BTV NEWS

កម្លាំងអាជ្ញាធររាជធានី បន្តឆ្មក់ចុះបង្ក្រាប Online Scams នៅខណ្ឌមានជ័យ ឃាត់ជនបរទេស១២នាក់

រដ្ឋមន្ត្រីក្រសួងយុត្តិធម៌បញ្ជាក់អំពីវិធានការចំនួនបីដែលនឹងត្រូវដាក់ឱ្យអនុវត្តចំពោះករណីក្មេងទំនើង

អាវុធហត្ថរាជធានី ឆ្មក់ចុះបង្រ្កាបភោជនីយដ្ឋាន «មហាមេឃ» សង្ស័យបង្កប់សេវាបម្រើផ្លូវភេទ ឃាត់មនុស្សប្រុសស្រី ៥៣នាក់

កម្លាំងអាជ្ញាធរចម្រុះ ចុះត្រួតពិនិត្យអគារស្នាក់នៅមួយកន្លែងសង្ស័យមានបង្កប់ Online Scams រកឃើញជនបរទេស ៥នាក់ ស្នាក់នៅខុសច្បាប់

សន្តិសុខ និង សង្គម

ទឹកជំនន់ប្រែក្លាយឆ្នេរសមុទ្រ Odesa ឲ្យទៅជាកន្លែងចាក់សំរាម និងទីស្មសានរបស់ខ្មោចសត្វ បន្ទាប់ពីបាក់ទំនប់

អ៊ុយក្រែន៖ ឆ្នេរសមុទ្រ នៅតំបន់ Odesa ភាគខាងត្បូងប្រទេសអ៊ុយក្រែន ត្រូវបានបិទបន្ទាប់ពីទឹកកខ្វក់ពីទំនប់ដែលបាក់ Nova Kakhovka បានរសាត់មកតាមខ្សែទឹក ដែលបង្កជា «ការគំរាមកំហែងជាក់ស្ដែង» ដល់ប្រជាជនក្នុងតំបន់ ខណៈដែលចំនួនអ្នកស្លាប់ពីការបាក់ទំនប់ដែលគ្រប់គ្រងដោយប្រទេសរុស្ស៊ីកាលពីថ្ងៃទី៦ ខែមិថុនានេះ បានកើនឡើងដល់ ៤៥នាក់ ក្រោយមានការផ្ដល់ផ្តល់ព័ត៌មានថ្មីៗពីអ្នកបាត់បង់ជីវិត ទាំងពីខាងអ៊ុយក្រែន និងរុស្ស៊ី។ការបាក់ទំនប់នេះបានបំផ្លាញភូមិ ជន់លិចដីស្រែចម្ការ និងធ្វើឲ្យដាច់ចរន្តអគ្គិសនី ហើយនិងការផ្គត់ផ្គង់ទឹកស្អាតដល់ប្រជាពលរដ្ឋរាប់ម៉ឺននាក់ ហើយទោះបីជាអាជ្ញាធរអ៊ុយក្រែន បានឲ្យដឹងថា ទឹកជំនន់ កំពុងតែស្រកចុះក៏ដោយ ប៉ុន្តែកម្ទេចកម្ទីបានរសាត់ធ្លាក់ទៅទន្លេ Dnipro រួចហូរចូលទៅក្នុងសមុទ្រខ្មៅ ដែលនឹងប្រែក្លាយឆ្នេរសមុទ្រ Odesa ឲ្យទៅជា «កន្លែងចាក់សំរាម និងទីស្មសានរបស់ខ្មោចសត្វ»។សាលាក្រុង Odesa បានឲ្យដឹងតាមរយៈបណ្ដាញសង្គម Telegram កាលពីថ្ងៃអាទិត្យថា៖ «ឆ្នេរសមុទ្រ Odesa ត្រូវបានប្រកាសថា មិនស័ក្ដិសមដល់ការហែលទឹកនោះឡើយ ដោយសារតែស្ថានភាពទឹកកាន់តែអាក្រក់ឡើងៗ នៅក្នុងតំបន់ទឹកគ្រប់កន្លែង (សមុទ្រ និងច្រាំងទន្លេ) និងត្រូវបានប្រកាសពីការគំរាមកំហែងជាក់ស្ដែងដល់សុខភាពរបស់អ្នករស់នៅទីក្រុង»។កាលពីថ្ងៃសៅរ៍ តាមរយៈការបង្ហោះសារលើបណ្ដាញសង្គម Telegram អាជ្ញាធរបានព្រមានកាន់តែខ្លាំងអំពីការធ្លាក់ចុះគុណភាពទឹក ដោយប្រាប់ថា ការធ្វើតេស្តមន្ទីរពិសោធន៍ «បានកំណត់អត្តសញ្ញាណភ្នាក់ងារចម្លងជំងឺ កាលពីសប្តាហ៍មុន»។ជាមួយគ្នានេះ អាជ្ញាធរក៏បានប្រកាសហាមប្រាមអ្នកស្រុកតំបន់ឆ្នេរសមុទ្រ Odesa មិនឲ្យលក់ត្រី និងអាហារសមុទ្រពីកន្លែងនេសាទមិនស្គាល់អត្តសញ្ញាណ នៅជិតផ្សារ និងមជ្ឈមណ្ឌលផ្សារទំនើប។ រីឯអាជ្ញាធរសុខាភិបាល នៅទីក្រុង Mykolaiv ភាគខាងត្បូងប្រទេស កាលពីថ្ងៃអាទិត្យ ក៏បានព្រមានអ្នកស្រុកកុំឲ្យបរិភោគទឹកបើកចេញពីក្បាលម៉ាស៊ីនរ៉ូប៊ីណេ ទៅហែលទឹក ឬនេសាទ បន្ទាប់ពីបានរកឃើញសារធាតុចម្លងរោគ នៅក្នុងទឹក នៅទីនោះ។មកទល់ពេលនេះ នៅតែមិនទាន់ច្បាស់ថា តើទំនប់ Nova Kakhovka ត្រូវបានធ្វើឲ្យបាក់ដោយចេតនា ឬថា តើជាកំហុសហេដ្ឋារចនាសម្ព័ន្ធ ខណៈដែលភាគីទាំង២ ទាំងអ៊ុយក្រែន និងរុស្ស៊ី នៅតែឆ្លើយដាក់គ្នា ជុំវិញការនៅពីក្រោយនៃការបាក់ទំនប់នេះ៕

ជនជាតិប៉ាគីស្ថានជាង ៣០០នាក់ បានស្លាប់ក្នុងគ្រោះមហន្តរាយលិចទូកជនអន្តោប្រវេសន៍នៅសមុទ្រមេឌីទែរ៉ាណេ

ប៉ាគីស្ថាន៖ ជនជាតិប៉ាគីស្ថានជាង ៣០០នាក់ បានស្លាប់ក្នុងគ្រោះមហន្តរាយលិចទូកនៅក្នុងសមុទ្រមេឌីទែរ៉ាណេ ស្ថិតនៅជិតតំបន់ឆ្នេរប្រទេសក្រិក គឺជាសោកនាដកម្មចុងក្រោយគេបង្ហាញពីវិបត្តិជនភៀសខ្លួនដែលសហភាពអឺរ៉ុបកំពុងប្រឈម ស្របពេលដែលមនុស្សរាប់ម៉ឺននាក់ ព្យាយាមស្វែងរកទីជម្រកល្អប្រសើរ គេចចេញពីសង្រ្គាម ការរំលោភបំពាន និងភាពក្រីក្រ ។ ប្រធានព្រឹទ្ធសភាប៉ាគីស្ថានលោក Muhammad Sadiq Sanjrani បានចេញចំនួនមនុស្សស្លាប់នៅក្នុងសេចក្តីថ្លែងការណ៍កាលពីថ្ងៃអាទិត្យ ដោយរូបលោកសម្តែងនូវមរណទុក្ខ និងចូលរួមចែករំលែកការសោកស្តាយដល់ក្រុមគ្រួសារអ្នកស្លាប់ ។ លោក Sanjrani និយាយថា ចិត្តគំនិត និងការអធិដ្ឋានរបស់ពួកយើងនៅជាមួយអ្នក ហើយពួកយើងសូមធ្វើអធិស្ឋានដល់ព្រលឹងដែលបានទៅកាន់សុខគតិភព ។ នេះគឺជាឧបទ្ទេវហេតុដ៏អាក្រក់បំផុត ដែលគូសបញ្ជាក់ពីតម្រូវការបន្ទាន់ក្នុងការលើកឡើង និងថ្កោលទោសទង្វើរដ៏គួរស្អប់ខ្ពើមរបស់ក្រុមរត់ពន្ធមនុស្សខុសច្បាប់ ។ ទោះបីជាយ៉ាងណាក៏ដោយ ក្រុមអាជ្ញាធរក្រិក ពុំទាន់បានបញ្ជាក់ពីចំនួនមនុស្សស្លាប់សរុបរបស់ជនជាតិប៉ាគីស្ថាននោះទេ ។ គួរឲ្យដឹងថា ប៉ាគីស្ថាន កំពុងស្ថិតក្នុងវិបត្តិសេដ្ឋកិច្ចដ៏អាក្រក់បំផុតរបស់ខ្លួន ក្នុងរយៈពេលជាច្រើនទសវត្សរ៍កន្លងមកនេះ ។ ដោយឡែក ទីភ្នាក់ងារអន្តោប្រវេសន៍ជាតិ(IOM) បាននិយាយថា បុរស ស្រ្តី និងកុមារប្រហែល ៧៥០នាក់ បាននៅលើទូកមួយគ្រឿង ពេលវាលិចកាលពីសប្តាហ៍មុន ដោយបានសម្លាប់មនុស្សរាប់រយនាក់ និងធ្វើឲ្យវាស្ថិតក្នុងចំណោមសោកនាដកម្មលិចទូកដ៏អាក្រក់បំផុតនៅក្នុងសមុទ្រមេឌីទែរ៉ាណេ ៕

៩៨នាក់ស្លាប់នៅឥណ្ឌា ដោយសារក្ដៅខ្លាំងក្នុងរយៈពេល៣ថ្ងៃ

ឥណ្ឌា៖ ទស្សនាវដ្ដីព័ត៌មានជាភាសាអង់គ្លេស India Today បានចុះផ្សាយ កាលពីថ្ងៃអាទិត្យថា មនុស្សចំនួន ៩៨នាក់ បានស្លាប់ដោយសារតែអាកាសធាតុក្ដៅខ្លាំង នៅក្នុងរដ្ឋ Uttar Pradesh និង Bihar របស់ប្រទេសឥណ្ឌា។សេចក្ដីការណ៍ពីទស្សនាវដ្ដីនោះ បានឲ្យដឹងថាមនុស្ស ៥៤នាក់ បានស្លាប់នៅក្នុងរដ្ឋ Uttar Pradesh ខណៈ ៤៤នាក់ទៀត នៅឯរដ្ឋជិតខាង Bihar ក្នុងរយៈពេល ៣ថ្ងៃចុងក្រោយនេះ។អាជ្ញាធរឧតុនិយមរបស់ប្រទេសឥណ្ឌា បាននិយាយនៅក្នុងរបាយការណ៍មួយ កាលពីថ្ងៃសៅរ៍ថា សីតុណ្ហភាពបានឡើងខ្ពស់លើសពី ៤០អង្សាសេ នៅក្នុងរដ្ឋ Uttar Pradesh និងរដ្ឋ Bihar ក៏ដូចជារដ្ឋផ្សេងទៀតនៅក្នុងប្រទេសនេះ។សេចក្ដីរាយការណ៍បានបន្ថែមថា៖ «រលកកម្ដៅឆ្ពោះទៅកាន់ស្ថានភាពរលកកម្ដៅខ្ពស់ខ្លាំង ទំនងជាបន្តលើប្រទេសឥណ្ឌាខាងកើត ភាគកណ្ដាលភាគខាងកើត និងឧបទ្វីបភាគខាងកើត ក្នុងអំឡុងពេល ៣ ទៅ៤ថ្ងៃខាងមុខ»៕

មនុស្សស្លាប់៤នាក់ និងរបួសរាប់សិបនាក់ ក្នុងយប់ដ៏ចលាចលនៃការបាញ់ប្រហារទ្រង់ទ្រាយធំ នៅទូទាំងប្រទេស

អាមេរិក៖ យ៉ាងហោចណាស់មនុស្ស ៤នាក់ បានស្លាប់ និងរាប់សិបនាក់ផ្សេងទៀត បានរងរបួសនៅក្នុងហេតុការណ៍បាញ់ប្រហារ ៣កន្លែងខុសគ្នា ដោយកើតឡើងនៅក្នុងរដ្ឋ Illinois, Missouri និង Washington ដែលនេះជាយប់ដ៏គួរឲ្យខ្លាចនៃការកើតមានអំពើហិង្សាដោយការប្រើប្រាស់កាំភ្លើង។នគរបាលបាននិយាយថា យ៉ាងហោចណាស់មនុស្សម្នាក់បានស្លាប់ និង ២២នាក់ទៀតបានរងរបួស នៅឯហាងលក់ទំនិញមួយកន្លែង នៅ Willowbrook រដ្ឋ Illinois ជាយក្រុងភាគនិរតីនៃទីក្រុង Chicago។ អាជ្ញាធរ បានពណ៌នាការជួបជុំនេះថា ជា «ការប្រារព្ធទិវា ១៩មិថុនា» ដោយស្ងប់ស្ងាត់ ដែលបានចាប់ផ្តើមនៅវេលាម៉ោង ៦ល្ងាចថ្ងៃសៅរ៍។នាយរងនគរបាលលោក Eric Swanson បាននិយាយកាលពីព្រឹកថ្ងៃអាទិត្យថា សាក្សី និងរបាយការណ៍ពីជនរងគ្រោះបឋម បានបង្ហាញថា មានមនុស្សយ៉ាងហោចណាស់ ២០នាក់ ត្រូវបានរងការបាញ់ប្រហារ ហើយនៅពេលនេះជនរងគ្រោះម្នាក់បានស្លាប់ហើយ។ លោកបន្តថា ជនរងគ្រោះត្រូវបានបញ្ជូនទៅកាន់មន្ទីរពេទ្យក្បែរនោះ ហើយថាឈ្មោះ និងអាយុរបស់អ្នកទាំងនោះមិនទាន់ដឹងនៅឡើយទេ។ មនុស្សមួយចំនួនបានរងរបួសផងដែរ ពេលរត់គេចខ្លួន ប៉ុន្តែមិនមែនត្រូវបានបាញ់ដោយគ្រាប់កាំភ្លើងនោះឡើយ។ លោកបានបន្ថែមថា មូលហេតុដែលនៅពីក្រោយការបាញ់ប្រហារនេះ គេនៅមិនទាន់ដឹងច្បាស់លាស់ទេ ហើយករណីនេះនៅតែស៊ើបអង្កេតយ៉ាងសកម្ម។ក្នុងហេតុការណ៍មួយទៀត មនុស្ស ២នាក់ បានស្លាប់ និង ៣នាក់ផ្សេងទៀត បានរងរបួស ជាច្រើនម៉ោងនៅមុនពេលប្រារព្ធពិធីបុណ្យតន្ត្រីរាំកម្សាន្តមួយ «Beyond Wonderland» ក្នុងរដ្ឋវ៉ាស៊ីនតោន។ នៅទីនោះ នគរបាលបាននិយាយថា មាននរណាម្នាក់ បានបាញ់រះសំដៅទៅហ្វូងមនុស្សនៅកន្លែងបោះជំរុំក្បែរ Gorge Amphitheatre ក្នុងទីក្រុងតូចមួយ George ចម្ងាយប្រហែល ១៥០ម៉ាយល៍ (ប្រមាណជាង ២៤១គីឡូម៉ែត្រ) ភាគខាងកើតទីក្រុង Seattle (ស៊ីអាតថល)។ដោយឡែកនគរបាលក្រុង St. Louis (សេន ល្វីស) បានឲ្យដឹងថា ការបាញ់ប្រហារដ៏សាហាវមួយ បានកើតឡើងនៅក្រោយម៉ោង ១ទៀបភ្លឺ ក្នុងទីក្រុងនេះ ហើយហេតុការណ៍នោះ បានបណ្ដាលឲ្យមនុស្សម្នាក់បាត់បង់ជីវិត និង ៩នាក់ផ្សេងទៀត បានរងរបួស។ នគរបាល បានបន្ថែមកាលពីថ្ងៃអាទិត្យថា ជនរងគ្រោះមានអាយុចន្លោះពី ១៥ឆ្នាំទៅ ១៩ឆ្នាំ ដោយនាយនគរបាល លោក Robert Tracy បានប្រាប់ថា អ្នកដែលបានស្លាប់ មានវ័យ១៧ឆ្នាំ។សូមបញ្ជាក់ថា យោងតាមបណ្ណាសារអំពើហិង្សារដោយកាំភ្លើង (Gun Violence Archive) ដែលជាគម្រោងមិនស្វែងរកប្រាក់ចំណេញដែលតាមដានហេតុការណ៍អាក្រក់នានា បានឲ្យដឹងថា មានការបាញ់ប្រហារទ្រង់ទ្រាយធំចំនួន ៣០៧ករណី ក្នុងឆ្នាំ២០២៣ នៅសហរដ្ឋអាមេរិក៕

គ្រួសារជាច្រើន បញ្ចុះសកសពមនុស្សជាទីស្រលាញ់ បន្ទាប់ពីមនុស្ស ៣៧ នាក់ស្លាប់ក្នុងការវាយប្រហារលើសាលារៀន នៅអ៊ុយហ្គង់ដា

អ៊ុយហ្គង់ដា៖ សមាជិកគ្រួសារជាច្រើនបានបញ្ចុះសាកសពមនុស្សជាទីស្រលាញ់របស់ពួកគេកាលពីថ្ងៃអាទិត្យ ទី១៨ ខែមិថុនា បន្ទាប់ពីអ្នកវាយប្រហារដោយក្រុមដែលមានទំនាក់ទំនងជាមួយក្រុមរដ្ឋអ៊ីស្លាមបានសម្លាប់សិស្សសាលាអនុវិទ្យាល័យយ៉ាងហោចណាស់ ៣៧ នាក់ នៅប្រទេសអ៊ុយហ្គង់ដា។សមាជិកនៃកងកម្លាំងប្រជាធិបតេយ្យសម្ព័ន្ធមិត្តរបស់ក្រុមឧទ្ទាម បានសម្លាប់សិស្សកាលពីល្ងាចថ្ងៃសុក្រ នៅសាលាអនុវិទ្យាល័យ Lhubirira ក្នុងទីក្រុងអឹមផន់វ៉េ(Mpondwe) ជិតព្រំដែនជាមួយសាធារណរដ្ឋប្រជាធិបតេយ្យកុងហ្គោ។យោធា និងនគរបាល បាននិយាយថា អ្នកវាយប្រហារក៏បានចាប់ពង្រាត់សិស្សចំនួន ៦ នាក់ ហើយបានរត់គេចខ្លួនទៅកាន់ឧទ្យានជាតិ Virunga ឆ្លងព្រំដែន។ ជោគវាសនារបស់សិស្សទាំង៦នាក់នៅពុំទាន់ដឹងនៅឡើយ។អាជ្ញាធរបាននិយាយថា ទាហានកាន់តែច្រើនបានចូលរួមក្នុងការស្វែងរកនៅក្នុងតំបន់ដែលរួមមានភ្នំ Rwenzori ពីកន្លែងដែលកម្លាំងប្រជាធិបតេយ្យសម្ព័ន្ធមិត្តរបស់ក្រុមឧទ្ទាម (ADF) បានចាប់ផ្តើមការបះបោររបស់ពួកគេប្រឆាំងប្រធានាធិបតីអ៊ុយហ្គង់ដាលោក Yoweri Museveni ក្នុងទសវត្សរ៍ឆ្នាំ ១៩៩០ ។អ្នកនាំពាក្យក្រសួងការពារជាតិលោក Felix Kulayigye បាននិយាយនៅក្នុងសេចក្តីថ្លែងការណ៍ថា បុគ្គលិកយោធាបានឃើញសាកសពអ្នកស្លាប់នៅពេលពួកគេទៅដល់សាលារៀន។ នគរបាលនិយាយថា មនុស្សប្រាំបីនាក់ផ្សេងទៀតកំពុងស្ថិតនៅក្នុងមន្ទីរពេទ្យដោយមានរបួសធ្ងន់ធ្ងរ បន្ទាប់ពីការវាយប្រហារ។នគរបាលនិងយោធាបាននិយាយថា ក្រុមអ្នកវាយប្រហារមានចំនួនប្រហែលប្រាំនាក់ បានដុតបំផ្លាញអន្តេវាសិកដ្ឋាន និងលួចយកអាហារ៕

ព្យុះស៊ីក្លូនបណ្តាលឲ្យមនុស្ស ១៣ នាក់ស្លាប់នៅភាគខាងត្បូងប្រទេសប្រេស៊ីល

ប្រេស៊ីល៖ យោងតាមអាជ្ញាធររដ្ឋបានឲ្យដឹងថា មនុស្សយ៉ាងហោចណាស់ ១៣ នាក់បានស្លាប់នៅក្នុងរដ្ឋ Rio Grande do Sul (រីយ៉ូ គ្រែន ឌូ ស៊ូល) ភាគខាងត្បូងប្រទេសប្រេស៊ីល បន្ទាប់ពីព្យុះស៊ីក្លូនត្រូពិចដ៏ខ្លាំងក្លា បានវាយប្រហារតំបន់នេះកាលពីថ្ងៃសុក្រ ទី១៦ ខែមិថុនា។រដ្ឋាភិបាលទីក្រុង Rio Grande do Sul បាននិយាយនៅក្នុងសេចក្តីប្រកាសព័ត៌មានថា ព្យុះនេះបានបណ្តាលឱ្យមានភ្លៀងធ្លាក់ខ្លាំង ហើយការស្វែងរករបស់ឧទ្ធម្ភាគចក្រកំពុងធ្វើឡើងនៅក្នុងស្រុកជិតខាងដែលជន់លិចដោយទឹកជំនន់ ដើម្បីស្វែងរកមនុស្ស ៥ នាក់ផ្សេងទៀតដែលបានបាត់ខ្លួន។ក្រៅពីការបញ្ជូនជំនួយតាមឧទ្ធម្ភាគចក្រ នៅតាមទីទីក្រុងលិចទឹកមួយចំនួន ក្រុមអ្នកជួយសង្គ្រោះបានប្រើទូកដើម្បីអាចជួយពលរដ្ឋដែលរងផលប៉ះពាល់។ វាជាការវាយប្រហារដ៏អាក្រក់បំផុតមួយនៅលើផ្លូវរបស់ព្យុះស៊ីក្លូនគឺទីក្រុង Caraa ដែលមានប្រជាជនជាង ៨,០០០ នាក់។អាជ្ញាធរបាននិយាយថា គិតត្រឹមយប់ថ្ងៃសុក្រ ក្រុង Maquine(ម៉ាគីន) ជាទីក្រុងនៅឆ្នេរសមុទ្រភាគខាងកើតបានទទួលទឹកភ្លៀងប្រហែល៣០ សង់ទីម៉ែត្រ។ ពលរដ្ឋជាច្រើននៅក្នុងតំបន់ដែលរងផលប៉ះពាល់បានជ្រកកោននៅក្នុងទីកន្លែងហាត់កីឡា នៅទីក្រុងរបស់ពួកគេ។ អាជ្ញាធរបានចេញការព្រមានអំពីហានិភ័យនៃបំណាក់ដីនៅតំបន់មួយចំនួន។ អភិបាលរដ្ឋលោក Eduardo Leite បាននិយាយថា សម្រាប់ពេលនេះ អាទិភាពគឺការជួយសង្គ្រោះប្រជាជន និងការពារអ្នកទាំងឡាយណាដែលរងផលប៉ះពាល់។ លោកបាននិយាយថា ការងារកសាងឡើងវិញនឹងចាប់ផ្តើមនៅពេលបន្ទាប់។ ទឹកជំនន់ធ្ងន់ធ្ងរនៅក្នុងប្រទេសប្រេស៊ីលគឺជារឿងធម្មតា ហើយបណ្តាលឱ្យមានការបំផ្លិចបំផ្លាញជាច្រើនទសវត្សរ៍មកហើយ។

លោក Blinken នឹងជួបអ្នកការទូតកំពូលនិងប្រធានាធិបតីចិន នៅថ្ងៃចន្ទនេះ ក្រោយការពិភាក្សាជាមួយប្រមុខការទូតចិន

អាមេរិក៖ ប្រមុខការទូតអាមេរិក លោក Antony Blinken នឹងជួបអ្នកការទូតជាន់ខ្ពស់ និងអាចជួបប្រធានាធិបតីចិននៅថ្ងៃចន្ទនេះ ជាថ្ងៃចុងក្រោយនៃដំណើរទស្សនកិច្ចដ៏កម្រទៅកាន់ទីក្រុងប៉េកាំង ក្នុងគោលបំណងទប់ស្កាត់ការមិនឯកភាពគ្នាជាច្រើនរបស់គូប្រជែងជាយុទ្ធសាស្រ្ត កុំឲ្យទំនាក់ទំនងកាន់តែដុនដាបថែមទៀត។ជាប្រមុខការទូតដំបូងរបស់សហរដ្ឋអាមេរិក ដែលបានទៅបំពេញទស្សនកិច្ចក្នុងប្រទេសចិន រយៈពេល៥ឆ្នាំមកនេះ លោក Blinken បានជួបពិភាក្សាប្រកបដោយភាពស្មោះត្រង់ និងស្ថាបនា រយៈពេល៧ម៉ោងកន្លះ ជាមួយប្រមុខការទូតចិន លោក ឈីន កាង (Qin Gang) កាលពីថ្ងៃអាទិត្យ ទោះបី ជាប្រមុខការទូតទាំង២ពី ទំនងពុំបានបង្កើតវឌ្ឍភាពដ៏រឹងមាំស្ដីពីជម្លោះនានា ដែលរួមទាំង បញ្ហាកោះតៃវ៉ាន់ ពាណិជ្ជកម្ម សិទ្ធិមនុស្ស និង ការនាំចូលទំនិញខុសច្បាប់ជាដើម ក៏ដោយក្ដី ។ ភាគីទាំង២ បានបង្ហាញបំណងរក្សាទំនាក់ទំនងប្រកបដោយស្ថិរភាពទោះបីជាមន្ត្រីអាមេរិកមួយរូបបានហៅ ថាជាការខ្វែងគំនិតដ៏ជ្រៅក៏ដោយ និងបានឯកភាពថា លោកឈីន នឹងទៅបំពេញទស្សនកិច្ចក្នុងទីក្រុងវ៉ាស៊ីនតោន ដើម្បីបន្តការសន្ទនា បន្ថែមទៀត ត្បិតពុំបានប្រកាសពីកាលបរិច្ឆេទក៏ដោយ។ លោក Blinken នឹងជួបប្រមុខការទូតជាន់ខ្ពស់របស់ចិន លោក Wang Yi នៅថ្ងៃចន្ទនេះ ប៉ុន្តែ មានការផ្ដោតខ្លាំងទៅលើបញ្ហាថាតើលោកនឹងជួបលោកប្រធានាធិបតីចិន Xi Jinping ឬអត់ ។ ខណៈដែលភាគីទាំង២ បាននិយាយថា ការពិភាក្សាកាលពីថ្ងៃអាទិត្យ ប្រកបដោយការស្ថាបនា ប្រមុខការទូតទាំង២ទំនងជាបានព្រមព្រៀងតិចតួច ក្រៅតែពីការសន្ទនាដែលនឹងបន្តនៅឯជំនួបចុងក្រោយក្នុងទីក្រុងវ៉ាស៊ីនតោន និងកំពុងធ្វើការដើម្បីបង្កភាពងាយស្រួលសម្រាប់ពលរដ្ឋរបស់ប្រទេសទាំង២ក្នុងការធ្វើដំណើរទៅវិញទៅមករវាងប្រទេសទាំង២៕

ព្យុះស៊ីក្លូន Biparjoy បោកបក់ដល់ដីគោកដែលនាំមកនូវភ្លៀងធ្លាក់ខ្លាំងដល់ប្រទេសឥណ្ឌា និងប៉ាគីស្ថាន

ប៉ាគីស្ថាន៖ ព្យុះស៊ីក្លូនត្រូពិក Biparjoy បានបោកបក់ដល់ដីគោកនៅរដ្ឋ Gujarat ភាគខាងលិចប្រទេសឥណ្ឌា នៅជិតព្រំដែនប៉ាគីស្ថាន ដោយបានបញ្ចេញខ្យល់បក់បោកយ៉ាងខ្លាំងដែលបានធ្វើឲ្យបាក់ដើមឈើ និង រលំបង្គោលភ្លើងជាច្រើន។ពេលបោកបក់ដីគោក ព្យុះ Biparjoy មានកម្លាំងស្មើនឹងព្យុះត្រូពិចដ៏ខ្លាំងក្លាមួយដែលមានល្បឿនខ្យល់បក់ ៦៥ ម៉ាយក្នុងមួយម៉ោង (១០០ គីឡូម៉ែត្រក្នុងមួយម៉ោង) នេះបើយោងតាមមជ្ឈមណ្ឌលព្រមានអំពីព្យុះទីហ្វុងរួមគ្នា។ខណៈដែលព្យុះនេះរំកិលទៅលើដីបន្តិចម្តងៗ ល្បឿនខ្យល់និងការគំរាមកំហែងនៃកំណើនព្យុះត្រូវបានគេរំពឹងថានឹងថយចុះ ដោយទឹកជំនន់ក្លាយជាផលប៉ះពាល់ដ៏ធំបំផុតសម្រាប់មនុស្សរាប់លាននាក់ក្នុងរយៈពេល ៤៨ ម៉ោងខាងមុខ។ការព្រមានអំពីភ្លៀងធ្លាក់ខ្លាំងត្រូវបានគេរំពឹងថានឹងនៅតែមានសម្រាប់ភាគពាយ័ព្យនៃប្រទេសឥណ្ឌារហូតដល់ថ្ងៃសៅរ៍។ កម្រិតទឹកភ្លៀងពី ១៥០ ទៅ ២៥០ មីលីម៉ែត្រ (៦ ទៅ ១០ អ៊ីង) ទំនងជាមានកើនឡើងខ្ពស់រហូតដល់ ៥០០ មីលីម៉ែត្រ (២០ អ៊ីញ)។នៅក្នុងប្រទេសប៉ាគីស្ថាន នាយកដ្ឋានឧតុនិយមបានព្រមានអំពីព្យុះធូលី និងព្យុះផ្គររន្ទះដែលរីករាលដាលនៅក្នុងខេត្ត Sindh ភាគខាងត្បូង ជាមួយនឹងភ្លៀងធ្លាក់ខ្លាំង ព្រមទាំងខ្យល់បក់ខ្លាំងក្នុងល្បឿន ៥០ទៅ៦០ ម៉ាយក្នុងមួយម៉ោង (៨០ទៅ១០០ គីឡូម៉ែត្រក្នុងមួយម៉ោង)។នៅមុនពេលព្យុះនេះមកដល់ ទាំងឥណ្ឌា និងប៉ាគីស្ថានបានអនុវត្តវិធានការសុវត្ថិភាពដ៏តឹងរឹង ដើម្បីធានាឱ្យមានការខូចខាត និងការបាត់បង់អាយុជីវិតតិចតួចបំផុត។ យោងតាមក្រុមអាជ្ញាធរបានឱ្យដឹងថា មនុស្សប្រហែល ១៨០.០០០ នាក់ត្រូវបានជម្លៀសចេញពីតំបន់ដែលរងផលប៉ះពាល់ខ្លាំងនៅទូទាំងប្រទេសទាំងពីរនេះ៕

ជិតមួយភាគបីនៃពលករបម្រើការងារតាមផ្ទះក្នុងប្រទេសម៉ាឡេស៊ីស្ថិតក្នុងលក្ខខណ្ឌពលកម្មដោយបង្ខំ

ម៉ាឡេស៊ី៖ ជិតមួយភាគបីនៃពលករអន្តោប្រវេសន៍ដែលធ្វើការតាមផ្ទះនៅក្នុងប្រទេសម៉ាឡេស៊ីកំពុងធ្វើការក្រោមលក្ខខណ្ឌពលកម្មដោយបង្ខំ នេះបើយោងតាមការស្ទង់មតិដែលចេញផ្សាយដោយទីភ្នាក់ងារពលកម្មរបស់អង្គការសហប្រជាជាតិកាលពីថ្ងៃព្រហស្បតិ៍។អង្គការពលកម្មអន្តរជាតិ (ILO) បានកំណត់លក្ខខណ្ឌដូចជា ការធ្វើការលើសម៉ោង ការងារថែមម៉ោងដោយមិនមានប្រាក់បន្ថែម ប្រាក់ឈ្នួលទាប ច្បាប់ការងារតឹងរឹង និងមិនអាចឈប់ពីការងារ ក្នុងចំណោមសូចនាករនៃពលកម្មដោយបង្ខំ។ការស្ទង់មតិដែលផ្អែកលើការសម្ភាសន៍ជាមួយពលករតាមផ្ទះចំនួន ១.២០១ នាក់នៅអាស៊ីអាគ្នេយ៍ បានរកឃើញថា ២៩% នៃពលករនៅក្នុងប្រទេសម៉ាឡេស៊ី បានប្រឈមនឹងលក្ខខណ្ឌការងារបែបនេះ ធៀបនឹង ៧%នៅប្រទេសសិង្ហបុរី និង ៤% នៅក្នុងប្រទេសថៃ ។អង្គការពលកម្មអន្តរជាតិ ILO បាននិយាយថា ទោះជាយ៉ាងនេះក្តី នៅក្នុងប្រទេសទាំងបីនេះ ពលករតាមផ្ទះដែលត្រូវបានធ្វើការស្ទង់មតិលើម៉ោងធ្វើការជាមធ្យម ដោយពួកគេធ្វើការ "លើសម៉ោង" នៃច្បាប់សម្រាប់ពលករផ្សេងទៀត ហើយគ្មាននរណាម្នាក់ទទួលបានប្រាក់ឈ្នួលអប្បបរមានោះទេ៕

ចិនយល់ឃើញថាដំណើរទស្សនកិច្ចមកកាន់ទីក្រុងប៉េកាំងរបស់លោក Blinkenប្រកបដោយការមិនទុកចិត្ត និងការរំពឹងទុកពីលទ្ធផលតិចតួច

ចិន៖ ស្របពេលដែលរដ្ឋមន្រ្តីការបរទេសសហរដ្ឋអាមេរិកលោក Antony Blinken នឹងបំពេញដំណើរទស្សនកិច្ចដែលពន្យារពេលយូររបស់លោកទៅកាន់ប្រទេសចិននៅចុងសប្តាហ៍នេះ មានគោលដៅធ្វើឲ្យមានស្ថិរភាពសម្រាប់ទំនាក់ទំនងដ៏តានតឹងរវាងប្រទេសមហាអំណាចទាំង ២របស់ពិភពលោកនោះ អារម្មណ៍នៅទីក្រុងប៉េកាំងហាក់ដូចជាមិនចង់ទទួលស្វាគមន៍នោះទេ ។ រយៈពេលប៉ុន្មានថ្ងៃមុនការចាកចេញរបស់ខ្លួន ប្រមុខការទូតសហរដ្ឋអាមេរិករូបនេះ ទទួលបានការស្តីបន្ទោសយ៉ាងខ្លាំងពីប្រទេសម្ចាស់ផ្ទះចិន ដែលតែងតែថ្កោលទោសទីក្រុងវ៉ាស៊ីងតោន សម្រាប់ការកើនឡើងភាពតានតឹងកាលពីពេលថ្មីៗនេះ បន្ទាប់ពីលោក Blinken លុបចោលដំណើរទស្សនកិច្ចមុនរបស់លោក កាលពីខែកុម្ភៈ ដោយសារបញ្ហាបាឡុងចារកម្មរបស់ចិន ដែលបានហោះលើដែនអាកាសសហរដ្ឋអាមេរិក ។ នៅក្នុងជំនួបតាមទូរស័ព្ទជាមួយលោក Blinken រដ្ឋមន្រ្តីការបរទេសចិនលោក Qin Gang បានជំរុញឲ្យសហរដ្ឋអាមេរិកបង្ហាញការគោរពចំពោះក្តីកង្វល់ស្នូលរបស់ទីក្រុងប៉េកាំង និងបញ្ឈប់ការជ្រៀតជ្រែកលើកិច្ចការផ្ទៃក្នុងរបស់ពួកគេ ។ ទោះបីជាយ៉ាងណាក៏ដោយ សារព័ត៌មានរដ្ឋចិន ហាក់ដូចជាស្ងាត់ស្ងៀមរយៈពេលប៉ុន្មានថ្ងៃកន្លងមកនេះ ចំពោះដំណើរទស្សនកិច្ចរបស់មន្រ្តីជាន់ខ្ពស់បំផុតរបស់សហរដ្ឋអាមេរិក ក្នុងរយៈពេល ៥ឆ្នាំ ។ លោក Yun Sun គឺជាប្រធានកម្មវិធី China Program នៅមជ្ឈមណ្ឌល Stimson ដែលជាក្រុមស្រាវជ្រាវនៅទីក្រុងវ៉ាស៊ីងតោន និយាយថា ការផ្សាយដំណើរទស្សនកិច្ចរបស់លោក Blinkenនៅចិន ពុំទូលំទូលាយ ឬចាប់អារម្មណ៍ដូចនៅលោកខាងលិចនោះទេ ៕

បណ្ដាញសង្គម

ព័ត៌មានថ្មីៗ

អ្នកស្រុករស់នៅទីក្រុងដាម៉ាសវាយតម្លៃផលប៉ះពាល់ ខណៈការចំណាយកើនឡើងដោយសារជម្លោះនៅមជ្ឈិមបូព៌ា

សិស្សសាលាស៊ូដង់មិនបានចូលរៀនជាច្រើនឆ្នាំ ដោយសារសង្គ្រាម

អ៊ីស្រាអែលនឹងដោះលែងអ្នកជាប់ឃុំប៉ាឡេស្ទីនដែលរងរបួសធ្ងន់

ចំនួនមនុស្សស្លាប់ក្នុងឧបទ្ទេវហេតុលិចទូកនៅឥណ្ឌា កើនឡើងដល់ ៦នាក់

អាមេរិកចាប់ផ្តើមឡើងវិញជើងហោះហើរដឹកអ្នកដំណើរទៅកាន់វេណេស៊ុយអេឡា ក្រោយផ្អាករយៈពេល ៧ឆ្នាំ

លោក Trumpនិយាយថា លោកប្រហែលជាដកទាហានសហរដ្ឋអាមេរិកចេញពីអ៊ីតាលី និងអេស្ប៉ាញ

ជំរំរដ្ឋ Texas ជាទីដែលទឹកជំនន់សម្លាប់មនុស្ស ២៨នាក់ ផ្អាកផែនការបើកឡើងវិញក្នុងរដូវក្តៅនេះ

ជនសង្ស័យត្រូវបានឃាត់ខ្លួន ក្រោយមនុស្ស ៦នាក់ រងការចាក់ដោយកាំបិតនៅវិទ្យាល័យរដ្ឋវ៉ាស៊ីនតោន សហរដ្ឋអាមេរិក

មនុស្សរាប់ពាន់នាក់នាំគ្នាតវ៉ាក្នុងទីក្រុងម៉ានីល នៅទិវាពលកម្មអន្តរជាតិ ដោយទាមទារដំឡើងប្រាក់ខែ និងបញ្ចប់ជម្លោះមជ្ឈិមបូព៌ា

នាយករដ្ឋមន្ត្រីស្លូវ៉ាគី និយាយថា EU សួរសំណួរអំពីកិច្ចពិភាក្សារបស់លោកជាមួយលោក PUTIN

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877