BTV NEWS

រយៈពេលជាង ៥ខែ កម្ពុជាបណ្តេញជនបរទេសចេញជិត ៣ម៉ឺននាក់ និងជិត ២ពាន់នាក់ទៀតត្រៀមបណ្តេញចេញ ពាក់ព័ន្ធករណី Online Scams និងការប្រព្រឹត្តបទល្មើសផ្សេងៗ

គយឃាត់ខ្លួនបុរសម៉ាឡេស៊ីម្នាក់រកឃើញហេរ៉ូអ៊ីន ៨១ កញ្ចប់ ពេលត្រៀមចាកចេញពីកម្ពុជាទៅកោះតៃវ៉ាន់

កងរាជអាវុធហត្ថខេត្តកំពង់ស្ពឺ បំបែកសំណុំរឿងលួចទូរស័ព្ទជាង ២០០គ្រឿង និងអ្នកទទួលផលចោរកម្ម

[UPDATE] ភ្លើងឆេះលំនៅឋានពលរដ្ឋនៅខណ្ឌជ្រោយចង្វាររលត់ហើយ

សន្តិសុខ និង សង្គម

ប្រធានាធិបតី៖ ប្រទេសកោះស៊ីប ត្រៀមខ្លួនជាស្រេច ក្នុងការបញ្ជូនជំនួយទៅកាន់តំបន់ហ្កាហ្សា

ប្រធានាធិបតីនៃប្រទេសកោះមេឌីទែរ៉ាណេភាគខាងកើត បាននិយាយកាលពីថ្ងៃចន្ទថា ប្រទេសកោះស៊ីប ត្រៀមខ្លួនជាស្រេច ដើម្បីចាប់ផ្តើមដឹកជញ្ជូនជំនួយមនុស្សធម៌ ក្នុងបរិមាណដ៏ច្រើន ទៅកាន់តំបន់ហ្កាហ្សា តាមនាវាដែលបើកឆ្លងកាត់ទឹករាក់បាន នៅពេលដែលលក្ខខណ្ឌជាក់ស្តែងអនុញ្ញាតឲ្យ។លោកប្រធានាធិបតី Nikos Christodoulides បាននិយាយថា សំណើរបស់ប្រទេសលោកសម្រាប់ច្រករបៀងសមុទ្រពីកំពង់ផែ Larnaca របស់ប្រទេសកោះស៊ីទៅតំបន់ហ្កាហ្សា គឺជា«ច្រកតែមួយគត់ដែលកំពុងត្រូវបានពិភាក្សាអំពីកម្រិតអន្តរជាតិ» ដែលជាមធ្យោបាយដែលអាចធ្វើទៅបាន ដើម្បីបំពេញបន្ថែមយ៉ាងសំខាន់នូវការលំហូរជំនួយចូលទៅក្នុងដែនដីនេះតាមរយៈ ច្រកព្រំដែន Rafahរបស់ប្រទេសអេ ហ្ស៊ីប។លោក Christodoulides បាននិយាយថា ផែនការសម្រាប់ច្រករបៀងប្រហែល ២៣០ម៉ាយ (៣៧០ គីឡូម៉ែត្រ) ត្រូវបានបញ្ចប់ជាចាំបាច់ ហើយជំនួយ អាចចាប់ត្រូវបានចាប់ផ្តើមដឹកជញ្ជូនចូល នៅពេលដែលការផ្អាកការប្រយុទ្ធគ្នា ត្រូវបានប្រកាស។មេដឹកនាំប្រទេសកោះស៊ីបរូបនេះ ដែលមានទំនាក់ទំនងជាប្រចាំជាមួយលោកនាយករដ្ឋមន្ត្រីអ៊ីស្រាអែល បេនចាមីន ណេតានីយ៉ាហ៊ូ (Benjamin Netanyahu) អំពីសំណើនោះ បាននិយាយថា ការទទួលបានភ្លើងខៀវ ដើម្បីចាប់ផ្តើមការដឹកជញ្ជូន គឺជាបញ្ហាស្មុគស្មាញ ដែលទាមទារឲ្យមានការចរចារដ៏ហ្មត់ចត់ ទាក់ទងនឹងប្រតិបត្តិការយោធាអ៊ីស្រាអែល ដែលកំពុងបន្តនៅក្នុងតំបន់ហ្កាហ្សា។

ក្រុមអ្នកសង្រ្គោះ តភ្ជាប់ការទាក់ទងលើកដំបូង ជាមួយក្រុមកម្មករសាងសង់ផ្លូវកក្រោមដីរបស់ឥណ្ឌាក្រោយការបាក់រលំ

កាលពីថ្ងៃចន្ទ ក្រុមអ្នកសង្គ្រោះ បានប្រើបំពង់ទំហំ៦អ៊ីញ តាមគំនរកម្ទេចថ្ម ផ្លូវក្រោមដីស៊ីលយ៉ារ៉ា ( Silkyar) ដែលបានបាក់រលំដែលនឹងជួយផ្គត់ផ្គង់អាហារកាន់តែច្រើនដល់ពួកគេ។ ការតភ្ជាប់ការប្រាស្រ័យទាក់ទងលើកដំបូងរបស់ក្រុមកម្មរ ដែលបានជាប់ក្នុងផ្លូវក្រោមដីបាក់រលំនៅក្នុងទីប្រជុំជន អ៊ុតាកាស៊ី (Uttarkashi) ក្នុងរដ្ឋ អ៊ុតារៈខណ្ឌ(Uttarakhand)បានកើតឡើងនៅព្រឹកថ្ងៃអង្គារនេះ ។ កាលពីថ្ងៃចន្ទដើមសប្ដាហ៍នេះ ក្រុមអ្នកសង្គ្រោះ បានដាក់បំពង់ថ្មីដើម្បីបញ្ជូនអាហារចំអិនរួចដល់កម្មករទាំង៤១នាក់ ដែលបានជាប់ជាង១សប្ដាហ៍នៅក្នុងផ្លូវក្រោមដីបាក់រលំក្នុងតំបន់ភ្នំហិម៉ាល័យរបស់ឥណ្ឌា និងបាននិយាយថា វិធានការត្រៀមទាំងឡាយកំពុងដំណើរការចាប់ផ្ដើមខួងដើម្បីជួយនាំពួកគេចេញប្រកបដោយសុវត្ថិភាព។ ក្រុមអាជ្ញាធរបាននិយាយថា ក្រុមកម្មករជាបុរសទាំងនោះ ត្រូវបានជាប់ក្នុងផ្លូវហាយវ៉េ នេះជាប់តាំងពី ព្រឹកថ្ងៃទី១២ខែវិច្ឆិកាមក ហើយពួកគេមានសុវត្ថិភាពទេ ខណៈការបញ្ជូនឲ្យពួកគេនូវអំពូលភ្លើង អ៊ុកស៊ីសែន អាហារគ្រៀម ទឹក និងថ្នាំពេទ្យ ត្រូវបានធ្វើរួចហើយតាមបំពង់តូចជាងនេះ។ សញ្ញានៃការទំនាក់ទំនងគ្នា ត្រូវថតបាន ដោយការប្រើកាម៉េរ៉ាឆ្លុះមួយ ដែលបានបញ្ជូនតាមបំពង់ទំហំ៦អ៊ីញ ។ នៅក្នុងវីដេអូ នោះ គេបានឃើញកម្មករពាក់អាវលឿង និងមួកស កំពុងទទួលបានអាហារ តាមបំពង់នោះនិងនិយាយជាមួយគ្នា ។សញ្ញាល្អនេះ បានក្លាយជាក្ដីរំពឹងដ៏រីករាយសម្រាប់ក្រុមគ្រួសាររបស់កម្មករទាំងនោះ៕

របាយការណ៍ UN៖ ភពផែនដីបន្តកើនឡើងកម្តៅដល់២,៩ អង្សាសេ ក្រោមការសន្យាបច្ចុប្បន្ន

អង្គការសហប្រជាជាតិបានព្រមានថា អាកាសធាតុភពផែនដី អាចឡើងកម្តៅរហូតដល់ ២,៩ អង្សាសេនៅចុងសតវត្សនេះ ទោះបីជាប្រទេសនានាសម្រេចបានគោលដៅក្នុងការកាត់បន្ថយការបំភាយឧស្ម័ននៅឆ្នាំ ២០៣០ ក៏ដោយ។ កម្មវិធីបរិស្ថានរបស់អង្គការសហប្រជាជាតិ កាលពីថ្ងៃចន្ទ បានចេញផ្សាយរបាយការណ៍គម្លាតការបំភាយឧស្ម័នឆ្នាំ ២០២៣។ របាយការណ៍នេះ និយាយថាការបំភាយឧស្ម័នផ្ទះកញ្ចក់សកលបានកើនឡើង ១,២ ភាគរយក្នុងឆ្នាំ ២០២២ បើប្រៀបធៀបទៅនឹងឆ្នាំមុន ដែលបានឈានដល់កំណត់ត្រា ៥៧,4 ពាន់លានតោន។របាយការណ៍និយាយថា ការអនុវត្តន៍ពេញលេញការសន្យានៃការបំភាយឧស្ម័ននាពេលបច្ចុប្បន្ន នឹងនៅតែធ្វើឱ្យពិភពលោកនៅបន្តសម្រាប់ការកំណត់ការកើនឡើងសីតុណ្ហភាពក្នុងសតវត្សរ៍នេះ ឱ្យនៅចន្លោះពី ២,៥ ទៅ ២,៩ អង្សា លើសពីកម្រិតមុនឧស្សាហកម្ម។ ដើម្បីកំណត់ការឡើងកម្តៅភពផែនដីឱ្យនៅតិចជាង ១,៥ អង្សា ការបំភាយឧស្ម័នផ្ទះកញ្ចក់សកលត្រូវតែកាត់បន្ថយនៅត្រឹម៤២ភាគរយនៅឆ្នាំ ២០៣០។របាយការណ៍បាននិយាយថា គិតត្រឹមពីពេលតាក់តែងមក មានរយៈពេល ៨៦ ថ្ងៃ នៅឆ្នាំនេះ នៅពេលដែលសីតុណ្ហភាពកើនឡើងលើស ១,៥ អង្សា លើកម្រិតមុនឧស្សាហកម្ម។ របាយការណ៍និយាយថា ក្នុងខែកញ្ញា ឆ្នាំនេះ គឺជាខែក្តៅបំផុតមិនធ្លាប់មានពីមុនមក ដោយមានសីតុណ្ហភាពសកលជាមធ្យម កើនឡើង ១,៨ អង្សា លើសពីកម្រិតមុនឧស្សាហកម្ម។ របាយការណ៍នេះ បានអំពាវនាវឱ្យប្រទេសទាំងអស់ ពន្លឿនការបំប្លែងកាបូនឲ្យនៅទាប និងសេដ្ឋកិច្ចដ៏ទូលំទូលាយជាបន្ទាន់។ សន្និសីទស្តីពីបម្រែបម្រួលអាកាសធាតុនាពេលខាងមុខ COP28 ដែលគ្រោងនឹងចាប់ផ្តើមនៅចុងខែនេះ នឹងក្លាយជា ឱកាសទាន់ពេលវេលា ដើម្បីអំពាវនាវឱ្យមានការគាំទ្រពីអន្តរជាតិក្នុងការកំណត់គោលដៅដែលមានមហិច្ឆតាបន្ថែមទៀត។

នគរបាលឥណ្ឌា និយាយថា ជនភៀសខ្លួនមីយ៉ាន់ម៉ា មិនព្រមវិលទៅប្រទេសកំណើតវិញ ដោយព្រួយបារម្ភពីការវាយប្រហារ

មន្ត្រីនគរបាលម្នាក់បាននិយាយកាលពីថ្ងៃចន្ទ ២០ វិច្ឆិកា ថា ជនភៀសខ្លួនមីយ៉ាន់ម៉ាមួយចំនួនដែលកំពុងស្នាក់នៅក្នុងរដ្ឋ មីហ្សូរាម (Mizoram) ភាគឦសាននៃប្រទេសឥណ្ឌា មិនព្រមវិលត្រឡប់ទៅប្រទេសកំណើតវិញទេ ព្រោះពួកគេខ្លាចថាមានការវាយប្រហារនៅក្នុងភូមិឋានរបស់ពួកគេ។ ប្រជាជនមីយ៉ាន់ម៉ារាប់ពាន់នាក់ និងទាហានជាច្រើននាក់បានចូលទៅក្នុងប្រទេសឥណ្ឌា ភៀសខ្លួនចេញពីការវាយប្រហារដោយក្រុមបះបោរទៅលើមូលដ្ឋានយោធារបស់ពួកគេនៅជិតព្រំដែនឥណ្ឌា។ យោងតាមនគរបាលប្រចាំរដ្ឋនេះ ទាហានប្រហែល ៧៥ នាក់ត្រូវបានបញ្ជូនទៅកាន់សហភាពមីយ៉ាន់ម៉ាវិញដោយកងកម្លាំងការពារព្រំដែន អាសាម រ៉ៃហ្វល( Assam Rifles) របស់ប្រទេសឥណ្ឌា ហើយភាគច្រើននៃជនភៀសខ្លួនបានត្រឡប់ទៅវិញចាប់តាំងពីការបះបោរបានចាប់ផ្តើម។ ទោះជាយ៉ាងណា ពួកគេមួយចំនួននៅតែបារម្ភថា អាចនឹងមានការវាយប្រហារ ឬអំពើហិង្សា ច្រើនទៀតនៅក្នុង ស្រុកភូមិរបស់ពួកគេ។ យោធាមីយ៉ាន់ម៉ាបានប្រយុទ្ធជាមួយជនជាតិភាគតិច និងក្រុមបះបោរផ្សេងទៀតជាច្រើនទសវត្សរ៍មកហើយ ប៉ុន្តែរដ្ឋប្រហារឆ្នាំ ២០២១ បាននាំមកនូវការសម្របសម្រួលដែលមិនធ្លាប់មានរវាងកងកម្លាំងប្រឆាំងយោធាដែលកំពុងបង្កើនភាពប្រឈមដ៏ធំបំផុតដល់កងទ័ពក្នុងរយៈពេលជាច្រើនឆ្នាំមកនេះ។ របបសឹកដែលកំពុងក្ដោបក្ដាប់អំណាចនៅសហភាពមីយ៉ាន់ម៉ាកំពុងប្រឈមការវាយប្រហារកាន់តែខ្លាំងនៅតាមសមរភូមិជួរមុខតាមតំបន់ព្រំដែនរបស់ខ្លួន ខណៈក្រុមម្ព័ន្ធមិត្តរបស់ក្រុមបះបោរជនជាតិភាគតិច រួមជាមួយក្រុមអ្នកតស៊ូគាំទ្រលទ្ធិប្រជាធិបតេយ្យ ព្យាយាមដណ្តើមយកទឹកដី និងប្រឆាំង របបគ្រប់គ្រងរបស់យោធា៕

ការប្រយុទ្ធគ្នារវាងជនជាតិភាគតិច បានសម្លាប់មនុស្ស៣២នាក់ ក្នុងតំបន់ជម្លោះរវាងស៊ូដង់ និងស៊ូដង់ខាងត្បូង

ក្រុមមន្ត្រីក្នុងតំបន់បាននិយាយកាលពីថ្ងៃច័ន្ទ (២០ វិច្ឆិកា) ថា ការវាយប្រហារដោយក្រុមគូប្រជែងនៃក្រុមជនជាតិភាគតិច ឌីនកា (Dinka) នៅក្នុងតំបន់ដែលទាមទារដោយប្រទេសស៊ូដង់ និងស៊ូដង់ខាងត្បូង បានសម្លាប់មនុស្សយ៉ាងហោចណាស់ ៣២ នាក់ កាលពីចុងសប្តាហ៍។ អំពើហឹង្សាដ៏បង្ហូរឈាមគឺជារឿងធម្មតានៅក្នុងតំបន់សម្បូរប្រេង អាបយៃ (Abyei) ជាទីដែលក្រុម ធ្វីក ឌីនកា (Twic Dinka) មកពីរដ្ឋ វ៉ារ៉ាប (Warrap) ប្រទេសជិតខាងរបស់ស៊ូដង់ខាងត្បូង ត្រូវបានជាប់គាំងនៅក្នុងជម្លោះជាមួយក្រុម ងុក ឌីនកា (Ngok Dinka) មកពីតំបន់ អាបយៃ ជុំវិញទីតាំងនៃព្រំដែនរដ្ឋបាល។កាលពីព្រឹកថ្ងៃអាទិត្យ ក្រុមប្រដាប់អាវុធ ធ្វីក ឌីនកា គាំទ្រដោយកងជីវពលក្នុងស្រុក បានវាយប្រហារភូមិ ងុក ឌីនកា ជាច្រើននៅភាគឦសាននៃទីក្រុង អាហ្គុក (Agok) នេះបើតាមលោក បុលីស គូច (Bulis Koch) រដ្ឋមន្ត្រីក្រសួងព័ត៌មានសម្រាប់តំបន់រដ្ឋបាល អាបយៃ បានប្រាប់សារព័ត៌មានរ៉យទ័រ។នៅក្នុងសេចក្តីថ្លែងការណ៍មួយ កងកម្លាំងសន្តិសុខបណ្តោះអាសន្នរបស់អង្គការសហប្រជាជាតិសម្រាប់តំបន់ អាបយៃ (UNISFA) បានថ្កោលទោសការវាយប្រហារនេះ ហើយបាននិយាយថា ខ្លួនបានពង្រឹងសន្តិសុខនៅក្នុងតំបន់ ដោយបង្កើនការល្បាត និងការចូលរួមពីថ្នាក់ដឹកនាំនយោបាយ អាបយៃ និងបណ្ដាមេដឹកនាំប្រពៃណី ដើម្បីកាត់បន្ថយភាពតានតឹង៕

កងទ័ពអ៊ីស្រាអែល ដាក់បង្ហាញអាវុធដែលក្រុមហាម៉ាសប្រើក្នុងអំឡុងការវាយប្រហារថ្ងៃទី ៧ តុលា

កងទ័ពអ៊ីស្រាអែល កាលពីថ្ងៃច័ន្ទ (២០ វិច្ឆិកា) បានដាក់បង្ហាញនូវសព្វាវុធ និងគ្រឿងផ្គត់ផ្គង់ដ៏ច្រើនដែលរឹបអូសបានពីក្រុមសកម្មប្រយុទ្ធហាម៉ាស បន្ទាប់ពីការវាយប្រហារកាលពីថ្ងៃទី ៧ ខែតុលា។ អាវុធដែលរឹបអូសបាននោះរួមមាន គ្រាប់បែកដៃ (RPGs) គ្រាប់បែកដៃកម្ដៅ គ្រាប់រ៉ូកែត និងអាវុធផ្សេងៗទៀត ព្រមទាំងរថយន្ត និងម៉ូតូជាច្រើនគ្រឿង ដែលបានប្រើប្រាស់ឆ្លងកាត់ពីតំបន់ហ្កាហ្សា ចូលទៅក្នុងប្រទេសអ៊ីស្រាអែល។អ៊ីស្រាអែល កំពុងរៀបចំពង្រីកការវាយលុករបស់ខ្លួនប្រឆាំងនឹងក្រុមហាម៉ាស ទៅកាន់ពាក់កណ្តាលនៃភាគខាងត្បូងតំបន់ហ្កាហ្សា ដែលឲ្យសញ្ញាដោយការបង្កើនការវាយប្រហារតាមអាកាសលើគោលដៅដែលអ៊ីស្រាអែល មើលឃើញថាជាជម្រករបស់ពួកសកម្មប្រយុទ្ធប្រដាប់អាវុធនេះ ដើម្បីជាការសងសឹកចំពោះការវាយប្រហារដោយពួកសកម្មប្រយុទ្ធប៉ាឡេស្ទីនហាម៉ាស លើអ៊ីស្រាអែល កាលពីថ្ងៃទី ៧ ខែតុលា។ប្រជាជនអ៊ីស្រាអែលប្រហែល ១.២០០ នាក់ ដែលភាគច្រើនជាជនស៊ីវិល ត្រូវបានសម្លាប់នៅក្នុងការវាយប្រហារដ៏បង្ហូរឈាមរបស់ក្រុមហាម៉ាសកាលពីថ្ងៃទី ៧ ខែតុលា នេះបើយោងតាមតួលេខសរុបរបស់អ៊ីស្រាអែល ដែលជាថ្ងៃមានមនុស្សស្លាប់ច្រើនបំផុតក្នុងប្រវត្តិសាស្ត្រ ៧៥ ឆ្នាំរបស់ប្រទេសនេះ។ រដ្ឋាភិបាលដែលគ្រប់គ្រងដោយក្រុមហាម៉ាស របស់តំបន់ហ្កាហ្សា បាននិយាយថា យ៉ាងហោចណាស់មានជនជាតិប៉ាឡេស្ទីនចំនួន ១៣.៣០០នាក់ ត្រូវបានសម្លាប់នៅក្នុងការទម្លាក់គ្រាប់បែករបស់អ៊ីស្រាអែល ចាប់តាំងពីពេលនោះមក រួមទាំងកុមារយ៉ាងហោចណាស់ ៥.៥០០ នាក់៕

មនុស្ស៦នាក់បានស្លាប់ដោយសារទឹកជំនន់ នៅភាគខាងត្បូងប្រទេសប្រេស៊ីល

ខ្យល់ព្យុះដ៏ខ្លាំងក្លានៅភាគខាងត្បូងប្រទេសប្រេស៊ីល បានបណ្តាលឱ្យមានទឹកជំនន់យ៉ាងធ្ងន់ធ្ងរកាលពីថ្ងៃច័ន្ទ (២០ វិច្ឆិកា) និងបានសម្លាប់មនុស្សយ៉ាងហោចណាស់ ៦នាក់ កាលពីចុងសប្តាហ៍។ ទឹកជំនន់ទន្លេបានធ្វើឱ្យភូមិជាច្រើនត្រូវបានលិចលង់ ហើយយ៉ាងហោចណាស់មនុស្ស ៣១.០០០ នាក់ បានរងផលប៉ះពាល់ដោយភ្លៀងនៅក្នុងរដ្ឋ រីអូ ក្រានដេ ដូសុល (Rio Grande do Sul) ហើយជាង ១.៦០០ នាក់ ត្រូវបានជម្លៀសចេញពីលំនៅឋានរបស់ពួកគេ។វីដេអូពីសារព័ត៌មានរ៉យទ័រ បានបង្ហាញពីមនុស្សដើរកាត់ផ្លូវលិចទឹក និងប្រើប្រាស់ទូកដើម្បីផ្លាស់ទី។ ភាគខាងត្បូងប្រទេសប្រេស៊ីល បានប្រឈមមុខនឹងព្រឹត្តិការណ៍អាកាសធាតុយ៉ាងធ្ងន់ធ្ងរក្នុងរយៈពេលប៉ុន្មានខែថ្មីៗនេះ រួមទាំងភ្លៀងធ្លាក់ខ្លាំង និងព្យុះស៊ីក្លូនដ៏បំផ្លិចបំផ្លាញនៅក្នុងខែកញ្ញា ដែលបានបណ្តាលឱ្យមនុស្សជាង ៥០ នាក់ស្លាប់។នៅក្នុងរដ្ឋ សាន់តា ខាតារីណា (Santa Catarina) អ្នកស្លាប់ជាច្រើនក៏ត្រូវបានរាយការណ៍ដោយសារភ្លៀងធ្លាក់ខ្លាំងដែលបានចាប់ផ្តើមកាលពីថ្ងៃអង្គារ ហើយអភិបាលខេត្តបានប្រកាសភាពអាសន្ននៅក្នុងទីក្រុងចំនួន ៦៤ នៅរដ្ឋនេះ។ នៅក្នុងទីក្រុងចំនួនបួនដែលរងគ្រោះខ្លាំងជាងគេនៅរដ្ឋនេះ ភ្លៀងដែលបានធ្លាក់ក្នុងរយៈពេលបីថ្ងៃ គឺមានកម្រិតច្រើនជាងទ្វេដងនៃអ្វីដែលបានរំពឹងទុកសម្រាប់ខែវិច្ឆិកា ទាំងមូល៕

ប្រមុខការទូតចិន៖ ពិភពលោកត្រូវតែចាត់វិធានការជាបន្ទាន់ ដើម្បីបញ្ឈប់វិបត្តិមនុស្សធម៌នៅហ្កាហ្សា

រដ្ឋមន្ត្រីការបរទេសចិន លោក Wang Yi បានប្រាប់ក្រុមអ្នកការទូតមកពីបណ្ដាប្រទេសអារ៉ាប់ និង មូស្លីមភាគច្រើនកាលពីថ្ងៃចន្ទ ថា សហគមន៍អន្តរជាតិត្រូវតែចាត់វិធានការជាបន្ទាន់ដើម្បីបញ្ឈប់ គ្រោះមហន្តរាយមនុស្សធម៌ នៅក្នុងតំបន់ហ្កាហ្សា។ គណៈប្រតិភូរដ្ឋមន្ត្រីការបរទេសនៃអាជ្ញាធរប៉ាឡេស្ទីន ឥណ្ឌូណេស៊ី អេហ្ស៊ីប អារ៉ាប៊ីសាអ៊ុឌីត និងហ្ស៊កដានី កំពុងមានវត្តមានក្នុងទីក្រុងប៉េកាំងក្នុងសប្តាហ៍នេះ សម្រាប់កិច្ចពិភាក្សាក្នុងបំណង កាត់បន្ថយការរីកកាន់តែធំនៃជម្លោះរវាងប៉ាឡេស្ទីន និងអ៊ីស្រាអែលបច្ចុប្បន្ន។លោក Wang បានប្រាប់ក្រុមរដ្ឋមន្ត្រីការបរទេសនៅក្នុងសុន្ទរកថាបើកនៅទីក្រុងប៉េកាំងថា សូមឱ្យយើងទាំងអស់គ្នាធ្វើការរួមគ្នាដើម្បីធ្វើឱ្យស្ថានការណ៍នៅតំបន់ហ្កាហ្សាឆាប់បានធូរស្រាលនិងស្ដារសន្តិភាពនៅមជ្ឈិមបូព៌ាឱ្យបានឆាប់តាមដែលអាចធ្វើទៅបាន។ លោក Wang បានប្រាប់ក្រុមប្រតិភូ រួមទាំងអគ្គលេខាធិការអង្គការសហប្រតិបត្តិការអ៊ីស្លាមថា គ្រោះមហន្តរាយមនុស្សធម៌ កំពុងរាលដាលនៅក្នុងតំបន់ហ្កាហ្សា។ លោកបាននិយាយថា ស្ថានភាពនៅតំបន់ហ្កាហ្សាប៉ះពាល់ដល់ប្រទេសទាំងអស់នៅជុំវិញពិភពលោកដោយចោទសួរពីអារម្មណ៍របស់មនុស្សអំពីភាពត្រឹមត្រូវ និងខុស និងចំណុចសំខាន់របស់មនុស្សជាតិ។បណ្ដារដ្ឋមន្ត្រីមកពីប្រទេសអារ៉ាប់ និងមូស្លីម បានជំរុញប្រទេសចិន ដាក់សម្ពាធលើក្រុមប្រឹក្សាសន្តិសុខអង្គការសហប្រជាជាតិឲ្យមានបទឈប់បាញ់ នៅតំបន់ហ្កាហ្សា៕

ពលរដ្ឋប្រេស៊ីលសម្រុក ទៅមើលការប្រគុំតន្ត្រី Taylor Swift ទោះរលកកម្ដៅវាយប្រហារខ្លាំងលើទីក្រុង រីយ៉ូ ឌើ ជេណឺរ៉ូក្ដី

ក្រុមអ្នកគាំទ្រតារាចម្រៀងស្រី Taylor Swift បានប្រមូលផ្តុំគ្នាកាលពីថ្ងៃចន្ទ ទី២០ខែវិច្ឆិកា នៅកីឡដ្ឋាន នីលតុនសាន់តូស (Nilton Santos) ក្នុងទីក្រុង រីយ៉ូ ឌើ ជេណឺរ៉ូ (Rio de Janeiro) ដើម្បីចូលរួមការប្រគុំតន្ត្រីរបស់កំពូលតារាចម្រៀងអាមេរិករូបនេះ បើទោះបីជាទីក្រុងនេះត្រូវបានរងការវាយប្រហារដោយរលកកម្ដៅខ្លាំងក៏ដោយ។ កាលពីថ្ងៃសៅរ៍ គេបានផ្អាកព្រឹត្តិការណ៍ប្រគុំតន្ត្រីរបស់កំពូលតារាចម្រៀងរូបនេះ ដោយសារតែការបំបែកកំណត់ត្រាក្ដៅបំផុតបន្ទាប់ពីអ្នកគាំទ្រម្នាក់បានស្លាប់ក្នុងស្ថានភាពដ៏ក្ដៅមួយថ្ងៃមុននេះ។ សីតុណ្ហភាពបានធ្លាក់ចុះយ៉ាងខ្លាំងកាលពីថ្ងៃចន្ទ បន្ទាប់ពីកម្ដៅដែលបំបែកកំណត់ត្រារយៈពេលពីរថ្ងៃក្នុងទីក្រុងធំបំផុតទីពីររបស់ប្រេស៊ីល។នៅយប់ដំបូងនៃកម្មវិធី "The Eras Tour" របស់តារាចម្រៀង Taylor Swift នៅទីក្រុង Rio កាលពីថ្ងៃសុក្រ អ្នកចូលរួមទស្សនា ម្នាក់ ឈ្មោះ Clara Benevides វ័យ ២៣ ឆ្នាំបានធ្លាក់ខ្លួនឈឺ ហើយក្រោយមកបានស្លាប់នៅក្នុងមន្ទីរពេទ្យ។ សោកនាដកម្មនេះបាននាំឱ្យរដ្ឋាភិបាលសហព័ន្ធបញ្ជាឱ្យអ្នករៀបចំព្រឹត្តិការណ៍ T4F SHOW3.SA ធានាឱ្យមានការប្រើប្រាស់ទឹកនៅក្នុងការប្រគុំតន្ត្រីនេះគ្រប់កន្លែងទាំងអស់នៅក្នុងប្រទេសប្រេស៊ីល និងចេញសេចក្តីណែនាំដែលអនុញ្ញាតឱ្យយកដបទឹកចូលទៅក្នុងការប្រគុំតន្ត្រីទាំងអស់ចាប់ពីពេលនេះតទៅ៕

ឆ្មាំល្បាតឆ្នេរអាមេរិកនិយាយថា ប្រេងមួយលានហ្គាឡុង លេចធ្លាយនៅឈូងសមុទ្រម៉ិកស៊ិក

ឆ្មាំល្បាតឆ្នេរសហរដ្ឋអាមេរិក កាលពីថ្ងៃចន្ទ បាននិយាយថា ខ្លួននៅតែស្វែងរកប្រភពនៃការលេចធ្លាយពីបំពង់បង្ហូរប្រេងក្រោមទឹក ចេញពីឆ្នេរសមុទ្ររដ្ឋ Louisiana ក្នុងឈូងសមុទ្រម៉ិកស៊ិក ដែលវាត្រូវបានគេប៉ាន់ប្រមាណថា បានបញ្ចេញប្រេងឆៅជាងមួយលានហ្គាឡុង។ បំពង់បង្ហូរប្រេងដែលមានប្រវែង ១០៨ គីឡូម៉ែត្រ ត្រូវបានបិទដោយក្រុមហ៊ុន Main Pass Oil Gathering Co (MPOG) កាលពីព្រឹកថ្ងៃព្រហស្បតិ៍ បន្ទាប់ពីប្រេងឆៅត្រូវបានគេប្រទះឃើញនៅជុំវិញឆ្នេរសមុទ្រប្រវែង៣១គីឡូម៉ែត្រ នៅតំបន់ដីសណ្តទន្លេ Mississippi។ក្រុមឆ្មាំល្បាតឆ្នេរ បាននិយាយថាក្រុមស្វែងរកនៅលើអាកាស បានប្រទះឃើញប្រេងដែលអាចមើលឃើញកាលពីថ្ងៃសុក្រសប្តាហ៍កន្លងទៅនេះ ហូរទៅភាគនិរតីចេញពីឆ្នេររដ្ឋ Louisiana ខណៈកិច្ចខិតខំប្រឹងប្រែងស្វែងរកប្រេងនៅតែបន្ត ហើយឧបករណ៍នៅក្រោមទឹក បានវាស់ស្ទង់បំពង់បង្ហូរប្រេងដើម្បីស្វែងរកប្រភពនៃការលេចធ្លាយ។ខណៈបរិមាណពិតប្រាកដនៃប្រេងដែលបានបញ្ចេញមិនត្រូវបានគេដឹងនោះ ឆ្មាំល្បាតឆ្នេរដឹកនាំការសម្អាតបាននិយាយថា ការគណនាផ្នែកវិស្វកម្មដំបូង បានដាក់បរិមាណនៃការលេចធ្លាយប្រេងនៅចំនួន ១,១ លានហ្គាឡុង ឬ ២៦.១៩០ បារ៉ែល។ឆ្មាំល្បាតឆ្នេរនិយាយថា រហូតមកដល់ពេលនេះពុំមានរបាយការណ៍អំពីអ្នករងគ្រោះថ្នាក់ ឬផលប៉ះពាល់នៅឆ្នេរសមុទ្រនោះទេ ហើយមូលហេតុនៃការលេចធ្លាយនេះកំពុងស្ថិតក្រោមការស៊ើបអង្កេត។ ទីភ្នាក់ងារការពារបរិស្ថានរបស់សហរដ្ឋអាមេរិក បាននិយាយកាលពីថ្ងៃសុក្រថា ឆ្មាំល្បាតឆ្នេរ បានចាប់ផ្តើមបង្កើតក្រុមឆ្លើយតបជាតិ ដែលរួមមានអង្គភាពសហព័ន្ធចំនួន១៥អង្គភាព ទទួលខុសត្រូវក្នុងការសម្របសម្រួលការឆ្លើយតបចំពោះឧបទ្ទវហេតុការបំពុលដោយកង្វក់ប្រេង។

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅសាធារណរដ្ឋកូរ៉េ ជួបជាមួយអាជ្ញាធរកូរ៉េ និងស្នើជួយគាំទ្រការធ្វើទំនើបកម្មវិស័យកសិកម្មមានសក្ដានុពលនៅកម្ពុជា

អ្នកគ្រប់គ្រងកម្មវិធីជាន់ខ្ពស់របស់ SDC ថា «ជំនាញ TVET មិនអាចខ្វះបាននៅក្នុងការរស់នៅប្រចាំថ្ងៃ»

សម្ដេចធិបតី អំពាវនាវដល់ក្រសួង-ស្ថាប័ន និងភាគីពាក់ព័ន្ធយកចិត្តទុកដាក់ខ្ពស់បន្តទៀតលើការងារអក្ខរកម្ម

ព្រឹត្តិការណ៍ជិះកង់ទស្សនាសមរាត្រីក្នុងតំបន់អង្គរ នាថ្ងៃទី២០-កញ្ញា បើកទទួលចុះឈ្មោះ ដោយឥតគិតថ្លៃ

សារព័ត៌មានអន្តរជាតិល្បីៗ ចេញមកនិយាយការពិតពីសង្គ្រាមឈ្លានពានរបស់ថៃមកលើកម្ពុជា

វិចារណកថា៖ អាងរងទឹកនីមួយៗ គឺជាផ្ទះរួម «យើងក្លាយជាអ្នកជិតខាងនឹងគ្នា នៅគ្រប់ទីកន្លែង ដែលទឹកនាំយើងចូលរួមក្នុងដំណើរតែមួយ»

លោក Trump ៖ក្រុមហ៊ុន Bombardier របស់កាណាដា ត្រូវតែផលិតយន្តហោះនៅអាមេរិក ពុំនោះនឹងបាត់បង់ឱកាសចូលទីផ្សារ

ប៉េរូ ប្រកាសគ្រាអាសន្ននៅពន្ធនាគារដែលមានសន្តិសុខខ្ពស់ចំនួនប្រាំកន្លែងដើម្បីប្រយុទ្ធប្រឆាំងក្រុមឧក្រិដ្ឋជន

អឺរ៉ុប សន្យាកញ្ចប់វិនិយោគជាង២០០លានដុល្លារដល់ដែនដី Greenland ក្នុងពេលមានការគំរាមកំហែងពីលោក Trump

ការប្រើប្រាស់ច្រកសមុទ្រ Hormuz គឺដើម្បីបង្កើតលក្ខខណ្ឌនៅក្រោយសង្គ្រាម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877