BTV NEWS

រយៈពេលជាង ៥ខែ កម្ពុជាបណ្តេញជនបរទេសចេញជិត ៣ម៉ឺននាក់ និងជិត ២ពាន់នាក់ទៀតត្រៀមបណ្តេញចេញ ពាក់ព័ន្ធករណី Online Scams និងការប្រព្រឹត្តបទល្មើសផ្សេងៗ

គយឃាត់ខ្លួនបុរសម៉ាឡេស៊ីម្នាក់រកឃើញហេរ៉ូអ៊ីន ៨១ កញ្ចប់ ពេលត្រៀមចាកចេញពីកម្ពុជាទៅកោះតៃវ៉ាន់

កងរាជអាវុធហត្ថខេត្តកំពង់ស្ពឺ បំបែកសំណុំរឿងលួចទូរស័ព្ទជាង ២០០គ្រឿង និងអ្នកទទួលផលចោរកម្ម

[UPDATE] ភ្លើងឆេះលំនៅឋានពលរដ្ឋនៅខណ្ឌជ្រោយចង្វាររលត់ហើយ

សន្តិសុខ និង សង្គម

ឧត្តមសេនីយ៍ត្រី អេង ហ៊ី បំភ្លឺ ករណីគោយន្តពលរដ្ឋជិះទៅច្រូតស្រូវ ត្រូវបានប៉េអ៊ឹមចាប់ និងមានការប្រើហឹង្សារួមទាំងផ្ទុះអាវុធនៅខេត្តព្រះវិហារ

ព្រះវិហារ៖ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស នៅថ្ងៃទី២៨ ខែវិច្ឆិកា ឆ្នាំ២០២៣នេះ បានចេញសេចក្តីបំភ្លឺ អំពីករណីការផ្សព្វផ្សាយថា “គោយន្តពលរដ្ឋជិះទៅច្រូតស្រូវ ត្រូវបានប៉េអ៊ឹមចាប់ និងមានការប្រើហឹង្សារួមទាំងផ្ទុះអាវុធទៀតផង ដៃកាន់ខ្នោះដៃកាន់ដំបងអីណា...ក្អេងក្អាង..សក្តិម៉ានហ្នឹងប្រូ...”។ លោកឧត្តមសេនីយ៍ត្រី អេង ហ៊ី បំភ្លឺថា តាមរបាយការណ៍របស់លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តព្រះវិហារ បានឱ្យដឹងថា៖ នៅថ្ងៃទី២៤ ខែវិច្ឆិកា ឆ្នាំ២០២៣ វេលាម៉ោង១៤និង៣៤នាទី ក្រុមការងារនៃអង្គការអនាគតយើង ប្រចាំនៅតំបន់ភ្នំត្នោត សហការជាមួយនឹងអង្គការសម្ព័ន្ធមិត្តសត្វព្រៃ “Wildlife Alliance” បានរៀបចំកម្លាំងចំនួន៥នាក់ ដឹកនាំដោយឈ្មោះ ណុប ថេត ភេទប្រុស អាយុ ៤៤ ឆ្នាំ, លោក ថន សំណាង ភេទប្រុស ជាយោធិននៃកងរាជអាវុធហត្ថលើផ្ទៃប្រទេស ប្រចាំនៅតំបន់ភ្នំត្នោត ភ្ជាប់ជាមួយអាវុធចំនួនមួយដើមនាំគ្នាដើរល្បាតការពារដីសហគមន៍ ដល់ចំណុចខាងត្បូងភូមិដូរ ចម្ងាយប្រហែល ២ គីឡូម៉ែត្រ បានជួបប្រជាពលរដ្ឋមួយគ្រួសារ មានគ្នាចំនួន ៥ នាក់ កំពុងសង់ខ្ទមមួយកន្លែង នៅកណ្ដាលព្រៃ គ្មានដីស្រែ និងដីចម្ការនៅក្បែរខ្ទមនោះទេ (តំបន់ដែនជម្រកសត្វព្រៃបឹងពែ) ពេលនោះក្រុមការងារ បាននាំខ្លួនមនុស្សចំនួនពីរនាក់ ប្ដីប្រពន្ធ ដែលមិនស្គាល់អត្តសញ្ញាណ និងគោយន្តចំនួនមួយគ្រឿង ដើម្បីយកទៅសួរនាំនៅទីស្នាក់ការ ក្នុងការចូលមកកាប់រុករានទន្ទ្រានយកដីព្រៃ និង ៣នាក់ទៀតទុកឲ្យចាំខ្ទម។ នៅវេលាម៉ោង១៦និង៣៩នាទី ធ្វើដំណើរដល់ចំណុចខាងលិច ភូមិរលំស្លែង ចម្ងាយប្រហែលមួយគីឡូម៉ែត្រ ស្រាប់តែមានប្រជាពលរដ្ឋមួយក្រុម មានគ្នាប្រហែល ៣០ នាក់ មកពីភូមិអង្គ្រង បានធ្វើការតវ៉ា រំដោះយកមនុស្សប្រុសស្រី ពីរនាក់ប្ដីប្រពន្ធ និងគោយន្តកន្ត្រៃចំនួន១គ្រឿង វិលត្រឡប់ទៅភូមិអង្គ្រងវិញ នៅពេលអន្តរាគមន៍រំដោះយកមនុស្ស និងគោយន្តនាពេលនោះក៍មានការប៉ះទង្គិចគ្នា ប្រតាយប្រតប់គ្នា ហើយខាងកម្លាំងកងរាជអាវុធហត្ថលើផ្ទៃប្រទេសបានបាញ់អាវុធគំរាមទៅលើចំនួនមួយគ្រាប់។ នៅថ្ងៃទី២៥ ខែវិច្ឆិកា ឆ្នាំ២០២៣ វេលាម៉ោង១៦និង០០នាទី ឈ្មោះណុប ថេត ប្រចាំនៅតំបន់ភ្នំត្នោត បានមកដាក់ពាក្យបណ្ដឹង នៅអធិការដ្ឋាននគរបាលស្រុកសង្គមថ្មី អំពីករណីប្រជាពលរដ្ឋទាំងនោះមករេរាំងសមត្ថកិច្ច រំដោះមនុស្ស និងគោយន្តកន្ត្រៃវិញពីក្នុងដៃសមត្ថកិច្ច ដើម្បីធ្វើការស្រាវជ្រាវស៊ើបអង្កេត ករណីខាងលើនេះ។លោកឧត្តមសេនីយ៍ត្រី អេង ហ៊ី បញ្ជាក់ថា ការប្រឆាំងនឹងអ្នករាជការសាធារណៈ គឺជាអំពើប្រឆាំងដោយប្រើការតទល់ដោយហិង្សា នឹងអ្នករាជការសាធារណៈដែលធ្វើសកម្មភាពដើម្បីអនុវត្តច្បាប់ បញ្ជារបស់អាជ្ញាធរសាធារណៈ ឬសេចក្តីសម្រេចរបស់តុលាការ។ អំពើប្រឆាំងដោយហិង្សាទៅលើការអនុវត្តការងារសាធារណៈ ឬការងារដែលមានប្រយោជន៍ជាសាធារណៈ ត្រូវផ្តន្ទាទោសដាក់ពន្ធនាគារពី១ខែទៅ៣ខែ និងពិន័យជាប្រាក់ពីមួយសែនរៀលទៅប្រាំសែនរៀល។ សូមបុគ្គលដែលពាក់ព័ន្ធមេត្តាគោរពច្បាប់ដូចមានចែងក្នុងមាត្រា៥០៣ និងមាត្រា៥០៦ នៃក្រមព្រហ្មទណ្ឌ។លោកឧត្តមសេនីយ៍ត្រី អេង ហ៊ី បញ្ជាក់ថា ចំពោះលោកព្រិន្ទបាលឯក ថន សំណាង ជានាយទាហាននៃកងរាជអាវុធហត្ថ ដែលបានអនុវត្តផ្ទាល់នៅក្នុងរឿងហេតុនេះ កងរាជអាវុធហត្ថនឹងធ្វើការត្រួតពិនិត្យ ហើយនឹងជម្រាបជូននៅពេលបញ្ចប់ការត្រួតពិនិត្យ៕

ថ្ងៃទី០២នៃព្រះរាជពិធីបុណ្យអុំទូក៖ សន្តិសុខ សណ្តាប់ធ្នាប់ មានភាពល្អប្រសើរ និងមានប្រជាពលរដ្ឋមកចូលរួមកម្សាន្តសប្បាយយ៉ាងច្រើនកុះករ

ភ្នំពេញ៖ នៅថ្ងៃទី០២ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក គឺសភាពការណ៍សន្តិសុខ សណ្តាប់ធ្នាប់ មានភាពល្អប្រសើរ និងមានប្រជាពលរដ្ឋមកចូលរួមកម្សាន្តសប្បាយយ៉ាងច្រើនកុះករប្រមាណ ១លាន ៧សែននាក់។ កម្លាំងត្រៀមអន្តរាគមន៍បានចេញជួយសង្រ្គោះករណីទូកប្រណាំងលិចទឹកចំនួន ០៤ទូក ដោយ បានជួយសង្រ្គោះកីឡាករសរុប ១១៩នាក់ និងជួយសង្គ្រោះកីឡាករធ្លាក់ពីលើទូកចំនួន ១៧នាក់ ប្រកបដោយសុវត្ថិភាព។ នេះបើយោងតាមរបស់អនុគណៈកម្មការការពាររក្សាសន្តិសុខ របៀបរៀបរយ សណ្តាប់ធ្នាប់សង្គម ចរាចរណ៍ សង្រ្គោះទូកលិច និងអ្នកជំងឺ។យោងតាមរបាយការណ៍របស់អនុគណៈកម្មការការពាររក្សាសន្តិសុខ របៀបរៀបរយ សណ្តាប់ធ្នាប់សង្គម ចរាចរណ៍ សង្រ្គោះទូកលិច និងអ្នកជំងឺ បានឲ្យដឹងថា កម្លាំងត្រៀមអន្តរាគមន៍ បានចេញជួយសង្រ្គោះករណីទូកប្រណាំងលិចទឹកចំនួន ០៤ទូក ដោយ បានជួយសង្រ្គោះកីឡាករសរុប ១១៩នាក់ និងជួយសង្គ្រោះកីឡាករធ្លាក់ពីលើទូកចំនួន ១៧នាក់ ប្រកបដោយសុវត្ថិភាព។ បានចុះផ្សព្វផ្សាយអប់រំស្ដីពីការបង្ការទប់ស្កាត់ និងពន្លត់អគ្គិភ័យតាមបណ្តាយានដ្ឋាន ផ្ទះជួល ផ្ទះសំណាក់ ភោជនីយ៍ដ្ឋាន នៅជុំវិញតំបន់ប្រារព្ធព្រះរាជពិធីបុណ្យសរុប ១៤គោលដៅ។ ក្រុមគ្រូពេទ្យប្រចាំការនៅតាមគោលដៅបានធ្វើការសង្រ្គោះបឋមដល់អ្នកដែលមានបញ្ហាសុខភាពសរុបចំនួន ២.៦៥៩នាក់ (ស្រី ៤៧៦នាក់) និងបញ្ជូនទៅសង្រ្គោះ នៅ មន្ទីរពេទ្យចំនួន ០២នាក់។គ្រប់ទីបញ្ជាការស្រាល (គិតពីម៉ោង ០៧:០០ព្រឹក ដល់ម៉ោង ១៩:០០យប់ ថ្ងៃទី២៧ ខែវិច្ឆិកា ឆ្នាំ២០២៣) សភាពការណ៍នៅក្នុងតំបន់ប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ថ្ងៃទី០២ ត្រូវនឹងថ្ងៃទី២៧ ខែ វិច្ឆិកា ឆ្នាំ២០២៣ នេះ ដែលមានទូកចូលរួមប្រកួតចំនួន ៣៣៨ទូក (ទូកអន្តរជាតិចំនួន ១៣៧ទូក) ក្នុងនោះ ៖-ទូកអុំបុរសចំនួន ១៥៨ទូក-ទូកចែវបុរសចំនួន ៤២ទូក-ទូកចែវនារីចំនួន ៣ទូក-ទូកអន្ដរជាតិ ១២៩ទូក-ចំណុះទូកសរុប ១៦.៥៩៦នាក់ (ត្រៀម ៣.៨៤៨នាក់)និងប្រទីបដែលនឹងត្រូវបណ្តែតអបអរសាទរព្រះរាជពិធីបុណ្យមានចំនួន ៣០ប្រទីប។ របាយការណ៍ដដែលបានបញ្ជាក់ថា ដោយឡែកកម្លាំងសមត្ថកិច្ចជំនាញ បានបង្រ្កាបបទល្មើសឆក់ទូរស័ព្ទដៃ ០១លើក ដោយឃាត់ខ្លួនជនល្មើស ០១នាក់ នៅគោលដៅសួនវត្តបុទុម និងមានករណីគ្រោះថ្នាក់ចរាចរណ៍កើតឡើង ០១លើក នៅគោលដៅមុខវត្តឧណ្ណាលោម (ម៉ូតូបុកក្មេងបណ្តាលឲ្យរបួស ០១នាក់)។ជាមួយគ្នានោះ សមត្ថកិច្ចការពារគោលដៅ បានប្រតិបត្តិការ និងអន្តរាគមន៍សង្រ្គោះ បានរកឃើញក្មេងវង្វេងសាច់ញាតិចំនួន ១១នាក់ (ស្រី ០៥នាក់) ដោយបានធ្វើការផ្សព្វផ្សាយ ហើយត្រូវបានសាច់ញាតិមកទទួលយកទៅវិញចំនួន ០៨នាក់ និងកំពុងស្វែងរកសាច់ញាតិចំនួន ០៣នាក់បន្តទៀត៕

គុណភាពខ្យល់ដ៏គ្រោះថ្នាក់បន្តកើតមាននៅក្នុងរដ្ឋធានីញូវដែល្លី ប្រទេសឥណ្ឌា

កាលពីថ្ងៃអាទិត្យម្សិលមិញ ប្រជាពលរដ្ឋបានត្អូញត្អែពីការរលាកបំពង់ក. និងក្រហាយភ្នែក ពេលដែលគុណភាពខ្យល់ដ៏គ្រោះថ្នាក់បន្តយាយីរដ្ឋធានីញូវដែល្លី ប្រទេសឥណ្ឌា ។ ផ្លូវ និងអគារ ត្រូវបានគ្របដណ្តប់ដោយផ្សែងអ័ព្ទនៅក្នុងទីក្រុងមួយនេះ ស្របពេលដែលសន្ទស្សន៍គុណភាពខ្យល់(AQI) របស់ស្ថានទូតសហរដ្ឋអាមេរិក កើនឡើងដល់កម្រិត ៣៣០ ធ្វើឲ្យវាស្ថិតក្នុងប្រភេទកម្រិតខ្យល់ប្រកបដោយគ្រោះថ្នាក់ ។ រដ្ឋធានីមានខ្យល់កខ្វក់ជាងគេបំផុតរបស់ពិភពលោកមួយនេះ បានចាប់ផ្តើមឡើងវិញការប្រយុទ្ធប្រឆាំងប្រចាំឆ្នាំរបស់ខ្លួនលើខ្យល់កខ្វក់នៅក្នុងខែវិច្ឆិកានេះ បើទោះបីជារដ្ឋាភិបាលសន្យាធ្វើឲ្យល្អប្រសើរឡើងស្ថានភាពខ្យល់កខ្វក់ក៏ដោយ ។ ទិន្នន័យពី គណៈកម្មាធិការគ្រប់គ្រងខ្យល់កខ្វក់កណ្តាលឥណ្ឌា(CPCB) បង្ហាញពីសន្ទស្សន៍គុណភាពខ្យល់លើសពីកម្រិត ៤០០នៅតាមតំបន់ជាច្រើន នៅក្នុងរដ្ឋធានីរបស់ប្រទេសឥណ្ឌាមួយនេះ ។ គុណភាពខ្យល់កខ្វក់លើសពីកម្រិត ៦០ ត្រូវបានគេចាត់ទុកថាជាខ្យល់គ្មានសុខភាព ។ ខ្យល់កខ្វក់នៅក្នុងទីក្រុងញូវដែល្លី កាន់តែអាក្រក់ខ្លាំងនៅរដូវរងា ពេលដែលល្បឿនខ្យល់បក់ធ្លាក់ចុះ និងអាកាសធាតុត្រជាក់ទាក់ខ្យល់កខ្វក់បង្កឡើងដោយសាររថយន្ត ឧស្សាហកម្ម និងការដុតកាកសំណល់កសិកម្មនៅតាមរដ្ឋជុំវិញ ដើម្បីត្រៀមដាំដំណាំថ្មី ៕

ចំនួនមនុស្សស្លាប់ដោយសារទឹកជំនន់នៅប្រទេសសូម៉ាលី កើនឡើងជិតដល់ ១០០នាក់

ទីភ្នាក់ងារព័ត៌មាន SONNA បានរាយការណ៍ថា ភ្លៀងធ្លាក់ខ្លាំងនៅប្រទេសសូម៉ាលី បានឆក់យកអាយុជីវិតមនុស្សជិត ១០០នាក់ ។ ពួកគេរាយការណ៍ថា មនុស្ស ៩៦នាក់ បានស្លាប់ ដែលជាតួលេខផ្តល់ជូនដោយប្រធានទីភ្នាក់ងារគ្រប់គ្រងគ្រោះមហន្តរាយសូម៉ាលី ។ លោក Hawa Ali Amadin គឺជាពលរដ្ឋមួយរូបរបស់សូម៉ាលី និយាយថា ទឹកជំនន់ទាំងនេះ កើនឡើងទ្វេដងបើធៀបនឹងគ្រោះទឹកជំនន់លើកមុន ។ ពេលភ្លៀងធ្លាក់ ពួកយើងអង្គុយក្រៅផ្ទះក្រោមសំពត់តង់រហូតដល់ភ្លៀងរាំង ។ លោកបន្តថា ពួកយើងចូលផ្ទះវិញ ពេលដែលលែងមានភ្លៀងធ្លាក់ ដើម្បីចំអិនអាហារដល់កូនៗរបស់ពួកយើង ។ គួរឲ្យដឹងថា ប្រទេសសូម៉ាលី និងប្រទេសជាច្រើនទៀតអាហ្វ្រិកខាងកើត បានរងផលប៉ះពាល់ដោយសារភ្លៀងធ្លាក់ឥតឈប់ឈរ ដែលបានចាប់ផ្តើមឡើងកាលពីខែតុលា បង្កឡើងដោយសារបាតុភូតអែល នីញ៉ូ និងបាតុភូតអាកាសធាតុមហាសមុទ្រឥណ្ឌា Dipole ។ បាតុភូតទាំង គឺជាលក្ខខណ្ឌអាកាសធាតុដែលធ្វើឲ្យប៉ះពាល់ដល់សីតុណ្ហភាពផ្ទៃមហាសមុទ្រ និងបណ្តាលឲ្យមានភ្លៀងធ្លាក់លើសកម្រិតមធ្យម ។ យោងតាមការអះអាងរបស់អង្គការសហប្រជាជាតិ(UN) បានឲ្យដឹងថា ទឹកជំនន់ទាំងនេះ ត្រូវបានចាត់ទុកថាជាគ្រោះទឹកជំនន់ដ៏អាក្រក់បំផុតក្នុងរយៈពេលជាច្រើនទសវត្សរ៍កន្លងមកនេះ បណ្តាលឲ្យមនុស្ស ៧០ម៉ឺននាក់ ជម្លៀសខ្លួន ។ ដោយឡែក នៅក្នុងប្រទេសជិតខាងកេនយ៉ា ទឹកជំនន់បានសម្លាប់មនុស្ស ៧៦នាក់ ។ ផ្លូវ និងស្ពានរងការខូចខាត ហើយប្រជាពលរដ្ឋគ្មានទីជម្រក ការផ្គត់ផ្គង់ទឹក និងចំណីអាហារ ៕

ព្រិលធ្លាក់ខ្លាំងបណ្តាលឲ្យបិទផ្លូវ និងកាត់ផ្តាច់ចរន្តអគ្គិសនីនៅប្រទេសប៊ុលហ្គារី

នាយករដ្ឋមន្រ្តីប៊ុលហ្គារីលោក Nikolay Denkov និយាយថា ព្រិលធ្លាក់ខ្លាំងនៅប្រទេសក្នុងតំបន់បាល់កង់មួយនេះ បណ្តាលឲ្យបិទផ្លូវ ចាប់តាំងពីល្ងាចថ្ងៃសៅរ៍រហូតមក ហើយផ្ទះជាង ១ពាន់ខ្នង គ្មានអគ្គិសនីប្រើប្រាស់នោះទេ ។ ក្រុមអាជ្ញាធរឧតុនិយមប៊ុលហ្គារី បានចេញការព្រមានអាកាសធាតុកម្រិតពណ៌ក្រហម បង្ហាញពីស្ថានដ៏គ្រោះថ្នាក់របស់ព្រិលធ្លាក់ខ្លាំង ហើយនិងខ្យល់ព្យុះ ផលវិបាករបស់ព្យុះ Bettin តាមតំបន់ចំនួន ៤នៅភាគឦសានប្រទេសប៊ុលហ្គារី ។ ការធ្វើចរាចរណ៍ជួបការលំបាកខ្លាំងនៅតាមផ្លូវ Petrohan Pass ដែលជាផ្លូវតភ្ជាប់តែមួយគត់ទៅកាន់រដ្ឋធានី Sofia ចេញពីតំបន់ Montana ។ នៅក្នុងរដ្ឋធានី Sofia ព្រិលធ្លាក់បណ្តាលឲ្យបាក់ដើមឈើលើផ្លូវផងដែរ ។ លោក Veselin Nikolovគឺជាមន្រ្តីអាជ្ញាធរហេដ្ឋារចនាសម្ព័ន្ធផ្លូវ បាននិយាយថា នៅលើកំណាត់ផ្លូវ Petrohan Pass ស្ថានភាពពិតជាពិបាកខ្លាំងណាស់នៅពេលយប់ ។ ផ្លូវបើកគ្រប់ពេល ប៉ុន្តែពួកយើងជួបបញ្ហាច្រើនណាស់ ។ លោកបន្តថា មាននូវបំណាក់ផ្ទាំងទឹកកក ក៏ដូចជាបាក់ដើមឈើលើផ្លូវ ។ ពួកយើងបានប្រឹងប្រែងអស់ពីសមត្ថភាព ដើម្បីឲ្យផ្លូវបន្តធ្វើចរាចរណ៍ បើទោះបីជាមានខ្យល់បក់ខ្លាំងក៏ដោយ ៕

មនុស្សម្នាក់ស្លាប់ និង១២នាក់បាត់ខ្លួន ក្នុងហេតុការណ៍លិចនាវាដឹកទំនិញនៅជិតកោះ Lesbos ប្រទេសក្រិក

ឆ្មាំល្បាតឆ្នេរក្រិក បាននិយាយថា មនុស្សម្នាក់ស្លាប់ និងមនុស្ស ១២នាក់ផ្សេងទៀត បានបាត់ខ្លួនកាលពីថ្ងៃអាទិត្យ ក្រោយពេលនាវាដឹកអំបិលជាមួយក្រុមនាវិក ១៤នាក់ បានលិចនៅជិតកោះ Lesbos ។ ក្រុមឆ្មាំល្បាតឆ្នេរ បន្តថា នាវាដឹកទំនិញ Raptor ដោតទង់ជាតិកូម័រ បានចាកចេញពីកំពង់ផែ El Dekheila ប្រទេសអេហ្ស៊ីប និងធ្វើដំណើរឆ្ពោះទៅកាន់ទីក្រុងអ៊ីស្តានប៊ុល ប្រទេសទួរគី ពេលដែលវារាយការណ៍ថាខូចម៉ាស៊ីន ហើយនិងបញ្ជូនសញ្ញាអាសន្នកាលពីព្រឹកថ្ងៃអាទិត្យ ។ មន្រ្តីមួយរូបរបស់ឆ្មាំល្បាតឆ្នេរក្រិក និយាយប្រាប់ទីភ្នាក់ងារព័ត៌មានរ៉យទ័រថា សាកសពមនុស្សម្នាក់ ត្រូវបានរកឃើញនៅតំបន់នោះ ហើយមនុស្សម្នាក់ទៀត ត្រូវបានសង្រ្គោះដោយឧទ្ធម្ភាគចក្រ ហើយត្រូវបានដឹកបញ្ជូនទៅកាន់មន្ទីរពេទ្យនៅកោះ Lesbos ។ ក្រុមនាវិក ៨នាក់ គឺជាជនជាតិអេហ្ស៊ីប និងក្រុមនាវិកផ្សេងទៀត គឺជាជនជាតិស៊ីរី និងឥណ្ឌា ៕

លោក Netanyahu ប្រាប់លោក Biden ថា អ៊ីស្រាអែលនឹងចាប់ផ្តើមប្រតិបត្តិការសឹកឡើងវិញក្រោយបញ្ចប់បទឈប់បាញ់

កាលពីថ្ងៃអាទិត្យម្សិលមិញ នាយករដ្ឋមន្រ្តីអ៊ីស្រាអែលលោក Benjamin Netanyahu បាននិយាយប្រាប់ប្រធានាធិបតីសហរដ្ឋអាមេរិកលោក Joe Biden ថា អ៊ីស្រាអែលនឹងចាប់ផ្តើមប្រតិបត្តិការសឹករបស់ខ្លួនឡើងវិញនៅតំបន់ហ្គាហ្សា នៅពេលដែលបញ្ចប់បទឈប់បាញ់ហើយនោះ ។ ទោះបីជាយ៉ាងណាក៏ដោយ លោក Netanyahu បាននិយាយផងដែរថា លោកនឹងស្វាគមន៍ការបន្តបទឈប់បាញ់ បើសិនជាមានការសម្របសម្រួលការដោះលែងចំណាប់ថ្នូរ ១០នាក់បន្ថែមទៀតជារៀងរាល់ថ្ងៃ ដូចដែលបានព្រមព្រៀងនៅក្នុងកិច្ចព្រមព្រៀងដំបូងដែលរៀបចំឡើងដោយប្រទេសកាតា ។ លោកនិយាយថា មាននូវផែនការដែលបទឈប់បាញ់អាចនឹងបន្ត ដើម្បីដោះលែងចំណាប់ថ្នូរ១០នាក់បន្ថែមទៀត ជារៀងរាល់ថ្ងៃ ។ លោក Netanyahu និយាយប្រាប់លោក Bidenថា ពេលណាបញ្ចប់បទឈប់បាញ់ ពួកយើងនឹងវិលត្រឡប់ទៅធ្វើសង្រ្គាមវិញដោយពេញកម្លាំង ដើម្បីសម្រេចគោលដៅរបស់ពួកយើង ដើម្បីធ្វើឲ្យសាបសូន្យក្រុមហាម៉ាស់ ដើម្បីធានាថា តំបន់ហ្គាហ្សាលែងវិលត្រឡប់ទៅរកស្ថានភាពចាស់ ហើយជាការពិតណាស់ថា ត្រូវតែមានការដោះលែងចំណាប់ថ្នូរទាំងអស់របស់ពួកយើង ៕

UN បន្តចែកចាយជំនួយមនុស្សធម៌ដ៏ច្រើនសន្ធឹកសន្ធាប់ទៅកាន់តំបន់ភាគខាងជើងហ្គាហ្សា

មន្រ្តីមួយរូបរបស់អង្គការសហប្រជាជាតិ(UN) ដែលបានចូលរួមក្បួនរថយន្តដឹកជំនួយមនុស្សធម៌ទៅកាន់តំបន់ភាគខាងជើងហ្គាហ្សា និយាយថា ក្រុមផ្តល់ជំនួយនៅលើរថយន្តបានចែកចាយជំនួយដ៏ច្រើនសន្ធឹកសន្ធាប់បំផុតនៅក្នុងរយៈពេល ១ខែកន្លងមកនេះ ដោយលោកបានរៀបរាប់ពីស្ថានភាពស្គមស្គាំង ស្លេកស្លាំង និងស្រេកទឹករបស់ប្រជាពលរដ្ឋ មុនពេលទឹកមកដល់ ។ មុនពេលបទឈប់បាញ់រយៈពេល ៤ថ្ងៃរវាងអ៊ីស្រាអែល និងក្រុមហាម៉ាស់ ចូលជាធរមានកាលពីថ្ងៃសុក្រ ទីភ្នាក់ងារ UN បានបង្ហាញការព្រួយបារម្ភពីជំងឺ និងការខះជាតិទឹកនៅតំបន់ភាគខាងជើងហ្គាហ្សា ដែលត្រូវបានកាត់ផ្តាច់ជំនួយពីខាងក្រៅអស់រយៈពេលជាច្រើនសប្តាហ៍មកហើយ ។ កាលពីមុន UNធ្លាប់បាននិយាយថា ពួកគេពុំអាចទទួលបានច្រកសុវត្ថិភាពនោះទេ ហើយក្រុមសុខាភិបាលដែលបន្តប្រតិបត្តិការដូចជាក្រុមកាកបាទក្រហមអន្តរជាតិ បានរងការវាយប្រហារនៅទីនោះ ។ លោក James Elder គឺជាមន្រ្តីទីភ្នាក់ងារកុមារ UN បាននិយាយប្រាប់ទីភ្នាក់ងារព័ត៌មានរ៉យទ័រថា មូននិធិកុមារអង្គការសហប្រជាជាតិ (UNICEF) បានចូលរួមក្បួនរថយន្ត ៥គ្រឿងកាលពីថ្ងៃអាទិត្យជាមួយនឹងទីភ្នាក់ងារ UNផ្សេងទៀត ដើម្បីចែកចាយនំមានថាមពលខ្ពស់ គ្រាប់ថ្នាំវីតាមីនដល់កុមារ និងក្មេងៗឈឺ ។ លោកនិយាយថា ការចែកចាយជំនួយនេះ ត្រូវបានផ្តល់ដល់មន្ទីរពេទ្យដែលគ្រប់គ្រងដោយក្រុមហាម៉ាស់ ។ លោករៀបរាប់ពីការមើលឃើញកុមាររងរបួស សម្រាកលើគ្រែក្នុងមន្ទីរពេទ្យ ក្នុងស្ថានភាពភ័យខ្លាច ។ លោកបន្តទៀតថា គ្មានសញ្ញាណាមួយនៃការបង្កជម្លោះទៀតនោះទេ ។ បើទោះបីជាជំនួយមកដល់យ៉ាងណាក៏ដោយ លោក Elder និយាយថា លោកបានមើលឃើញជនប៉ាឡេស្ទីននៅតំបន់ហ្គាហ្សា បន្តដំណើរឆ្ពោះទៅកាន់តំបន់ភាគខាងត្បូង ដោយពួកគេព្រួយបារម្ភដល់ការទម្លាក់គ្រាប់បែកសារជាថ្មីរបស់អ៊ីស្រាអែល បើសិនជាបទឈប់បាញ់រយៈពេល ៤ថ្ងៃ ពុំត្រូវបានពន្យាពេលទេនោះ ៕

ជនប៉ាឡេស្ទីននៅទីក្រុង Ramallah និងហ៊្សេរុយសាឡឹម អបអរសាទរការវិលត្រឡប់មកវិញរបស់សាច់ញាតិ

កាលពីថ្ងៃអាទិត្យម្សិលមិញ ប្រជាពលរដ្ឋរស់នៅទីក្រុង Ramallah ស្ថិតក្នុងតំបន់កាន់កាប់វ៉េសប៊ែង បានអបអរសាទរការដោះលែងជនប៉ាឡេស្ទីនពីពន្ធនាគារអ៊ីស្រាអែល នៅថ្ងៃទី ៣នៃបទឈប់បាញ់រយៈពេល ៤ថ្ងៃ រវាងអ៊ីស្រាអែល និងក្រុមជីវពលហាម៉ាស់ ។ ទោះបីជាយ៉ាងណាក៏ដោយនៅក្នុងទីក្រុងហ៊្សេរុយឡាឡឹម នគរបាលអ៊ីស្រាអែល បានរឹតត្បិតការអបអរសាទរដោយអនុញ្ញាតឲ្យគ្រួសារទទួលយកអ្នកទោសដែលត្រូវបានដោះលែងនៅក្នុងផ្ទះរបស់ពួកគេ ហើយមិនអនុញ្ញាតឲ្យមានការជួបជុំគ្នាទ្រង់ទ្រាយធំនោះទេ ។ ពន្ធនាគារអ៊ីស្រាអែល ត្រូវបានត្រួតត្រាដោយរដ្ឋមន្រ្តីសន្តិសុខជាតិនិយមស្តាំលោក Itamar Ben-Gvir ដែលគាំទ្រជាយូរមកហើយលើការចាត់វិធានការបង្ក្រាបអ្នកទោសប៉ាឡេស្ទីន ។ កាលពីថ្ងៃព្រហស្បតិ៍សប្តាហ៍មុន លោក Ben-Gvir បាននិយាយនៅលើបណ្តាញព័ត៌មានសង្គម X អតីតបណ្តាញព័ត៌មានសង្គម Twitterថា លោកបានណែនាំមន្រ្តីសេវាកម្មពន្ធនាគារឲ្យការពារការព្យាយាមណាមួយរបស់ក្រុមភេរវករ ក្នុងការអបអរសាទរនៅក្នុងពន្ធនាគារ ។ ទីភ្នាក់ងារព័ត៌មាន WAFAរបស់ប៉ាឡេស្ទីន បានរាយការណ៍ថា កាលពីថ្ងៃអាទិត្យ អ៊ីស្រាអែលបានដោះលែងជនប៉ាឡេស្ទីន ៣៩នាក់ ក្នុងនោះមានស្រ្តី ៦នាក់ និងយុវជន ៣៣នាក់ ពីពន្ធនាគារ ២កន្លែង ៕

ចំណាប់ថ្នូរដែលត្រូវបានដោះលែង ដឹកតាមឧទ្ធម្ភាគចក្រទៅកាន់មណ្ឌលសុខភាពនៅប្រទេសអ៊ីស្រាអែល

ចំណាប់ថ្នូរកុមារ និងស្រ្តីអ៊ីស្រាអែលដែលត្រូវបានដោះលែង បានធ្វើដំណើរតាមឧទ្ធម្ភាគចក្រមកដល់មណ្ឌលសុខភាពកុមារ Schneider ប្រទេសអ៊ីស្រាអែល ។ ចំណាប់ថ្នូរត្រូវបានដឹកដំបូងទៅកាន់មូលដ្ឋានទ័ពស្ថិតនៅទីក្រុងភាគខាងត្បូង Hatzerim ប្រទេសអ៊ីស្រាអែល ។ គួរឲ្យដឹងថា ក្រុមហាម៉ាស់ បានដោះលែងចំណាប់ថ្នូរ ១៧នាក់ ដែលបានរក្សាទុកនៅក្នុងតំបន់ហ្គាហ្សាអស់រយៈពេល ៥១ថ្ងៃ រួមទាំងក្មេងស្រីកាត់ជាតិសាសន៍អ៊ីស្រាអែល-អាមេរិក កាលពីថ្ងៃអាទិត្យ ស្របពេលដែលអ៊ីស្រាអែលបានដោះលែងអ្នកទោសប៉ាឡេស្ទីន នៅថ្ងៃទី ៣នៃកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាស់ ។ បទឈប់បាញ់រយៈពេល ៤ថ្ងៃ គឺជាការផ្អាកសង្រ្គាមលើកដំបូងនៅក្នុងជម្លោះរយៈពេល ៧សប្តាហ៍ ចាប់តាំងពីក្រុមហាម៉ាស់ សម្លាប់មនុស្ស ១.២០០នាក់ និងចាប់ចំណាប់ថ្នូរប្រហែល ២៤០នាក់ ទៅកាន់តំបន់ហ្គាហ្សា ។ ដោយឡែក ពលរដ្ឋថៃ ៣នាក់ និងពលរដ្ឋរុស្ស៊ីម្នាក់ ត្រូវបានដោះលែងផងដែរដោយក្រុមហាម៉ាស់ កាលពីថ្ងៃអាទិត្យ ៕

បណ្ដាញសង្គម

ព័ត៌មានថ្មីៗ

អាជ្ញាធរខេត្តកំពង់ធំ ជួបសំណេះសំណាល និងអបអរសាទរសិស្សជ័យលាភីនិទ្ទេស A

ឯកឧត្តម ហ៊ុន ម៉ានី៖ បាឋកថាជាស៊េរី ជាស្ពានផ្សារភ្ជាប់នូវគុណតម្លៃអន្តរជំនាន់ រវាងថ្នាក់ដឹកនាំជំនាន់មុន និងថ្នាក់ដឹកនាំជំនាន់ក្រោយ

ជនជាតិចិន ត្រូវបានសង្រ្គោះចេញពីរូងក្រោមដីនេប៉ាល់ រយៈពេល ១០ថ្ងៃ ក្រោយទឹកជំនន់ដ៏គំហក់

ប្រធានក្រុមការងារថ្នាក់កណ្តាលចុះជួយឃុំខ្នុរដំបង ស្រុកជើងព្រៃ នាំយកអំណោយ និងថវិកាជូនដល់ពលរដ្ឋមានជីវភាពខ្វះខាត

យានចម្លងអាល្លឺម៉ង់ឡើងដល់ទីអវកាស ខណៈអឺរ៉ុបចូលរួមប្រកួតប្រជែងបាញ់បង្ហោះផ្កាយរណប

ក្រសួងការងារ នាំយកឱកាសការងារដល់ផ្ទះជូនប្រជាពលរដ្ឋនៅស្រុកថ្មបាំង

រាជរដ្ឋាភិបាលកម្ពុជា បន្តវិធានការក្តៅមិនបន្ធូរដៃ ដើម្បីបោសសម្អាត Online Scams

អន្តរក្រសួង ចុះវាយតម្លៃការងារថែទាំផ្លូវជនបទ ១២ខ្សែ នៅខេត្តត្បូងឃ្មុំ

ក្រុមនិស្សិតចុះស្រាវជ្រាវផ្ទាល់ពីវប្បធម៌ជនជាតិដើមភាគតិច នៅខេត្តមណ្ឌលគិរី

រដ្ឋបាលខេត្តត្បូងឃ្មុំ ជំរុញអាជ្ញាពាក់ព័ន្ធបន្តផ្សព្វផ្សាយបញ្ជ្រាបការយល់ដឹងពីបញ្ហាជំងឺអេដស៍

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877