BTV NEWS

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

ស្នងការរាជធានី បញ្ជាឲ្យកម្លាំងសមត្ថកិច្ចចុះពិនិត្យទីតាំងផាប់មួយកន្លែង នៅខណ្ឌទួលគោក ក្រោយឃើញមានក្មេងៗទៅប្រមូលផ្តុំផឹកស៊ីទាំងថ្ងៃ

ពលរដ្ឋម្នាក់ស្លាប់ និងម្នាក់រងរបួសករណីផ្ទុះគ្រាប់បែកចង្កោម នៅស្រុកស្វាយចេក ខេត្តបន្ទាយមានជ័យ

បង្រ្កាបទីតាំងបទល្មើសឆបោកតាមប្រព័ន្ធបច្ចេកវិទ្យាឈ្មោះឆាយណាបឹងបេង ខេត្តបន្ទាយមានជ័យ រកឃើញភស្តុតាង និងជនបរទេសមួយចំនួន

សន្តិសុខ និង សង្គម

មនុស្ស ២៨នាក់ត្រូវបានសម្លាប់នៅក្នុងការប៉ះទង្គិចដោយពួកសកម្មប្រយុទ្ធនៅភាគអាគ្នេយ៍អ៊ីរ៉ង់

ទីភ្នាក់ងារព័ត៌មានផ្លូវការ IRNA បានរាយការណ៍ថា ការប៉ះទង្គិចគ្នាដ៏បង្ហូរឈាមមួយបានផ្ទុះឡើងនៅក្នុងខេត្ត ស៊ីស្ថាន និង បាឡូចឈីស្ថាន (Sistan and Baluchestan) ភាគអាគ្នេយ៍នៃប្រទេសអ៊ីរ៉ង់ កាលពីយប់ថ្ងៃពុធ (០៣ មេសា) ដែលបណ្តាលឱ្យមនុស្សយ៉ាងហោចណាស់ ២៨ នាក់បាត់បង់ជីវិត។អំពើហឹង្សាបានផ្ទុះឡើងនៅពេលដែលសមាជិកនៃក្រុមសកម្មប្រយុទ្ធ ចាអ៊ីស អាល់ហ្ស៊ូម (Jaish al-Zulm) បានបើកការវាយប្រហារដោយសម្របសម្រួលលើមូលដ្ឋានយោធា និងនគរបាលនៅទូទាំងតំបន់។ យោងតាមរបាយការណ៍បានឱ្យដឹងថា ការវាយប្រហារនេះបានកំណត់គោលដៅលើប៉ុស្តិ៍យោធាដែលជាកម្មសិទ្ធិរបស់អង្គភាពឆ្មាំបដិវត្តន៍អ៊ីស្លាមអ៊ីរ៉ង់ (IRGC) ក្នុងតំបន់ រ៉ាសក៍ (Rask) រួមជាមួយនឹងទីស្នាក់ការកណ្តាលអង្គភាពឆ្មាំបដិវត្តន៍ IRGC និងប៉ុស្តិ៍នគរបាលឆ្មាំល្បាតឆ្នេរនៅតំបន់ ឆាបាហា (Chabahar)។ការប្រឈមមុខដាក់គ្នានេះបានឆក់យកជីវិតពួកសកម្មប្រយុទ្ធ ១៨ នាក់ និងបុគ្គលិកសន្តិសុខ ១០ នាក់ នេះបើយោងតាម IRNA ដោយបន្ថែមថាការប៉ះទង្គិចគ្នាបានបញ្ចប់ ហើយសណ្តាប់ធ្នាប់ត្រូវបានស្ដារឡើងវិញនៅក្នុងតំបន់ដែលរងផលប៉ះពាល់។ក្រុម ចាអ៊ីស អាល់ហ្ស៊ូម ដែលត្រូវបានចាត់តាំងជាអង្គការភេរវករដោយប្រទេសអ៊ីរ៉ង់ បានជាប់ពាក់ព័ន្ធក្នុងការវាយប្រហារមុនៗជាច្រើន ដែលផ្តោតលើកងកម្លាំងសន្តិសុខអ៊ីរ៉ង់ និងជនស៊ីវិល។ សកម្មភាពរបស់ក្រុមនេះបានជំរុញឱ្យមានភាពតានតឹងនៅក្នុងតំបន់ និងបានបង្កបញ្ហាប្រឈមយ៉ាងខ្លាំងដល់កិច្ចខិតខំប្រឹងប្រែងផ្នែកសន្តិសុខរបស់អ៊ីរ៉ង់៕

ប្រជាជនហៃទី ព្យាយាមរត់គេចពីភាពអនាធិបតេយ្យ ខណៈបណ្ដាប្រទេសជិតខាងបង្កើនកម្លាំងយោធា

ដោយមិនទាន់មានសញ្ញានៃក្រុមប្រឹក្សាអន្តរកាល ដែលបានសន្យាបង្កើតជាយូរដើម្បីដឹកនាំនៅក្នុងការដាក់ពង្រាយកងទ័ពអន្តរជាតិ និងការស្តារសណ្តាប់ធ្នាប់ឡើងវិញនោះ ប្រជាជនហៃទី កំពុងព្យាយាមភៀសខ្លួនចេញពីប្រទេសតាមដែលអាចធ្វើបាន។ ក្រុមជនអន្ធពាលដ៏ហិង្សា បានចូលកាន់កាប់តំបន់ជាច្រើននៃរដ្ឋធានីហៃទី សម្លាប់មនុស្សរាប់ពាន់នាក់ បង្ខំមនុស្សរាប់លាននាក់ឱ្យស្ថិតក្នុងភាពអត់ឃ្លានយ៉ាងធ្ងន់ធ្ងរ និងបង្កឱ្យមានការរឹតបន្តឹងសន្តិសុខពីប្រទេសជិតខាង។អាកាសយានដ្ឋាន និងកំពង់ផែសមុទ្រនៅទីក្រុងព័រអូប្រាំង ត្រូវបានបិទអស់រយៈពេលមួយខែ ដោយសារសកម្មភាពគ្មានសណ្ដាប់ធ្នាប់របស់ក្រុមជនអន្ធពាល ខណៈអាកាសយានដ្ឋាននៅភាគខាងជើងនៃទីក្រុង កេប-ហៃត្យុង (Cap-Haitien) បានចាប់ផ្តើមជើងហោះហើរឡើងវិញទៅកាន់ទីក្រុង ម៉ៃអាមី (Miami) សហរដ្ឋអាមេរិក កាលពីសប្តាហ៍មុន ដែលជំរុញឱ្យមនុស្សជាច្រើនព្យាយាមចាកចេញ។បណ្ដាប្រទេសជិតខាងបានពង្រឹងវិធានការសន្តិសុខតាមព្រំដែន រួមទាំងសាធារណរដ្ឋដូមីនីក ដែលជាប្រទេសតែមួយគត់មានព្រំដែនគោកជាមួយហៃទី ហើយដែលបានច្រានចោលមិនឱ្យមានជំរំជនភៀសខ្លួននៅលើទឹកដីរបស់ខ្លួន និងបាននិរទេសមនុស្សរាប់ម៉ឺននាក់ចេញពីប្រទេស។នៅក្នុងការលើកឡើងដែលចេញផ្សាយដោយរដ្ឋាភិបាល ដូមីនីក កាលពីថ្ងៃព្រហស្បតិ៍ បានឱ្យដឹងថា រដ្ឋមន្ត្រីការបរទេសដូមីនីក លោក រ៉ូប៊ឺតតូ អាល់វ៉ារ៉េស (Roberto Alvarez) បានប្រាប់សារព៏ត៌មាន BBC ថា បុគ្គលិកយោធាប្រហែល ១០.០០០ នាក់ត្រូវបានគេដាក់ពង្រាយទៅកាន់ព្រំដែនជិត ៤០០ គីឡូម៉ែត្ររបស់ខ្លួន ដែលជា «បន្ទុកដ៏ធ្ងន់» ដល់ថវិកាជាតិ និងរំខានដល់ពាណិជ្ជកម្មឆ្លងព្រំដែន៕

នាវាចម្បាំងដាណឺម៉ាក បានជួបបញ្ហាដោយសារប្រព័ន្ធសព្វាវុធមួយចំនួនមិនដំណើរការ ក្នុងការប្រយុទ្ធនៅសមុទ្រក្រហម

ប្រធានក្រុម បាននិយាយកាលពីថ្ងៃព្រហស្បតិ៍ថា នាវាចម្បាំងដាណឺម៉ាកមួយគ្រឿង ដែលត្រូវបានដាក់ពង្រាយទៅកាន់សមុទ្រក្រហម ជាផ្នែកមួយនៃប្រតិបត្តិការដែលដឹកនាំដោយសហរដ្ឋអាមេរិក បានជួបបញ្ហាដោយសារប្រព័ន្ធអាវុធរបស់ខ្លួនមិនដំណើរការ នៅពេលដែលត្រូវបានវាយប្រហារដោយដ្រូនប្រតិបត្តិការដោយក្រុមសកម្មប្រយុទ្ធហ៊ួទី កាលពីខែមុន ខណៈដែលនាវានេះ បានទៅដល់ប្រទេសដាណឺម៉ាក។ការបរាជ័យដែលរហូតមកដល់ថ្ងៃព្រហស្បតិ៍ទើបតែ ត្រូវបានរាយការណ៍ដោយប្រព័ន្ធផ្សព្វផ្សាយការពារជាតិក្នុងស្រុក Olfi ដោយដកស្រង់របាយការណ៍សម្ងាត់របស់នាវានេះ បានជំរុញឲ្យរដ្ឋាភិបាលបណ្តេញ មន្ត្រីយោធាជាន់ខ្ពស់របស់ខ្លួន គឺលោកFlemming Lentfer កាលពីថ្ងៃពុធ។រដ្ឋមន្ត្រីក្រសួងការពារជាតិ លោក Troels Lund Poulsen បាននិយាយថា ការបណ្តេញចេញនេះ គឺជាលទ្ធផលនៃការរំលោភលើទំនុកចិត្ត បន្ទាប់ពីលោក Lentfer ខកខានមិនបានជូនដំណឹងដល់ក្រសួងឲ្យបានលម្អិតអំពីឧប្បត្តិហេតុ កាលពីថ្ងៃទី៩ ខែមីនា នៅពេលដែលនាវាចម្បាំង Iver Huitfeldt ត្រូវបានវាយប្រហារដោយក្រុមសកម្មប្រយុទ្ធហ៊ួទី។ប្រធានក្រុមនាវា និងជាមេបញ្ជាការ លោក Sune Lund បានប្រាប់សារព័ត៌មានរ៉យទ័រថា ទោះបីជាមានដំណើរការខុសប្រក្រតីក៏ដោយ ក៏នាវាចម្បាំងនេះ បានបាញ់ទម្លាក់យានដ្រូនចំនួន ៤គ្រឿង។លោក Lund បាននិយាយដោយមិនបានបញ្ជាក់លម្អិតថា៖«យើងមានប្រព័ន្ធមួយចំនួនមិនដំណើរការ ឬការខូចប្រព័ន្ធ ដែលបានបង្កជាឧបសគ្គតិចតួចដល់ការចូលរួមរបស់យើង»។"ប៉ុន្តែនៅពេលដែលមិនមានការចូលរួមនោះ គឺយើងមិនត្រូវបានគេការពារទេ។ យើងមានតម្រូវការចាំបាច់ ដូច្នេះយើងអាចបន្តប្រយុទ្ធ និងបញ្ឈប់ការគំរាមកំហែងនេះ»។កងកម្លាំងប្រដាប់អាវុធ បានបង្ហោះវីដេអូដ៏គួរឲ្យភ្ញាក់ផ្អើលមួយ នៅលើប្រព័ន្ធផ្សព្វផ្សាយសង្គម ដែលបង្ហាញពីការបាញទម្លាក់យានដ្រូន ជាលើកដំបូងដែលនាវាចម្បាំងរបស់ដាណឺម៉ាក បានធ្វើការប្រយុទ្ធដោយផ្ទាល់ ចាប់តាំងពីឆ្នាំ ១៩៤៣។

អ្នកព្យាករណ៍៖ រដូវកាលព្យុះកំណាចអាត្លង់ទិកឆ្នាំ ២០២៤ មានស្ថានភាពសកម្មខ្លាំង

អ្នកព្យាករណ៍អាកាសធាតុ នៅសាកលវិទ្យាល័យរដ្ឋ Colorado State (CSU) សហរដ្ឋអាមេរិក កាលពីថ្ងៃព្រហស្បតិ៍ បានព្យាករថា នឹងមានរដូវព្យុះកំណាចអាត្លង់ទិកឆ្នាំ ២០២៤ មានភាពសកម្មខ្លាំង ដោយសារតែសីតុណ្ហភាពផ្ទៃសមុទ្រក្តៅ និងកម្លាំងខ្យល់ប្តូរទិសធ្វើឲ្យព្យុះចុះខ្សោយក្នុងរដូវក្តៅ និងរដូវស្លឹកឈើជ្រុះ។ការព្យាករណ៍របស់សាកលវិទ្យាល័យ CSU ដែលតាមដាមដានយ៉ាងទូលំទូលាយ រកឃើញព្យុះសង្ឃរាធំៗចំនួន ៥ ឬព្យុះដែលមានល្បឿនខ្យល់លើសពី ១៧៨ គីឡូម៉ែត្រក្នុងមួយម៉ោង ក្នុងចំណោមព្យុះសរុបចំនួន ១១ ជាផ្នែកមួយនៃការព្យាករណ៍សម្រាប់ព្យុះដែលត្រូវបានដាក់ឈ្មោះចំនួន២៣ ។ការព្យាករណ៍ ត្រូវបានតាមដានយ៉ាងដិតដល់ដោយសហគមន៍តំបន់ឆ្នេរ និងក្រុមហ៊ុនថាមពល។ ឈូងសមុទ្រម៉ិកស៊ិករបស់សហរដ្ឋអាមេរិក មានចំនួន១៥ភាគរយនៃការផលិតប្រេងឆៅសរុបរបស់សហរដ្ឋអាមេរិក និង ៥ភាគរយនៃការផលិតឧស្ម័នធម្មជាតិស្ងួតរបស់ខ្លួន ហើយជិត ៥០ភាគរយ នៃសមត្ថភាពចម្រាញ់ប្រេងរបស់ប្រទេសនេះស្ថិតនៅលើឆ្នេរសមុទ្ររបស់ខ្លួន។លោក អាឡិច ដេសរ៉ូស៊ីអឺស(Alex DesRosiers) អ្នកវិទ្យាសាស្ត្រអាកាសធាតុ និងជាសហអ្នកនិពន្ធនៃការសិក្សានៅសាកលវិទ្យា CSU បាននិយាយថា យើងរំពឹងថានឹងមានការផ្លាស់ប្តូរចេញពីបាតុភូត អែលនីញ៉ូ(El Nino) ទៅជា La Nina ។ ដូច្នេះ បច្ចុប្បន្ននេះ យើងមានមហាសមុទ្រដ៏កក់ក្តៅដែលត្រៀមរួចជាស្រេចដើម្បីជួយសម្រាប់សកម្មភាពព្យុះសង្ឃរា និងបរិយាកាសដែលទំនងជាឲ្យស្ថិតក្នុងការគ្រប់គ្រង។ រដូវព្យុះសង្ឃរាជាមធ្យម បង្កើតព្យុះដែលត្រូវបានដាក់ឈ្មោះចំនួន ១៤ ដែលក្នុងនោះ ព្យុះចំនួន៧ នាំឱ្យមានព្យុះសង្ឃរា និង ៣ ក្លាយជាព្យុះស៊ីក្លូនធំៗ។ ការព្យាករណ៍របស់សាកលវិទ្យាល័យ CSU គឺស្របទៅនឹងទស្សនវិស័យដំបូងផ្សេងទៀត។ កាលពីសប្តាហ៍មុន ទីភ្នាក់ងារអាកាសធាតុ បាននិយាយថាមានឱកាស ១០ទៅ១៥ភាគរយ នៃព្យុះដែលមានឈ្មោះចំនួន៣០ ឬច្រើនជាងនេះ នៅក្នុងរដូវកាលព្យុះសង្ឃរាឆ្នាំ ២០២៤ នេះ ដែលចាប់ផ្តើមនៅថ្ងៃទី ១ ខែមិថុនា និងបន្តរហូតដល់ថ្ងៃទី ៣០ ខែវិច្ឆិកា។ជាទូទៅ យើងមានការព្រួយបារម្ភដូចធម្មតា អំពីកន្លែងដែលរងការវាយប្រហារ ជាញឹកញាប់នៅឆ្នេរសមុទ្រភាគខាងជើង និងតំបន់សមុទ្រការ៉ាអ៊ីប ព្រោះវាមានគំរូប្រវត្តិសាស្ត្រសម្រាប់ទីកន្លែងទាំងនោះដែលមានឥទ្ធិពលខ្លាំង។

នៅហ្កាហ្សា UN មើលឃើញថា ពុំមានការគោរពច្បាប់មនុស្សធម៌អន្តរជាតិនោះទេ

ទោះបីជាសហរដ្ឋអាមេរិក ធ្វើការអំពាវនាវខ្លាំងបំផុតសម្រាប់បទឈប់បាញ់ចំពោះសង្គ្រាមនៅតំបន់ហ្កាហ្សាក៏ដោយ អ្នកនាំពាក្យអង្គការសហប្រជាជាតិ បានចេញមកសម្តែងការខកចិត្តដែលនៅតែបន្តចំពោះវឌ្ឍនភាពនោះ។អ្នកនាំពាក្យអង្គការសហប្រជាជាតិ លោក Stephane Dujarric បាននិយាយកាលពីថ្ងៃព្រហស្បតិ៍ ក្នុងអំឡុងពេលធ្វើសន្និសីទសារព័ត៌មានរយៈពេលដប់ថ្ងៃបន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចដែលទាមទារឱ្យមានបទឈប់បាញ់បន្ទាន់រវាងអ៊ីស្រាអែល និង ក្រុមសកម្មប្រយុទ្ធហាម៉ាស ប៉ាឡេស្ទីន ថា ស្ថានភាពនៅតំបន់ហ្កាហ្សា មិនបានដំណើរការក្នុងទិសដៅត្រឹមត្រូវទេ។ លោកបាននិយាយបន្តថា យើងបានឃើញការមិនគោរពចំពោះរឿងនេះ នៅក្នុងសង្គ្រាម សម្រាប់ច្បាប់មនុស្សធម៌អន្តរជាតិ។ ការប្រយុទ្ធគ្នានៅតំបន់ហ្កាហ្សានៅតែបន្ត។ ប្រតិបត្តិការរបស់អ៊ីស្រាអែល កំពុងបន្ត។ ចំណាប់ថ្នូរនៅតែត្រូវបានបន្តឃុំខ្លួន ហើយបន្ទាប់ពីការវាយប្រហារតាមអាកាស របស់ អ៊ីស្រាអែលលើក្បួនរថយន្តផ្តល់ជំនួយនៅតំបន់ហ្កាហ្សា បានសម្លាប់បុគ្គលិក៧នាក់ មកពីអង្គការសប្បុរសធម៌ World Central Kitchen កាលពីដើមសប្តាហ៍នេះ អង្គការសហប្រជាជាតិ បានផ្អាកសកម្មភាពជំនួយអស់រយៈពេល ៤៨ ម៉ោង។ ប៉ុន្តែលោក Dujarric បាននិយាយថា ការដឹកជញ្ជូននឹង បន្តឡើងវិញនៅយប់នេះ ដោយក្បួនធ្វើដំណើររបស់រថយន្តដឹកជំនួយចេញនៅយប់នេះ។

ការវាយប្រហាររបស់អ៊ីស្រាអែលលើអគារហ្កាហ្សា បានសម្លាប់មនុស្ស ១០៦នាក់ គឺជាឧក្រិដ្ឋកម្មសង្គ្រាមជាក់ស្តែង

ការស៊ើបអង្កេតរបស់អង្គការឃ្លាំមើលសិទ្ធិមនុស្សដែលបានចេញផ្សាយកាលពីថ្ងៃព្រហស្បតិ៍ បាននិយាយថា ការវាយប្រហាររបស់អ៊ីស្រាអែលលើអគារមួយ នៅតំបន់ហ្កាហ្សា កាលពីខែតុលា មិនមានគោលដៅ របស់សកម្មប្រយុទ្ធទេ ប៉ុន្តែបានសម្លាប់ជនស៊ីវិលចំនួន ១០៦នាក់ រួមទាំងកុមារ ៥៤នាក់ ដែលធ្វើឲ្យវាក្លាយជា «ឧក្រិដ្ឋកម្មសង្គ្រាមជាក់ស្តែង» ។ច្បាប់អន្តរជាតិហាមឃាត់ការវាយប្រហារលើគោលដៅយោធា ដែលទំនងជានឹងបង្កគ្រោះថ្នាក់មិន សមហេតុផលដល់ជនស៊ីវិល។ ការវាយប្រហារថ្ងៃទី៣១ ខែតុលា ជាការសម្លាប់មនុស្សច្រើនបំផុត ចាប់តាំងពីសង្គ្រាម ចាប់ផ្ដើមជិត ៦ខែហើយនោះ។អង្គការឃ្លាំមើលសិទិ្ធមនុស្ស និយាយថា ការវាយប្រហារចំនួន៤ដាច់ដោយឡែកពីគ្នា បានដួលរលំអគាររបស់ក្រុមវិស្វករ នៅកណ្តាលតំបន់ហ្កាហ្សា ដែលផ្តល់ជម្រកដល់មនុស្សប្រហែល ៣៥០នាក់ ប្រហែល១ ភាគ៣នៃពួកគេ បានភៀសខ្លួនពីផ្ទះសម្បែងរបស់ពួកគេ ទៅកន្លែងផ្សេងទៀត ក្នុងទឹកដីនេះ។អង្គការនេះ បានបញ្ជាក់ថា អ្នកស្លាប់ទាំងនោះរួមមានក្មេងលេងបាល់ទាត់នៅខាងក្រៅ និងអ្នកស្រុកសាកទូរសព្ទ នៅក្នុងហាងលក់ទំនិញជាន់ទី១។ក្រុមដែលនិយាយថា ខ្លួនបានបញ្ជាក់ពីបញ្ជីអ្នកស្លាប់របស់ខ្លួនជាមួយនឹងក្រុមហ៊ុន Airwars ជាអ្នកឃ្លាំមើលជម្លោះដែលមានមូលដ្ឋាននៅទីក្រុងឡុងដ៍ បានបញ្ជាក់ថា ស្ត្រីចំនួន ៣៤នាក់ បុរស ១៨នាក់ និងកុមារ៥៤នាក់ ត្រូវបានសម្លាប់ នៅក្នុងការវាយប្រហារនេះ។ អ្នកស្លាប់ទាំងនោះ មកពី២២គ្រួសារ។ គ្រួសារធំមួយ គឺគ្រួសារលោក Abu Said បានបាត់បង់សាច់ញាតិ ២៣នាក់ ក្នុងការវាយប្រហារ។សារព័ត៌មាន AP បានរាយការណ៍អំពីបងប្អូនបង្កើត ៤នាក់ ដែលត្រូវបានសម្លាប់ នៅក្នុងការវាយប្រហារ កាលពីខែតុលា រួមទាំងក្មេងប្រុសភ្លោះអាយុ ១៨ខែផងដែរ។

មេដឹកនាំក្រុមជីហាត ម្នាក់របស់អ៊ីរ៉ាក់ ស្លាប់ក្នុងការបំផ្ទុះគ្រាប់បែកអត្តឃាតនៅភាគពាយ័ព្យស៊ីរី

ប្រភពពីក្រុមជីហាត បាននិយាយថា មេដឹកនាំក្រុមជីហាត ឈានមុខគេម្នាក់របស់អ៊ីរ៉ាក់ នៅភាគពាយ័ព្យប្រទេសស៊ីរី កាន់កាប់ដោយក្រុមឧទ្ទាម ដែលបានបង្កើតអតីតសម្ព័ន្ធក្រុមអាល់កៃដា ត្រូវបានសម្លាប់កាលពីថ្ងៃព្រហស្បតិ៍ (០៤ មេសា) នៅពេលដែលអ្នកបំផ្ទុះគ្រាប់បែកអត្តឃាតម្នាក់ បានបំផ្ទុះខ្លួនឯងនៅក្នុងលំនៅឋានសម្រាប់ទទួលភ្ញៀវរបស់មេដឹកនាំក្រុមជីហាតរូបនោះ។ប្រភពទាំងបីនោះបាននិយាយថា លោក អាប៊ូ ម៉ារៀ អាល់កាថានី (Abu Maria al Qahtani) ដែលមានឈ្មោះពិតថា មីសឺ អាល់ ចាបួរី (Maysr al Jabouri) បានស្លាប់បន្ទាប់ពីបញ្ជូនទៅដល់មន្ទីរពេទ្យដោយសារមានរបួសធ្ងន់ធ្ងរពេក នៅពេលដែលអ្នកបំផ្ទុះគ្រាប់បែកអត្តឃាតនោះបានបំផ្ទុះខ្លួនឯងភ្លាមៗបន្ទាប់ពីស្វាគមន៍លោកនៅទីក្រុង សាម៉ាដា (Sarmada) ខណៈដែលមនុស្សជាច្រើននាក់ផ្សេងទៀតបានរងរបួស។លោក អាល់កាថានី គឺជាស្ថាបនិកម្នាក់នៃរណសិរ្ស នូស្រា (Nusra) ដែលជាអតីតយុទ្ធជនក្រុមអាល់កៃដា នៅក្នុងប្រទេសស៊ីរី ដែលបានប្តូរឈ្មោះខ្លួនឯងថា ហាយ៉ាត់ ថារឺ អាល់សាម (Hayat Tahrir al Sham -HTS) បន្ទាប់ពីបានបែកបាក់ទំនាក់ទំនងជាមួយក្រុមអាល់កៃដា។ ក្រុមហាយ៉ាត់ ថារឺ អាល់សាម HTS នេះបានបញ្ជាក់ពីការស្លាប់របស់លោក អាល់កាថានី នៅក្នុងការបង្ហោះប្រព័ន្ធផ្សព្វផ្សាយសង្គម និងបានស្តីបន្ទោសក្រុម ISIS ដែលជាក្រុមសកម្មប្រយុទ្ធគូប្រជែងមនោគមវិជ្ជា ថានៅពីក្រោយការបំផ្ទុះនោះ តែមិនទាន់មានការអះអាងពីការទទួលខុសត្រូវចំពោះការវាយប្រហារនេះទេ។ក្រុម ហាយ៉ាត់ ថារឺ អាល់សាម ដែលបានចុះបញ្ជីជាអង្គការភេរវករដោយសហរដ្ឋអាមេរិក ត្រូវបានរដ្ឋាភិបាលស៊ីរី និងកងកម្លាំងរុស្ស៊ី កំណត់គោលដៅជាយូរមកហើយ៕

ភ្លៀងធ្លាក់ខ្លាំងនៅទីក្រុងស៊ីដនី ប្រទេសអូស្រ្តាលី បង្កឱ្យមានការព្រមានអំពីទឹកជំនន់

ភ្លៀងធ្លាក់ខ្លាំងបានបោកបក់ភាគអាគ្នេយ៍នៃប្រទេសអូស្ត្រាលី នៅថ្ងៃសុក្រ (០៥ មេសា) នេះ ដោយធ្វើឱ្យមានភ្លៀងធ្លាក់ក្នុងកម្រិតទឹកភ្លៀងរយៈពេលជិតមួយខែទៅលើទីក្រុងស៊ីដនី (Sydney) និងបង្កឱ្យមានការព្រមានអំពីទឹកជំនន់ ដោយអាជ្ញាធរបានជំរុញឱ្យប្រជាជនជៀសវាងការធ្វើដំណើរដែលមិនសំខាន់ និងស្នាក់នៅក្នុងលំនៅឋាន។ទិន្នន័យរបស់ការិយាល័យឧតុនិយមរបស់អូស្ត្រាលីបានបង្ហាញថា ទីក្រុងស៊ីដនី ដែលជាផ្ទះរបស់មនុស្សជាង ៥ លាននាក់ បានទទួលទឹកភ្លៀងកម្រិត ១១១ មីលីម៉ែត្រ ក្នុងរយៈពេល ២៤ ម៉ោងដល់ព្រឹកថ្ងៃសុក្រនេះ ដែលជាកម្រិតជិតស្មើនឹងកម្រិតទឹកភ្លៀងជាមធ្យម ១២១,៥ មីលីម៉ែត្រសម្រាប់ខែមេសា។ការិយាល័យអាកាសធាតុបាននិយាយថា ភ្លៀងអាចកាន់តែខ្លាំងពេញថ្ងៃសុក្រនេះ ដោយរំពឹងថានឹងមានភ្លៀងធ្លាក់ដល់ទៅ ២០០ មីលីម៉ែត្រនៅក្នុងតំបន់មួយចំនួន មុនពេលដែលសម្ពាធទាបតាមឆ្នេរសមុទ្ររសាត់ទៅភាគខាងកើតឆ្ពោះទៅសមុទ្រ ថាសម៉ាន (Tasman) នៅថ្ងៃសៅរ៍។ ភ្លៀងធ្លាក់ខ្លាំងបានបំផ្លាញឧបករណ៍ផ្លូវដែកនៅស្ថានីយ៍រថភ្លើងធំមួយក្នុងទីក្រុងស៊ីដនី ដែលធ្វើឱ្យមានការពន្យារពេលដល់អ្នកដំណើរពេលព្រឹក។ក្រុមសង្គ្រោះបន្ទាន់នៅរដ្ឋ ញ៉ូវ សៅ វេលស៍ (New South Wales) បានទទួលការហៅទូរស័ព្ទរាយការណ៍ច្រើនជាង ៥០០ ករណីហើយមនុស្ស ៧ នាក់ត្រូវបានជួយសង្គ្រោះពីទឹកជំនន់ ខណៈដែលការព្រមានត្រូវបានដាក់ចេញសម្រាប់ទន្លេជាច្រើននៅភាគខាងកើត៕

គ្រោះថ្នាក់រយន្តក្រុងបុកគ្នានៅប្រទេសបូលីវី សម្លាប់មនុស្សយ៉ាងតិច ១៤ នាក់

យ៉ាងហោចណាស់មនុស្ស ១៤ នាក់បានស្លាប់ និង ២ នាក់ទៀតបានរងរបួសនៅក្នុងឧបទ្ទវហេតុដែលពាក់ព័ន្ធនឹងរថយន្តក្រុងខ្នាតតូច និងរថយន្តដឹកទំនិញ បានបុកគ្នានៅលើផ្លូវហាយវេ ក្នុងទីក្រុង អូរូរ៉ូ (Oruro) ភាគខាងលិចប្រទេសបូលីវី នេះបើយោងតាមមន្ត្រីក្នុងតំបន់បាននិយាយកាលពីថ្ងៃព្រហស្បតិ៍ (០៤ មេសា)។ មន្ត្រីមូលដ្ឋាន លោក ហ៊ូលីអូ ឡារៀ (Julio Larrea) បាននិយាយថា អ្នកស្លាប់រួមមានកុមារម្នាក់ ស្ត្រី ៩ នាក់ និងបុរស ៤ នាក់។បើតាមសមត្ថកិច្ចបានឱ្យថា អ្នកបើកបររថយន្តដឹកអំបិលនោះ ប្រហែលជាងងុយដេក បាត់បង់ម្ចាស់ការ រួចក៏ជ្រុលទៅបុកនឹងរថយន្តក្រុង ដែលស្ថិតក្នុងគន្លងផ្លូវម្ខាងទៀត។ អ្នកបើកបររថយន្តដឹកទំនិញ ដែលជាម្នាក់ក្នុងចំណោមគ្នា ២ នាក់ដែលនៅរស់រានមានជីវិតពីគ្រោះថ្នាក់ចរាចរណ៍នេះ ត្រូវបានសមត្ថកិច្ចចាប់ខ្លួន និងកសាងសំណុំរឿងបញ្ជូនទៅកាន់ការិយាល័យរដ្ឋអាជ្ញា។ប្រទេសបូលីវី មានកំណត់ត្រាដ៏សោកសៅនៅពេលនិយាយអំពីសុវត្ថិភាពផ្លូវហាយវេ ហើយគ្រោះថ្នាក់ដែលពាក់ព័ន្ធនឹងរថយន្តក្រុងធ្វើដំណើរពេលយប់គឺជារឿងធម្មតា ខណៈដែលអាជ្ញាធរបូលីវី បានបង្ហាញកិច្ចខិតខំប្រឹងប្រែងតិចតួចណាស់ក្នុងការដោះស្រាយបញ្ហានេះ៕

អ៊ីស្រាអែល គ្រោងនឹងកែសម្រួលយុទ្ធសាស្ត្រសង្គ្រាមនៅហ្កាហ្សា បន្ទាប់ពីការស្លាប់បុគ្គលិកជំនួយ

អ៊ីស្រាអែល បាននិយាយកាលពីថ្ងៃព្រហស្បតិ៍ (០៤ មេសា) ថាខ្លួននឹងកែសម្រួលយុទ្ធសាស្ត្រក្នុងសង្គ្រាមហ្កាហ្សា បន្ទាប់ពីការស្លាប់របស់បុគ្គលិកជំនួយ ៧ នាក់នៅក្នុងការវាយប្រហារតាមអាកាស ដែលយោធារបស់ខ្លួនបានទទួលស្គាល់ថាជាកំហុសដ៏ធំមួយ ហើយបន្ថែមថាការរកឃើញក្នុងការស៊ើបអង្កេត នឹងត្រូវបានបង្ហាញជាសាធារណៈក្នុងពេលឆាប់ៗនេះ។ឧប្បត្តិហេតុកាលពីថ្ងៃច័ន្ទ បានធ្វើឱ្យលោកខាងលិចមានការខឹងសម្បារចំពោះចំនួនការស្លាប់ជនស៊ីវិលដែលកំពុងកើនឡើងនៅក្នុងតំបន់ហ៊ុមព័ទ្ធប៉ាឡេស្ទីន ជាពិសេសនៅពេលដែលបុគ្គលិកទីភ្នាក់ងារផ្ទះបាយកណ្តាលរបស់ពិភពលោក (WCK) ត្រូវបានសម្លាប់ដែលរួមមានពលរដ្ឋអូស្ត្រាលី អង់គ្លេស ប៉ូឡូញ និងពលរដ្ឋសញ្ជាតិពីរ អាមេរិក-កាណាដា។យ៉ាងហោចណាស់បុគ្គលិកមនុស្សធម៌ ១៩៦ នាក់ត្រូវបានសម្លាប់នៅហ្កាហ្សា ចាប់តាំងពីខែតុលាមក នេះបើយោងតាមអង្គការសហប្រជាជាតិ។ បណ្ដាមេដឹកនាំអ៊ីស្រាអែល បានសម្តែងការសោកសៅចំពោះអ្វីដែលយោធាហៅថាជា «កំហុសដ៏ធ្ងន់ធ្ងរ» បន្ទាប់ពីការកំណត់អត្តសញ្ញាណខុសនៃក្បួនរថយន្តអង្គការ WCK នៅពេលយប់ នៅក្នុងតំបន់ប្រយុទ្ធដ៏ស្មុគស្មាញមួយ។ស្ថាបនិកអង្គការសប្បុរសធម៌នេះ គឺមេចុងភៅដ៏ល្បី លោក ហូសេ អាន់ដ្រេស (Jose Andres) បាននិយាយថា ក្បួនរថយន្តនោះត្រូវបាន «តម្រង់គោលដៅជាប្រព័ន្ធ» ទោះបីជាយោធាអ៊ីស្រាអែលដឹងពីការចល័តរបស់បុគ្គលិករបស់លោក ដោយបានច្រានចោលការអះអាងរបស់អ៊ីស្រាអែល ដែលថានោះគ្រាន់តែជាកំហុសដោយអចេតនា ខណៈលោកបានអំពាវនាវឱ្យមានការស៊ើបអង្កេតឯករាជ្យលើឧបទ្ទវហេតុនេះ៕

បណ្ដាញសង្គម

ព័ត៌មានថ្មីៗ

រដ្ឋមន្ត្រីការបរទេសកម្ពុជាចូលរួម និងថ្លែងសុន្ទរកថាក្នុងពិធីជប់លៀង “រាត្រីនៃកិច្ចសហប្រតិបត្តិការឡានឆាង-មេគង្គ”

សម្តេចតេជោ ហ៊ុន សែន៖តើពួកក្បត់ជាតិនេះបើមិនបានភូតកុហក់វាងាប់ឬអី? បានជាពួកវាបន្តបោកប្រាស់ប្រជាជនបែបនេះ

ក្រសួងឧស្សាហកម្មនឹងរៀបចំទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី៤ ដើម្បីជំរុញ បរិវត្តកម្មកម្ពុជា

ចិនជំរុញឲ្យមានអាពាហ៍ពិពាហ៍ និងការសម្រាលបុត្រ ស្របពេលផ្លាស់ប្តូរឥរិយាបថសង្គម

អ៊ីស្រាអែល៖ គោលដៅចំនួន ២.០០០ទីតាំង ត្រូវបានវាយប្រហារនៅលីបង់

ដាណឺម៉ាកនឹងជ្រើសរើសសភាថ្មី នៅក្នុងការបោះឆ្នោតស្ថិតក្រោមស្រមោលរបស់លោក Trump

ចិនជំរុញឲ្យគ្រប់ភាគីទាំងអស់ក្នុងជម្លោះឈូងសមុទ្រ ធានាការផ្គត់ផ្គង់ប្រេងប្រកបដោយស្ថិរភាព និងគ្មានការរារាំង

ហូឡង់រឹតបន្តឹងសន្តិសុខ ក្រោយមានការបាញ់ប្រហារលើបុរសម្នាក់ដែលរិះគន់អាជ្ញាធរអ៊ីរ៉ង់

អ្នកនាំពាក្យកងឆ្មាំបដិវត្តន៍អ៊ិស្លាមអ៊ីរ៉ង់ ត្រូវបានសម្លាប់នៅក្នុងការវាយប្រហាររបស់អាមេរិក-អ៊ីស្រាអែល

សហជីពនៅកម្ពុជាគាំទ្ររដ្ឋាភិបាលក្នុងការជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877