BTV NEWS

បច្ចេកវិទ្យា EV ដ៏ទំនើបរបស់ចិន កំពុងតែផ្លាស់ប្តូរការរចនាបែបបថនៃរថយន្តសកល

អ៊ីស្រាអែលបានសម្លាប់មនុស្ស ៣៥ នាក់ក្នុងការវាយប្រហារនៅយេម៉ែនមួយថ្ងៃបន្ទាប់ពីការទម្លាក់គ្រាប់បែកលើរដ្ឋធានី Doha របស់កាតា

អ្នកកាន់ទុក្ខប្រមូលផ្តុំគ្នានៅវិមានCapitol រដ្ឋ Utah គោរពវិញ្ញាណក្ខន្ធមនុស្សជំនិតរបស់លោក Trumpដែលត្រូវបានបាញ់សម្លាប់

នគរបាលអាមេរិក តាមប្រម៉ាញ់ខ្មាន់កាំភ្លើង ក្រោយមន្រ្តីជំនិតរបស់លោក Trump ត្រូវបានបាញ់សម្លាប់

ព័ត៌មានអន្តរជាតិ

ការដេញដោលតាមទូរទស្សន៍ ធ្វើឲ្យការប្រជែងតំណែងប្រធានាធិបតីកូរ៉េខាងត្បូងកាន់តែស្វិតស្វាញ

បេក្ខជនប្រធានាធិបតីកូរ៉េខាងត្បូង លោក Lee Jae-myung បានមើលឃើញការនាំមុខរបស់លោកនៅក្នុងយុទ្ធនាការបោះឆ្នោតធ្លាក់មកនៅក្នុងកម្រិតដ៏ស្ដួចស្ដើងយ៉ាងឆាប់រហ័ស អំឡុងការស្ទង់មតិចុងក្រោយបង្អស់ដែលត្រូវបានចេញផ្សាយ នៅថ្ងៃសុក្រ (ទី២៣ ខែឧសភា) នេះ ខណៈដែលលោក Kim Moon-soo របស់គណបក្សអភិរក្សនិយម បានឡើងប្រជាប្រិយភាព បន្ទាប់ពីមានការជជែកដេញដោលតាមទូរទស្សន៍ជាលើកដំបូងរបស់ពួកលោក។បេក្ខជនរបស់បក្សប្រឆាំង គឺគណបក្សប្រជាធិបតេយ្យ (DP) លោក Lee មានការគាំទ្រប្រហែល ៤៥ភាគរយ នៅក្នុងការស្ទង់មតិរបស់ក្រុមហ៊ុនស្រាវជ្រាវ Gallup Korea ដែលត្រូវបានធ្វើឡើងពីថ្ងៃទី២០ ខែឧសភា ដល់ថ្ងៃទី២២ ខែឧសភា ដោយបានធ្លាក់ចុះ ៦ភាគរយ ធៀបនឹងសប្តាហ៍មុន។ ចំណែកសំឡេងគាំទ្រ ចំពោះលោក Kim របស់បក្សកាន់អំណាច គឺគណបក្សអំណាចប្រជាជន (PPP) បានឡើងដល់ ៣៦ភាគរយ ពោលគឺកើនចំនួន ៧ភាគរយ។ បើទោះបីជាលទ្ធផលនោះ នៅតែបានបង្ហាញថា លោក Lee មានប្រៀបក៏ដោយ ក៏លោក Kim អាចមានឱកាសទៅកាន់តែកៀកនឹងគូប្រជែងរបស់ខ្លួនបានដែរ ប្រសិនបើលោកអាចបញ្ចុះបញ្ចូលលោក Lee Jun-seok របស់គណបក្សកំណែទម្រង់ (RP) ឲ្យដកខ្លួនចេញពីការប្រកួតប្រជែង ហើយរូបលោកអាចប្រមូលបានសំឡេងគាំទ្រភាគច្រើនរបស់បេក្ខជនរូបនេះ។ការស្ទង់មតិនេះ កើតមានឡើងបន្ទាប់ពីគូប្រកួតប្រជែង បានឡើងតទល់គ្នានៅក្នុងកម្មវិធីជជែកដេញដោលតាមកញ្ចក់ទូរទស្សន៍ជាលើកដំបូង កាលពីថ្ងៃទី១៨ ខែឧសភា។ ការស្ទង់មតិ ក៏បានឲ្យដឹងផងដែរថា មនុស្សកាន់តែច្រើន កំពុងបង្ហាញនូវការជ្រើសរើសរបស់ពួកគេ នៅពេលដែលការបោះឆ្នោតកាន់តែជិតមកដល់ ដោយចំនួននៃអ្នកបោះឆ្នោតមិនទាន់សម្រេចចិត្ត បានធ្លាក់ចុះដល់កម្រិតដែលត្រូវបានគេមើលឃើញនៅមុនការបោះឆ្នោតប្រធានាធិបតីចុងក្រោយ។ ការជជែកដេញដោលតាមកញ្ចក់ទូរទស្សន៍លើកទី២ ត្រូវគ្រោងធ្វើនៅល្ងាចថ្ងៃទី២៣ ខែឧសភានេះ។ ប្រជាជនកូរ៉េខាងត្បូង នឹងទៅបោះឆ្នោតនៅថ្ងៃទី៣ ខែមិថុនា ដើម្បីជ្រើសរើសមេដឹកនាំថ្មី បន្ទាប់ពីមានអស្ថិរភាពនយោបាយរយៈពេល ៦ខែ ដែលបង្កឡើងដោយការប្រកាសច្បាប់អាជ្ញាសឹករបស់អតីតប្រធានាធិបតី លោក Yoon Suk Yeol៕

កងទ័ពអ៊ុយក្រែនធ្វើការវាយប្រហារទ្រង់ទ្រាយធំលើទីក្រុង Lgov បានបណ្តាលឲ្យមនុស្សជាង ១០នាក់ រងរបួស

អភិបាលតំបន់ស្តីទីលោក Alexander Khinshtein បានសរសេរនៅលើបណ្តាញសង្គម Telegram ថា មនុស្ស ១២នាក់ ក្នុងនោះមានក្មេងជំទង់ពីរនាក់ បានរងរបួស នៅពេលដែលកងកម្លាំងប្រដាប់អាវុធអ៊ុយក្រែន បានធ្វើការវាយប្រហារទ្រង់ទ្រាយមួយ លើទីក្រុង Lgov ក្នុងតំបន់ឃើស (Kursk)។លោកបានសរសេរថា៖«កងកម្លាំងប្រដាប់អាវុធនៃប្រទេសអ៊ុយក្រែន បានធ្វើការវាយប្រហារដ៏ធំមួយ លើទីក្រុង Lgov ។ ការវាយប្រហារនេះ បានកំណត់គោលដៅលើផ្លូវហាយវេ Kursk-Rylsk នៅប្រទល់ទីក្រុងនេះ។ ជាអកុសល ជនស៊ីវិល ១២នាក់ បានរងរបួស ក្នុងនោះមានក្មេងជំទង់ពីរនាក់ ដែលមានអាយុ ១៣ និង ១៦ឆ្នាំ»។ក្មេងអាយុ ១៣ឆ្នាំ បានរងរបួសខ្នងផ្នែកខាងក្រោម។ ក្មេងប្រុសអាយុ ១៦ឆ្នាំ បានរងរបួសក្បាល និង ស្មាខាងឆ្វេង។ជនរងគ្រោះផ្សេទៀត មានស្រី ៧នាក់ ប្រុស៣នាក់ រងរបួសនិងមានស្នាមជាំ។ របួសរបស់ពួកគេ មិនមានគ្រោះថ្នាក់ដល់អាយុជីវិតឡើយ។ រថយន្ត ៤គ្រឿង អគារផ្ទះល្វែងមួយ និងផ្ទះ ២ខ្នង ត្រូវរងការខូចខាត ។ ការជួសជុល នឹងចាប់ផ្តើមភ្លាមៗ នៅពេលលស្ថានភាព ប្រសើរឡើង។

ទីក្រុងព្យុងយ៉ាងរិះគន់កិច្ចប្រជុំមហាសន្និបាតUNស្តីពីសិទ្ធិមនុស្ស នៅកូរ៉េខាងជើងថា ជាការបង្កហេតុ

កូរ៉េខាងជើងនៅថ្ងៃសុក្រនេះ បានរិះគន់កិច្ចប្រជុំជាន់ខ្ពស់របស់អង្គការសហប្រជាជាតិស្តីពីស្ថានភាពសិទ្ធិមនុស្សរបស់ប្រទេសនេះថា ជា «ការបង្កហេតុនយោបាយ» ដោយប្តេជ្ញាថានឹងមិនមើលរំលងយុទ្ធនាការលាបពណ៌បែបនេះដោយ «កងកម្លាំងអរិភាព»។សមាគមសម្រាប់ការសិក្សាសិទ្ធិមនុស្សរបស់ប្រទេសកូរ៉េខាងជើង បានចេញការរិះគន់ដែលបានទទួលដោយទីភ្នាក់ងារព័ត៌មានមជ្ឈិមកូរ៉េ (KCNA) ទាក់ទងនឹងសម័យប្រជុំមហាសន្និបាតជាន់ខ្ពស់របស់អង្គការសហប្រជាជាតិលើកដំបូង ដែលបានកោះប្រជុំកាលពីថ្ងៃអង្គារ ដើម្បីដោះស្រាយការរំលោភសិទ្ធិមនុស្សរបស់ប្រទេសកូរ៉េខាងជើង។ក្នុងជំនួបនោះ អ្នករត់ភៀសខ្លួនកូរ៉េខាងជើង សកម្មជន និងអ្នកផ្សេងទៀត បានអំពាវនាវឲ្យ មានសកម្មភាពអន្តរជាតិ ដើម្បីកែលម្អស្ថានភាពសិទ្ធិមនុស្ស នៅក្នុងប្រទេសកូរ៉េខាងជើង ដោយមានអ្នករត់ចោលស្រុកពីរនាក់ពីប្រទេសនេះ ចែករំលែកព័ត៌មានផ្ទៃក្នុងអំពីបញ្ហានេះ។សមាគមនេះ បានចោទប្រកាន់ទីក្រុងវ៉ាស៊ីនតោន ទីក្រុងសេអ៊ូល និងប្រទេសដទៃទៀតជុំវិញ «ការបង្កហេតុនយោបាយយ៉ាងសាហាវយង់ឃ្នង»សម្រាប់ការរើសអើងលើស្ថានភាពសិទ្ធិមនុស្ស នៅក្នុងប្រទេសកូរ៉េខាងជើង ដោយបានរិះគន់កិច្ចប្រជុំនេះថា ជាការបំពានធម្មនុញ្ញអង្គការសហប្រជាជាតិ និងច្បាប់អន្តរជាតិ ដែលគោរពអធិបតេយ្យភាព និងការមិនជ្រៀតជ្រែកក្នុងកិច្ចការផ្ទៃក្នុង។ក្រុមនេះបានអះអាងថា៖«អង្គការសហប្រជាជាតិមិនដែលត្រូវបានប្រើប្រាស់ដោយបើកចំហជាវេទិកាសម្រាប់ការប្រឈមមុខដាក់គ្នា ផែនការ និងការប្រឌិតរឿង ដោយកងកម្លាំងជាក់លាក់ ដែលស្វែងរកការផ្តួលរំលំប្រព័ន្ធនៃរដ្ឋអធិបតេយ្យដូចសព្វថ្ងៃនេះទេ»។

លោក Trump ទើបដឹងថា សង្គ្រាមនៅអ៊ុយក្រែន ប្រហែលជាស្មុគស្មាញខ្លាំងពេកហើយក្នុងការដោះស្រាយ

បន្ទាប់ពីការពិភាក្សាតាមទូរសព្ទអស់ ២ម៉ោង ជាមួយលោកប្រធានាធីបតីរុស្ស៊ី Vladimir Putin កាលពីថ្ងៃចន្ទសប្ដាហ៍នេះ ប្រធានាធិបតីអាមេរិក លោក Donald Trump បានធ្វើការសារភាពដ៏មិនធម្មតាមួយថា មានតែរុស្ស៊ី និងអ៊ុយក្រែនប៉ុណ្ណោះ ដែលគួរចូលរួមក្នុងកិច្ចពិភាក្សាបញ្ចប់សង្រ្គាមរវាងភាគីទាំងពីរ ដោយលោកបានសរសេរលើបណ្តាញសង្គមថា "ដោយសារមានតែរុស្ស៊ី និងអ៊ុយក្រែនទេ ដែលដឹងពីសេចក្ដីលម្អិតនៃការចរចាដែលពុំមាននរណាម្នាក់អាចនឹងដឹង"។ការទទួលស្គាល់ពីកម្រិតពិបាកក្នុងការដោះស្រាយសង្គ្រាមនៅអ៊ុយក្រែននេះ ហាក់ដូចជាខុសពីចរិតលក្ខណៈរបស់លោក Trump ដោយសារប្រធានាធិបតីអាមេរិករូបនេះ តែងតែអះអាងថា លោកដឹងរឿងច្រើនជាងអ្នកដ៏ទៃពីបញ្ហាជាច្រើន ហើយនោះប្រហែលជាបានកំណត់ដំណើរការសន្តិភាពទៅលើផ្លូវថ្មីដែលកាន់តែមិនប្រាកដប្រជា។តាមទស្សនៈរបស់លោក Putin ចន្លោះប្រហោងនៅក្នុងរឿងដែលលោក Trump បានដឹងអំពីសង្គ្រាមដ៏បង្ហូរឈាមនេះ តែងតែផ្តល់អត្ថប្រយោជន៍ដល់ទីក្រុងមូស្គូ។ យុទ្ធសាស្ត្រចរចាដ៏ពេញនិយមមួយរបស់មេដឹកនាំរុស្ស៊ីរូបនេះគឺការគ្របអ្នកប្រាស្រ័យទាក់ទងរបស់លោកជាមួយនឹងទ្រឹស្ដីប្រវត្តិសាស្ត្រ និងការពិតដែលបានជ្រើសរើសរួចដើម្បីគាំទ្រទស្សនៈជាក់លាក់មួយ។មន្ត្រីអ៊ុយក្រែន និងសម្ព័ន្ធមិត្តអឺរ៉ុប តែងព្យាយាមត្រៀមលោក Trump សម្រាប់ការសន្ទនាបែបនេះជាមួយលោក Putin ដោយបានផ្តល់ទស្សនៈផ្ទាល់ខ្លួនរបស់ពួកគេលើភាពស្មុគស្មាញខ្លាំងនៃសង្រ្គាម និងប្រវត្តិសាស្រ្តរបស់ជម្លោះ ប៉ុន្តែជារឿយៗមិនជោគជ័យទេ ដោយសារការមិនសូវយល់ពីសង្រ្គាមអ៊ុយក្រែន នៅក្នុងរដ្ឋបាលលោក Trump។ដើម្បីព្យាយាមពង្រីកការឈ្វេងយល់របស់លោក Trump អំពីអ៊ុយក្រែន ប្រធានាធិបតីអ៊ុយក្រែន លោក Volodymyr Zelenskiy ម្តងហើយម្តងទៀត បានលើកទឹកចិត្តលោក និងក្រុមមន្រ្តីជាន់ខ្ពស់របស់លោក ឱ្យទៅទស្សនកិច្ចប្រទេសនេះ និងធ្វើជាសាក្សីនៃសង្គ្រាមដោយផ្ទាល់ ប៉ុន្តែពុំមាននរណាម្នាក់យល់ព្រមចូលរួមជាមួយលោក Zelenskiy ក្នុងការធ្វើដំណើរដ៏ញឹកញាប់របស់លោកក្នុងតំបន់សង្រ្គាមឡើយ៕

បេសកជន៖ រុស្ស៊ីអំពាវនាវឲ្យមានការស៊ើបអង្កេតលើរបាយការណ៍របស់UN ស្តីពីស្ថានភាពនៅអ៊ុយក្រែន

តំណាងអចិន្ត្រៃយ៍រុស្ស៊ីប្រចាំអង្គការសហប្រជាជាតិលោក Vasily Nebenzya បានប្រកាសថា ការពណ៌នាមិនពិតអំពីស្ថានភាពជុំវិញអ៊ុយក្រែន នៅក្នុងរបាយការណ៍របស់អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) ស្តីពីការការពារជនស៊ីវិល ក្នុងជម្លោះប្រដាប់អាវុធ ធានាឲ្យមានការស៊ើបអង្កេតជាផ្លូវការ នៅអង្គការពិភពលោកនេះ។បេសកជនរូបនេះ បាននិយាយនៅក្នុងកិច្ចប្រជុំក្រុមប្រឹក្សាសន្តិសុខថា៖«របាយការណ៍របស់លោកអគ្គលេខាធិការដែលងត្រូវរៀបចំសម្រាប់កិច្ចប្រជុំរបស់យើង នៅក្នុងផ្នែកដែលទាក់ទងនឹងអ៊ុយក្រែន លើឡើងអំពីចំនួនជនស៊ីវិលរុស្ស៊ី ដែលរងផលប៉ះពាល់ដោយជម្លោះតែម្តងប៉ុណ្ណោះ ទាក់ទងនឹងជនភៀសខ្លួន។ យ៉ាងណាក៏ដោយ វាមិនបញ្ជាក់ថា ការលើកឡើងនេះ សំដៅទៅលើការប្រើប្រាស់ជនស៊ីវិលរាប់រយនាក់ ដែលត្រូវបានចាប់ពង្រត់ដោយទាហានអ៊ុយក្រែន នៅក្នុងតំបន់ Kursk ជាចំណាប់ខ្មាំងនោះទេ។លោកបានបន្ថែមថា៖«ផ្ទុយទៅវិញ របាយការណ៍នេះ បានលើកឡើងពីការវាយប្រហារចំនួន ៣០០លើក លើហេដ្ឋារចនាសម្ព័ន្ធថាមពលរបស់ប្រទេសអ៊ុយក្រែន។ របាយការណ៍ បានខកខានក្នុងការនិយាយថា ទាំងនេះ គឺជាទីតាំងហេដ្ឋារចនាសម្ព័ន្ធ ដែលគាំទ្រគោលបំណងយោធា។ លើសពីនេះទៅទៀត តួរលេខរបស់ភាគីអ៊ុយក្រែន គឺគ្រាន់តែជាការជឿជាក់ប៉ុណ្ណោះ។ របាយការណ៍នេះ ថែមទាំងសំដៅទៅលើការចម្លងដែលមិនអាចទទួលយកបាននៃរឿងមិនពិតរបស់លោកខាងលិចអំពីកុមារ ដែលត្រូវបានបំបែកចេញពីឪពុកម្តាយរបស់ពួកគេ និងត្រូវបានជម្លៀសដោយបង្ខំ ដោយគ្មានព័ត៌មានជាក់លាក់ ឬព័ត៌មានជំនួយ។

ក្រុមប្រទេស G7 គំរាមដាក់ទណ្ឌកម្មកាន់តែតឹងរ៉ឹងប្រឆាំងនឹងរុស្ស៊ី ប្រសិនបើប្រទេសនេះ បន្តអរិភាព នៅអ៊ុយក្រែន

ក្រុមប្រទេស G7 បានព្រមានថា ពួកគេនឹងរឹតបន្តឹងទណ្ឌកម្មប្រឆាំងរុស្ស៊ី ប្រសិនបើក្រុងមូស្គូ មិនយល់ព្រមចំពោះបទឈប់បាញ់ នៅអ៊ុយក្រែន។សេចក្តីថ្លែងការណ៍របស់រដ្ឋមន្ត្រីហិរញ្ញវត្ថុ G7 និងទេសាភិបាលធនាគារកណ្តាលរបស់អ៊ុយក្រែន ដែលបានអនុម័ត បន្ទាប់ពីកិច្ចប្រជុំរបស់ពួកគេ នៅប្រទេសកាណាដា បានប្រកាសថា៖«យើងស្វាគមន៍កិច្ចខិតខំប្រឹងប្រែងដែលកំពុងបន្ត ដើម្បីសម្រេចបានបទឈប់បាញ់។ ប្រសិនបើបទឈប់បាញ់បែបនេះ មិនត្រូវបានយល់ព្រមនោះទេ យើងនឹងបន្តស្វែងរកជម្រើសដែលអាចធ្វើបានទាំងអស់ រួមទាំងជម្រើស ដើម្បីបង្កើនសម្ពាធ ដូចជាការបង្កើនការដាក់ទណ្ឌកម្មបន្ថែមទៀត»។ ក្រុមរដ្ឋមន្ត្រី G7 បាននិយាយថា៖«ស្របតាមប្រព័ន្ធច្បាប់រៀងៗខ្លួន យើងបញ្ជាក់ម្តងទៀតថា ទ្រព្យសម្បត្តិអធិបតេយ្យភាពរបស់រុស្ស៊ី នៅក្នុងដែនសមត្ថកិច្ចរបស់យើង នឹងបន្តជាប់គាំង រហូតដល់រុស្ស៊ីបង់ថ្លៃសម្រាប់ការខូចខាត ដែលប្រទេសនេះ បានបង្កឡើងដល់អ៊ុយក្រែន។

វេជ្ជបណ្ឌិតអង់គ្លេស ដែលធ្វើការនៅតំបន់ហ្កាហ្សា ពណ៌នាទឹកដីនេះថា ជាកន្លែងសត្តឃាត

វេជ្ជបណ្ឌិតអង់គ្លេសដែលធ្វើការនៅតំបន់ហ្កាហ្សា បានពណ៌នាទឹកដីនេះថា ជាកន្លែងសត្តឃាត ដែលអ្នកជំងឺដែលពួកគេកំពុងព្យាបាល មានកង្វះអាហារូបត្ថម្ភយ៉ាងធ្ងន់ធ្ងរ។គ្រូពេទ្យវះកាត់កែសម្ផស្ស និងអ្នកឯកទេសផ្នែកឆ្អឹងមកពីចក្រភពអង់គ្លេស មានមូលដ្ឋាននៅមន្ទីរពេទ្យ Amal និង Nasser នៅក្នុងទីក្រុង Khan Younis នៅភាគខាងត្បូងនៃទឹកដីនេះ។សារព័ត៌មាន Sky News បានរាយការណ៍ថា លោកវេជ្ជបណ្ឌិត Tom Potokar ដែលជាគ្រូពេទ្យវះកាត់កែសម្ផស្ស ដែលមានឯកទេសខាងរបួសរលាកបានធ្វើការនៅតំបន់ហ្កាហ្សាចំនួន ១៦ដង ប៉ុន្តែបាននិយាយថា បេសកកម្មនេះ បានបង្ហាញពីកម្រិតនៃការបំផ្លិចបំផ្លាញខ្លាំងជាងដំណើរទស្សនកិច្ចចុងក្រោយរបស់លោក ក្នុងឆ្នាំ ២០២៣។ លោក Potokar បាននិយាយបន្ទាប់ពីធ្វើការវះកាត់ស្ត្រីប៉ាឡេស្ទីន ដែលរងរបួសយ៉ាងធ្ងន់ធ្ងរ ដែលប្តីនិងកូន ត្រូវបានសម្លាប់ ក្នុងការវាយប្រហាររបស់អ៊ីស្រាអែលថា៖«អ្វីដែលអ្នកអាចនិយាយ វាពិតជាគួរឲ្យរន្ធត់ណាស់ ហើយវាក៏ជាកន្លែងសត្តឃាត»។លោកបានជំរុញមេដឹកនាំពិភពលោកឲ្យ «ឈប់និយាយ ហើយធ្វើអ្វីមួយ ដើម្បីចាត់វិធានការ»។លោក Potokar បានផ្លាស់ទៅមន្ទីរពេទ្យ Amal កាលពីសប្តាហ៍មុន បន្ទាប់ពីមន្ទីរពេទ្យអ៊ឺរ៉ុបក្បែរនោះ ដែលលោកធ្លាប់ធ្វើការ ត្រូវបានវាយប្រហារដោយមីស៊ីលអ៊ីស្រាអែល ហើយបង្ខំឲ្យបិទ។ការថែទាំសុខភាពរបស់ហ្កាហ្សា គឺស្ថិតក្នុងស្ថានភាពដួលរលំ ដោយមន្ទីរពេទ្យ ត្រូវបានកំណត់គោលដៅម្តងហើយម្តងទៀតដោយអ៊ីស្រាអែល ចាប់តាំងពីសង្រ្គាម បានចាប់ផ្តើម នៅក្នុងខែតុលា ឆ្នាំ ២០២៣។ការវាយប្រហារតាមអាកាស និងការទម្លាក់គ្រាប់បែកឥតឈប់ឈរ បានសម្លាប់មនុស្សជាង ៥៣.000 នាក់ ហើយមន្ទីរពេទ្យពោរពេញដោយជនជាតិប៉ាឡេស្ទីន ដែលមានរបួសទាក់ទងនឹងការបាញ់ប្រហារ។

សេចក្តីថ្លែងការណ៍៖ ក្រុមហ៊ួទីកំពុងបង្កើនសមត្ថភាពទ្វេដង សម្រាប់ប្រតិបត្តិការបន្ថែមប្រឆាំងអ៊ីស្រាអែល

អ្នកនាំពាក្យយោធារបស់ចលនា Ansar Allah បានប្រកាសថា ក្រុមហ៊ួទីនៅប្រទេសយេម៉ែន កំពុងស្វះស្វែងរក «បង្កើនសមត្ថភាពរបស់ពួកគេទ្វេដង» ដើម្បីវាយប្រហារប្រឆាំងនឹងអ៊ីស្រាអែល។អ្នកនាំពាក្យរូបនេះ បានប្រាប់ទូរទស្សន៍ Al Masirah TV ថា៖«ស្របពេលមានការកើនឡើងភាពតានតឹង នៅក្នុងតំបន់ហ្កាហ្សា និងឧក្រិដ្ឋកម្មដែលកំពុងបន្តរបស់សត្រូវប្រឆាំងនឹងប្រជាជនប៉ាឡេស្ទីន កងកម្លាំងប្រដាប់អាវុធយេម៉ែន កំពុងធ្វើការ ដើម្បីបង្កើនសមត្ថភាព និងលទ្ធភាពរបស់ពួកគេទ្វេដង ដើម្បីពង្រីកប្រតិបត្តិការគាំទ្រ និងបង្កើនការប្រយុទ្ធគ្នា»។យោងតាមលោក Sareeបានឲ្យដឹងថា អ្វីដែលហៅថាប្រតិបត្តិការគាំទ្រដែលក្រុមហ៊ួទី កំពុងធ្វើ ក្នុងសាមគ្គី ភាពជាមួយប៉ាឡេស្ទីន ពាក់ព័ន្ធនឹង «ការបិទអាកាសយានដ្ឋាន Ben-Gurion ការហាមប្រាមលើនាវាទាំងអស់ចូលកំពង់ផែ Haifa និងការហាមឃាត់លើនាវាអ៊ីស្រាអែល ដែលឆ្លងកាត់សមុទ្រក្រហម និងសមុទ្រ អារ៉ាប់»។បន្ទាប់ពីការកើនឡើងនៃជម្លោះនៅតំបន់ហ្កាហ្សា ក្រុមហ៊ួទីបានព្រមានអ៊ីស្រាអែលថា ពួកគេនឹងបាញ់ផ្លោងទឹកដីរបស់ខ្លួន ខណៈរារាំងនាវាដែលមានទំនាក់ទំនងជាមួយរដ្ឋជ្វីហ្វ មិនឲ្យឆ្លងកាត់សមុទ្រក្រហម និងច្រកសមុទ្រ Bab el-Mandeb រហូតដល់ទីក្រុងតែលអាវីវ (Tel Aviv) បញ្ឈប់ប្រតិបត្តិការយោធារបស់ខ្លួនប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស នៅក្នុងការប្រយុទ្ធគ្នានោះ។

អាមេរិក និងអ៊ីរ៉ង់ នឹងបើកកិច្ចចរចានុយក្លេអ៊ែរក្នុងពេលមានការប៉ះទង្គិចលើបន្ទាត់ក្រហម

អ្នកចរចារបស់ប្រទេសអ៊ីរ៉ង់ និងសហរដ្ឋអាមេរិក បន្តកិច្ចចរចានៅថ្ងៃសុក្រនេះនៅទីក្រុងរ៉ូម ប្រទេសអ៊ីតាលី ដើម្បីដោះស្រាយជម្លោះរយៈពេលជាច្រើនទសវត្សរ៍មកនេះ ជុំវិញមហិច្ឆតានុយក្លេអ៊ែររបស់ទីក្រុងតេអេរ៉ង់ ទោះបីជាមេដឹកនាំកំពូលរបស់អ៊ីរ៉ង់ បានព្រមានថាការរុញឲ្យសម្រេចបានកិច្ចព្រមព្រៀងថ្មី ក៏ពិបាកដែរ ក្នុងពេលមានការប៉ះទង្គិចគ្នាលើបន្ទាត់ក្រហម។លោកប្រធានាធិបតី Donald Trump មានបំណងកាត់បន្ថយសក្តានុពលរបស់ទីក្រុង Tehran ក្នុងការផលិតអាវុធនុយក្លេអ៊ែរ ដែលអាចបង្កឱ្យមានការប្រជែងអាវុធនុយក្លេអ៊ែរក្នុងតំបន់។ សម្រាប់ផ្នែករបស់ខ្លួន អ៊ីរ៉ង់ ចង់លុបបំបាត់ទណ្ឌកម្មដ៏មហន្តរាយលើសេដ្ឋកិច្ចដែលផ្អែកលើប្រេងរបស់ខ្លួន។រដ្ឋមន្ត្រីការបរទេសអ៊ីរ៉ង់ លោក Abbas Araqchi និងបេសកជនប្រចាំតំបន់មជ្ឈិមបូព៌ារបស់លោក Trump លោក Steve Witkoff នឹងបើកកិច្ចចរចាជុំទី៥ តាមរយៈអ្នកសម្របសម្រួលប្រទេសអូម៉ង់ ទោះបីជាទីក្រុងវ៉ាស៊ីនតោន និងទីក្រុងតេអេរ៉ង់ ប្រកាន់ជំហរតឹងតែងជាសាធារណៈជុំវិញការចម្រាញ់សារធាតុអ៊ុយរ៉ានីញ៉ូមរបស់ប្រទេសអ៊ីរ៉ង់ ក៏ដោយ។ទីក្រុងតេអេរ៉ង់ និងទីក្រុងវ៉ាស៊ីនតោន បាននិយាយថា ប្រទេសទាំងពីរពេញចិត្តផ្នែកការទូតដើម្បីដោះស្រាយការប្រឈមមុខដាក់គ្នា ប៉ុន្តែពួកគេនៅតែខ្វែងគំនិតគ្នាយ៉ាងជ្រៅជាច្រើនលើបន្ទាត់ក្រហម ដែលអ្នកចរចានឹងត្រូវបញ្ចៀស ដើម្បីឈានដល់កិច្ចព្រមព្រៀងនុយក្លេអ៊ែរថ្មី និងទប់ស្កាត់សកម្មភាពយោធានាពេលអនាគត។

អាមេរិក និងប្រទេសក្នុងតំបន់ សហការគ្នាដោះស្រាយបញ្ហាអ្នកទោសក្រុម Daesh នៅស៊ីរី

ប្រធានាធិបតីទួរគី លោក រ៉េសិប តាយីប អឺដូហ្កាន់ (Recep Tayyip Erdogan) បាននិយាយនៅក្នុងអត្ថាធិប្បាយ ដែលបានចេញផ្សាយកាលពីថ្ងៃព្រហស្បតិ៍ថា ទួរគី សហរដ្ឋអាមេរិក ស៊ីរី និងអ៊ីរ៉ាក់ បានបង្កើតក្រុមការងារមួយ ដើម្បីព្យាយាមដោះស្រាយបញ្ហាអ្នកទោសក្រុមដេស(Daesh) ដែលត្រូវបានឃុំខ្លួននៅក្នុងប្រទេសស៊ីរី។កងកម្លាំងប្រជាធិបតេយ្យស៊ីរីដែលដឹកនាំដោយជនជាតិឃើដ ឬ SDF គ្រប់គ្រងផ្នែកដ៏ធំនៃភាគឦសានប្រទេសស៊ីរី ជាប់ព្រំដែនទួរគីនិងអ៊ីរ៉ាក់ ហើយត្រួតពិនិត្យជំរំពន្ធនាគារជាង ១០កន្លែង ដែលឃុំខ្លួនក្រុម Daesh រាប់ពាន់នាក់ ដែលត្រូវបានគេស្គាល់ថា ជាក្រុមរដ្ឋឥស្លាម ឬ IS គឺក្រុមយុទ្ធជន និងក្រុមគ្រួសាររបស់ពួកគេ។ប្រធានាធិបតីអាមេរិកលោក ដូណាល់ ត្រាំ (Donald Trump) បានស្នើឲ្យរដ្ឋាភិបាលស៊ីរី «ទទួលខុសត្រូវ» សម្រាប់អ្នកទោស Daesh ប្រហែល ៩.000នាក់ នៅពេលលោកជួបប្រធានាធិបតីស៊ីរីលោក Ahmad Al-Sharaa ក្នុងប្រទេសអារ៉ាប៊ីសាអ៊ូឌីត កាលពីថ្ងៃទី ១៤ ខែឧសភា។លោក អឺដូហ្កាន់ បាននិយាយថា គណៈកម្មាធិការមួយ ត្រូវបានបង្កើតឡើង ដើម្បីដោះស្រាយអ្វីដែលត្រូវធ្វើជាមួយអ្នកទោស ជាពិសេសស្ត្រី និងកុមារ ដែលត្រូវបានឃុំខ្លួន នៅជំរំ ជនភៀសខ្លួន ដូចជាជំរំ Al-Hol នៅភាគខាងជើងប្រទេសស៊ីរី។ ការអត្ថាធិប្បាយរបស់លោកនៅលើគេហទំព័រប្រធានាធិបតី ត្រូវបានចេញផ្សាយ នៅពេលលោកត្រឡប់មកពីដំណើរទស្សនកិច្ចនៅប្រទេសហុងគ្រី។លោក អឺដូហ្កាន់ បាននិយាយថា៖«អ៊ីរ៉ាក់ចាំបាច់ត្រូវផ្តោតការយកចិត្តទុកដាក់លើបញ្ហាជំរំ។ «ភាគច្រើននៃស្ត្រី និងកុមារ នៅក្នុងជំរំ Al Hol ជាពិសេសជារបស់អ៊ីរ៉ាក់និងស៊ីរី។ ដូច្នេះប្រទេសទាំងពីរនេះ គួរតែធ្វើអ្វីដែលចាំបាច់សម្រាប់ពួកគេ»។

បណ្ដាញសង្គម

ព័ត៌មានថ្មីៗ

៨ខែឆ្នាំនេះ កម្ពុជានាំចេញទំនិញទៅអាម៉េរិកមានទឹកប្រាក់ជាង ៨ ៣០០ លានដុល្លារឈរក្នុងលំដាប់ទី១ នៃការនាំចេញសរុបរបស់កម្ពុជា

៦ខែឆ្នាំ២០២៥ មានករណីអគ្គិភ័យកើតឡើងជាង៥០០ករណី បណ្ដាលឱ្យមនុស្សស្លាប់២១នាក់ ខណៈ១០ថ្ងៃខែកញ្ញានេះ កើតឡើង១២ករណី

ជាងចម្លាក់នៅប្រាសាទមេបុណ្យខាងលិច មានសមត្ថភាពឆ្លាក់ក្បាច់តាមទ្រង់ទ្រាយដើម ទុកជាកេរដំណែលរយឆ្នាំបន្តទៀត

សម្ដេចប្រធានរដ្ឋសភាកម្ពុជានឹងអញ្ជើញដឹកនាំគណៈប្រតិភូជាន់ខ្ពស់សភាកម្ពុជាចូលរួមមហាសន្និបាតប្រចាំឆ្នាំរបស់អាយប៉ា លើកទី៤៦ នៅប្រទេសម៉ាឡេស៊ី សប្តាហ៍ក្រោយ

[UPDATE] ចំនួនអ្នកស្លាប់នៃការតវ៉ានៅប្រទេសនេប៉ាល់បន្តកើនឡើង ទោះមានការដាក់ពង្រាយទ័ពក៏ដោយ

កូរ៉េខាងត្បូង ស្នើសុំឱ្យអាមេរិកអនុញ្ញាតឱ្យកម្មករដែលជាប់ឃុំចាកចេញដោយដៃមិនជាប់ខ្នោះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877