នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រយៈពេល១ឆ្នាំ TIA រួមចំណែកជំរុញកំណើនសេដ្ឋកិច្ចកម្ពុជាប្រមាណ ៥ភាគរយ
កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរ​ទស្សនៈ​ជាមួយ​ដៃ​គូ​អន្តរជាតិ​នៅ​ទីក្រុង​សៀមិន
កម្ពុជាដាក់ចេញវិធានការបន្ទាន់ ដើម្បីទប់ការកើនឡើងនៃសម្ពាធអតិផរណា រក្សាស្ថិរភាព​ម៉ាក្រូ​សេដ្ឋកិច្ច​ជាតិ
រាជរដ្ឋាភិបាលនឹងទម្លាក់កញ្ចប់ថវិកា ៥៣ លានដុល្លារ សម្រាប់បន្តអភិវឌ្ឍន៍ជំនាញគាំទ្រ MSMEs

សេដ្ឋកិច្ច និង កសិកម្ម

រយៈពេល១ឆ្នាំ TIA រួមចំណែកជំរុញកំណើនសេដ្ឋកិច្ចកម្ពុជាប្រមាណ ៥ភាគរយ

2026/09/08 02:54:00 pm        178
Facebook Telegram Linkin
នៅថ្ងៃទី៩ ខែកញ្ញានេះស្អែក គឺជាថ្ងៃគម្របខួបមួយឆ្នាំគត់ ដែលអាកាសយានដ្ឋានអន្តរជាតិតេជោ បាន​ប្រកាសបើកដំណើរផ្លូវការផ្តល់សេវាកម្មជូនអ្នកដំណើរជាតិអន្តរជាតិ ហើយ​តាម​អ្នក​នាំ​ពាក្យ​រដ្ឋ​លេខាធិការដ្ឋានអាកាសចរណ៍ស៊ីវិល សម្រាប់ការបើកដំណើរការរយៈពេលជិត១ឆ្នាំនេះ អាកាស​យាន​ដ្ឋានអន្តរជាតិតេជោ TIA បានទទួលអ្នកដំណើរអន្តរ​ជាតិ​ចេញ​ចូល​កម្ពុជា​ជិត​ពីរ​លាន​នាក់ ​និងបានរួមចំណែកជំរុញកំណើនសេដ្ឋកិច្ចកម្ពុជាប្រមាណ៥ភាគរយ។ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសស៊ីវិល នៅថ្ងៃ​ទី៨ ខែកញ្ញា នេះថា នៅក្នុងដំណើរការអាកាសយានដ្ឋានអន្តរជាតិតេជោ ក្នុងរយៈពេល​១​ឆ្នាំ​នេះ ​ចំនួនអ្នកដំណើរមិនមានកំណើននោះទេដោយសារវិបត្តិសង្គ្រាមនៅតំបន់មជ្ឈិមបូព៌ា ប៉ុន្តែ​សន្ទុះ​ការ​ដឹកទំនិញ Cargo ចេញចូលកម្ពុជា គឺមានកំណើនកើនឡើងជាលំដាប់ ទន្ទឹម​នឹង​នេះ​អាកាស​យាន​ដ្ឋានអន្តរជាតិតេជោ ក៏បាននិងកំពុងបន្តសាងសង់បន្ថែម ឃ្លាំងផ្ទុកទំនិញ​ទំនើប​តាម​ស្តង់ដា​អន្តរជាតិ និងបន្តសាង​សង់​រោង​ជាង​ជួស​ជុល​យន្ត​ហោះ​ក្រោម​កិច្ច​សហការ​ជា​មួយ​ប្រទេស​សិង្ហបូរី ជាដើម។សូមរំលឹកថា អាកាសយានដ្ឋានអន្តរជាតិតេជោ TIA លំដាប់ថ្នាក់ 4F បាន​សាងសង់​នៅ​លើ​ផ្ទៃ​ដី​សរុប ទំហំ២,៦០០ហិកតា នៅក្នុងដំណាក់កាលទី១ បានចំណាយ​ថវិ​កា​សាង​សង់​ជាក់​ស្តែង​អស់​២,៣០០​លានដុល្លារ។ អាកាសយានដ្ឋានអន្តរជាតិតេជោ សាងសង់ក្នុងដំណាកកាលទី១ បាន​ចំណាយ​ពេល​ចំនួនជាង៥ឆ្នាំ ចាប់ផ្តើមនៅថ្ងៃទី០៧ ខែមករា ឆ្នាំ២០២០ និងបញ្ចប់នៅថ្ងៃទី៣១ ខែ​កក្កដា ឆ្នាំ២០២៥ មានសមត្ថភាពអាចបម្រើការហោះហើរបានដល់យន្តហោះគ្រប់ប្រភេទ ទាំង​ជើង​ហោះហើរក្នុងតំបន់ និងជើងហោះហើររយៈចម្ងាយឆ្ងាយ (Long-haul Flights) ដែល​អាច​ចុះ​ចតបានដោយសុវត្ថិភាព ហើយបាន​ប្រកាស​បើក​ដំណើរការ​ផ្តល់​សេវា​កម្ម​ទទួល​អ្នក​ដំណើរ​អន្តជាតិនៅថ្ងៃទី៩ ខែកញ្ញា ឆ្នាំ២០២៥ ហើយប្រារព្ធ​ពិធី​សម្ពោធ​ដាក់​ឱ្យ​ប្រើ​ប្រាស់​ជា​ផ្លូវ​ការ ​នៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។សមិទ្ធផល​ថ្មី​មួយទៀត បានរួមចំណែកអភិវឌ្ឍហេដ្ឋារចនាសម្ព័ន្ធអាកាសយានដ្ឋាន និង​តភ្ជាប់​ជើង​ហោះ​ហើរ​ទៅកាន់ពិភពលោកកាន់តែធំ និងទូលាយជាងមុន, ជានិម្មិតរូប នៃការរីកចម្រើន​របស់​កម្ពុជា ​សំដៅជំរុញកំណើនសេដ្ឋកិច្ចជាតិ លើកស្ទួយវិស័យអាកាសចរណ៍ ទេសចរណ៍ វិនិយោគ វិស័យដឹកជញ្ជូន និងឡូជីស្ទីក (Logistic) របស់កម្ពុជា៕ អត្ថបទ៖ ស៊ុម សុខជា 

កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរ​ទស្សនៈ​ជាមួយ​ដៃ​គូ​អន្តរជាតិ​នៅ​ទីក្រុង​សៀមិន

2026/09/08 01:43:40 pm        156
Facebook Telegram Linkin
ខេត្តហ្វូជៀន៖ គណៈប្រតិភូជាន់ខ្ពស់កម្ពុជា ស្វែងយល់ពីបច្ចេកវិទ្យានវានុវត្តន៍ និងការ​ផ្លាស់​ប្តូរ​ទស្សនៈ​ជុំវិញ​ការវិនិយោគ ជាមួយដៃគូ អន្តរជាតិសំខាន់ៗ នៅទីក្រុងសៀមិន ខេត្តហ្វូជៀន លើ​កិច្ច​សហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ រវាងកម្ពុជានិងដៃគូ អន្តរជាតិ។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.​) ​នៅថ្ងៃទី៧ ខែកញ្ញា ឆ្នាំ២០២៦ បានដឹកនាំគណៈប្រតិភូជាន់ខ្ពស់ និងតំណាង​វិស័យ​ឯកជន​កម្ពុជា ​បំពេញបេសកកម្មការងារយ៉ាងសកម្ម និងទស្សនកិច្ច សិក្សាស្វែងយល់ ដើម្បីផ្លាស់ប្តូរ​ទស្សនៈ ​ជាមួយដៃគូអន្តរជាតិសំខាន់ៗ ជាក់ស្តែងក្នុងជំនួបលោក You Lingkan ប្រធាន​ក្រុម​ហ៊ុន​ Xiamen Hongda Taxation Service Limited ភាគីទាំងពីរ​បាន​ផ្តោត​លើ​ការ​ប្រាស្រ័យ​ទាក់​ទង​ពាណិជ្ជកម្ម ការបង្កើតបណ្តាញ ទំនាក់ទំនងរវាងវិស័យឯកជន និងការទាក់ទាញ​វិនិយោគិន​ពី​ខេត្តហ្វូជៀន មកបណ្តាក់ទុននៅកម្ពុជា។ នៅថ្ងៃដ៏ដែលនេះដែរ, ឯកឧត្តមឧបនាយករដ្ឋមន្ត្រី បានបន្តដឹកនាំគណៈប្រតិភូអមដំណើរ អញ្ជើញធ្វើទស្សនកិច្ចសិក្សា និង ស្វែងយល់ពីបច្ចេកវិទ្យានវានុវត្តន៍ នៅក្រុមហ៊ុន SDIC Intelligent Information Technology Co., Ltd. ដោយមានការទទួល ស្វាគមន៍យ៉ាងកក់ក្តៅពីសំណាក់គណៈគ្រប់គ្រងជាន់ខ្ពស់ ដឹកនាំដោយ លោក Teng Da ប្រធានក្រុមហ៊ុន។ ក្នុងឱកាសនោះ គណៈ ប្រតិភូកម្ពុជាបានសិក្សាស្វែងយល់ពីសមត្ថភាពឈានមុខរបស់ក្រុមហ៊ុន លើវិស័យកោសល្យវិច័យឌីជីថល (Digital Forensics) ការធ្វើឌីជីថលូបនីយកម្មនៃសន្តិសុខសាធារណៈ សន្តិសុខសាយប័រ និងរដ្ឋាភិបាលឌីជីថល ដែលជាទុនដ៏សំខាន់សម្រាប់កម្ពុជាក្នុងការ ជំរុញការអភិវឌ្ឍសេដ្ឋកិច្ច និងសន្តិសុខឌីជីថលប្រកបដោយចីរភាព និងសុវត្ថិភាព។ ចំណែកនៅពេលល្ងាច, ឯកឧត្តមឧបនាយករដ្ឋមន្ត្រី និងគណៈប្រតិភូ បានអញ្ជើញចូលរួមក្នុងពិធីទទួលទានអាហារពេល ល្ងាចធុរកិច្ច និងវិនិយោគ ដែលត្រូវបានរៀបចំទទួលស្វាគមន៍ដោយគណៈគ្រប់គ្រងជាន់ខ្ពស់ នៃសន្និសីទអង្គការសហប្រជាជាតិ ស្តីពីពាណិជ្ជកម្ម និងការអភិវឌ្ឍ (UNCTAD)។ សូមបញ្ជាក់ថា កម្មវិធីទាំងបីនេះ បានបញ្ចប់ទៅដោយបរិយាកាសស្និទ្ធស្នាល និង ទទួលបានលទ្ធផលជាផ្លែផ្កា ក្នុងការបើកច្រកផ្លូវបន្ថែមទៀត សម្រាប់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ រវាងកម្ពុជា និងដៃគូអន្តរជាតិនាពេលខាងមុខ៕ អត្ថបទ៖ សុន រ៉ាឌី

កម្ពុជាដាក់ចេញវិធានការបន្ទាន់ ដើម្បីទប់ការកើនឡើងនៃសម្ពាធអតិផរណា រក្សាស្ថិរភាព​ម៉ាក្រូ​សេដ្ឋកិច្ច​ជាតិ

2026/09/07 02:56:07 pm        206
Facebook Telegram Linkin
រាជរដ្ឋាភិបាលដាក់ចេញវិធានការបន្ទាន់ ក្នុងរយៈពេលខ្លី (នៅចុងឆ្នាំ២០២៦) ដើម្បីទប់ការកើនឡើងនៃសម្ពាធអតិផរណា ដែល បាននិងកំពុងបន្តកើនឡើង ឱ្យស្ថិតនៅក្នុងការគ្រប់គ្រងបាន ដើម្បីរក្សាស្ថិរភាពម៉ាក្រូសេដ្ឋកិច្ច និងចីរភាពហិរញ្ញវត្ថុសាធារណៈ ជំរុញប្រែ ក្លាយបញ្ហាចំពោះមុខ ឱ្យទៅជាកាលានុវត្តភាពនៃការអភិវឌ្ឍ។ ឯកឧត្តម អ៊ុង លុយណា អគ្គនាយកនៃអគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ លើកឡើងក្នុងពិធី ប្រកាសដាក់ឱ្យអនុវត្តជាផ្លូវការនូវឯកសារ កម្មវិធីអន្តរាគមន៍គ្រប់ជ្រុងជ្រោយឆ្លើយតបនឹងសភាពការណ៍ពហុវិបត្តិ នៅចុងសប្តាហ៍កន្លង មកថា ជុំវិញវិបត្តិដែលកំពុងប្រឈមក្នុងពេលបច្ចុប្បន្ននេះ គឺដោយសារការផ្លាស់ឆាប់រហ័សនៃរបបពាណិជ្ជកម្មសកល, បញ្ហាជម្លោះ ព្រំដែនកម្ពុជា-ថៃ បាននិងកំពុងស្ថិតក្នុងភាពមិនប្រាកដប្រជា ក្នុងនោះមួយផ្នែកធំការធ្វើឱ្យប៉ះពាល់ពលករដែលជាជនភៀសសឹក, និង សង្គ្រាមនៅមជ្ឈឹមបូព៌ា បានធ្វើឱ្យបញ្ហាថ្លៃប្រេងឥន្ធនៈ និងឧស្ម័នឡើងថ្លៃ ជាពិសេសការប៉ះពាល់ទៅលើវិស័យដែលពឹងផ្អែកប្រេង និង ឧស្ម័ន។ ឯកឧត្តមបន្តថា ជុំវិញបញ្ហានេះបានធ្វើឱ្យសម្ពាធអតិផរណាកើនឡើងខ្ពស់ ជាក់ស្តែងតាមការប៉ាន់ស្មាននៅដើមឆ្នាំ២០២៦ ស្ថិតក្នុងរង្វង់ ៣.៨% ហើយតាមរយៈការវាស់វែងចុងក្រោយនេះ អតិផរណាបានកំពុងកើនឡើងយ៉ាងលឿន ជាក់ស្តែងនៅក្នុងខែឧសភា កន្លងមកនេះ ត្រូវបានប៉ាន់ស្មានក្នុងរង្វង់ ៧.២%។ ជុំវិញបញ្ហាទាំងនេះ ទើបរាជរដ្ឋាភិបាលបានសម្រេចដាក់វិធានការបន្ថែម ដើម្បីជួយ សម្រាលបន្ទុកឡើងវិញ ជាពិសេសនៅចុងឆ្នាំ២០២៦នេះ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងថា ស្របតាម ស្មារតីខាងលើនេះ រាជរដ្ឋាភិបាលក៏បានដាក់ចេញ និងជំរុញអនុវត្តនូវកម្មវិធីអន្តរាគមន៍គ្រប់ជ្រុងជ្រោយ ឆ្លើយតបនឹងសភាពការណ៍ពហុ- វិបត្តិនេះឡើង ។ កម្មវិធីអន្តរាគមន៍នេះ បានរួមបញ្ចូលគ្នានូវវិធានការចម្រុះ ទាំងវិធានការផ្នែកផ្គត់ផ្គង់ និងវិធានការផ្នែកតម្រូវការ សំដៅ ជំរុញកំណើន និងពង្រឹងភាពធន់នៃសេដ្ឋកិច្ច និងសង្គមកម្ពុជា សម្រាប់រយៈពេលខ្លី និងមធ្យមខាងមុខ។ សរុបជារួម, កម្មវិធីអន្តរាគមន៍ ដែលបានដាក់ឲ្យអនុវត្តជាផ្លូវការនេះ មិនមែនសម្រាប់តែការដោះស្រាយផលប៉ះពាល់ភ្លាមៗនៃវិបត្តិ តែ មួយមុខប៉ុណ្ណោះទេ ប៉ុន្តែថែមទាំងជាការវិនិយោគលើប្រជាជន, ការបង្កើតការងារ, ការបង្កើនផលិតភាព, ជាពិសេសសម្រាប់សហគ្រាស ធុនមីក្រូ តូច និងមធ្យម, និងការពង្រឹងភាពធន់នៃសេដ្ឋកិច្ចកម្ពុជា ជាកញ្ចប់រួមតែមួយ ។ ក្នុងន័យនេះកម្មវិធីអន្តរាគមន៍ អាចត្រូវបាន ចាត់ទុកជាឧបករណ៍វិធានការគោលនយោបាយដ៏សំខាន់របស់រាជរដ្ឋាភិបាល ក្នុងការខិតខំរក្សាលំនឹងជីវភាពប្រជាជន និងពង្រឹងភាព ធន់របស់សហគ្រាស ជាពិសេសសហគ្រាសធុនមីក្រូ តូច និងមធ្យម សំដៅជំរុញកំណើនសេដ្ឋកិច្ចជាតិ សម្រាប់ឆ្នាំ២០២៦នេះ និងជា មូលដ្ឋានសម្រាប់គាំទ្រសេដ្ឋកិច្ច ឲ្យបន្តស្ថិតលើមាគ៌ានៃកំណើន នៅបណ្តាឆ្នាំខាងមុខប្រកបដោយចីរភាព៕ អត្ថបទ៖ សុន រ៉ាឌី

រាជរដ្ឋាភិបាលនឹងទម្លាក់កញ្ចប់ថវិកា ៥៣ លានដុល្លារ សម្រាប់បន្តអភិវឌ្ឍន៍ជំនាញគាំទ្រ MSMEs

2026/09/07 12:38:57 pm        266
Facebook Telegram Linkin
រាជរដ្ឋាភិបាលនឹងទម្លាក់កញ្ចប់ថវិកាប្រមាណ ៥៣ លានដុល្លារអាមេរិក គាំទ្រកម្មវិធីការអភិវឌ្ឍជំនាញដែលមានស្រាប់ និងការរៀបចំ កម្មវិធីបណ្តុះបណ្តាលថ្មីៗ ដើម្បីឆ្លើយតបទៅនិងតម្រូវការទីផ្សាររបស់សហគ្រាសធុនមីក្រូ តូច និងមធ្យម និងគាំទ្របង្កើតមុខរបរ និង ការចូលទីផ្សារការងារ។ ឯកឧត្តម អ៊ុង លុយណា អគ្គនាយកនៃអគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ លើកឡើងក្នុងពិធី ប្រកាសដាក់ឱ្យអនុវត្តជាផ្លូវការនូវឯកសារ កម្មវិធីអន្តរាគមន៍គ្រប់ជ្រុងជ្រោយឆ្លើយតបនឹងសភាពការណ៍ពហុវិបត្តិ នៅចុងសប្តាហ៍កន្លង មកថា ជុំវិញបញ្ហាសេដ្ឋកិច្ចនេះ ឃើញថា ក្រោយពីវិបត្តិនៃជំងឺកូវីដ-១៩ មានបញ្ហាប្រឈមច្រើន ជាពិសេសនៅឆ្នាំ២០២៦នេះ កម្ពុជា ជួបបញ្ហាប្រឈមពហុវិបត្តិ ក្នុងនោះបញ្ហាប្រេងឥន្ធនៈ បានដាក់សម្ពាធខ្លាំងជាងគេ ដែលនឹងអាចធ្វើឱ្យកំណើនសេដ្ឋកិច្ចថមថយ ជាក់ ស្តែងការវាយតម្លៃកំណើនសេដ្ឋកិច្ចនៅដើមឆ្នាំ២០២៦ បានព្យាករណ៍ក្នុងរង្វង់ ៥,២% និងបន្ទាប់មកទៀតនៅត្រឹម ៤,២% និងនៅក្នុង រយៈពេល ៦ ខែ ឆ្នាំ២០២៦នេះ ត្រូវបានវាយតម្លៃមកនៅត្រឹម ៤,១% ប៉ុណ្ណោះ។ បញ្ហានេះក្រសួងបាននិងកំពុងពិនិត្យ និងតាមដាន បន្ថែមទៀត ដើម្បធ្វើការវាយតម្លៃនៅពាក់កណ្តាលឆមាសទី២ ឆ្នាំ២០២៦នេះ។ ឯកឧត្តម បន្តថា តាមរយៈការដាក់ចេញកម្មវិធីអន្តរាគមន៍គ្រប់ជ្រុងជ្រោយនេះ គឺបានបែងចែកជាបីកញ្ចប់ធំៗ ដែលមានទំហំ ទឹកប្រាក់សរុបជាង ១ ២២៤ លានដុល្លារអាមេរិក ក្នុងនោះសម្រាប់កញ្ចប់ទី១ មានទឹកប្រាក់ជាង ១ ប៊ីលានដុល្លារអាមេរិក សម្រាប់ អនុវត្តលើ ១៥ វិធានការ, បញ្ចប់ទី២ មានទឹកប្រាក់ ៥៣ លានដុល្លារអាមេរិក និងអនុវត្តវិធានការចំនួន ៤ ក្នុងនោះការ គាំទ្រកម្មវិធីការ អភិវឌ្ឍជំនាញដែលមានស្រាប់ និងការរៀបចំកម្មវិធីបណ្តុះបណ្តាលថ្មីៗ ដើម្បីឆ្លើយតបទៅនិងតម្រូវការទីផ្សាររបស់ MSMEs និងគាំទ្រ បង្កើតមុខរបរ និងការចូលទីផ្សារការងារ និងការដាក់ចេញកម្មវិធីបណ្តុះបណ្តាលខ្លីនៅតាមសាកលវិទ្យាល័យជាដើម។ ចំណែកកញ្ចប់ ទី៣ មានទឹកប្រាក់ជាង ១២៤ លានដុល្លារអាមេរិក ដោយកញ្ចប់នេះអនុវត្តលើ ៨ វិធានការផងដែរ។ ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា លើកឡើងថា កម្មវិធីអន្តរាគមន៍នេះគឺជាយុទ្ធនាការធំមួយរបស់ រាជរដ្ឋាភិបាល ដែលមានទឹកប្រាក់ជាង ១ ២២៤ លានដុល្លារអាមេរិក ដោយបំបែកទៅលើវិធានារតូចៗជាច្រើន ដែលបញ្ហាក៏សូមឱ្យ ម្ចាស់អាជីវកម្ម ក៏ដូចសមាគមនានា សូមយកចិត្តទុកដាក់ឱ្យបានខ្ពស់ ដើម្បីដាក់ពាក្យស្នើសុំឱ្យចំគោលដៅ ហើយបញ្ហានេះក៏សូមឱ្យ ក្រសួងសេដ្ឋកិច្ច និងហិរញ្ញវត្ថុ ផ្សព្វផ្សាយការអនុវត្តវិធានការទាំងនោះឱ្យបានទូលំទូលាយ ដើម្បីធានានូវប្រសិទ្ធភាព និងស័ក្តិភាព ក្នុង ការអនុវត្តនូវរាល់វិធានការគន្លឹះនានា។ សូមបញ្ជាក់ថា កញ្ចប់អន្តរាគមន៍ទី២ មានទឹកប្រាក់សរុប ៥៣ លានដុល្លារអាមេរិក ដោយអនុវត្តលើការផ្តល់ការបណ្តុះបណ្តាលជំនាញ បច្ចេកទេស និងវិជ្ជាជីវៈ ដោយផ្សារភ្ជាប់នឹងការបង្កើតមុខរបរ ដែលផ្តោតលើការគាំទ្រកម្មវិធីអភិវឌ្ឍន៍ជំនាញមានស្រាប់ ដែលកំពុងត្រូវ បានបន្តអនុវត្ត និងលើការរៀបចំនូវកម្មវិធីបណ្តុះបណ្តាលថ្មី ដែលមានគោលដៅច្បាស់លាស់ ព្រមទាំងឆ្លើយតបនឹង តម្រូវការទីផ្សារ របស់សហគ្រាសធុនមីក្រូ តូច និងមធ្យម ដោយផ្សារភ្ជាប់ការអភិវឌ្ឍជំនាញ ជាមួយការគាំទ្រផ្នែកហិរញ្ញប្បទាន និងការគាំទ្របង្កើត មុខរបរ ឬការចូលទីផ្សារការងារ។ លើសពីនេះកញ្ចប់អន្តរាគមន៍ទី២នេះ ក៏មានការដាក់ចេញនូវកម្មវិធីបណ្តុះបណ្តាលវគ្គខ្លីនៅតាម សាកលវិទ្យាល័យនានា ទទួលបានការគាំទ្រពីគម្រោងកែលម្អការអប់រំកម្រិតឧត្តមសិក្សា និងការផ្តល់ការគាំទ្រដល់ការផ្គូផ្គងការងារ និង ការជួយស្វែងរកការងារ សម្រាប់ពលករទេសន្តរប្រវេសន៍វិលត្រឡប់ពីក្រៅប្រទេស គ្រួសារក្រីក្រ និងគ្រួសារងាយរងហានិភ័យ យុវជន ដែលមានជំនាញទាប និងកម្មករក្នុងសេដ្ឋកិច្ចក្រៅប្រព័ន្ធ វិស័យកសិកកម្ម សំណង់ សេវាកម្ម និងសហគ្រាសធុន តូច និងមធ្យម៕ អត្ថបទ៖ សុន រ៉ាឌី

ប្រព័ន្ធធារាសាស្ត្រក្នុងស្រុកបរិបូណ៌ ខេត្តកំពង់ឆ្នាំង អាចស្រោច​ស្រព​ផ្ទៃដីស្រែ​វស្សា​បាន​ជាង ១ម៉ឺន​៧ពាន់ហិកតា

2026/09/05 01:24:25 pm        267
Facebook Telegram Linkin
ប្រព័ន្ធធារាសាស្ត្រអាចាំង និងលំហាច មានទីតាំងស្ថិតនៅក្នុងស្រុកបរិបូណ៌ ខេត្តកំពង់ឆ្នាំង គឺ​ជា​ប្រព័ន្ធ​ប្រឡាយ ដែលអាច​នាំ​ទឹក​ទៅ​ស្រោច​ស្រព​លើ​​ដី​កសិកម្ម​ប្រជាកសិករ​បាន​ប្រមាណជាង ១ម៉ឺន​៧ពា​ន់ហិ​កតា ដោយប្រព័ន្ធធារាសាស្ត្រអាចាំង ស្រោចស្រពបានជាង១ម៉ឺន៤ពាន់ហិកតា និ​ង​លំហាចស្រោចស្រពបានជាង ៣ពាន់ហិកតា។ នេះបើតាមការបញ្ជាក់ពីលោក ចេង ចាន់ដូណា អភិបាល​ស្រុកបរិបូណ៌ ខេត្តកំពង់ឆ្នាំងអោយដឹង នាព្រឹកថ្ងៃទី០៥ ខែកញ្ញា ឆ្នាំ២០២៦។លោក ចេង ចាន់ដូណា បានអោយដឹងថា៖ ប្រព័ន្ធធារាសាស្ត្រអាចាំង និងលំហាចនេះ គឺ​ជា​សំណង់​ប្រព័ន្ធ​ធារាសាស្ត្រថ្មី ដែលមានលក្ខណៈគ្រប់ជ្រុងជ្រោយរបស់ខេត្តកំពង់ឆ្នាំង មិន​ត្រឹម​តែ​សម្រាប់​បំរើ​លើការងារស្រោចស្រពប៉ុណ្ណោះទេ ប៉ុន្តែសម្រាប់កា​រ​ប្រើ​ប្រាស់​ក្នុង​ជីវភាព​ប្រចាំ​ថ្ងៃ​របស់​បង​ប្អូន​ប្រជាកសិករ និងលើវិស័យទេសចរណ៍ថែមទៀត។ ប្រជាកសិករដែលទទួលផលប្រយោជន៍ពីប្រព័ន្ធធារាសាស្ត្រទាំង២ខាងលើ ក៏អាចដាំស្រូវបាន ចាប់​ពី​២​ទៅ៣ដងក្នុង១ឆ្នាំ រួមនិងដាំដំណាំផ្សេងៗ ហើយជីវភាពបានល្អប្រសើរជាងពេលមុន។លោក​បន្តថា សមិទ្ធិផលទាំងអស់នេះ បានបង្ហាញពីការយកចិត្តទុកដាក់របស់រាជរដ្ឋាភិបាល ក្រោ​ម​ការ​ដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់សម្តេចតេជោ ហ៊ុន សែន ប្រធាន​ព្រឹទ្ធ​សភា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយចាប់​ផ្តើម​ពី​ការ​ស្តារ​មកកសាង និងអភិវឌ្ឍន៍ ហើយឈានទៅធ្វើការពង្រីកពង្រឹងសមត្ថភាពគ្រប់គ្រងទឹក ដើម្បីធា​នាដល់ការផ្គត់ផ្គង់ទឹកគ្រប់គ្រាន់សម្រាប់ការបង្ករបង្កើនផលស្រូវ និងដំណាំ​គ្រប់​ប្រភេទ​របស់​ប្រជា​ពលរដ្ឋ ក៏ដូចជាការប្រើប្រាស់ប្រចាំថ្ងៃ ដែលជាផ្នែក​មួយ​ជួយ​លើក​ស្ទួយដ​ល់​គោល​នយោបាយ​ជាតិ ស្តីពីសន្តិសុខស្បៀងប្រកបដោយប្រសិទ្ធិភាព និងយុទ្ធសាស្ត្រនាំស្រូវ​អង្ករ​ចេញ​រប​ស់​រាជរដ្ឋាភិបាល ក្នុងដំណាក់កាលនៃការប្រែប្រួលអាកាសធាតុ។ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក៏បានថ្លែងអំណរគុណដល់ប្រទេសចិន និង​ជប៉ុន ដែលជានិច្ចជាកាលតែងជួយដល់រាជរដ្ឋាភិបាលកម្ពុជា ក្នុងការកសាង និងអភិវឌ្ឍន៍​ហេដ្ឋា​រចនា​សម្ព័ន្ធ​ស្ទើរគ្រប់វិស័យ និងបានកោតសរសើរ​វាយ​តម្លៃ​ខ្ពស់​ចំពោះ​កិច្ច​ខំប្រឹង​ប្រែង​របស់​ក្រុម​ការងា​រអនុ​វត្តគម្រោងកែលំអ និងស្តារឡើងវិញនូវប្រព័ន្ធស្រោចស្រព និងប្រព័ន្ធរំដោះ​ទឹក​ភាគ​ខាង​លិច​បឹងទន្លេសាប ជាមួយលទ្ធផលការងារ​ដែល​សម្រេច​បាន​ទៅ​តាម​ផែនកា​រ​ដែល​បាន​គ្រោង​ទុក​។ លើសពីនេះឯកឧត្តអភិបាលខេត្ត ក៏បានអំពាវ​នាវ​អោយ​ប្រជាក​សិករ​នៅ​ក្នុង​ស្រុក​ទាំង​៣​នៃ​ខេត្តកំពង់ឆ្នាំង ដែលកំពុងទទួលបានសារៈប្រយោជន៍ពីគម្រោងទាំង២នេះ ត្រូវជួយថែរក្សា និង​ចែក​រំលែកទឹកប្រើប្រាស់អោយមានតម្លាភាព ការទទួលខុសត្រូវខ្ពស់ និងអោយ​មាន​សុខដុម​រម្យនា​នៅ​ក្នុង​សហគមន៍ទាំងអស់៕ អត្ថបទ៖ កាំង ហុងវាស្នា

រាជរដ្ឋាភិបាល គ្រោងឧបត្ថម្ភធនលើការបំប្លែងរ៉ឺម៉កកង់បី ដើម្បី​កាត់​បន្ថយ​ការ​ប្រើ​ប្រេង​ឥន្ធនៈ និង​ឧស្ម័ន

2026/09/05 11:06:41 am        3451
Facebook Telegram Linkin
រាជរដ្ឋាភិបាលគ្រោងដាក់ឲ្យអនុវត្តនូវកម្មវិធីឧបត្ថម្ភធន និងផ្តល់ឥណទានសម្បទាន សម្រាប់​ការ​បំប្លែង​រ៉ឺម៉ក​កង់​បី​​ពីការប្រើប្រាស់​ប្រេងឥន្ធនៈ និងឧស្ម័ន ទៅជាការប្រើប្រាស់អគ្គិសនី ដោយ​គម្រោង​នេះនឹង​ចាប់ផ្តើមសាកល្បងលើរ៉ឺម៉កកង់បីជាង ៦ម៉ឺនគ្រឿង នៅរាជធានីភ្នំពេញ ដើម្បី​កាត់​បន្ថយ​ការ​ពឹងផ្អែកលើប្រេងឥន្ធនៈទាំងនេះ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ ​លើកឡើងនៅក្នុងពិធី​ប្រកាសដាក់ឱ្យអនុវត្តជាផ្លូវការនូវឯកសារ «កម្ម​វិធី​អន្ត​រាគមន៍​គ្រប់​ជ្រុង​ជ្រោយ​ឆ្លើយ​តប​នឹងសភាពការណ៍ពហុវិបត្តិ” នៅថ្ងៃទី៤ ខែកញ្ញា ឆ្នាំ២០២៦ ថា នៅក្នុង​កម្ម​វិធី​អន្តរាគមន៍​គ្រប់ជ្រុងជ្រោយ ឆ្លើយតបនឹងសភាពការណ៍ពហុវិបត្តិនេះ ចំណែកកញ្ចប់​អន្តរាគមន៍​ទី៣៖ ដែលគ្រប់គ្រងការធ្វើអន្តរកម្ម និងការបំប្លែងថាមពល ត្រូវបានរៀបចំឡើងក្នុង​គោល​បំណង​ជំរុញ​ការ​ប្រើប្រាស់ថាមពលអគ្គិសនី ឬថាមពល ស្អាតផ្សេងទៀត ដើម្បីកាត់បន្ថយ​ការ​ពឹង​ផ្អែក​លើ​ឧស្ម័ន​ឥន្ធនៈ ឬប្រេងឥន្ធនៈ ក្នុងនោះរាជរដ្ឋាភិបាលបានបញ្ចុះអត្រាពន្ធនាំចូល លើមុខ ទំនិញ​មួយ​ចំនួន​រួម​មាន ឧបករណ៍សាកអាគុយរថយន្តអគ្គិសនី, ឆ្នាំងដាំបាយអគ្គិសនី, ចង្កៀងសូឡា, ចង្ក្រាន​​កម្ដៅ​អគ្គិសនី, រថយន្តដឹក អ្នកដំណើរ និងដឹកទំនិញប្រភេទ HEV, PHEV និង EV ជា​ដើម​ ដើម្បីកាត់បន្ថយការពឹងផ្អែកលើប្រេងឥន្ធនៈ ឬឧស្ម័នឥន្ធនៈ។ឯកឧត្តម​អគ្គបណ្ឌិតសភាចារ្យ បន្តឱ្យដឹងថា ជាមួយគ្នានេះ, រាជរដ្ឋាភិបាល​ក៏​កំពុង​សិក្សា​រៀប​ចំ​យន្តការ ​និងគ្រោងដាក់ឲ្យអនុវត្ត នូវកម្មវិធីឧបត្ថម្ភធន និងផ្តល់​ឥណទាន​សម្បទាន​សម្រាប់​ការ​បំប្លែង​រ៉ឺម៉កកង់បី ពីការប្រើប្រាស់ប្រេងឥន្ធនៈ និងឧស្ម័នឥន្ធនៈ ទៅជាការ ប្រើប្រាស់អគ្គិសនី។ កម្មវិធី​នេះនឹងចាប់ផ្តើមសាកល្បងលើការបំប្លែងរ៉ឺម៉កកង់បី ចំនួនប្រមាណជាង ៦ ម៉ឺនគ្រឿង នៅ​រាជ​ធានី​ភ្នំពេញ មុន នឹងពង្រីកទៅតាមបណ្តាខេត្តនានា។ កញ្ចប់អន្តរាគមន៍ទី៣នេះ ក៏មាន​ការ​គិតគូរ​ដាក់​ចេញផងដែរ នូវវិធានការពង្រឹងសន្តិសុខថាមពល, កាត់បន្ថយហានិភ័យ ពីការ​រំខាន​នៃ​ការ​ផ្គត់ផ្គង់ និងធានាលទ្ធភាពឆ្លើយតបក្នុងគ្រាអាសន្ន ឬវិបត្តិថាមពល បញ្ហានេះ​ការ​រៀប​ចំ​ផែន​ការ​ប្រតិបត្តិស្តីពីការគ្រប់គ្រងការផ្គត់ផ្គង់ប្រេងឥន្ធនៈ ក្នុងករណីមានភាពអាសន្នផ្នែកថាមពល ការ​អភិវឌ្ឍប្រព័ន្ធ QR Code សម្រាប់ការគ្រប់ គ្រងការផ្តល់កូតាប្រើប្រាស់ប្រេងឥន្ធនៈ និង​ឧស្ម័ន​ឥន្ធនៈ និងការពង្រឹងស្តុកបម្រុងយុទ្ធសាស្ត្រប្រេងឥន្ធនៈ និងឧស្ម័នឥន្ធនៈ ស្របតាម ស្តង់​ដា​អន្តរជាតិ​។ជុំវិញការបំប្លែងរ៉ឺម៉កកង់បីនេះ, ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ និងជាអគ្គ លេខាធិការគណៈកម្មាធិការគោលនយោបាយសេដ្ឋកិច្ច និង​ហិរញ្ញ​វត្ថុ លើកឡើងផងដែរថា ទាក់ទិនការប្រែក្លាយរ៉ឺម៉កកង់បីពីការប្រើ ប្រាស់ប្រេងឥន្ធនៈ និង​ឧស្ម័ន ទៅប្រើប្រាស់អគ្គិសនីនេះ ក្រសួងកំពុងសិក្សាឱ្យបានច្បាស់បន្ថែមទៀតដូចជា ការរ​ត់​ចម្ងាយ​ផ្លូវ និងការចង់ បានរបស់អ្នកប្រើប្រាស់ ដើម្បីជំរុញការដាក់ចេញឱ្យចំគោលដៅ និង​មាន​ប្រសិទ្ធភាព​។ទាក់ទិនរ៉ឺម៉កកង់បីនេះ បើយោងតាមទិន្នន័យពីសមាគម និងក្រសួងនៅក្នុងឆ្នាំ២០២០ កម្ពុជា​មាន​ចំនួន​រ៉ឺម៉កកង់បី (រួមទាំងរ៉ឺម៉កកង់បី បែបប្រពៃណី និងម៉ូតូកង់បីបែបទំនើប និងកង់បីឥណ្ឌា) សរុប​នៅទូទាំងប្រទេសមានប្រមាណជាង ១០ ម៉ឺនគ្រឿង ក្នុងនោះនៅរាជធានី ភ្នំពេញ តាម​ការ​ប៉ាន់ប្រ​មាណ របស់សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) មាន​អ្នក​ប្រក​ប​របរ និងរ៉ឺម៉កកង់បី អនឡាញ (PassApp, Grab ជាដើម) រួមទាំងកង់បីឥណ្ឌា និង​កង់​បី​បែប​ប្រពៃណី​ខ្មែរខ្លះៗ មានប្រមាណជាង ៥ ម៉ឺនគ្រឿង៕ អត្ថបទ៖ សុន រ៉ាឌី

កម្ពុជានាំចេញទៅកាន់ប្រទេស RCEP មានទឹកប្រាក់ជាង ៦ពាន់លានដុល្លារអាមេរិក ក្នុង​រយៈពេល​៧​ខែ​​ឆ្នាំ២០២៦

2026/09/05 09:57:58 am        229
Facebook Telegram Linkin
ភ្នំពេញ៖ កម្ពុជានាំចេញទំនិញទៅកាន់ប្រទេស RCEP (អាសិប) មានទឹកប្រាក់ ៦,៤១​ពាន់​លាន​ដុល្លារ​​អាមេរិក ក្នុងរយៈពេល ៧ខែនៃឆ្នាំ២០២៦ កើនឡើង ១១ ភាគរយ បើ​ធៀប​នឹ​ង​រយៈ​ពេល​ដូច​គ្នាកា​លពី​ឆ្នាំ២០២៥។ បណ្តាប្រទេស RCEP មាន​ចំណែកទីផ្សារជាង ៣០ ភាគរយ នៃកា​រ​នាំ​ចេញ​សរុប។ របាយការណ៍របស់ក្រសួងពាណិជ្ជកម្ម​ បានបញ្ជាក់ថា ចាប់ពីខែមករា ដល់ ខែកក្កដា ឆ្នាំ២០២៦ កម្ពុជា បាន​នាំ​ចេញ​ទំនិ​ញ​ទៅ​កាន់​បណ្តា​ប្រទេស​កិច្ច​ព្រម​ព្រៀង​ភាព​ជាដៃគូ​សេដ្ឋកិច្ច​គ្រប់​ជ្រុង​ជ្រោយ​តំបន់ ​(RCEP) មានតម្លៃជាប្រាក់ជាង ៦ ៤១២លានដុល្លារអាមេរិក កើនឡើង ១០,៩៩ ភាគរយ បើធៀបនឹងរយៈពេលដូចគ្នាកាលពីឆ្នាំទៅ។ បណ្តាប្រទេស RCEP បាន​គ្រប់​ដណ្តប់​ចំណែក​ទីផ្សារ ៣០,៣៤ ភាគរយ នៃការនាំចេញសរុបដែលមានចំនួន ១៩,២៤ ពាន់​លាន​ដុល្លារ​អាមេរិក​។​ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) មានប្រទេស​សមាជិក​សរុប​ចំនួន ​១៥ ដែលរួមមានប្រទេសសមាជិកអាស៊ានទាំង ១០ និងប្រទេស​ដៃ​គូ​ពាណិជ្ជ​កម្ម​ធំ​ៗ​ចំនួន​៥ ​រួមមាន ចិន ជប៉ុន សាធារណរដ្ឋកូរ៉េ អូស្ត្រាលី និងនូវែលសេឡង់។ របាយការណ៍​នេះ បានបញ្ជាក់ទៀតថា ក្នុងចំណោមប្រទេស RCEP គឺ កម្ពុជាបាននាំចេញ​ទៅ​កាន់​ទីផ្សារ​​អាស៊ានក្នុងទំហំទឹកប្រាក់ចំនួនជាង ៣ ៥៣៩លានដុល្លារអាមេរិក ដែល​ស្មើ​នឹង​ជាង​ពាក់​កណ្តាល​នៃការនាំចេញទៅកាន់ទីផ្សារ RCEP ទាំងមូល។​ ចំណែក ប្រទេសដៃគូពាណិជ្ជកម្ម​ធំៗ​ចំនួន​៥ របស់កម្ពុជា គឺប្រទេសចិនបានបញ្ជាទិញទំនិញក្នុងទំហំទឹកប្រាក់ជាង ១ ១០៣ លាន​ដុល្លារអាមេរិក​ បន្ទាប់មកប្រទេសជប៉ុន បានស្រូបយកទំនិញកម្ពុជាមានតម្លៃជាប្រាក់ ១ ០៨៤លានដុល្លារអាមេរិក និង អូស្រ្តាលី ចំនួនជាង ៤១២លានដុល្លារអាមេរិក, សាធារណរដ្ឋកូរ៉េ ចំនួន​ជាង ២៥៧ លានដុល្លារអាមេរិក, និងនូវែលសេឡង់ ចំនួនជាង ១៤លានដុល្លារអាមេរិក។ លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច បាន​ឱ្យ​ដឹង​ថា​ ទោះបីកម្ពុជាបានចូលជាសមាជិក RCEP ទើបបាន៤ឆ្នាំក៏ដោយ ក៏ការនាំ​ចេញ​របស់​កម្ពុជា​ទៅ​កា​​ន់ទីផ្សារ RCEP កំពុងមានកំណើន និងក្លាយជាច្រកសំខាន់មួយសម្រាប់ពង្រីក និងធ្វើ​ពិពិធ​កម្ម​ទីផ្សារ​នាំចេញ។ ជាពិសេស ទីផ្សារនេះបាន​ផ្តល់​ឱកាស​កាន់​តែ​ច្រើន​ដល់​ទំនិញ​សំខាន់​ៗ​របស់​កម្ពុជា ដូចជា ផលិតផលកាត់ដេរ, គ្រឿងបង្គុំអគ្គិសនី, និងអេឡិចត្រូនិក, គ្រឿងសង្ហារឹម, និង​ផលិត​ផល​កែច្នៃកសិកម្មជាច្រើនប្រភេទ អាចចូលទៅ​កាន់​ទីផ្សារ​ក្នុង​តំបន់​បាន​កាន់​តែ​ងាយ​ស្រួល​។​ កម្ពុជាបាននាំចេញទំនិញទៅកាន់ទីផ្សារ​ RCEP កើនឡើងពី ៦,៣៤ ពាន់លានដុល្លារអាមេរិក ក្នុង​ឆ្នាំ​​២០២២ ដល់ ៩,៨ ពាន់លានដុល្លារអាមេរិក ក្នុងឆ្នាំ២០២៥។ RCEP ជាកិច្ច​ព្រម​ព្រៀង​ពាណិជ្ជ​កម្មធំនៅក្នុងពិភពលោកដោយមានប្រជាជនប្រមាណ ២ ២០០លាននាក់ ឬ ៣០​ភាគ​រយ ​នៃប្រជាជនពិភពលោក និង មានទំហំពាណិជ្ជកម្ម ២៨ភាគរយ នៃទំហំ​ពាណិជ្ជ​កម្ម​ពិភពលោ​ក​៕​ អត្ថបទ៖ ធូ វិរៈ 

កម្ពុជា-ចិន បើកកិច្ចសន្ទនាលើកទី២ ដើម្បីជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ

2026/09/03 03:28:10 pm        456
Facebook Telegram Linkin
កម្ពុជា-ចិនរៀបចំវេទិកាសន្ទនា រវាងរដ្ឋនិងវិស័យឯកជនលើកទី២ ដើម្បីពង្រឹង និងជំរុញកិច្ច​សហប្រតិបត្តិការ​សេដ្ឋកិច្ច ពាណិជ្ជកម្ម និងការវិនិយោគ និងធ្វើឱ្យប្រសើរឡើងនូវ​ទំនាក់​ទំនង​សេដ្ឋកិច្ច ​កសាងជំនឿទុកចិត្តពីសំណាក់សហគមន៍ធុរកិច្ចចិន ដើម្បីពង្រីក វិសាលភាពវិនិយោគ និង​ទាក់ទាញវិនិយោគថ្មីៗមកបណ្តាក់ទុនបន្ថែម។ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) រួមជាមួយនិងឯកឧត្តម Wang Wenbin ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា នៅថ្ងៃទី៣ ខែកញ្ញា ឆ្នាំ២០២៦នេះ បានអញ្ជើញសហធិបតីដឹកនាំកិច្ចសន្ទនាលើកទី២ រវាងរដ្ឋនិងវិស័យឯកជនកម្ពុជា-ចិន ដែលត្រូវបានរៀបចំ ឡើងក្នុងគោលបំណងដើម្បីពង្រឹង និងជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ ព្រមទាំងធ្វើឱ្យប្រសើរឡើង នូវទំនាក់ទំនងសេដ្ឋកិច្ច កសាងជំនឿទុកចិត្តពីសំណាក់សហគមន៍ធុរកិច្ចចិន សំដៅជំរុញឱ្យមានការពង្រីកវិសាលភាពវិនិយោគបន្ថែម និងទាក់ទាញការវិនិយោគថ្មីៗទៀតមកកម្ពុជា។ ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍ទៅកាន់ឯកឧត្តមឯកអគ្គរដ្ឋទូត ទីប្រឹក្សាទទួលបន្ទុកការងារសេដ្ឋកិច្ច និងទំនាក់ទំនងពាណិជ្ជកម្ម នៃស្ថានទូតចិន, ថ្នាក់ដឹកនាំក្រសួង-ស្ថាប័នជាសមាជិក ក.អ.ក., ក៏ដូចជាវិនិយោគិន ធុរជន និងតំណាង ក្រុមហ៊ុនសហគ្រាសចិនទាំងអស់ ដែលមានវត្តមានចូលរួមក្នុងជំនួបសន្ទនាដ៏មានសារៈសំខាន់នេះ។ ឯកឧត្តមបានរំលឹកអំពីផ្លែផ្កា នៃកម្មវិធី «Open Day with DPM» លើកទី១ ដែលទើបតែបានប្រព្រឹត្តទៅកាលពីថ្ងៃទី១ ខែកញ្ញា កន្លងទៅថ្មីៗ។ តាមរយៈជំនួប ផ្ទាល់ជាមួយថ្នាក់ដឹកនាំនៃក្រុមហ៊ុនចំនួន ២០ ឯកឧត្តមឧបនាយករដ្ឋមន្ត្រី បានទទួលស្ដាប់ដោយយកចិត្តទុកដាក់នូវរាល់កង្វល់ បញ្ហា ប្រឈម និងតម្រូវការជាក់ស្តែង ហើយបានប្តេជ្ញានាំយកនូវរាល់បញ្ហាទាំងនោះទៅពិភាក្សា និងធ្វើការងារយ៉ាងជិតស្និទ្ធ ជាមួយភាគី ពាក់ព័ន្ធទាំងអស់ ដើម្បីស្វែងរកដំណោះស្រាយសមស្រប និងទាន់ពេលវេលា។ឯកឧត្តមឯកអគ្គរដ្ឋទូត បានសម្តែងនូវអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា តាមរយៈ ក.អ.ក. ចំពោះ ការផ្តល់កិច្ចគាំទ្រពេញទំហឹង និងការយកចិត្តទុកដាក់រៀបចំ «កិច្ចសន្ទនារវាងរដ្ឋនិងវិស័យឯកជនកម្ពុជា-ចិន» ប្រកបដោយលទ្ធផល ផ្លែផ្កា និងទទួលបានជោគជ័យត្រចះត្រចង់ ដែលសបញ្ជាក់ពីមិត្តភាពដ៏ស្មោះត្រង់និងរឹងមាំ ជាមួយកិច្ចសហប្រតិបត្តិការអភិវឌ្ឍកម្រិត ខ្ពស់រវាងប្រទេសទាំងពីរ ក្នុងក្របខណ្ឌ “សហគមន៍វាសនារួមកម្ពុជា-ចិន ក្នុងយុគសម័យថ្មីគ្រប់រដូវកាល”។ឯកឧត្តម លើកឡើងបន្តថា តាមរយៈការផ្លាស់ប្តូរមតិយោបល់ប្រកបដោយស្មារតីស្ថាបនា នៅក្នុងកិច្ចសន្ទនាលើកទី១ បាន កត់សម្គាល់ឃើញថា សំណូមពរ និងបញ្ហាប្រឈមមួយចំនួនធំ ដែលវិស័យឯកជនចិនបានលើកឡើង ត្រូវបានយកចិត្តទុកដាក់ ដោះស្រាយបានទាន់ពេលវេលា និងមានប្រសិទ្ធភាពខ្ពស់ ដែលនេះឆ្លុះបង្ហាញឱ្យឃើញពីតម្លៃយ៉ាងធំធេង នៃការគិតគូរយកចិត្តទុក ដាក់របស់រាជរដ្ឋាភិបាលកម្ពុជា ក្នុងការថែទាំគាំទ្រការវិនិយោគពីវិស័យឯកជន។សូមបញ្ជាក់ថា កិច្ចសន្ទនាលើកទី២ រវាងរដ្ឋនិងវិស័យឯកជនកម្ពុជា-ចិន បានផ្តោតលើរបៀបវារៈសំខាន់ៗរួមមាន៖ ១. ការពិនិត្យលើ បច្ចុប្បន្នភាព និងវឌ្ឍនភាពការងារ តាមរយៈការវាយតម្លៃរួមគ្នាលើស្មារតីដែលដាក់ចេញនៅក្នុងកិច្ចសន្ទនាលើកទី១, ២. ការពិភាក្សា លើបច្ចុប្បន្នភាពស្តីពីគោលនយោបាយ និងបទប្បញ្ញត្តិពាក់ព័ន្ធនានា, ៣. ការចូលរួមមតិយោបល់បញ្ចេញទស្សនៈ និងសំណូមពរ ពី តំណាងក្រុមហ៊ុនសហគ្រាសចិន ភ្ជាប់ជាមួយការឆ្លើយតប បកស្រាយពីតំណាងក្រសួងស្ថាប័នពាក់ព័ន្ធ, និង៤. ការកំណត់ និងដាក់ ចេញនូវទិសដៅការងារបន្ត៕ អត្ថបទ៖ សុន រ៉ាឌី 

រដ្ឋមន្ត្រីក្រសួងសេដ្ឋកិច្ច៖ កូរ៉េជាដៃគូអភិវឌ្ឍន៍ទ្វេភាគីលំដាប់ទី៣ ដែលផ្តល់ហិរញ្ញប្បទានឆ្លើយតបនឹងអាទិភាពកម្ពុជា

2026/09/02 02:24:29 pm        285
Facebook Telegram Linkin
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែងថា កូរ៉េជាដៃគូអភិវឌ្ឍន៍ទ្វេភាគីសំខាន់លំដាប់ទី៣ ដែលបានផ្តល់ហិរញ្ញប្បទាន ទាំងឥណទានសម្បទាន និងហិរញ្ញប្បទានឥតសំណង ឆ្លើយតបទៅនិងតម្រូវការអាទិភាព និងបានរួមចំណែកជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជនកម្ពុជា។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅសប្តាហ៍កន្លងមក នេះ បានទទួលជួបពិភាក្សាការងារជាមួយឯកឧត្តម KIM Chang Yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋ កូរ៉េ ប្រចាំនៅព្រះរាជាណាចក្រម្ពុជា ស្តីពីការបន្តជំរុញ និងពង្រឹងកិច្ចសហប្រតិបត្តិការទ្វេភាគីកម្ពុជា-សាធារណរដ្ឋកូរ៉េ, ដោយក្នុងជំនួប នោះ ឯកឧត្តមឧបនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះឯកឧត្តមឯកអគ្គរដ្ឋទូត និងបានថ្លែងអំណរគុណយ៉ាងជ្រាលជ្រៅ ដល់រដ្ឋាភិបាលនិងប្រជាជនកូរ៉េ ដែលបានផ្តល់ហិរញ្ញប្បទានអភិវឌ្ឍន៍ផ្លូវការ រួមចំណែកដល់ការអភិវឌ្ឍសេដ្ឋកិច្ចនិងសង្គមកម្ពុជា តាម រយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងមូលនិធិសហប្រតិបត្តិការសម្រាប់ការអភិវឌ្ឍសេដ្ឋកិច្ច (EDCF)។ឯកឧត្តមអគ្គបណ្ឌិតសភាចារ្យ បន្តថា ទំនាក់ទំនងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ ត្រូវបាន ពង្រឹងនិងពង្រីកឥតឈប់ឈរ ខណៈដែលប្រទេសទាំងពីរកម្ពុជា-កូរ៉េ បានដំឡើងកម្រិតនៃទំនាក់ទំនងទៅជា “ដៃគូយុទ្ធសាស្ត្រ” កាល ពីឆ្នាំ២០២៤។ ជាមួយគ្នានេះ, ហិរញ្ញប្បទានពីសាធារណរដ្ឋកូរ៉េ ទាំងឥណទានសម្បទាន និងហិរញ្ញប្បទានឥតសំណងបានឆ្លើយតប ទាន់ពេលវេលា និងចំតម្រូវការជាអាទិភាពរបស់រាជរដ្ឋាភិបាលកម្ពុជា ហើយបានរួមចំណែកយ៉ាងធំធេងដល់ការកសាងមូលដ្ឋានគ្រឹះ ដើម្បីជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជនកម្ពុជា។ រដ្ឋាភិបាលនៃសាធារណរដ្ឋកូរ៉េ គឺជាដៃគូអភិវឌ្ឍន៍ ទ្វេភាគីដ៏សំខាន់លំដាប់ទី ៣ និងនិងជាដៃគូអភិវឌ្ឍន៍សំខាន់លំដាប់ទី៥ ក្នុងក្របខណ្ឌហិរញ្ញប្បទានសហប្រតិបត្តិការពីដៃគូអភិវឌ្ឍន៍ ទាំងអស់នៅកម្ពុជា ។ ជាក់ស្តែងសមិទ្ធិផលរូបវន្តជាច្រើនដែលជាផ្លែផ្កានៃកិច្ចសហប្រតិបត្តិការរវាងប្រទេសទាំងពីរ ទាំងក្នុងក្របខណ្ឌ ហិរញ្ញប្បទានឥតសំណង និងឥណទានសម្បទានដូចជា ផ្លូវថ្នល់ ស្ពាន ប្រព័ន្ធធារាសាស្រ្ត បណ្តាញអគ្គិសនី មន្ទីរពេទ្យ និងសាលា រៀនជាដើម បានគ្របដណ្តប់នៅទូទាំងប្រទេសកម្ពុជា។ឯកឧត្តមឧបនាយករដ្ឋមន្ត្រី បានគូសបញ្ជាក់ថា កម្ពុជានឹងបន្តពូនជ្រុំកិច្ចសហប្រតិបត្តិការហិរញ្ញវត្ថុ និងអភិវឌ្ឍន៍រវាងប្រទេស ទាំងពីរកម្ពុជា-សាធារណរដ្ឋកូរ៉េ ស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា ស្របពេលដែលកម្ពុជា យកចិត្តទុកដាក់លើការកែលម្អបរិស្ថានវិនិយោគ, ការពារ និងជំរុញទំនុកចិត្តវិនិយោគិន ក៏ដូចជាជំរុញការអភិវឌ្ឍសហគ្រាសមីក្រូ តូច និងមធ្យមនៅកម្ពុជាជាដើម ។ ឯកឧត្តម KIM Chang Yong បានវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយជោគជ័យរបស់ រាជរដ្ឋាភិបាលកម្ពុជា ក្នុងការរក្សាសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច បើទោះបីជាស្ថិត ក្នុងបរិការណ៍ដែលពិភពលោកកំពុង ប្រឈមនឹងវិបត្តិសេដ្ឋកិច្ច បញ្ហាភូមិសាស្ត្រនយោបាយ និងផលវិបាកនៃសង្គ្រាមរវាងប្រទេសរុស្ស៊ី-អ៊ុយក្រែន និងវិបត្តិថាមពលក៏ដោយ ។ បញ្ហានេះរដ្ឋាភិបាលកូរ៉េ នឹងបន្តផ្តល់ហិរញ្ញប្បទានដល់រាជរដ្ឋាភិបាលកម្ពុជា ដើម្បីគាំទ្រដល់ការអភិវឌ្ឍប្រទេស ស្របតាមតម្រូវការ វិស័យអាទិភាព និងគោលនយោបាយអភិវឌ្ឍន៍ ខណៈកិច្ចសហប្រតិបត្តិការពាណិជ្ជកម្ម និងវិនិយោគរវាងប្រទេសទាំងពីរក៏បានកំពុង មានការរីកចំរើនគួរឱ្យកត់សម្គាល់៕ អត្ថបទ៖ សុន រ៉ាឌី

ក្រុមហ៊ុនសិង្ហបុរីមួយឈ្វេងយល់ពីការបង្កើត និងគាំទ្រមជ្ឈមណ្ឌល MSME Hub នៅកម្ពុជា​

2026/09/01 04:21:52 pm        280
Facebook Telegram Linkin
ក្រុមហ៊ុន Grab Holdings Inc. សិង្ហបុរី កំពុង​សិក្សា​ឈ្វេង​យល់​អំពី​កិច្ច​សហប្រតិបត្តិការ​ជាមួយ​រាជ​រដ្ឋាភិបាល លើគោលនយោបាយ នៃការបង្កើត និងគាំទ្រមជ្ឈមណ្ឌលសហគ្រាសធុនមីក្រូ តូច និង​មធ្យម (MSME Hub) ដើម្បីជួយជ្រោមជ្រែងដល់អាជីវកម្ម នៅក្នុងប្រទេសកម្ពុជា​។ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី៣១ ខែសីហា ឆ្នាំ ២០២៦ បានទទួលជួបសម្តែងការគួរសម និង​ពិភាក្សា​ការ​ងារ​ជាមួយ លោកស្រី Chin Yin Ong ប្រធានផ្នែកលើកកម្ពស់សមត្ថភាព អង្គភាព នៃក្រុមហ៊ុន Grab Holdings Inc. សិង្ហបុរី ក្នុងឱកាស​ដែល​លោក​ស្រី​កំពុង​បំពេញ​ទស្សន​កិច្ច​ការងារ​នៅ​កម្ពុជា​ ចាប់ពីថ្ងៃ ទី៣១ ខែសីហា ដល់ថ្ងៃទី២ ខែកញ្ញា ឆ្នាំ២០២៦។ក្នុងជំនួបនោះ, លោកស្រី Chin Yin Ong បានស្នើសុំអនុសាសន៍ និងការ​ណែនាំ​បន្ថែម​ពី​ឯកឧត្តម ឧបនាយករដ្ឋមន្ត្រី សម្រាប់ ជាមូលដ្ឋានក្នុង​ការ​បង្កើន​ប្រសិទ្ធ​ភាព​នៃ​ការ​អនុវត្ត​ផែន​ការ​សកម្ម​ភាព​អាជីវកម្មរបស់ Grab នៅកម្ពុជាឱ្យកាន់តែប្រសើរឡើង។ ក្នុងនោះ ផែនការ​សកម្មភាព​សំខាន់​ៗ​ដែលបានលើកឡើងមាន៖ (១)- ការសិក្សា និងស្វែងយល់​អំពី​កិច្ច​សហប្រតិបត្តិការ​ជាមួយ​រាជ​រដ្ឋាភិបាលកម្ពុជា ក្នុងការបង្កើតនិងគាំទ្រមជ្ឈមណ្ឌលសហគ្រាសធុនមីក្រូ តូច និង​មធ្យម (MSME Hub) ដើម្បីជួយជ្រោមជ្រែងដល់អាជីវកម្ម ក្នុងស្រុក, (២)- ការ​លើក​កម្ពស់​សមត្ថ​ភាព និងការអភិវឌ្ឍជំនាញ តាមរយៈការបង្កើតកម្មវិធីបណ្តុះបណ្តាល ដើម្បីពង្រឹង​សមត្ថភាព បង្កើនជំនាញបន្ថែម និងអភិវឌ្ឍសមត្ថភាពបច្ចេកវិទ្យាឌីជីថលជូនដល់ក្រុមអ្នកបើកបរ និង​ដៃគូ​ពាណិជ្ជករ/អាជីវកររបស់ក្រុមហ៊ុនឱ្យ កាន់តែមានប្រៀបក្នុងការប្រកួតប្រជែងលើទីផ្សារ, និង (៣)- ការរួមចំណែកទាក់ទាញទេសចរមកកាន់កម្ពុជា តាមរយៈការរិះរកនូវ យុទ្ធសាស្រ្ត​ទីផ្សារ​ថ្មី​ៗ​បន្ថែម។ជាការឆ្លើយតប, ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងរាក់ទាក់ ចំពោះវត្តមានរបស់លោកស្រី Ong ព្រមទាំងប្រតិភូអមដំណើរ ក្នុងឱកាសនៃការអញ្ជើញមកបំពេញទស្សនកិច្ចការងារនៅព្រះរាជាណាចក្រកម្ពុជា, ឯកឧត្តមឧបនាយក រដ្ឋមន្ត្រី បានសម្តែងនូវការគាំទ្រយ៉ាងពេញទំហឹងចំពោះរាល់គំនិតផ្តួចផ្តើម និងផែនការសកម្មភាពសំខាន់ៗដែលក្រុមហ៊ុន Grab បាន លើកឡើង និងបានវាយតម្លៃខ្ពស់ចំពោះការប្តេជ្ញាចិត្តរបស់ក្រុមហ៊ុនក្នុងការចូលរួមចំណែកអភិវឌ្ឍន៍សេដ្ឋកិច្ចឌីជីថលនៅកម្ពុជា។ ក្នុង ជំនួបនោះដែរ ឯកឧត្តមឧបនាយករដ្ឋមន្ត្រី ក៏បានគូសបញ្ជាក់យ៉ាងច្បាស់ អំពីជំហរយ៉ាងម៉ឺងម៉ាត់របស់រាជរដ្ឋាភិបាលកម្ពុជា ក្នុងការបន្ត បោសសម្អាតលុបបំបាត់ និងប្រយុទ្ធប្រឆាំងដាច់ខាតរាល់បទល្មើសឆបោកតាមប្រព័ន្ធបច្ចេកវិទ្យា (Online Scams) ដើម្បីធានានូវ បរិស្ថានវិនិយោគដែលមានសុវត្ថិភាព ទំនុកចិត្ត និងការការពារសិទ្ធិផលប្រយោជន៍របស់អ្នកប្រើប្រាស់ក្នុងប្រព័ន្ធឌីជីថល៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

កម្ពុជាតវ៉ាចំពោះការរំលោភបំពានជាបន្តបន្ទាប់របស់ថៃលើអធិបតេយ្យ និងបូរណភាពទឹកដីកម្ពុជា
09/08/2026 08:09 PM
Facebook Telegram Linkin
ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ
09/08/2026 08:09 PM
Facebook Telegram Linkin
មន្រ្តីជាន់ខ្ពស់ គ.ជ.គ.ម. ចុះពិនិត្យការងារគ្រោះមហន្តរាយ និងសួរសុខទុក្ខភៀសសឹក ក្នុងខេត្តបន្ទាយមានជ័យ និងខេត្តឧត្តរមានជ័យ
09/08/2026 08:09 PM
Facebook Telegram Linkin
ពលរដ្ឋអេក្វាឌ័ររាប់ម៉ឺននាក់បោះបង់ចោលផ្ទះសម្បែងរបស់ខ្លួនស្របពេលអំពើហិង្សាជនអន្ធពាលកើនឡើង
09/08/2026 07:09 PM
Facebook Telegram Linkin
លោកLavrov និយាយប្រាប់សមភាគីអារ៉ាប៊ីសាអ៊ូឌីតថា រុស្ស៊ីត្រៀមខ្លួនរួចរាល់ ដើម្បីជួយដោះស្រាយស្ថានភាពនៅមជ្ឈិមបូព៌ា
09/08/2026 06:09 PM
Facebook Telegram Linkin
ជ័យជម្នះរបស់គណបក្ស​ AfD ធ្វើ​ឱ្យ​​របៀបវារៈកំណែទម្រង់របស់លោក Merz កាន់តែ​មិន​ច្បាស់លាស់​
09/08/2026 06:09 PM
Facebook Telegram Linkin
រដ្ឋមន្រ្តីការបរទេសគុយបាច្រានចោលការចរចារបស់អាមេរិក បើទោះបីជាមានការបិទច្រកក៏ដោយ
09/08/2026 06:09 PM
Facebook Telegram Linkin
ប៉ាគីស្ថានបង្ហាញប្រព័ន្ធមីស៊ីលដែល​អាច​ជារបស់​ចិន ខណៈទំនាក់ទំនងកាន់តែស៊ីជម្រៅ
09/08/2026 06:09 PM
Facebook Telegram Linkin
កោះហាវ៉ៃប្រកាសដាក់រដ្ឋក្នុងគ្រាអាសន្ន ខណៈព្យុះសង្ឃរា Lowell បោកបក់ជិតមកដល់
09/08/2026 06:09 PM
Facebook Telegram Linkin
អូស្រ្តាលីប្រឈមនឹងរដូវភ្លើងឆេះព្រៃខ្លួនឯងបន្ទាប់ពីរដូវក្តៅដ៏ក្តៅគគុកនៅអឺរ៉ុប
09/08/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.