BTV NEWS

សមត្ថកិច្ចខេត្តព្រះសីហនុ បង្ក្រាបទីតាំងសង្ស័យ Online Scams នៅកាស៊ីណូ ជីន យូ មេន តាំង ឃាត់ខ្លួនមនុស្ស ៩នាក់

រដ្ឋមន្ត្រីក្រសួងយុត្តិធម៌៖ ច្បាប់ប្រឆាំង Online Scam នឹងរួមចំណែកធានាមិនឱ្យបទល្មើសនេះត្រឡប់វិញ

សមត្ថកិច្ចឃាត់ខ្លួនជនបរទេស ១៧នាក់ ពាក់ព័ន្ធករណី Online Scam ក្នុងភូមិសាស្ត្រសង្កាត់វាលស្បូវ

សមត្ថកិច្ច ឃាត់ខ្លួនជនជាតិវៀតណាម ១០នាក់ទៀត ជាប់ពាក់ព័ន្ធ Online Scam នៅសង្កាត់ព្រែកប្រា ខណ្ឌច្បារអំពៅ

សន្តិសុខ និង សង្គម

សហរដ្ឋអាមេរិក នឹងជួយជប៉ុន នៅក្នុងការប៉ះទង្គិចយន្តហោះយ៉ាងធ្ងន់ធ្ងរ ដោយផ្ដល់ឧបករណ៍ថតទិន្នន័យ

ក្រុមមន្ត្រីសុវត្ថិភាពអាកាសចរណ៍អាមេរិក នឹងផ្តល់ជំនួយដល់ប្រទេសជប៉ុន ក្នុងការអាន និងវិភាគម៉ាស៊ីនថតទិន្នន័យយន្តហោះ បន្ទាប់ពីមានការប៉ះទង្គិចគ្នាយ៉ាងធ្ងន់ធ្ងររវាងយន្តហោះខ្នាតធំរបស់ក្រុមហ៊ុន ជើផេន អ៊ែរឡាញស៍ ( Japan Airlines) និងយន្តហោះខ្នាតតូចរបស់កងឆ្មាំល្បាតឆ្នេរនៅសប្តាហ៍នេះ។ប្រធានក្រុមប្រឹក្សាសុវត្ថិភាពដឹកជញ្ជូនជាតិ (NTSB) លោកស្រី ជែននីហ្វឺ ហូមែនឌី (Jennifer Homendy) បានប្រាប់អ្នកយកព័ត៌មានថា ប្រទេសជប៉ុនបានស្នើសុំជំនួយលើឧបករណ៍ថតទិន្នន័យដែលផលិតដោយក្រុមហ៊ុន ហាន់នីវែល (Honeywell)។ លោកស្រីបានបន្ថែមថា «យើងនឹងជួយលើរឿងនេះ» ប៉ុន្តែគេមិនច្បាស់ទេថាតើម៉ាស៊ីនថតទិន្នន័យនោះនឹងត្រូវនាំយកទៅកាន់ទីក្រុងវ៉ាស៊ីនតោន ដើម្បីធ្វើការវិភាគ ឬក៏បុគ្គលិកក្រុមប្រឹក្សាសុវត្ថិភាព NTSB នឹងធ្វើដំណើរទៅប្រទេសជប៉ុនដើម្បីជួយដោយផ្ទាល់។នៅក្រោមច្បាប់អន្តរជាតិសម្រាប់ការស៊ើបអង្កេតលើយន្តហោះ ដែលត្រូវបានគេស្គាល់ទូទាំងឧស្សាហកម្មអាកាសចរណ៍ដោយឈ្មោះស្របច្បាប់ថា «ឧបសម្ព័ន្ធទី ១៣» ការស៊ើបអង្កេតនេះត្រូវបានដឹកនាំដោយប្រទេសដែលឧបទ្ទវហេតុបានកើតឡើង ប៉ុន្តែប្រទេសដែលយន្តហោះត្រូវបានផលិតក៏អាចចូលរួមបានផងដែរ។ក្រុមអ្នកជំនាញផ្នែកនីតិកោសល្យវិទ្យាមកពីក្រុមហ៊ុន អ៊ែរប៊ឺស (Airbus) និងទីភ្នាក់ងាររដ្ឋបារាំង ប៊ីអេអ៊ី (BAE) រួមជាមួយតំណាងម្នាក់មកពីក្រុមប្រឹក្សាសុវត្ថិភាពដឹកជញ្ជូនរបស់ប្រទេសកាណាដា (TSB) កំពុងស៊ើបអង្កេតឧបទ្ទវហេតុដែលបានសម្លាប់សមាជិកនាវិកយន្តហោះឆ្មាំល្បាតឆ្នេរចំនួន ៥នាក់ ក្នុងចំណោមមនុស្សទាំង ៦នាក់នៅលើនោះ៕

ប្រជាជនអ៊ីរ៉ង់កាន់ទុក្ខសមាជិកគ្រួសារ និងមិត្តភក្តិ ដែលបានស្លាប់ក្នុងការវាយប្រហារភេរវកម្ម

សមាជិកគ្រួសារ និងមិត្តភក្តិរបស់អ្នកដែលបានបាត់បង់ជីវិតនៅក្នុងការបំផ្ទុះគ្រាប់បែកផ្ទួនគ្នាចំនួនពីរកាលពីថ្ងៃពុធ នៅជិតទីបញ្ចុះសពអតីតមេបញ្ជាការយោធាកាសេមសូឡេម៉ានី(Qassem Soleimani )ក្នុងទីក្រុង ឃើម៉ាន់(Kerman) ភាគអាគ្នេយ៍ប្រទេសអ៊ីរ៉ង់ កំពុងកាន់ទុក្ខចំពោះការបាត់បង់របស់ពួកគេ។ លោក Soleimani ដែលជាមេបញ្ជាការយោធាដ៏មានឥទ្ធិពលបំផុតមួយរូបក្នុងប្រទេសអ៊ីរ៉ង់ បានស្លាប់ កាលពីថ្ងៃទី ៣ ខែមករា ឆ្នាំ ២០២៣ នៅជិតអាកាសយានដ្ឋានអន្តរជាតិរបស់ទីក្រុងបាកដាដ( Baghdad)ប្រទេសអ៊ីរ៉ាក់ ក្នុងការវាយប្រហារដោយយានដ្រូន ដែលបញ្ជាដោយ អតីតប្រធានាធិបតីសហរដ្ឋអាមេរិកលោក Donald Trump ។ សាកសពរបស់លោក Soleimani ត្រូវបានបញ្ចុះនៅក្នុងទីក្រុងកំណើត ឃើម៉ាន់ របស់លោក បន្ទាប់ពីពិធីបុណ្យសពដែលមានមនុស្សរាប់លាននាក់ចូលរួមទូទាំងប្រទេសអ៊ីរ៉ង់។ កាលពីរសៀលថ្ងៃពុធសប្ដាហ៍នេះ ការផ្ទុះមួយបានកើតឡើងនៅជិតទីបញ្ចុះសពរបស់លោក Soleimani ជាកន្លែងដែលមនុស្សមួយចំនួនធំកំពុងប្រារព្ធខួបនៃការស្លាប់របស់លោក។ ដប់នាទីក្រោយមក ការផ្ទុះលើកទីពីរក៏បានកើតឡើង។តាមរបាយការណ៍ក្នុងតំបន់ ការបំផ្ទុះគ្រាប់បែកនេះបានសម្លាប់មនុស្ស ៨៤ នាក់ និងរបួស ២៨៤ នាក់។ រដ្ឋាភិបាលអ៊ីរ៉ង់ បានប្រកាសយកថ្ងៃព្រហស្បតិ៍ ទី ៤មករា សប្ដាហ៍ជាថ្ងៃកាន់ទុក្ខទូទាំងប្រទេស។ក្រុមអ្នកកាន់ទុក្ខបានប្រមូលផ្តុំគ្នាជុំវិញទីតាំងកើតហេតុកាលពីថ្ងៃព្រហស្បតិ៍ ដើម្បីចូលរួមរំលែកទុក្ខដល់ជនរងគ្រោះនៃការវាយប្រហារភេរវកម្មនេះ៕

សង្គ្រាមអ៊ីស្រាអែល-ហាម៉ាស៖ កងកម្លាំងការពារអីស្រអែល រុះរើមជ្ឈមណ្ឌលបញ្ជាការហាម៉ាស នៅទីក្រុងខាន់យូនីស

យោធាអ៊ីស្រាអែល បាននិយាយថា ខ្លួនកំពុងរុះរើមជ្ឈមណ្ឌលបញ្ជា និងគ្រប់គ្រងរបស់ក្រុមហាម៉ាស នៅក្នុងទីក្រុងខាន់យូនីស (Khan Younis) ភាគខាងត្បូងដ៏សំខាន់នៃតំបន់ហ្កាហ្សា។កងកម្លាំងការពារអ៊ីស្រាអែល (IDF) បានអះអាងថា កងទ័ពរបស់ខ្លួន បានសម្លាប់យុទ្ធជនហាម៉ាសជាច្រើននាក់ នៅក្នុងតំបន់នេះ ហើយបាន «បំផ្លាញយ៉ាងច្រើនសន្ធឹកសន្ធាប់»នូវហេដ្ឋារចនាសម្ព័ន្ធភេរវកម្មរបស់ក្រុមនេះ ក្នុងអំឡុងពេលប្រតិបត្តិការ នាពេលថ្មីៗ។លោក Col Mickey Sharvit មេបញ្ជាការកងពលតូច Kiryati បាននិយាយថា៖«មិនមានហេដ្ឋារចនាសម្ព័ន្ធស៊ីវិល» នៅក្នុងតំបន់ដែលកងកម្លាំងការពារអ៊ីស្រាអែល កំពុងប្រតិបត្តិការទេ ចំពេលមានការអំពាវនាវឲ្យយោធាអ៊ីស្រាអែល ធ្វើបន្ថែមទៀត ដើម្បីការពារជនស៊ីវិល។លោកបានបន្ថែមថា«យើងជួបការភ័យខ្លាច នៅស្ទើរគ្រប់ផ្ទះ នៅក្នុងមន្ទីរពេទ្យ និងសាលារៀន។ កងកម្លាំងរបស់យើងថែមទាំង បានកម្ចាត់ភេរវករ ដែលងើបចេញពីរូងក្រោមដី [ផ្លូវរូងក្រោមដី] នៅក្នុងសាលារៀនមួយ»។ព័ត៌មានបច្ចុប្បន្នភាព បានកើតឡើង នៅពេលដែលការបាញ់ផ្លោងថ្មីរបស់អ៊ីស្រាអែល បានសម្លាប់ជនជាតិប៉ាឡេស្ទីន ១៤នាក់នៅទីក្រុងខាន់យូនីស រួមទាំងកុមារ៩នាក់ នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស នៅតំបន់ហ្កាហ្សា។អ្នកស្រុកហ្កាហ្សា ក៏បាននិយាយផងដែរថា យន្តហោះ និងរថក្រោះរបស់អ៊ីស្រាអែល បានទម្លាក់គ្រាប់បែកលើជំរំជនភៀសខ្លួនចំនួនបី នៅកណ្តាលដែនដីនេះ ក្នុងអំឡុងពេលនៃការវាយប្រហារ ដែលធ្ងន់ធ្ងរជាងការវាយប្រហារកាលប៉ុន្មានថ្ងៃកន្លងទៅ។ ពុំមានការអត្ថាធិប្បាយភ្លាមៗពីយោធាអ៊ីស្រាអែលលើការអះអាងនេះទេ។

ចំនួនអ្នកស្លាប់ប៉ាឡេស្ទីននៅក្នុងសង្រ្គាមអ៊ីស្រាអែលនៅតំបន់ហ្កាហ្សា កើនឡើងជាង ២២,៤០០នាក់

ក្រុមអាជ្ញាធរសុខាភិបាលរបស់តំបន់ហ្កាហ្សាបាននិយាយកាលពីថ្ងៃព្រហស្បតិ៍ថា ជនជាតិប៉ាឡេស្ទីន យ៉ាងហោចណាស់ ២២.៤៣៨នាក់ បានស្លាប់និង៥៧.៦១៤ នាក់ផ្សេងទៀតបានរងរបួសនៅក្នុងការវាយប្រហាររបស់អ៊ីស្រាអែលនៅតំបន់ហ្កាហ្សាស្ទ្រីបចាប់តាំងពីថ្ងៃទី ៧ខែតុលាឆ្នាំ២០២៣មក។អ្នកនាំពាក្យក្រសួងសុខាភិបាលលោកអាស្រាហ្វ អាល់គូដ្រា(Ashraf al-Qudra) បាននិយាយនៅក្នុងសេចក្តីថ្លែងការណ៍មួយថា កុមារ និងស្ត្រីមានចំនួន ៧០% នៃជនរងគ្រោះទាំងនោះ ។លោកបានបន្ថែមថា មនុស្ស ១២៥ នាក់ បានស្លាប់ និង៣១៨នាក់ ផ្សេងទៀតបានរងរបួសនៅក្នុងការវាយប្រហាររបស់អ៊ីស្រាអែលក្នុងរយៈពេល២៤ ម៉ោងចុងក្រោយនេះ។ យោងតាមអ្នកនាំពាក្យ គ្រូពេទ្យចំនួន ៣២៦ នាក់បានស្លាប់ រថយន្តសង្គ្រោះចំនួន ១២១ គ្រឿងត្រូវបានបំផ្លាញ ហើយមន្ទីរពេទ្យចំនួន ៣០កន្លែង និងមណ្ឌលថែទាំសុខភាពចំនួន៥៣ កន្លែង ត្រូវបានបង្ខំឱ្យ បញ្ឈប់ដំណើរការផ្ដល់សេវាដោយការវាយលុករបស់អ៊ីស្រាអែលចាប់តាំងពីថ្ងៃទី៧ ខែតុលា។ លោក អាល់គូដ្រា (Al-Qudra) បាននិយាយថា គ្រូពេទ្យចំនួន ៩៩នាក់ នៅតែស្ថិតក្នុងការឃុំខ្លួនរបស់អ៊ីស្រាអែល។អ៊ីស្រាអែលបានបើកការវាយប្រហារផ្លូវអាកាស និងថ្មើរជើងឥតឈប់ឈរលើតំបន់ ហ្កាហ្សាស្ទ្រីប បន្ទាប់ពីការវាយប្រហារឆ្លងព្រំដែនដោយក្រុម ហាម៉ាស ប៉ាឡេស្ទីនកាលពីថ្ងៃទី ៧ ខែតុលា។ ជនជាតិអ៊ីស្រាអែលប្រមាណ១.២០០នាក់ បានស្លាប់ក្នុងការវាយប្រហាររបស់ក្រុមហាម៉ាសចូលក្នុងប្រទេសអ៊ីស្រាអែល។ ការវាយប្រហារឥតសំចៃដៃរបស់អ៊ីស្រាអែលបានធ្វើឱ្យតំបន់ហ្កាហ្សារងការបំផ្លិចបំផ្លាញធ្ងន់ធ្ងរ ដោយ ៦០% នៃហេដ្ឋារចនាសម្ព័ន្ធនៅក្នុងតំបន់រងការឡោមព័ទ្ធដោយអ៊ីស្រាអែលមួយនេះ ត្រូវបានខូចខាត ឬបំផ្លាញ ហើយពលរដ្ឋជិត ២ លាននាក់ត្រូវបានភៀសខ្លួនចេញពីលំនៅឋានស្របពេលមានកង្វះ ស្បៀងអាហារ ទឹកស្អាត និងថ្នាំពេទ្យជាដើម៕

សមត្ថកិច្ចឃាត់ខ្លួនសិស្សសាលា ៧នាក់ ករណីប្រើហិង្សា និងចែកចាយវីដេអូលើបណ្តាញសង្គម

ភ្នំពេញ៖ ករណីសិស្សសាលាវាយគ្នាបង្កជាការភ្ញាក់ផ្អើលពេញបណ្តាញសង្គមហ្វេសប៊ុកកាលពីថ្ងៃទី០៤ ខែមករា ឆ្នាំ២០២៤ ត្រូវបានឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បញ្ជាកម្លាំងឱ្យតាមចាប់ក្រុមជនសង្ស័យបាន ៤នាក់ នៅក្បែររង្វង់មូលវាលរេញ ស្រុកព្រៃនប់ ខេត្តព្រះសីហនុ នាយប់ថ្ងៃទី០៤ ខែមករាដដែល ក្រោយមានការចែកចាយវីដេអូពីអំពើហិង្សានេះលើបញ្ដាញសង្គម ។នគរបាលប៉ុស្តិ៍រដ្ឋបាលភ្លើងឆេះរទេះ ខណ្ឌកំបូល រាជធានីភ្នំពេញ បានប្រាប់ BTV ឱ្យដឹងថា អំពើហិង្សាដែលបង្កឡើងដោយសិស្សសាលាមួយក្រុមនេះ គឺកើតឡើងក្នុងភូមិជន្លុងម្លូ សង្កាត់ភ្លើងឆេះរទេះកាលពីថ្ងៃទី០៣ ខែមករា ឆ្នាំ២០២៤ ភ្លាមៗក្រោយទទួលបានព័ត៌មាននេះឧត្តមសេនីយ៍ឯក ជួន ណារិន្ទ បានដាក់បទបញ្ជាដ៏ម៉ឺងម៉ាត់ឱ្យសមត្ថកិច្ចខណ្ឌកំបូលស្រាវជ្រាវរហូតឈានដល់ឃាត់ខ្លួនបានចំនួន ៧នាក់ ក្នុងនោះគឺអ្នកដៃដល់មានតែ ២នាក់ប៉ុណ្ណោះ ដោយមាន៣នាក់ឃាត់បាននៅពេលថ្ងៃ ចំណែក ៤នាក់ទៀតឃាត់ខ្លួននាល្ងាច ថ្ងៃទី០៤ ខែមករា ឆ្នាំ២០២៤ នៅវាលរេញ ស្រុកព្រៃនប់ ខេត្តព្រះសីហនុ ខណៈដែលក្រុមសិស្សសាលាទាំងនេះជិះម៉ូតូគេចខ្លួនពីភ្នំពេញទៅខេត្តព្រះសីហនុ។ជនរងគ្រោះក្នុងអំពើហិង្សានេះមានអាយុ ១៥ឆ្នាំ មានទីលំនៅសង្កាត់ពងទឹក ខណ្ឌដង្កោ ចំណែកជនសង្ស័យ ទី១. ឈ្មោះ អាត សំណាង ហៅ ឈ័ររី ភេទប្រុស អាយុ ១៧ឆ្នាំ មានទីលំនៅ បុរីពិភពថ្មីគម្រោងទី៣ សង្កាត់ភ្លើងឆេះរទេះ ខណ្ឌកំបូល ជាជនដៃដល់ ទី២. ឈ្មោះ យាន រស្មី ហៅ អាម៉ី ភេទស្រី អាយុ ១៥ឆ្នាំ ជាសិស្ស នៃ សាលាជម្ពូវ័ន រស់នៅភូមិព្រៃសំព័រ សង្កាត់ក្រាំងពង្រ ខណ្ឌដង្កោ ជាជនដៃដល់៕ តារាវុទ្ធី

រដ្ឋមន្ត្រីការពារជាតិអ៊ីស្រាអែល គូសបញ្ជាក់ពីដំណាក់កាលថ្មីក្នុងសង្គ្រាមនៅហ្កាហ្សា

រដ្ឋមន្ត្រីការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) កាលពីថ្ងៃព្រហស្បតិ៍ (០៤ មករា) បានគូសបញ្ជាក់អំពីដំណាក់កាលថ្មីនៃសង្រ្គាមរបស់អ៊ីស្រាអែលនៅហ្កាហ្សា ដោយជាវិធីសាស្រ្តដែលកំណត់គោលដៅកាន់តែច្រើននៅភាគខាងជើង និងការបន្តស្វែងរកបណ្ដាមេដឹកនាំក្រុមហាម៉ាស នៅភាគខាងត្បូង ខណៈដែលអ៊ីស្រាអែល ស្វះស្វែងរកការដោះលែងចំណាប់ថ្នូរនៅសេសសល់ ដែលត្រូវបានចាប់ដោយក្រុមហាម៉ាស។ដោយស្ថិតក្រោមសម្ពាធអន្តរជាតិទាមទារឲ្យផ្លាស់ប្តូរទៅរកប្រតិបត្តិការប្រយុទ្ធដែលមិនសូវខ្លាំងក្លា និងស្របពេលជួបបញ្ហាប្រឈមផ្នែកសេដ្ឋកិច្ច អ៊ីស្រាអែលបាននិងកំពុងដកកងកម្លាំងរបស់ខ្លួននៅក្នុងតំបន់ហ្កាហ្សា ដើម្បីអនុញ្ញាតឱ្យក្រុមបម្រុងរាប់ពាន់នាក់ត្រឡប់ទៅធ្វើការវិញ។លោក ហ្កាឡាន់ បាននិយាយនៅក្នុងសេចក្តីថ្លែងការណ៍មួយថា ប្រតិបត្តិការនៅភាគខាងជើងនឹងរួមបញ្ចូលការវាយឆ្មក់ ការរុះរើផ្លូវរូងក្រោមដី ការវាយប្រហារតាមផ្លូវអាកាស និងថ្មើរជើង ព្រមទាំងប្រតិបត្តិការកងកម្លាំងពិសេស។ លោក ហ្កាឡាន់ បានបន្ថែមថា បន្ទាប់ពីសង្រ្គាមរួច ក្រុមហាម៉ាសនឹងមិនគ្រប់គ្រងតំបន់ហ្កាហ្សាទៀតទេ ហើយតំបន់ហ៊ុមព័ទ្ធនេះនឹងត្រូវគ្រប់គ្រងដោយស្ថាប័នប៉ាឡេស្ទីន ដរាបណាគ្មានការគំរាមកំហែងដល់អ៊ីស្រាអែល។នៅតំបន់ភាគខាងត្បូង ជាទីដែលភាគច្រើននៃប្រជាជន ២,៣លាននាក់នៅហ្កាហ្សាឥឡូវនេះកំពុងរស់នៅក្នុងតង់ និងទីជម្រកបណ្តោះអាសន្នផ្សេងទៀត អ៊ីស្រអែលនឹងផ្តោតសំខាន់លើការលុបបំបាត់មេដឹកនាំក្រុមហាម៉ាស និងការជួយសង្គ្រោះចំណាប់ថ្នូរអ៊ីស្រាអែលប្រហែល ១៣០នាក់ដែលនៅសេសសល់ក្នុងចំណោមមនុស្ស ២៤០នាក់ ដែលត្រូវបានចាប់ខ្លួនកាលពីថ្ងៃទី០៧ ខែតុលា៕

ចិន តវ៉ាទៅកាន់មីយ៉ាន់ម៉ា ក្រោយការបាញ់កាំភ្លើងធំបានបង្ករបួសដល់មនុស្ស ៥នាក់

អ្នកនាំពាក្យក្រសួងការបរទេសចិនបាននិយាយកាលពីថ្ងៃព្រហស្បតិ៍ (០៤ មករា) ថាប្រទេសចិន បានតវ៉ាទៅកាន់សហភាពមីយ៉ានម៉ា ជុំវិញហេតុការណ៍ដែលមនុស្សប្រាំនាក់បានរងរបួស បន្ទាប់ពីការបាញ់កាំភ្លើងធំបានវាយប្រហារអំឡុងពេលការប្រយុទ្ធគ្នារវាងរបបសឹកដែលកំពុងកាន់អំណាច និងក្រុមឧទ្ទាម ហើយបានប្រយុទ្ធគ្នាជ្រុលចូលទៅក្នុងទីក្រុងតូចមួយនៅជិតព្រំដែនចិន។ជម្លោះប្រដាប់អាវុធបានផ្ទុះឡើងនៅភាគខាងជើងនៃប្រទេសមីយ៉ាន់ម៉ា រវាងយោធា និងក្រុមឧទ្ទាម ចាប់តាំងពីចុងខែតុលា ដោយជំរុញឱ្យមានការអំពាវនាវបទឈប់បាញ់ពីប្រទេសចិន ដែលនៅជិតខាង ហើយថែមទាំងបានជួយសម្រួលដល់កិច្ចសន្ទនារវាងភាគីជម្លោះទាំងពីរផងដែរ។នៅមុននោះ សារព័ត៌មាន ក្លូបប៊ល ថែមស៍ (Global Times) ដែលគ្រប់គ្រងដោយរដ្ឋបាននិយាយថា មនុស្ស ៥នាក់នៅទីក្រុង ណានសាន (Nansan) ដែលជាទីក្រុងអនុតំបន់ត្រូពិចនៅក្បែរមីយ៉ាន់ម៉ា ត្រូវបានបញ្ជូនទៅកាន់មន្ទីរពេទ្យ បន្ទាប់ពីបានរងរបួសកាលពីថ្ងៃពុធដោយសារគ្រាប់ផ្លោង។ ឧបទ្ទវហេតុនេះកើតឡើងបន្ទាប់ពីស្ថានទូតចិនប្រចាំនៅមីយ៉ាន់ម៉ា បានជំរុញជនជាតិរបស់ខ្លួនកាលពីសប្តាហ៍មុនឱ្យចាកចេញពីទីក្រុង ឡោកខៃ (Laukkai) ឱ្យបានឆាប់តាមដែលអាចធ្វើទៅបាន ដោយលើកឡើងពីកំណើនហានិភ័យផ្នែកសន្តិសុខ៕

ក្រុមរដ្ឋអ៊ីស្លាមអះអាងពីការវាយប្រហារដ៏ព្រៃផ្សៃនៅអ៊ីរ៉ង់ ដោយការបំផ្ទុះពីរលើកសម្លាប់មនុស្ស ៨៤ នាក់

ក្រុមសកម្មប្រយុទ្ធរដ្ឋអ៊ីស្លាមបាននិយាយកាលពីថ្ងៃព្រហស្បតិ៍ទី ៤ ខែមករា ថាខ្លួនបានបំផ្ទុះគ្រាប់បែកពីរលើកដែលបានសម្លាប់មនុស្សយ៉ាងហោចណាស់ ៨៤ នាក់នៅឯពិធីរំលឹកវិញ្ញាណក្ខន្ឌមួយក្នុងប្រទេសអ៊ីរ៉ង់ដល់ការស្លាប់របស់ឆ្មាំបដិវត្តន៍ លោកឧត្តមសេនីយ៍ Qasem Soleimani ។ការអះអាងពីក្រុមរដ្ឋអ៊ីស្លាម បានកើតឡើងនៅពេលដែលអ៊ីរ៉ង់ បានប្រារព្ធពិធីកាន់ទុក្ខទូទាំងប្រទេសរយៈពេលមួយថ្ងៃសម្រាប់អ្នកដែលត្រូវបានសម្លាប់នៅក្នុងការបំផ្ទុះកាលពីថ្ងៃពុធសប្ដាហ៍នេះ។ នៅក្នុងសេចក្តីថ្លែងការណ៍មួយនៅលើ Telegram ក្រុមរដ្ឋអ៊ីស្លាមបាននិយាយថា សមាជិកពីរនាក់របស់ពួកគេ បានធ្វើសកម្មភាពបំផ្ទុះគ្រាប់បែកក្នុងអាវកាក់របស់ពួកគេ នៅក្នុងចំណោមហ្វូងមនុស្សជាច្រើនដែលបានចូលរួមគោរពវិញ្ញាណក្ខន្ធលោក Soleimani ក្នុងថ្ងៃគម្រប់ខួបការស្លាប់របស់លោកនៅក្នុងការវាយប្រហារដោយយានដ្រូនរបស់សហរដ្ឋអាមេរិកក្នុងទីក្រុងបាកដាដកាលពីបួនឆ្នាំមុន។ទីភ្នាក់ងារសារព័ត៌មានផ្លូវការអ៊ីរ៉ង់ IRNA បានរាយការណ៍ថ្មីៗនេះថា ក្រុមអ្នកស៊ើបអង្កេតអ៊ីរ៉ង់បានបញ្ជាក់រួចហើយថា ការបំផ្ទុះលើកទីមួយ ជាស្នាដៃរបស់ក្មាន់បំផ្ទុះគ្រាប់បែកអត្តឃាតម្នាក់ ហើយត្រូវគេជឿថាការបំផ្ទុះទីពីរគឺ ប្រហែលជាក្មាន់បំផ្ទុះគ្រាប់បែកអត្តឃាតម្នាក់ទៀត។ លោក Soleimani ដែលដឹកនាំប្រតិបត្តិការបរទេសរបស់ឆ្មាំការពារកងកម្លាំង គុដស៍ (Quds) គឺជាសត្រូវដ៏ធំរបស់រដ្ឋអ៊ីស្លាម។ ក្រុមជ្រុលនិយមនិកាយស៊ុននីនេះ ធ្លាប់បានវាយប្រហារកាលពីកន្លងទៅជាញឹកញាប់នៅអ៊ីរ៉ង់ដែលកាន់សាសនានិកាយស៊ីអ៊ីតភាគច្រើន ។ ចំនួនអ្នកស្លាប់ត្រូវបានកែសម្រួលបន្ទាបពីប្រហែល១០០នាក់នៅថ្ងៃ បន្ទាប់ពីអ្វីដែលក្រុមអាជ្ញាធរអ៊ីរ៉ង់ហៅថាជា ការវាយប្រហារភេរវកម្ម ដែលបានធ្វើឱ្យមនុស្សរាប់រយនាក់រងរបួសផងដែរនៅជិតផ្នូររបស់ លោកSoleimani ក្នុងទីក្រុងឃើម៉ាន់ Kerman ភាគខាងត្បូង។អ៊ីរ៉ង់បានទទួលរងការវាយប្រហារយ៉ាងសាហាវព្រៃផ្សៃនាពេលកន្លងមកពីក្រុមជីហាដ និងពួកសកម្មប្រយុទ្ធផ្សេងទៀត ព្រមទាំងការសម្លាប់មន្ត្រី និងអ្នកវិទ្យាសាស្ត្រនុយក្លេអ៊ែរដែលបានស្តីបន្ទោសទៅលើសត្រូវអ៊ីស្រាអែល។កាលពីថ្ងៃព្រហស្បតិ៍ រដ្ឋមន្ត្រីក្រសួងមហាផ្ទៃលោក អាម៉េដ វ៉ាហ៊ីឌី(Ahmad Vahidi) បានប្រាប់ទីភ្នាក់ងារព័ត៌មាន ISNA អំពីការពង្រឹងសន្តិសុខជុំវិញព្រំដែនដ៏ផុយស្រួយរបស់ខ្លួនជាមួយអាហ្វហ្គានីស្ថាន និងប៉ាគីស្ថាន៕

ចំនួនអ្នកស្លាប់ក្នុងគ្រោះរញ្ជួយដីនៅជប៉ុនកើនឡើងដល់៨៤ និង៧៩នាក់បាត់ខ្លួន ខណៈអាកាសធាតុអាប់អួររំខានដល់ការសង្គ្រោះ

ចំនួនអ្នកស្លាប់ដោយសារគ្រោះរញ្ជួយដីដ៏ធ្ងន់ធ្ងរដែលបានវាយប្រហារតំបន់ឧបទ្ទីបណូតូ(Noto) ភាគកណ្តាលរបស់ប្រទេសជប៉ុន បានកើនឡើងដល់ ៨៤នាក់នៅក្នុងខេត្ត អ៊ីហ្ស៊ីកាវ៉ា (Ishikawa)តែមួយគត់ ហើយមនុស្ស ៧៩នាក់នៅតែបាត់ខ្លួនក្នុងខេត្តមួយនេះ។ ក្នុងពេលសីតុណ្ហភាពចុះត្រជាក់ខ្លាំង និងភ្លៀងធ្លាក់ខ្លាំង ក្រុមអ្នកជួយសង្គ្រោះកំពុងស្វែងរកនៅតាមគំនរបាក់បែកនៃលំឋានដែលដួលរលំនៅភាគខាងលិចប្រទេសជប៉ុន ដោយសង្ឃឹមថានឹងអាចរកឃើញអ្នកនៅរស់រានមានជីវិតពីការរញ្ជួយដីនៅសប្តាហ៍នេះ។គ្រោះរញ្ជួយដីកម្រិត ៧.៦ រ៉ិចទ័រ កាលពីថ្ងៃចន្ទដើមសប្ដាហ៍នេះ បានអង្រួនខេត្ត អ៊ីហ្ស៊ីកាវ៉ា និងតំបន់ជុំវិញ ដោយបានបំផ្លិចបំផ្លាញអគាររាប់ពាន់ខ្នង បង្កឱ្យមានអគ្គិភ័យ និងបានចេញការព្រមានអំពីរលកយក្សស៊ូណាមិ។ មនុស្សយ៉ាងហោចណាស់៨៤នាក់ត្រូវបានគេដឹងថាបានស្លាប់ ដោយចំនួនអ្នកស្លាប់ត្រូវរំពឹងថានឹងកើនឡើង ខណៈក្រុមអ្នកជួយសង្គ្រោះកំពុងទប់ទល់នឹងរលករញ្ជួយ និងអាកាសធាតុមិនល្អ ក្នុងពេលប្រតិត្តិការសង្គ្រោះនៅតាមគំនរកម្ទេចថ្មនានា។ ក្រុមមន្ត្រីក្នុងខេត្តអ៊ីហ្ស៊ីកាវ៉ា(Ishikawa)បាននិយាយថា អ្នកស្លាប់៤៨នាក់ នៅក្នុងទីក្រុង វ៉ាជីម៉ា (Wajima) និង ២៣ នាក់នៅទីក្រុងស៊ូស៊ុយ(Suzu) ៥នាក់នៅទីក្រុងណាណាវ (Nanao) ៤នាក់នៅ ទីក្រុង អាណាមីស៊ុ(Anamizu) ២នាក់នៅ តំបន់ណូតូ (Noto) ម្នាក់នៅទីក្រុងហៃគុ(Hakui) និង ទីប្រជុំ ហ្ស៊ីកា (Shika)។អ្នកស្លាប់ចំនួន១៣នាក់ផ្សេងទៀតត្រូវបានគេរាយការណ៍នៅក្នុងក្រុងជិតខាងចំនួន ៥។ មនុស្សជាង៣០០នាក់បានរងរបួស យ៉ាងហោចណាស់២៦នាក់មានស្ថានភាបរបួសធ្ងន់ ។រដ្ឋាភិបាលខេត្ត អ៊ីហ្ស៊ីកាវ៉ា បានប្រកាសតួលេខចុងក្រោយ នៅក្នុងកិច្ចប្រជុំនៅឯទីស្នាក់ការកណ្តាលគ្រប់គ្រងគ្រោះមហន្តរាយកាលពីល្ងាចថ្ងៃទី ៤ ខែមករា សប្ដាហ៍នេះ៕

ករណីសិស្សសាលាវាយគ្នានៅសង្កាត់ភ្លើងឆេះរទេះ សមត្ថកិច្ចតាមចាប់ដល់វាលរេញ

ភ្នំពេញ ៖ ករណីសិស្សសាលាវាយគ្នានៅសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ បង្កការភ្ញាក់ផ្អើលពេញបណ្តាសង្គមហ្វេសប៊ុកថ្មីៗនេះ ត្រូវសមត្ថកិច្ចមូលដ្ឋានតាមចាប់បាន ៤នាក់ នៅវាលរេញ ខេត្តព្រះសីហនុ នាល្ងាច ថ្ងៃទី៤ ខែមករា ឆ្នាំ២០២៤ ។ ពេលនេះសមត្ថកិច្ចខណ្ឌកំបូលកំពុងនាំខ្លួនជនសង្ស័យទាំង ៤នាក់នេះមកកាន់រាជធានីភ្នំពេញ ។ សមត្ថកិច្ចនគរបាលប៉ុស្តិ៍រដ្ឋបាលភ្លើងឆេះរទេះ ប្រាប់ BTV ឲ្យដឹងនាពេលនេះថា នៅក្នុងហេតុការណ៍នេះ សមត្ថកិច្ចខណ្ឌកំបូលចាប់ខ្លួនចំនួន ៧នាក់ ប៉ុន្តែអ្នកដៃដល់តែ ២នាក់ទេ ។ ៣នាក់ ឃាត់បានពីថ្ងៃ ចំណែក ៤នាក់ទៀត ឃាត់ខ្លួននាល្ងាច ថ្ងៃទី៤ ខែមករា ឆ្នាំ២០២៤ នៅវាលរេញ ខេត្តព្រះសីហនុ ៕ អត្ថបទ៖ តារាវុទ្ធី

បណ្ដាញសង្គម

ព័ត៌មានថ្មីៗ

ផ្ទះទេវតា០១ខ្នង ដោយមានភ្ជាប់អណ្ដូងទឹកស្អាត និងប្រព័ន្ធភ្លើងសូឡា ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត,សម្ដេចធិបតី ហ៊ុន ម៉ាណែត និងលោកជំទាវបណ្ឌិត ត្រូវបានលោកជំទាវ ហ៊ុន ម៉ាណា ប្រគល់ជូនលោកយាយលោកតា ចាស់ជរានៅខេត្តពោធិ៍សាត់

វៀតណាមចាត់បញ្ជូននាយទាហានបន្តវេនចំនួនពីរ រូបមកចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំកម្ពុជាដឹកនាំដោយប្រទេសហ្វីលីពីន

អភិបាលខេត្តកំពត៖ ការរៀបចំការប្រឡងជ្រើសរើសមន្ត្រីពន្ធនាគារ គឺជាដំណើរការសំខាន់មួយក្នុងការជ្រើសរើសធនធានមនុស្សដែលមានសមត្ថភាព មានសុចរិតភាព និងមានការទទួលខុសត្រូវខ្ពស់

ឯកឧត្តម ហ៊ុន ម៉ានី លើកទឹកចិត្តដល់សម្ព័ន្ធគ្រូពេទ្យ ស.ស.យ.ក. បន្តខិតខំប្រឹងប្រែងអភិវឌ្ឍជំនាញសុខាភិបាលឌីជីថល

រាជរដ្ឋាភិបាលសម្រេចបញ្ចុះអត្រាពន្ធគយ និងអត្រាអាករនាំចេញ លើមុខទំនិញឧបករណ៍អគ្គិសនី, ប្រព័ន្ធសូឡា, រថយន្តអគ្គិសនី និងទំនិញមួយចំនួនទៀត

CDC បានអនុម័តរោងចក្របង្គុំ និងតម្លើងរថយន្តពាណិជ្ជកម្មអគ្គិសនីខ្នាតធំ នៅខេត្តពោធិ៍សាត់

ក្រុមហ៊ូទីបើកការវាយប្រហារលើកទីពីរលើអ៊ីស្រាអែលក្នុងពេល២៤ ម៉ោង ខណៈជម្លោះនៅអាស៊ីខាងលិចកាន់តែតានតឹង

ក្រសួងបរិស្ថាន បង្ហាញការព្រួយបារម្ភចំពោះការផ្សាយដោយយោងទិន្នន័យពី IQAir ថាខ្យល់ពុលនៅកម្ពុជា ឈរលេខរៀងទី២ លើសកលលោក ខណៈគុណភាពខ្យល់នៅកម្ពុជា មានកម្រិតល្អ

មេដឹកនាំអ៊ុយក្រែន បដិសេធការចោទប្រកាន់របស់រដ្ឋមន្ត្រីការបរទេសអាមេរិកពីបទកុហកអំពីការធានាសន្តិសុខ

ក្រុមអ្នកសង្កេតការណ៍អាស៊ាន (AOT) ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ច្រកអូរស្មាច់ ក្រុងសំរោង ខេត្តឧត្តរមានជ័យ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877