BTV NEWS

គយឃាត់ខ្លួនបុរសម៉ាឡេស៊ីម្នាក់រកឃើញហេរ៉ូអ៊ីន ៨១ កញ្ចប់ ពេលត្រៀមចាកចេញពីកម្ពុជាទៅកោះតៃវ៉ាន់

កងរាជអាវុធហត្ថខេត្តកំពង់ស្ពឺ បំបែកសំណុំរឿងលួចទូរស័ព្ទជាង ២០០គ្រឿង និងអ្នកទទួលផលចោរកម្ម

[UPDATE] ភ្លើងឆេះលំនៅឋានពលរដ្ឋនៅខណ្ឌជ្រោយចង្វាររលត់ហើយ

ឧត្តមសេនីយ៍ឯកជួន ណារិន្ទ បញ្ជាឲ្យស្រាវជ្រាវបន្ទាន់ករណីយុវតីម្នាក់ស្លាប់ក្នុងគ្រោះថ្នាក់ចរាចរណ៍ ហើយមានជនឆ្លៀតឱកាសលួចយកម៉ូតូ

សន្តិសុខ និង សង្គម

ព្យុះផ្គររន្ទះវាយលុកភាគខាងកើតអូស្ត្រាលី ខណៈរលកកម្ដៅកើតមានភាគខាងជើង

ព្យុះផ្គររន្ទះដ៏ខ្លាំងក្លាបានកើតមាននៅផ្នែកខ្លះនៃភាគខាងកើតរបស់ប្រទេសអូស្ត្រាលី នៅថ្ងៃសៅរ៍ (ទី៣០ ខែធ្នូ) ដោយនាំមកនូវភ្លៀងធ្លាក់ខ្លាំង ដុំព្រិលធំៗ និងខ្យល់បក់បោកខ្លាំង ពោលគឺមានរយៈប៉ុន្មានថ្ងៃ បន្ទាប់ពីព្យុះមួយទៀត បានបោកបក់ទៅដល់តំបន់នេះ នៅថ្ងៃសម្រាកបុណ្យណូអែល។ប្រព័ន្ធអាកាសធាតុដ៏អាក្រក់នេះ ត្រូវបានគេព្យាករថា នឹងបក់បោកលើតំបន់ ដែលលាតសន្ធឹងជាង ១.០០០គីឡូម៉ែត្រពីទីក្រុង Port Macquarie ក្នុងរដ្ឋ New South Wales ដល់ទីក្រុង Rockhampton ក្នុងរដ្ឋ Queensland ដោយភាគអាគ្នេយ៍នៃរដ្ឋ Queensland ត្រូវបានគេរំពឹងថា នឹងទទួលឥទ្ធិពលអាក្រក់ធ្ងន់ធ្ងរនៃព្យុះនេះ។ក្នុងរយៈពេល ២ម៉ោង នៅព្រឹកថ្ងៃសៅរ៍នេះ តំបន់ខ្លះមានភ្លៀងធ្លាក់កម្រិតប្រហែល ១១០មីលីម៉ែត្រ ដែលប្រហែលនឹងបរិមាណសរុប ១ខែ ខណៈដែលទំហំដុំព្រិលធំៗ រហូតដល់ ៦សង់ទីម៉ែត្រ ក៏ត្រូវបានគេប្រទះឃើញផងដែរ។ អាកាសធាតុដ៏អាក្រក់នេះ ត្រូវបានគេរំពឹងថា នឹងបន្តមានរហូតឆ្នាំថ្មី។មនុស្ស ២នាក់ ត្រូវបានបញ្ជូនទៅមន្ទីរពេទ្យបន្ទាប់ពីរន្ទះបាញ់ ដោយម្នាក់នៅក្នុងរថយន្ត និងម្នាក់ទៀត នៅលើអេស្កាវ៉ាទ័រ។ ព្យុះនេះកើតឡើងបន្ទាប់ពីមាននូវអាកាសធាតុដ៏អាក្រក់ខ្លាំង នៅថ្ងៃទី២៥ ខែធ្នូ និងថ្ងៃទី២៦ ខែធ្នូ ដែលបានសម្លាប់មនុស្ស ១០នាក់ និងធ្វើឲ្យផ្ទះសម្បែងរាប់ម៉ឺនខ្នងដាច់ចរន្តអគ្គិសនី នៅទូទាំងភាគខាងកើត និងកើតមានបន្ទាប់ពីព្យុះស៊ីក្លូន Jasper កាលពីដើមខែនេះ បានបង្កជាទឹកជំនន់ និងការខូចខាតយ៉ាងធំធេង។ចំណែកឯរដូវក្តៅខែធ្នូ ដល់ខែកុម្ភៈរបស់ប្រទេសអូស្ត្រាលី ស្ថិតនៅក្រោមឥទ្ធិពលនៃបាតុភូត El Nino ដែលអាចបង្កឲ្យមានអាកាសធាតុអាក្រក់បំផុត រាប់ចាប់ពីភ្លើងឆេះព្រៃ រហូតដល់ព្យុះស៊ីក្លូន និងគ្រោះរាំងស្ងួតរយៈយូរ៕

អ្នកស្លាប់នៅតំបន់ហ្កាហ្សា ឡើងដល់ ២១.៥០០នាក់ហើយ ពីការវាយប្រហាររបស់អ៊ីស្រាអែល

ចំនួនអ្នកស្លាប់របស់ប៉ាឡេស្ទីនពីការវាយប្រហាររបស់អ៊ីស្រាអែល នៅតំបន់ហ្កាហ្សាស្ទ្រីប បានកើនឡើងលើសពី ២១.៥០០នាក់ និងជាង ៥៥.៩០០នាក់ផ្សេងទៀត បានរងរបួស គិតចាប់តាំងពីជម្លោះប៉ាឡេស្ទីន និងអ៊ីស្រាអែល បានផ្ទុះឡើង កាលពីថ្ងៃទី៧ ខែតុលា។ នេះបើយោងតាមទិន្នន័យចុងក្រោយ ដែលចេញផ្សាយ ដោយក្រសួងសុខាភិបាល ដែលមានមូលដ្ឋាន នៅតំបន់ហ្កាហ្សា កាលពីថ្ងៃសុក្រ (ទី២៩ ខែធ្នូ)។ក្រសួងបានឲ្យដឹងថា យ៉ាងហោចណាស់ជនជាតិប៉ាឡេស្ទីន ១៨៧នាក់ ត្រូវបានសម្លាប់នៅក្នុងការវាយប្រហារតាមអាកាស និងផ្លូវគោគរបស់អ៊ីស្រាអែលលើតំបន់ហ្កាហ្សាស្ទ្រីប ក្នុងរយៈពេល ២៤ម៉ោងកន្លងមកនេះ។ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ដើមបូព៌ា (UNRWA) កាលពីថ្ងៃសុក្រ បានឲ្យដឹងនៅលើបណ្តាញសង្គមថា យ៉ាងហោចណាស់មនុស្ស ៣០៨នាក់ ដែលកំពុងស្នាក់នៅក្នុងកន្លែងរបស់ទីភ្នាក់ងារអង្គការសហប្រជាជាតិ ត្រូវបានសម្លាប់ ដោយសារការវាយប្រហាររបស់អ៊ីស្រាអែល ខណៈ ១.០៩៥នាក់ផ្សេងទៀត បានរងរបួស។លើសពីនេះ ជនជាតិប៉ាឡេស្ទីន ៣០៤នាក់ បានបាត់បង់ជីវិតនៅតំបន់វ៉េសប៊ែង (West Bank) ចាប់តាំងពីមានជម្លោះ។ នៅឆ្នាំ២០២៣ ប្រតិបត្តិការយោធារបស់អ៊ីស្រាអែលនៅតំបន់វ៉េសប៊ែង បានសម្លាប់ជនជាតិប៉ាឡេស្ទីនចំនួន ៥០៤នាក់ ដែលនេះជាការបាត់បង់ជីវិតដ៏អាក្រក់បំផុត សម្រាប់ប៉ាឡេស្ទីន នៅក្នុងដែនដីនេះ ចាប់តាំងពីទីភ្នាក់ងារអង្គការសហប្រជាជាតិ បានចាប់ផ្តើមកត់ត្រាចំនួនជនរងគ្រោះ ក្នុងឆ្នាំ២០០៥។កងកម្លាំងការពារជាតិអ៊ីស្រាអែល (IDF) នៅថ្ងៃសុក្រ បាននិយាយថា ពួកគេបានពង្រីកប្រតិបត្តិការយោធា នៅក្នុងទីក្រុង Khan Yunis ភាគខាងត្បូងនៃតំបន់ហ្កាហ្សា ក្នុងរយៈពេល ២៤ម៉ោងមុននេះ ហើយកងទ័ពរបស់ខ្លួន បានកម្ចាត់កងកម្លាំងហាម៉ាស នៅក្នុងអគារ និងផ្លូវរូងក្រោមដីជាច្រើន ខណៈពេលដែលបានបំផ្លាញកំណាត់ផ្លូវរូងក្រោមដី និងហេដ្ឋារចនាសម្ព័ន្ធនានាផងដែរ៕

McDonald's Malaysia ប្តឹងចលនាពហិការប្រឆាំងអ៊ីស្រាអែល ដោយទាមទារសំណង ១,៣លានដុល្លារ

ក្រុមហ៊ុន McDonald's Malaysia នៅប្រទេសម៉ាឡេស៊ី បានប្តឹងចលនាមួយ ដែលជំរុញឲ្យមានការធ្វើពហិការប្រឆាំងនឹងប្រទេសអ៊ីស្រាអែលពីបទចេញ «សេចក្តីថ្លែងការណ៍មិនពិត និងបង្ខូចកេរ្តិ៍ឈ្មោះ» ដែលក្រុមហ៊ុននិយាយថា ប៉ះពាល់ដល់អាជីវកម្មរបស់ខ្លួន។ ក្រុមហ៊ុនអាហារសម្រន់មួយនេះ កំពុងស្វែងរកការសងជំងឺចិត្តចំនួន ៦លានរីងហ្គីត (១,៣លានដុល្លារអាមេរិក)។ម៉ាឡេស៊ី ដែលជាប្រទេសកាន់សាសនាឥស្លាមភាគច្រើន គឺជាអ្នកគាំទ្រឥតងាករេចំពោះប៉ាឡេស្ទីន ហើយសាខាលក់អាហារសម្រន់លោកខាងលិចមួយចំនួន នៅក្នុងប្រទេសនេះ ក៏ដូចជាក្នុងប្រទេសមូស្លីមមួយចំនួនផ្សេងទៀតដែរ ត្រូវបានកំណត់ជាគោលដៅ សម្រាប់ការធ្វើយុទ្ធនាការពហិការ ប្រឆាំងនឹងការវាយលុកដោយយោធារបស់អ៊ីស្រាអែល នៅតំបន់ហ្កាហ្សា។ភោជនីយដ្ឋាន Gerbang Alaf (GAR) ដែលទទួលបានអាជ្ញាប័ណ្ណរបស់ក្រុមហ៊ុន McDonald's នៅក្នុងប្រទេសម៉ាឡេស៊ី កំពុងប្តឹងចលនារបស់ម៉ាឡេស៊ី ដែលមានឈ្មោះថា Boycott, Divestment & Sanctions (BDS) (ការធ្វើពហិការ ការបោះបង់ចោល និងការដាក់ទណ្ឌកម្ម) ពាក់ព័ន្ធនឹងការបង្ហោះតាមបណ្ដាញសង្គមជាបន្តបន្ទាប់ ដែលត្រូវបានចោទប្រកាន់ថា បានភ្ជាប់ម៉ាកយីហោអាជីវកម្មអាហារសម្រន់នេះ ក្នុងចំណោមក្រុមហ៊ុនដទៃទៀត ទៅនឹង «សង្គ្រាមប្រល័យពូជសាសន៍អ៊ីស្រាអែល» ប្រឆាំងនឹងប៉ាឡេស្ទីន នៅតំបន់ហ្កាហ្សា។យោងតាមដីកាបង្គាប់កោះហៅចុះថ្ងៃទី១៩ ខែធ្នូ ដែលទីភ្នាក់ងារសារព័ត៌មាន Reuters បានឃើញ ភោជនីយដ្ឋាន Gerbang Alaf បានចោទប្រកាន់ថា BDS របស់ម៉ាឡេស៊ី បានញុះញង់សាធារណជនឲ្យធ្វើពហិការ ចំពោះក្រុមហ៊ុន McDonald's Malaysia ដែលនាំឲ្យខាតបង់ប្រាក់ចំណេញ និងការកាត់បន្ថយការងារ ក្នុងចំណោមការខូចខាតផ្សេងទៀត ដោយសារតែការបិទ និងកាត់បន្ថយម៉ោងធ្វើការ ក្នុងហាងរបស់ក្រុមហ៊ុន៕

ចុះអ័ព្ទខ្លាំងក្នុងប្រទេសចិន ខណៈអ្នកធ្វើដំណើរចូលឆ្នាំថ្មី ប្រឈមការរំខានដែលអាចកើតមាន

អ្នកឈប់សម្រាកវិស្សមកាលចុងឆ្នាំ នៅទូទាំងប្រទេសចិន កំពុងប្រឈមចំពោះការរំខានការដឹកជញ្ជូនដែលអាចកើតមាន បន្ទាប់ពីការិយាល័យអាកាសធាតុកាលពីថ្ងៃសុក្រ បានព្រមានថា ការចុះអ័ព្ទនិងផ្សែងអ័ព្ទខ្លាំង នឹងគ្របដណ្តប់តំបន់នានាពីខេត្ត Hebei ភាគខាងជើង រហូតដល់ទីក្រុងសៀងហៃ ភាគខាងត្បូងក្នុងរយៈពេល ២៤ ម៉ោងបន្ទាប់នេះ។ក្រុមតាមដានឧតុនិយមកណ្តាល បានចេញការព្រមានពណ៌ក្រហមលើកដំបូងរបស់ខ្លួន សម្រាប់ការចុះអ័ព្ទចាប់តាំងពីឆ្នាំ ២០១៧មក ។ ស្ថានភាព ត្រូវបានគេរំពឹងថានឹងប្រសើរឡើងចាប់ពីល្ងាចថ្ងៃសៅរ៍នេះ នៅពេលដែលរលកខ្យល់ត្រជាក់ ត្រូវបានគេរំពឹងថានឹងបក់បោកហួសប្រទេសនេះ។កម្មវិធីតាមដាន Flight Master បានបង្ហាញថា ជើងហោះហើរជាង៦០០ ត្រូវបានពន្យារពេល នៅក្នុងទីក្រុងជាច្រើន ។មជ្ឈមណ្ឌលឧតុនិយមជាតិបាននិយាយថា ផ្សែងអ័ព្ទខ្លាំងត្រូវបានគេរំពឹងទុកនៅផ្នែកមួយចំនួននៃខេត្ត Hebeiភាគខាងជើង ខេត្តHenanភាគខាងកណ្តាល ខេត្តAnhuiភាគខាងកើត ខេត្តJiangsu ខេត្តZhejiang និងខេត្តសានទុង(Shandong) ព្រមទាំងនៅទីក្រុង Shanghai និងក្រុង Chongqing ។ការិយាល័យព្យាករណ៍បាននិយាយថា អាកាសធាតុមិនអំណោយផលខ្លាំង គឺដោយសារតែសំណើមខ្ពស់ និងលក្ខខណ្ឌនៃការសាយភាយបរិយាកាសមិនល្អ។

មនុស្សរាប់ពាន់នាក់ បានប្រមូលផ្តុំគ្នានៅក្នុងរដ្ឋធានីយេម៉ែន ដើម្បីគាំទ្រពលរដ្ឋប៉ាឡេស្ទីននៅហ្កាហ្សា

មនុស្សរាប់ពាន់នាក់ បានមកប្រមូលផ្តុំគ្នានៅក្នុងរដ្ឋធានីសាណា ប្រទេសយេម៉ែន កាលពីថ្ងៃសុក្រ ក្នុងការប្រមូលផ្តុំទ្រង់ទ្រាយធំ ដើម្បីបង្ហាញពីសាមគ្គីភាពជាមួយពលរដ្ឋប៉ាឡេស្ទីន នៅក្នុងតំបន់ហ្កាហ្សា។ ការថតពីលើអាកាស បានបង្ហាញ ក្រុមបាតុកររាប់ពាន់នាក់កំពុងស្ថិតនៅលើផ្លូវមួយ គ្រវីទង់ជាតិប៉ាឡេស្ទីន ដោយពួកគេមួយចំនួនកាន់អាវុធ ខណៈស្រែកពាក្យប្រឆាំងអ៊ីស្រាអែល និងប្រឆាំងសហរដ្ឋអាមេរិក។ការប្រមូលផ្តុំគ្នានេះ ក៏មានគោលបំណងបង្ហាញការគាំទ្រចំពោះការវាយប្រហាររបស់ក្រុមហ៊ួទី ទៅលើនាវានៅសមុទ្រក្រហម។ ទីភ្នាក់ងារសារព័ត៌មាន Anadolu រាយការណ៍ថា ប្រជាជនយេម៉ែនរាប់ពាន់នាក់កាលពីថ្ងៃសុក្របានចូលរួមក្នុងការប្រមូលផ្តុំទ្រង់ទ្រាយធំក្នុងការគាំទ្រតំបន់ហ្កាហ្សាដែលកំពុងប្រឈមមុខនឹងការវាយលុកដ៏បំផ្លិចបំផ្លាញរបស់អ៊ីស្រាអែល។ ការប្រមូលផ្តុំគ្នានេះ ត្រូវបានអំពាវនាវដោយក្រុមហ៊ួទី នៅក្នុងទីក្រុង និងតំបន់នានា ដែលស្ថិតក្រោមការគ្រប់គ្រងរបស់ក្រុមនេះ ក្រោមប្រធានបទ «នៅជាមួយអ្នករហូតដល់មានជ័យជំនះ និង អាមេរិកនឹងមិនបញ្ឈប់យើងបានទេ។ សេចក្តីថ្លែងការណ៍មួយដោយក្រុមហ៊ួទី ត្រូវបានអានក្នុងអំឡុងពេលការប្រមូលផ្តុំគ្នា ដែលសង្កត់ធ្ងន់ពីការបន្តការប្រមូលផ្តុំកាន់តែច្រើនដើម្បីគាំទ្រតំបន់ហ្កាហ្សា។ សេចក្តីថ្លែងការណ៍ ក៏បានជំរុញឱ្យប្រជាជននៅទូទាំងពិភពលោក ធ្វើឱ្យសកម្មអាវុធពហិការសេដ្ឋកិច្ចប្រឆាំងទៅនឹងផលិតផលសហរដ្ឋអាមេរិក និងអ៊ីស្រាអែល និងក្រុមហ៊ុនទាំងអស់ដែលគាំទ្រពួកគេ។ក្រុមហ៊ួទី បានបញ្ជាក់ពីការបន្តប្រតិបត្តិការកងទ័ពជើងទឹករបស់ខ្លួនទៅលើនាវាអ៊ីស្រាអែល ឬនាវាទាំងឡាយណាដែលធ្វើដំណើរទៅកាន់កំពង់ផែអ៊ីស្រាអែល រហូតដល់ការបិទច្រកនៅតំបន់ហ្កាហ្សាត្រូវបានដកចេញ។កាលពីពេលថ្មីៗនេះ រដ្ឋមន្ត្រីការពារជាតិអាមេរិក លោក Lloyd Austin បានប្រកាសពីការបង្កើតបេសកកម្មចម្រុះជាតិសាសន៍មួយឈ្មោះថាប្រតិបត្តិការការពារវិបុលភាព (Operation Prosperity Guardian) ដើម្បីប្រឆាំងការវាយប្រហាររបស់ក្រុមហ៊ួទី លើនាវាពាណិជ្ជកម្មនៅសមុទ្រក្រហម។

ការវាយប្រហារតាមអាកាសរបស់រុស្ស៊ី លើអ៊ុយក្រែន ធ្វើឲ្យមានការរិះគន់នៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ

ប្រទេសរុស្ស៊ី បានធ្វើឲ្យមានការរិះគន់យ៉ាងខ្លាំងនៅក្នុងក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ សម្រាប់ការបាញ់មីស៊ីលទ្រង់ទ្រាយធំនិងការវាយប្រហារដោយយានដ្រូនទៅលើប្រទេសអ៊ុយក្រែន បន្ទាប់ពីទីក្រុងគីវ និងអ្នកគាំទ្ររបស់ខ្លួន បានអំពាវនាវឱ្យមានកិច្ចប្រជុំបន្ទាន់នៃស្ថាប័នដែលមានសមាជិក ១៥រូប ដើម្បីដោះស្រាយការវាយប្រហារនេះ។ ការវាយប្រហាររបស់រុស្ស៊ីនៅទូទាំងប្រទេសអ៊ុយក្រែន កាលពីថ្ងៃសុក្របានសម្លាប់ជនស៊ីវិល ៣១ នាក់ និងរងរបួសជាង ១៦០ នាក់ផ្សេងទៀត នៅក្នុងការវាយប្រហារតាមអាកាសទ្រង់ទ្រាយធំ ចាប់តាំងពីការចាប់ផ្តើមសង្រ្គាមកាលពីខែកុម្ភៈ ឆ្នាំ ២០២២ ហើយប្រទេសប៉ូឡូញបាននិយាយថា មីស៊ីលរបស់រុស្ស៊ីទំនងជា បានហោះចូលទៅក្នុងដែនអាកាសរបស់ខ្លួន មុនពេលងាកទៅរកប្រទេសអ៊ុយក្រែន។សមាជិកក្រុមប្រឹក្សាភាគច្រើន រួមទាំងសហរដ្ឋអាមេរិក បារាំង និងចក្រភពអង់គ្លេស បានថ្កោលទោសការវាយប្រហារលើអ៊ុយក្រែន។ ឯកអគ្គរដ្ឋទូតអង់គ្លេសប្រចាំអង្គការសហប្រជាជាតិ លោក Barbara Woodward បានឆ្លើយតបថា សកម្មភាពរបស់រុស្ស៊ី គឺជាមូលហេតុតែមួយគត់នៃសោកនាដកម្មនៅអ៊ុយក្រែន។ តំណាងអចិន្ត្រៃយ៍រងរបស់ប្រទេសចិនប្រចាំអង្គការសហប្រជាជាតិ លោក Geng Shuang ពុំបានថ្កោលទោសការវាយប្រហារនេះទេ ហើយបានអំពាវនាវឱ្យមានដំណោះស្រាយនយោបាយចំពោះសង្គ្រាមនៅអ៊ុយក្រែន។ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vasily Nebenzya បាននិយាយនៅក្នុងការឆ្លើយតបដ៏វែងមួយថា រុស្ស៊ីបានបើកការវាយប្រហារតែលើហេដ្ឋារចនាសម្ព័ន្ធយោធាក្នុងប្រទេសអ៊ុយក្រែនតែប៉ុណ្ណោះ ហើយប្រព័ន្ធការពារដែនអាកាសរបស់អ៊ុយក្រែន ទទួលខុសត្រូវចំពោះការស្លាប់និងរងរបួសជនស៊ីវិល។

វិមានក្រឹមឡាំង៖ រុស្ស៊ី នឹងចាត់វិធានការសងសឹកប្រឆាំងការសម្រេចរឹបអូសទ្រព្យសម្បត្តិរបស់ខ្លួន

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃសុក្រថា រុស្ស៊ី បានវាយតម្លៃរួចហើយនូវ «ចំណាត់ការសងសឹក» ដ៏មានសក្ដានុពល ដែលខ្លួនអាចធ្វើ ប្រសិនបើទ្រព្យសម្បត្តិរបស់ប្រទេសនេះ ត្រូវបានរឹបអូស។លោក Peskov បាននិយាយបែបនេះ ខណៈធ្វើអត្ថាធិប្បាយលើសំណើរបស់ទីក្រុងវ៉ាស៊ីនតោន ដែលបានធ្វើឡើងនៅក្នុងក្រុមប្រទេស G7 ដែលបានជំរុញឱ្យក្រុមការងារស្វែងរកវិធីដើម្បីរឹបអូសទ្រព្យសម្បត្តិរបស់រុស្ស៊ីដែលមានតម្លៃ ៣០០ ពាន់លានដុល្លារ។លោក Peskov បាននិយាយថា យើងបានវិភាគចំណាត់ការសងសឹក ដែលអាចកើតមានទាំងអស់ជាមុនហើយទីក្រុងមូស្គូ នឹងធ្វើអ្វីគ្រប់យ៉ាងដើម្បីបម្រើផលប្រយោជន៍ជាតិរបស់ខ្លួន។លោកនិយាយថា ប្រទេសរុស្ស៊ី នឹងពិចារណាយ៉ាងពេញលេញនូវ ភាពមិនអាចស្មានទុកជាមុនបាន នៃសមភាគីរបស់ខ្លួន និង ទំនោរក្នុងការបំពានច្បាប់អន្តរជាតិ។លោក Peskov និយាយថា ប្រទេសរុស្ស៊ីបានចងក្រងបញ្ជីទ្រព្យសម្បត្តិរបស់លោកខាងលិច ដែលខ្លួនអាចរឹបអូសបាន ដើម្បីឆ្លើយតបទៅនឹងការសម្រេចចិត្តដ៏មានសក្តានុពល ក្នុងការរឹបអូសទ្រព្យសម្បត្តិរបស់ខ្លួន។លោកបានបញ្ជាក់ថា ទ្រឹស្ដីស្របច្បាប់ណាមួយដែលនឹងអនុញ្ញាតឱ្យមានការរឹបអូសទ្រព្យសម្បត្តិរបស់រុស្ស៊ី ជាសំខាន់គឺ មុខរបរស្របច្បាប់ ហើយការសម្រេចបែបនេះ នឹងធ្វើឱ្យខូចដល់ការជឿទុកចិត្តរបស់ប្រទេសផ្សេងទៀតចំពោះសហរដ្ឋអាមេរិក និងសហភាពអឺរ៉ុប ព្រមទាំងសេដ្ឋកិច្ចសកលលោកទាំងមូល។

អាហ្រ្វិកខាងត្បូង ប្តឹងអ៊ីស្រាអែលនៅតុលាការអង្គការសហប្រជាជាតិពីបទ «អំពើប្រល័យពូជសាសន៍» នៅហ្កាហ្សា

ប្រទេសអាហ្រ្វិកខាងត្បូង បានដាក់ពាក្យបណ្ដឹងកាលពីថ្ងៃសុក្រ នៅក្នុងតុលាការយុត្តិធម៌អន្តរជាតិ (ICJ) ប្រឆាំងប្រទេសអ៊ីស្រាអែល ពីបទអំពើ «ប្រល័យពូជសាសន៍» របស់ខ្លួននៅក្នុងតំបន់ហ្កាហ្សា។យោងតាមសេចក្តីប្រកាសព័ត៌មានរបស់តុលាការ ICJ បានឲ្យដឹងថា ករណីនេះអះអាងថា «ការរំលោភបំពានដោយអ៊ីស្រាអែលតាមដែលបានចោទប្រកាន់ចំពោះកាតព្វកិច្ចរបស់ខ្លួន ក្រោមអនុសញ្ញាស្តីពីការទប់ស្កាត់ និងការដាក់ទណ្ឌកម្មនៃឧក្រិដ្ឋកម្មប្រល័យពូជសាសន៍ (អនុសញ្ញាប្រល័យពូជសាសន៍) ទាក់ទងនឹងពលរដ្ឋប៉ាឡេស្ទីននៅតំបន់ហ្កាហ្សា។នៅក្នុងពាក្យបណ្តឹងទៅកាន់តុលាការអង្គការសហប្រជាជាតិ ប្រទេសអាហ្រ្វិកខាងត្បូង បាននិយាយថា សកម្មភាព និងការបំភ្លេចចោលដោយអ៊ីស្រាអែល គឺជាការប្រល័យពូជសាសន៍នៅក្នុងអាកប្បកិរិយា ខណៈពួកគេបានប្តេជ្ញាជាមួយនឹងបំណងជាក់លាក់ ដើម្បីបំផ្លាញពលរដ្ឋប៉ាឡេស្ទីននៅក្នុងតំបន់ហ្កាហ្សា។ប្រទេសអាហ្វ្រិកខាងត្បូង បានអំពាវនាវដល់តុលាការ ICJ សម្រាប់វិធានការ ដើម្បីធានាបានការអនុវត្តន៍តាមច្បាប់របស់អ៊ីស្រាអែលជាមួយនឹងកាតព្វកិច្ចរបស់ខ្លួនក្រោមអនុសញ្ញាប្រល័យពូជសាសន៍ មិនឱ្យពាក់ព័ន្ធក្នុងការប្រល័យពូជសាសន៍ និងដើម្បីទប់ស្កាត់ និងដាក់ទណ្ឌកម្មលើអំពើប្រល័យពូជសាសន៍។

ពលរដ្ឋភៀសខ្លួនតំបន់ហ្កាហ្សា ភៀសខ្លួនម្តងទៀត ខណៈអ៊ីស្រាអែល វាយលុកថ្មីដោយរថក្រោះ និងតាមអាកាស

ពលរដ្ឋប៉ាឡេស្ទីនរាប់ម៉ឺននាក់ដែលភៀសខ្លួន បានស្វែងរកទីជម្រក ខណៈរថក្រោះរបស់អ៊ីស្រាអែល បានរុលចូលឆ្លងកាត់តំបន់ហ្កាហ្សាភាគកណ្តាល ដោយមានមនុស្សជាង ១៨០នាក់ ត្រូវបានគេរាយការណ៍ថាបានស្លាប់ក្នុងរយៈពេល ២៤ ម៉ោង ក្នុងការវាយប្រហារតាមអាកាស និងការបាញ់រាំងកាំភ្លើងធំ ទៅលើតំបន់ហ៊ុមព័ទ្ធហ្កាហ្សាដែលត្រូវបានបំផ្លាញ។ពលរដ្ឋនិយាយថា យន្តហោះចម្បាំងអ៊ីស្រាអែល វាយប្រហារភាគខាងត្បូងតំបន់ហ្កាហ្សា បានធ្វើឱ្យលំនៅឋានរាបដល់ដី និងកប់ក្រុមគ្រួសារជាច្រើន ខណៈពួកគេដេកលក់។ការវាយលុកនៅភាគកណ្តាល និងភាគខាងត្បូងតំបន់ហ្កាហ្សា បានជំរុញឱ្យប្រជាជនជម្លៀសខ្លួនជាថ្មី ចេញពីតំបន់ផ្សេងទៀត ជាអ្វីដែលរដ្ឋមន្ត្រីការពារជាតិអ៊ីស្រាអែល លោក Yoav Gallant បានចាត់ទុកថាជាដំណាក់កាលសំខាន់នៃបេសកកម្មរបស់អ៊ីស្រាអែល ដើម្បីកម្ទេចសត្រូវក្រុមហាម៉ាស។ប្រជាជនស្ទើរតែទាំងអស់ចំនួន ២,៣ លាននាក់នៅតំបន់ហ្កាហ្សា បានភៀសខ្លួនចេញពីលំនៅឋានរបស់ពួកគេយ៉ាងហោចណាស់ម្តង ហើយមនុស្សជាច្រើន ពេលនេះកំពុងភៀសខ្លួនម្តងទៀត ដែលបានមកជ្រកកោននៅក្នុងតង់បណ្តោះអាសន្ន ឬជ្រកក្រោមក្រណាត់ប្លាស្ទិក នៅលើដីវាល ។

អាមេរិកអនុម័ត ការលក់គ្រាប់រំសេវបន្ទាន់ទៅឲ្យអ៊ីស្រាអែល

សហរដ្ឋអាមេរិក កាលពីថ្ងៃសុក្រ បានប្រកាសការអនុម័តលើការលក់គ្រាប់កាំភ្លើងធំមានផលប៉ះពាល់ខ្លាំង១៥៥មីលីម៉ែត្រក្នុងតម្លៃ ១៤៧,៥ លានដុល្លារ និងយុទ្ធោបករណ៍ពាក់ព័ន្ធ ទៅឲ្យអ៊ីស្រាអែល ក្រោមការផ្តល់ឲ្យបន្ទាន់ ដែលមិនឆ្លងកាត់ការពិនិត្យរបស់សភា។ ការផ្តល់ដូចគ្នានេះ ត្រូវបានប្រើប្រាស់កាលពីដើមខែនេះ ដើម្បីអនុម័តការលក់គ្រាប់កាំភ្លើងរថក្រោះ ១៤.០០០ គ្រាប់ ១២០មីលីម៉ែត្រ ទៅឱ្យអ៊ីស្រាអែល ដែលកំពុងប្រយុទ្ធជាមួយក្រុមហាម៉ាសនៅតំបន់ហ្កាហ្សា ក្នុងជម្លោះបំផ្លិចបំផ្លាញយ៉ាងខ្លាំង ដែលបានចាប់ផ្តើមដោយការការវាយប្រហារដ៏ភ្ញាក់ផ្អើលដោយក្រុមសកម្មប្រយុទ្ធប៉ាឡេស្ទីន កាលពីខែតុលា។ ទីភ្នាក់ងារសហប្រតិបត្តិការសន្តិសុខក្រសួងការពារជាតិសហរដ្ឋអាមេរិក បាននិយាយនៅក្នុងសេចក្តីថ្លែងការណ៍ថា អ៊ីស្រាអែលបានស្នើសុំគ្រាប់រំសេវ ១៥៥មីលីម៉ែត្រ, ឧបករណ៍បំផ្ទុះ ទៅក្នុងករណីលក់របស់យោធាបរទេសកាលពីលើកមុន ដោយបង្កើនការចំណាយសរុបប្រមាណពី ៩៦,៥១ លានដុល្លារដល់ ១៤៧,៥ លានដុល្លារ។ យោងតាមសេចក្តីថ្លែងការណ៍បានឲ្យដឹងថា រដ្ឋមន្ត្រីការបរទេសបានកំណត់ថា «មានគ្រាអាសន្នដែលតម្រូវឱ្យលក់បន្ទាន់ទៅឱ្យរដ្ឋាភិបាលអ៊ីស្រាអែល» នូវសព្វាវុធ ដោយបញ្ចៀសតម្រូវការជាធម្មតាសម្រាប់ការពិនិត្យរបស់សភា ដែលត្រូវបានគេនិយាយថា គ្រាប់រំសេវនឹងយកមកពីស្តុករបស់កងទ័ពសហរដ្ឋអាមេរិក។ សេចក្តីថ្លែងការណ៍បាននិយាយថា «អ៊ីស្រាអែលនឹងប្រើប្រាស់សមត្ថភាពដែលបានពង្រឹងជាការរារាំងដល់ការគំរាមកំហែងក្នុងតំបន់ និងដើម្បីពង្រឹងការការពារប្រទេសរបស់ខ្លួន» ។យោងតាមក្រសួងសុខាភិបាលនៅក្នុងដែនដីគ្រប់គ្រងដោយក្រុមហាម៉ាសបានឲ្យដឹងថា បន្ទាប់ពីការវាយប្រហារ សហរដ្ឋអាមេរិក បានប្រញាប់ប្រញាល់ផ្តល់ជំនួយយោធាដល់ប្រទេសអ៊ីស្រាអែល ដែលបានអនុវត្តយុទ្ធនាការឥតឈប់ឈរនៅក្នុងតំបន់ហ្កាហ្សា ដែលបានសម្លាប់មនុស្សយ៉ាងហោចណាស់ ២១.៥០៧ នាក់ ភាគច្រើនជាស្ត្រី និងកុមារ។

បណ្ដាញសង្គម

ព័ត៌មានថ្មីៗ

ក្រុមប្រឹក្សាអ្នកច្បាប់បើកវគ្គបណ្តុះបណ្តាលស្តីពីគោលការណ៍ណែនាំស្តីពីនីតិវិធីនិងវិធាននៃការតាក់តែងសេចក្តីព្រាងច្បាប់ និងលិខិតបទដ្ឋានគតិយុត្តផ្សេងទៀត

កម្ពុជាត្រៀមខ្លួនជាស្រេចក្នុងការរៀបចំ “វេទិកាធុរកិច្ចកម្ពុជា-បារាំង លើកទី៣” នាខែវិច្ឆិកាខាងមុខ

CAMBODIA SPORT+ ឧបត្ថម្ភដល់សិស្សនិទ្ទេស A ២រូប រហូតបញ្ចប់ដំណើរសិក្សាថ្នាក់បរិញ្ញាបត្រ

វិទ្យាស្ថានចក្ខុវិស័យអាស៊ី៖ កម្ពុជាដើរតួនាទីកាន់តែសំខាន់លើឆាកអន្ដរជាតិ ប្រឆាំងការឆបោកអនឡាញ

ស្រូវកសិករខេត្តកំពង់ស្ពឺជាង ៤ម៉ឺនហិកតាត្រូវបានសង្គ្រោះ ខណៈជាងមួយម៉ឺនហិកតាផ្សេងទៀតកំពុងស្ថិតក្នុងការអន្តរាគមន៍

មន្ត្រីវាយកូនបាល់៖ ការចេញទៅប្រកួតអន្តរជាតិចំនួនពីររបស់កីឡាករវាយកូនបាល់កម្ពុជាជាការសន្សំពិន្ទុ និងបង្កើនគុណភាពបច្ចេកទេស

ប្រដាល់សកលកម្ពុជា២រូប ត្រៀមប្រកួតកីឡាអាស៊ី នៅជប៉ុន ជាមួយនឹងគោលដៅបន្តចូលរួមប្រកួតវគ្គជម្រុះអូឡាំពិកហ្គេម ២០២៨

រដ្ឋមន្ត្រីនៃក្រុមប្រទេស LDC កំពុងជំរុញការបង្កើមហិរញ្ញប្បទានអាកាសធាតុសម្រាប់ការឆ្លើយតបផលប៉ះពាល់នៃការប្រែប្រួលអាកាសធាតុ

លីគកំពូលកម្ពុជា នឹងចាប់ផ្ដើមរដូវកាលថ្មីចុងសប្ដាហ៍នេះ ជាមួយការរំពឹងមានការប្រកួតប្រជែងកាន់តែខ្លាំង

គណៈកម្មាធិការអចិន្ត្រៃយ៍រដ្ឋសភា បញ្ជូនសេចក្តីព្រាងច្បាប់សំខាន់ៗចំនួន ៤ ទៅគណៈកម្មការជំនាញសិក្សាស្រាវជ្រាវ មុនដាក់ឆ្លងសម័យប្រជុំពេញអង្គ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877