BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

លោក Trump ស្តីបន្ទោសអធិការបតីអាល្លឺម៉ង់ លោក Merz សម្រាប់ការរិះគន់សង្គ្រាមនៅអ៊ីរ៉ង់

ប្រធានាធិបតី លោក Donald Trump បាននិយាយវាយប្រហារលោក Friedrich Merz របស់ប្រទេសអាល្លឺម៉ង់ ចំពោះការរិះគន់របស់អធិការបតីរូបនេះ ជុំវិញសង្គ្រាមរបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់ ដោយសង្កត់ធ្ងន់ថា ជម្លោះនេះគឺចាំបាច់ដើម្បីការពារទីក្រុងតេអេរ៉ង់ ពីការទទួលបានអាវុធនុយក្លេអ៊ែរ។ការថ្លែងរបស់លោក Trump កាលពីថ្ងៃអង្គារ បានបង្ហាញពីការខកចិត្តដែលលោកបានបង្ហាញជាញឹកញាប់ជាមួយសម្ព័ន្ធមិត្តអឺរ៉ុប និងណាតូ ចំពោះភាពគ្មានឆន្ទះគាំទ្រពេញលេញចំពោះសង្គ្រាម ឬចូលរួមក្នុងសង្គ្រាម។ លោក Trump បានសរសេរនៅក្នុងសារលើបណ្តាញផ្សព្វផ្សាយសង្គមថា «អធិការបតីអាល្លឺម៉ង់ លោក Friedrich Merz គិតថា វាមិនអីនោះទេសម្រាប់ប្រទេសអ៊ីរ៉ង់ក្នុងការមានអាវុធនុយក្លេអ៊ែរ។ លោកTrump និយាយថា លោក Merz មិនដឹងថា លោកកំពុងនិយាយអំពីអ្វីនោះទេ! ប្រសិនបើអ៊ីរ៉ង់មានអាវុធនុយក្លេអ៊ែរ ពិភពលោកទាំងមូលនឹងត្រូវបានចាប់ជាចំណាប់ខ្មាំង»។ «ខ្ញុំកំពុងធ្វើរឿងអ្វីមួយជាមួយអ៊ីរ៉ង់នៅពេលនេះ ដែលប្រទេស ឬប្រធានាធិបតីដទៃទៀត គួរតែធ្វើជាយូរមកហើយ។ទោះបីជាប្រទេសអាល្លឺម៉ង់ជាសម្ព័ន្ធមិត្តដ៏ស្មោះត្រង់បំផុតមួយរបស់សហរដ្ឋអាមេរិក និងអ៊ីស្រាអែល ក៏ដោយ លោក Merz បានវាយតម្លៃដោយត្រង់ៗអំពីសង្គ្រាមលើអ៊ីរ៉ង់ ដោយហៅយុទ្ធនាការយោធានេះថា «មិនបានពិចារណា»។ មេដឹកនាំអាល្លឺម៉ង់រូបនេះ បាននិយាយផងដែរថា ទីក្រុងវ៉ាស៊ីនតោនកំពុងរងភាព «អាម៉ាស់» ដោយតាកទិកចរចារបស់ទីក្រុងតេអេរ៉ង់ ខណៈអ៊ីរ៉ង់បដិសេធមិនបញ្ជូនគណៈប្រតិភូទៅជួបមន្ត្រីអាមេរិក មុនពេលការបិទផ្លូវលើកំពង់ផែរបស់ខ្លួនត្រូវបានដកចេញ។ការរិះគន់របស់លោក Merz បង្ហាញពីការចាកចេញយ៉ាងខ្លាំងក្លារបស់លោកពីគោលនយោបាយគាំទ្រអ៊ីស្រាអែលដែលចូលចិត្តធ្វើសង្គ្រាម។

ខណៈការចរចារវាងអាមេរិក និងអ៊ីរ៉ង់នៅតែជាប់គាំង អ្នកជំនាញបានព្រមានអំពី «ការរំខានរយៈពេលវែង»

ដោយសារតែសង្គ្រាមរបស់សហរដ្ឋអាមេរិកនិងអ៊ីស្រាអែល លើអ៊ីរ៉ង់ បានឈានចូលដល់ថ្ងៃទី៦០ អ្នកជំនាញបានព្រមានថា គ្មានសញ្ញានៃទីបញ្ចប់នៅចំពោះមុខឡើយ ខណៈការចរចាជាបន្ត នៅតែ «ជាប់គាំង» ហើយតម្លៃប្រេង និងអតិផរណា ហក់ឡើងខ្ពស់។សហរដ្ឋអាមេរិក និងអ៊ីស្រាអែល បានចាប់ផ្តើមការវាយប្រហាររបស់ពួកគេទៅលើប្រទេសអ៊ីរ៉ង់នៅថ្ងៃទី ២៨ ខែកុម្ភៈ។ ទីក្រុងតេអេរ៉ង់ បានសងសឹកវិញដោយការបិទច្រកសមុទ្រហ័រមូស ជាច្រកតូចចង្អៀតភ្ជាប់ឈូងសមុទ្រទៅកាន់ឈូងសមុទ្រអូម៉ង់ ដែលតាមរយៈច្រកនេះការនាំចេញប្រេង និងឧស្ម័នប្រហែល២០ភាគរយរបស់ពិភពលោក ឆ្លងកាត់ពីមជ្ឈិមបូព៌ា ជាចម្បងទៅកាន់អាស៊ី និងទៅកាន់អឺរ៉ុប។ កាលពីពេលថ្មីៗនេះ សហរដ្ឋអាមេរិកបានដាក់ការបិទផ្លូវដើម្បីកាត់ផ្តាច់នាវាណាមួយដែលដឹកប្រេងរបស់ប្រទេសអ៊ីរ៉ង់ ហើយនៅទីបំផុតបង្ខំឱ្យប្រទេសនេះបិទផលិតកម្មនៅពេលដែលអស់ស្តុក និងស្វែងរកដំណោះស្រាយ។ ខណៈប្រទេសទាំងពីរជាប់គាំងក្នុងការចរចា តម្លៃប្រេងបានបន្តហក់ឡើង ដោយកាលពីថ្ងៃអង្គារ ប្រេងឆៅ WTI មានតម្លៃ១០០,០៩ដុល្លារ កើនឡើងពី ៦៧,០២ដុល្លារក្នុងមួយបារ៉ែល នៅថ្ងៃមុននៃការវាយប្រហារ ហើយប្រេងឆៅ Brent កំពុងជួញដូរក្នុងតម្លៃ១១១,៨៥ដុល្លារ ដែលបានកើនឡើងពី៧២,៨៧ដុល្លារក្នុងមួយបារ៉ែលនៅថ្ងៃទី២៧ ខែកុម្ភៈ។នៅតាមស្ថានីយប្រេងឥន្ធនៈក្នុងសហរដ្ឋអាមេរិក វាបានប្រែក្លាយតម្លៃកើនឡើងខ្ពស់បំផុតក្នុងរយៈពេលជិតបួនឆ្នាំកន្លងទៅនេះសម្រាប់តម្លៃប្រេងជាមធ្យម។

លោក Trump នឹងដាក់រូបភាពរបស់លោកនៅលើលិខិតឆ្លងដែនរបស់សហរដ្ឋអាមេរិកមួយចំនួន

មន្ត្រីបាននិយាយកាលពីថ្ងៃអង្គារ ទី២៨ ខែមេសា ថា រូបភាពរបស់លោក Donald Trump នឹងលេចឡើងក្នុងពេលឆាប់ៗនេះនៅលើលិខិតឆ្លងដែនរបស់សហរដ្ឋអាមេរិកមួយចំនួន ជាការបំបែកបទដ្ឋានមួយផ្សេងទៀត ខណៈប្រធានាធិបតីបានដាក់ត្រាផ្ទាល់ខ្លួនរបស់លោកនៅលើស្ថាប័នរដ្ឋាភិបាល។ក្រសួងការបរទេស បានបញ្ជាក់ថា ក្រសួងនឹងផ្តល់លិខិតឆ្លងដែនបោះពុម្ពមានកំណត់ ដើម្បីប្រារព្ធខួបលើកទី២៥០ នៃសេចក្តីប្រកាសឯករាជ្យរបស់សហរដ្ឋអាមេរិកនៅឆ្នាំនេះ។ឯកសារនោះរួមមានរូបភាពចំនួនពីរដែលត្រូវបានកំណត់ឱ្យបង្ហាញនៅខាងក្នុងលិខិតឆ្លងដែន មួយជារូបថតផ្លូវការរបស់លោក Trump ដែលត្រូវបានដាក់នៅលើសេចក្តីប្រកាសឯករាជ្យជាមួយហត្ថលេខារបស់លោកជាពណ៌មាសនៅខាងក្រោម។ រូបភាពទីពីរ បង្ហាញពីគំនូរប្រវត្តិសាស្ត្ររបស់បិតាស្ថាបនិករបស់សហរដ្ឋអាមេរិក។អ្នកនាំពាក្យ លោក Tommy Pigott បាននិយាយនៅលើបណ្តាញ X ថា «ខណៈសហរដ្ឋអាមេរិកប្រារព្ធខួបលើកទី២៥០របស់អាមេរិកនៅក្នុងខែកក្កដា ក្រសួងការបរទេសកំពុងរៀបចំចេញលិខិតឆ្លងដែនអាមេរិកដែលរចនាឡើងជាពិសេសមួយចំនួនមានកំណត់ ដើម្បីអបអរដល់ឱកាសជាប្រវត្តិសាស្ត្រ»។វាមិនច្បាស់ភ្លាមៗនោះទេថាតើ អ្នកដាក់ពាក្យសុំលិខិតឆ្លងដែនអាចបដិសេធការបោះពុម្ពពិសេសនេះឬយ៉ាងណា។ មានគំរូមួយចំនួនប៉ុណ្ណោះនៅគ្រប់ទីកន្លែងក្នុងពិភពលោក ដែលមាននៅក្នុងលទ្ធិប្រជាធិបតេយ្យនូវរូបភាពមេដឹកនាំកំពុងកាន់អំណាចលេចឡើងនៅក្នុងលិខិតឆ្លងដែន ដោយប្រទេសភាគច្រើនគាំទ្រការពណ៌នាអំពីរូបភាពប្រវត្តិសាស្ត្រ ឬធម្មជាតិ។

លោក Trump ៖ អ៊ីរ៉ង់បានប្រាប់លោកថា ខ្លួនស្ថិតក្នុង«ស្ថានភាពដួលរលំ»ស្របពេលការចរចាសន្តិភាពជាប់គាំង

លោកប្រធានាធិបតី Donald Trump បាននិយាយថា អ៊ីរ៉ង់បានប្រាប់លោកថា ខ្លួនស្ថិតក្នុង «ស្ថានភាពដួលរលំ» ហើយចង់ឱ្យសហរដ្ឋអាមេរិកបើកច្រកសមុទ្រ Hormuz «ឱ្យបានឆាប់តាមដែលអាចធ្វើទៅបាន» ខណៈពួកគេព្យាយាម «ដោះស្រាយស្ថានភាពការដឹកនាំរបស់ពួកគេ»។លោកពុំបានពន្យល់លម្អិតទេថាសារនោះត្រូវបានបញ្ជូនដោយរបៀបណា ឬអ្នកណាជាអ្នកនិយាយពិតប្រាកដនោះទេ។ ការអត្ថាធិប្បាយរបស់លោក Trump កាលពីថ្ងៃអង្គារ២៨មេសាសប្ដាហ៍នេះ បានកើតឡើងស្របពេលមានរបាយការណ៍ថា លោកមិនពេញចិត្តនឹងសំណើចុងក្រោយរបស់អ៊ីរ៉ង់ក្នុងការបើកច្រកសមុទ្រ Hormuz ឡើងវិញ ជាផែនការមួយដែលត្រូវបានគេនិយាយថា ជាការទាមទារឱ្យសហរដ្ឋអាមេរិកបញ្ចប់ការបិទផ្លូវកំពង់ផែរបស់អ៊ីរ៉ង់នៅក្នុងផ្លូវទឹកនេះ ប៉ុន្តែបានជៀសវាងបញ្ហាទាក់ទងនឹងកម្មវិធីនុយក្លេអ៊ែរ។អ្នកនាំពាក្យសេតវិមានលោកស្រី Olivia Wales បានប្រាប់សារព័ត៌មាន TIME នៅពេលត្រូវបានសួរអំពីសំណើដែលបានរាយការណ៍នោះ ថា ពួកលោកស្រីបានដឹងច្បាស់អំពីខ្សែបន្ទាត់ក្រហមរបស់សហរដ្ឋអាមេរិក ហើយលោកប្រធានាធិបតីនឹងធ្វើកិច្ចព្រមព្រៀងដែលល្អសម្រាប់ប្រជាជនអាមេរិក និងពិភពលោក តែប៉ុណ្ណោះ។រដ្ឋមន្ត្រីការបរទេសលោក Marco Rubio បានច្រានចោលគំនិតណាមួយនៃសំណើដែលមិនផ្តោតលើការសន្ទនាអំពីសមត្ថភាពនុយក្លេអ៊ែររបស់អ៊ីរ៉ង់។ លោកបានប្រាប់សារព័ត៌មាន Fox News កាលពីយប់ថ្ងៃចន្ទដើមសប្ដាហ៍នេះថា គ្មានការសង្ស័យទេនៅក្នុងចិត្តរបស់លោកថា នៅពេលណាមួយនាពេលអនាគត ប្រសិនបើរបបបព្វជិតជ្រុលនិយមនេះនៅតែគ្រប់គ្រងក្នុងប្រទេសអ៊ីរ៉ង់ ពួកគេនឹងសម្រេចចិត្តថាពួកគេចង់បានអាវុធនុយក្លេអ៊ែរ ដោយសង្កត់ធ្ងន់ថា សមត្ថភាពនុយក្លេអ៊ែររបស់អ៊ីរ៉ង់នៅតែជា “បញ្ហាជាមូលដ្ឋាន” ដែល “នៅតែត្រូវបានប្រឈមម៕

មេដឹកនាំឈូសមុទ្រធ្វើដំណើរទៅដល់អារ៉ាប៊ីសាអ៊ូឌីត ដើម្បីពិភាក្សាពីការឆ្លើយតបចំពោះការវាយប្រហាររបស់អ៊ីរ៉ង់

នៅថ្ងៃអង្គារនេះ ក្រុមមេដឹកនាំតំបន់ឈូងសមុទ្របានធ្វើដំណើរទៅដល់ទីក្រុង Jeddah របស់ប្រទេសអារ៉ាប៊ីសាអ៊ូឌីត សម្រាប់កិច្ចប្រជុំពិសេសនៃក្រុមប្រឹក្សាសហប្រតិបត្តិការឈូងសមុទ្រ(GCC) ដែលជាជំនួបដោយផ្ទាល់លើកដំបូង ចាប់តាំងពីរដ្ឋរបស់ពួកគេក្លាយជាជួរមុខនៃសង្រ្គាមអ៊ីរ៉ង់កាលពីរយៈពេល ២ខែមុន ។មន្រ្តីឈូងសមុទ្រដែលសុំមិនបញ្ចេញឈ្មោះនិយាយថា ជំនួបមួយនេះមានគោលបំណងបង្កើតការឆ្លើយតបចំពោះការវាយប្រហារមីស៊ីល និងយានដ្រូនរាប់ពាន់លើករបស់អ៊ីរ៉ង់លើរដ្ឋក្នុងតំបន់ឈូងសមុទ្រ ដែលបានប្រឈម ចាប់តាំងពីសហរដ្ឋអាមេរិក និងអ៊ីស្រាអែល បើកការវាយប្រហាររួមគ្នាលើអ៊ីរ៉ង់កាលពីថ្ងៃទី ២៨ ខែកុម្ភៈ ។សង្រ្គាមមួយនេះ ត្រូវបានគេមើលឃើញហេដ្ឋារចនាសម្ព័ន្ធថាមពលនៅរដ្ឋ GCC ទាំង ៦ រងការខូចខាត ក្នុងនោះរួមមានទាំងហេដ្ឋារចនាសម្ព័ន្ធស៊ីវិល និងក្រុមហ៊ុនមានការជាប់ពាក់ព័ន្ធជាមួយសហរដ្ឋអាមេរិកផងដែរ ហើយទីតាំងយោធា បានក្លាយជាគោលដៅវាយប្រហារដូចគ្នា ។ការវាយប្រហារបានស្ងប់ស្ងាត់ទៅវិញ ចាប់តាំងពីសហរដ្ឋអាមេរិក និងអ៊ីរ៉ង់ឈានដល់បទឈប់បាញ់កាលពីថ្ងៃទី ៨ ខែមេសា បើទោះបីជារដ្ឋធានីក្នុងតំបន់ឈូងសមុទ្រ នៅព្រួយបារម្ភថា ជម្លោះនឹងចាប់ផ្តើមឡើងវិញក៏ដោយ ក្នុងនោះកិច្ចពិភាក្សាសហរដ្ឋអាមេរិក-អ៊ីរ៉ង់ សម្រាប់កិច្ចព្រមព្រៀងបញ្ចប់សង្រ្គាមអចិន្រ្តៃយ៍ មកទល់នឹងពេលនេះ នៅមិនទាន់អាចសន្និដ្ឋានបាននៅឡើយនោះទេ ៕

ប្រធានាធិបតីអេស្តូនី៖ «អឺរ៉ុបត្រូវតែត្រៀមខ្លួន» សម្រាប់គ្រាប់សេណារីយ៉ូ នៅក្នុងសង្គ្រាមអ៊ុយក្រែន

នៅថ្ងៃអង្គារ (ទី២៨ ខែមេសា ឆ្នាំ២០២៦) នេះ ក្នុងអំឡុងពេលមានទស្សនកិច្ចរដ្ឋ នៅប្រទេសហ្វាំងឡង់ ប្រធានាធិបតីអេស្តូនី បានលើកឡើងថា អឺរ៉ុបត្រូវតែត្រៀមខ្លួន សម្រាប់សេណារីយ៉ូដែលអាចកើតមានទាំងអស់ ទាក់ទងនឹងសង្គ្រាម នៅអ៊ុយក្រែន ។នៅក្នុងសន្និសីទសារព័ត៌មានរួមគ្នាជាមួយប្រធានាធិបតីហ្វាំងឡង់ លោក Alexander Stubb មេដឹកនាំអេស្តូនី លោក Alar Karis បាននិយាយថា៖ «អឺរ៉ុបត្រូវតែត្រៀមខ្លួន សម្រាប់រាល់ការវិវត្ត នៅក្នុងដំណើរការសន្តិភាពអ៊ុយក្រែន»។លោកបានបញ្ជាក់ថា អឺរ៉ុបត្រូវតែមានវត្តមាននៅក្នុងកិច្ចពិភាក្សាទាំងអស់ ពាក់ព័ន្ធនឹងសន្តិសុខរបស់ខ្លួន ហើយគួរតែចូលរួមដោយមានគោលជំហរដ៏រឹងមាំមួយ ដើម្បីរួមចំណែកដល់សន្តិភាព ប្រកបដោយភាពយុត្តិធម៌ និងយូរអង្វែង នៅអ៊ុយក្រែន។លោក Karis បានលើកឡើងទៀតថា មិនមានវឌ្ឍនភាពជាក់ស្តែងណាមួយ នៅក្នុងកិច្ចប្រឹងប្រែងសន្តិភាពដែលមានគោលបំណងបញ្ចប់សង្គ្រាមរបស់រុស្ស៊ី នៅអ៊ុយក្រែននោះទេ ដោយបន្ថែមថា ស្ថានភាពនេះតម្រូវឲ្យមានការយកចិត្តទុកដាក់ជាបន្តបន្ទាប់ពីបណ្តាប្រទេសនៅអឺរ៉ុប។លោកបានសង្កត់ធ្ងន់ថា ជម្លោះនៅតែជាចំណុចសំខាន់នៃសន្តិសុខអឺរ៉ុប ហើយការគាំទ្រ ចំពោះអ៊ុយក្រែនគួរតែនៅតែរឹងមាំ ទោះបីជាមានសភាពការណ៍វិវត្តន៍សកលផ្សេងទៀតក៏ដោយ។លោកប្រធានាធិបតីអេស្តូនីរូបនេះ ក៏បានបញ្ជាក់ផងដែរពីសារៈសំខាន់នៃកិច្ចសហប្រតិបត្តិការ ក្នុងតំបន់កាន់តែជិតស្និទ្ធ ជុំវិញបញ្ហាសន្តិសុខ និងការពារជាតិ ជាពិសេសក្នុងចំណោមប្រទេសអឺរ៉ុបខាងជើង និងបាល់ទិក៕

យោធាអ៊ីស្រាអែលចេញការព្រមានជម្លៀស សម្រាប់តំបន់ភាគខាងត្បូងលីបង់

យោធាអ៊ីស្រាអែល នៅថ្ងៃអង្គារ (ទី២៨ ខែមេសា ឆ្នាំ២០២៦) នេះ បានព្រមានឲ្យជម្លៀសចេញជាបន្ទាន់ សម្រាប់ប្រជាជននៅក្នុងភូមិ និងទីប្រជុំជនជាង ១០កន្លែង នៅភាគខាងត្បូងនៃប្រទេសលីបង់ ហើយឲ្យធ្វើដំណើរឆ្ពោះទៅទិសខាងជើង ដោយបញ្ជាក់ថា ខ្លួននឹងឆ្លើយតបទៅនឹង «ការរំលោភលើបទឈប់បាញ់» របស់ក្រុមហេសបូឡា នៅទីនោះ។អ្នកនាំពាក្យភាសាអារ៉ាប់ លោក Avichay Adraee បានបង្ហោះនៅលើបណ្ដាញសង្គម X ថា យោធា «មិនមានបំណងបង្កគ្រោះថ្នាក់ដល់អ្នកទេ ហើយដោយសារការក្ដីបារម្ភ អំពីសុវត្ថិភាពរបស់អ្នក អ្នកត្រូវបានតម្រូវឲ្យជម្លៀសចេញពីផ្ទះរសម្បែងបស់អ្នកជាបន្ទាន់ ហើយផ្លាស់ចេញពីតំបន់ជាក់លាក់មួយ ឆ្ពោះទៅកាន់តំបន់ Sidon»។លោកបានបន្ថែមថា «អ្នកណាដែលមានវត្តមាននៅជិតអង្គភាពរបស់ក្រុមហេសបូឡា ទីតាំង ឬអាវុធរបស់ពួកគេ កំពុងស្ថិតនៅក្នុងគ្រោះថ្នាក់»។តំបន់ទាំងអស់ដែលត្រូវបានលើកឡើង ហាក់ដូចជានៅខាងក្រៅ ឬនៅលើព្រំដែននៃអ្វីដែលហៅថា «ខ្សែព្រំដែនពណ៌លឿង» ជាដែនដីដ៏តូចរបស់លីបង់ដែលមានប្រវែងប្រហែល ១០គីឡូម៉ែត្រ តាមបណ្តោយព្រំដែនដែលកងទ័ពអ៊ីស្រាអែលកំពុងធ្វើប្រតិបត្តិការ។អ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ បានចោទគ្នាទៅវិញទៅមក ជុំវិញការរំលោភលើបទឈប់បាញ់ដ៏ផុយស្រួយ នៅក្នុងប្រទេសលីបង់ ដែលបានព្រមព្រៀងគ្នាកាលពីដើមខែនេះ ហើយការវាយប្រហារដោយភាគីទាំង២ នៅតែបន្តមាន៕

ស៊ុយអែតព្រមានអំពីលទ្ធភាពដែលអាចខ្វះខាតប្រេងឥន្ធនៈយន្តហោះ ដោយសារសង្គ្រាមមជ្ឈិមបូព៌ា

រដ្ឋាភិបាលស៊ុយអែត បានព្រមាននៅថ្ងៃអង្គារ (ទី២៨ ខែមេសា ឆ្នាំ២០២៦) នេះថា កង្វះខាតប្រេងឥន្ធនៈយន្តហោះ អាចកើតមាននៅក្នុងប្រទេសនៃអនុតំបន់អឺរ៉ុបខាងជើងមួយនេះ ដោយសារតែការរំខានដល់ការផ្គត់ផ្គង់ ដែលបណ្តាលមកពីសង្គ្រាមមជ្ឈិមបូព៌ា និងការបិទច្រកសមុទ្រ Hormuz។រដ្ឋមន្ត្រីក្រសួងថាមពល លោកស្រី Ebba Busch បានថ្លែងនៅក្នុងសន្និសីទសារព័ត៌មានមួយថា៖ «យើងចង់ផ្តល់ការព្រមានជាមុនថា មានហានិភ័យដែលនាំឲ្យខ្វះខាតប្រេងឥន្ធនៈយន្តហោះ។ នេះគឺផ្អែកលើការវាយតម្លៃរបស់ទីភ្នាក់ងារថាមពលស៊ុយអែត»។ដោយថ្លែងរួមជាមួយនាយករដ្ឋមន្ត្រី លោក Ulf Kristersson និងនាយកទីភ្នាក់ងារថាមពល លោកស្រី Caroline Asserup លោកស្រី Busch បានបញ្ជាក់ថា៖ «ទោះបីជាកិច្ចព្រមព្រៀងសន្តិភាពយូរអង្វែង (រវាងសហរដ្ឋអាមេរិក និងអ៊ីរ៉ង់) នឹងត្រូវអនុវត្តនៅថ្ងៃស្អែកក៏ដោយ ក៏វាទំនងជានៅតែត្រូវការពេលវេលាមុនពេលការផ្គត់ផ្គង់ប្រេង និងឧស្ម័នត្រូវបានស្តារឡើងវិញ»។គួរបញ្ជាក់ថា បច្ចុប្បន្ននេះ មិនមានការខ្វះខាតប្រេងឥន្ធនៈយន្តហោះជាប្រព័ន្ធនោះទេ នៅសហភាពអឺរ៉ុប។ ប៉ុន្តែក្ដីបារម្ភកំពុងកើនឡើង ខណៈដែល ២០ភាគរយនៃប្រេងឥន្ធនៈយន្តហោះដែលប្រើប្រាស់ដោយសហភាពអឺរ៉ុប ជាធម្មតាឆ្លងកាត់ច្រកសមុទ្រ Hormuz៕

អារ៉ាប់រួម ចាកចេញពី OPEC និង OPEC+ ជាផលប៉ះពាល់យ៉ាងខ្លាំងដល់ក្រុមផលិតប្រេងសកល

ប្រទេសអេមីរ៉ាតអារ៉ាប់រួម (អារ៉ាប់រួម) បានឲ្យដឹងនៅថ្ងៃអង្គារ (ទី២៨ ខែមេសា ឆ្នាំ២០២៦) នេះថា ខ្លួនបានចាកចេញពី OPEC និង OPEC+ ជាការសម្រេចដែលផ្ដល់ផលប៉ះពាល់យ៉ាងធ្ងន់ធ្ងរដល់ក្រុមនាំចេញប្រេង និងមេដឹកនាំជាក់ស្តែងរបស់ប្លុកទាំង២ គឺអារ៉ាប៊ីសាអ៊ូឌីត នៅពេលដែលសង្គ្រាមអ៊ីរ៉ង់ បានបង្កឲ្យមានការរំខានភ្លាមៗជាប្រវត្តិសាស្ត្រដល់ថាមពល និងធ្វើឲ្យសេដ្ឋកិច្ចពិភពលោកមិនមានស្ថិរភាព។ការបាត់បង់អារ៉ាប់រួមដ៏គួរឲ្យភ្ញាក់ផ្អើលនេះ ដែលជាសមាជិកយូរអង្វែងរបស់ OPEC អាចបង្កើតឲ្យមានភាពច្របូកច្របល់ និងធ្វើឲ្យក្រុមនេះចុះខ្សោយ ដែលជាធម្មតាបានប្រឹងប្រែងបង្ហាញការរួបរួមគ្នា ទោះបីជាមានការខ្វែងគំនិតផ្ទៃក្នុង លើបញ្ហាជាច្រើន រាប់ចាប់ពីភូមិសាស្ត្រនយោបាយ រហូតដល់កូតាផលិតកម្មក៏ដោយ។ក្រុមផលិតរដ្ឋឈូងសមុទ្ររបស់ OPEC បាននិងកំពុងជួបការលំបាក ក្នុងការដឹកជញ្ជូនទំនិញនាំចេញឆ្លងកាត់ច្រកសមុទ្រ Hormuz ដែលជាផ្លូវដ៏តូចចង្អៀតមួយ នៅចន្លោះអ៊ីរ៉ង់ និងអូម៉ង់ ជាទីដែលប្រេងឆៅ និងឧស្ម័នធម្មជាតិរាវ ១ភាគ៥ របស់ពិភពលោក ជាធម្មតាឆ្លងកាត់ ដោយសារតែការគំរាមកំហែង និងការវាយប្រហាររបស់អ៊ីរ៉ង់ លើនាវានានា។ប៉ុន្តែការចាកចេញរបសើអារ៉ាប់រួម ពី OPEC តំណាងឲ្យជ័យជម្នះដ៏ធំមួយ សម្រាប់ប្រធានាធិបតីអាមេរិក លោក Donald Trump ដែលបានចោទប្រកាន់អង្គការនេះថា «យកប្រៀបលើប្រទេសផ្សេងៗ» ដោយការដំឡើងតម្លៃប្រេងហួសពីការពិត។ចំណាត់ការដកខ្លួននេះ បានកើតឡើងបន្ទាប់ពីអារ៉ាប់រួមដែលជាមជ្ឈមណ្ឌលពាណិជ្ជកម្ម ក្នុងតំបន់ និងជាសម្ព័ន្ធមិត្តដ៏សំខាន់បំផុតមួយរបស់ទីក្រុងវ៉ាស៊ីនតោន បានរិះគន់រដ្ឋអារ៉ាប់ថា មិនបានធ្វើគ្រប់គ្រាន់ ដើម្បីការពារវាពីការវាយប្រហារជាច្រើនរបស់អ៊ីរ៉ង់ អំឡុងសង្គ្រាម។ ទីប្រឹក្សាការទូតរបស់ប្រធានាធិបតីអារ៉ាប់រួម លោក Anwar Gargash បានរិះគន់ការឆ្លើយតបរបស់រដ្ឋអារ៉ាប់ និងឈូងសមុទ្រ ចំពោះការវាយប្រហាររបស់អ៊ីរ៉ង់ នៅក្នុងវគ្គមួយ នៅឯវេទិការដ្ឋមានឥទ្ធិពលឈូងសមុទ្រ កាលពីថ្ងៃចន្ទ៕

ក្រុមហ៊ុននីហ្សេរីយ៉ាផលិតយានបើកដោយខ្លួនឯង ដើម្បីការពារហេដ្ឋារចនាសម្ព័ន្ធអាហ្វ្រិក

ក្រុមហ៊ុនបច្ចេកវិទ្យាការពារជាតិ Terra Industries របស់នីហ្សេរីយ៉ា បានបញ្ចេញប្រព័ន្ធការពារជាតិគ្រប់គ្រងដោយខ្លួនឯង រួមទាំងយានដ្រូនស្ទាក់ចាប់ យានបោសសម្អាតគ្រាប់មីន និងកម្មវិធីចារកម្មសមរភូមិ នៅក្នុងការបង្ហាញមួយមានការចូលរួមពីក្រុមន្រ្តីយោធាជាន់ខ្ពស់ និងក្រុមតំណាងរដ្ឋាភិបាល ។ លោក Nathan Nwachuku គឺជាសហស្ថាបនិកបង្កើតក្រុមហ៊ុន Terra Industries បាននិយាយថា ថ្ងៃនេះពួកយើងបង្ហាញប្រព័ន្ធការពារជាតិថ្មីៗរបស់ខ្លួន ដូចជា យានដ្រូនស្ទាក់ចាប់ ឧបករណ៍បោសសម្អាតគ្រាប់មីន យានដែលអាចរកឃើញឧបករណ៍បំផ្ទុះកែច្នៃនៅលើដី និងកម្មវិធីស៊ើបការណ៍សម្ងាត់នៅសមរភូមិរបស់ពួកយើង ដែលនឹងអាចដំណើរការដោយស្វ័យប្រវត្តិកម្មវិធីរៀបផែនការ និងសម្របសម្រួលយោធា ។ លោកបន្តថា ពួកយើងបង្ហាញផងដែរ ពីការត្រៀមខ្លួនសម្រាប់ប្រតិបត្តិការនៅសមរភូមិ និងការដាក់ពង្រាយជាក់ស្តែងនៅសមរភូមិ ។ សូមបញ្ជាក់ថា ក្រុមហ៊ុន Terra Industries បានចុះហត្ថលេខាលើកិច្ចព្រមព្រៀងវិនិយោគរួមគ្នាជាមួយសាជីវកម្មឧស្សាហកម្មការពារជាតិ (DICON) គ្រប់គ្រងដោយរដ្ឋនីហ្សេរីយ៉ា កាលពីខែកុម្ភៈ។ លោក Babatunde Ayala គឺជាអគ្គនាយកសាជីវកម្ម DICON បាននិយាយថា កិច្ចសហការគឺចាំបាច់ ។បច្ចុប្បន្នក្រុមហ៊ុន Terra Industries ការពារមូលដ្ឋានហេដ្ឋារចនាសម្ព័ន្ធមានតម្លៃប្រហែល ១១ ពាន់លានដុល្លារនៅទូទាំងទ្វីបអាហ្វ្រិក ។ ក្រុមហ៊ុនអាយុកាល ២ឆ្នាំដែលបង្កកើតរួមគ្នាដោយសហស្ថាបនិក Nathan អាយុ ២២ឆ្នាំ និងសហស្ថាបនិក Maxwell Maduka អាយុ ២៤ឆ្នាំនេះ រកប្រាក់បាន ៣៤លានដុល្លារនៅដើមឆ្នាំនេះ ពីក្រុមហ៊ុនវិនិយោគជាច្រើន រួមទាំងក្រុមហ៊ុន Lux Capital និងក្រុមហ៊ុន 8VC ៕

បណ្ដាញសង្គម

ព័ត៌មានថ្មីៗ

ទេសរដ្ឋមន្រ្តី គន់ គីម អញ្ជើញចុះសួរទុក្ខប្រជាពលរដ្ឋភៀសសឹកស្នាក់នៅផ្ទះបណ្តោះអាសន្ន ក្នុងខេត្តព្រះវិហារ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877