BTV NEWS

មនុស្សប្រុសស្រីពាក់ព័ន្ធករណីបង្កគ្រោះថ្នាក់ចរាចរណ៍នៅខណ្ឌឫស្សីកែវ បណ្តាលឲ្យក្មេងម្នាក់រងរបួសធ្ងន់នឹងត្រូវបញ្ចូនទៅតុលាការទាំង ២នាក់

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

ស្នងការរាជធានី បញ្ជាឲ្យកម្លាំងសមត្ថកិច្ចចុះពិនិត្យទីតាំងផាប់មួយកន្លែង នៅខណ្ឌទួលគោក ក្រោយឃើញមានក្មេងៗទៅប្រមូលផ្តុំផឹកស៊ីទាំងថ្ងៃ

ពលរដ្ឋម្នាក់ស្លាប់ និងម្នាក់រងរបួសករណីផ្ទុះគ្រាប់បែកចង្កោម នៅស្រុកស្វាយចេក ខេត្តបន្ទាយមានជ័យ

សន្តិសុខ និង សង្គម

ទីភ្នាក់ងារមនុស្សធម៌របស់UN ប្រើប្រាស់ការដឹកជញ្ជូនតាមអាកាស ដើម្បីដឹកជំនួយនិងបុគ្គលិកទៅហៃទី

ទីភ្នាក់ងារមនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធថា ពួកគេបានរៀបចំការដឹកជញ្ជូនតាមជើងយន្តហោះទៅកាន់ប្រទេសហៃទី មានឱសថ ការផ្គត់ផ្គង់វេជ្ជសាស្រ្ត និងបុគ្គលិកផ្តល់ជំនួយ ដែលមានសារៈសំខាន់សម្រាប់កិច្ចខិតខំប្រឹងប្រែងសង្គ្រោះនៅក្នុងប្រទេសដែលញាំញីដោយដោយជម្លោះមួយនេះ។ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ការដឹកជញ្ជូនតាមផ្លូវអាកាស អាចនាំយកថ្នាំពេទ្យបានជាង ៨០០គីឡូក្រាម រួមមានទាំងកញ្ចប់ឈាម និងសម្ភារៈផ្គត់ផ្គង់វេជ្ជសាស្រ្តផ្សេងទៀតទៅក្នុងប្រទេសនេះ។អង្គការ OCHA បាននិយាយថា ការផ្គត់ផ្គង់ទាំងនេះ មានសារៈសំខាន់សម្រាប់ការឆ្លើយតបផ្នែកសុខភាព ធ្វើឡើងដោយទីភ្នាក់ងារអង្គការសហប្រជាជាតិ និងអង្គការមិនមែនរដ្ឋាភិបាល ដោយអគារថែទាំសុខភាព បានរងផលប៉ះពាល់ធ្ងន់ធ្ងរដោយអំពើហិង្សា។ អង្គការ OCHA បាននិយាយថា ការប្រើប្រាស់ការដឹកជញ្ជូនតាមអាកាស បានអនុញ្ញាតឱ្យអង្គការមនុស្សធម៌នាំយកបុគ្គលិកគ្រប់គ្រាន់ចូលទៅក្នុងប្រទេសហៃទី ដើម្បីបន្តផ្តល់ជំនួយ។ការិយាល័យ បាននិយាយថា កម្មវិធីស្បៀងអាហារពិភពលោក (WFP) បានចែកចាយអាហារក្តៅជាង ៨.៤០០កញ្ចប់ដល់ប្រជាជន ដែលត្រូវបានបង្ខំឱ្យភៀសខ្លួនចេញពីលំនៅឋានរបស់ពួកគេ នៅទីក្រុង ព័រ អូប្រាំង។លោកស្រី វ្ល័រេនស៊ីយ៉ា សូតូ នីណូ(Florencia Soto Nino) អ្នកនាំពាក្យរបស់អង្គការសហប្រជាជាតិ បាននិយាយថា ការដឹកជញ្ជូនតាមយន្តហោះត្រូវបានធ្វើប្រតិបត្តិការដោយអង្គភាពសេវាដឹកជញ្ជូនតាមអាកាសមនុស្សធម៌កម្មវិធីស្បៀងអាហារពិភពលោក(WFP) របស់អង្គការសហប្រជាជាតិ ។

កូរ៉េខាងត្បូង នឹងផ្អាកអាជ្ញាបណ្ណក្រុមវេជ្ជបណ្ឌិតវ័យក្មេងកំពុងធ្វើកូដកម្មចាប់ពីសប្ដាហ៍ក្រោយទៅ

ក្រុមមន្ត្រីបាននិយាយនៅថ្ងៃព្រហស្បតិ៍សប្ដាហ៍នេះថា រដ្ឋាភិបាលកូរ៉េខាងត្បូង នឹងចាប់ផ្ដើមផ្អាកអាជ្ញាបណ្ណក្រុមវេជ្ជបណ្ឌិតវ័យក្មេងដែលនៅបន្តកូដកម្ម នៅសប្ដាហ៍ក្រោយ ខណៈពួកគេមិនព្រមបញ្ចប់ការដើរចេញពីការងាររយៈពេលជាច្រើនសប្ដាហ៍ ដែលបានដាក់បន្ទុកបន្ថែមលើសេវាវេជ្ជសាស្ត្រ របស់ប្រទេសនេះ ។ ជាង៩០% នៃក្រុមគ្រូពេទ្យហាត់ការចំនួន១៣.០០០នាក់ របស់ប្រទេសនេះ និងអ្នកស្រុក បានចេញធ្វើកូដកម្មរយៈពេលប្រហែលមួយខែ មកហើយ ដើម្បីតវ៉ាប្រឆាំងផែនការរបស់រដ្ឋាភិបាលក្នុងការបង្កើនចំនួននិស្សិតពេទ្យ ចូលរៀនពេទ្យ។ កូដកម្មនានា បានបណ្ដាលឲ្យលុបចោលការវះកាត់អ្នកជំងឺនិងការព្យាបាលផ្សេងៗនៅមន្ទីរពេទ្យទាំងឡាយ។ ក្រុមមន្ត្រីបាននិយាយថា ផែនការរើសគ្រូពេទ្យបន្ថែម គឺដើម្បីត្រៀមសម្រាប់កំណើនប្រជាជនដែលកំពុងកើនឡើងយ៉ាងឆាប់រហ័សនៅក្នុងប្រទេសមួយដែលមានចំនួនគ្រូពេទ្យទាបបំផុតក្នុងពិភពលោក ។ប៉ុន្តែខាងក្រុមគ្រូពេទ្យវិញ លើកឡើងថាសាលារៀនមិនអាចដោះស្រាយកំណើននិស្សិតពេទ្យបានភ្លាមៗទេ ហើយនឹងប៉ះពាល់ដល់សេវាសុខាភិបាលរបស់ប្រទេសនេះមិនខាន។រដ្ឋាភិបាលបាននិងកំពុងចាត់វិធានការរដ្ឋបាលជាបន្តបន្ទាប់លើការផ្អាកអាជ្ញាបណ្ណ បន្ទាប់ពីក្រុមវេជ្ជបណ្ឌិតទាំងនោះ បានខកខានពេលវេលាកំណត់របស់រដ្ឋាភិបាលកាលពីថ្ងៃទី២៩ខែកុម្ភៈឲ្យចូលបម្រើការងារវិញ ។ ជំហានទាំងនោះរួមទាំងការបញ្ចូនលិខិតផ្ដល់ដំណឹងជាផ្លូវការដើម្បីបញ្ជាក់ដល់អ្នកធ្វើកូដកម្មទាំងឡាយ ដែលអវិត្តមាន ដោយបញ្ជាក់ប្រាប់ពួកគេអំពីការទុកឱកាសឲ្យពួកគេឆ្លើយតបចំពោះការផ្អាកនេះ។ ឧបនាយករដ្ឋមន្ត្រីសុខាភិបាល លោក Park Min-soo បានប្រាប់សន្និសីទសារព័ត៌មាននៅថ្ងៃព្រហស្បតិ៍សប្ដាហ៍នេះថា រដ្ឋាភិបាលត្រូវគេរំពឹងថានឹងបញ្ចប់ជំហានទាំងនោះលើក្រុមវេជ្ជបណ្ឌិតធ្វើកូដកម្ម ដូច្នេះ នឹងមានការជូនដំណឹងដល់ពួកគេពីការផ្អាកអាជ្ញាបណ្ណនេះ៕

អតីតមន្ត្រីអាមេរិករាប់សិបនាក់ជំរុញឱ្យលោក Biden ព្រមានចាត់វិធានការធ្ងន់ធ្ងរលើអ៊ីស្រាអែលជុំវិញសង្រ្គាមនៅហ្កាហ្សា

អតីតមន្ត្រីអាមេរិក អ្នកការទូត និងមន្ត្រីយោធាសហរដ្ឋអាមេរិក ជិត៧០ នាក់កាលពីថ្ងៃពុធបានជំរុញឱ្យលោកប្រធានាធិបតី Joe Biden ព្រមានអ៊ីស្រាអែលអំពីផលវិបាកធ្ងន់ធ្ងរ ប្រសិនបើខ្លួនបដិសេធសិទ្ធិស៊ីវិល និងតម្រូវការជាមូលដ្ឋានដល់ប៉ាឡេស្ទីន និងពង្រីកសកម្មភាពតាំងទីលំនៅ នៅតំបន់ West Bank ដែលកាន់កាប់ដោយអ៊ីស្រាអែល។ ក្រុមនេះបាននិយាយនៅក្នុងលិខិតចំហមួយផ្ញើទៅកាន់លោក Biden ថា សហរដ្ឋអាមេរិក ត្រូវតែមានឆន្ទៈក្នុងការចាត់វិធានការជាក់ស្តែងប្រឆាំងនឹងការអនុវត្តន៍បែបនេះ ដោយរួមទាំងការរឹតបន្តឹងលើការផ្តល់ជំនួយរបស់សហរដ្ឋអាមេរិក ដល់អ៊ីស្រាអែល ដែលស្របតាមច្បាប់ និងគោលនយោបាយរបស់សហរដ្ឋអាមេរិក។ក្នុងចំណោមហត្ថលេខីទាំងនោះ ក៏មានអតីតឯកអគ្គរដ្ឋទូតរាប់សិបរូបផងដែរ ព្រមទាំងមន្ត្រីក្រសួងការបរទេសចូលនិវត្តន៍ដទៃទៀត និងអតីតមន្ត្រីមន្ទីរបញ្ចកោណ ចារកម្ម និងមន្ត្រីសេតវិមាន រួមទាំងលោក Anthony Lake ទីប្រឹក្សាសន្តិសុខជាតិរបស់អតីតប្រធានាធិបតីលោក Bill Clinton។លិខិតនេះបានគូសបញ្ជាក់ពីការកើនឡើងនៃភាពរន្ធត់នៅក្នុងសហរដ្ឋអាមេរិកចំពោះប្រតិបត្តិការរបស់អ៊ីស្រាអែលប្រឆាំងនឹងក្រុមសកម្មប្រយុទ្ធហាម៉ាសនៅតំបន់ហ្កាហ្សាស្ទ្រីប ដែលបានបញ្ឆេះដោយការវាយលុករបស់ពួកគេកាលពីថ្ងៃទី៧ ខែតុលា២០២៣ ចូលទៅក្នុងភាគខាងត្បូងអ៊ីស្រាអែល សម្លាប់ ជនជាតិអ៊ីស្រាអែល ប្រហែល១.២០០នាក់ និងចាប់មនុស្ស ២៥៣នាក់ជាចំណាប់ខ្មាំង។ ភាគច្រើននៅក្នុងតំបន់ហ្កាហ្សាត្រូវបានបំផ្លាញ ហើយប្រជាជនប៉ាឡេស្ទីនជិត ៣២.០០០នាក់ នាក់ត្រូវបានសម្លាប់ ។ អង្គការសហប្រជាជាតិនិយាយថា ប្រជាជនចំនួន ២,៣ លាននាក់ មានអាហារ និងទឹកតិចតួច ព្រមទាំងខ្វះទីជម្រក ហើយការខ្វះខាតស្បៀងអាហារនៅតាមផ្នែកនានាលើសពីកម្រិតទុរ្ភិក្ស៕

ការផ្ទុះជំងឺគ្រុនឈាមក្នុងប្រទេសអាហ្សង់ទីន កំពុងស្ថិតលើផ្លូវដល់កម្រិតបំបែកកំណត់ត្រា

ការផ្ទុះឡើងដ៏ច្រើននៃជំងឺគ្រុនឈាម ដែលជាជំងឺឆ្លងពីមូសខ្លា និងអាចបណ្តាលឱ្យស្លាប់បាន នៅក្នុងប្រទេសអាហ្សង់ទីន គឺកំពុងស្ថិតនៅលើផ្លូវឈានដល់កម្រិតបំបែកកំណត់ត្រាពីមុន ដែលឆ្លុះបញ្ចាំងពីការព្រួយបារម្ភកាន់តែខ្លាំងនៅជុំវិញអាមេរិកខាងត្បូង ដែលអាកាសធាតុក្តៅ និងសើមបាននាំឱ្យមានការកើនឡើងនៃករណីជំងឺនេះ។រហូតមកដល់ពេលនេះមានជំងឺគ្រុនឈាមជាង ១២០.០០០ ករណី ត្រូវបានកត់ត្រានៅក្នុងប្រទេសអាហ្សង់ទីន ក្នុងរដូវកាលពីឆ្នាំ២០២៣ និង២០២៤ ជាមួយនឹងចំនួនភាគច្រើនក្នុងរយៈពេលពីរខែចុងក្រោយនេះ។ តួលេខនោះបានលើសពីរដូវកាលមុន ដែលជាកំណត់ត្រាអាក្រក់បំផុតរួចទៅហើយ។រោគសញ្ញានៃជំងឺគ្រុនឈាម រួមមានគ្រុនក្តៅខ្លាំង ឈឺក្បាល ក្អួត កន្ទួលលើស្បែក និងឈឺសាច់ដុំ និងសន្លាក់ ដែលអាចធ្ងន់ធ្ងរខ្លាំង ហើយជំងឺនេះត្រូវបានគេហៅថាជំងឺគ្រុនក្តៅ «បាក់ឆ្អឹង»។ ក្នុងករណីខ្លះ វាអាចបណ្តាលឱ្យមានជំងឺគ្រុនបែកគ្រាប់ឈាមធ្ងន់ធ្ងរជាងមុន ដែលបណ្តាលឱ្យមានការហូរឈាមរហូតដល់ស្លាប់។តួលេខចុងក្រោយរបស់រដ្ឋាភិបាលបង្ហាញថា គិតមកដល់ពេលនេះ មានអ្នកស្លាប់ចំនួន ៧៩ នាក់ហើយក្នុងរដូវកាលនេះ នៅក្នុងប្រទេសអាហ្សង់ទីន។ ករណីភាគច្រើនតែងតែកើតមានក្នុងអំឡុងរដូវក្តៅចុងខែនៃអឌ្ឍគោលខាងត្បូង ចាប់ពីខែកុម្ភៈ ដល់ខែឧសភា នៅពេលដែលអាកាសធាតុតែងតែក្តៅ និងសើម ប៉ុន្តែនៅឆ្នាំនេះ ចំនួនករណីកាន់តែខ្ពស់ត្រូវបានគេសង្កេតឃើញនៅមុនរដូវកាលនោះមកដល់៕

ការវាយប្រហារតាមអាកាសរបស់អ៊ីស្រាអែលនៅតំបន់វេសបែង បានសម្លាប់យុទ្ធជនប៉ាឡេស្ទីន ៣នាក់

ក្រសួងសុខាភិបាលប៉ាឡេស្ទីន បាននិយាយថា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនបី នាក់ និងម្នាក់ទៀត បានរងរបួស នៅក្នុងការវាយប្រហារតាមអាកាសកាលពីថ្ងៃពុធ នៅក្នុងទីក្រុងជេនីន (Jenin)នៃតំបន់វេសបែងដែលកាន់កាប់ដោយអ៊ីស្រាអែល ជាអ្វីដែលយោធាអ៊ីស្រាអែល បានអះអាងថា គឺជាប្រតិបត្តិការមួយសំដៅទៅលើក្រុមសកម្មប្រយុទ្ធប៉ាឡេស្ទីន។យោធាអ៊ីស្រាអែល បាននិយាយថា យន្តហោះមួយគ្រឿង បានវាយប្រហារលើយុទ្ធជនប៉ាឡេស្ទីនចំនួន៤ នាក់ជិះក្នុងរថយន្តមួយគ្រឿង ក្នុងតំបន់ជេនីន ក្នុងចំណោមពួកគេនោះ ពីរនាក់ គឺជាសមាជិកជាន់ខ្ពស់នៃក្រុមជីហាដអ៊ីស្លាម ដែលបានដឹកនាំការវាយប្រហារលើជនជាតិអ៊ីស្រាអែល។លោក ម៉ាខ្មូដ ហ្គ្រាយយីប (Mahmoud Ghrayyeb) អ្នកស្រុកនៃជំរំជនភៀសខ្លួនជេនីន ដែលបាននិយាយថា ខ្លួនបានឃើញហេតុការណ៍តាមរយៈកាមេរ៉ាឃ្លាំមើល បានបញ្ជាក់ថា ការវាយប្រហារនោះ បានត្រូវចំរថយន្តនោះ នៅម៉ោងប្រហែល៥:៣៧ល្ងាច។ នៅពេលដែលចរាចរណ៍មានភាពមមាញឹក នៅមុនពេលទទួលទានអាហារក្នុងអំឡុងខែដ៏ពិសិដ្ឋនៃពិធីបុណ្យសាសនាមូស្លីមរ៉ាម៉ាដាន។លោកបាននិយាយថា៖«យើងបានឃើញអវយវៈរបស់អ្នកដែលត្រូវគេវាយប្រហារនោះខ្ទាត់ទៅលើផ្លូវ»។ បុរសម្នាក់ និងប្រពន្ធរបស់ខ្លួននៅក្នុងរថយន្តមួយផ្សេងទៀតដែលបើកឆ្លងកាត់ ពួកគេត្រូវបានសង្គ្រោះដោយអព្ភូតហេតុមួយ»។វីដេអូពីកាមេរ៉ាសុវត្ថិភាពរបស់លោកហ្គ្រាយយីប ដែលត្រូវបានចែករំលែកជាមួយសារព័ត៌មានរ៉យទ័រ បានបង្ហាញថា រថយន្តមួយគ្រឿងនៅលើផ្លូវដ៏មមាញឹកមួយភ្លាមៗនោះ ត្រូវបានឆាបឆេះដោយអណ្តាតភ្លើង ហើយបានរលត់បាត់ទៅវិញ។ ចំណែករថយន្តមួយគ្រឿងទៀតដែលគេឃើញបើកមកពីទិសដៅផ្ទុយគ្នានោះ ក៏បានឈប់ ហើយបើកត្រឡប់ក្រោយវិញ។

UN៖ កុមារប្រហែល ២២២.០០០នាក់អាចស្លាប់ដោយសារកង្វះអាហារូបត្ថម្ភ នៅស៊ូដង់

ក្រុមប្រឹក្សាសន្តិសុខអង្គការសហប្រជាជាតិ បានជួបប្រជុំគ្នា កាលពីថ្ងៃពុធ ដើម្បីដោះស្រាយស្ថានភាពមនុស្សធម៌ ដែលកំពុងកើតឡើងនៅក្នុងប្រទេសស៊ូដង់។ លោក អេដឹម វូសននូ(Edem Wosornu) នាយកប្រតិបត្តិការនៃការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បាននិយាយថា ប្រទេសនេះ ប្រហែលជាស្ថិតក្នុងដំណើរឆ្ពោះទៅរកវិបត្តិអត់ឃ្លានធ្ងន់ធ្ងរបំផុតរបស់ពិភពលោក។លោក Wosornu បាននិយាយថា ដៃគូមនុស្សធម៌របស់យើង ប៉ាន់ប្រមាណថា ក្នុងប៉ុន្មានសប្តាហ៍ខាង និងប៉ុន្មានខែខាងមុខនេះ នៅតាមទីកន្លែងក្នុងតំបន់នឹងមានកុមារប្រហែល ២២២.០០០នាក់ អាចស្លាប់ដោយសារកង្វះអាហារូបត្ថម្ភ។ សង្គ្រាមស៊ីវិល បានផ្ទុះឡើងរយៈពេលពីរឆ្នាំ បន្ទាប់ពីប្រទេសនេះបានទទួលឯករាជ្យ ដែលបានបណ្តាលឱ្យមនុស្សរាប់សែននាក់បានស្លាប់នៅចន្លោះឆ្នាំ ២០១៣ និងឆ្នាំ២០១៨។សន្តិភាពដ៏ផុយស្រួយមួយបានកើតមានឡើង រវាងក្រុមបះបោរ ចាប់តាំងពីពេលនោះមក ប៉ុន្តែការប៉ះទង្គិចគ្នានៅតែបន្តក្នុងចំណោមក្រុមប្រដាប់អាវុធ។ សកម្មជនមួយចំនួននិយាយថា ពួកគេជឿថាការកើនឡើងនៃការសម្លាប់នាពេលថ្មីៗនេះ មានជាប់ទាក់ទង មួយផ្នែកទៅនឹងការបោះឆ្នោត ដែលនឹងជ្រើសរើសមេដឹកនាំដើម្បីបន្តតំណែងរដ្ឋាភិបាលអន្តរកាលបច្ចុប្បន្ន។មនុស្សជាង ១៥០នាក់ ត្រូវបានសម្លាប់នៅចុងខែមករា និងដើមខែកុម្ភៈ នៅភាគខាងជើង និងខាងលិចប្រទេសស៊ូដង់ខាងត្បូង ក្នុងជម្លោះរវាងក្រុមគូប្រជែង។ សហរដ្ឋអាមេរិក អង់គ្លេស និងប្រទេសន័រវេស បានអំពាវនាវឱ្យមេដឹកនាំប្រទេសស៊ូដង់ខាងត្បូង ចាត់វិធានការបន្ទាន់ដើម្បីធានាឱ្យមានការបោះឆ្នោតពិតប្រាកដ និងដោយសន្តិវិធី។

សង្គ្រាមក្រុមជនអន្ធពាលហៃទី រាលដាលនៅតំបន់ជាយរដ្ឋធានីដ៏ធំ ខណៈស្ថានទូតនានាជម្លៀសបុគ្គលិក

អ្នកស្រុកនៅក្នុងសង្កាត់ ប៉េត្យុង វីល (Petion-Ville) ដ៏ធំនៅជាយរដ្ឋធានី ព័រអូប្រាំង របស់ប្រទេសហៃទី បានឃុំខ្លួនឯងនៅក្នុងលំនៅឋានរបស់ពួកគេកាលពីថ្ងៃពុធ (២០ មីនា) ដោយលើកឡើងពីការភ័យខ្លាចដែលថាមានការបាញ់ប្រហារដោយកាំភ្លើងធំ និងសាកសពជាច្រើន ដែលត្រូវបានរកឃើញនៅតាមផ្លូវ។សារព័ត៌មាន ឡឺ នូវែលលីស (Le Nouvelliste) បានរាយការណ៍ថា យ៉ាងហោចណាស់មនុស្ស ១៥ នាក់ត្រូវបានសម្លាប់នៅក្នុងការវាយប្រហារនៅជុំវិញតំបន់ជាយក្រុង ដែលជាទីតាំងនៃសណ្ឋាគារលំដាប់ខ្ពស់ជាច្រើន ព្រមទាំងជុំវិញស្ថានទូតជាច្រើន ហើយបាននិយាយថា ក្រុមបុរសប្រដាប់អាវុធបានធ្វើការវាយប្រហារនៅភាគខាងកើតទីក្រុង។តំបន់លំនៅឋាន ប៉េត្យុង វីល ស្ថិតនៅជិតសណ្ឋាគារមួយចំនួនដែលមេដឹកនាំក្រុមជនអន្ធពាល ជីមមី បាប៊ីឃ្យូ ហ្ស៊េរីហ្សេ (Jimmy "Barbeque" Cherizier) បានគំរាមកំហែងកាលពីសប្តាហ៍មុន ដោយនិយាយថាខ្លួននឹងតាមប្រមាញ់ម្ចាស់សណ្ឋាគារ ដែលលាក់អ្នកនយោបាយជើងចាស់នៅពីក្រោយទ្វាររបស់ពួកគេ។ទោះបីជាលោកនាយករដ្ឋមន្រ្តី អារីយែល ហុងរី (Ariel Henry) បាននិយាយថាលោកនឹងចុះចេញពីតំណែងកាលពីសប្តាហ៍មុន ដែលជាការទាមទាររបស់ក្រុមជនអន្ធពាលដែលមានអំណាចដ៏ខ្លាំងក៏ដោយ ក៏អំពើហិង្សានៅតែបន្ត។ ក្រុមប្រឹក្សាអន្តរកាលរបស់ប្រធានាធិបតី ត្រូវបានមេដឹកនាំអន្តរជាតិសម្របសម្រួល ប៉ុន្តែបង្កើតខ្លួនរបស់ក្រុមនេះនៅតែមិនច្បាស់លាស់នៅឡើយ៕

លោក Netanyahu ប្រាប់បក្សសាធារណរដ្ឋរបស់អាមេរិកថា សង្គ្រាមនៅហ្កាហ្សានឹងបន្ត ក្រោយការលើកឡើងរបស់លោកស៊ូមរ

សមាជិកព្រឹទ្ធសភាអ៊ីស្រាអែលបានប្រាប់ក្រុមអ្នកសារព័ត៌មានក្នុងសុន្ទរកថានៅឯការទទួលទានអាហារថ្ងៃត្រង់គណបក្សថា លោកនាយករដ្ឋមន្ត្រីអ៊ីស្រាអែលBenjamin Netanyahu បានប្រាប់សមាជិកព្រឹទ្ធសភា របស់គណបក្សសាធារណរដ្ឋសហរដ្ឋអាមេរិក កាលពីថ្ងៃពុធថា អ៊ីស្រាអែល នឹងបន្តកម្ចាត់ក្រុមសម្មជនហាម៉ាសប៉ាឡេស្ទីនឲ្យអស់នៅក្នុងតំបន់ហ្កាហ្សាស្ទ្រីប ។ព្រឹទ្ធសមាជិកគណបក្សសាធារណរដ្ឋអាមេរិក លោកជីម រីសជ៍( Jim Risch)បាននិយាយថា លោក Netanyahu នឹងធ្វើអ្វីដូចមាត់លោកនិយាយអញ្ចឹង ។លោកថាធ្វើគឺធ្វើហើយ លោកនឹងបន្តសមរភូមិរហូតដល់ទីបញ្ចប់។មេដឹកនាំបក្សអភិរក្សនិយមរបស់អ៊ីស្រាអែល បានប្រាប់សមាជិកបក្សសាធារណរដ្ឋអាមេរិក តាមវីដេអូ ជិតមួយសប្ដាហ៍ ក្រោយមេដឹកនាំព្រឹទ្ធសភាសំឡេងភាគច្រើនរបស់សហរដ្ឋអាមេរិក លោក ឆាក់ស៊ូមរ (Chuck Schumer) បានធ្វើសុន្ទរកថាមួយនៅព្រឹទ្ធសភា ដោយហៅលោក Netanyahu ថាជាបុគ្គលរារាំងសន្តិភាព និងជំរុញឲ្យរៀបចំការបោះឆ្នោតថ្មីអ៊ីស្រាអែល។កិច្ចប្រជុំកាលពីថ្ងៃពុធ បានគូសបញ្ជាក់ពីនយោបាយនៃគោលនយោបាយអ៊ីស្រាអែលរបស់ទីក្រុងវ៉ាស៊ីនតោន ។ លោក Netanyahu បានស្របយោបល់ជាមួយតំណាងរាស្ត្ររបស់គណបក្សសាធារណរដ្ឋអាមេរិក ដែលចោទប្រកាន់លោក ស៊ូមរ ពីបទព្យាយាមផ្ដួលរំលំមេដឹកនាំអ៊ីស្រាអែល។ លោក ចន បារ៉សសូ (John Barrasso) បាននិយាយថា យើងបានស្នើលោក ស៊ូមរ ឲ្យធ្វើបច្ចុប្បន្នភាព ហើយយើងបានទទួលរបាយការណ៍ស្ដីពីសង្គ្រាម ការដោះលែងចំណាប់ថ្នូរ និងកិច្ចខិតខំប្រឹងប្រែងបោសសម្អាតក្រុមហាម៉ាស ។ យើងបានប្រាប់លោកថា អ៊ីស្រាអែល មានសិទ្ធិគ្រប់យ៉ាង ក្នុងការការពារខ្លួន ហើយលោកថា នោះជាអ្វីដែលពួកគេត្រូវបន្តធ្វើយ៉ាងពិតប្រាកដ៕

ការវាយប្រហារតាមអាកាសរបស់ទួរគី វាយប្រហារលើគោលដៅគណបក្សពលករឃឺត ២៧កន្លែង នៅអ៊ីរ៉ាក់

ក្រសួងការពារជាតិរបស់ប្រទេសអ៊ីរ៉ាក់ បាននិយាយកាលពីថ្ងៃអង្គារថា កងកម្លាំងរបស់ប្រទេសទួរគី បាន វាយប្រហារតាមអាកាសមកលើគោលដៅចំនួន២៧គោលដៅ របស់គណបក្សពលករឃឺដ (PKK) ក្រៅច្បាប់ នៅក្នុងប្រតិបត្តិការឆ្លងព្រំដែន នៅប្រទេសអ៊ីរ៉ាក់ ភាគខាងជើង។ក្រសួង បាននិយាយនៅក្នុងសេចក្តីថ្លែងការណ៍ថា គោលដៅសរុបចំនួន ២៧កន្លែង រួមមានលេណដ្ឋាន ទីជម្រក និងរូងភ្នំ ដែលប្រើប្រាស់ដោយអង្គការភេរវកម្មរបស់គណបក្សពលករឃឺត(PKK) នៅភាគខាងជើងប្រទេសអ៊ីរ៉ាក់ ត្រូវបានបំផ្លាញ ដោយប្រតិបត្តិការតាមដែនអាកាស។ប្រតិបត្តិការទាំងនេះ បានធ្វើឡើងបន្ទាប់ពីក្រសួងការពារជាតិទួរគី បានប្រកាសកាលពីថ្ងៃអង្គារថាទាហានម្នាក់បានស្លាប់ និង៤នាក់ផ្សេងទៀតបានរងរបួស បណ្តាលមកពីការជ្រៀតចូលនិងការវាយប្រហារដោយក្រុមសកម្មប្រយុទ្ធរបស់គណបក្សពលករឃឺត(PKK) នៅក្នុងតំបន់ប្រតិបត្តិការ «Claw-Lock» នៅភាគខាងជើងប្រទេសអ៊ីរ៉ាក់។កងកម្លាំងសន្តិសុខទួរគី ជារឿយៗធ្វើប្រតិបត្តិការឆ្លងកាត់ព្រំដែននៅភាគខាងជើងប្រទេសអ៊ីរ៉ាក់ ជាតំបន់លាក់ខ្លួន និងជាមូលដ្ឋានរបស់ក្រុមសកម្មប្រយុទ្ធគណបក្សពលករឃឺត។រដ្ឋាភិបាលប្រទេសទួរគី បានចាប់ផ្តើមប្រតិបត្តិការ Claw-Lock នៅក្នុងខែមេសា ឆ្នាំ ២០២២ ដើម្បីប្រយុទ្ធប្រឆាំងក្រុមគណបក្សពលករឃឺត(PKK) នៅភាគខាងជើងប្រទេសអ៊ីរ៉ាក់ នៅក្បែរព្រំដែនប្រទេសទួរគី។គណបក្សពលករឃឺត(PKK) ត្រូវបានចុះបញ្ជីជាអង្គការភេរវកម្មដោយប្រទេសទួរគី សហរដ្ឋអាមេរិក និងសហភាពអឺរ៉ុប ដែលបានបានបះបោរប្រឆាំងរដ្ឋាភិបាលទួរគី អស់រយៈពេលជាងបីទសវត្សរ៍មក ហើយ។

នាវាដឹកប្រេងបំពាក់ទង់ជាតិកូរ៉េខាងត្បូង ក្រឡាប់នៅឆ្នេរភាគខាងលិចប្រទេសជប៉ុន មនុស្ស៤នាក់ត្រូវបានជួយសង្គ្រោះ

ប្រព័ន្ធផ្សព្វផ្សាយក្នុងស្រុកបានរាយការណ៍ថា នាវាដឹកប្រេងបំពាក់ទង់ជាតិកូរ៉េខាងត្បូង បានក្រឡាប់នៅព្រឹកថ្ងៃពុធនេះ នៅឆ្នេរសមុទ្រនៃកោះ មុតសួ(Mutsure) ក្នុងខេត្តយ៉ាម៉ាហ្គូជិ(Yamaguchi) ភាគខាងលិចប្រទេសជប៉ុន។ប្រព័ន្ធផ្សព្វផ្សាយរដ្ឋ NHK បានរាយការណ៍ ដោយដកស្រង់សម្តីឆ្មាំល្បាតឆ្នេរជប៉ុននិយាយថា នាវិក ១១ នាក់នៅលើនាវាដឹកប្រេង កេអយយ៉ុង ស៊ុន(Keoyoung Sun) រួមមានជនជាតិកូរ៉េខាងត្បូងពីរនាក់ និងជនបរទេស ៩ នាក់ផ្សេងទៀត។ រហូតមកដល់ពេលនេះ មនុស្ស ៤ នាក់ ត្រូវបានជួយសង្គ្រោះនៅជិតកន្លែងកើតហេតុ។ការហៅទូរស័ព្ទសង្គ្រោះបន្ទាន់ ត្រូវបានធ្វើឡើងដើម្បីជួយសង្គ្រោះនាវាដឹកប្រេងនៅភាគខាងលិច កោះ Mutsure ខេត្ត Yamaguchi នៅម៉ោងប្រហែល ៧:០៥ នាទីព្រឹក ម៉ោងក្នុងស្រុក នៅថ្ងៃពុធ នេះដោយនិយាយថា នាវានេះផ្អៀងយោលចុះឡើងដោយសារតែអាកាសធាតុមិនអំណោយផល ដែលត្រូវការ ការជួយសង្គ្រោះ។យោងតាមឆ្មាំល្បាតឆ្នេរបានឲ្យដឹងថា នាវាបានក្រឡាប់ ព្រោះវាត្រូវបានបោះយុថ្កា ដោយសារអាកាសធាតុមិនអំណោយផល ហើយកិច្ចខិតខំប្រឹងប្រែងជួយសង្គ្រោះកំពុងបន្ត ខណៈសុវត្ថិភាពនៃនាវិកដែលបាត់ខ្លួន នៅពុំទាន់ដឹងនៅឡើយ។

បណ្ដាញសង្គម

ព័ត៌មានថ្មីៗ

ប្រភព៖ ក្រុមប្រឹក្សាសន្តិភាពរបស់លោក Trump ប្រគល់សំណើររំសាយអាវុធក្រុមហាម៉ាស

របាយការណ៍៖ អ៊ីរ៉ង់ត្រៀមអនុញ្ញាតឲ្យនាវាជប៉ុនឆ្លងកាត់ច្រកសមុទ្រ Hormuz

លោក Putin បញ្ជាក់ទៅទីក្រុងតេអេរ៉ង់ថា រុស្ស៊ីនៅតែជាមិត្ត និងដៃគូដ៏ស្មោះត្រង់របស់អ៊ីរ៉ង់

យោធាអ៊ីរ៉ង់ ព្រមានអារ៉ាប់រួម កុំវាយប្រហារលើកោះឈូងសមុទ្រដែលមានជម្លោះ

ក្រុមហ៊ុនចម្រាញ់ប្រេងនៅឥណ្ឌា និងផ្សេងទៀតនៅអាស៊ី គ្រោងទិញប្រេងអ៊ីរ៉ង់ ក្រោយអាមេរិកលើកលែង ទណ្ឌកម្ម

រដ្ឋជាសមាជិក EU ត្រូវបានជំរុញឲ្យទម្លាក់គោលដៅស្តុកឧស្ម័ន ដោយសារសង្គ្រាមអ៊ីរ៉ង់

អាមេរិកឲ្យក្រុមហ៊ុនខ្ចីប្រេង ៤៥,២លានបារ៉ែល ជាការបញ្ចេញដំបូង ដោយសារសង្គ្រាមអ៊ីរ៉ង់

គណៈកម្មាធិការជាតិជំរុញចលនា ភូមិ១ ផលិតផល១ ចាប់ផ្តើមយុទ្ធនាការផ្សព្វផ្សាយផលិតផលខ្មែរ

ឯកអគ្គរាជទូតកម្ពុជាប្រចាំប្រទេសកូរ៉េ ជួបជាមួយអាជ្ញាធរកូរ៉េ ដើម្បីពង្រឹងសហប្រតិបត្តិការជួយដល់ពលករខ្មែរ

របាយការណ៍៖ អ៊ីរ៉ង់បានបាញ់មីស៊ីលទៅលើមូលដ្ឋានរួមអាមេរិក និងអង់គ្លេស នៅមហាសមុទ្រឥណ្ឌា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877