BTV NEWS

លិចទូកស្មាច់នៅកណ្តាលទន្លេ ក្នុងខណ្ឌជ្រោយចង្វា រកឃើញសពមនុស្ស៣នាក់ ខណៈ៥នាក់ទៀតកំពុងបាត់ខ្លួនក្នុងទឹក

កម្លាំងសមត្ថកិច្ចបើកប្រតិបត្តិការបង្ក្រាបសំបុក Online Scams នៅសង្កាត់អូរបែកក្អមឃាត់ខ្លួនមនុស្ស ៤៩នាក់

មនុស្សប្រុសស្រីពាក់ព័ន្ធករណីបង្កគ្រោះថ្នាក់ចរាចរណ៍នៅខណ្ឌឫស្សីកែវ បណ្តាលឲ្យក្មេងម្នាក់រងរបួសធ្ងន់នឹងត្រូវបញ្ចូនទៅតុលាការទាំង ២នាក់

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

សន្តិសុខ និង សង្គម

ក្រុមសិទ្ធិមនុស្ស៖ អ៊ីស្រាអែលមិនគោរពតាមសេចក្តីបង្គាប់របស់តុលាការUN ដើម្បីអនុញ្ញាតឲ្យជំនួយគ្រប់គ្រាន់ចូលទៅក្នុងតំបន់ហ្កាហ្សា

អង្គការឃ្លាំមើលសិទ្ធិមនុស្ស បាននិយាយកាលពីថ្ងៃចន្ទថា អ៊ីស្រាអែល ពុំបានអនុវត្តតាមសេចក្តីបង្គាប់របស់តុលាការកំពូលអង្គការសហប្រជាជាតិ ក្នុងការផ្តល់ជំនួយដែលត្រូវការបន្ទាន់ ដល់ប្រជាជនដែលអស់សង្ឃឹម នៅក្នុងតំបន់ហ្កាហ្សាស្ទ្រីបនោះទេ ដែលមានរយៈពេល១ខែ បន្ទាប់ពីការចេញសេចក្តីសម្រេចដ៏សំខាន់ ក្នុងទីក្រុងឡាអេ ដែលបង្គាប់ឲ្យប្រទេសអ៊ីស្រាអែល បន្ថយសង្គ្រាមរបស់ខ្លួន។នៅក្នុងការឆ្លើយតបដំបូងចំពោះញត្តិរបស់ប្រទេសអាហ្វ្រិកខាងត្បូង ដែលបានចោទប្រកាន់អ៊ីស្រាអែល ពីបទប្រល័យពូជសាសន៍ តុលាការកំពូលរបស់អង្គការសហប្រជាជាតិ បានបង្គាប់ឱ្យអ៊ីស្រាអែល ធ្វើអស់ពីសមត្ថភាពដើម្បីការពារការស្លាប់ ការបំផ្លិចបំផ្លាញ និងអំពើប្រល័យពូជសាសន៍ នៅក្នុងតំបន់ហ្កាហ្សា។ ប្រទេសនេះ បានបញ្ឈប់ភ្លាមៗចំពោះសេចក្តីបង្គាប់ឱ្យបញ្ចប់ការវាយលុកដោយយោធារបស់ខ្លួន ដែលបានបង្កឱ្យមានមហន្តរាយមនុស្សធម៌នៅក្នុងតំបន់ហ៊ុមព័ទ្ធរបស់ប៉ាឡេស្ទីន។ អ៊ីស្រាអែល បានច្រានចោលយ៉ាងម៉ឺងម៉ាត់ ចំពោះបទចោទប្រកាន់នេះ ដោយនិយាយថាខ្លួនកំពុងប្រយុទ្ធនឹងសង្គ្រាម ក្នុងការការពារខ្លួន។ ការត្រៀមខ្លួន កំពុងធ្វើឡើងសម្រាប់អ៊ីស្រាអែល ដើម្បីពង្រីកប្រតិបត្តិការជើងគោករបស់ខ្លួន ចូលទៅក្នុងទីក្រុង Rafah ជាទីក្រុងនៅភាគខាងត្បូងផុតតំបន់ហ្កាហ្សានៅតាមបណ្តោយព្រំដែនជាមួយប្រទេសអេហ្ស៊ីប ជាកន្លែងដែលប្រជាជនប៉ាឡេស្ទីន ១,៤ លាននាក់ បានសម្រុកទៅទីនោះដើម្បីស្វែងរកទីសុវត្ថិភាព។នៅទីក្រុង Rafah ជំរំតង់ដ៏ស្អេកស្កៈ បានប្រែជាលំនៅឋានរបស់ជនភៀសខ្លួន ដែលបានបង្កឱ្យមានការព្រួយបារម្ភជាសកល ហើយសម្ព័ន្ធមិត្តរបស់អ៊ីស្រាអែល បានព្រមានថា អ៊ីស្រាអែល ត្រូវតែការពារជនស៊ីវិល ក្នុងពេលប្រយុទ្ធជាមួយក្រុមហាម៉ាស។

ចិនជំរុញអាមេរិក ឱ្យចាត់វិធានការជាក់ស្តែងដើម្បីសម្រេចបានបទឈប់បាញ់នៅហ្កាហ្សា

អ្នកនាំពាក្យក្រសួងការបរទេសចិន កាលពីថ្ងៃចន្ទ (២៦ កុម្ភៈ) បានជំរុញឱ្យសហរដ្ឋអាមេរិក ស្តាប់តាមការអំពាវនាវរបស់សហគមន៍អន្តរជាតិសម្រាប់បទឈប់បាញ់ជាបន្ទាន់នៅតំបន់ហ្កាហ្សាស្ទ្រីប ហើយដើរតួនាទីស្ថាបនាក្នុងការសម្រេចបានបទឈប់បាញ់ និងបន្ធូរបន្ថយវិបត្តិមនុស្សធម៌។អ្នកនាំពាក្យលោកស្រី ម៉ៅ នីង (Mao Ning) បានធ្វើការលើកឡើងនេះនៅក្នុងសន្និសីទសារព័ត៌មានមួយ នៅពេលត្រូវបានសាកសួរឱ្យធ្វើអត្ថាធិប្បាយលើរបាយការណ៍ដែលថា នៅក្នុងកិច្ចប្រជុំរដ្ឋមន្ត្រីការបរទេស G20 នាពេលថ្មីៗនេះ សហរដ្ឋអាមេរិក ត្រូវបានប្រទេសមួយចំនួនរិះគន់ចំពោះការប្រឆាំងបទឈប់បាញ់ភ្លាមៗនៅតំបន់ហ្កាហ្សាស្ទ្រីប។លោកស្រី ម៉ៅ បាននិយាយថា ជម្លោះប៉ាឡេស្ទីន និងអ៊ីស្រាអែលចុងក្រោយនេះ នៅតែបន្តកើនឡើង ហើយស្ថានភាពមនុស្សធម៌នៅតំបន់ហ្កាហ្សាស្ទ្រីប គឺធ្ងន់ធ្ងរបំផុត ដោយជនស៊ីវិលជិត ៣០.០០០ នាក់ត្រូវបានសម្លាប់ និងប្រហែល ១,៩ លាននាក់ត្រូវភៀសខ្លួន។អ្នកនាំពាក្យរូបនេះបានបន្ថែមថា បទឈប់បាញ់ភ្លាមៗនៅតំបន់ហ្កាហ្សាស្រ្ទីប គឺជាការអំពាវនាវជាសកល និងការឯកភាពដ៏លើសលប់របស់សហគមន៍អន្តរជាតិ ហើយសហរដ្ឋអាមេរិកគួរតែគោរពតាមការអំពាវនាវនេះ និងចាត់វិធានការជាក់ស្តែងដើម្បីដើរតួនាទីស្ថាបនាក្នុងការសម្រេចបានបទឈប់បាញ់ និងបន្ធូរបន្ថយវិបត្តិមនុស្សធម៌ដ៏សោកសៅនៅតំបន់ហ៊ុមព័ន្ធមួយនេះ៕

រដ្ឋមន្ត្រីបញ្ជាក់ថា អ៊ីស្រាអែលប្តេជ្ញា លុបបំបាត់ក្រុមហាម៉ាស ដោយមិនគិតពីចំនួនខាតបង់សេដ្ឋកិច្ច

រដ្ឋមន្ត្រីក្រសួងសេដ្ឋកិច្ច និងឧស្សាហកម្ម លោក នី បាកាត (Nir Barkat) បានថ្លែងកាលពីថ្ងៃចន្ទថា អ៊ីស្រាអែល ប្តេជ្ញាឈ្នះសង្រ្គាមនៅតំបន់ហ្កាហ្សា និងលុបបំបាត់ក្រុមហាម៉ាស ដោយមិនគិតពីចំនួនខាតបង់សេដ្ឋកិច្ចរបស់ប្រទេសនេះ។សេដ្ឋកិច្ចមានតម្លៃ៥០០ពាន់លានដុល្លាររបស់អ៊ីស្រាអែល បានរងនូវផលប៉ះពាល់ ក្នុងអំឡុងសង្គ្រាមរយៈពេលជាង ៤ខែប្រឆាំងនឹងក្រុមសកម្មប្រយុទ្ធប៉ាឡេស្ទីន នៅតំបន់ហ្កាហ្សា ក្នុងអំឡុងពេលដែលមនុស្សរាប់ពាន់នាក់ បានចាកចេញពីកម្លាំងពលកម្មអ៊ីស្រាអែល ហើយទៅបម្រើយោធា។ប៉ុន្តែលោកបាកាត ដែលត្រូវបានគេមើលឃើញយ៉ាងទូលំទូលាយថា ជាបេក្ខភាពដ៏សំខាន់ ដើម្បីស្នង តំណែងលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានបញ្ជាក់យ៉ាងច្បាស់ថា សន្តិសុខជាតិ មិនត្រឹមតែមានសារៈសំខាន់ប៉ុណ្ណោះទេ ថែមទាំងក៏មានសារៈសំខាន់សម្រាប់សេដ្ឋកិច្ចរបស់ប្រទេសអ៊ីស្រាអែលផងដែរ។នៅពេលសួរថាតើហានិភ័យនៃឱនភាពពាណិជ្ជកម្មកាន់តែធំ និងការទម្លាក់ចំណាត់ថ្នាក់ផ្សេងទៀត អាចមានន័យយ៉ាងណាសម្រាប់អ៊ីស្រាអែល លោកបាកាត បានប្រាប់សារព័ត៌មានរ៉យទ័រថា«ចូរមើល យើងប្តេជ្ញាយកឈ្នះសង្រ្គាមនេះ។ យើងនឹងឈ្នះសង្រ្គាម ដោយមិនគិតពីអ្វីទាំងអស់»។លោកបាននិយាយក្នុងអំឡុងដំណើរទស្សនកិច្ចទៅកាន់ប្រទេសអារ៉ាប់រួមសម្រាប់សន្និសីទថ្នាក់រដ្ឋមន្ត្រីនៃអង្គការពាណិជ្ជកម្មពិភពលោក(WTO)ថា៖«ខ្ញុំគិតថា នៅពេលដែលមនុស្សសម្លឹងមើលសេដ្ឋកិច្ចរបស់អ៊ីស្រាអែល ជាដំបូង ពួកគេចង់ធ្វើឲ្យប្រាកដថា យើងជាប្រទេសដែលមានសុវត្ថិភាព»។

ការវាយប្រហាររបស់អ៊ីស្រាអ៊ែល សម្លាប់មនុស្ស២នាក់នៅក្នុងលីបង់ ហេសបូឡាឆ្លើយតបដោយ គ្រាប់រ៉ុក្កែត៦០គ្រាប់

អ៊ីស្រាអែលកាលពីថ្ងៃចន្ទ បានបើកការវាយប្រហារតាមអាកាសចូលយ៉ាងជ្រៅទៅក្នុងប្រទេសលីបង់ ដោយបានសម្លាប់មនុស្សយ៉ាងហោចណាស់ពីរនាក់ ដែលជំរុញឲ្យក្រុមភេរវករឆ្លើយតបដោយការ បាញ់រ៉ុ ក្កែតចំនួន ៦០គ្រាប់ឆ្ពោះទៅកាន់រដ្ឋជ្វីហ្វនេះ។ការវាយប្រហាររបស់អ៊ីស្រាអែល បានកើតឡើង បន្ទាប់ពីក្រុមហេសបូឡាដែលគាំទ្រដោយអ៊ីរ៉ង់ បានបាញ់ទម្លាក់យានដ្រូនរបស់អ៊ីស្រាអែល ប៉ុន្មានម៉ោងមុននេះ។ យន្តហោះចម្បាំងរបស់អ៊ីស្រាអែល បានវាយប្រហារជ្រលងភ្នំ Bekaa របស់ប្រទេសលីបង់ ដែលជាការវាយប្រហារចូលយ៉ាងជ្រៅបំផុតរបស់ខ្លួនទៅ ក្នុងទឹកដីនៃប្រទេសជិតខាងភាគខាងជើងរបស់ខ្លួន។ក្រុមហេសបូឡា បានឆ្លើយតបដោយការបាញ់រ៉ុក្កែត Katyusha ចំនួន៦០គ្រាប់ទៅកាន់ទីស្នាក់ការកណ្តាលកងទ័ពអ៊ីស្រាអែល នៅតំបន់ Golan Heights ដែលកាន់កាប់ដោយអ៊ីស្រាអែល នៅក្បែរប្រទេសស៊ីរី។ការវាយប្រហារនេះ បានបង្ហាញពីការកើនឡើងនៃអំពើហិង្សារវាងក្រុមហេសបូឡា និងអ៊ីស្រាអែលដែលប្រដាប់ដោយអាវុធធុនធ្ងន់ ចាប់តាំងពីសង្គ្រាមឆ្នាំ ២០០៦ របស់ពួកគេ ដែលបានជំរុញឲ្យមានការព្រួយបារម្ភអំពីការផ្ទុះឡើងនូវសង្គ្រាមនៅក្នុងតំបន់ដែលហៀរចេញពីសង្រ្គាមនៅតំបន់ហ្កាហ្សានោះ។ការវាយប្រហារលើជ្រលងភ្នំ Baalbek ដោយសារតែទីតាំងនេះចូលយ៉ាងជ្រៅទៅក្នុងប្រទេសលីបង់ គឺជាព្រឹត្តិការណ៍ដ៏ធំបំផុត ចាប់តាំងពីការវាយប្រហារតាមអាកាសនៅដើមខែមករា ទៅលើទីក្រុងបេរូត ( Beirut) ដែលបានសម្លាប់មន្ត្រីកំពូលរបស់ក្រុមហាម៉ាស លោក Saleh Aouri។

កសិករតវ៉ាទូទាំងអឺរ៉ុប ដាក់សម្ពាធលើមេដឹកនាំដោះស្រាយក្ដីកង្វល់ការឡើងថ្លៃទំនិញ ផលិតផលកសិកម្ម និងបរិស្ថាន

កាលពីថ្ងៃចន្ទក្រុមប្រជាករសិករបានបិទព្រំដែនរវាងប្រទេសប៉ូឡូញនិងអាល្លឺម៉ង់ ដោយគប់ដបទឹកលើកងកម្លាំងនគរបាល ក្នុងទីក្រុងព្រុចសែល និងបានប្រមូលផ្ដុំគ្នានៅក្នុងទីក្រុងម៉ាឌ្រីដ ដើម្បីទាមទារចំណាត់ការជួយបន្ធូរតម្លៃមុខទំនិញនៅតាមទីផ្សារ និងនូវអ្វីដែលពួកគេនិយាយថាជាការប្រកួតប្រជែងមិនស្មើភាពគ្នាពីបរទេស។ ក្រុមរដ្ឋមន្ត្រីកសិកម្មមកពីទូទាំងសហភាពអឺរ៉ុប បានប្ដេជ្ញាចាត់វិធានការបន្ថែមទៀតដើម្បីការបន្ថយការបង់សេវាក្រៅផ្លូវការនិងជួយក្រុមកសិករខណៈជួបជុំគ្នានៅក្នុងទីក្រុងព្រុចសែលដើម្បីពិភាក្សាវិបត្តិនេះបន្ទាប់ពីកសិករពោពេញដោយកំហឹងចេញតវ៉ារយៈពេលជាច្រើនសប្ដាហ៍នៅទូទាំងអឺរ៉ុប។ រដ្ឋជាសមាជិកទាំង២៧ បានបន្ធូរបន្ថយផ្នែកខ្លះនៃគោលនយោបាយកិច្ចព្រមព្រៀងបរិស្ថានបៃតង ដោយលុបចោលគោលដៅមួយដើម្បីលុបការបំភាយឧស្ម័នក្នុងការងារកិសកម្មពីផែនទីវិថីបម្រែបម្រួលអាកាសធាតុឆ្នាំ២០២៤របស់ខ្លួន។ប៉ុន្តែកសិករកំពុងទាមទារច្រើនជាងនេះទេ។ប្រធានសម្របសម្រួលនៃអង្គការកសិកម្ម ឡាវីយ៉ា ខេមផេនស៊ីណា(La Via Campesina) លោក Morgan Ody បាននិយាយថា ពួកលោកមកកាន់ទីក្រុងព្រុចសែលជាថ្មីទៀតនៅថ្ងៃនេះក្នុងនាមជាប្រជាកសិករ ព្រោះសហភាពអឺរ៉ុប មិនបានស្ដាប់ការទាមទាររបស់យើងទេ។ ការទាមទាររបស់យើងគឺដើម្បីផលប្រយោជន៍ស្មើភាពគ្នាប៉ុណ្ណោះ។នៅឯការប្រមូលផ្ដុំគ្នាក្នុងទីក្រុងព្រុចសែល នគរបាលបង្ក្រាបកុបកម្ម បានប្រើកាណុងបាញ់ទឹកលើក្រុមបាតុករ ដែលកំពុងគប់ដបទឹកនិងស៊ុតលើពួកគេ ខណៈត្រាក់ទ័រប្រហែល៩០០គ្រឿង បានធ្វើឲ្យកកស្ទះចរចារណ៍នៅតាមតំបន់មួយចំនួននៃរដ្ឋធានីរបស់បែលហ្ស៊ិក នៅមិនឆ្ងាយប៉ុន្មានពីទីតាំងជំនួបក្រុមរដ្ឋមន្ត្រី។នៅឯការតវ៉ាមួយក្នុងទីក្រុងម៉ាឌ្រីដ ក្រុមកសិករមកពីទូទាំងប្រទេសអេស្ប៉ាញ បានផ្លុំកញ្ចែ ចុចស៊ីផ្លេ និងវាយស្គរលាន់ត្រហឹង ជំរុញឲ្យសហភាពអឺរ៉ុប បន្ធូរបទប្បញ្ញត្តិ និងទម្លាក់ចោលច្បាប់មួយចំនួនចំពោះគោលយោបាយកសិកម្ម CAP នៃការឧបត្ថម្ភធនបម្រុង និងកម្មវិធីផ្សេងទៀត៕

ក្រុមមន្ត្រី៖ ជនភៀសខ្លួននៅទីក្រុងរ៉ាហ្វា នឹងត្រូវអនុញ្ញាតឲ្យភៀសខ្លួនទៅកាន់តំបន់ផ្សេងនៅហ្កាហ្សាភាគខាងត្បូង

មន្ត្រីអ៊ីស្រាអែលពីរនាក់ បានប្រាប់សារព័ត៌មាន NBC News កាលពីថ្ងៃចន្ទថា ជនស៊ីវិលប៉ាឡេស្ទីនដែលស្នាក់នៅក្នុងទីក្រុងរ៉ាហ្វា (Rafah) នឹងត្រូវអនុញ្ញាតឲ្យភៀសខ្លួនទៅកាន់តំបន់ផ្សេងទៀតនៃតំបន់ហ្កាហ្សាភាគខាងត្បូង មុនពេលការវាយប្រហាររបស់អ៊ីស្រាអែល ប៉ុន្តែនឹងមិនត្រូវបានអនុញ្ញាតឲ្យត្រឡប់ទៅផ្ទះរបស់ពួកគេវិញ នៅភាគខាងជើងនៃតំបន់ហ្កាហ្សាស្ទ្រីបនោះទេ។ .ព័ត៌មានលម្អិតនៃផែនការរបស់អ៊ីស្រាអែលសម្រាប់ការវាយប្រហារលើទីក្រុងរ៉ាហ្វា ដែលមិនត្រូវបានគេរាយការណ៍ពីមុន ផ្តល់ការយល់ឃើញដំបូងអំពីរបៀបដែលអ៊ីស្រាអែលស្នើឲ្យដោះស្រាយជាមួយប្រជាជនប៉ាឡេស្ទីនប្រហែល ១,៤ លាននាក់ដែលបានស្វែងរកការជ្រកកោន នៅក្នុងទីក្រុងចុងបំផុតនៃដែនដីនេះ បន្ទាប់ពីត្រូវបានផ្លាស់ទីលំនៅដោយការប្រយុទ្ធគ្នានេះ។ ក្រុមមន្ត្រី បាននិយាយថា នៅក្រោមផែនការនេះ ជនស៊ីវិល នឹងត្រូវបានអនុញ្ញាតឲ្យចាកចេញពីទីក្រុង រ៉ាហ្វា ទៅកាន់តំបន់ភាគខាងត្បូងនៃទន្លេ Wadi Gaza ដែលជាជ្រលងទន្លេដែលត្រូវបានចាត់ទុកថា ជាព្រំប្រទល់បែងចែកក្រៅផ្លូវការរវាងពាក់កណ្តាលភាគខាងជើង និងភាគខាងត្បូងនៃតំបន់ហ្កាហ្សាស្ទ្រីប។ ថ្លែងក្នុងលក្ខខណ្ឌមិនបញ្ចេញឈ្មោះ ដោយសារតែពួកគេមិនត្រូវបានអនុញ្ញាតឲ្យពិភាក្សាជាសាធារណៈអំពីផែនការយោធា ពួកគេបាននិយាយថា ប្រជាជន អាចទៅទីក្រុងខាន់យូនីស ( Khan Younis) ភាគខាងជើងនៃទីក្រុងរ៉ាហ្វា នៅពេលដែលប្រតិបត្តិការយោធានៅទីនោះ ត្រូវបានបញ្ចប់។មន្ត្រីទាំងនោះ បាននិយាយថា តំបន់ពិតប្រាកដទៅកាន់កន្លែងដែលជនស៊ីវិលប៉ាឡេស្ទីន នឹងត្រូវបានប្រាប់ឲ្យធ្វើដំណើរទៅ ហើយផ្លូវដែលពួកគេ នឹងត្រូវបានគេប្រាប់ឲ្យធ្វើដំណើរ មិនទាន់ត្រូវបានសម្រេចនៅឡើយទេ ហើយនឹងអាស្រ័យលើលក្ខខណ្ឌជាក់ស្តែង។

គណបក្សធំបំផុតរបស់ឥណ្ឌូណេស៊ី សម្លឹងរកមើលការស៊ើបអង្កេតលើភាពមិនប្រក្រតីនៃការបោះឆ្នោត

គណបក្សដ៏ធំបំផុតនៅក្នុងសភាឥណ្ឌូនេស៊ី កំពុងសម្លឹងរកមើលការស៊ើបអង្កេតផ្នែកនីតិបញ្ញត្តិលើការចោទប្រកាន់ជុំវិញការបោះឆ្នោតប្រធានាធិបតីក្នុងខែនេះ ហើយក៏គ្រោងនឹងដាក់សំណុំរឿងទៅកាន់តុលាការកំពូលផងដែរ នេះបើយោងតាមមន្ត្រីជាន់ខ្ពស់មួយរូបរបស់គណបក្សបាននិយាយកាលពីថ្ងៃចន្ទ (២៦ កុម្ភៈ)។គណបក្សតស៊ូប្រជាធិបតេយ្យឥណ្ឌូណេស៊ី (PDIP) បានគាំទ្រលោក ហ្កាន់ចា ប្រាណូវ៉ូ (Ganjar Pranowo) សម្រាប់តំណែងជាប្រធានាធិបតី ដែលបានទទួលចំណាត់ថ្នាក់លេខ៣ ពីក្រោយលោករដ្ឋមន្ត្រីការពារជាតិ ប្រាបូវ៉ូ ស៊ូបៀនតូ (Prabowo Subianto) ដែលជាអ្នកឈ្នះដាច់ក្នុងការបោះឆ្នោតកាលពីថ្ងៃទី១៤ ខែកុម្ភៈ យោងទៅតាមចំនួនសន្លឹកឆ្នោតក្រៅផ្លូវការ និងការរាប់បឋមដែលកំពុងបន្តដោយស្ថាប័នបោះឆ្នោត។អគ្គលេខាធិការបក្សតស៊ូប្រជាធិបតេយ្យឥណ្ឌូណេស៊ី PDIP លោក ហាស្តូ គ្រីស្ទីយ៉ានតូ (Hasto Kristiyanto) បានប្រាប់សារព័ត៌មានរ៉យទ័រថា «យើងបានរកឃើញថាមានការរំលោភអំណាច រាប់ចាប់ពីទិដ្ឋភាពផ្លូវច្បាប់ រហូតដល់ការប្រើប្រាស់មធ្យោបាយរដ្ឋ» ដោយមិនបានផ្តល់ព័ត៌មានជាក់លាក់ ឬភស្តុតាងដើម្បីគាំទ្រការចោទប្រកាន់នោះទេ។លោក ហាស្តូ បាននិយាយថាគណបក្ស PDIP និងអ្នកគាំទ្រផ្សេងទៀតរបស់លោក ហ្កាន់ចា នឹងដាក់ពាក្យបណ្ដឹងលើភាពមិនប្រក្រតីនៃការបោះឆ្នោតដែលត្រូវបានចោទប្រកាន់នេះ ទៅតុលាការធម្មនុញ្ញ ប៉ុន្តែមិនបានផ្តល់ពេលវេលាកំណត់ទេ ហើយថាការស៊ើបអង្កេតនេះមានគោលបំណងការពារលទ្ធិប្រជាធិបតេយ្យ៕

ទ័ពអាកាសអាមេរិក ដែលដុតខ្លួនឯងនៅក្រៅស្ថានទូតអ៊ីស្រាអែល បានស្លាប់ដោយសាររបួសធ្ងន់ធ្ងរ

យោធា និងនគរបាលក្នុងតំបន់បាននិយាយកាលពីថ្ងៃចន្ទ (២៦ កុម្ភៈ) ថាទាហានអាកាសរបស់កងទ័ពអាកាសអាមេរិកម្នាក់ ដែលបានដុតខ្លួនឯងនៅខាងក្រៅស្ថានទូតអ៊ីស្រាអែល នៅទីក្រុងវ៉ាស៊ីនតោន ក្នុងសកម្មភាពជាក់ស្តែងនៃការតវ៉ាប្រឆាំងនឹងសង្គ្រាមនៅតំបន់ហ្កាហ្សា បានស្លាប់ដោយសាររបួសធ្ងន់ធ្ងរពេក។កងទ័ពអាកាសបាននិយាយនៅក្នុងសេចក្តីថ្លែងការណ៍មួយថា ឧត្តមនាវីឯក អារ៉ុន ប៊ូសនែល (Aaron Bushnell) វ័យ ២៥ ឆ្នាំ ដែលជាអ្នកឯកទេសប្រតិបត្តិការការពារតាមអ៊ីនធឺណិតជាមួយក្រុមជំនួយការស៊ើបការណ៍សម្ងាត់ទី ៥៣១ រូបនេះបានស្លាប់ដោយសាររបួសក្នុងឧបទ្ទវហេតុនេះ។មន្ត្រីនាំពាក្យនាយកដ្ឋាននគរបាលក្រុងវ៉ាស៊ីនតោន លី លេផេ (Lee Lepe) បានបញ្ជាក់ពីការស្លាប់នេះ ខណៈមន្ទីរបញ្ចកោណបាននិយាយថាការស្លាប់នេះគឺជា «ព្រឹត្តិការណ៍សោកនាដកម្ម» ហើយថារដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) កំពុងតាមដានស្ថានភាពយ៉ាងដិតដល់។នាយកដ្ឋានពន្លត់អគ្គិភ័យក្រុងវ៉ាស៊ីនតោន បាននិយាយថា លោក ប៊ូសនែល ត្រូវបានបញ្ជូនទៅកាន់មន្ទីរពេទ្យភ្លាមៗក្នុងស្ថានភាពធ្ងន់ធ្ងរ បន្ទាប់ពីមន្ត្រីសេវាសម្ងាត់អាមេរិកបានពន្លត់ភ្លើង ដែលលោកបានដុតខ្លួឯងកាលពីថ្ងៃអាទិត្យ ក្នុងពេលកំពុងស្លៀកសម្លៀកបំពាក់ទាហាន និងបានផ្សាយផ្ទាល់ហេតុការណ៍នេះតាមអ៊ីនធឺណិត៕

យុវជនព្យាយាមភៀសខ្លួន មុនការអនុវត្តបទបញ្ជាកែណ្ឌកម្លាំងចូលបម្រើទ័ព នៅសហភាពមីយ៉ាន់ម៉ា

មានការប្រជ្រៀតជាន់គ្នាដ៏គ្រោះថ្នាក់មួយនៅខាងក្រៅការិយាល័យលិខិតឆ្លងដែន ដែលបានឆក់យកជីវិតមនុស្សពីរនាក់ និងការឈរតម្រង់ជួរគ្នាមិនដាច់នៅខាងក្រៅស្ថានទូត ទាំងនេះគ្រាន់តែជាឧទាហរណ៍មួយចំនួននៃអ្វីដែលកំពុងកើតឡើងនៅក្នុងសហភាពមីយ៉ាន់ម៉ា ចាប់តាំងពីការប្រកាសពីការចូលបម្រើយោធាជាកាតព្វកិច្ច។ ពួកគេជាច្រើន កំពុងស្វែងរកការចាកចេញពីប្រទេសនេះ ដើម្បីគេចចេញពីការបង្ខំឲ្យចូលបម្រើកងទ័ព។ រដ្ឋាភិបាលយោធាមីយ៉ាន់ម៉ាកំពុងប្រឈមការក្រោកប្រឆាំងកាន់តែខ្លាំងឡើង ចំពោះរបបគ្រប់គ្រងរបស់ខ្លួន ហើយបានបាត់បង់ដែនដីដ៏ធំរបស់ប្រទេសនេះ ធ្លាក់ទៅឱ្យក្រុមតស៊ូប្រដាប់អាវុធ។កាលពីថ្ងៃទី១ខែកុម្ភៈឆ្នាំ២០២១ យោធាបានដណ្តើមអំណាចនៅក្នុងរដ្ឋប្រហារមួយ ដោយចាប់ក្រុមមេដឹកនាំជាប់ឆ្នោត រួមទាំងលោកស្រី អ៊ុង សានស៊ូជី ឃុំឃាំងរហូតមកដល់បច្ចុប្បន្ន និងធ្វើឱ្យប្រទេសនេះធ្លាក់ចូលទៅក្នុងសង្រ្គាមស៊ីវិលដ៏បង្ហូរឈាមដែលនៅតែបន្តកើតមានដល់សព្វថ្ងៃនេះ។ មនុស្សរាប់ពាន់នាក់ត្រូវបានសម្លាប់ ហើយអង្គការសហប្រជាជាតិបានប៉ាន់ប្រមាណថាមនុស្សប្រហែល២,៦លាននាក់ ត្រូវបានរត់ភៀសខ្លួនចេញពីទីលំនៅ។យុវជនមីយ៉ាន់ម៉ា ដែលភាគច្រើនបានដើរតួនាទីដឹកនាំការតវ៉ា និងប្រឆាំងរបបយោធា ឥឡូវនេះត្រូវបានគេប្រាប់ថាពួកគេនឹងត្រូវប្រយុទ្ធដើម្បីរបបនេះ។មនុស្សជាច្រើនជឿថានេះដោយសារ របបសឹកជួបវិបត្តិក្នុងការប្រយុទ្ធជាមួយកងកម្លាំងប្រដាប់អាវុធប្រឆាំងនៅតាមព្រំដែនក្នុងពេលប៉ុន្មានខែថ្មីៗនេះ ស្របពេលក្រុមប្រឆាំងរដ្ឋាភិបាល បានរួបរួមដៃគ្នាកម្ទេចរបបនេះនៅក្នុងតំបន់សំខាន់ៗមួយចំនួន។លោក Robert សកម្មជន វ័យ ២៤ឆ្នាំ បានប្រាប់សារព័ត៌មាន BBC ថា នេះជារឿងមិនសមហេតុសមផលទាល់តែសោះ ដែលត្រូវតែបម្រើក្នុងជួរកងទ័ពនៅពេលនេះ ព្រោះយើងមិនមែនប្រយុទ្ធជាមួយបរទេសឈ្លានពានឯណា គឺយើងកំពុងប្រយុទ្ធគ្នាជាមួយជនជាតិមីយ៉ាន់ម៉ាគ្នាឯងទេតើ ។ ប្រសិនបើយើងចូលបម្រើទ័ព ប្រៀបយើងជួយរបបយោធាក្នុងការប្រព្រឹត្តអំពើឃោរឃៅ៕

កងទ័ពអ៊ីស្រាអែល បង្ហាញផែនការវាយប្រហារទីក្រុងរ៉ាហ្វា របស់តំបន់ហ្កាហ្សា

ការចេញផ្សាយពីការិយាល័យលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានឱ្យដឹងកាលពីព្រឹកថ្ងៃចន្ទ (២៦ កុម្ភៈ) ថាកងទ័ពអ៊ីស្រាអែល បានបង្ហាញគណៈរដ្ឋមន្ត្រីសង្គ្រាមជាមួយនឹងផែនការវាយប្រហារ និងផែនការជម្លៀសជនស៊ីវិលនៅក្នុងទីក្រុងរ៉ាហ្វា (Rafah) ភាគខាងត្បូងតំបន់ហ្កាហ្សា។ការប្រកាសនេះបានធ្វើឡើង ស្របពេលមានការអំពាវនាវពីអន្តរជាតិជំរុញអ៊ីស្រាអែល មិនឱ្យបើកប្រតិបត្តិការជើងគោកនៅក្រុងរ៉ាហ្វា ជាទីដែលមនុស្សជាងមួយលាននាក់កំពុងស្វែងរកទីជម្រកពីការទម្លាក់គ្រាប់បែករបស់អ៊ីស្រាអែល នៅកន្លែងផ្សេងទៀត។ ការិយាល័យនេះបានបញ្ជាក់ថា គណៈរដ្ឋមន្ត្រីបានអនុម័តផែនការបញ្ជូនរថយន្តដឹកស្បៀងអាហារដោយផ្ទាល់ចូលទៅកាន់ភាគខាងជើងហ្កាហ្សា ក្នុងគោលបំណងការពាររថយន្តដឹកទំនិញពីការលួចដោយជនស៊ីវិល។បច្ចុប្បន្ននេះ រថយន្តជំនួយមនុស្សធម៌ ចូលទៅកាន់តំបន់ហ្កាហ្សា តាមរយៈច្រកឆ្លងកាត់ចំនួនពីរ ដែលមានទីតាំងនៅតំបន់ភាគខាងត្បូង ហើយជួបប្រទះការលំបាកក្នុងការទៅដល់ភាគខាងជើង ដោយសារតែជនស៊ីវិលដែលកំពុងស្រេកឃ្លាន បានសម្រុកចូលរថយន្តដឹកទំនិញលួចយកអាហារ។ យ៉ាងហោចណាស់មានគ្រួសារមួយក្នុងចំណោម ៤ គ្រួសារនៅតំបន់ហ្កាហ្សាស្ទ្រីប ឬស្មើនឹងមនុស្សជាងកន្លះលាននាក់ កំពុងប្រឈមមុខនឹងគ្រោះមហន្តរាយនៃកម្រិតអសន្តិសុខស្បៀងអាហារធ្ងន់ធ្ងរ ដែលជាកម្រិតព្រមានខ្ពស់បំផុត៕

បណ្ដាញសង្គម

ព័ត៌មានថ្មីៗ

ក្រុមអ្នកស្រាវជ្រាវនិយាយថា បម្រែបម្រួលអាកាសធាតុនឹងបំផ្លាញប្រពៃណីនេសាទត្រីលើបឹងទឹកកកនៅអឌ្ឍគោលខាងជើង

នាវាដឹកប្រេងរឹបអូសបានរបស់រុស្ស៊ី ធ្វើដំណើរទៅដល់ទីក្រុង Marseille ប្រទេសបារាំង

កម្ពុជាជម្រាបជូនឥណ្ឌាអំពីការវិវត្តថ្មីៗពាក់ព័ន្ធនឹងស្ថានការណ៍ព្រំដែនកម្ពុជា-ថៃ

ស្ថាប័នការពារស៊ីវិល៖ មនុស្ស ៥នាក់ស្លាប់ នៅអូម៉ង់ ក្រោយរថយន្តហូរទៅតាមទឹកជំនន់

សម្ដេចតេជោបង្ហាញអារម្មណ៍ផ្ទាល់ខ្លួនទាក់ទងនឹងស្ដ្រីម្នាក់យកប្ដីពីរក្នុងពេលតែមួយ ដោយចាត់ទុកទង្វើនេះបានបំផ្លាញប្រពៃណីស្ត្រីខ្មែរខ្លាំងបំផុតក្នុងសម័យទំនើបក្រោយសម័យរបបប៉ុល ពត

ក្រុមហ៊ុនរុស្ស៊ី Novatek ចុះហត្ថលេខាកិច្ចព្រមព្រៀងបឋម ក្នុងការផ្គត់ផ្គង់ឧស្ម័នធម្មជាតិរាវទៅកាន់វៀតណាម

សម្តេចប៉ាប Leo មានបន្ទូលថា ការវាយប្រហារតាមអាកាស គួរតែត្រូវបានហាមឃាត់

រុស្ស៊ីអំពាវនាវឲ្យមានដំណោះស្រាយនយោបាយ និងការទូត ក្រោយលោក Trump ចេញឱសានវាទ ចំពោះអ៊ីរ៉ង់

ប្អូនស្រីមេដឹកនាំកូរ៉េខាងជើង ច្រានចោលពីការមានកិច្ចប្រជុំកំពូល រវាងទីក្រុងព្យុងយ៉ាង និងនាយករដ្ឋមន្ត្រីជប៉ុន

ប្រេងបានធ្លាក់ថ្លៃជាង ១៣ភាគរយ ពេលលោក Trump ផ្អាកការវាយប្រហារហេដ្ឋារចនាសម្ព័ន្ធថាមពលអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877