BTV NEWS

ជីបម៉ុងលែនបើកការដ្ឋានសាងសង់គម្រោងហ្គ្រេនលែនម៉ាក ២៧១ និងមជ្ឈមណ្ឌលសន្និបាត និងអាពាហ៍ពិពាហ៍

អគ្គនាយករងគយ៖ វិស័យឡូជីស្ទិក និងខ្សែច្រវាក់ផ្គត់ផ្គង់ គឺជាឆ្អឹងខ្នង និងជាឃ្នាស់នៃសេដ្ឋកិច្ច

ដំឡូងមីស្ងួតរបស់កម្ពុជាចំនួន២០០ពាន់តោន នឹងត្រូវនាំចេញបន្ថែម ខណៈចំនួន ៥ពាន់តោន បានទៅដល់ទីផ្សារប្រទេសចិន

រដ្ឋលេខាធិការក្រសួងកសិកម្ម ដឹកនាំក្រុមការងារចុះតម្រង់ទិសដល់មន្ត្រីកសិកម្មឃុំ នៅតំបន់មេគង្គក្រោម ក្នុងខេត្តចំនួន៣

សេដ្ឋកិច្ច និង កសិកម្ម

ប្រជាជនប៉ាគីស្ថាន ខកចិត្តដោយសារតម្លៃទំនិញតាមទីផ្សារឡើងថ្លៃខ្ពស់ មុនពិធីបុណ្យ Eid al Fitr

ខណៈខែដ៏វិសុទ្ធនៃពិធីបុណ្យរ៉ាម៉ាដាន នឹងបញ្ចប់ចុងសប្តាហ៍នេះ ផ្សារទំនើប និងទីផ្សារប្រពៃណីនៅទូទាំងប្រទេសប៉ាគីស្ថាន កំពុងគ្របដណ្ដប់ដោយភាពអ៊ូអរខ្លាំងនៅពេលប្រជាពលរដ្ឋ បានសម្រុកទិញទំនិញ នៅមុនពិធីបុណ្យមូស្លីម អេត អាល់ ហ្វីត (Eid al Fitr)ចូលមកដល់។ប៉ុន្តែនៅឆ្នាំនេះ ទាំងអ្នកទិញទំនិញ ទាំងអ្នកលក់ និយាយថា អតិផរណាកំពុងបង្អាក់ភាពរីករាយក្នុងការទិញទំនិញនៅតាមទីផ្សារនានា។សប្តាហ៍ចុងក្រោយនៃបុណ្យរ៉ាម៉ាដាន ជាធម្មតា តែងមើលឃើញភាពរីករាយនៃការដើរទិញទំនិញផ្សេងៗ ជាមួយក្រុមគ្រួសារ ដែលប្រមូលផ្តុំគ្នាទៅកាន់ទីផ្សារភ្លាមៗ បន្ទាប់ពីពិធី អ៊ីហ្វតា"iftar" ដែលជាពិធីស្រាយបួសឬការទទួលទាហានអាហារបន្ទាប់ពីថ្ងៃលិច ក្នុងការស្វែងរកសម្លៀកបំពាក់ គ្រឿងអលង្ការ និងស្បែកជើង ថ្មីៗ ដែលជាធម្មតាត្រូវបានចាត់ទុកថាជាពិធីបុណ្យ អេត(Eid) មានរយៈពេលបីថ្ងៃនៅក្នុងប្រទេសប៉ាគីស្ថាន។អតិថិជន និងម្ចាស់ហាងនៅទីផ្សារ សំខាន់ៗក្នុងទីក្រុង Karachi និង Lahore បានប្រាប់សារព័ត៌មាន Reuters ថាតម្លៃទំនិញល្អៗ ដូចជាបានកើនឡើងទ្វេដងចាប់តាំងពីពេលដូចគ្នាកាលពីឆ្នាំមុន។ពិធីបុណ្យ Eid al Fitr ដែលជាថ្ងៃបញ្ចប់នៃបុណ្យរ៉ាម៉ាដាន ត្រូវបានគេរំពឹងថានឹងចូលមកដល់នៅថ្ងៃទី១០ខែមេសា នៅក្នុងប្រទេសប៉ាគីស្ថានក្នុងឆ្នាំនេះ ទោះបីជាអាចនឹងត្រូវពន្យារពេលមួយថ្ងៃដោយសារតែពេលវេលានៃការមើលឃើញព្រះចន្ទក៏ដោយ៕

អារម្មណ៍អ្នកប្រើប្រាស់កូរ៉េខាងត្បូងធ្លាក់ចុះ ដោយសារការព្រួយបារម្ភអំពីអតិផរណាអាហារ

ការស្ទង់មតិរបស់ធនាគារកណ្តាលបានបង្ហាញនៅថ្ងៃអង្គារសប្ដាហ៍នេះ ពីរសប្តាហ៍មុនការបោះឆ្នោតសភារបស់ប្រទេសនេះ ថា អារម្មណ៍អ្នកប្រើប្រាស់របស់ប្រទេសកូរ៉េខាងត្បូង បានធ្លាក់ចុះនៅក្នុងខែមីនានេះ ដោយសារការកើនឡើងនៃការព្រួយបារម្ភអំពីតម្លៃកសិកម្មកើនឡើង។ សន្ទស្សន៍អារម្មណ៍អ្នកប្រើប្រាស់បានធ្លាក់ចុះពី១០១,៩% ក្នុងខែកុម្ភៈ ដល់១០០,៧%នៅក្នុងខែមីនា ដោយប្រកាសពីការធ្លាក់ចុះប្រចាំខែដ៏ធំបំផុតចាប់តាំងពីខែតុលាមក នៅក្នុងការស្ទង់មតិប្រចាំខែរបស់ធនាគារកណ្តាលកូរ៉េចំពោះអ្នកប្រើប្រាស់ទំនិញ។ ការធ្លាក់ចុះបានកើតឡើង ខណៈការរំពឹងទុកអតិផរណារបស់អ្នកប្រើប្រាស់ក្នុងរយៈពេល១២ ខែបន្ទាប់ បានកើនឡើងជាលើកដំបូងក្នុងរយៈពេលប្រាំខែពី ៣,២ ភាគរយមកនៅ៣ ភាគរយ។នៅក្នុងការស្ទង់មតិ ៦៣,៤ % នៃអ្នកឆ្លើយតបបាននិយាយថា ការឡើងថ្លៃតម្លៃកសិកម្មនឹងជំរុញឱ្យមានអតិផរណាក្នុងរយៈពេល ១២ ខែបន្ទាប់ កើនឡើងយ៉ាងខ្លាំងពី៥១,៥% កាលពីខែកន្លងទៅ។ តិផរណាអ្នកប្រើប្រាស់របស់ប្រទេសកូរ៉េខាងត្បូងបានកើនឡើងកាលពីខែកុម្ភៈ បន្ទាប់ពីមានភាពធូរស្រាលរយៈពេល៣ខែ ដោយសារតែសម្ពាធផ្នែកផ្គត់ផ្គង់ ដែលភាគច្រើនមានដើមចមមកពីតម្លៃកសិកម្មហក់ឡើង៕

តម្លៃប្រេងហក់ឡើង ខណៈហានិភ័យភូមិសាស្ត្រនយោបាយតានតឹងខ្លាំង បង្កក្ដីបារម្ភដល់ការផ្គត់ផ្គង់

តម្លៃប្រេងបានហក់ឡើងខ្ពស់នៅក្នុងការជួញដូរដំបូងនៅអាស៊ី នៅថ្ងៃចន្ទសប្ដាហ៍នេះ ដោយសារការព្រួយបារម្ភលើការផ្គត់ផ្គង់សកលដែលកាន់តែតឹងតែង ព្រោះតែជម្លោះនៅមជ្ឈិមបូព៌ា និងរវាងរុស្ស៊ី និងអ៊ុយក្រែន ស្របពេលការរួមតូចនៃចំនួនខួងយករ៉ែរបស់សហរដ្ឋអាមេរិក បានរុញឲ្យតម្លៃប្រង លោតឡើងខ្ពស់។ភាគហ៊ុនប្រេងឆៅរបស់ក្រុមហ៊ុន Brent បានកើនឡើង ២៤ សេន ឬ ០,៣% ដល់ ៨៥ ,៦៧ ដុល្លារក្នុងមួយបារ៉ែល នៅនៅម៉ោង០០២៩ ម៉ោងសកល(0029 GMT) ។ ភាគហ៊ុនរបស់ប្រេងឆៅអាមេរិកបានកើនឡើង ២៥ សេន ឬ ០,៣% ដល់ ៨០,៨៨ ដុល្លារក្នុងមួយបារ៉ែល។ ក្រុមហ៊ុនទាំងពីរបានកត់ត្រាការផ្លាស់ប្តូរតិចជាង ១% កាលពីសប្តាហ៍មុនធៀបនឹងសប្តាហ៍មុនៗ។ លោក ហ៊ីរ៉ូយូគិ គីគូកាវ៉ា (Hiroyuki Kikukawa) ប្រធានក្រុមហ៊ុន NS Trading ដែលជាផ្នែកមួយរបស់ក្រុមហ៊ុន Nissan Securities បាននិយាយថា ការកើនឡើងភាពតានតឹងភូមិសាស្ត្រនយោបាយ រួមជាមួយនឹងការកើនឡើងនៃការវាយប្រហារលើរោងចក្រថាមពលនៅក្នុងប្រទេសរុស្ស៊ី និងអ៊ុយក្រែន ព្រមទាំងការធ្លាក់ចុះក្តីសង្ឃឹមបទឈប់បាញ់នៅមជ្ឈិមបូព៌ា បានធ្វើឱ្យមានការព្រួយបារម្ភអំពីការផ្គត់ផ្គង់ប្រេងពិភពលោក។ .លោកបាននិយាយថា ការធ្លាក់ចុះសកម្មភាពខួងប្រេងរបស់សហរដ្ឋអាមេរិក ក៏បង្កើនការព្រួយបារម្ភផងដែរចំពោះការផ្គត់ផ្គង់កាន់តែតឹងរ៉ឹង ។ ទីក្រុង Kyiv បាននិយាយថា រុស្ស៊ីបានវាយប្រហារលើហេដ្ឋារចនាសម្ព័ន្ធសំខាន់ៗនៅតំបន់ល្វីវ (Lviv )ភាគខាងលិចរបស់អ៊ុយក្រែនដោយមីស៊ីល កាលពីព្រឹកថ្ងៃអាទិត្យ ក្នុងការវាយប្រហារតាមអាកាសដ៏ធំដែលឃើញមីស៊ីលរុស្ស៊ីមួយគ្រាប់ហោះចូលដែនអាកាសប៉ូឡូញ៕

ក្រសួងពាណិជ្ជកម្ម លើកទឹកចិត្តដល់ធ្វើធុរកិច្ច នៃការពង្រីកទីផ្សារគ្រឿងអលង្ការ និងត្បូងមានតម្លៃទៅអន្តរជាតិ

ក្រសួងពាណិជ្ជកម្ម គាំទ្រ និងជំរុញលើកទឹកចិត្តដល់ការធ្វើធុរកិច្ចលើវិស័យគ្រឿងអលង្ការ និងត្បូងមានតម្លៃនៅកម្ពុជា តាមរយៈការជំរុញពង្រីកទីផ្សារក្នុងស្រុក និងទៅកាន់ទីផ្សារអន្តរជាតិ។លោកជំទាវ តាន់ ទេពីកណ្ណិកា អនុរដ្ឋលេខាធិការក្រសួងពាណិជ្ជកម្ម លើកឡើងនៅក្នុងកម្មវិធីបើកសម្ពោធ ពិព័រណ៍គ្រឿងអលង្ការ និងត្បូងកម្ពុជា អន្តរជាតិ លើកទី១៥ ឆ្នាំ២០២៤ និងការបើកសម្ពោធជាផ្លូវការ នៃកម្មវិធីនារីឯកគ្រឿងអលង្ការ និងត្បូងអន្តរជាតិ លើកទី១ ឆ្នាំ២០២៤ នៅថ្ងៃទី២១ ខែមីនា ឆ្នាំ២០២៤ នេះថា ពាក់ព័ន្ធគ្រឿងអលង្ការ និងត្បូងមានតម្លៃនេះ ក្រសួងពាណិជ្ជកម្ម តែងតែគាំទ្រ និងជំរុញលើកទឹកចិត្តការធ្វើធុរកិច្ចលើវិស័យគ្រឿងអលង្ការ និងត្បូងមានតម្លៃនៅកម្ពុជា តាមរយៈការចូលរួមរៀបចំបង្កើតសមាគមនេះឡើង និងបន្តគាំទ្រសហការជាមួយសមាគម ដោយប្រមូលកៀរគរផលិតករ អាជីវករ និងគ្រប់ភាគីភាគព័ន្ធក្នុងវិស័យគ្រឿងអលង្ការទាំងអស់ ឲ្យក្លាយទៅជាតួអង្គតែមួយប្រមូលផ្តុំនិងលើកទឹកចិត្តឲ្យមានគំនិតច្នៃប្រឌិត ដើម្បីអភិវឌ្ឍន៍លើវិស័យគ្រឿងអលង្ការ និងទាំងការរចនាម៉ូត ការធ្វើពិពិធកម្មទីផ្សារ ដើម្បីជួយរាជរដ្ឋាភិបាលបើកច្រកសេដ្ឋកិច្ចសម្រាប់វិស័យនេះ និងបានចូលរួមចំណែកក្នុងការយករូបិយប័ណ្ណបរទេសមកចាក់បញ្ចូលក្នុងសេដ្ឋកិច្ចជាតិ។ លោកជំទាវ បន្តថា ទំហំទីផ្សារនៃផលិតផលគ្រឿងអលង្ការ និងត្បូងមានតម្លៃនៅកម្ពុជា បានកំពុងតែបន្តរីកចម្រើនកាន់តែធំឡើងរយៈពេលប៉ុន្មានឆ្នាំមកនេះ ក្នុងនោះសម្រាប់គោលបំណងនៃក្រសួងពាណិជ្ជកម្មចំពោះវិស័យគ្រឿងអលង្ការ និងត្បូងមានតម្លៃនេះ គឺមិនត្រឹមតែចង់ពង្រីកទីផ្សារក្នុងប្រទេសប៉ុណ្ណោះទេ ប៉ុន្តែក៏មានគោលដៅក្នុងការពង្រីកទីផ្សារអន្តរជាតិ សម្រាប់ទំនិញគ្រឿងអលង្ការ និងត្បូងមានតម្លៃ ដែលផលិតនៅកម្ពុជាផងដែរ ដើម្បីបង្កើនឱកាសទីផ្សារ និងកាលានុវត្តភាព សម្រាប់វិនិយោគិនជាតិនិងអន្តរជាតិ នៅក្នុងវិស័យនេះ។ចំណែក, លោកបណ្ឌិត ឆាយ ស៊ីណាត ប្រធានស្តីទីសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា លើកឡើងផងដែរថា គ្រឿងអលង្ការ និងត្បូង មានការអភិវឌ្ឍយ៉ាងខ្លាំងនូវផលិតផលដ៏មានតម្លៃនេះ ក្នុងការកែច្នៃជាច្រើនម៉ូតជាច្រើនទម្រង មានក្បាច់ក្បូររចនាយ៉ាងប្រណិត ដើម្បីប្រកួតប្រជែងលើទីផ្សារ ដោយយើងសម្លឹងទៅមើលការច្នៃគ្រឿងអលង្ការ និងត្បូងកាលពីសម័យមុន មានក្បាច់ទៅតាមសម័យកាលនោះ, ប៉ុន្តែសម័យកាលបច្ចុប្បន្ននេះ បងប្អូនខ្មែរយើង ជាពិសេសជាងទង (ជាងមាស) មានជំនាញយ៉ាងខ្លាំងក្នុងការរចនាម៉ូតរបស់គ្រឿងអលង្ការ ទោះបីជាក្បាច់នោះពិបាកក្នុងការរចនាយ៉ាងណាក្តី គឺគាត់អាចច្នៃបាន មិនថាគ្រឿងអលង្ការជា មាស ផ្លាកទីន ស្ពាន ឬត្បូងថ្មឡើយ។លោកបន្តថា បច្ចុប្បន្នយើងសង្កេតឃើញថា គ្រឿងអលង្ការ និងត្បូងមានតម្លៃរបស់កម្ពុជា មានសន្ទុះយ៉ាងខ្លាំងទាំងក្នុងស្រុក និងក្រៅស្រុក ម្យ៉ាងទៀតនៅពេលការដាក់តាំងបង្ហាញនៅតាមបណ្តាប្រទេសផ្សេងៗ ដូចជា ប្រទេសឥណ្ឌា ថៃ ចិន ក្នុងទីក្រុងហុងកុង ប្រទេសសិង្ហបុរី និងប្រទេសមួយចំនួនទៀតក្នុងទ្វីបអាស៊ី រួមបញ្ជូលទាំងទ្វីបអឺរ៉ុប ដែលជាដៃគូរបស់ប្រទេសកម្ពុជាយើង គឺមានការចាប់អារម្មណ៍យ៉ាងខ្លាំង នូវការរចនាច្នៃម៉ូតក្បាច់ក្បូរពីស្នាដៃរបស់បងប្អូនខ្មែរយើង។សូមបញ្ជាក់ថា កម្មវិធីពិព័រណ៌នេះ មានការចូលរួមពីក្រុមហ៊ុនក្នុង និងក្រៅប្រទេសដូចជា ក្រុមហ៊ុនកម្ពុជា ចិន ឥណ្ឌា អ៊ីតាលី ជប៉ុន ថៃ និងវៀតណាមជាដើម ព្រមទាំងមានការដាក់តាំងបង្ហាញលក់គ្រឿងអលង្ការ ត្បូងមានតម្លៃ គ្រឿងម៉ាស៊ីន និងបច្ចេកវិទ្យាថ្មី សម្រាប់កែច្នៃគ្រឿងអលង្ការ ផងដែរ៕ អត្ថបទ៖ សុន រ៉ាឌី

សម្តេចធិបតី៖ រយៈពេល៦ខែនេះ មានរោងចក្រសហគ្រាសបើកថ្មី ៣៣១៣ ក្នុងនោះវិស័យកាត់ដេរ ១៦៤ រោងចក្រ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ក្នុងរយៈពេល ៦ខែមកនេះ រោងចក្រសហគ្រាសសរុបដែលបានបើកថ្មីមានមានចំនួន ៣៣១៣ ក្នុងនោះមានវិស័យកាត់ដេរ ១៦៤ រោងចក្រ។សម្ដេចធិបតី នាយករដ្ឋមន្រ្ដី មានប្រសាន៍បញ្ជាក់បែបនេះ ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព។ សម្តេចធិបតី ហ៊ុន ម៉ាណែត បានថ្លែងថា សម្ដេចទទទួលស្គាល់ថា សេដ្ឋកិច្ចកម្ពុជាបច្ចុប្បន្នមិនទាន់ល្អឥតខ្ចោះនោះទេ ប៉ុន្ដែក៏សូមឱ្យអ្នកដែលរិះគន់ត្រូវពិចារណាអំពីទំហំសមិទ្ធផលជាក់ស្ដែងចំពោះការរីកច្រើនរបស់កម្ពុជាផងដែរ ដូចជាករណីរោងចក្រមួយចំនួនបានបិទទ្វា ប៉ុន្ដែក៏មានរោចក្រជាច្រើនបានបើកថ្មីដែរ។ សម្ដេចនាយករដ្ឋមន្រ្ដីបានបញ្ជាក់ថា ប្រទេសកម្ពុជាគឺជាប្រទេសដែលប្រកាន់ភ្ជាប់នូវទីផ្សារសេរី ដូច្នេះការប្រកួតប្រជែងនៅក្នុងទីផ្សារគឺត្រូវតែមានអាជីវកម្មខ្លះជោគជ័យ និងខ្លះទៀតបរាជ័យត្រូវបិទទ្វាបែបនេះឯង។សម្តេចធិបតី នាយករដ្ឋមន្រ្ដី បានបញ្ជាក់បន្ថែមថា កង្វល់របស់ប្រជាពលរដ្ឋ ក៏ជាកង្វល់របស់រាជរដ្ឋាភិបាលដែរ។ សម្តេចបញ្ជាក់ថា បើចង់ដឹងពីការងារ កុំទៅមើលកន្លែងដែលអាជីវកម្មបិទទ្វា ប៉ុន្ដែត្រូវទៅមើលកន្លែងដែលបើកឬប្រកាសជ្រើសរើសបុគ្គលិកវិញ ដូចជានៅទីភ្នាក់ងារ ការងារ និងមុខរបរ នៃក្រសួងការងារជាដើម (NEA)៕អត្ថបទ៖ វ៉ន ដារ៉ា

សម្ដេចធិបតី៖ ៦ខែនេះ គម្រោងវិនិយោគថ្មីចំនួន១៧៣ បានចុះបញ្ជីនៅកម្ពុជា មានទុនវិនិយោគ ៤១៥០លានដុល្លារ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា ក្នុងរយៈពេលជាង ៦ខែ មកនេះមានគម្រោងវិនិយោគថ្មីចំនួន ១៧៣បានចុះបញ្ជីនៅកម្ពុជា ក្នុងនោះមានទុនវិនិយោគ ៤១៥០ លានដុល្លារ។សម្ដេចធិបតីនាយករដ្ឋមន្រ្ដី មានប្រសាន៍បញ្ជាក់បែបនេះ ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព។ សម្ដេចថ្លែងថា ក្នុងរយៈពេល៦ខែ រាជរដ្ឋាភិបាលអាណត្តិទី៧ បានខិតខំទាក់ម៉ូយ (អ្នកវិនិយោគ) មកបណ្ដាក់ទុក វិនិយោគនៅក្នុងប្រទេសកម្ពុជា ហើយជាលទ្ធផលមានក្រុមហ៊ុន អ្នកវិនិយោគិនថ្មីចំនួន ១៧៣ គម្រោង បានជ្រើសរើសយកការបណ្ដាក់ទុនចុះបញ្ជីវិនិយោគនៅកម្ពុជា ដែលសរុបជាទឹកប្រាក់មានទំហំទឹកប្រាក់ជាង ៤ ពាន់លានដុល្លារអាមេរិក។សម្តេចធិបតី នាយករដ្ឋមន្រ្ដីបានគូសបញ្ជាក់ថា គម្រោងទាំង ១៧៣ នេះត្រូវបានចុះបញ្ជីនៅ CDC រួចរាល់ហើយ ខណៈតាមរយៈគម្រោងវិនិយោគទាំងនេះនឹងផ្តល់ឱកាសការងារជាង ១៧ ម៉ឺនកន្លែងដល់ប្រជាពលរដ្ឋនៅទូទាំងសប្រទេស។ សម្តេចធិបតី គូសបញ្ជាក់ថា រាជរដ្ឋាភិបាល កំពុងបន្តខិតខំប្រឹងប្រែងលើកកម្ពស់បរិយាកាសធុរកិច្ច និងជំរុញការវិនិយោគនៅកម្ពុជាដើម្បីបង្កើតការងារបន្ថែមទៀតជូនប្រជាពលរដ្ឋ៕អត្ថបទ៖ វ៉ន ដារ៉ា

ខយ តេ កម្ពុជា៖ ១០ឆ្នាំនៃភាពច្នៃប្រឌិត នវានុវត្តន៍ និងភាពជោគជ័យ

រយៈពេល ១០ឆ្នាំមកនេះ ជាមួយនឹងភាពច្នៃប្រឌិត និងនវានុវត្តន៍ ខយ តេ កម្ពុជា សម្រេចបាននូវសមិទ្ធផលជាបន្តបន្ទាប់ រហូតរក្សាបាននូវភាពលេចធ្លោ និងបាននាំមកនូវភាពរីកចំរើនយ៉ាងច្រើននៅក្នុងសង្គម។ បើតាមការអះអាងពីតំណាងក្រុមហ៊ុន សមិទ្ធផលឆ្នើម និងកំណត់ត្រាដែលមិនធ្លាប់មានពីមុនមកនេះ ខយ តេ កម្ពុជា បាននាំមកនូវភាពជោគជ័យដ៏ត្រចះត្រចង់គួរជាទីមោទនៈ។ ភាពភាពជោគជ័យដែលក្រុមហ៊ុនបានសង្កត់ធ្ងន់នោះគឺ ការបង្កើតឯកត្តកម្មជាម៉ាកយីហោដែលលក់បានរហូតដល់ចំនួន ៤១៩៨កែវក្នុងមួយថ្ងៃដែលជាកំណត់ត្រាលក់ខ្ពស់ជាងគេបំផុត សម្រាប់សាខាមួយ ជាមួយនឹងកំណត់ត្រានៃការបើកដំណើរការសាខា ខយ តេ ធំជាងគេបំផុតនៅក្នុងពិភពលោក ដែលធ្វើឱ្យមានការទទួលស្គាល់យ៉ាងទូលំទូលាយជាលក្ខណៈសកល។បន្ថែមលើនេះ ខយ តេ កម្ពុជា ក៏បានធ្វើជាម្ចាស់ផ្ទះរៀបចំព្រឹត្តិការណ៍ប្រឡងក្រឡុកតែ (Shaker Master) ដែលជាកម្មវិធីប្រកួតក្រឡុកតែដ៏ធំជាងគេបំផុតមួយនៅក្នុងពិភពលោកដែលមានការចូលរួមពីបណ្តាប្រទេសជាង១០ ដើម្បីពង្រឹងវប្បធម៌ និងសិប្បកម្មតែជាលក្ខណៈសកល។ទន្ទឹមនេះ ខយ តេ កម្ពុជា តែងតែចូលរួមយ៉ាងសកម្មក្នុងសកម្មភាពសង្គមប្រកបដោយការប្តេជ្ញាចិត្តខ្ពស់។ ជាក់ស្តែងក្នុងអំឡុងពេលគ្រោះធម្មជាតិ ខយ តេ កម្ពុជា បានផ្តល់ការឧបត្ថម្ភគាំទ្រដល់គ្រួសាររងគ្រោះជាង ៤០០០គ្រួសារ និងការចែកភេសជ្ជៈ ខយ តេ ចំនួន១ម៉ឺនកែវដោយឥតគិតថ្លៃជូនដល់ពលរដ្ឋកម្ពុជា។តាមរយៈសមិទ្ធផល និងការរួមចំណែកទាំងនេះ ធ្វើឱ្យមានការទទួលស្គាល់ និងបានទទួលនូវពានរង្វាន់កិត្តិយសកម្រិតជាតិ និងអន្តរជាតិជាច្រើន រួមមាន៖- ពានរង្វាន់ប្រតិបត្តិការឆ្នើម ពី foodpanda- ពានរង្វាន់ម៉ាកតែដែលអតិថិជនពេញនិយមបំផុត ពី NHAM24- ពានរង្វាន់ម៉ាកដែលមានឥទ្ធិពលបំផុត ពី E-Gets- ពានរង្វាន់សហគ្រិនវ័យក្មេងឆ្នើមកម្ពុជា ឆ្នាំ២០១៥ (ASEAN-CHINA)- ពានរង្វាន់កន្លែងការងារល្អបំផុត ពីក្រសួងទេសចរណ៍- វិញ្ញាបនបត្រអនុលោមភាពសារពើពន្ធប្រភេទ មាស ពីអគ្គនាយកដ្ឋានពន្ធដារការសម្លឹងឆ្ពោះទៅអនាគត និងការអបអរសាទរខួបអនុស្សាវរីយ៍ ១០ ឆ្នាំ ក្រោមប្រធានបទ «វិថីដើរម៉ូដ»។ដើម្បីអបអរសាទរចំពោះសមិទ្ធផលដែលសម្រេចបានរយៈពេល ១០ឆ្នាំមកនេះ ខយ តេ កម្ពុជា បានរៀបចំកម្មវិធីខួបអនុស្សាវរីយ៍គម្រប់ ១០ឆ្នាំរបស់ខ្លួន ក្រោមប្រធានបទ «វិថីដើរម៉ូដ» ដោយមានការដើរបង្ហាញម៉ូដសម្លៀកបំពាក់ដ៏ធំ ដែលមានគោលបំណងបង្ហាញពីចក្ខុវិស័យអនាគតរបស់ ខយ តេ កម្ពុជា ក្នុងការប្តេជ្ញារក្សានូវភាពលេចធ្លោ ភាពច្នៃប្រឌិត និងនវានុវត្តន៍របស់ខ្លួននៅលើវិថីតែគុជក្នុងប្រទេសកម្ពុជាឱ្យកាន់តែរឹងមាំ។ កម្មវិធីនេះ ក៏មានការចូលរួមពីសំណាក់ថ្នាក់ដឹកនាំជាន់ខ្ពស់របស់រាជរដ្ឋាភិបាល ឯកឧត្តម លោកជំទាវ អ្នកឧកញ៉ា ឧកញ៉ា អគ្គនាយកនៃក្រុមហ៊ុន ខយតេ អ្នកបងើ្កតមាតិការ ថ្នាក់ដឹកនាំ និងបុគ្គលិក ខយ តេ កម្ពុជា ព្រមទាំងអ្នកគាំទ្ររបស់ខ្លួនជាច្រើននាក់ផងដែរ៕

CSX បង្ហាញមហិច្ឆតាជំរុញការជួញដូរភាគហ៊ុនឲ្យកើនដល់ ១០០លានដុល្លារ នៅឆ្នាំ២០៣០ ខាងមុខ

អគ្គនាយកផ្សារមូលបត្រកម្ពុជា (CSX) ជាថ្មីម្តងទៀត បានលើកឡើងនូវមហិច្ឆតារបស់ខ្លួន ដែលមានបំណងចង់សម្រេចឲ្យបានទំហំការជួញដូរឲ្យកើនដល់ ១០០លានដុល្លារអាម៉េរិក ក្នុង១ថ្ងៃ ខណៈសព្វថ្ងៃនេះ ជាមធ្យមទំហំជួញដូរមានប្រមាណ ២០ម៉ឺនដុល្លារ ក្នុង១ថ្ងៃ។ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃផ្សារមូលបត្រកម្ពុជា ក្នុងពិធីបើកវគ្គបណ្តុះបណ្តាលស្តីពី Earnings Forum 2024 នៅព្រឹកថ្ងៃទី១២ ខែមីនានេះ បានមានប្រសាសន៍ថា គិតមកដល់បច្ចុប្បន្ន គណនីដែលកំពុងជួញដូរដែលមានបញ្ជីឈ្មោះ ចំនួនសរុបប្រមាណជាង ៥ម៉ឺនគណនី។ ឯកឧត្តម បានបន្តថា តាមរយៈកម្មវិធីបណ្តុះបណ្តាលនេះ ផ្សារមូលបត្រកម្ពុជា នឹងបន្តរៀបចំឲ្យកាន់តែច្រើនបន្ថែមទៀត ដើម្បីឲ្យសាធារណជនកម្ពុជាស្គាល់អំពីការវិនិយោគដែលត្រឹមត្រូវស្របតាមច្បាប់ ដែលមានការធានាការពារច្បាប់ និងបទប្បញ្ញត្តិជាធរមាន ដើម្បីឈានសម្រេចឲ្យបាននូវគោលដៅនៃមហិច្ឆតាខាងលើនេះ។ ជាមួយនេះ ឯកឧត្តម បានស្នើវិនិយោគិនសាធារណៈ និងសិក្ខាកាមដែលចូលរួមក្នុងវគ្គបណ្តុះបណ្តាលថ្ងៃនេះទាំងអស់ ឲ្យព្យាយាមក្រេបជញ្ជក់នូវចំណេះដឹង ឬក៏លើកជាសំណួរសួរទៅកាន់តំណាងក្រុមហ៊ុនចុះបញ្ជីទាំងអស់ ដើម្បីទទួលបានព័ត៌មានគ្រប់ជ្រុងជ្រោយ ងាយស្រួលក្នុងការសម្រេចចិត្តវិនិយោគ ឬបង្កើតចំណូលអកម្មចាប់ពីពេលនេះតទៅ ដើម្បីជាមូលដ្ឋានក្នុងការវិភាគ ក៏ដូចជាជំនួយបន្ថែមសម្រាប់វិនិយោគក្នុងការវិភាគជាបច្ចេកទេស ដើម្បីសម្រេចចិត្តក្នុងការវិនិយោគលើភាគហ៊ុនឲ្យបានត្រឹមត្រូវ។សូមបញ្ជាក់ថា វគ្គបណ្តុះបណ្តាលស្តីពី Earnings Forum 2024 នេះ ត្រូវបានបង្កើតឡើងក្នុងឆ្នាំ២០២៣ ក្នុងគោលបំណងបង្កើតជាវេទិកាជូនក្រុមហ៊ុនចុះបញ្ជីក្នុងការផ្សព្វផ្សាយព័ត៌មានរបស់ក្រុមហ៊ុនដល់វិនិយោគិន និងជាវេទិកាមួយអនុញ្ញាតឲ្យសាធារណជនស្វែងយល់បន្ថែមពីអាជីវកម្មរបស់ក្រុមហ៊ុនចុះបញ្ជីនៅផ្សារមូលបត្រកម្ពុជា រួមមានប្រតិបត្តិការអាជីវកម្ម លទ្ធផលហិរញ្ញវត្ថុ និងផែនការអាជីវកម្មនាពេលអនាគត៕ អត្ថបទ៖ ឈិត បូរ៉ាវី

ប្រទេសចិនកំណត់គោលដៅសេដ្ឋកិច្ចពេញដោយមហិច្ឆតាសម្រាប់ឆ្នាំ២០២៤ ក្នុងឱកាសបើកសភាប្រជាជន

លោកនាយករដ្ឋមន្ត្រីចិន លី ឈាង (Li Qiang) បានទទួលស្គាល់ថាការអនុវត្តសេដ្ឋកិច្ចរបស់ប្រទេសចិនបានប្រឈមនឹងភាពលំបាក ដោយបន្ថែមថាបញ្ហាជាច្រើនទាំងនេះមិនទាន់ត្រូវបានដោះស្រាយនៅឡើយទេ។បញ្ហានេះបានកើតឡើងនៅពេលប្រទេសចិនកំពុងព្យាយាមស្តារសេដ្ឋកិច្ចឲ្យរីកចម្រើនឡើងវិញ។ លោកបានបន្តថា ហានិភ័យ និងគ្រោះថ្នាក់ដែលអាចកើតមានក្នុងវិស័យអចលនទ្រព្យ បំណុលរបស់រដ្ឋាភិបាលក្នុងតំបន់ និងស្ថាប័នហិរញ្ញវត្ថុខ្នាតតូច និងមធ្យម មានសភាពធ្ងន់ធ្ងរក្នុងផ្នែកមួយចំនួន។ នៅក្រោមកាលៈទេសៈទាំងនេះ យើងបានប្រឈមបញ្ហាជាច្រើនក្នុងការសម្រេចចិត្តបង្កើតគោលនយោបាយ និងធ្វើការងាររបស់យើង។ វិធានការផ្សេងទៀតដើម្បីជួយដោះស្រាយកំណើនសេដ្ឋកិច្ចកំពុងងើបឡើងវិញយឺតរបស់ប្រទេសនេះពីជំងឺរាតត្បាតក៏ត្រូវបានគូសបញ្ជាក់ផងដែរ រួមទាំងការបង្កើតគំនិតផ្តួចផ្តើមថ្មីដើម្បីដោះស្រាយបញ្ហានៅក្នុងវិស័យអចលនទ្រព្យដែលរងគ្រោះដោយវិបត្តិរបស់ប្រទេសនេះ។ ទីក្រុងប៉េកាំងក៏មានគោលបំណងបន្ថែមការងារចំនួន១២ លាន កន្លែង នៅក្នុងតំបន់ទីក្រុងផងដែរ។លោកនាយករដ្ឋមន្ត្រី Li បាននិយាយថា បទប្បញ្ញត្តិនៃទីផ្សារហិរញ្ញវត្ថុក៏នឹងកើនឡើងផងដែរ ខណៈពេលការស្រាវជ្រាវនឹងកើនឡើងនៅក្នុងបច្ចេកវិទ្យាថ្មីៗ រួមទាំងបញ្ញាសិប្បនិម្មិត (AI) និងវិទ្យាសាស្ត្រជីវិត។ អស់រយៈពេលជាច្រើនទសវត្សរ៍មកហើយ ដែលសេដ្ឋកិច្ចចិនបានពង្រីកក្នុងអត្រាខ្ពស់បំផុត ដោយតួលេខផ្លូវការដាក់ផលិតផលក្នុងស្រុកសរុប (GDP) របស់ខ្លួនកើនឡើងជាមធ្យមជិត ១០% ក្នុងមួយឆ្នាំ។នៅលើមាគ៌ា ដែលខ្លួនបានវ៉ាដាច់ប្រទេសជប៉ុនដើម្បីក្លាយជាមហាអំណាចសេដ្ឋកិច្ចទីពីររបស់ពិភពលោក ទីក្រុងប៉េកាំងបានអះអាងថាខ្លួនបានដកប្រជាជនរាប់រយលាននាក់ចេញពីភាពក្រីក្រ។ ក្រុងប៉េកាំងនិយាយថាកាលពីឆ្នាំមុនថា សេដ្ឋកិច្ចបានកើនឡើង ៥,២% ទោះថាកម្រិតនោះទាបសម្រាប់ប្រទេសចិនក្ដី។ ទោះជាយ៉ាងណា ក្រុមអ្នករិះគន់ខ្លះអះអាងថា តួលេខពិតអាចមានតិចជាងមួយភាគបីនៃចំនួននោះ៕

រដ្ឋមន្ត្រីហិរញ្ញវត្ថុ៖ ប្រទេសចិន ផ្តល់កម្ចីជាង២ពាន់លានដុល្លារដល់ប៉ាគីស្ថាន

រដ្ឋមន្ត្រីក្រសួងហិរញ្ញវត្ថុចាំផ្ទះលោក សាមសេដ អាក់តា (Shamshad Akhtar) បានបញ្ជាក់នៅក្នុងការឆ្លើយតបទៅកាន់សារព័ត៌មានរ៉យទ័រនៅថ្ងៃព្រហស្បតិ៍នេះថា ប្រទេសចិន បានផ្តល់ប្រាក់កម្ចីជាង ២ពាន់លានដុល្លារ ដល់ប្រទេសប៉ាគីស្ថាន។សារព័ត៌មាន Geo News ដែលបានរាយការណ៍ដល់ព័ត៌មានរ៉យទ័រជាលើកដំបូង បាននិយាយដោយដកស្រង់ប្រភពពីក្រសួងហិរញ្ញវត្ថុប៉ាគីស្ថានថា ប្រាក់កម្ចីចំនួន ២ពាន់លានដុល្លារ ត្រូវផ្តល់ នៅក្នុងខែមីនា ហើយត្រូវបានពន្យាររយៈពេលមួយឆ្នាំ។ ទីក្រុងប៉េកាំង បានធ្វើការទំនាក់់ទំនងការសម្រេចចិត្តនេះ ទៅកាន់ទីក្រុងអ៊ីស្លាម៉ាបាដ។សេដ្ឋកិច្ចដែលជាប់គាំងដោយបញ្ហាលុយប្រាក់របស់ប្រទេសប៉ាគីស្ថាន កំពុងតស៊ូ ដើម្បីស្ថិរភាពពីវិបត្តិហិរញ្ញវត្ថុ និងទទួលបានការរៀបចំរង់ចាំប្រាក់ចំនួន ៣ពាន់លានដុល្លារពីមូលនិធិរូបិយវត្ថុអន្តរជាតិ (IMF)កាលពីរដូវក្តៅមុន។ទីភ្នាក់ងារវាយតម្លៃ Fitch បាននិយាយកាលពីសប្តាហ៍មុនថា ជំហរខាងក្រៅដែលងាយរងគ្រោះរបស់ប្រទេសប៉ាគីស្ថាន មានន័យថា ការធានាហិរញ្ញវត្ថុពីដៃគូពហុភាគី និងទ្វេភាគី នឹងក្លាយជាបញ្ហាបន្ទាន់បំផុតមួយ ដែលរដ្ឋាភិបាលបន្ទាប់ កំពុងប្រឈម។

បណ្ដាញសង្គម

ព័ត៌មានថ្មីៗ

សម្ដេចតេជោ វាយតម្លៃខ្ពស់ចំពោះលោក ដូណាល់ ត្រាំ មានសេចក្តីក្លាហានចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន

រដ្ឋអាជ្ញាលីទុយអានី៖ ចារកម្មយោធារុស្ស៊ី ជាប់ពាក់ព័ន្ធនឹងការដុតហាង Ikea

ទាហានស៊ីរីបានបាញ់តគ្នាជាមួយកងទ័ពលីបង់ និងក្រុមប្រដាប់អាវុធ នៅភាគឦសានលីបង់

រ៉្វាន់ដា និងបែលហ្ស៊ិក បណ្ដេញអ្នកការទូតគ្នាទៅវិញទៅមក ជុំវិញជម្លោះ នៅកុងហ្គោ

បេក្ខជនប្រកាន់ស្តាំដ៏តឹងរ៉ឹងរ៉ូម៉ានី ត្រូវបានរំពឹងថា នឹងឈ្នះជុំទី១ នៃការបោះឆ្នោតប្រធានាធិបតី

កូរ៉េខាងត្បូង និងអ៊ុយក្រែន ពិភាក្សាអំពីការដោះស្រាយបញ្ហាអ្នកទោសសង្គ្រាមកូរ៉េខាងជើង

ប.ស.ស. ប្រកាសឲ្យសមាជិកអាចស្នើសុំទូទាត់តាវកាលិកផ្នែកថែទាំសុខភាព តាមរយៈកម្មវិធីទូរស័ព្ទដៃបានចាប់ពីថ្ងៃនេះតទៅ

ក្រសួងការបរទេស៖ ចិនមិនដែលផ្គត់ផ្គង់សព្វាវុធ និងវត្ថុប្រើប្រាស់សម្រាប់ស៊ីវិលនិងយោធា ដល់អ៊ុយក្រែនទេ

លោក Zelensky ចុះហត្ថលេខាលើច្បាប់ស្តីពីការបញ្ជូនកងទ័ព ទៅកាន់រដ្ឋផ្សេងទៀត

លោក Trump បញ្ឈប់វិទ្យុសំឡេងសហរដ្ឋអាមេរិក វិទ្យុអាស៊ីសេរី និងវិទ្យុអឺរ៉ុបសេរី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877