក្នុងជីវិតរបស់ពួកគេ។ ទី២ គឺ បញ្ហាជនអន្តោប្រវេសន៍-ប្រសិនបើបញ្ហាមួយកំណត់អត្តសញ្ញាណនយោបាយរបស់លោក Trump នោះគឺជាការអះអាងរបស់លោកដែលថាប្រទេសនេះបានបាត់បង់ការគ្រប់គ្រងលើព្រំដែនរបស់ខ្លួន។ យុទ្ធនាការឆ្នាំ២០១៦ របស់លោកសន្យាថានឹងសាងសង់របងឆ្លងកាត់ព្រំដែនអាមេរិក-ម៉ិកស៊ិក ។ ទី៣ គឺសិទ្ធិបន្តពូជ- ចាប់តាំងពីឆ្នាំ ១៩៨០ មក យុទ្ធនាការប្រធានាធិបតីត្រូវបានធ្វើឡើងដោយបេក្ខជនគណបក្សសាធារណរដ្ឋដែលប្រកាសពីការប្រឆាំងរបស់ពួកគេចំពោះការរំលូតកូន។ នេះពាក់ព័ន្ធនឹងការតែងតាំងចៅក្រមតុលាការកំពូលដែលនឹងសម្រេចកំណត់សិទ្ធិរំលូតកូន។ ទី៤ គឺគោលនយោបាយការបរទេស -នេះគឺជាការពិត ដែលទទួលស្គាល់ជាសកលថា គោលនយោបាយការបរទេសមិនមែនជាអាទិភាពរបស់អ្នកបោះឆ្នោតនោះទេ ប៉ុន្តែមានជម្លោះអន្តរជាតិពីរដែលកំពុងរំខានដល់ទិដ្ឋភាពនយោបាយរបស់សហរដ្ឋអាមេរិក ហើយអាចជះឥទ្ធិពលលើមនុស្សនៅលើសន្លឹកឆ្នោត។ សំខាន់គឺការបែកបាក់គ្នាច្រើនរវាងបក្សធំៗទាំង២។ និងទី៥ គឺ បញ្ហាប្រជាធិបតេយ្យ- លទ្ធិប្រជាធិបតេយ្យមាននៅលើសន្លឹកឆ្នោតពីមុន ដូចជាឆ្នាំ២០២២ ថ្មីៗនេះ។ នោះគឺជាក្តីកង្វល់សម្រាប់គណបក្សប្រជាធិបតេយ្យ និងគណបក្សសាធារណរដ្ឋ ទោះបីជាតាមរបៀបផ្សេងៗគ្នាក៏ដោយ៕

កិច្ចប្រជុំពេញអង្គគណៈរដ្ឋមន្រ្ដីព្រឹកនេះ សម្រេចអនុម័តលើសេចក្តីព្រាងច្បាប់​ស្តីពីប្រព័ន្ធទឹកកខ្វក់

2024/08/23 07:58:38 pm        247
Facebook Telegram Linkin
ភ្នំពេញ៖ សេចក្តីព្រាងច្បាប់ស្តីពីប្រព័ន្ធទឹកកខ្វក់ ដែលរៀបចំឡើងដោយក្រសួងសាធារណការ និង​ដឹកជញ្ជូន ត្រូវបានអនុម័តជាផ្លូវការក្នុងសម័យប្រជុំពេញអង្គគណៈរដ្ឋមន្ត្រី ក្រោមអធិបតី​ភាព​ដ៏​ខ្ពង់​ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នាព្រឹក​ថ្ងៃ​ទី២៣ ខែសីហា ឆ្នាំ២០២៤នេះ នៅវិមានសន្តិភាព។ កិច្ចប្រជុំនា​ឱកាសនេះ បានប្រព្រឹត្តទៅក្រោមកិច្ចដឹកនាំប្រកបដោយគតិបណ្ឌិតរបស់ សម្តេចធិបតី នាយករដ្ឋមន្ត្រី ដោយបានពិភាក្សា និងឆ្លងលើរបៀបវារៈមួយចំនួន ដោយក្នុងនោះ “សេចក្តីព្រា​ង​ច្បាប់​ស្តីពី​ប្រព័ន្ធទឹកកខ្វក់” ត្រូវបានកិច្ចប្រជុំពេញអង្គគណៈរដ្ឋមន្ត្រីសម្រេចអនុម័ត ឱ្យបន្ត​នីតិ​វិធី​ក្នុង​ការ​ស្នើសុំសេចក្តីទុកចិត្តពីស្ថាប័ននីតិប្បញ្ញត្តិ សំដៅធ្វើឱ្យសេចក្តីព្រាងច្បាប់នេះចូលជាធរមាន និង​អាចប្រកាសដាក់ឱ្យអនុវត្តជាផ្លូវការក្នុងពេលឆាប់ៗខាងមុខ។សេចក្តី​ព្រាង​ច្បាប់នេះ បន្ទាប់ពីបានអនុម័ត និងដាក់ចេញឱ្យប្រើប្រាស់ជាផ្លូវការ រំពឹងថា និង​ក្លាយ​ជា​ឧបករណ៍គតិយុត្តដ៏សំខាន់សម្រាប់កំណត់អំពីការគ្រប់គ្រងការអភិវឌ្ឍ ការសាងសង់ ការ​ជួស​ជុល ការថែទាំ ការធ្វើប្រតិបត្តិការ និងការប្រើប្រាស់ប្រព័ន្ធទឹកកខ្វក់ ក្នុងគោលបំ​ណង​ធានា​ប្រសិទ្ធ​ភាព គុណភាព សុវត្ថិភាព និងនិរន្តរភាពនៃប្រព័ន្ធទឹកកខ្វក់ និងការការពារបរិស្ថាន រួម​ចំណែក​ធ្វើ​ឱ្យ​ប្រសើរ​ឡើងនូវសុខមាលភាព សាធារណៈនៅក្នុងព្រះរាជាណាចក្រកម្ពុជា៕ 

សង្គ្រាមពាណិជ្ជកម្មឡើងកម្ដៅខ្លាំង ខណៈសហភាពអឺរ៉ុបគ្រោងដំឡើងពន្ធបន្ថែមលើរថយន្តអគ្គិសនីរបស់ចិន

2024/08/23 06:54:28 pm        100
Facebook Telegram Linkin
អត្រាដែលបានកែសម្រួលត្រូវបានចេញផ្សាយកាលពីថ្ងៃអង្គារសប្ដាហ៍នេះ ជាផ្នែកមួយនៃការស៊ើបអង្កេតរបស់គណៈកម្មការសហភាពអឺរ៉ុបលើការឧបត្ថម្ភធនដែលត្រូវបានចោទប្រកាន់សម្រាប់ការនាំចូលរថយន្តអគ្គិសនីផលិតដោយប្រទេសចិនទៅកាន់ទីផ្សារអឺរ៉ុប។ គណៈកម្មការដែលដោះស្រាយគោលនយោបាយពាណិជ្ជកម្មរបស់សហភាពអឺរ៉ុបបាននិយាយថា ខ្លួននៅតែជឿជាក់ថាការផលិតរថយន្តអគ្គិសនី ឬ EV របស់ចិន បានទទួលអត្ថប្រយោជន៍ពីការឧបត្ថម្ភធនយ៉ាងច្រើន។ ដូច្នេះ ខ្លួនបានស្នើការដំឡើងពន្ធជាកាតព្វកិច្ចចន្លោះពី១៧ទៅ៣៦,៣% លើក្រុមហ៊ុនផលិតរថយន្តចិន រួមទាំងរថយន្តTesla ផលិតក្នុងប្រទេរសចិន នៅពេលនាំចេញផលិតផលរបស់ពួកគេទៅកាន់ទីផ្សារសហភាពអឺរ៉ុប។ ថយន្ត BYD ដែលកំពុងនាំមុខគេលើទីផ្សារនានារបស់អឺរ៉ុប នឹងប្រឈមការដំឡើងពន្ធ១៧% ធ្លាក់ចុះពី១៧,៤% និងថយន្ត Geely នឹងបង់ពន្ធ១៩,៣ % ដែលកន្លងទៅបង់ពន្ធ១៩,៩ រយ និង រថយន្តម៉ាក SAIC បង់ពន្ធអតិបរមា ៣៦,៣ % ធ្លាក់ចុះពី៣៧,៦%។ ក្រុមហ៊ុនផលិតរថយន្តរបស់ចិនផ្សេងទៀត ដែលបានសហការជាមួយទីក្រុងព្រុចសែលក្នុងការស៊ើបអង្កេតរបស់ពួកគេនឹងមើលឃើញការដំឡើងពន្ធ ២១,៣ % កើនឡើងបន្តិចពី២០,៨ % ដែលធ្លាប់បានស្នើឡើងកាលពីកន្លងទៅ។ ក្រសួងពាណិជ្ជកម្មចិនបានរិះការដំឡើងពន្ធរបស់សហភាពអឺរ៉ុបថាជា អ្នកការពារនិយម និងខ្វះភស្តុតាង ហើយបានប្តេជ្ញាចាត់វិធានការចាំបាច់ដើម្បីការពារសិទ្ធិ និងផលប្រយោជន៍របស់អាជីវកម្មចិន។កាលពីថ្ងៃពុធសប្ដាហ៍នេះដែរ សមាគមក្រុមហ៊ុនផលិតរថយន្តចិន (CAAM) បាន ជំទាស់យ៉ាងខ្លាំង ចំពោះការដាក់ទណ្ឌកម្មដោយការដំឡើងពន្ធ ដែលបានកែសម្រួលដោយនិយាយថាទង្វើរបស់សហភាពអឺរ៉ុបបាននាំមកនូវ ហានិភ័យនិងភាពមិនច្បាស់លាស់ដ៏ធំធេង សម្រាប់ប្រតិបត្តិការ និងការវិនិយោគរបស់ចិននៅក្នុងសហភាពអឺរ៉ុប៕

សម្ដេចធិបតី ហ៊ុន ម៉ាណែត៖ កម្ពុជាគាំទ្រជាយុទ្ធសាស្រ្ដនៅក្នុងទិសដៅ​ដ៏ត្រឹមត្រូវ​ចំពោះ​សុខុមាលភាពស្រ្ដី

2024/08/23 06:53:27 pm        166
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា រាជ​រដ្ឋាភិបាលកម្ពុជា បានគាំទ្រជាយុទ្ធសាស្រ្ដនៅក្នុងទិសដៅដ៏ត្រឹមត្រូវចំពោះសុខុមាលភាពស្រ្ដី ក្នុង​ក្របខណ្ឌគ្រប់ជ្រុងជ្រោយអាស៊ានស្ដីពី «សេដ្ឋកិច្ចដែលគិតគូរពីសុខុមាលភាព» ដែលត្រូ​វបា​ន​បង្កើត​ឡើងនៅឆ្នាំ២០២១ ដោយ​កម្ពុជា​បន្ត​គាំទ្រ​ចំពោះ​ការ​បោះជំហាន​ជា​យុទ្ធសាស្រ្ដ​នៅ​ក្នុង​ទិស​ដៅ​ដ៏ត្រឹមត្រូវនេះ។សម្ដេចធិបតី នាយករដ្ឋមន្រ្ដីមានប្រសាសន៍បញ្ជាក់បែបនេះ ក្នុងឱកាសថ្លែងសុន្ទរកថា ក្នុង​កិច្ច​ប្រជុំ​កំពូល​ស្ត្រីអាស៊ានលើកទី៣៖ ក្រោមប្រធានបទ «ការពង្រឹងសេដ្ឋកិច្ច​ដែល​គិតគូរ​ពី​សុខុមាល​ភាព និងភាពធន់ ឆ្ពោះទៅសហគមន៍អាស៊ានក្រោយឆ្នាំ ២០២៥»នាព្រឹកថ្ងៃទី២៣ ខែសីហា ឆ្នាំ​២០២៤​នេះ។តាមរយៈសុន្ទរកថាសម្ដេចធិបតី នាយករដ្ឋមន្រ្ដីបានបង្ហាញការជឿជាក់ថា លទ្ធផលគន្លឹះ​ដែល​ទទួល​បាន​ពីកិច្ចពិភាក្សារវាងភាគីពាក់ព័ន្ធសំខាន់ៗ នឹងក្លាយទៅជា​ធាតុ​ចូល​ដ៏​មាន​តម្លៃ​សម្រាប់​ថ្នាក់​ដឹកនាំអាស៊ាន ក្នុងការលើកកម្ពស់ និងទទួលស្គាល់តម្លៃនៃការងារមើលថែ ទាំងបាន​ប្រាក់​កម្រៃ និងមិនបានប្រាក់កម្រៃ ក៏ដូចជាការងារបម្រើតាមផ្ទះរបស់ស្រ្ដីផងដែរ។ សម្ដេច​ធិបតី​មាន​ប្រសាសន៍​ដោយមោទនភាព​ចំពោះ​វេទិកា​នេះ​ថា​ការ​សម្រេច​បាន​នូវ​ការ​ប្ដេជ្ញា​ចិត្ត​របស់​អាស៊ាន ក្នុងការលើកកម្ពស់គុណភាពជីវិត និងសុខុមាលភាពសម្រាប់ប្រជាជនអាស៊ាន ដើម្បី​រៀបចំអាស៊ានឱ្យកាន់តែរឹងមាំ ប្រកបដោយភាពធន់ និងនិរន្តរភាព ក្នុងការឆ្លើតតប​ទៅ​នឹង​វិបត្តិ​ស្មុគ​ស្មាញ និងបញ្ហាប្រឈមថ្មីៗ ខណៈសេដ្ឋកិច្ចដែលគិតគូរពីមុខុមាលភាព បានឆ្លើយ​តប​នឹង​គោល​ដៅនៃការអភិវឌ្ឍប្រកបដោយនិរន្តរភាព (SDGs) ជាច្រើន។សម្ដេចជម្រាបថា គោលនយោបាយនៃរាជរដ្ឋាភិបាលកម្ពុជា តាមរយៈយុទ្ធសាស្រ្ដបញ្ចកោណ ដំណាក់​កាលទី១ ក៏មានបេសកកម្ម និងគោលបំណងរួមគ្នា ជាពិសេសលើកិច្ចខិតខំប្រឹងប្រែង ក្នុង​ការផ្ដល់ការការពារសង្គម សម្រាប់ស្រ្ដីទាំងអស់គ្នា។ សម្ដេចបន្តថា ថ្មីៗនេះ រាជ​រដ្ឋាភិបាល​កម្ពុជា ទើបតែបានដាក់ចេញនូវ ផែនការបង្ហាញផ្លូវឆ្ពោះទៅរកការគ្រប់ដណ្ដប់សុខភាពជាសកល ២០២៤-២០៣៥ កម្មវិធី និងគម្រោងមួយចំនួនត្រូវបានដាក់ចេញរួមមាន ការពង្រីក​មូល​និធិ​សុខុមាលភាពសុខាភិបាលសម្រាប់គ្រួសារដែលងាយរងគ្រោះ និងសេវា​ថែទាំសុខ​ភាព​ ដើម្បី​សម្រេច​បាន​នូវការគ្របដណ្ដប់សុខភាពជាសកលផងដែរ៕ អត្ថបទ៖ វ៉ន ដារ៉ា

សមាជបក្សប្រជាធិបតេយ្យបានបញ្ចប់ដោយលោកស្រី Harris ទទួលយកការតែងតាំងជាបេក្ខជនប្រធានាធិបតីផ្លូវការជាប្រវត្តិសាស្ត្រ

2024/08/23 06:51:39 pm        104
Facebook Telegram Linkin
លោកស្រីអនុប្រធានាធិបតី Kamala Harris បានបិទសមាជជាតិរបស់បក្សប្រជាធិបតេយ្យកាលពីយប់ថ្ងៃព្រហស្បតិ៍សប្ដាហ៍នេះ នៅពេលលោកស្រីបានទទួលយកការតែងតាំងជាបេក្ខជនប្រធានាធិបតីជាផ្លូវការជាប្រវត្តិសាស្ត្ររបស់គណបក្សលោកស្រី ហើយចាប់យកឱកាសដែលនៅសល់មួយចំនួនរបស់លោកស្រីដើម្បីទាក់ទាញទស្សនិកជនរាប់លាននាក់។ លោកស្រី Harris នឹងដាក់ចេញនូវចក្ខុវិស័យសម្រាប់ប្រទេសនេះ និងបន្តកិច្ចខិតខំប្រឹងប្រែងទប់ទល់នឹងលោក Donald Trump មកពីគណបក្សសាធារណរដ្ឋ ក្រោយលោកប្រធានាធិបតី Joe Biden បានបញ្ចប់ការប្រកួតប្រជែងបោះឆ្នោតឡើងវិញ ហើយបានគាំទ្រលោកស្រីឱ្យជំនួសរូបលោកនៅលើសន្លឹកឆ្នោតរបស់គណបក្សប្រជាធិបតេយ្យ។ មន្ត្រីយុទ្ធនាការសុំមិនបញ្ចេញឈ្មោះនិយាយថា លោកស្រី Harris មានគោលបំណងបីសម្រាប់សុន្ទរកថារបស់ខ្លួន ។ មន្ត្រីរូបនេះបាននិយាយថាលោកស្រីនឹងចែករំលែកសាវតារបស់ខ្លួនចេញពីគ្រួសារវណ្ណៈកណ្តាល ដើម្បីការពារអ្នកដទៃក្នុងឋានៈជារដ្ឋអាជ្ញា ផ្ទុយពីចក្ខុវិស័យសុទិដ្ឋិនិយមរបស់លោកស្រីជាមួយនឹងរបៀបវារៈរបស់លោកTrump និងជំរុញឱ្យមានស្មារតីស្នេហាជាតិ។លោកស្រី Harris បាននិយាយយ៉ាងខ្លីទៅកាន់សមាជបក្សប្រជាធិបតេយ្យកាលពីថ្ងៃចន្ទដើមសប្ដាហ៍នេះ នៅពេលលោកស្រីបានថ្លែងអំណរគុណដល់លោក Biden និងបានអបអរសាទរកំណត់ត្រារបស់លោកជាប្រធានាធិបតី៕

សម្តេចធិបតី ហ៊ុន ម៉ាណែត ដឹកនាំប្រជុំពេញអង្គគណៈរដ្ឋមន្ត្រីដើម្បីពិនិត្យ និងពិភាក្សា​លើរបៀបវារៈចំនួន៤

2024/08/23 06:30:26 pm        229
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៣ ខែសីហា នេះ អញ្ជើញជាអធិបតីភាពដ៏ខ្ពង់ខ្ពស់ដឹកនាំប្រជុំពេញអង្គគណៈរដ្ឋមន្ត្រី ដើម្បីពិនិត្យ និង​ពិភាក្សាលើរបៀបវារៈចំនួន៤ ៖ទី១. ការពិនិត្យ និងពិភាក្សាលើ របាយការណ៍វឌ្ឍនភាពនៃការអនុវត្តវិធានការ កែទម្រង់មុតស្រួច​ជាកញ្ចប់​ដែលបានដាក់ចេញ ក្នុងវេទិការាជរដ្ឋាភិបាល ផ្នែកឯកជន លើកទី១៩ ប្រចាំឆមាសទី១ ឆ្នាំ២០២៤។ទី២. ការពិនិត្យ និងសម្រេចលើសេចក្តីព្រាងច្បាប់ស្តីពីប្រព័ន្ធទឹកកខ្វក់។ទី៣. ការពិនិត្យ និងសម្រេចលើសេចក្តីព្រាងច្បាប់ ស្តីពីការអនុម័តយល់ព្រមឱ្យ​ព្រះរាជាណាចក្រ​កម្ពុជា​ចូលជាភាគី នៃកិច្ចព្រមព្រៀងស្តីពី ការទទួលយក បទប្បញ្ញត្តិបច្ចេកទេសរួម នៃអង្គការ​សហប្រជាជាតិ សម្រាប់យានយន្ត បរិក្ខារ និងគ្រឿងបន្លាស់ ដែលអាចបំពាក់ និង/ឬ ប្រើប្រាស់​ទៅលើយានយន្ត និងលក្ខខណ្ឌសម្រាប់ការទទួលស្គាល់ទៅវិញទៅមក នៃ ការផ្តល់អនុលោមភាព ដោយឈរ​លើមូលដ្ឋាន នៃបទប្បញ្ញត្តិអង្គការសហប្រជាជាតិ។ទី៤. បញ្ហាផ្សេងៗ។

ប្រធានាធិបតីអាមេរិកបន្ទាប់ អាចប្រឈមមុខនឹងពិភពលោកដ៏គ្រោះថ្នាក់បំផុតចាប់តាំងពីឆ្នាំ១៩៤៥

2024/08/23 06:16:23 pm        175
Facebook Telegram Linkin
យោងតាមគណៈកម្មាធិការទ្វេបក្សដែលបង្កើតឡើងដោយសភាអាមេរិក ដើម្បីសិក្សាពីហានិភ័យនៃសង្រ្គាមពិភពលោកដែលជិតមកដល់បានឱ្យដឹងថា មេដឹកនាំបន្ទាប់ដែលឈ្នះការបោះឆ្នោតប្រធានាធិបតីសហរដ្ឋអាមេរិក ក្នុងខែវិច្ឆិកា ខាងមុខនេះ នឹងប្រឈមមុខនឹងស្ថានភាពយុទ្ធសាស្ត្រដ៏លំបាកបំផុត និងពិភពលោកដ៏គ្រោះថ្នាក់បំផុតចាប់តាំងពីឆ្នាំ១៩៤៥ ដែលជាឆ្នាំបញ្ចប់នៃសង្រ្គាមលោកលើកទី២មក។គណៈកម្មការយុទ្ធសាស្ត្រការពារជាតិរបស់អាមេរិក ដែលបង្កើតឡើងដោយសភាក្នុងឆ្នាំ២០២២ បានចេញរបាយការណ៍របស់ខ្លួនកាលពីមួយខែមុន ដោយព្រមានត្រង់ៗថា ប៉ុន្មានឆ្នាំខាងមុខនេះ «អាចរួមបញ្ចូលសក្តានុពលសម្រាប់សង្រ្គាមដ៏ធំជិតមកដល់» ប្រហែលជាក្នុងពេលដំណាលគ្នាជាមួយចិន រុស្ស៊ី និងប្រទេសដទៃទៀត ហើយសហរដ្ឋអាមេរិក អាចនឹង «មិនបានត្រៀមខ្លួនរួចរាល់ទេ»។របាយការណ៍បានបន្តថា គ្រោះថ្នាក់ទាំងនោះឥឡូវនេះកាន់តែធ្ងន់ធ្ងរជាងកំឡុងឆ្នាំដំបូងនៃសង្គ្រាមត្រជាក់ ដោយហានិភ័យជាច្រើនទៀតកំពុងតែលេចឡើងបន្តិចម្ដងៗ។ ថាតើភាគីណាមួយនៅក្នុងនយោបាយអាមេរិកចង់ចូលរួមជាមួយគ្រោះថ្នាក់ពិភពលោកទាំងនោះក្នុងឆ្នាំបោះឆ្នោតនេះ នៅតែជាសំណួរពិបាកឆ្លើយមួយទៀត។ ខណៈពេលដែលមន្ត្រីអាមេរិក ជជែកពីការរៀបចំយោធារបស់ចិនដើម្បីក្រសោបយកកោះតៃវ៉ាន់នៅឆ្នាំ២០២៧ រួមទាំងតម្រូវការគាំទ្រអ៊ុយក្រែន និងរារាំងរុស្ស៊ីពីការដណ្តើមយកទឹកដីអឺរ៉ុបបន្ថែមទៀត គូប្រជែងប្រធានាធិបតីអាមេរិកទាំងពីរគឺលោកស្រី Kamala Harris និងលោក Donald Trump បានបន្តការប្ដេជ្ញារបស់ពួកគេក្នុងទ្រង់ទ្រាយធំ និងក្លាហាន ប៉ុន្តែផ្តោតភាគច្រើនលើបញ្ហាក្នុងស្រុកប៉ុណ្ណោះ។ជាការពិតណាស់ មិនមែនការសម្រេចចិត្តក្នុងនយោបាយអាមេរិកទាំងអស់ត្រូវតែរង់ចាំប្រធានាធិបតីបន្ទាប់ទេ។ ដោយមានបញ្ជាការយោធាជាច្រើនរបស់មន្ទីរបញ្ចកោណ និងសហរដ្ឋអាមេរិក ការរៀបចំផែនការកំពុងដំណើរការយ៉ាងល្អរួចទៅហើយសម្រាប់សមយុទ្ធយោធាដ៏ធំនៅឆ្នាំ២០២៥ ដែលជាលើកដំបូងនឹងមើលឃើញកងកម្លាំងសំខាន់ៗផ្លាស់ទីពីដីគោកអាមេរិក ដើម្បីគាំទ្រដល់សមយុទ្ធក្នុងពេលដំណាលគ្នាទាំងនៅអឺរ៉ុប និងប៉ាស៊ីហ្វិក៕

សម្តេចធិបតី៖ រាជរដ្ឋាភិបាលនឹងចំណាយថវិកា១០០លានដុល្លារទៀត សម្រាប់ចុះបញ្ជីដី​ជូនប្រជាពលរដ្ឋ

2024/08/23 05:02:15 pm        227
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសអះអាងថា ក្នុងរយៈពេល ១២​ខែ​​មកនេះរាជរដ្ឋាភិបាលអាណត្តិទី៧ បានចុះបញ្ជីដីជូនបងប្អូនប្រជាពលរដ្ឋ​បាន​ជាង២​លាន​ក្បាល​ដី និងចេញបណ្ណបានជិត៥៩ម៉ឺនបណ្ណ ហើយសម្តេច​រំពឹងថា​នឹង​បញ្ចប់​ការ​វាស់វែង​ប្រមាណ​ជាង​២​លាន​៥សែនក្បាលដីទៀតដែលនៅសេសសល់នាដំណាច់ឆ្នាំ២០២៥ នឹងត្រូវប្រើប្រាស់​ថវិកា​មួយ​រយលានដុល្លារអាមេរិក។ថ្លែងក្នុងសេចក្តីថ្លែងការណ៍ពិសេសមួយ ស្តីពីសមិទ្ធផល១ឆ្នាំ របស់រាជរដ្ឋាភិបាលនីតកាលទី៧ នៃ​រដ្ឋសភា២២ សីហា ឆ្នាំ២០២៣-២២សីហា ឆ្នាំ២០២៤នេះ សម្តេចធិបតី ហ៊ុន ម៉ាណែត បាន​បញ្ជាក់​ថា ដើម្បីលុបបំបាត់នូវភាពចម្រូងចម្រាស់ និងទំនាស់ដីធ្លីនៅកម្ពុជានោះ រាជរដ្ឋាភិបាល​នឹង​ខិតខំ​ធ្វើយ៉ាងណា ចុះវាស់វែងដីធ្លីជូនប្រជាពលរដ្ឋឲ្យបានឆាប់រហ័ស ដោយក្នុងដំណាក់​កាល​នេះ​បាន​និងកំពុងប្រើប្រាស់ កម្លាំងចម្រុះជាងប្រាំពាន់នាក់។ដោយឡែកចំពោះការទន្រ្ទានយកដីរដ្ឋ និងកាន់កាប់រំលោភដីរដ្ឋវិញ សម្តេចធិបតីនាយករដ្ឋមន្រ្តី បាន​ឲ្យដឹងថា ក្នុងរយៈពេល១២ខែមកនេះ រាជរដ្ឋាភិបាល​បាននិងកំពុង​បន្ត​ចាត់​វិធាន​ការ​ទប់​ស្កាត់​ការ​ទន្រ្ទាន​យក​ដីរដ្ឋ ដីព្រៃឈើ ដីតំបន់ការពារធនធានធម្មជាតិ និងបឹងទន្លេសាបជាដើម។ ទន្ទឹមនឹងនេះរាជរដ្ឋាភិបាលក៏បានជំរុញការចុះវាស់វែងកំណត់ព្រំ និងចុះបញ្ជីដី​ឲ្យ​បាន​ចង់​សព្វ​គ្រប់​នា​ពេល​ខាង​មុខដើម្បី ឈានទៅដល់ការបញ្ចប់ទំនាស់រវាងដីរដ្ឋ និងឯកជនផងដែរ។យ៉ាងណាក៏ដោយតាមរយៈក្នុងសេចក្តីថ្លែងការណ៍ពិសេសមួយ ស្តីពីសមិទ្ធផល១ឆ្នាំ របស់​រាជ​រដ្ឋាភិបាល​នីតកាល​ទី៧​នៃរដ្ឋសភា សម្តេចធិបតីក៏បានអំពាវនាវ​យ៉ាង​ទទួច​ជា​ថ្មី​ម្តង​ទៀត​ដល់​អាជ្ញាធរ​គ្រប់​លំដាប់ថ្នាក់ទាំងអស់ត្រូវក៏ដូចជាប្រជាពលរដ្ឋ គប្បីត្រូវចូលរួម​ទប់​ស្កាត់​ការ​ទន្រ្ទាន់​ដី​រដ្ឋ និងដីនៅតាមបឹងទន្លេសាប ខណៈត្រងន័យនេះត្រូវបានសម្តេចធិបតីចាត់ទុកថា ការចូលរួ​ម​ថែ​រក្សា និងទប់ស្កាត់នូវការទន្រ្ទាន់យកដីតាមបឹងទន្លេសាបក៏ដូចជាព្រៃលិច ទឹកគឺ​ជា​ការ​ចូល​រួម​រក្សា​នូវ​ធន​ធានជលផល និងសន្តិសុខស្បៀងសម្រាប់ប្រជាពលរដ្ឋយើងក៏ដូចជាសន្តិ សុខទឹក​សម្រា​ប់​ប្រើ​ប្រាស់ និងស្រោយស្រព​ព្រម​ទាំង​រក្សា​បាន​នូវតុល្យភាព​ប្រព័ន្ធ​អេកូឡូស៊ី​នៅ​តាម​បឹង​ទន្លេសាប​ផង​ដែរ​៕ អត្ថបទ បាន ចក់

សម្ដេចតេជោ៖«ពាក្យក្មេងមានកម្លាំងចាស់ស្គាល់ផ្លូវល្មមដូរចេញហើយ ព្រោះមនុស្ស​ចាស់ខ្លះដូចមេក្រុមប្រឆាំងជ្រុលនិយម នាំក្មេងវង្វេងផ្លូវរហូត»

2024/08/22 07:43:38 pm        945
Facebook Telegram Linkin
ភ្នំពេញ៖សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី២២ ខែសីហា ឆ្នាំ ២០២៤នេះ តាមរយៈសារនៅលើបណ្ដាញសង្គមបានបញ្ជាក់ថា «ពាក្យក្មេងមានកម្លាំងចាស់ស្គាល់ផ្លូវ ល្មមដូរចេញហើយ ព្រោះមនុស្សចាស់ខ្លះដូចមេក្រុមប្រឆាំងជ្រុលនិយម នាំក្មេងវង្វេងផ្លូវរហូត»។សម្ដេចតេជោ ហ៊ុន សែន បានសរសេរថា (ត្រូវលោតទៅក្នុងទឹក ទើបចេះហែលទឹក ជាទ្រឹស្តីនៅតែត្រឹមត្រូវ)។ ឯទ្រឹស្តី (ក្មេងមានកម្លាំងចាស់ស្គាល់ផ្លូវ) ហាក់លេងស្របជាមួយ សភាពការបច្ចុប្បន្នហើយដែលអាចកែទៅជា (ក្មេងមានកម្លាំង និងស្គាល់ផ្លូវឯចាស់មានបទពិសោធន៍)។សម្ដេចតេជោបន្តថា ថ្ងៃ២២ ខែសីហា ឆ្នាំ២០២៤នេះជាខួបមួយឆ្នាំនៃថ្ងៃជំនាន់ថ្មីចាប់ផ្តើមកាច់ចង្កូតនាវាកម្ពុជា ជាមួយការចាកចេញរបស់ U.90 U.80 និង U.70 សំដៅដល់អ្នកមាន អាយុជាង៨០ ជាង៧០ និងជិត៧០ឆ្នាំ។សម្ដេចបញ្ជាក់ថា ជំនាន់ថ្មីបានដឹកនាំដោយស្វាហាប់ និងការទទួលខុសត្រូវដែលខ្ញុំសូមលើកតែចំណុចគន្លឹះមកកត់សំគាល់គឺ៖១. រក្សាបានសន្តិភាព ស្ថេរភាពនយោបាយ សន្តិសុខសណ្តាប់សង្គម។២. រក្សាបានស្ថេរភាពម៉ាក្រូសេដ្ឋកិច្ច ទប់ស្កាត់បានអតិផរណារក្សាបានកម្លាំងទិញនៃប្រាក់រៀល។៣. រក្សាបាននូវកំណើនសេដ្ឋកិច្ច ទោះបីសេដ្ឋកិច្ចតំបន់ និងសកលលោកជួបការលំបាកក៏ដោយ។៤. ប្រាក់ចំណូលជាតិរក្សាបានល្អ ពិសេសសាច់ប្រាក់នៅរតនាគារជាតិ សម្រាប់ចំណាយចរន្តមិនមានការថយចុះទេ បើទោះជាការចំណាយកើនឡើង ដោយការដំឡើងបៀវត្សរ៍ ចំណាយលើការជួយប្រជាជនក៏ដោយ។សម្ដេចតេជោបានបញ្ជាក់ថា៖«បទពិសោធន៍របស់ខ្ញុំ សាច់ប្រាក់សម្រាប់បើកបៀវត្សរ៍ និងចំណាយចរន្តផ្សេងទៀត វាសំខាន់ណាស់សម្រាប់រដ្ឋាភិបាលប្រទេសមួយ។ ខ្ញុំនិងថ្នាក់ដឹកនាំផ្សេងទៀតចាកចេញដោយបន្សល់ទុកឲ្យជំនាន់ថ្មី មានសាច់ប្រាក់គ្រប់គ្រាន់ប្រើប្រាស់ច្រើនខែ ហើយជំនាន់ថ្មីក៏មិនមែនជា ស្រីជញ្ជើធ្លុះនោះឡើយ ពួកគេខិតខំប្រមូលចំណូលដើម្បីបម្រើឲ្យការចំណាយដែលចេះតែកើនឡើង និងរក្សាបាននូវសាច់ប្រាក់ក្នុងរតនាគារមិនឲ្យថយចុះ»។សម្ដេចតេជោបន្ថែមថា៖«ខ្ញុំដាក់អំរែកចុះបន្ទាប់ពីបំពេញការងារខាងនីតិប្រតិបត្តិរយៈពេលជាង៤៤ឆ្នាំ ក្នុងនោះកាន់មុខតំណែងជានាយករដ្ឋមន្ត្រីជាង៣៨ឆ្នាំ មានពេលសមល្មម ដើម្បីរក្សាសុខភាពក្នុងវ័យ៧២ឆ្នាំ។ កិច្ចការសព្វថ្ងៃនៅប្រមាណ ៥០% ប្រៀបធៀបពេលធ្វើកិច្ចការជានាយករដ្ឋមន្ត្រី។ ពាក្យក្មេងមានកម្លាំង ចាស់ស្គាល់ផ្លូវ ល្មមដូរចេញហើយ ព្រោះមនុស្សចាស់ខ្លះដូចមេក្រុមប្រឆាំងជ្រុលនិយម នាំក្មេងវង្វេងផ្លូវរហូតហើយ»៕

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ ​យុវជនមាន​តួនាទីសំខាន់​​ក្នុង​ការ​រួម​ចំណែក​ពង្រឹង​ទំនាក់​ទំនង​រវាង​កម្ពុជា​-ជប៉ុន ឱ្យកាន់តែរឹងមាំថែមទៀត
09/26/2026 05:09 PM
Facebook Telegram Linkin
អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់
09/26/2026 05:09 PM
Facebook Telegram Linkin
សិស្សានុសិស្ស​ លោកគ្រូអ្នកគ្រូ រួមទាំង​អាណាព្យាបាល​ នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA
09/26/2026 05:09 PM
Facebook Telegram Linkin
ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង
09/26/2026 05:09 PM
Facebook Telegram Linkin
ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់
09/26/2026 05:09 PM
Facebook Telegram Linkin
ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត
09/26/2026 05:09 PM
Facebook Telegram Linkin
ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច
09/26/2026 04:09 PM
Facebook Telegram Linkin
មនុស្ស​រាប់លាននាក់នៅភាគឦសានរបស់​សហរដ្ឋអាមេរិក ត្រៀមប្រឈម​នឹង​ព្យុះដ៏ខ្លាំងក្លា
09/26/2026 04:09 PM
Facebook Telegram Linkin
កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល
09/26/2026 04:09 PM
Facebook Telegram Linkin
UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤
09/26/2026 04:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.