នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អនុប្រធាន EU-ABC លើកទឹកចិត្តឱ្យវិនិយោគិនអឺរ៉ុបមកស្វែងរកឱកាសវិនិយោគនៅកម្ពុជា
ប្រធានសមាគមភស្តុភារកម្ម៖ សេវាកម្មដឹកជញ្ជូន​នឹងហក់ឡើង​ប្រសិន​សង្គ្រាម​នៅ​មជ្ឈិម​បូព៌ា​អូសប​ន្លាយ
មន្រ្តីជាន់ខ្ពស់រដ្ឋាភិបាល៖ កម្ពុជានឹងជួបចរចា​ជាមួយ​តំណាង​ពាណិជ្ជកម្ម​អាម៉េរិក​លើ​ការ​កំណត់​ពន្ធបដិការថ្មី
រដ្ឋមន្រ្តីក្រសួងរ៉ែនិងថាមពល៖ ការផ្គត់ផ្គង់ និងថ្លៃអគ្គិសនី មិនប៉ះ​ពាល់​ឡើយ​ទោះ​តម្លៃ​ប្រេង​ហក់​ឡើង​ក៏​ដោយ

សេដ្ឋកិច្ច និង កសិកម្ម

ក្រសួងពាណិជ្ជកម្មត្រៀមរួចរាល់ក្នុងការរៀបចំ «ពិព័រណ៍ពាណិជ្ជកម្មកម្ពុជា(CTE)» រយៈពេល៤ថ្ងៃ នៅភ្នំពេញ

2024/12/09 04:09:17 pm        293
Facebook Telegram Linkin
ភ្នំពេញ៖ មន្រ្តីជាន់ខ្ពស់នៃក្រសួងពាណិជ្ជកម្ម លើកឡើងថា ក្រសួងត្រៀម​រួចជាស្រេច​ក្នុង​ការ​រៀប​ចំ​ពិព័រណ៍​​ពាណិជ្ជកម្ម​កម្ពុជា(CTE) ចាប់ពីថ្ងៃទី១៣ ដល់១៦ ខែធ្នូ ឆ្នាំ២០២៤ នៅខណ្ឌច្បារអំពៅ រាជ​ធានី​ភ្នំពេញ ក្នុងគោលបំណងដើម្បីតាំងបង្ហាញផលិតផលមានគុណភាពខ្ពស់របស់កម្ពុជា ទំនិញនាំចេញ-នាំ​ចូល​សំខាន់​ៗ និងសេវាកម្មដែលមានលក្ខណៈពិសេសរបស់បណ្តាអ្នកផ្គត់ផ្គង់ជុំវិញពិភពលោក។ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម នៅក្នុងសន្និសីទសារព័ត៌មាន ស្ដីពីការរៀបចំពិព័រណ៍ពាណិជ្ជកម្មកម្ពុជា ក្រោមមូលបទនៃឆ្នាំ២០២៤ «យុគសម័យថ្មីនៃពាណិជ្ជកម្ម» នៅ​រសៀល​ថ្ងៃ​ទី៩ ខែធ្នូនេះ បានមានប្រសាសន៍ថា ពិព័រណ៍ពាណិជ្ជកម្មកម្ពុជានាពេលខាងមុខនេះ គឺ​ជា​ព្រឹត្តិការណ៍​ពិព័រណ៍ដ៏ធំមួយប្រចាំឆ្នាំ ដែលព្រឹត្តិការណ៍នេះ ដើមឡើយមានឈ្មោះថា «ពិព័រណ៍​ផលិត​ផល​ខ្មែរ ​និងទំនិញនាំចេញ-នាំចូល (CIEGE)» ដែលចាប់តាំងពីឆ្នាំ២០០៦មក ត្រូវបានរៀប​ចំ​ឡើង​ទទួល​បាន​ជោគ​ជ័យចំនួន១៦លើកមកហើយ។ ឯកឧត្តម បានបន្តថា ការផ្លាស់ប្តូរឈ្មោះពិព័រណ៍នេះ ដើម្បី​ឱ្យ​កាន់​តែមាន​ភាព​សាមញ្ញ ឆ្លុះបញ្ចាំងពីគោលគំនិត នៃឧត្តមភាព និងប្រកប​ដោយ​ភាព​ទាក់​ទាញ​ក្នុង​ទីផ្សារ​សម័យ​ថ្មី​។ពិព័រណ៍ពាណិជ្ជកម្មកម្ពុជាដែលគ្រោងរៀបចំនាពេលខាងមុខនេះ នឹងដាក់បង្ហាញផលិតផលជាច្រើន មាន​ដូច​ជា ផលិតផលសម្រាប់ការនាំចេញរបស់កម្ពុជា ផលិតផលកម្មន្តសាល ផលិតផលសិប្បកម្ម ផលិតផល​កសិកម្ម និងសេវាកម្ម។ ក្រៅពីនេះ ក៏មានការតាំងបង្ហាញផលិតផល និងលក់ទំនិញ, វេទិកា​ពាណិជ្ជកម្ម​ឌីជីថល​លើកទី១ និងពិព័រណ៍អនឡាញ វេទិកាពាណិជ្ជកម្ម និងវិនិយោគកម្ពុជា-កូរ៉េ កម្មវិធី​ជំនួប​ពាណិជ្ជក​ម្ម​ស្ដីពី​ការអភិវឌ្ឍទីផ្សារផលិតផលសក្ដានុពលកម្ពុជា វេទិកាស្ដីពីការនាំចេញរបស់កម្ពុជា។ ក្នុងនោះ ក្រុម​ហ៊ុន​ អ្នកចែកចាយ និងអ្នកតំណាងនៃវិស័យឯកជន ដែលនឹងត្រូវចូលរួមតាំងបង្ហាញផលិតផល និង​សេវា​កម្ម​នានា​ចំនួន ២៤៦ស្ដង់៕ អត្ថបទ ឈិត បូរ៉ាវី

រដ្ឋាភិបាលបង្កើនការយកចិត្តទុកដាក់អភិវឌ្ឍន៍វិស័យវារីវប្បកម្មលើកស្ទួយកំណើនប្រាក់ចំណូលដល់ពលរដ្ឋ

2024/12/09 11:41:22 am        163
Facebook Telegram Linkin
ភ្នំពេញ៖ មកដល់បច្ចុប្បន្ននេះ រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និង​នេសាទ ជាសេនាធិការ បានកំពុងយកចិត្តទុកដាក់យ៉ាងខ្លាំងក្នុងការអភិវឌ្ឍវិស័យវារីវប្បកម្ម ដើម្បី​ចូល​រួម​ធានាសន្តិសុខស្បៀងប្រកបដោយភាពប្រកួតប្រជែង និងនិរន្តរភាព។ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាល​ពី​សប្តាហ៍​កន្លង​ទៅ បានមានប្រសាសន៍ថា តាមរយៈយុទ្ធសាស្ត្របញ្ចកោណដំណាក់កាលទី១ របស់​រាជ​រដ្ឋាភិបាល​នីតិកាលទី៧ ដឹកនាំដោយសម្តេចនាយករដ្ឋមន្រ្តី ហ៊ុន ម៉ាណែត រាជរដ្ឋាភិបាលកម្ពុជា​បាន​ដាក់​ចេញនូវគោលនយោបាយអាទិភាពទី៥ និងទី៦ គឺ៖ការលើកស្ទួយផលិតកម្មកសិកម្ម រក​ទី​ផ្សារ និងរក្សាលំនឹងថ្លៃកសិផល តាមរយៈកម្មវិធីហិរញ្ញប្បទាន,ការដាក់ពង្រាយមន្ត្រីឃុំ សង្កាត់​, ការ​អភិវឌ្ឍសហគមន៍កសិកម្មទំនើប។ឯកឧត្តម បានបន្តថា ផ្អែកតាមគោលនយោបាយរបស់រាជដ្ឋាភិបាល ក្រសួង​កសិកម្ម​មាន​ចក្ខុ​វិស័យ ​កសិកម្មគឺបន្តធានាសន្តិសុខស្បៀងកម្ពុជា ភាពប្រកួតប្រជែងប្រកបដោយនិរន្តរភាព ហើយ​វិស័យ​កសិកម្មនៅតែ រួមចំណែកយ៉ាងសំខាន់ក្នុងសេដ្ឋកិច្ចជាតិ។ ក្នុងន័យនេះ គោលនយោបាយ​កសិកម្ម​គឺ​៖ ទី១.កសិករមានហូប ទី២.មានប្រើ ទី៣.មានបាន និងទី៤.មានរហូត។ ជុំវិញការលើកខាងលើនេះ លោក កូយ ចន្ឌី សព្វថ្ងៃជានិស្សិតឆ្នាំទី៤ នៃមហាវិទ្យាល័យជលផល និង​វារីវប្បកម្មនៃសាកលវិទ្យាល័យភូមិន្ទកសិកម្ម បានឲ្យព័ត៌មាន ប៊ីធីវី ដឹងថា តាមរយៈ​ការ​រៀប​ចំ​ពិព័រណ៍​វារីវប្បកម្មកម្ពុជាលើកទី១ កន្លងទៅថ្មីៗនេះដែលផ្តួចផ្តើមឡើងរបស់ក្រសួងកសិកម្ម រុក្ខា​ប្រមាញ់ និងនេសាទ ពិតជាមានសារៈសំខាន់ណាស់ និងបានចូ​ល​រួម​ចំណែក​ជា​ច្រើន​ក្នុង​ការ​ផ្តល់​ចំណេះ​ដឹង បច្ចេកទេស ដូចជាការចិញ្ចឹម ការគ្រប់គ្រង និងបង្កើតទំនាក់​ទំនង​ជា​ដើម​ទៅដ​ល់​អ្នក​កំពុង​ប្រកប អាជីវកម្មក្នុងវិស័យនេះឲ្យកាន់តែមានការរីកចម្រើនបន្ថែមទៀតក្នុងវិស័យទាំងនេះ។លោក រី វុទ្ធី វារីវប្បករមកពីស្រុកស្វាយអន្ទរ ខេត្តព្រៃវែង បានលើកឡើងស្រដៀងដែរថា ទៅ​ថ្ងៃ​ខាង​មុខ​ចង់ឲ្យក្រសួងកសិកម្ម រៀបចំកម្មវិធីបែបនេះបន្តទៀតដើម្បីជំរុញការធ្វើទំនាក់ទំនង ចែក​រំលែកចំណេះដឹង និងបទពិសោធន៍ ក្នុងការអភិវឌ្ឍប្រព័ន្ធទីផ្សារវារីវប្បកម្ម។ ជាពិសេស​បង្កើន​ការ​យល់​ដឹង​ឲ្យបានទូលំទូលាយអំពីអនុវិស័យវារីវប្បកម្មនៅកម្ពុជា។នៅថ្ងៃទី៦ និង៧ ខែធ្នូ ឆ្នាំ២០២៤កន្លងទៅ ក្រសួងកសិកម្ម រុក្ខាប្រមាញ់ និងនេសាទ បានរៀប​ចំ​ពិព័រណ៍​វារីវប្បកម្មកម្ពុជាលើកទី១ នៅរាជធានីភ្នំពេញ ក្នុងគោលបំណង​ដើម្បី​ផ្សព្វ​ផ្សាយ​គុណ​ភាព និងលើកកម្ពស់ស្នាដៃរបស់វារីវប្បកម្មខ្មែរ បង្កើនការយល់ដឹងជាសាធារណៈ អំពី​គុណ​ភាព​ត្រី​ចិញ្ចឹម​របស់​កម្ពុជា និងលើកកម្ពស់ការយល់ដឹងអំពីចំណី ពូជ ការផ្គត់ផ្គង់បច្ចេក​វិទ្យាថ្មីៗ​ដែល​ប្រើ​ប្រាស់​ក្នុង​វារីវប្បកម្ម ជំរុញការទំនាក់ទំនងកិច្ចសហការ រវាងភាគីពាក់ព័ន្ធ​ក្នុង​ខ្សែ​ច្រវាក់​តម្លៃ​វារី​វប្បកម្ម ព្រមទាំងបង្កើតយន្តការផ្សព្វផ្សាយ ចែករំលែកចំណេះដឹង បទពិសោធន៍ និងមេរៀន​ក្នុង​ការ​អភិវឌ្ឍប្រព័ន្ធទីផ្សារវារីវប្បកម្មកម្ពុជា៕ អត្ថបទ ឈិត បូរ៉ាវី 

វិនិយោគិនចិនកំពុងហូរចូលកម្ពុជាឡើងវិញ ដើម្បីស្វែងរកឱកាសវិនិយោគ និងការធ្វើពាណិជ្ជកម្ម​ផ្សេងៗ

2024/12/09 11:07:07 am        203
Facebook Telegram Linkin
ប្រធានសមាគមពាណិជ្ជកម្ម និងឧស្សាហកម្មកម្ពុជា-ចិន មើលឃើញថា វិនិយោគិនបរទេស ជា​ពិសេស​វិនិយោគិនមកពីប្រទេសចិន បានកំពុងហូរចូលមកកម្ពុជា ដើម្បីស្វែងរកឱកាសវិនិយោគ និង​ការ​ធ្វើពាណិជ្ជកម្មផ្សេងៗ ក្រោមបរិយាកាសអំណោយផល និងការងើប ឡើងវិញ​ជា​បណ្តើរ​ៗ​នៃ​សេដ្ឋកិច្ចកម្ពុជា។លោក ណែម ឌីណា ប្រធានសមាគមពាណិជ្ជកម្ម និងឧស្សាហកម្មកម្ពុជា-ចិន (ក្វាងទុង) ថ្លែង​លើក​ឡើង​នៅក្នុង ពិធីនិងការចុះអនុស្សារណៈយោគយល់គ្នា រវាងសមាគមសហគ្រិនវីម៉ូកម្ពុជា និង​សមាគមពាណិជ្ជកម្ម និងឧស្សាហកម្មកម្ពុជា-ចិន (ក្វាងទុង) នៅចុងសប្តាហ៍កន្លងមកថា ទាក់​ទិន​ការធ្វើធុរកិច្ចនេះ បច្ចុប្បន្នសមាគមបានកំពុងអនុវត្តផែនការ សកម្មភាពជាច្រើន ព្រម​ទាំង​បាន​បង្កើត​ទីស្នាក់ការចាំនៅទីក្រុងហ្គងចូវ នៃប្រទេសចិន, ការដាក់ទីស្នាក់ការនៅទីនោះ គឺដើម្បី​សម្របសម្រួលដល់ប្អូន ជាពិសេសម្ចាស់អាជីវកម្មផ្សេងៗ ដែលស្វែងរកទីផ្សារ ឬដៃគូវិនិយោគ មាន​​ឱកាសជួបជុំគ្នារវាងធុរកិច្ចនៃប្រទេសទាំងពីរ ដើម្បីពង្រីក ទីផ្សារ​នៃ​ការ​ចរាចរទំនិញរបស់ខ្លួន។លោក ប្រធានសមាគមរូបនេះ បានបន្ថែមឱ្យដឹងថា ចាប់ពីដើមឆ្នាំក្រោយនេះ សមាគម​ពាណិជ្ជ​កម្ម និងឧស្សាហកម្មកម្ពុជា-ចិន (ក្វាងទុង) និងបានរៀបចំផែនការ នៃដំណើរ​ទស្សន​កិច្ច​របស់​ម្ចាស់​អាជីវកម្មចិនចូលមកកម្ពុជា ដែលដំណើរទស្សនកិច្ចនេះ គឺជា ការបង្កើតនូវទំនាក់ទំនង ការ​ស្វែង​រក​ឱកាសវិនិយោគ និងការធ្វើពាណិជ្ជកម្មផ្សេងៗជាដើម។លោក ណែម ឌីណា បន្ថែមថា ជុំវិញការវិនិយោគនេះ ឃើញថា រាជរដ្ឋាភិបាល​កម្ពុជា​បាន​យក​ចិត្ត​ទុក​ដាក់​យ៉ាង និងបានបង្កើននូវកិច្ចសហប្រតិបត្តិការជាមួយប្រទេសដៃគូសំខាន់ៗជាច្រើន និង​បាន​ដាក់​ចេញទិសដៅលើកទឹកចិត្ត ដែលជាការពង្រឹងនូវ ទំនុកចិត្តដល់វិនិយោគិនគ្រប់រូប ក្នុង​ការ​ធ្វើ​ប្រតិបត្តិការធុរកិច្ច និងវិនិយោគនៅកម្ពុជា បច្ចុប្បន្នឃើញថា, លំហូរនៃវិនិយោគិនបរទេស ជា​ពិសេសវិនិយោគិនចិន បានកំពុងហូរចូលមកកម្ពុជា ដើម្បីស្វែងរកឱកាសវិនិយោគ និង​ការ​ធ្វើ​ពាណិជ្ជក​ម្មផ្សេងៗ ហើយកម្ពុជានឹង ទទួលបានវិនិយោគិន​បរទេស​កាន់​តែ​ច្រើន​ទៀត​នៅ​ក្នុង​ឆ្នាំ​បន្ត​បន្ទាប់​។សូមបញ្ជាក់ថា ពាក់ព័ន្ធគោលនយោបាយគាំទ្រនានា ដែលរាជរដ្ឋាភិបាលកម្ពុជា ក្រោម​ការ​ដឹកនាំ​យ៉ា​ងប៉ិនប្រសប់របស់ សម្តេចអគ្គម ហាសេនាបតីតេជោ ហ៊ុន សែន អតីតនាយករដ្ឋមន្រ្តី និង​បច្ចុប្បន្ន​ជា​ប្រធានព្រឹទ្ធសភា ដែលបន្តវេននៃការដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញក្នុងទិសដៅលើកទឹកចិត្ត និងពង្រឹងនូវទំនុកចិត្តដល់​វិនិយោគិន​គ្រប់​រូប ក្នុងការធ្វើប្រតិបត្តិការធុរកិច្ច និងវិនិយោគនៅកម្ពុជារួម បញ្ចូលទាំង​គោល​នយោបាយ​អភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ដែលមានចក្ខុ​វិស័យ​ក្នុង​ការ​ជំរុញ​ កែប្រែ និងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ឈាន​ទៅ​ឧស្សាហកម្មផ្អែកលើជំនាញ ត្រឹមឆ្នាំ២០២៥។ ជាក់ស្តែងជុំវិញវិនិយោគនេះ, នៅក្នុងខែ វិច្ឆិកា ឆ្នាំ២០២៤ កន្លងមកនេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មីចំនួន ៤៣ ក្នុង​នោះ​គម្រោងពង្រីកផលិតកម្មចំនួន៣ មានទុនវិនិយោគសរុបជិត ៩៤០ លានដុល្លារអាមេរិក និង​អាច​បង្កើតការងារបានប្រមាណ ៣៩ ពាន់កន្លែង៕ អត្ថបទ៖ សុន រ៉ាឌី 

សមាគមក្នុងស្រុកមួយ សហការជាមួយសមាគមចិន ដើម្បីស្វែងរកដៃគូវិនិយោគ និងជំរុញការ​នាំចេញ​ទំនិញកម្ពុជា

2024/12/07 05:09:44 pm        657
Facebook Telegram Linkin
សមាគមក្នុងស្រុកមួយ ចុះអនុស្សារណៈយោគយល់គ្នាជាមួយសមាគមចិន ដើម្បីជំរុញ​ការ​ផ្លាស់​ប្តូរ​​បទបិសោធន៍ ការបណ្តុះ បណ្តាល ការស្វែងរកដៃគូវិនិយោគ ជាពិសេសលើក​កម្ពស់​ជំរុញ​ដល់​ការ​នាំ​ចេញ​ទំនិញរបស់កម្ពុជា ដើម្បីរួមចំណែកដល់កំណើននៃការ នាំចេញជាមួយ​រាជរដ្ឋាភិបាល​។លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងក្នុងជំនួបអាជីវកម្ម ការ​ផ្គូរផ្គង​អាជីវកម្ម សម្រាប់សហគ្រាសធុន តូច និងមធ្យមនៅកម្ពុជា និងការចុះ​អនុស្សារណៈ​យោគ​យល់​គ្នា រវាងសមាគមសហគ្រិនវីម៉ូកម្ពុជា និងសមាគមពាណិជ្ជកម្ម និង ឧស្សាហកម្មកម្ពុជា-ចិន (ក្វាងទុង) នៅថ្ងៃនេះថា មកដល់ពេលនេះ សមាគមមានសមាជិកជាសហគ្រិនជាច្រើន ដែល​កំពុង​ធ្វើអាជីវកម្មផ្សេងៗគ្នា ដោយក្នុងនោះសមាគមតែងតែរៀបចំវេទិកា និងជំនួប​អាជីវកម្ម​ជា​បន្ត​បន្ទាប់ ដើម្បីឱ្យសហគ្រិនទទួលនូវការ ផ្លាស់ប្តូរបទពិសោធន៍ ការចែករំលែកចំណេះដឹង ការ​ផ្គូរ​ផ្គង​ពាណិជ្ជកម្ម និងការស្វែករក ទីផ្សារលក់ផលិតផលបន្ថែម ដើម្បីជំរុញ ការធ្វើអាជីវកម្ម​ឱ្យ​កាន់​តែ​ប្រសើរ ក្នុងគោលដៅចូលរួមចំណែកបង្កើតប្រាក់ចំណូល និងវិស័យ​ការងារ​ជាមួយ​រាជ​រដ្ឋាភិបាល​។  លោក បន្តថា ជាក់ស្តែងនៅក្នុងថ្ងៃនេះ សមាគមបានចុះអនុស្សារណៈជាមួយសមាគមពាណិជ្ជកម្ម និង​ឧស្សាហកម្មកម្ពុជា-ចិន (ក្វាងទុង) ដោយមានគោលដៅសំខាន់ៗជាច្រើន ជុំវិញលើក​កម្ពស់​សហគ្រិន​នៅ​កម្ពុជា ឱ្យមាននំនាក់ទំនង និងមានកិច្ចសហ- ប្រតិបត្តិការលើអាជីវកម្មកាន់តែច្រើន ដើម្បី​លើកក​ម្ពស់ដល់ខ្សែច្រវាក់ផលិតកម្ម ជុំវិញការប្រកួតប្រជែង ជាពិសេសការនាំចេញទំនិញ គាំទ្រ​ដល់​គោលនយោបាយរបស់រាជរដ្ឋាភិបាល ដែលបាន​កំពុង​ខិតខំ​ប្រឹង​ប្រែង​លើ​ការងារ​ទាំង​​​នេះ​។ជុំវិញកិច្ចសហការនេះដែរ, លោក ណែម ឌីណា ប្រធានសមាគមពាណិជ្ជកម្ម និង​ឧស្សាហ​កម្ម​កម្ពុជា-​ចិន (ក្វាងទុង) លើកឡើងផងដែរថា បច្ចុប្បន្នសមាគម​បាន​កំពុង​អនុវត្ត​ផែន​ការ​លើស​កម្មភាព​ការងារជាច្រើន ជាពិសេសការសម្របសម្រួលដល់ វិនិយោគិនចិន ក្នុងការស្វែង​រក​ទីតាំង​លើ​ការវិ​និយោគនៅកម្ពុជាជាដើម។ ជាក់ស្តែងតាមរយៈនេះដែរ សមាគមបានចុះអនុស្សារណៈ ជា​មួយ​សមាគម​សហគ្រិនវីម៉ូកម្ពុជា ដើម្បីពង្រឹកកិច្ចសហប្រតិបត្តិការបន្ថែមទៀត ជា​ពិសេស​គាំទ្រ​ដល់​ការ​ប្រកួត​ប្រជែង និងជំរុញដល់ ការនាំចេញទំនិញរបស់កម្ពុជាបន្ថែម។ជុំវិញបញ្ហានេះដែរ, ឯកឧត្តម ណុប នរិន្ទ ប្រធានកិត្តិយសសមាគមសហគ្រិនវីម៉ូកម្ពុជា លើក​ឡើង​ថា កម្ពុជាដែលស្ថិតនៅក្រោម ដំបូលនៃសន្តិភាព បានធ្វើឱ្យ​កម្ពុជា​មាន​ឱកាស​ជា​ច្រើន​សម្រាប់​ការ​អភិវឌ្ឍន៍ ជាពិសេសការបើកចំហរស្វាគមន៍ ដល់ការវិនិយោគជាតិ និងអន្តរជាតិ ក្នុង​នោះ​វិស័យឯកជនក៏ទទួលបាននូវឱកាសក្នុងការធ្វើអាជីវកម្ម លើការរកស៊ីទទួលទានផ្សេងៗ ជាក់​ស្តែងសកម្មភាព ដែលសហគមបានកំពុងធ្វើនៅពេលនេះ គឺមានសារៈសំខាន់ណាស់ ដើម្បីជួយ​ជ្រោម​ជ្រែង​ដល់ការពង្រឹង និងពង្រីកខ្លួនរបស់សហគ្រិន ដែលម្ចាស់សហគ្រាស និងអាជីវកម្ម​ឱ្យ​កាន់​តែ​រីកចម្រើនថែមទៀត ជាក់ស្តែងនៅពេលនេះ សមាគមបានកំពុងពង្រីកដៃគូនៅក្រៅ ប្រទេស ជំរុញការផ្លាស់ប្តូរបទពិសោធន៍ ចំណេះដឹង ការស្វែងរកដៃគូវិនិយោគ ដើម្បីជំរុញ​សកម្មភាព​អាជីវកម្មឱ្យកាន់តែខ្លាំងក្លា៕ អត្ថបទ៖ សុន រ៉ាឌី

រដូវប្រមូលត្រីប្រហុក ផ្អក នឹងចាប់ផ្តើមពីស្អែកតទៅ

2024/12/07 12:19:07 pm        215
Facebook Telegram Linkin
រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានជូន​ដំណឹង​ដល់​ប្រជាពលរដ្ឋ​ដែល​មាន​បំណង​ធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញមកទិញត្រី ដែលចាប់ផ្តើម​ពីថ្ងៃ​ទី៨ ដល់ថ្ងៃទី១៣ ខែធ្នូ ឆ្នាំ២០២៤។ នៅក្នុងសេចក្តីជូនដំណឹងនេះ រដ្ឋបាលជលផល បានជំរាបជូនបន្តថា ដោយ​សារ​តែ​នៅ​ក្នុង​រដូវ​នេសាទ​ឆ្នាំ​២០២៤-២០២៥ តាមការសង្កេតត្រីចាប់ផ្ដើមបន្លាស់ទីចេញពីបឹងទន្លេសាប បឹង ស្ទឹង និង​ព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយ​ផល​ដល់​ការ​ធ្វើ​នេសាទ​បាន​ត្រី​ច្រើន។ ជាពិសេសគឺគន្លងដាយត្រីដងទន្លេសាបនៅក្នុងភូមិសាស្ដ្រខេត្ដកណ្ដាល និងរាជធានីភ្នំពេញ។រដ្ឋបាលជលផល បានអំពាវនាវដល់ប្រជាពលរដ្ឋអញ្ជើញទៅទិញត្រីតាមពេលវេលា និងទីកន្លែង​ដូច​ជម្រាបជូន ហើយសូមអាជ្ញាធរមូលដ្ឋាន ឬសមត្ថកិច្ចពាក់ព័ន្ធ មេត្ដាជួយសម្រប​សម្រួល​ជូន​ដល់​ប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផល ផលិតផលត្រីដោយ​រលូន​តាមការគួរ​៕

ត្រីចាប់ផ្តើមសំបូរ ប្រជានេសាទសប្បាយចិត្ត និងអរគុណដល់សម្តេចធិបតី ហ៊ុន ម៉ាណែត ដែលជួយទប់ស្កាត់បទល្មើស

2024/12/07 12:11:45 pm        197
Facebook Telegram Linkin
កំពង់ឆ្នាំង៖ ចាប់ពីល្ងាចថ្ងៃទី០៦ ខែធ្នូ ឆ្នាំ២០២៤មក ត្រីចាប់ផ្តើមត្រូវច្រើន និងមា​ន​ប្រជានេសាទ​ជា​ច្រើនទូក កំពុងដាក់មងបណ្តែត ដោយក្នុងនោះប្រជា​នេសាទ​អាច​រក​បាន​ចាប់​ពី​៨០​ទៅ​១០០គីឡូក្នុង១ទូក នាំអោយពួកគាត់មានចិត្តសប្បាយរីករាយ និងអរគុណ​ដល់​សម្តេច​ធិបតី ហ៊ុន ម៉ាណែត នាយករដ្ឋមន្ត្រី និងក្រសួង មន្ទីរកសិកម្ម រុក្ខាប្រម៉ាញ់ និងនេសាទ និង​កម្លាំង​ខ័ណ្ឌជលផលកំពង់ឆ្នាំងដែលបានបង្ក្រាបបទល្មើសនេសាទទាន់ពេល នាំអោយត្រីសំបូរ។ប្រជានេសាទបានបន្តថា៖ ត្រីឆ្នាំនេះ គ្រាន់បើជាងឆ្នាំកន្លងទៅ ដោយពួកគាត់មើលឃើញថា ក្រសួង និងមន្ទីរកសិកម្ម រុក្ខាប្រម៉ាញ់ និងនេសាទ រួមនិងកម្លាំងខ័ណ្ឌជលផលកំពង់ឆ្នាំង បាន​បង្ក្រាប​បទល្មើសនេសាទទាន់ពេលវេលា និងបន្តបន្ទាប់គ្មានឈប់ ទើបធ្វើអោយ​ត្រី​សំបូរ​ឡើង​វិញ​។ នៅល្ងាចថ្ងៃម្សិលមិញ ត្រីដែលត្រូវមងប្រជានេសាទ មានដូចជាប្រភេទត្រីច្រកែង ត្រី​ឆ្កោក​ត្រូវ​មួយ​ៗ និងត្រីមួយចំនួនទៀតបានត្រូវផងដែរ។ ពួកគាត់បានថ្លែងអំណរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្រសួង មន្ទីរកសិកម្ម និងកម្លាំងជលផល ដែល​បាន​ជួយ​អោយ​មាន​ត្រី​ឡើង​វិញ ហើយពួកគាត់សង្ឃឹមថា ឆ្នាំក្រោយនេះ ត្រីនឹងត្រូវច្រើនជាងឆ្នាំនេះ។លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បានអោយដឹងថា៖ ត្រីឆ្នាំនេះ ត្រូវច្រើនជាងឆ្នាំទៅ បើគិតពេលវេលាដូចគ្នា ហើយត្រីឆ្កោក​ដែល​មិ​ន​សូវ​ឃើញ​នៅ​ឆ្នាំ​កន្លង​ទៅ តែឆ្នាំនេះឃើញវត្តមានត្រីប្រភេទនេះច្រើនជាងឆ្នាំកន្លងទៅ។ ដោយឡែក​កម្លាំង​ខ័ណ្ឌ​រដ្ឋបាល​ជល​ផលកំពង់ឆ្នាំង តែងសហការជាមួយកម្លាំងអាជ្ញាធរមូលដ្ឋាន កម្លាំងប្រដាប់អាវុធ​ទាំង៣ ចុះបង្ក្រាបជាបន្តបន្ទាប់ នាំអោយត្រីបានសំបូរនៅរដូវខ្នើតក្នុងខែ១២នេះ៕ កាំង ហុងវាស្នា

កម្ពុជាសង្ឃឹមថាការអនុវត្តគម្រោងនានាជាមួយធនាគារពិភពលោកនឹងប្រសើរឡើងទៅមុខបន្ថែមទៀត​លើវិស័យកសិកម្ម

2024/12/06 01:56:20 pm        121
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មាន​សង្ឃឹម​យ៉ាង​មុត​មាំ​ថា ក្នុងការបន្តកិច្ចសហប្រតិបត្តិការ និងអនុវត្ត​គម្រោង​អភិវឌ្ឍ​នានា​ជាមួយ​ធនាគារ​ពិភព​លោក (The World Bank) នឹងប្រកបដោយលទ្ធផលផ្លែផ្កា និង​ទទួល​ជោគ​ជ័យ​ទៅ​មុខ​ទាំង​អស់​បន្ថែម​ទៀត ដោយស្របតាមគោលនយោបាយរបស់រាជរដ្ឋាភិបាលកម្ពុជា។ក្នុងជំនួបការងារជាមួយ លោកស្រី Tania Meyer នាយក​ប្រចាំ​ប្រទេស នៃ​ធនាគារ​ពិភព​លោក​ប្រចាំ​កម្ពុជា កាលពីរសៀលថ្ងៃទី៥ ធ្នូ ឆ្នាំ២០២៤កន្លងទៅ ឯកឧត្តមរដ្ឋមន្ត្រី បានលើកឡើង​ពី​គោល​នយោបាយ​របស់​រាជ​រដ្ឋាភិបាល​ក្នុង​វិស័យ​កសិកម្ម​ក្នុង​ការ​រក្សា​ស្ថេរភាព​ថ្លៃ​កសិផល​សម្រាប់​ប្រជា​កសិករ និងអ្នកប្រើប្រាស់ ការដាក់ពង្រាយមន្រ្តីកសិកម្មភូមិ-ឃុំ ដែល​ជា​ជំនួយ​ការ​របស់​ប្រជា​កសិករ​ជួយ​ទៅ​លើផ្នែកបច្ចេកទេសនិងការរាយការណ៍នូវបញ្ហាប្រឈមផ្សេងៗ និងការកសាង​សហគមន៍​កសិកម្មទំនើប ដែលអាចជួយប្រជាកសិករកាត់បន្ថយថ្លៃដើមផលិត មានផែន​ការ​ច្បាស់​លាស់ ទទួលបានកម្ចីដើមទុនការប្រាក់ទាប អាចផ្គត់ផ្គង់ទៅតាមតម្រូវការទីផ្សារ មាន​ការ​គាំទ្រ​បច្ចេក​ទេសជាប្រចាំពីក្រសួង និងការគាំពារពីហានិភ័យនៃការប្រែប្រួលអាកាសធាតុ។ លើសពីនេះ ឯកឧត្តម បានណែនាំ​អំពី​គោល​នយោបាយ​អាទិភាព​ក្នុង​វិស័យ​កសិកម្ម​ក្នុង​ការ​ធានា​ឱ្យ​បាននូវសន្តិសុខស្បៀង និងនិរន្តរភាពសេដ្ឋកិច្ចនិងបរិស្ថាន ធ្វើយ៉ាងណាឱ្យប្រជាកសិករ មាន​ហូប​ មានប្រើ មានបាន និងមានរហូត។ទន្ទឹមនឹងនេះ ឯកឧត្តមរដ្ឋមន្រ្តី បានគូសបញ្ជាក់ថា កម្ពុជាមានកសិផលសក្តានុពលជាច្រើន ដែល​ត្រូវ​ការ​ការកែច្នៃនាំចេញទៅកាន់ទីផ្សារអន្តរជាតិ ប្រការសំខាន់ការប្រកួតប្រជែងនេះ គឺ​ផ្តោត​សំខាន់​ទៅ​លើ​គុណភាពល្អប្រណិត រសជាតិឆ្ងាញ់ អនាម័យខ្ពស់ លក់ក្នុងតម្លៃថ្លៃ និងទទួល​បាន​តម្លៃ​បន្ថែម​ខ្ពស់ ដោយមិនប្រកួតប្រជែងបរិមាណឡើយ។ពាក់ព័ន្ធនឹង​ការងារឌីជីថលូបនីយកម្ម ឯកឧត្តម ឌិត ទីណា បានលើកឡើងថា ការងារនេះ គឺ​ជា​មូល​ដ្ឋាន​គ្រឹះយ៉ាងសំខាន់ក្នុងវិស័យកសិកម្ម ដែលត្រូវដាក់ឱ្យ​អនុវត្ត​គ្រប់​ទី​កន្លែង​ដូច​ជា​ការ​អនុវត្ត​ការងារ​ប្រចាំ​ថ្ងៃរបស់មន្រ្តីរាជការ គ្រឹះស្ថានអប់រំ ការងារមន្រ្តីភូមិ-ឃុំ សហគមន៍កសិកម្មទំនើប និង​កសិករនៅមូលដ្ឋានជាក់ស្តែង សុទ្ធសឹងតែត្រូវការដើម្បីអនុវត្តការងារមានភាពទំនើបកម្ម រហ័ស​ទាន់ពេលវេលា និងមានភាពងាយស្រួល។ ក្នុងការងារនេះ ក្រុមការងារ​ធនាគារ​ពិភពលោក​អាច​ពិនិត្យ​លទ្ធភាពក្នុងការចូលរួមជំរុញកម្មវិធីផ្សេងៗដែលអាចប្រើប្រាស់បានទូលំទូលាយ មាន​ការ​គ្រប់​គ្រងច្បាស់លាស់ និងអាចជួលជុលថែទាំបានប្រកបដោយប្រសិទ្ធភាព៕

ក្រុមហ៊ុនថ្មីមួយបង្ហាញបំណងចង់វិនិយោគធាតុចូលកសិកម្មពីប្រទេសឡាវ មកប្រទេសកម្ពុជា

2024/12/06 01:42:40 pm        140
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅ​ថ្ងៃម្សិលមិញ បានអនុញ្ញាតឱ្យក្រុមហ៊ុន ស៊ីណូ អាហ្គ្រីប៉ូតាស (Sino-Agri Potash Co.,Ltd) ចូល​ជួបសម្តែងការគួរសម និងពិភាក្សា​ការងារ​ពាក់ព័ន្ធ​គម្រោង​វិនិយោគ​វិស័យ​កសិកម្ម​នៅ​កម្ពុជា​។ ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី៦ ធ្នូ ឆ្នាំ២០២៤ បានឲ្យដឹងថា ក្នុង​ជំនួប​នេះ ឯកឧត្តមរដ្ឋមន្ត្រី បានសម្ដែងការស្វាគមន៍ចំពោះក្រុមហ៊ុន ដែលមាន​គោលបំ​ណង​វិនិយោគ​ធាតុ​ចូល​កសិកម្មពីប្រទេសឡាវមកប្រទេសកម្ពុជា។ លើសពីនេះ ឯកឧត្តមរដ្ឋមន្ត្រី បានផ្តល់​អនុសាសន៍​ដល់​ក្រុមហ៊ុនត្រូវចូលរួមសហការជាមួយអគ្គនាយកដ្ឋានកសិកម្ម តេស្ត​គុណ​ភាព​ធាតុ​ចូល​កសិកម្ម ជាពិសេសជី ឱ្យបានត្រឹមត្រូវតាមស្តង់ដាបច្ចេកទេស។ បន្ថែម​ពី​លើនេះ ឯកឧត្តមរដ្ឋមន្ត្រី បានឲ្យក្រុមហ៊ុនត្រូវស្វែងយល់ពីនីតិវិធីច្បាប់ និង​នីតិ​វិធី​ការ​ចុះ​​បញ្ជី​ផលិត​ផល សម្រាប់ពាណិជ្ជកម្មឲ្យបានច្បាស់លាស់ និងត្រឹមត្រូវ។ពាក់ព័ន្ធ​នឹងការងារខាងលើនេះទៀតសោត ឯកឧត្តមរដ្ឋមន្ត្រី ឌិត ទីណា បានណែ​នាំ​ឱ្យ​ក្រុម​ហ៊ុន​ស្វែង​យ​ល់ពីតម្រូវការទីផ្សារនៅកម្ពុជា ហើយត្រូវវិនិយោគជីកសិកម្មដែលមានគុណភាពល្អ មាន​តម្លៃ​សមរម្យ និងមានស្តង់ដាខ្ពស់។សូមបញ្ជាក់ថា គិតក្នុងឆមាសទី១ ឆ្នាំ២០២៤ កម្ពុជាសម្រេច​បាន​ការ​នាំ​ចេញ​កសិផល​ទៅកា​ន់​ទីផ្សារ​អន្តរជាតិ មានការកើនឡើងប្រមាណជាង ៥៧% ហើយបើធៀប​រយៈពេល​ដូច​គ្នា​ទៅ​នឹង​ឆ្នាំ​២០២៣ ក្នុងនោះមុខទំនិញកសិកម្មសំខាន់ៗ ដែលបាននាំចេញនោះ មានដូចជា៖ ស្រូវ អង្ករ កៅស៊ូ ដំឡូងមី ស្វាយ ចេកស្រស់ ម្រេច គ្រាប់ស្វាយចន្ទី ពោត ប្រេងដូង ដំឡូងមី ផ្លែមៀនស្រស់ និង​កសិផលជាង ៧៧មុខផ្សេងៗទៀត៕

កម្ពុជាទទួលបានការវិនិយោគចំនួន៤៣ គម្រោង មានទុនសរុបជិត ៩៤០ លានដុល្លារអាមេរិក

2024/12/06 12:39:32 pm        177
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា ក្នុងខែវិច្ឆិកា ឆ្នាំ២០២៤នេះ បានអនុម័តគម្រោងថ្មីចំនួន ៤៣ ក្នុង​នោះ​គម្រោងពង្រីកផលិតកម្មចំនួន៣ មានទុនវិនិយោគសរុបជិត ៩៤០ លានដុល្លារអាមេរិក និងអាច​បង្កើតការងារបានប្រមាណ ៣៩ ពាន់កន្លែង។ក្រុមប្រឹក្សាអភិវឌ្ឍន៍កម្ពុជា បានបង្ហាញរបាយការណ៍វិនិយោគនៅក្នុងខែវិច្ឆិកា ឆ្នាំ២០២៤ ដោយ​ក្នុង​នោះ​បានអនុម័តគម្រោង ថ្មី ចំនួន៤៣ គម្រោង និងគម្រោងពង្រីកផលិតកម្មចំនួន ៣ គម្រោង មានទុនវិនិយោគសរុបប្រមាណ ៩៣៩ លានដុល្លារអាមេរិក។ ក្នុងចំណោម​គម្រោង​វិនិយោគ​សរុបនេះ ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ៣២ គម្រោង និងគម្រោងវិនិយោគដែល​មាន​ទីតាំង​ស្ថិត​នៅ​ក្នុង​តំបន់​សេដ្ឋកិច្ច​ពិសេស​មាន​ចំនួន ១១ គម្រោង។ជាការកត់សម្គាល់ សម្រាប់​គម្រោង​វិនិយោគ​ដែល​មាន​ភាព​លេច​ធ្លោ​ជាង​គេ​ប្រចាំ​ខែ​វិច្ឆិកា​នេះ​រួម​មាន​៖ ក្រៅតំបន់សេដ្ឋកិច្ច ពិសេស សម្រាប់ហេដ្ឋារចនាសម្ព័ន្ធ និងផ្សេងៗមាន៖ គម្រោង​ពង្រីក​ផលិតកម្ម​របស់គម្រោងវិនិយោគសេវាទូរគមនាគមន៍មូលដ្ឋាន (ប្រព័ន្ធទូរស័ព្ទចល័ត) មានទីតាំង​នៅ​រាជ​ធានី-ខេត្ត ទូទាំងប្រទេស មានទុនវិនិយោគបន្ថែម ចំនួន ៤៨០ លានដុល្លារអាមេរិក បង្កើត​ការងារបានចំនួនជាង ២ ពាន់កន្លែង។ចំណែកទេសចរណ៍៖ គម្រោងវិនិយោគបង្កើតសណ្ឋាគារផ្កាយ ៥ ចំនួន ៣០០ បន្ទប់ មាន​ទីតាំង​នៅ​ភូមិ​បាវិត​កណ្ដាល សង្កាត់បាវិត ក្រុងបាវិត ខេត្តស្វាយរៀង ក្នុងទុនវិនិយោគ ៧០ លានដុល្លារ​អាម៉េរិក​បង្កើតការងារ បានចំនួន ៨២២ កន្លែង។ ឧស្សាហកម្ម៖ គម្រោងវិនិយោគ​បង្កើត​រោង​ចក្រ​ផលិត​ភេសជ្ជៈ​ប៉ូវកម្លាំង នៅសង្កាត់សំរោង ខណ្ឌព្រែកព្នៅ រាជធានីភ្នំពេញ មានទុន វិនិយោគ ៣៩ លានដុល្លារអាមេរិក•បង្កើតការងារ ១១៥ កន្លែង។ គម្រោង​វិនិយោគ​បង្កើត​រោង​ចក្រ​ផលិត​អំពូល​ភ្លើង លំអដើម ណូអែល, ពូកខ្យល់ និងគ្រឿងសង្ហារិម នៅឃុំត្រែងត្រយឹង ស្រុកភ្នំស្រួច ខេត្ត​កំពង់ស្ពឺ ទុនវិនិយោគ ៣៥ លានដុល្លារអាមេរិក បង្កើត ការងារជិត ២ពាន់កន្លែង។ចំណែកក្នុងតំបន់សេដ្ឋកិច្ចពិសេស៖ សម្រាប់ឧស្សាហកម្ម, គម្រោង​វិនិយោគ​បង្កើត​តំបន់​សេដ្ឋកិច្ច​ពិសេស មានទីតាំងនៅ ឃុំជើងគោ ស្រុកព្រៃនប់ ខេត្តព្រះសីហនុ មានទុនវិនិយោគជាង ៥០ លាន​ដុល្លារអាមេរិក បង្កើតការងារ ២០៣ កន្លែង។ គម្រោង វិនិយោគ​បង្កើត​រោងចក្រ​កែច្នៃ​អាលុយ​មីញ៉ូម និងផលិតគ្រឿងបន្ទាប់បន្សំបន្ទះសូឡា មានទីតាំងនៅតំបន់សេដ្ឋកិច្ចពិសេសក្រុង ព្រះសីហនុ មានទុន ៣០ លានដុល្លារអាមេរិក បង្កើតការងារ ១៦០ កន្លែង។គួរបញ្ជាក់ផងដែរថា ក្នុងខែវិច្ឆិកា ឆ្នាំ២០២៤ នេះ ការ​វិនិយោ​គ​មក​ពី​សាធារណរដ្ឋ​សង្គម​និយម​វៀតណា​ម ស្ថិតនៅលំដាប់លេខរៀង ទី១ ដោយបានរួមចំណែកជាង ៥១% នៃទុនវិនិយោគ​សរុប, ចំណែកសាធារណរដ្ឋប្រជាមានិតចិន ស្ថិតនៅលំដាប់លេខរៀងទី២ ដោយ​បានរួ​មចំណែក​ជាង ២៤% នៃទុនវិនិយោគសរុប និងព្រះរាជាណាចក្រកម្ពុជា ស្ថិតនៅលំដាប់លេខរៀងទី៣ ដោយ​បានរួម ចំណែកជាង ១៤% នៃទុនវិនិយោគសរុប៕ អត្ថបទ៖សុនរ៉ាឌី

គណៈប្រតិភូចិនចំនួន ៧ក្រុមហ៊ុន កំពុងសិក្សាស្វែងយល់អំពីបរិយាកាសវិនិយោគនៅកម្ពុជា

2024/12/06 10:35:49 am        218
Facebook Telegram Linkin
គណៈប្រតិភូមកពីប្រទេសចិន ចំនួន ៧ ក្រុមហ៊ុន បានសិក្សាស្វែងយល់ អំពីបរិយាកាស​វិនិយោគ​នៅ​កម្ពុជា លើការបណ្តាក់ទុន រកស៊ីទទួលទានផ្សេងៗ ខណៈកម្ពុជា​បាន​ផ្តល់​នូវ​ភាព​អំណោយ​ផល និងបង្ករលក្ខណៈងាយស្រួលគ្រប់បែបយ៉ាងជូនអ្នកវិនិយោគ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅក្នុងជំនួបពិភាក្សា ការងារជាមួយ លោក Du Xu នាយកប្រតិបត្តិក្រុមហ៊ុន Guangdong Guangxin Holdings Group Ltd. និងជាតំណាងនៃ គណៈប្រតិភូ ដែល​មាន​សមាស​ភាព​ពីក្រុមហ៊ុនចំនួន៦ផ្សេងទៀត នៅថ្ងៃទី ៥ ខែ ធ្នូ ម្សិលមិញនេះ ឯកឧត្តម​ឧបនាយក​រដ្ឋ​មន្ត្រី បានលើកបង្ហាញអំពីសមិទ្ធផលនានារបស់រាជរដ្ឋាភិបាលកម្ពុជា ពិសេស​លើ​វិស័យ​ហេដ្ឋា​រចនា​សម្ព័ន្ធ ដែលកំពុងត្រូវបានយកចិត្តទុក ដាក់ និងមានតួនាទីសំខាន់ គាំទ្រសកម្មភាព​វិនិយោគ​របស់​វិនិយោគិន។ ជាក់ស្ដែងចំពោះគម្រោងហេដ្ឋារចនាសម្ព័ន្ធផ្លូវទឹកមានជាអាទិ៍ គម្រោង​ព្រែកជីកហ្វូណនតេជោ ដែលជាគម្រោង​អាទិភាព​មួយ​ដែល​ទទួល​បាន​ការ​គាំទ្រ​ពី​រាជរដ្ឋាភិបាល នឹងចូលរួមជំរុញភាពប្រទាក់ ក្រឡា នៃការដឹកជញ្ជូនផ្លូវទឹកនៅកម្ពុជា។ ឯកឧត្តមឧបនាយករដ្ឋមន្ត្រី បន្ថែមថា ពាក់ព័ន្ធនឹងកិច្ចសម្រួលវិនិយោគ ក្រុម​ប្រឹក្សា​អភិវឌ្ឍន៍​កម្ពុជា បានសម្ពោធដាក់ឱ្យប្រើ ជាផ្លូវការនូវប្រព័ន្ធបច្ចេកវិទ្យាថ្មីមួយ សម្រាប់ការ​ចុះ​បញ្ជី​គ​ម្រោង​វិនិយោគ​មាន​លក្ខណៈសម្បត្តិគ្រប់គ្រាន់ កាលពីថ្ងៃទី ២៧ ខែវិច្ឆិកា ឆ្នាំ២០២៤ កន្លងទៅ ដែល​មាន​ឈ្មោះ​ថា​ប្រព័ន្ធ cdcIPM។ ប្រព័ន្ធនេះត្រូវបានអភិវឌ្ឍឡើងស្របតាមគតិបណ្ឌិតដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានក្រុមប្រឹក្សាអភិវឌ្ឍន៍កម្ពុជា ដើម្បី​ជំរុញ ប្រសិទ្ធភាពក្នុងការទាក់ទាញវិនិយោគិន ឱ្យមកវិនិយោគនៅកម្ពុជា និងផ្ដល់​លទ្ធភាព​ជូន​វិនិយោគិនអាចដាក់ពាក្យស្នើសុំចុះបញ្ជី គម្រោងវិនិយោគពីក្រុមប្រឹក្សាអភិវឌ្ឍន៍កម្ពុជា បាន​ដោយ​ផ្ទាល់​ផងដែរ។នៅក្នុងជំនួបនេះ, លោក Du Xu បានថ្លែងអំណរគុណជូនចំពោះ ឯកឧត្តមឧបនាយករដ្ឋមន្ត្រី ដែល​បានអនុញ្ញាតជូនលោក និងគណៈប្រតិភូទាំងអស់ចូលជួបសម្ដែងការគួរសម និងពិ​ភាក្សា​ការងារ ព្រមទាំងអាចស្វែងយល់បន្ថែមទៀត អំពីបរិយាកាសវិនិយោគ នៅកម្ពុជា។ លើសពីនេះ លោក​ក៏បានសម្ដែងការអបអរសាទរចំពោះលទ្ធផលដ៏មានផ្លែផ្កា នៃដំណើរទស្សនកិច្ចមិត្តភាព និង​ផ្លូវការ របស់គណៈប្រតិភូនៃព្រះរាជាណាចក្រកម្ពុជា ដែលមានឯកឧត្តមឧបនាយករដ្ឋមន្រ្តី អញ្ជើញ​អមដំណើរសម្ដេចអគ្គមហាសេនាបតី តេជោ ហ៊ុន សែន ប្រធានព្រឹទ្ធសភា ទៅកាន់​សាធារណ​រដ្ឋ​ប្រជាមានិតចិន កាលពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២៤ នោះផងដែរ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

កងទ័ពស៊ូដង់ដណ្តើមបានមកវិញទីក្រុង Bara ស្ថិតក្នុងរដ្ឋNorth Kordofan
03/06/2026 08:03 PM
Facebook Telegram Linkin
អាល្លឺម៉ង់ប្រាប់អ៊ីរ៉ង់ឲ្យឈប់វាយប្រហារប្រទេសទី៣ ខណៈមិនឃើញការគំរាមកំហែង ចំពោះណាតូ
03/06/2026 08:03 PM
Facebook Telegram Linkin
សង្រ្គាមនៅអ៊ីរ៉ង-ឈូងសមុទ្រ បិទផ្ទប់ច្រករបៀងជំនួយ និងពន្យឺតដល់កិច្ចខិតខំជួយសង្រ្គោះសកល
03/06/2026 08:03 PM
Facebook Telegram Linkin
ប្រជាជនអ៊ីរ៉ង់ជួបជុំដើម្បីអធិដ្ឋានថ្ងៃសុក្រ ជាលើកដំបូងតាំងពីផ្ទុះសង្គ្រាមជាមួយអាមេរិក និងអ៊ីស្រាអែល
03/06/2026 08:03 PM
Facebook Telegram Linkin
ទីក្រុងមូស្គូមើលឃើញកំណើនតម្រូវការខ្ពស់សម្រាប់ប្រេង និងឧស្ម័នធម្មជាតិរុស្ស៊ី ស្របពេលសង្រ្គាមអ៊ីរ៉ង់
03/06/2026 08:03 PM
Facebook Telegram Linkin
ក្រិកនឹងដាក់ពង្រាយប្រព័ន្ធ Patriot ដើម្បីការពារប៊ុលហ្គារី ខណៈសង្គ្រាមមជ្ឈិមបូព៌ាកាន់តែអាក្រក់ទៅៗ
03/06/2026 08:03 PM
Facebook Telegram Linkin
ឧស្សាហកម្មក្បឿង និងសេរ៉ាមិចឥណ្ឌា ប្រឈមនឹងការបិទផលិតកម្ម ខណៈជម្លោះមជ្ឈិមបូព៌ាបង្អាក់ប្រេង
03/06/2026 08:03 PM
Facebook Telegram Linkin
សមត្ថកិច្ចរាជធានី ចុះពិនិត្យរដ្ឋបាលរកឃើញជនជាតិបរទេស៩៩នាក់ ស្នាក់នៅខុសច្បាប់ និងពាក់ព័ន្ធបទល្មើសអនឡាញ
03/06/2026 08:03 PM
Facebook Telegram Linkin
UN៖ ជនស៊ីវិលអាហ្វហ្គានីស្ថាន ៥៦នាក់ ត្រូវបានសម្លាប់នៅក្នុងជម្លោះជាមួយប៉ាគីស្ថាន ចាប់តាំងពីសប្តាហ៍មុន
03/06/2026 07:03 PM
Facebook Telegram Linkin
ប្រមុខសិទ្ធិមនុស្ស UN៖ ពិភពលោកត្រូវតែទប់ស្កាត់បន្ទាន់នូវការកើនឡើងភាពតានតឹង នៅមជ្ឈិមបូព៌ា
03/06/2026 07:03 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.