BTV NEWS

កសិករគាំទ្រចំណាត់ការរាជរដ្ឋាភិបាលក្នុងការទប់ស្កាត់ការនាំចូលទុរេន ខណៈទិន្នផលទុរេនមានការកើនឡើង

ពាណិជ្ជកម្មទ្វេភាគីកម្ពុជា-វៀតណាម មានទឹកប្រាក់សរុបជាង ៣,៣ ពាន់លានដុល្លារ កើនជាង ៤ %

ទំនិញមានកំណើនខ្ពស់បំផុតចំនួន២០ប្រភេទ បានកំពុងគាំទ្រដល់ការនាំចេញ និងកំណើន ក្នុងសេដ្ឋកិច្ច

កម្ពុជាដាក់ចេញផែនការសកម្មភាពគន្លឹះ ជំរុញប្រែក្លាយវិស័យសក្តានុពលឱ្យរឹងមាំ ដើម្បីសេដ្ឋកិច្ចជាតិ

សេដ្ឋកិច្ច និង កសិកម្ម

អតិថិជនមានទំនុកចិត្តខ្ពស់ចំពោះប្រព័ន្ធធនាគារ នៅមុននិងក្រោយការបោះឆ្នោត

ភ្នំពេញ៖ ការដក-ដាក់ប្រាក់ និងការផ្តល់កម្ចីរបស់គ្រឹះស្ថានធនាគារ និងហិរញ្ញវត្ថុ រក្សាបានស្ថិរភាពធម្មតា នៅមុន និងក្រោយការបោះឆ្នោត ថ្ងៃទី២៣ កក្កដា ឆ្លុះបញ្ចាំងពីទំនុកចិត្តខ្ពស់របស់អតិថិជន ចំពោះប្រព័ន្ធធនាគារនៅកម្ពុជា។លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា និងនាយកប្រតិបត្តិ អិលអូអិលស៊ី (ខេមបូឌា) ភីអិលស៊ី បានលើកឡើងនៅថ្ងៃទី២៧ ខែកក្កដាថា សកម្មភាពដក-ដាក់ប្រាក់ របស់អតិថិជននៅតាមគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទទួលបានប្រាក់បញ្ជើ មានស្ថិរភាពល្អ នៅមុនពេល និងក្រោយពេលការបោះឆ្នោត។លោក សុខ វឿន លើកឡើងថា ខុសពីការបោះឆ្នោតអាណត្តិកន្លងទៅ ការបោះឆ្នោតជាតិឆ្នាំ២០២៣នេះ មិនមែនការដកប្រាក់ក្នុងទំហំច្រើន គួរឱ្យកត់សម្គាល់នោះទេ ដោយបញ្ជាក់ថា អតិថិជនមានទំនុកចិត្តមកលើប្រព័ន្ធធនាគារនៅកម្ពុជា។ប្រាក់បញ្ញើក្នុងវិស័យធនាគាររបស់កម្ពុជាបានកើនឡើងដល់ ៤២,៧ ពាន់លានដុល្លារគិតត្រឹមខែមករាឆ្នាំនេះ ខណៈកម្ចី របស់ធនាគារមានជាង ៥៥ ពាន់លានដុល្លារ នេះបើតាមរបាយការណ៍ពីធនាគារជាតិនៃកម្ពុជា។គ្រឹះស្ថានធនាគារបានទទួលប្រាក់បញ្ញើប្រមាណ ៤២,៧ ពាន់លានដុល្លារ ដែលកើនឡើងពី ៣៧ ពាន់លានដុល្លារកាលពីខែតុលាឆ្នាំ២០២២។ឯកឧត្តម ជា ចាន់តូ ទេសាភិបាលនៃធនាគារជាតិនៃកម្ពុជា បានមានប្រសាសន៍កាលពីពេលថ្មីៗនេះថា កំណើនទាំងប្រាក់កម្ចី និងប្រាក់បញ្ញើ ឆ្លុះបញ្ចាំងពីទំនុកចិត្តសាធារណៈចំពោះប្រព័ន្ធធនាគាររបស់ប្រទេសកម្ពុជា។ឯកឧត្តម បានលើកឡើងថា វិស័យធនាគារនៅតែរឹងមាំ និងធន់ ហើយបានបន្តដើរតួនាទីយ៉ាងសកម្មក្នុងការគាំទ្រដល់ការងើបឡើងវិញនៃសេដ្ឋកិច្ច ក្នុងអំឡុង និងក្រោយពេលនៃការរាតត្បាតនៃជំងឺកូវីដ-១៩ ៕ អត្ថបទ៖ វណ្ណៈ

ក្រុមហ៊ុន សហគ្រាស ចុះបញ្ជីតាមថ្នាលជាតិ មានទុនវិនិយោគសរុបជាង ៨ ប៊ីលានដុល្លារអាមេរិក

ភ្នំពេញ៖ កម្ពុជាទទួលបានក្រុមហ៊ុន និងសហគ្រាស ដែលបានចុះបញ្ជីតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន មានចំនួនជាង ២៧ ពាន់ ក្រុមហ៊ុន និងសហគ្រាស មានទុនវិនិយោគចុះបញ្ជី ទំហំទឹកប្រាក់សរុបជាង ៨ ប៊ីលានដុល្លារអាមេរិកគិតត្រឹមខែកក្កដា។តាមសេចក្ដីប្រកាសព័ត៌មានរួម របស់ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ហៅកាត់ថា CamDX គិតត្រឹម ថ្ងៃទី ២៥ ខែ កក្តដា ឆ្នាំ ២០២៣, CamDX ទទួលបានក្រុមហ៊ុន/សហគ្រាស មានចំនួន ២៧ ៥១១ ដែលបានចុះបញ្ជីអាជីវកម្ម តាមរយៈប្រព័ន្ធនេះ ដោយមានដើមទុនវិនិយោគប្រមាណ ៨.០៩ ប៊ីលានដុល្លារអាមេរិក ក្នុងនោះចំពោះនាមករណ៍បម្រុងទុក មានចំនួន ១៥ ៧៦៩ ក្រុមហ៊ុន/សហគ្រាស។សកម្មភាពអាជីវកម្មធំៗចំនួន៥ប្រភេទ ទទួលបានការចុះបញ្ជី និងមានដើមទុនច្រើនជាងគេរួមមាន៖ ការវិនិយោគលើការសាងសង់អគារ មានទំហំទឹកប្រាក់ប្រមាណជាង ១ ប៊ីលានដុល្លារ, សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន ឬជួលពីគេ ៩២១ លានដុល្លារ, សកម្មភាពសេវាកម្មស្នាក់នៅ ចំនួន ៨៩៧ លាន ដុល្លារ, សកម្មភាពពិគ្រោះយោបល់ ផ្នែកគ្រប់គ្រង ៤៧៤ លានដុល្លារ, កម្មន្តសាល សំលៀកបំពាក់ ៣៦៨ លានដុល្លារ, និងការ ចុះបញ្ជីរបស់ក្រុមហ៊ុនផ្សេងៗទៀត មានចំនួន ៤.៣៧ ប៊ីលានដុល្លារ។ម្ចាស់ក្រុមហ៊ុន ឬសហគ្រាសដែលបានចុះបញ្ជី ជាបុរស មាន ៦២ ភាគរយ និងជាស្រ្តី មានចំនួន ៣៨ ភាគរយ។ដោយឡែកកម្មវត្ថុការចុះបញ្ជី សម្រាប់ក្រុមហ៊ុន/សហគ្រាស ទទួលការចុះបញ្ជីច្រើនជាងគេ ក្នុងនោះសកម្មភាពសេវាកម្មភោជនីយដ្ឋាន និងសេវាកម្មផ្គត់ផ្គង់អនាម័យចល័ត មានចំនួនជាង ២ ២១៧ ក្រុមហ៊ុន/សហគ្រាស, ការលក់ដុំទំនិញសម្រាប់ការប្រើប្រាស់ ក្នុងផ្ទះ មានជាង ១ ៦៨២ ក្រុមហ៊ុន/សហគ្រាស, ការលក់ដុំឯកទេសផ្សេងៗ ជាង ១ ៦៤៨, ការលក់រាយប្រេងឥន្ធនៈ យានយន្តនៅ ក្នុងហាងឯកទេស មានជាង ១ ៣០១, សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន ឬជួលគេ មានចំនួន ១ ១៤៧, និងការចុះបញ្ជីរបស់ក្រុមហ៊ុន/សហគ្រាសផ្សេងៗ មានចំនួនជាង ១៩ ៥១៨ ក្រុមហ៊ុន/សហគ្រាសផងដែរ៕អត្ថបទ៖ សុន រ៉ាឌី

សមាគគ្រឹះស្ថានហិរញ្ញវត្ថុ ជំរុញសមាជិកផ្តល់កម្ចីដល់សហគ្រាសធុនតូចឲ្យបានច្រើន ដើម្បីលើកកម្ពស់អាជីវកម្ម

ភ្នំពេញ៖ សមាគមមីក្រូហិរញ្ញវត្ថុកម្ពុជា ជំរុញ និងលើកទឹកចិត្តដល់សមជិកដែលជាគ្រឹះស្ថានមីក្រូហិរញ្ញវត្ថុទាំងអស់ ផ្តល់ឥណទានដល់សហគ្រាសធុនតូចឲ្យបានកាន់តែច្រើន ក្នុងគោលដៅលើកកម្ពស់សកម្មភាពអាជីវកម្ម ដើម្បីចូលរួមចំណែកដល់ការអភិវឌ្ឍសេដ្ឋកិច្ចជាតិ។លោក ផល វ៉ាន់ឌី អគ្គលេខាធិការសមាគមមីក្រូហិរញ្ញវត្ថុកម្ពុជា លើកឡើងនៅថ្ងៃទី២៥ ខែកក្កដា ឆ្នាំ២០២៣ នេះថា សហគ្រាសធុនតូច និងមធ្យម គឺជាឆ្នឹងខ្នងដ៏សំខាន់ក្នុងការចូលរួមអភិវឌ្ឍន៍សេដ្ឋកិច្ចជាតិ, ដូច្នេះចំពោះគំនិតផ្តួចផ្តើម គម្រោងផ្តល់ឥណទានដល់សហគ្រាសធុនតូច របស់សមាគមមីក្រូហិរញ្ញវត្ថុកម្ពុជានេះ ដោយបច្ចុប្បន្នសមាគមមើលឃើញថា ប្រជាពលរដ្ឋកម្ពុជា ជាច្រើន មានស្មារតីជាសហគ្រិនភាពជច្រើន នៅក្នុងកិច្ចការប្រកបអាជីវកម្ម ដើម្បីបង្កើតប្រាក់ចំណូលនៅក្នុងគ្រួសាររបស់ពួកគាត់។ជុំវិញគម្រោងនេះ លោក ផល វ៉ាន់ឌី បានលើកឡើងឲ្យដឹងថា កន្លងមកនេះការផ្តល់ឥណទានដល់សហគ្រាសធុនតូច របស់គ្រឹះស្ថានមីក្រូហិរញ្ញវត្ថុ ក្នុងរង្វង់ប្រមាណ ៣០ ភាគរយ នៃការផ្តល់ឥណទានសរុបប៉ុណ្ណោះ ។ ដើម្បីឲ្យសហគ្រាសធុនតូចក្នុងស្រុក ទទួលបានឥណទានកាន់តែកាន់ច្រើន សមាគមមីក្រូហិរញ្ញវត្ថុកម្ពុជា សូមលើកទឹកចិត្តដល់គ្រឹះស្ថានដែលជាសមាជិកទាំងអស់ ជួយ បង្កើតនូវផលិតផល និងសេវាកម្មថ្មីៗ ដើម្បីលើកកម្ពស់ការផ្តល់ឥណទានដល់សហគ្រាសខ្នាតតូច ក្នុងគោលដៅជំរុញពង្រីកអាជីវកម្មនៅតាមសហគមន៍ ឬនៅតាមមូលដ្ឋាន ឲ្យកាន់តែរីកចម្រើនបន្ថែមទៀត ដើម្បីចូលរួមចំណែកការអភិវឌ្ឍសេដ្ឋកិច្ចជាតិជាមួយរាជរដ្ឋាភិបាលកម្ពុជា។សមាគមមីក្រូហិរញ្ញវត្ថុកម្ពុជា នឹងបន្តធ្វើកិច្ចការជាច្រើនបន្ថែមទៀត ដើម្បីឲ្យអតិថិជនអាចទទួលបានហិរញ្ញវត្ថុផ្លូវការ ប៉ុន្តែអតិថិជនខ្លួនឯង ក៏ត្រូវលើកកម្ពស់នូវចំណេះដឹងហិរញ្ញវត្ថុ និងមានផែនការអាជីវកម្មច្បាស់លាស់ និងការកសាងកេរឈ្មោះល្អដល់អ្នកផ្តល់សេវាហិរញ្ញវត្ថុ ដើម្បីទទួលបានឥណទានយកទៅអភិវឌ្ឍន៍ក្នុងអាជីវកម្មនេះ៕អត្ថបទ៖ សុន រ៉ាឌី

ក្រសួងសេដ្ឋកិច្ច ប្រកាសអនុវត្តអាករលើតម្លៃបន្ថែមលើការនាំចូល-ចែកចាយបារី

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ចេញសេចក្ដីណែនាំ ដល់គ្រប់ម្ចាស់សហគ្រាសដែលប្រកបអាជីវកម្មនាំចូលបារី ឬចែកចាយបន្តបារី នាំចូលទាំងអស់ អំពីការអនុវត្តអាករលើតម្លៃបន្ថែមចំពោះបារីនាំចូល ដើម្បីពង្រឹងការអនុវត្តអាករលើតម្លៃបន្ថែម ឱ្យមានតម្លាភាព។ តាមសេចក្តីសេចក្ដីណែនាំ ស្តីពីការអនុវត្តអាករលើតម្លៃបន្ថែមចំពោះបារីនាំចូល ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ការអនុវត្តអាករលើ តម្លៃបន្ថែមរួមមាន ចំពោះបារីដែលនាំចូលសម្រាប់គោលដៅលក់ក្នុងស្រុក សហគ្រាសត្រូវអនុវត្តអាករលើតម្លៃបន្ថែមដូចទំនិញនាំចូលជាប់អាករដទៃទៀតផងដែរ ដោយត្រូវប្រមូលអាករលើតម្លៃបន្ថែមតាមអត្រា ១០ ភាគរយ រាល់ការផ្គត់ផ្គង់បារី នៅក្នុងព្រះរាជាណាចក្រកម្ពុជា។អាករលើតម្លៃបន្ថែម ដែលបានបង់នៅពេលនាំចូល ឬទិញក្នុងស្រុក ត្រូវបានអនុញ្ញាតជាឥណទានអាករលើធាតុចូល សម្រាប់កាត់កងជាមួយ អាករលើធាតុចេញ។ចំពោះបារីដែលនាំចូលសម្រាប់គោលដៅនាំចេញ សហគ្រាសត្រូវបានបន្តអនុញ្ញាតឱ្យបង់ អាករលើតម្លៃបន្ថែម តែម្ដងគត់ នៅពេលនាំចូលជាការស្រេច ដូចដែលបានអនុវត្តនាពេលកន្លងមក, ក្នុងនោះសហគ្រាសត្រូវដាក់លិខិតប្រកាស និងបង់ប្រាក់អាករ ស្របតាមច្បាប់ និងលិខិតបទដ្ឋានគតិយុត្តជាធរមាន។តាមរយៈសេចក្តីជូនដំណឹងនេះ ក្រសួងសេដ្ឋកិច្ច និងហិរញ្ញវត្ថុ សង្ឃឹមយ៉ាងមុតមាំថា គ្រប់សហគ្រាសដែលប្រកបអាជីវកម្មនាំចូលបារី ឬចែកចាយបន្ត បារីនាំចូលទាំងអស់ នឹងយកចិត្តទុកដាក់អនុវត្តតាមខ្លឹមសារ ដោយសេចក្ដីណែនាំនេះ មានប្រសិទ្ធភាពអនុវត្តចាប់ពីថ្ងៃទី ០១ ខែ សីហា ឆ្នាំ២០២៣ តទៅ៕អត្ថបទ៖ សុន រ៉ាឌី

កម្មករ-កម្មការិនីរោងចក្រសហគ្រាស រំពឹងការដំឡើងប្រាក់ឈ្នួលអតិប្បរមាឆ្នាំ២០២៤

ភ្នំពេញ៖ ខណៈដែលកិច្ចប្រជុំពិភាក្សាប្រាក់អប្បបរមាក្នុងវិស័យវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២៤ នឹងឈានដល់នាពេលខាងមុខនេះ កម្មករ កម្មការិនី រោងចក្រសហគ្រាស សង្ឃឹមទុកថា នឹងអាចដំឡើងដូចរៀងរាល់ឆ្នាំបន្តទៀត បន្ទាប់គណបក្សប្រជាជនកម្ពុជានឹងបន្តដឹកនាំប្រទេសជាតិ ក្រោយទទួលសម្លេងគាំទ្រច្រើនលើសលុប ក្នុងការបោះឆ្នោតជាតិកន្លងទៅ។កម្មករកាត់ដេរ នៅសួនឧស្សាហកម្ម ឈុន ហុង ស្ថិតនៅស្រុកអង្គស្នួល ខេត្តកណ្តាល នៅព្រឹកថ្ងៃទី២៦ ខែកក្កដានេះ បានលើកឡើងស្រដៀងៗគ្នាថា ក្រោយចូលបំពេញការងារក្នុងវិស័យកាត់ដេរជាច្រើនឆ្នាំមកនេះ ប្រាក់ឈ្នួលដែលទទួលបាន តែងតែត្រូវបានដំឡើងជារៀងរាល់ឆ្នាំ។ ពួកគាត់នៅតែរំពឹងទៀតថា នឹងទទួលបានការដំឡើងប្រាក់ឈ្នួលអប្បបរមាខ្ពស់បន្តទៀតសម្រាប់ឆ្នាំ២០២៤ខាងមុខនេះ ដោយសារជឿជាក់លើការដឹកនាំរបស់គណបក្សប្រជាជនកម្ពុជា ។បើតាមក្រសួងការងារ និងបណ្តុះណ្តាលវិជ្ជាជីវៈ បានឲ្យ ប៊ីធីវី ដឹងថា ក្រុមប្រឹក្សាជាតិប្រាក់ឈ្នួលអប្បបរមា នឹងបើកកិច្ចប្រជុំពិភាក្សាអំពីប្រាក់ឈ្នួលអ្បបរមាជូនកម្មករនិយោជិតក្នុងវិស័យវាយនភណ្ឌ កាត់ដេរ ផលិតស្បែកជើង និងផលិត ផលិតផលធ្វើដំណើរ និងកាបូប នៅខែសីហា ឆ្នាំ២០២៣ខាងមុខនេះ ដើម្បីជជែកគ្នាក្នុងការកំណត់ប្រាក់ឈ្នួលអប្បបរមាជូនដល់កម្មករនិយោជិត អនុវត្តនៅឆ្នាំ២០២៤។គិតរហូតមកដល់ឆ្នាំ២០២៣នេះ កម្មករនិយោជិតដែលបំពេញការក្នុងវិស័យឧស្សាហកម្មកាត់ដេរមានចំនួន ២០០ដុល្លារអាម៉េរិក ដោយគិតជាមធ្យម បូកទាំងប្រាក់ឈ្នួលអប្បបរមា ប្រាក់ថែមម៉ោងការងារ និងប្រាក់ឧបត្ថម្ភផ្សេងៗទៀត កម្មករនិយោជិតម្នាក់ អាចទទួលប្រាក់ខែចន្លោះ ២៥០ទៅ៣០០ដុល្លារ ឬឈានដល់៣៥០ដុល្លារ នៅក្នុងមួយខែៗ៕អត្ថបទ៖ឈិត បូរ៉ាវី

ADBផ្តល់កម្ចី៤០លានដុល្លារ សម្រាប់កំណែទម្រង់នៅក្នុងវិស័យសាធារណៈនៅកម្ពុជា

ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីផ្អែកលើគោលនយោបាយចំនួន ៤០ លានដុល្លារ ដើម្បីគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពង្រឹងបន្ថែម ការផ្តល់សេវាសាធារណៈដោយរដ្ឋបាលមូលដ្ឋាន តាមរយៈកំណែទម្រង់ជាបន្តបន្ទាប់ ក្នុងវិស័យហិរញ្ញវត្ថុសាធារណៈ និងវិមជ្ឈការ។កម្ចីកម្មវិធីរងទីពីរ និង ចុងក្រោយ ក្រោមកម្មវិធីអភិវឌ្ឍន៍វិស័យសេវាសាធារណៈ និងការគ្រប់គ្រងហិរញ្ញវត្ថុដែលបានធ្វើវិមជ្ឈការ លើកទីពីរនេះ នឹងបញ្ចប់កំណែទម្រង់ជាបន្តបន្ទាប់ ដើម្បីពង្រឹងតួនាទី និងសមត្ថភាពរបស់រដ្ឋបាលមូលដ្ឋាន ក្នុងការផ្តល់សេវាសាធារណៈប្រកបដោយប្រសិទ្ធភាព។ កំណែទម្រង់ក្រោមកម្មវិធីរងទីពីរនេះ ត្រូវបានរៀបចំឡើងដើម្បីពង្រឹងការធ្វើផែនការនិងរៀបចំថវិកា ការគ្រប់គ្រង ចំណូល និង ចំណាយ និងសមត្ថភាពបុគ្គលិកនៅកម្រិតរដ្ឋបាលមូលដ្ឋានដើម្បីផ្តល់សេវាកម្មប្រសើរឡើង, លើកកម្ពស់ការធ្វើផែនការរដ្ឋាភិបាលមូលដ្ឋាន, និង កែលម្អលទ្ធភាពទទួលបានសេវាសាធារណៈរបស់ប្រជាពលរដ្ឋ។នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជា លោកស្រី Jyotsana Varma មានប្រសាសន៍ថា «កំណែទម្រង់ និងដំណោះស្រាយឌីជីថល ដែលត្រូវបានអនុវត្តក្នុងកម្មវិធីនេះនឹងជួយតម្រង់ផែនការកម្រិតមូលដ្ឋាន ជាមួយនឹងថវិកាជាតិនិងខេត្ត សម្រាប់ការផ្តល់សេវាសាធារណៈនៅមូលដ្ឋានប្រកបដោយប្រសិទ្ធភាព និងសមធម៌ ដូចជាការទទួលបានទឹកស្អាត អនាម័យ និងការអប់រំជាដើម។ វិធានការដែលអនុវត្តក្នុងកម្មវិធីនេះក៏នឹងជំរុញការចូលរួមរបស់ស្ត្រីក្នុងការធ្វើសេចក្តីសម្រេចចិត្ត ក្នុងកម្រិតមូលដ្ឋានផងដែរ។កម្មវិធីនេះបង្កើតឡើងផ្អែកលើមូលដ្ឋាននៃការគាំទ្រយូរអង្វែងរបស់ADB លើកំណែទម្រង់វិមជ្ឈការក្នុងប្រទេសកម្ពុជា រួមទាំងការបង្កើតគោលនយោបាយ និងក្របខ័ណ្ឌបទប្បញ្ញត្តិ សម្រាប់ដំណើរការវិមជ្ឈការ ក៏ដូចជាការគាំទ្រក្នុងការពង្រឹងនិងគ្រប់គ្រងប្រាក់ចំណូលនៅថ្នាក់ក្រោមជាតិ។ ADB បានជួយបង្កើតការិយាល័យសេវាច្រកចេញចូលតែមួយសម្រាប់ការផ្តល់សេវាដែលឆ្លើយតបនឹងតម្រូវការ ក៏ដូចជាការិយាល័យភ្នាក់ងារស៊ើបអង្កេតបណ្តឹងតវ៉ា ដើម្បីត្រួតពិនិត្យភាពប្រសើរឡើងនៃវិសាលភាព និងគុណភាពនៃសេវាកម្មដែលបានផ្តល់។កម្មវិធីរងទីពីរនេះផ្តោតលើ ការពង្រឹងការសម្របសម្រួលការផ្តល់សេវាដែលឆ្លើយតបនឹងតម្រូវការ និងប្រកបដោយគណនេយ្យភាព និងការលើកកម្ពស់ការគ្រប់គ្រងចំណូលនិងចំណាយ ដើម្បីបំពេញតម្រូវ ការនៅថ្នាក់រដ្ឋាភិបាលមូលដ្ឋាន។ វានឹងធ្វើឱ្យស៊ីជម្រៅបន្ថែមទៀតនូវកំណែទម្រង់ ដែលត្រូវបានអនុម័ត ក្រោមកម្មវិធីរងទីមួយ ដែលមានគោលបំណងអភិវឌ្ឍជំនាញរដ្ឋបាលសាធារណៈ និងសមត្ថភាពសម្រាប់ មន្ត្រីរដ្ឋបាលមូលដ្ឋាន តាមរយៈដំណើរការនៃសាលាជាតិរដ្ឋបាលមូលដ្ឋាន។ADB គឺជាដៃគូរបស់កម្ពុជាក្នុងការគាំទ្រកំណែទម្រង់លើការគ្រប់គ្រងហិរញ្ញវត្ថុសាធារណៈ និង វិមជ្ឈការចាប់តាំងពីឆ្នាំ ២០០២ ដោយសង្កត់ធ្ងន់លើការបន្តគោលនយោបាយដើម្បីធ្វើឱ្យស៊ីជម្រៅ ទាំង វិធានការវិមជ្ឈការផ្នែករដ្ឋបាលនិងសារពើពន្ធសម្រាប់ ការកែលម្អការផ្តល់សេវា ការអភិវឌ្ឍសេដ្ឋកិច្ច មូលដ្ឋាន និងការកាត់បន្ថយភាពក្រីក្រ។កម្ចីកម្មវិធីថ្មីនេះគឺស្របតាមយុទ្ធសាស្ត្រភាពជាដៃគូប្រចាំប្រទេសរបស់ ADB សម្រាប់កម្ពុជាឆ្នាំ ២០១៩-២០២៣។ ធនាគារអភិវឌ្ឍន៍អាស៊ី ប្តេជ្ញាថា នឹងសម្រេចឱ្យបាននូវ វិបុលភាព បរិយាប័ន្ន ភាពធន់និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង។ បង្កើតឡើងនៅឆ្នាំ ១៩៦៦ ធនាគារនេះគ្រប់គ្រងដោយសមាជិកចំនួន ៦៨ ប្រទេស ដែលក្នុងនោះមាន ៤៩ ប្រទេស មកពីតំបន់អាស៊ីនិងប៉ាស៊ីហ្វិក៕ អត្ថបទ សូដាវណ្ណ

ស្លាករបស់ Twitter ចាប់ផ្ដើមទម្លាក់ចុះ នៅទីស្នាក់ការកណ្តាល ដោយប្តូរឡូហ្គោ X ជំនួសវិញ

អាមេរិក៖ ស្លាក ដែលគេស្គាល់ជាទូទៅរបស់បណ្ដាញសង្គម Twitter ចាប់ផ្តើមទម្លាក់ចុះហើយ នៅឯទីស្នាក់ការកណ្តាលរបស់ក្រុមហ៊ុន ក្នុងទីក្រុងសាន់ហ្វ្រាន់ស៊ីស្កូ (San Francisco) សហរដ្ឋអាមេរិក កាលពីថ្ងៃចន្ទ (ទី២៤ ខែកក្កដា) ដែលការទម្លាក់ចុះនេះ គឺជាផ្នែកនៃការប្តូរស្លាកសញ្ញាពាណិជ្ជកម្មថ្មី។បន្ទាប់ពីប្រើប្រាស់រយៈពេល ១៧ឆ្នាំជាមួយនឹងនិមិត្តសញ្ញាបក្សីពណ៌ខៀវ ដែលតំណាងឲ្យការផ្សព្វផ្សាយគំនិតទៅកាន់ពិភពលោក មហាសេដ្ឋីលោក Elon Musk បានសម្រេចប្តូរឈ្មោះពីអក្សរ Twitter ជាអក្សរ X វិញ ហើយបានបង្ហាញឡូហ្គោថ្មី ដែលផ្ដោតការយកចិត្តទុកដាក់លើការបង្កើត «កម្មវិធីគ្រប់ប្រភេទ»។ចាប់តាំងពីចូលមកគ្រប់គ្រងក្រុមហ៊ុនបណ្ដាញសង្គម Twitter ក្នុងខែតុលា លោក Musk បាននិយាយថា លោកស្រមៃដល់ការបង្កើតកម្មវិធីមួយ ដែលអាចផ្តល់សេវាកម្មជាច្រើនដល់អ្នកប្រើប្រាស់លើសពីបណ្ដាញទំនាក់ទំនងសង្គម ដូចជាការបង់ប្រាក់តាមប្រព័ន្ធកុំព្យូទ័រជាដើម ពោលគឺជាគំនិតមួយ ដែលឆ្លុះបញ្ចាំងពីបណ្ដាញសង្គម WeChat ដ៏ពេញនិយម នៅប្រទេសចិន។តែយ៉ាងណាក្ដី ចាប់តាំងពីមានការកាន់កាប់របស់លោក Musk ក្រុមហ៊ុនបណ្ដាញសង្គមមួយនេះ បានប្រឈមនឹងពេលវេលាច្របូកច្របល់មិនចេះចប់ ដោយមានការបញ្ឈប់បុគ្គលិក ការធ្លាក់ចុះយ៉ាងខ្លាំងនៃអ្នកផ្សាយពាណិជ្ជកម្ម និងការកើនឡើងយ៉ាងឆាប់រហ័សនៃប្រើប្រាស់កម្មវិធីថ្មី Threads ដែលជាការឆ្លើយតបយ៉ាងមានប្រសិទ្ធភាពរបស់ក្រុមហ៊ុន Meta ចំពោះក្រុមហ៊ុន Twitter៕

ការដោះដូរទំនិញរវាងកម្ពុជា និងអាស៊ានមានទឹកប្រាក់ជាង ៧ពាន់លានដុល្លារ ក្នុងឆមាសទី១

ភ្នំពេញ៖ ការដោះដូរពាណិជ្ជកម្មសរុបរបស់កម្ពុជាជាមួយបណ្តាប្រទេសសមាជិកអាស៊ានសម្រេចបានជាង ៧,១ ពាន់លានដុល្លារ ក្នុងឆមាសទី១ រួមចំណែកប្រមាណ ៣០ភាគរយនៃទំហំពាណិជ្ជអន្តរជាតិសរុប។របាយការណ៍ពីក្រសួងពាណិជ្ជកម្ម បង្ហាញថា ទំហំពាណិជ្ជកម្មសរុបរបស់កម្ពុជាជាមួយប្រទេសសមាជិកអាស៊ាន បានធ្លាក់ចុះ ១៧ ភាគរយ នៅក្នុងឆមាសទី១ ។ ចាប់ពីខែមករា ដល់ខែមិថុនា ការនាំចេញសរុបរបស់កម្ពុជាទៅប្រទេសអាស៊ាន សម្រេចបានជាង ២.៤ ពាន់លានដុល្លារ កើនឡើង ៣៦ ភាគរយ ខណៈការនាំចូលសរុបមានជាង ៤.៦ ពាន់លានដុល្លារ ធ្លាក់ចុះ ៣១ ភាគរយ។ការដោះដូរទំនិញជាមួយប្រទេសវៀតណាម ជាប់ចំណាត់ថ្នាក់កំពូល ដែលមានទឹកប្រាក់ជាង ៣,៣ ពាន់លានដុល្លារ តាមពីក្រោយដោយប្រទេសថៃ ជាង ១ ពាន់លានដុល្លារ និងប្រទេសសិង្ហបុរីជិត ៨០០ លានដុល្លារ។បើយោងតាមរបាយការណ៍ក្រសួងពាណិជ្ជកម្ម កម្ពុជាបាននាំចេញកសិផល សំលៀកបំពាក់ ស្បែកជើង កាបូប គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ខណៈដែលការនាំចូលមានដូចជាចំណីអាហារ ភេសជ្ជៈ ឧបករណ៍អគ្គិសនី និងអេឡិចត្រូនិក សម្ភារសំណង់ គ្រឿងយន្តកសិកម្ម និងយានជំនិះ។សូមបញ្ជាក់ថា ក្នុងឆមាសទី១ឆ្នាំ២០២៣ ទំហំពាណិជ្ជកម្មអន្តរជាតិរបស់កម្ពុជា មានទឹកប្រាក់សរុបជាង ២៣.៦ ពាន់លានដុល្លារ ធ្លាក់ចុះ ១៣ភាគរយ ធៀបនឹងរយៈពេលដូចគ្នា ឆ្នាំមុន៕ អត្ថបទ៖ វណ្ណៈ

កម្មករនិយោជិត ជឿជាក់ថា រាជរដ្ឋាភិបាលអាណត្តិថ្មី នឹងបន្តផ្តល់អត្ថប្រយោជន៍ និងកម្មវិធីគាំពារសង្គមនានា

ភ្នំពេញ៖ ដោយសារការបោះឆ្នោតជ្រើសរើសតំណាងរាស្រ្តនីតិកាលទី៧ បានបញ្ចប់ដោយភាពល្អប្រសើរ ជាមួយលទ្ធផលបឋមថា គណបក្សប្រជាជនកម្ពុជា ទទួលសំឡេងគាំទ្រច្រើនជាងគេ កម្មការិនីរោងចក្រកាត់ដេរ បានសម្តែងការសាទរ និងជឿជាក់ថា ក្រោមការដឹកនាំរបស់គណបក្សមួយនេះ ពួកគាត់នឹងនៅតែទទួលបាននូវអត្ថប្រយោជន៍ និងកម្មវិធីគាំពារសង្គមនានា ដែលប្រមុខថ្នាក់ដឹកនាំប្រកាសដាក់ឲ្យអនុវត្តនាពេលកន្លងមក និងដឹកនាំប្រទេសឲ្យរីកចម្រើនបន្ថែមទៀត។ក្រុមកម្មការនីរោងចក្រកាត់ដេរ ខេម អេភីអាយ ស្ថិតនៅឃុំបែកចាន ស្រុកអង្គស្នួល ខេត្តកណ្តាល បានលើកឡើងនៅព្រឹកថ្ងទី២៥ ខែកក្កដា ថា គិតរហូតមកដល់បច្ចុប្បន្ន អត្ថប្រយោជន៍ដែលពួកគាត់ទទួលបានមានដូចជា៖ របបសន្តិសុខសង្គមផ្នែកថែទាំសុខភាព, របបប្រាក់សោធន ដូចមន្ត្រីរាជការ, ការដំឡលងប្រាក់ឈ្នួលអប្បបរមាជារៀងរាល់ឆ្នាំ និងប្រាក់ឧបត្ថម្ភនៅពេលពពោះ និងក្រោយសម្រាលកូនជាដើម។ ពួកគាត់ បានបន្តថា ប្រមុខរាជរដ្ឋាភិបាលកម្ពុជា តែងតែគិតជាប់ជានិច្ច ធ្វើឱ្យការរស់នៅ និងបំពេញការងារសព្វថ្ងៃនេះ ប្រសើរឡើង ទទួលប្រាក់ចំណូល និងអត្ថប្រយោជន៍ពីកម្មវិធីគាំពារសង្គមដែលបានដាក់ចេញ។យោងតាមទិន្នន័យរបស់ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា បច្ចុប្បន្ននេះ ស្ថានភាពការងារនៅតែបន្តរក្សាបានលំនឹង និងបានបន្តចូលរួមចំណែកក្នុងការបង្កើតការងារ ដែលឆ្លុះបញ្ចាំងតាមរយៈកំណើនរោងចក្រ សហគ្រាស។ គិតត្រឹមឆ្នាំ២០២៣នេះ រោងចក្រ សហគ្រាសក្នុងវិស័យឧស្សាហកម្មកាត់ដេរ ដែលបានចុះបញ្ជីក្នុងក្រសួងការងារ និងបណ្តុះបណ្តាលវិជ្ជាជីវៈ មានចំនួនសរុបជាង ១ ៥០០រោងចក្រ សហគ្រាស និងមានកម្មករនិយោជិតសរុបប្រមាណ ១,៧លាននាក់៕អត្ថបទ៖ បូរ៉ាវី

រាជរដ្ឋាភិបាល នឹងជំរុញកំណើនសេដ្ឋកិច្ចជាតិក្នុងអត្រា ៦,៦ ភាគរយ ឆ្នាំ២០២៤

ភ្នំពេញ៖ ឆ្នាំ២០២៤ ជាឆ្នាំដំបូងនៃអាណត្តិរបស់រាជរដ្ឋភិបាល នីតិកាលទី ៧ នៃរដ្ឋសភា, រាជរដ្ឋាភិបាលនឹងបន្តប្រកាន់ខ្ជាប់នូវ ការអនុវត្តគោលការណ៍ រក្សាសមិទ្ធផលចាស់ បង្កើតសមិទ្ធផលថ្មី សំដៅលើកកម្ពស់ការបន្តអភិវឌ្ឍន៍ជាតិប្រកបដោយបរិយាបន្ន, ជាពិសេស ការរក្សាកំណើនសេដ្ឋកិច្ចជាតិ ក្នុងអត្រា ៦,៦% ជាមួយនឹងអត្រាអតិផរណា ស្ថិតក្នុងកម្រិតអាចគ្រប់គ្រងបាន។ក្នុងក្របខណ្ឌគោលនយោបាយម៉ាក្រូសេដ្ឋកិច្ច នៃសេចក្តីព្រាងច្បាប់ ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២៤ ក្រសួងសេដ្ឋកិច្ច និងហិរញ្ញវត្ថុ បានរំលេចពីទស្សនវិស័យសេដ្ឋកិច្ចសកលសម្រាប់ឆ្នាំ ២០២៤ ត្រូវបានរំពឹងថា នឹងសម្រេចបានកំណើនល្អ ជាមួយនឹងការថមថយអត្រាអតិផរណា ខណៈដែលឆ្នាំ ២០២៣ ជាចំណុចរបត់មួយ ដែលកំណើនសេដ្ឋកិច្ចសកលធ្លាក់ចុះដល់កម្រិតទាបបំផុត ក្នុងបរិការណ៍ក្រោយវិបត្តិជំងឺកូវីដ-១៩ ។ ឈរលើមូលដ្ឋាននេះ, កំណើនសេដ្ឋកិច្ច កម្ពុជាក្នុងឆ្នាំ ២០២៤ រំពឹងថា នឹងសម្រេចបានក្នុងអត្រា ៦,៦% ជាមួយនឹងអត្រាអតិផរណា ស្ថិតក្នុងកម្រិតអាចគ្រប់គ្រងបាន ក្នុងអត្រា ២,៥% និងការរក្សាបាននូវស្ថិរភាពអត្រាប្តូរប្រាក់ ៤ ០៦៥ រៀល ក្នុងមួយដុល្លារអាមេរិក ។ ជុំវិញកំណើនខ្ពស់ និងរឹងមាំនេះ ក្រសួងសេដ្ឋកិច្ច និងហិរញ្ញវត្ថុ រំពឹងថា និងគាំទ្រដោយលទ្ធភាពក្នុងការសម្របខ្លួនបានទៅនឹង និន្នាការសកល និងតំបន់ ដែលបាននិងកំពុងលេចឡើង, ការត្រៀមខ្លួនដោះស្រាយបញ្ហាប្រឈម និងហានិភ័យធំៗ, ការទាក់ទាញ វិនិយោគដែលមានតម្លៃបន្ថែមខ្ពស់ , ភាពអំណោយផលនៃទីតាំងភូមិសាស្ត្រ និងភាគលាភប្រជាសាស្ត្រកម្ពុជា, ការទាញប្រយោជន៍ពីការ រីកចម្រើនយ៉ាងរហ័សនៃឌីជីថលូបនីយកម្ម, ព្រមទាំងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីនានា ។ទាក់ទងការវិនិយោគនេះដែរ អ្នកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា មើលឃើញថា ក្រោយ ពីបោះឆ្នោតជ្រើសតាំងតំណាងរាស្រ្ត នីតិកាលទី ៧ កម្ពុជានិងអាចស្រូបយកឱកាសវិនិយោគកាន់តែច្រើន ខណៈការបោះឆ្នោតនេះ បាន បង្ហាញឲ្យពិភពលោក ជាពិសេសវិនិយោគិនបរទេស មានទំនុកចិត្តកាន់ខ្លាំង ក្នុងការមកបណ្តាក់ទុនរកស៊ីទទួលទាននៅកម្ពុជា។ ចំពោះ វិស័យបច្ចេកវិទ្យាឌីជីថលូបនីយកម្មវិញ លោកជំទាវ កែវ មុំ ប្រធានសមាគមសហគ្រិនស្រ្តីកម្ពុជា បានលើកឡើងផងដែរថា វិស័យបច្ចក វិទ្យាបានកំពុងជំរុញផ្លាស់ប្តូរយ៉ាងលឿន ក្នុងនោះសហគ្រិនជាស្រ្តីបានកំពុងចាប់យកវិស័យនេះផងដែរ សម្រាប់ការប្រើប្រាស់ក្នុងអាជីវកម្ម និងការធ្វើពាណិជ្ជកម្មផ្សេងៗ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

អ្នកវិភាគ៖ បរិយាកាសកក់ក្តៅ តែមិនមែនជាការទម្លុះភាពទាល់ច្រកនោះឡើយលើទំនាក់ទំនងទ្វេភាគី អំឡុងជំនួបលោក Trump-Xi

មន្ត្រី៖ អ៊ុយក្រែនមិនឃើញសញ្ញាដែលរុស្ស៊ីរៀបចំវាយប្រហារដោយនុយក្លេអ៊ែរ ទោះមានសមត្ថភាពក្ដី

អ្នកតាំងលំនៅនិគមន៍អ៊ីស្រាអែលដុតកម្ទេចរថយន្ត និងបំផ្លាញផ្នែកខាងក្នុងព្រះវិហារនៅតំបន់វ៉េសប៊ែង

តម្លៃប្រេងហក់ឡើង ៣ភាគរយ បន្ទាប់ពីលោក Trump ប្រាប់ថា កំពុងអស់ការអត់ធ្មត់ជាមួយអ៊ីរ៉ង់

វិមានក្រឹមឡាំង៖ ជំនួបរវាងមេដឹកនាំរុស្ស៊ី និងចិន នឹងត្រូវប្រកាសឲ្យដឹងក្នុងពេលដ៏ខ្លីខាងមុខនេះ

ឥណ្ឌាចុះកិច្ចព្រមព្រៀងជាមួយអារ៉ាប់រួមលើវិស័យការពារជាតិ និងប្រេង អំឡុងដំណើរទស្សនកិច្ចរបស់លោក Modi

ជនស៊ីវិលជាច្រើនកំពុងជាប់ខ្លួនក្នុងសង្គ្រាមយានដ្រូន នៅភាគខាងកើតប្រទេសកុងហ្គោ

ឥណ្ឌាដំឡើងថ្លៃប្រេងលើកដំបូង ក្នុងរយៈពេលជាង ៤ឆ្នាំ ដោយសារការរំខានថាមពល នៅមជ្ឈិមបូព៌ា

ក្រសួងការបរទេស៖ អ៊ីរ៉ង់ធានាការឆ្លងកាត់ដោយសុវត្ថិភាពតាមច្រកសមុទ្រហ័រមូសសម្រាប់នាវាទាំងអស់ បន្ទាប់ពីសង្គ្រាមចប់

អគ្គលេខាធិការដ្ឋានរដ្ឋសភា និងព្រឹទ្ធសភា បិទវគ្គបណ្តុះបណ្តាលស្តីពី “ការទូតសភា” ជូនដល់មន្ត្រីជំនាញនៃសភា កម្ពុជា-ឡាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877