BTV NEWS

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

ស្នងការរាជធានី បញ្ជាឲ្យកម្លាំងសមត្ថកិច្ចចុះពិនិត្យទីតាំងផាប់មួយកន្លែង នៅខណ្ឌទួលគោក ក្រោយឃើញមានក្មេងៗទៅប្រមូលផ្តុំផឹកស៊ីទាំងថ្ងៃ

ពលរដ្ឋម្នាក់ស្លាប់ និងម្នាក់រងរបួសករណីផ្ទុះគ្រាប់បែកចង្កោម នៅស្រុកស្វាយចេក ខេត្តបន្ទាយមានជ័យ

បង្រ្កាបទីតាំងបទល្មើសឆបោកតាមប្រព័ន្ធបច្ចេកវិទ្យាឈ្មោះឆាយណាបឹងបេង ខេត្តបន្ទាយមានជ័យ រកឃើញភស្តុតាង និងជនបរទេសមួយចំនួន

សន្តិសុខ និង សង្គម

UN ត្រៀមបេសកកម្មទៅកាន់មន្ទីរពេទ្យ Al Shifa តំបន់ហ្កាហ្សា បន្ទាប់ពីអ៊ីស្រាអែលដកកងទ័ពចេញ

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទថា អង្គការសហប្រជាជាតិ កំពុងរៀបចំបេសកកម្មទៅកាន់មន្ទីរពេទ្យ Al Shifa ក្នុងតំបន់ហ្កាហ្សា បន្ទាប់ពីការដកខ្លួនរបស់កងទ័ពអ៊ីស្រាអែលចេញពីបរិវេណនេះ។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយថា យើងកំពុងរៀបចំផែនការបេសកកម្មទៅកាន់មន្ទីរពេទ្យនេះឱ្យបានឆាប់តាមដែលយើងអាចធ្វើទៅបាន ដើម្បីជួយប្រជាជនឱ្យទទួលបានការយកចិត្តទុកដាក់ផ្នែកវេជ្ជសាស្ត្រ និងដើម្បីវាយតម្លៃស្ថានភាពមន្ទីរពេទ្យ។ បេសកកម្មនេះ ធ្វើឡើងខណៈយើងបានឃើញរបាយការណ៍ថា កងកម្លាំងការពារជាតិអ៊ីស្រាអែលចាកចេញពីបរិវេណមន្ទីរពេទ្យAl Shifa ។ អ្នកនាំពាក្យរូបនេះ បាននិយាយថា អង្គការសុខភាពពិភពលោក (WHO) កំពុងរង់ចាំការកាត់បន្ថយជម្លោះ និងការធានាបានសុវត្ថិភាពសមស្របពីរដ្ឋាភិបាលអ៊ីស្រាអែល។ ទន្ទឹមនឹងនេះ នៅមន្ទីរពេទ្យ Al Aqsa តំបន់ហ្កាហ្សាភាគកណ្តាល ក្រុមអង្គការសុខភាពពិភពលោក កំពុងបំពេញបេសកកម្មមនុស្សធម៌នៅទីនោះ នៅពេលដែលជំរំតង់មួយកន្លែងនៅក្នុងបរិវេណមន្ទីរពេទ្យ ត្រូវបានវាយប្រហារដោយការវាយប្រហារតាមអាកាសរបស់អ៊ីស្រាអែល។ មនុស្ស៤នាក់ ត្រូវបានគេរាយការណ៍ថាបានស្លាប់ និង១៧នាក់ផ្សេងទៀតរងរបួស ។ លោក Dujarric និយាយថា ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយថា ពុំមានការផ្លាស់ប្តូរគួរឱ្យកត់សម្គាល់ចំពោះបរិមាណនៃការផ្គត់ផ្គង់ជំនួយមនុស្សធម៌ចូលទៅកាន់តំបន់ហ្កាហ្សា ឬដំណើរការប្រសើរឡើងសម្រាប់ការចូលទៅកាន់ភាគខាងជើងឡើយ ។ចាប់ពីថ្ងៃទី ១ ដល់ថ្ងៃទី ៣០ ខែមីនា រថយន្តដឹកជំនួយចំនួន ១៥៩គ្រឿងជាមធ្យម បានឆ្លងកាត់តំបន់ហ្កាហ្សាក្នុងមួយថ្ងៃ។ ចំនួនច្រើនបំផុត គឺកាលពីថ្ងៃព្រហស្បតិ៍សប្តាហ៍មុន ដែលរថយន្តដឹកជំនួយ ២៦៤គ្រឿង បានចូលទៅក្នុងតំបន់ហ្កាហ្សា។ លោកបាននិយាយបន្តថា នេះនៅតែមានកម្រិតទាបជាងគោលដៅប្រតិបត្តិការ នៃរថយន្តដឹកជំនួយចំនួន ៥០០ គ្រឿងក្នុងមួយថ្ងៃ។

ទាហានអ៊ីស្រាអែល ដកខ្លួនចេញពីមន្ទីរពេទ្យហ្កាហ្សា ដោយបន្សល់ទុកកម្ទេចថ្ម និងសាកសពជាច្រើន

កងកម្លាំងអ៊ីស្រាអែលបានចាកចេញពីមន្ទីរពេទ្យ អាល់ស៊ីហ្វា (Al Shifa) ក្នុងទីក្រុងហ្កាហ្សា កាលពីថ្ងៃច័ន្ទ (០១ មេសា) បន្ទាប់ពីប្រតិបត្តិការរយៈពេលពីរសប្តាហ៍ដោយកងកម្លាំងពិសេស ដែលបានឃាត់ខ្លួនជនសកម្មប្រយុទ្ធប៉ាឡេស្ទីនរាប់រយនាក់ដែលសង្ស័យ និងបានបន្សល់ទុកនូវសំណល់កម្ទេចកម្ទីនៃអគារដែលត្រូវបានបំផ្លាញ ព្រមទាំងសាកសពជាច្រើន។ក្រុមមន្ត្រីប៉ាឡេស្ទីនបានហៅការវាយឆ្មក់លើមន្ទីរពេទ្យព្យាបាលអ្នកជំងឺរងរបួសធ្ងន់ធ្ងរនេះ ថាជាឧក្រិដ្ឋកម្មសង្គ្រាម ខណៈដែលក្រុមមន្ត្រីអ៊ីស្រាអែលបាននិយាយថា កងកម្លាំងពិសេសបានធ្វើការវាយប្រហារតាមគោលដៅប្រឆាំងនឹងមូលដ្ឋានរឹងមាំរបស់ក្រុមហាម៉ាស ដែលមានចេតនាដាក់ទីតាំងក្នុងចំណោមជនស៊ីវិលដែលងាយរងគ្រោះ។យោងទៅតាមយោធាអ៊ីស្រាអែលបានឱ្យដឹងថា ប្រជាជនប៉ាឡេស្ទីនចំនួនប្រហែល ៦.២០០ នាក់ ធ្លាប់បានជ្រកកោននៅក្នុងបរិវេណនោះ ដែលជាទីតាំងមួយក្នុងចំណោមទីតាំងផ្សេងទៀតនៅភាគខាងជើងហ្កាហ្សា ដែលមានការផ្គត់ផ្គង់អគ្គិសនី និងទឹកមួយចំនួន។លោក អ៊ីស្មែល អាល់ថាវ៉ាបតា (Ismail Al-Thawabta) នាយកការិយាល័យប្រព័ន្ធផ្សព្វផ្សាយតំបន់ហ្កាហ្សា របស់ក្រុមហាម៉ាស បាននិយាយថា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនចំនួន ៤០០ នាក់នៅក្នុង និងជុំវិញមន្ទីរពេទ្យនោះ រួមទាំងវេជ្ជបណ្ឌិតស្ត្រីម្នាក់ និងកូនប្រុសដែលជាវេជ្ជបណ្ឌិតផងដែរនោះ ហើយបានបញ្ឈប់សកម្មភាព និងប្រតិបត្តិការរបស់មន្ទីរពេទ្យទាំងមូល៕

ចំហេះព្រៃដ៏ច្រើនកន្លែងមិនធ្លាប់មាន បានវាយប្រហារវេណេស៊ុយអេឡា ក្នុងអំឡុងពេលគ្រោះរាំងស្ងួត

យោងតាមទិន្នន័យដែលបានចេញផ្សាយកាលថ្ងៃចន្ទ (០១ មេសា) បានឱ្យដឹងថា ប្រទេសវេណេស៊ុយអេឡា កំពុងទប់ទល់នឹងចំហេះព្រៃដ៏ច្រើនសន្ធឹកសន្ធាប់មិនធ្លាប់មាន ខណៈគ្រោះរាំងស្ងួតដែលជំរុញដោយបម្រែបម្រួលអាកាសធាតុបានលេបត្របាក់ប្រទេសតំបន់ព្រៃអាម៉ាហ្សូនមួយនេះ។យោងតាមទីភ្នាក់ងារស្រាវជ្រាវ អ៊ីនប៉េ (Inpe) របស់ប្រេស៊ីល ដែលឃ្លាំមើលទ្វីបអាមេរិកខាងត្បូង បានឱ្យដឹងថា ផ្កាយរណបបានចុះបញ្ជីចំណុចចំហេះជាង ៣០.២០០ កន្លែងនៅក្នុងប្រទេសវេណេស៊ុយអេឡា ចាប់ពីខែមករា ដល់ខែមីនា ដែលជាកម្រិតខ្ពស់បំផុតសម្រាប់រយៈពេលនោះ ចាប់តាំងពីកំណត់ត្រាបានចាប់ផ្តើមក្នុងឆ្នាំ ១៩៩៩ មក។នោះរាប់បញ្ចូលទាំងចំហេះព្រៃនៅព្រៃអាម៉ាហ្សូន ក៏ដូចជាព្រៃឈើ និងវាលស្មៅផ្សេងទៀតរបស់ប្រទេស។ ក្រុមអ្នកស្រាវជ្រាវបាននិយាយថា ចំហេះដែលបង្កើតដោយមនុស្ស ដែលតែងតែធ្វើឡើងដើម្បីបោសសម្អាតដីសម្រាប់កសិកម្ម កំពុងរីករាលដាលដោយមិនអាចគ្រប់គ្រងបាន ដោយសារសីតុណ្ហភាពខ្ពស់ និងភ្លៀងធ្លាក់ទាបនៅភាគខាងជើងអាមេរិកខាងត្បូង ក៏ដូចជាកង្វះផែនការបង្ការជាដើម។នៅក្នុងប្រទេសវេណេសុយអេឡា ក្រុមពន្លត់អគ្គិភ័យប្រហែល ៤០០ នាក់បានប្រយុទ្ធនឹងចំហេះដ៏ធំមួយនៅថ្ងៃឈប់សម្រាកបុណ្យអ៊ីស្ទ័រ (Easter) នៅចុងសប្តាហ៍ ដែលគំរាមកំហែងដល់ឧទ្យានជាតិ ហិនរី ពីទៀ (Henri Pittier) ដែលជាតំបន់ឆ្នេរអភិរក្ស មានព្រៃឈើកម្រ នេះបើយោងតាមសេវាឧទ្យានជាតិ៕

ជនអន្តោប្រវេសន៍៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍មុន

អង្គការទេសន្តប្រវេសន៍អន្តរជាតិ (IOM) កាលពីថ្ងៃចន្ទ បាននិយាយថា ជនអន្តោប្រវេសន៍ចំនួន ៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍កន្លងទៅនេះ។អង្គការ IOM បាននិយាយនៅក្នុងសេចក្តីថ្លែងការណ៍ថា ចាប់ពីថ្ងៃទី ២៤ ដល់ថ្ងៃទី ៣០ ខែមីនា ឆ្នាំ២០២៤ ជនអន្តោប្រវេសន៍ចំនួន ៤៨០នាក់ ត្រូវបានស្ទាក់ចាប់ ហើយបានបញ្ជូនត្រឡប់ទៅកាន់ប្រទេសលីប៊ីវិញ។អង្គការ IOM បាននិយាយថា ជនអន្តោប្រវេសន៍ ដែលត្រូវបានជួយសង្គ្រោះរួមមានស្ត្រី ២៦ នាក់ និងកុមារ ៥ នាក់ ហើយសាកសពជនអន្តោប្រវេសន៍ពីរនាក់ត្រូវបានស្រង់យកមកវិញ។ជនអន្តោប្រវេសន៍សរុបចំនួន ៣.៧៩១នាក់ ត្រូវបានជួយសង្គ្រោះ ខណៈ១២០នាក់ បានស្លាប់ និង ២៥៣នាក់ផ្សេងទៀត បានបាត់ខ្លួននៅឆ្នេរសមុទ្រលីប៊ី។ជនអន្តោប្រវេសន៍គ្មានឯកសារជាច្រើននាក់ ដែលភាគច្រើនមកពីទ្វីបអាហ្រ្វិក បានជ្រើសរើសឆ្លងកាត់សមុទ្រមេឌីទែរ៉ាណេ ទៅកាន់ឆ្នេរសមុទ្រអឺរ៉ុបពីប្រទេសលីប៊ី ដែលទទួលរងភាពចលាចលចាប់តាំងពីឆ្នាំ ២០១១ នៅពេលដែលអតីតមេដឹកនាំចុងក្រោយ លោក មួម៉ាហ្គាដាហ្វី(Muammar Gaddafi) ត្រូវបានផ្ដួលរំលំ។រដ្ឋមន្ត្រីក្រសួងមហាផ្ទៃប្រទេសលីប៊ី លោក Emad al-Tarabelsi កាលពីពេលថ្មីៗនេះបាននិយាយព្រលយពាក្យថា ក្រសួងគ្រោងនឹងធ្វើមាតុភូមិនិវត្តន៍ជនអន្តោប្រវសេន៍ខុសច្បាប់ជាង ២០.០០០ នាក់ក្នុងឆ្នាំនេះ។

ម៉ិកស៊ិក ជម្លៀសប្រជាជនរបស់ខ្លួន៣៤នាក់ ចេញពីប្រទេសហៃទី គេចពីវិបត្តិអំពើហិង្សា

ប្រទេសម៉ិកស៊ិក បានជម្លៀសប្រជាជនរបស់ខ្លួនចំនួន ៣៤ នាក់ ដែលមានបំណងចាកចេញពីប្រទេសហៃទី ខណៈអំពើហឹង្សារបស់ក្រុមជនអន្ធពាល បានរាលដាលនៅក្នុងប្រទេសតំបន់សមុទ្រការ៉ាអ៊ីបមួយនេះ។ កងទ័ពជើងទឹកប្រទេសម៉ិកស៊ិក បានចែករំលែកវីដេអូបង្ហាញពីឧទ្ធម្ភាគចក្រ ចុះចតនៅចំណតឧទ្ធម្ភាគចក្ររបស់ស្ថានទូតសាធារណរដ្ឋដូមីនីក ក្នុងទីក្រុង ព័រ អូប្រាំង ដើម្បីទទួលយកប្រជាជនម៉ិកស៊ិក ដែលរួមមានអនីតិជន៧នាក់។ឧទ្ធម្ភាគចក្រ បាននាំយកអ្នកជម្លៀសខ្លួនទៅកាន់នាវាមួយគ្រឿងរបស់កងទ័ពជើងទឹក ដែលដឹកជនជាតិរបស់ខ្លួនត្រឡប់ទៅប្រទេសម៉ិកស៊ិកវិញ។ រដ្ឋាភិបាលប្រទេសម៉ិកស៊ិក បាននិយាយនៅក្នុងសេចក្តីថ្លែងការណ៍ថា ប្រតិបត្តិការពិសេសនេះត្រូវបានដាក់ពង្រាយ ដោយសារតែអាកាសយានដ្ឋានអន្តរជាតិ របស់ប្រទេសហៃទីត្រូវបានគ្រប់គ្រងដោយខុសច្បាប់ ដោយក្រុមប្រដាប់អាវុធ។ការចាកចេញរបស់ជនជាតិបរទេសពីប្រទេសហៃទី បានកើនឡើងនាពេលថ្មីៗនេះ ខណៈអនាគតនយោបាយរបស់ប្រទេសនេះ ស្ថិតក្នុងភាពមិនប្រាកដប្រជា ដោយក្រុមជនអន្ធពាលប្រដាប់អាវុធ បានពង្រីកការគ្រប់គ្រងរបស់ពួកគេនៅរដ្ឋធានី និងនៅតំបន់ដាច់ឆ្ងាយបន្ថែមទៀត។ ជម្លោះនេះ បានសម្លាប់មនុស្សរាប់ពាន់នាក់ និងរាប់សែននាក់បានភៀសខ្លួន ហើយការវាយប្រហារជាបន្តបន្ទាប់ រួមមានទាំង ការវាយឆ្មក់ទៅលើប៉ុស្តិ៍នគរបាល និងអាកាសយានដ្ឋានអន្តរជាតិ នាំឱ្យមានការផ្អាកជើងហោះហើរពាណិជ្ជកម្មជាច្រើនជើង។

នាវាដំបូងគេ បានឆ្លងកាត់ផ្លូវទន្លេជាបណ្តោះអាសន្ន បន្ទាប់ពីការបាក់ស្ពាននៅទីក្រុង Baltimore

យោងតាមឆ្មាំល្បាតឆ្នេរសហរដ្ឋអាមេរិក បាននិយាយថា នាវា ថាក់បូត គ្រីស្តាល់ ខូសថ៍(Tugboat Crystal Coast) ដែលមានផ្ទុកប្រេង គឺជានាវាដំបូងគេ ដែលធ្វើដំណើរឆ្លងកាត់ផ្លូវទន្លេដែលទើបបង្កើតថ្មី ជាបណ្តោះអាសន្ន នៅទីក្រុង Baltimore បន្ទាប់ពីការបាក់រលំស្ពាន Key Bridge ។ នាវានេះ ធ្វើដំណើរទៅកាន់មូលដ្ឋានទ័ពអាកាស Dover ដោយមានផ្ទុកប្រេងឥន្ធនៈ។ផ្លូវឆ្លងកាត់គ្រាអាសន្ន មានទទឹង ២៦៤ ហ្វីត និងជម្រៅ ១១ហ្វីត ត្រូវបានសម្អាតកាលពីថ្ងៃចន្ទ ដើម្បីអនុញ្ញាតឱ្យនាវាសំខាន់ៗឆ្លងកាត់តាមដងទន្លេ Patapsco ជុំវិញបំណែកបាក់បែកនៅកន្លែងគ្រោះមហន្តរាយស្ពានបាក់។ផ្លូវទឹកជម្រៅ១៥ហ្វីត ទីពីរ ត្រូវបានគេរំពឹងថានឹងបើកក្នុងពេលឆាប់ៗនេះដើម្បីអនុញ្ញាតឱ្យនាវាសមុទ្រចូលទៅកាន់កំពង់ផែ Baltimore រួមជាមួយនឹងផ្លូវទឹកទីបីដែលមានជម្រៅកាន់តែជ្រៅជាងនេះ។អភិបាលរដ្ឋ លោក Wes Moore បាននិយាយកាលពីថ្ងៃច័ន្ទថា ថ្ងៃនេះជាព្រឹត្តិការណ៍ដ៏សំខាន់មួយនៅក្នុងដំណើរការនៃការចាប់ផ្តើមទាញយកបំណែកស្ពានចេញ ដោយចាប់ផ្តើមបើកបណ្តាញផ្លូវទឹក។ លោក ដាវីដ អូ ខន់នែល (David O'Connell) ប្រធានក្រុមឆ្មាំល្បាតឆ្នេរអាមេរិក ដែលជាអ្នកសម្របសម្រួលនៅកន្លែងកើតហេតុរបស់សហព័ន្ធ ទទួលបន្ទុកការឆ្លើយតបរួមចំពោះការបាក់ស្ពាន បាននិយាយនៅក្នុងបទសម្ភាសន៍ផ្តាច់មុខជាមួយប្រព័ន្ធផ្សព្វផ្សាយ CBS News ថា បណ្តាញផ្លូវទឹកជំនួយត្រូវបានគ្រោងនឹងបើកនៅតាមបណ្តោយភាគឦសាននៃផ្លូវទឹក និងមួយខ្សែទៀតនឹងដំណើរការតាម បណ្តោយភាគខាងត្បូង។

រដ្ឋាភិបាលអ៊ីស្រាអែល អនុម័តច្បាប់បិទសារព័ត៌មាន Al Jazeera ជាបណ្ដោះអាសន្ន

សភារបស់អ៊ីស្រាអែល បានអនុម័តច្បាប់មួយកាលពីថ្ងៃចន្ទ ដោយត្រួសត្រាយផ្លូវ ដើម្បីបិទបណ្តាញព័ត៌មាន Al Jazeera ដែលមានមូលដ្ឋាននៅប្រទេសកាតា ក្រោមច្បាប់អនុញ្ញាតឲ្យមានការហាមឃាត់ បណ្តោះអាសន្ននៃបណ្តាញព័ត៌មានបរទេសដែលរដ្ឋាភិបាលចាត់ទុកថា ជាការគំរាមកំហែងដល់សន្តិសុខជាតិ។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា លោកនឹង «ចាត់វិធានការភ្លាមៗ» ដើម្បីអនុវត្តច្បាប់ប្រឆាំងនឹងសារព័ត៌មាន Al Jazeera ដោយចោទប្រកាន់បណ្តាញព័ត៌មានដែលផ្តល់មូលនិធិដោយប្រទេសកាតាថា បានគាំទ្រការវាយប្រហារថ្ងៃទី៧ ខែតុលារបស់ក្រុមហាម៉ាសប្រឆាំងនឹងអ៊ីស្រាអែល និងបម្រើជាភ្នាក់ងារសម្រាប់អង្គការភេរវកម្មដែលកំណត់ដោយសហរដ្ឋអាមេរិក។លោកណេតាន់យ៉ាហ៊ូ បានបង្ហោះជាភាសាហ៊ីប្រូ (Hebrew) នៅលើបណ្តាញសង្គមXថា៖«បណ្តាញសារព័ត៌មានភេរវកម្ម Al Jazeera នឹងលែងចាក់ផ្សាយពីអ៊ីស្រាអែលទៀតហើយ។ ខ្ញុំមានបំណងធ្វើសកម្មភាពភ្លាមៗដោយអនុលោមតាមច្បាប់ថ្មី ដើម្បីបញ្ឈប់សកម្មភាពរបស់បណ្តាញសារព័ត៌មាននេះ»។ សារព័ត៌មាន Times of Israel បានរាយការណ៍ថា ច្បាប់នេះ បានអនុម័តដោយសភាអ៊ីស្រាអែល ដោយមានសំឡេងគាំទ្រ៧១សំឡេង និងសំឡេងប្រឆាំង១០សំឡេង នៅក្នុងការអានលើកទីពីរ និងទីបីរបស់ខ្លួននៅក្នុងកិច្ចប្រជុំពេញអង្គនៅក្នុងសភា។ ការសម្រេចឲ្យបិទបណ្តាញសារព័ត៌មានបរទេសនេះដែលចាត់ទុកថាជាការគំរាមកំហែងសន្តិសុខជាតិ អាចអនុវត្តបានតែ៤៥ថ្ងៃប៉ុណ្ណោះ ប៉ុន្តែអាចបន្តជាថ្មីសម្រាប់រយៈពេល ៤៥ ថ្ងៃទៀត។ ច្បាប់នេះ នឹងផុតកំណត់នៅថ្ងៃទី៣១ ខែកក្កដា។ទាំងអ៊ីស្រាអែល និងសហរដ្ឋអាមេរិក សុទ្ធតែរិះគន់ចំពោះការតាមយកព័ត៌មានរបស់សារព័ត៌មាន Al Jazeera លើអ៊ីស្រាអែលយ៉ាងទូលំទូលាយ និងការរាយការណ៍អំពីសង្រ្គាមរបស់អ៊ីស្រាអែលប្រឆាំងនឹងក្រុមហាម៉ាស ចាប់តាំងពីការវាយប្រហារថ្ងៃទី៧ ខែតុលា។ រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន (Antony Blinken) បានអំពាវនាវឲ្យរដ្ឋាភិបាលកាតាកាត់បន្ថយការញុះញង់ប្រឆាំងនឹងអ៊ីស្រាអែលនៅក្នុងការផ្សាយរបស់សារព័ត៌មាន Al Jazeera អំពីផលវិបាកនៃការវាយប្រហារខែតុលា។ប៉ុន្តែរដ្ឋបាលលោកបៃដិន បាននិយាយថា ខ្លួនមានការព្រួយបារម្ភចំពោះការអនុម័តច្បាប់របស់អ៊ីស្រាអែល។

ការតវ៉ានៅក្រុងហ្ស៉េរុយសាឡឹមបង្ហាញពីកំហឹងប្រឆាំងនឹងលោក Netanyahu លែងរង់ចាំដល់សង្គ្រាមចប់ទៀតហើយ

បាតុកម្មដ៏ធំនៅមុខសភា(Knesset)និងការិយាល័យរដ្ឋាភិបាលកាលពីយប់ថ្ងៃអាទិត្យនៅក្នុងទីក្រុងហ្ស៉េរុយសាឡឹម និងតេល អាវីវ គឺជាអ្វីមួយដែលប្រៀបបានទៅនឹការតស៊ូដ៏ធំប្រឆាំងនឹងកែប្រែប្រព័ន្ធតុលាការកាលពីឆ្នាំមុន។ នេះគឺជាការប្រមូលផ្ដុំគ្នាដ៏ច្រើននិងការរួមកម្លាំងដ៏ធំ ដែលជាទូទៅ អ្នកបោះឆ្នោតសម្រាប់គណបក្សអ្នកកណ្តាលនិយម មេរ៉េតស៍ និងការងារ (Meretz and Labor) ត្រូវបានគេមើលឃើញនៅក្នុងបាតុកម្ម នៅពេលដែល សភាបានលុបចោលស្តង់ដារសមហេតុផលរបស់តុលាការជាន់ខ្ពស់កាលពីរដូវក្តៅឆ្នាំមុន។ នេះគឺជាការតាំងចិត្តដូចគ្នា ប្រឆាំងនឹងនាយករដ្ឋមន្ត្រី ដែលធ្លាប់ព្យាយាមលុបបំបាត់លទ្ធិប្រជាធិបតេយ្យ ហើយឥឡូវនេះបានដឹកនាំសង្គ្រាមដែលនាំឲ្យមានបញ្ហាកាន់តែស្មុគស្មាញ ដោយមានចំណាប់ខ្មាំង ១៣៤ នាក់នៅតែត្រូវបានឃុំខ្លួននៅក្នុងដែនដីហ្កាហ្សា។ សម្រាប់បាតុករដ៏ច្រើន ដែលបានសម្រុកទៅកាន់ផ្លូវកាបលែន(Kaplan)នៃទីក្រុងហ្ស៉េរុយឡឹម (Jerusalem)ដូចជាទឹកបាក់ទំនប់ពីទីក្រុងស៊ីណេម៉ា(Cinema)ឆ្លងកាត់សភា ទៅកាន់បណ្ណាល័យជាតិថ្មី គឺជាប្រភេទនៃការជួបជុំគ្នាឡើងវិញ បន្ទាប់ពីការផ្អាកអស់រយៈពេល៦ខែ។ទោះយ៉ាងណា មានការខ្វែងគំនិតគ្នាមួយចំនួនរវាងបាតុកម្មប្រឆាំងនឹងការកែប្រែប្រព័ន្ធតុលាការ និងសកម្មភាពដ៏ធំប្រឆាំងលោក Netanyahu និងរដ្ឋាភិបាលរបស់លោក កាលពីថ្ងៃអាទិត្យ។ ទីមួយ នៅក្នុងការតវ៉ាប្រឆាំងនឹងផ្លាស់ប្ដូរអ្នកនយោបាយកំពុងស្ថិតក្នុងតំណែងដោយមិនត្រូវបានអញ្ជើញឲ្យនិយាយនៅលើឆាក។ ទីពីរ ដោយសារកាលៈទេសៈ បន្ទាប់ពីគ្រោះមហន្តរាយថ្ងៃទី ៧ ខែតុលា របៀបវារៈទាំងមូលបានផ្លាស់ប្តូរ ជាមួយនឹងការដោះស្រាយ និងកំហឹងបន្ថែម។ ការកែប្រែច្បាប់ គឺកើតចេញពីការចរចា។ ឥឡូវនេះបញ្ហាគឺការរំដោះចំណាប់ខ្មាំង វិបត្តិកើតចេញពីការលើកលែងការកេណ្ឌកម្លាំងបុរសជ្វីហ្វជ្រុលនិយមអូសតូដុកមិនឲ្យចូលបម្រើយោធា ការប្រព្រឹត្តរបស់អ្នកនយោបាយ និងការអំពាវនាវដោយទទូចឲ្យរៀបចំការបោះឆ្នោតថ្មី និងទាមទារឲ្យលោក Netanyahu លាលែងពីតំណែង៕

រដ្ឋមន្ត្រីប៉េរូ ៦ រូបលាលែងពីតំណែង បន្ទាប់ពីនគរបាលឆ្មក់ចូលឆែកឆេរនិវេសនដ្ឋានប្រធានាធិបតី

រដ្ឋមន្ត្រីចំនួនប្រាំមួយរូបរបស់ប្រទេសប៉េរូ ត្រូវបានជំនួសតំណែងកាលពីថ្ងៃចន្ទ (០១ មីនា) បន្ទាប់ពីពួកគេបានលាលែងពីតំណែងភ្លាមៗ ស្របពេលមានរឿងអាស្រូវនយោបាយថ្មីពាក់ព័ន្ធនឹងនាឡិកាប្រណីតដែលកំណត់គោលដៅលើប្រធានាធិបតីប៉េរូ ដោយតម្រូវឱ្យមានការរុះរើគណរដ្ឋមន្រ្តី និងបន្ថែមភាពប្រែប្រួលថែមទៀតដល់នយោបាយដ៏រង្គោះរង្គើរបស់ប្រទេសអាមេរិកខាងត្បូងមួយនេះ។ការលាលែងពីតំណែងភ្លាមៗនេះ ដែលរួមទាំងរដ្ឋមន្ត្រីក្រសួងមហាផ្ទៃ ធ្វើឡើងបន្ទាប់ពីការស៊ើបអង្កេតមួយជុំវិញការចោទប្រកាន់ពីការប្រព្រឹត្តខុសច្បាប់ដោយប្រធានាធិបតី លោកស្រី ឌីណា បូលូអាតតេ (Dina Boluarte) ដែលកំពុងត្រូវបានស៊ើបអង្កេតជុំវិញនាឡិកាម៉ាក រ៉ូឡិច (Rolex) ស៊េរីខ្ពស់ជាច្រើនគ្រឿងរបស់លោកស្រី។នគរបាល និងក្រុមរដ្ឋអាជ្ញាបានឆ្មក់ចូលនិវេសនដ្ឋាន និងការិយាល័យរបស់មេដឹកនាំរូបនេះកាលពីចុងសប្តាហ៍ ដើម្បីស្វែងរកភស្តុតាងនៃប្រភពដើមនៃនាឡិកា Rolex យ៉ាងហោចណាស់បីគ្រឿង។ លោកស្រី បូលូអាតតេ បានបដិសេធថាខ្លួនមិនបានធ្វើខុសអ្វីឡើយ ហើយបានទទូចថាលោកស្រីទិញនាឡិកាដោយថវិកាផ្ទាល់ខ្លួនប៉ុណ្ណោះ។រដ្ឋមន្ត្រីក្រសួងមហាផ្ទៃ លោក វីកទ័រ តរ៉េស (Victor Torres) បានប្រកាសពីការសម្រេចចិត្តចុះចេញពីតំណែងកាលពីថ្ងៃច័ន្ទ ដែលត្រូវបានបន្តដោយការលាលែងពីរដ្ឋមន្ត្រីអប់រំ និងរដ្ឋមន្ត្រីកិច្ចការនារី ព្រមទាំងការលាលែងពីគណៈរដ្ឋមន្ត្រីចំនួនបីរូបបន្ថែមទៀត។ អ្នកទាំងអស់នោះបានសម្តែងការគាំទ្រចំពោះលោកស្រី បូលូអាតតេ ដោយរដ្ឋមន្រ្តីម្នាក់ក្នុងចំណោមនោះបានហៅការឆ្មក់ឆែកឆេររបស់នគរបាលនេះថាថារឿង «មិនចាំបាច់» និង «ហួសហេតុ»៕

ឯកអគ្គរដ្ឋទូតអ៊ីរ៉ង់ ប្រចាំស៊ីរី ប្តេជ្ញាសងសឹកនឹងការវាយប្រហាររបស់អ៊ីស្រាអែល លើស្ថានទូត

ឯកអគ្គរដ្ឋទូតអ៊ីរ៉ង់ប្រចាំប្រទេសស៊ីរី លោក ហូសេន អាកបារី (Hossein Akbari) បានសន្យាថា អ៊ីរ៉ង់នឹងឆ្លើយតបចំពោះការវាយប្រហាររបស់អ៊ីស្រាអែល ទៅលើស្ថានទូតអ៊ីរ៉ង់ក្នុងរដ្ឋធានី ដាម៉ាស នៃប្រទេសស៊ីរី កាលពីព្រឹកថ្ងៃចន្ទ (០១ មេសា) ជាមួយនឹងកម្លាំងស្មើគ្នាដូចដែលអីស្រាអែលបានប្រើ។យន្តហោះចម្បាំងអ៊ីស្រាអែល ដែលត្រូវបានសង្ស័យ បានវាយប្រហារតាមអាកាសលើស្ថានទូតអ៊ីរ៉ង់ ក្នុងប្រទេសស៊ីរី កាលពីថ្ងៃចន្ទ នៅក្នុងការវាយប្រហារដែលអ៊ីរ៉ង់បាននិយាយថា បានសម្លាប់ទីប្រឹក្សាយោធារបស់ខ្លួនចំនួន៧ នាក់ ដែលរួមមានមេបញ្ជាការជាន់ខ្ពស់បីនាក់ ហើយនោះបានក្លាយជាការកើនឡើងដ៏ធំនៅក្នុងសង្រ្គាមរបស់អ៊ីស្រាអែល ជាមួយសត្រូវក្នុងតំបន់។ឯកអគ្គរដ្ឋទូតអ៊ីរ៉ង់រូបនេះបានចេញការព្រមានថា អ៊ីរ៉ង់នឹងមិនបណ្តោយឱ្យសកម្មភាពរបស់អ៊ីស្រាអែលប្រព្រឹត្តទៅដោយពុំមានចម្លើយតបឡើយ ហើយនឹងសងសឹកដោយកម្លាំងស្មើគ្នានេះ។ រដ្ឋមន្ត្រីការបរទេសស៊ីរី លោក ហ្វៃសាល ម៉េកដាដ (Faisal Mekdad) ដែលបានទៅដល់កន្លែងកើតហេតុ បន្ទាប់ពីការវាយប្រហារដោយមីស៊ីលនោះ បានថ្កោលទោសឧបទ្ទវហេតុនេះថា ជារឿងអយុត្តិធម៌។ក្រសួងការពារជាតិស៊ីរីបាននិយាយថា ការវាយប្រហារដោយមីស៊ីលនេះបានកើតឡើងនៅម៉ោងប្រហែល ៥:០០ ល្ងាច (ម៉ោងក្នុងស្រុក)។ អ៊ីស្រាអែល បានកំណត់គោលដៅជាយូរមកហើយលើការដំឡើងយោធារបស់អ៊ីរ៉ង់ នៅក្នុងប្រទេសស៊ីរី និងក្រុមប្រយុទ្ធតំណាងរបស់ខ្លួន ប៉ុន្តែការវាយប្រហារកាលពីថ្ងៃចន្ទនេះ គឺជាលើកដំបូងហើយដែលអ៊ីស្រាអែលវាយប្រហារបរិវេណស្ថានទូតអ៊ីរ៉ង់ដ៏ធំដោយផ្ទាល់បែបនេះ៕

បណ្ដាញសង្គម

ព័ត៌មានថ្មីៗ

រដ្ឋមន្ត្រីការបរទេសកម្ពុជាចូលរួម និងថ្លែងសុន្ទរកថាក្នុងពិធីជប់លៀង “រាត្រីនៃកិច្ចសហប្រតិបត្តិការឡានឆាង-មេគង្គ”

សម្តេចតេជោ ហ៊ុន សែន៖តើពួកក្បត់ជាតិនេះបើមិនបានភូតកុហក់វាងាប់ឬអី? បានជាពួកវាបន្តបោកប្រាស់ប្រជាជនបែបនេះ

ក្រសួងឧស្សាហកម្មនឹងរៀបចំទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី៤ ដើម្បីជំរុញ បរិវត្តកម្មកម្ពុជា

ចិនជំរុញឲ្យមានអាពាហ៍ពិពាហ៍ និងការសម្រាលបុត្រ ស្របពេលផ្លាស់ប្តូរឥរិយាបថសង្គម

អ៊ីស្រាអែល៖ គោលដៅចំនួន ២.០០០ទីតាំង ត្រូវបានវាយប្រហារនៅលីបង់

ដាណឺម៉ាកនឹងជ្រើសរើសសភាថ្មី នៅក្នុងការបោះឆ្នោតស្ថិតក្រោមស្រមោលរបស់លោក Trump

ចិនជំរុញឲ្យគ្រប់ភាគីទាំងអស់ក្នុងជម្លោះឈូងសមុទ្រ ធានាការផ្គត់ផ្គង់ប្រេងប្រកបដោយស្ថិរភាព និងគ្មានការរារាំង

ហូឡង់រឹតបន្តឹងសន្តិសុខ ក្រោយមានការបាញ់ប្រហារលើបុរសម្នាក់ដែលរិះគន់អាជ្ញាធរអ៊ីរ៉ង់

អ្នកនាំពាក្យកងឆ្មាំបដិវត្តន៍អ៊ិស្លាមអ៊ីរ៉ង់ ត្រូវបានសម្លាប់នៅក្នុងការវាយប្រហាររបស់អាមេរិក-អ៊ីស្រាអែល

សហជីពនៅកម្ពុជាគាំទ្ររដ្ឋាភិបាលក្នុងការជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877