BTV NEWS

តំណាងអយ្យការសម្រេចចោទប្រកាន់មន្ត្រីក្រសួងការបរទេស៣រូបពាក់ព័ន្ធករណីលួចទិដ្ឋាការឲ្យជនបរទេសដែលជាពួក online scams

ជនជាតិវៀតណាម ៤៧នាក់ ពាក់ព័ន្ធករណីឆបោកតាមប្រព័ន្ធបច្ចេកវិទ្យា និងបទល្មើសផ្សេងៗទៀត ត្រូវបានបណ្ដាញចេញពីកម្ពុជា

កម្ពុជា-អាម៉េរិក បង្ក្រាបឧក្រិដ្ឋកម្មគ្រឿងញៀនឆ្លងដែន : ចាប់ខ្លួនជនបរទេសជាច្រើននាក់ រឹបអូសសារធាតុគីមីសម្រាប់ផលិតគ្រឿងញៀនច្រើនជាង១តោន និងគ្រឿងញៀនខុសច្បាប់ជាង២០០គីឡូក្រាម

បុរសម្នាក់ ត្រូវបាននគរបាលឃាត់ខ្លួន បញ្ជូនទៅស្នងការដ្ឋាននគរបាលរាជធានីភ្នំពេញ ពាក់ព័ន្ធករណីវាយម្ចាស់រថយន្ត រងរបួស

សន្តិសុខ និង សង្គម

នាយករដ្ឋមន្ត្រីអ៊ីស្រាអែល ព្រមានវាយលុកក្រុងរ៉ាហ្វា ទោះមាន ឬគ្មានកិច្ចព្រមព្រៀងបទឈប់បាញ់ក្ដី

លោកនាយករដ្ឋមន្ត្រីអ៊ីស្រាអែល Benjamin Netanyahu បានប្តេជ្ញាកាលពីថ្ងៃអង្គារ ៣០ មេសា ថា ខ្លួននឹងបើកការវាយលុកលើទីក្រុង រ៉ាហ្វា (Rafah) ភាគខាងត្បូងក្នុងដែនដីហ្កាហ្សាស្ទ្រីប ទោះមាន ឬគ្មានកិច្ចព្រមព្រៀងបទឈប់បាញ់ជាមួយក្រុមហាម៉ាសក៏ដោយ។ នាយករដ្ឋមន្ត្រី ដែលកំពុងរងសម្ពាធទាំងក្នុងស្រុក និងអន្តរជាតិ រូបនេះ បានចេញការព្រមាននេះ ទោះបីមានការព្រួយបារម្ភយ៉ាងខ្លាំងលើកឡើងដោយទីក្រុងវ៉ាស៊ីនតោន ដែលជាសម្ព័ន្ធមិត្តសំខាន់បំផុតរបស់ខ្លួនក្ដី និងប៉ុន្មានម៉ោងមុនពេលរដ្ឋមន្ត្រីការបរទេសអាមេរិកលោក លោកAntony Blinken ទៅដល់ប្រទេសអ៊ីស្រាអែលក្នុងដំណើរចុងក្រោយរបស់លោកដើម្បីដោះស្រាយវិបត្តិនៅមជ្ឈិមបូព៌ា។ លោក Netanyahu ដែលបានប្តេជ្ញាថានឹងកម្ទេចក្រុមហាម៉ាស ក្រោយការវាយប្រហារកាលពីថ្ងៃទី៧ខែតុលា បានសន្យាប្រយុទ្ធលុះត្រាទទួលជ័យជម្នះទាំងស្រុង ហើយបាននិយាយថាការបញ្ឈប់សង្រ្គាម មុនពេលសម្រេចបានគោលដៅទាំងអស់គឺមិនអាចទៅរួចឡើយ ។ ការិយាល័យរបស់លោកបាននិយាយថា លោកនាយករដ្ឋមន្ត្រី បានប្រាប់ក្រុមគ្រួសាររបស់ចំណាប់ខ្មាំងមួយចំនួនដែលនៅតែត្រូវបានឃុំខ្លួននៅក្នុងដែនដីហ្កាហ្សាថាយើងនឹងចូលទៅក្នុងតំបន់ រ៉ាហ្វា ហើយយើងនឹងលុបបំបាត់កងវរសេនាតូចហាម៉ាសនៅទីនោះ ទោះមាន ឬគ្មានកិច្ចព្រមព្រៀងក៏ដោយ។ ការអត្ថាធិប្បាយរបស់លោក Netanyahu បានកើតឡើង ខណៈក្រុមហាម៉ាស កំពុងថ្លឹងថ្លែងផែនការចុងក្រោយសម្រាប់បទឈប់បាញ់ដែលបានស្នើឡើងនៅក្នុងកិច្ចពិភាក្សានៅទីក្រុងគែរ(Cairo) ប្រទេសអេហ្ស៊ីប ជាមួយក្រុមអ្នកសម្របសម្រួលអាមេរិក អេហ្ស៊ីប និងកាតា ដែលបានលើកឡើងពីក្តីសង្ឃឹមយ៉ាងប្រុងប្រយ័ត្នសម្រាប់ការបញ្ចប់ការប្រយុទ្ធគ្នា បន្ទាប់ពីសង្រ្គាមមានរយៈពេលជិត៧ខែ៕

កម្មករសំណង់ឥណ្ឌា ប្រឈមស្ថានភាពការងារធ្ងន់ធ្ងរខ្លាំង ដោយសាររលកកម្ដៅខ្លាំងពេក

រលកកម្ដៅដ៏ក្ដៅបំផុតនៅក្នុងទីក្រុងកូលកាតា(Kolkata)ភាគខាងកើតរបស់ប្រទេសឥណ្ឌា បានបង្កបញ្ហាធ្ងន់ធ្ងរយ៉ាងខ្លាំងដល់ពលករ ឬកម្មករសំណង់នៅខាងក្រៅ ខណៈពួកគេធ្វើការនៅការរដ្ឋានសំណង់ផ្សេងៗ ក្រោមកម្ដៅព្រះអាទិត្យដ៏ក្ដៅជាច្រើនម៉ោង ដោយមានពេលសម្រាកបានតិចតួច។ កាលពីថ្ងៃអង្គារ ទី៣០ ខែមេសា សប្ដាហ៍នេះ ក្រុមកម្មករ បាននិយាយថា ការធ្វើការងារនៅក្រោមស្ថានភាពអាកាសធាតុគ្រោះថ្នាក់បែបនេះ អាហារូបត្ថម្ភល្អៗគឺជារឿងចាំបាច់។ កម្មករម្នាក់ លោក បៃយ៉ា ណាត់យ៉ាដាវ (Baidya Nath Yadav)បាននិយាយថា ការជ្រកក្រោមម្លប់ និងទទួលទានភេសជ្ជៈមានសារធាតុគ្លុយកូស គឺជាដំណោះស្រាយដ៏ល្អ ជួយដល់កម្មករសំណង់ ដើម្បីរក្សាកម្រិតថាមពលរបស់ពួកគេ អំឡុងបំពេញការងារ ។ ទីក្រុងនេះ បានកត់ត្រា កម្រិតសីតុណ្ហភាពអតិបរ ៤២អង្សាសេ ខណៈការិយាល័យអាកាសធាតុ បានចេញការប្រកាសអាសន្ន សម្រាប់កម្ដៅក្ដៅខ្លាំងបន្ថែមទៀត និងសំណើមក្ដៅ ជាងធម្មតា រវាងខែមេសា និងខែមិថុនា។ មនុស្ស២នាក់ បានស្លាប់ នៅក្នុងរដ្ឋកេរ៉ាឡា(Kerala)ប្រទេសឥណ្ឌា កាលពីថ្ងៃទី២៩ខែមេសា ដោយគេសង្ស័យថាស្លាប់ដោយសារក្ដៅខ្លាំងពេក ។ ក្រុមអ្នកវិទ្យាសាស្ត្រ បាននិយាយថា បម្រែបម្រួលអាកាសធាតុ ជាកត្តាជំរុញឲ្យមានរលកកម្ដៅកាន់តែញឹកញាប់ ធ្ងន់ធ្ងរ និងមានរយៈពេលយូរ អំឡុងរយៈពេលប៉ុន្មានខែនៃរដូវក្ដៅនេះ៕

ពលរដ្ឋវៀតណាម ស្នាក់នៅក្នុងផ្ទះ អំឡុងពេលវិស្សមកាល ដើម្បីគេចពីរលកកម្ដៅខ្លាំង

អ្នកស្រុកជាច្រើននៅទីក្រុងហាណូយបានជ្រើសរើសការចំណាយពេលវិស្សមកាលនៃទិវាបង្រួបបង្រួមជាតិរបស់ពួកគេស្នាក់នៅក្នុងផ្ទះកាលពីថ្ងៃអង្គារ ថ្ងៃទី៣០ ខែមេសា ខណៈប្រទេសវៀតណាមបានជួបប្រទះរលកកម្ដៅក្ដៅបំផុត ដោយមានសីតុណ្ហភាពកើនឡើងដល់ ៤៤ អង្សាសេ នៅក្នុងតំបន់មួយចំនួនរបស់ប្រទេសនេះ។ ថ្ងៃឈប់សម្រាកជាសាធារណៈ ដែលជាថ្ងៃរំលឹកខួបនៃការបង្រួបបង្រួមវៀតណាមខាងត្បូង និងខាងជើងក្នុងឆ្នាំ ១៩៧៥ ជាធម្មតាគេតែងមើលឃើញទីធ្លាសាធារណៈនានាពោរពេញដោយភ្ញៀវទេសចរកាលពីឆ្នាំមុនៗ។ឆ្នាំនេះ ភ្ញៀវទេសចរជាច្រើនកំពុងស្វែងរកទីជម្រកក្នុងម្លប់ ដើម្បីគេចពីកម្ដៅព្រះអាទិត្យដ៏ក្ដៅ ដែលធ្វើឲ្យផ្លូវនានាក្នុងទីក្រុងហាណូយស្ទើរតែគ្មានមនុស្សតាមផ្លូវ។ អ្នកធ្វើដំណើរតាមទោចក្រយានយន្ត ក៏ត្រូវបានគេមើលឃើញពាក់អាវដៃវែងផងដែរ ដើម្បីការពារស្បែករបស់ពួកគេពីកម្ដៅព្រះអាទិត្យដ៏ក្ដៅដោយផ្ទាល់។ លោកឌីញវ៉ាន់ហ៊ើយ( Dinh Van Hieu)វ័យ៥៤ ឆ្នាំ អ្នករត់ស៊ីក្លូ បានប្រាប់សារព័ត៌មាន Reuters កាលពីថ្ងៃអង្គារថា កម្ដៅខ្លាំងបានប៉ះពាល់ដល់អាជីវកម្មរបស់លោក ដោយបន្ថែមថារឿងតែមួយគត់ដែលលោកអាចធ្វើបាន គឺជ្រកនៅក្រោមដើមឈើដើម្បីគេចពីកម្ដៅព្រះអាទិត្យ។ ទីភ្នាក់ងារព្យាករណ៍អាកាសធាតុជាតិរបស់ប្រទេសវៀតណាមបានព្រមានពីហានិភ័យនៃចំហេះព្រៃ ការខ្សោះជាតិទឹក និងការដួសន្លប់ដោយសារកម្ដៅក្ដៅខ្លាំងពេក ។ ប្រភពដដែលនេះ បាននិយាយថា សីតុណ្ហភាពអតិបរិមានៅក្នុងតំបន់មួយចំនួននៃភាគខាងជើង និងកណ្តាលប្រទេសវៀតណាម មានចាប់ពី៤០,២ ដល់៤៤ អង្សាសេ ក្នុងរយៈពេលប៉ុន្មានថ្ងៃកន្លងមកនេះ ដោយបន្ថែមថាសីតុណ្ហភាពនឹងមិនធ្លាក់ចុះទេ រហូតដល់ដើមខែឧសភានេះ ៕

ហ្ស៊កហ្ស៊ី ត្រូវបានចលាចលដោយសារការប៉ះទង្គិចគ្នាជុំវិញសេចក្ដីស្នើច្បាប់ ភ្នាក់ងារបរទេស

នគរបាលបង្ក្រាបកុបកម្មនៅក្នុងប្រទេសហ្ស៊កហ្ស៊ី បានបាញ់ឧស្ម័នបង្ហៀរទឹកភ្នែក និងកាណុងបាញ់ទឹក ដើម្បីបំបែកហ្វូងមនុស្សកំពុងតវ៉ាប្រឆាំងសំណើច្បាប់នេះ ដែលក្រុមប្រឆាំងមើលឃើញថា សំដៅលើសេរីភាពសារព័ត៌មាន។ ក្រុមបាតុករបានគប់ស៊ុត និងដបទឹកលើកងកម្លាំងនគរបាលនៅខាងក្រៅសភាក្នុងរដ្ឋធានី ប៊ីលីស៊ី (Tbilisi)។ ក្រុមមនុស្សបានដកថយ ប៉ុន្តែការប៉ះទង្គិចគ្នានៅតែបន្តនៅលើវិថី រ៉ាស្តាវ៉េលី(Rustaveli)កាលពីល្ងាចថ្ងៃអង្គារទី៣០ខែមេសា។មនុស្សមួយចំនួនត្រូវបានរាយការណ៍ថាបានរងរបួស និងត្រូវបានឃុំខ្លួន។កាលពីថ្ងៃទី១៧មេសា កន្លងទៅសមាជិកសភាបានផ្តល់ការគាំទ្រដំបូងចំពោះសំណើច្បាប់ស្ដីពីភ្នាក់ងារបរទេស។ នៅក្រោមច្បាប់ដែលស្នើឡើងដោយគណបក្សកាន់អំណាចក្ដីសុបិនហ្ស៊កហ្ស៊ី (Georgian Dream) បណ្ដាអង្គការមិនមែនរដ្ឋាភិបាល (NGOs) និងប្រព័ន្ធផ្សព្វផ្សាយឯករាជ្យដែលទទួលបានមូលនិធិលើសពី ២០% ពីម្ចាស់ជំនួយបរទេស នឹងត្រូវចុះបញ្ជីជាអង្គការទទួលផលប្រយោជន៍ពីអំណាចបរទេស។ ពួកគេក៏ នឹងត្រូវបានត្រួតពិនិត្យដោយក្រសួងយុត្តិធម៌របស់ហ្ស៊កហ្ស៊ីផងដែរ ហើយអាចត្រូវបានបង្ខំឱ្យចែករំលែកព័ត៌មានរសើប ឬប្រឈមការពិន័យជាប្រាក់រហូតដល់ ២៥.០០០ ឡារីហ្ស៊កហ្ស៊ី ស្មើ៩.៤០០ដុល្លារអាមេរិក ។ការអនុម័តច្បាប់នេះនៅក្នុងអំណានលើកដំបូងរបស់ខ្លួនបានបង្កឱ្យមានការតវ៉ាតាមដងផ្លូវជាបន្តបន្ទាប់។ សេចក្តីរាយការណ៍របស់ប្រព័ន្ធផ្សព្វផ្សាយបាននិយាយថា កាលពីថ្ងៃអង្គារសប្ដាហ៍នេះ អ្នកតវ៉ាជាច្រើននាក់បានរងរបួសក្នុងអំឡុងការប៉ះទង្គិចគ្នានៅក្នុងរដ្ឋធានីប៊ីលីស៊ី ៕

សហជីពអាហ្សង់ទីន ធ្វើកូដកម្មប្រឆាំងនឹងកំណែទម្រង់ការងាររបស់រដ្ឋាភិបាល

សហជីពគ្រាប់ធញ្ញជាតិផលិតប្រេង និងសហជីពកម្មករដែនសមុទ្ររបស់ប្រទេសអាហ្សង់ទីន បានធ្វើកូដកម្មកាលពីថ្ងៃចន្ទ (២៩ មេសា) ដើម្បីតវ៉ាចំពោះសេចក្ដីស្នើច្បាប់កំណែទម្រង់ការងារដែលគាំទ្រដោយប្រធានាធិបតីសេរីនិយមជ្រុលនិយម លោក ហាវីយេ មីឡៃ (Javier Milei) ខណៈដែលសមាជិកសភាបានចាប់ផ្តើមការជជែកដេញដោលលើសំណើច្បាប់នោះ។អាហ្សង់ទីន គឺជាប្រទេសនាំចេញសណ្តែកសៀងកែច្នៃដ៏សំខាន់មួយរបស់ពិភពលោក ហើយប្រាក់ចំណូលបានមកពីការនាំចេញទំនិញគឺជាប្រភពរូបិយប័ណ្ណបរទេសដ៏សំខាន់ដែលត្រូវការដើម្បីទូទាត់បំណុល និងហិរញ្ញវត្ថុសម្រាប់ការនាំចូលរបស់រដ្ឋាភិបាលដែលកំពុងជាប់គាំងលើបញ្ហាសាច់ប្រាក់ ស្របពេលមានការធ្លាក់ចុះនៃសេដ្ឋកិច្ចដ៏យូរ។កូដកម្មបានធ្វើឡើងបន្ទាប់ពីសមាជិកសភានៅក្នុងសភាជាន់ទាបរបស់ប្រទេសអាហ្សង់ទីន បានចាប់ផ្តើមការពិភាក្សាលើសេចក្ដីស្នើច្បាប់កំណែទម្រង់សេដ្ឋកិច្ចដ៏ធំចំនួនពីរ ដែលស្នើឡើងដោយលោកប្រធានាធិបតី មីឡៃ ដែលអំពាវនាវឱ្យធ្វើឯកជនភាវូបនីយកម្ម និងគោលនយោបាយសារពើពន្ធកាន់តែតឹងរ៉ឹង ក៏ដូចជាពន្ធលើប្រាក់ខែខ្ពស់ និងកំណែទម្រង់ការងារ។លោក មីឡៃ បានឡើងកាន់អំណាចកាលពីខែធ្នូ ដោយសន្យាកាត់បន្ថយការចំណាយសាធារណៈ និងទប់ស្កាត់អតិផរណាខ្ពស់ ប៉ុន្តែការជំរុញកំណែទម្រង់របស់លោកបានប្រឈមមុខនឹងការតស៊ូយ៉ាងតឹងរឹងពីគូប្រជែងកណ្តាលនិយមឆ្វេង និងបង្កឱ្យមានបាតុកម្មជាបន្តបន្ទាប់៕

បុរសអ៊ុយក្រែន ៣០នាក់បានស្លាប់ ដោយសារព្យាយាមគេចពីការប្រយុទ្ធ តាំងពីសង្គ្រាមចាប់ផ្តើម

អ្នកនាំពាក្យសេវាព្រំដែនអ៊ុយក្រែន បានប្រាប់ទីភ្នាក់ងារសារព័ត៌មាន យ៉ូគ្រីនហ្វម (Ukrinform) ថា បុរសជនជាតិអ៊ុយក្រែនប្រហែល ៣០ នាក់បានស្លាប់ដោយព្យាយាមឆ្លងព្រំដែនចេញពីប្រទេសអ៊ុយក្រែន ដោយខុសច្បាប់ ដើម្បីគេចចេញពីការប្រយុទ្ធគ្នាក្នុងសង្គ្រាមប្រឆាំងនឹងប្រទេសរុស្ស៊ី ដែលបានចាប់ផ្តើមនៅឆ្នាំ២០២២។លោក អាន់ឌ្រី ដេមឈិនកូ (Andriy Demchenko) បាននិយាយថា «អ្នកខ្លះបានបាត់បង់ជីវិត ខណៈពេលដែលពួកគេព្យាយាមឆ្លងទន្លេ ឬឆ្លងកាត់ភ្នំ ហើយសរុបមក ចាប់តាំងពីការលុកលុយពេញលេញបានចាប់ផ្តើម មនុស្សប្រហែល ៣០ នាក់បានស្លាប់ដោយប៉ុនប៉ងឆ្លងដែនខុសច្បាប់»។ជាមួយនឹងករណីលើកលែងមួយចំនួន បុរសជនជាតិអ៊ុយក្រែនដែលមានអាយុចន្លោះពី ១៨ ទៅ ៦០ ឆ្នាំមិនត្រូវបានអនុញ្ញាតឱ្យចាកចេញពីប្រទេសទេ ព្រោះពួកគេអាចត្រូវបានប្រមូលផ្តុំដើម្បីធ្វើជាកងកម្លាំងប្រយុទ្ធ នេះបើយោងតាមច្បាប់អាជ្ញាសឹករបស់ប្រទេសអ៊ុយក្រែន។ លោក ដេមឈិនកូ បាននិយាយថា ចាប់តាំងពីការចាប់ផ្តើមនៃសង្រ្គាមមក ឆ្មាំល្បាតព្រំដែនបានរកឃើញក្រុមឧក្រិដ្ឋជនប្រហែល ៤៥០ ក្រុមដែលបានប៉ុនប៉ងរត់ពន្ធមនុស្សឆ្លងកាត់ព្រំដែនដោយខុសច្បាប់។កាលពីដើមខែមេសា លោក ដេមឈិនកូ បានប្រាប់ទូរទស្សន៍រដ្ឋរបស់អ៊ុយក្រែនថា ជាមធ្យមបុរសប្រហែល ១០ នាក់ ដែលព្យាយាមចាកចេញពីអ៊ុយក្រែនដោយខុសច្បាប់ ត្រូវបានបញ្ឈប់ជារៀងរាល់ថ្ងៃ៕

អាមេរិកអះអាងថា អង្គភាពចំនួន៥របស់អ៊ីស្រាអែល បានរំលោភសិទ្ធិមនុស្ស មុនថ្ងៃទី ៧ ខែតុលា

ក្រសួងការបរទេសរបស់សហរដ្ឋអាមេរិក បាននិយាយថា ក្រសួងបានអះអាងថា អង្គភាពកងកម្លាំងសន្តិសុខអ៊ីស្រាអែលចំនួនប្រាំ បានរំលោភសិទ្ធិមនុស្សយ៉ាងធ្ងន់ធ្ងរ មុនខែតុលា ឆ្នាំមុន នៅពេលដែលជម្លោះជាមួយក្រុមហាម៉ាសបានចាប់ផ្តើម។ប្រព័ន្ធផ្សព្វផ្សាយរបស់សហរដ្ឋអាមេរិក បានរាយការណ៍ថា អង្គភាពរបស់អ៊ីស្រាអែល បានធ្វើទារុណកម្ម និងបំពានលើពលរដ្ឋប៉ាឡេស្ទីន នៅក្នុងតំបន់ West Bank ដែលកាន់កាប់ដោយអ៊ីស្រាអែល។ ច្បាប់របស់សហរដ្ឋអាមេរិក បានហាមឃាត់មិនឱ្យផ្តល់ជំនួយយោធាដល់អង្គភាពកងកម្លាំងសន្តិសុខបរទេស នៅពេលដែលមានព័ត៌មានគួរឱ្យទុកចិត្តពាក់ព័ន្ធក្នុងការរំលោភសិទ្ធិមនុស្សធ្ងន់ធ្ងរ។ប្រព័ន្ធផ្សព្វផ្សាយរបស់សហរដ្ឋអាមេរិក បានរាយការណ៍ថា ទីក្រុងវ៉ាស៊ីនតោន អាចផ្អាកជំនួយយោធាដល់អង្គភាពកងកម្លាំងការពារជាតិអ៊ីស្រាអែល។ របាយការណ៍នេះ បានធ្វើឲ្យមានការឆ្លើយតបយ៉ាងម៉ឹងម៉ាត់ពីនាយករដ្ឋមន្ត្រីអ៊ីស្រាអែល លោក Benjamin Netanyahu។ច្បាប់របស់សហរដ្ឋអាមេរិក អនុញ្ញាតឱ្យមានការលើកលែងឡើយ។ ជំនួយផ្នែកយោធាអាចត្រូវបានផ្តល់ឲ្យ ប្រសិនបើរដ្ឋមន្ត្រីការបរទេសកំណត់ថា រដ្ឋាភិបាលរបស់កងកម្លាំងសន្តិសុខដែលពាក់ព័ន្ធនឹងចាត់វិធានការប្រកបដោយប្រសិទ្ធភាព ដើម្បីនាំអ្នកទាំងឡាយណាដែលទទួលខុសត្រូវទៅកាន់តុលាការ។

មនុស្ស៤០នាក់ បានស្លាប់ ដោយសាររលកកម្តៅ នៅក្នុងប្រទេសបង់ក្លាដែស

មនុស្ស ៤០នាក់ បានស្លាប់ ដោយសារជំងឺដាច់សរសៃឈាមខួរក្បាលបណ្តាលមករលកកម្តៅដែលបានបន្តអស់រយៈពេលជាងមួយខែ។ ចំណែកមនុស្ស ៧នាក់ បានស្លាប់ដោយសារជំងឺគ្រុនក្តៅ ក្នុងរយៈពេលតែមួយថ្ងៃ កាលពីថ្ងៃអាទិត្យ។ជីវិតមនុស្ស ត្រូវបានរំខានដោយសាររលកកម្ដៅខ្លាំង។ នាយកដ្ឋានឧតុនិយម បានចេញសេចក្តីជូនដំណឹងអំពីកម្តៅនេះ ក្នុងរយៈពេល ៧២ម៉ោង ក្នុងជុំទី៥។នាយកដ្ឋានឧតុនិយម បានជូនដំណឹងថា រលកកម្តៅនៅទូទាំងប្រទេស នឹងបន្តកើតមាន។ សីតុណ្ហភាពទំនងជានឹងកើនឡើងបន្ថែមទៀត នៅក្នុងខែឧសភា។ អ្នកជំនាញសុខភាព បានណែនាំកុំឲ្យចេញក្រៅផ្ទះប្រសិនបើមិនចាំបាច់ទេនោះ។យោងតាមការព្រមានរបស់នាយកដ្ឋានឧតុនិយមឲ្យបានដឹងថា ការឈឺចាប់ អាចនឹងកើនឡើង ដោយសារតែចំហាយទឹកកើនឡើងខ្លាំង។ ទន្ទឹមនឹងនេះ ឥទ្ធិពលកម្តៅនៃសម្ពាធមហាសមុទ្រទាបលើតំបន់ West Bengal និងតំបន់ជុំវិញ ត្រូវបានគេមើលឃើញ នៅលើផ្ទៃដី។ដោយសាររលកកម្ដៅឡើងខ្លាំង អ្នកធ្វើការ រងផលប៉ះពាល់ខ្លាំងជាងគេបំផុត។ អ្នកបើករ៉ឺម៉ក និងអ្នកបើកបររថយន្តដែលប្រើហ្គាស កំពុងទទួលរងផលប៉ះពាល់ខ្លាំងពីរលកកម្តៅនេះ។ គេឃើញមនុស្សជាច្រើនឈប់ជិះរ៉ឺម៉ក និងដេកក្រោមម្លប់ដើមឈើ ដើម្បីបំបាត់កម្ដៅ។សីតុណ្ហភាពរបស់ប្រទេសបង់ក្លាដែស បានបន្តពីកើនឡើងពី ៤០ ទៅ ៤២,៧ អង្សាសេ ក្នុងរយៈពេលមួយខែចុងក្រោយនេះ ជាពិសេសនៅក្នុងរដ្ឋធានីដាក្កា (Dhaka) សីតុណ្ហភាព បានបន្តលើសពី ៤០ អង្សាសេ ក្នុងរយៈពេល ១៤ថ្ងៃ ចុងក្រោយនេះ។

ប្រទេសឥណ្ឌា តវ៉ាចំពោះពាក្យស្លោកផ្ដាច់ខ្លួនរបស់ពលរដ្ឋកាន់សាសនាស៊ីក នៅកាណាដា

ប្រទេសឥណ្ឌា បានកោះហៅស្នងការរងកាណាដា កាលពីថ្ងៃចន្ទ (២៩ មេសា) ហើយបានសម្តែង «ការព្រួយបារម្ភ និងការតវ៉ាយ៉ាងខ្លាំង» បន្ទាប់ពីក្រុមអ្នកចូលរួមការជួបជុំមួយលើកពាក្យស្លោកផ្ដាច់ខ្លួនជាច្រើនឃ្លាដើម្បីគាំទ្រដល់ស្រុកកំណើតពលរដ្ឋសាសនាស៊ីក នៅក្នុងព្រឹត្តិការណ៍មួយដែលថ្លែងដោយលោកនាយករដ្ឋមន្ត្រី ចាស្ទីន ទ្រូដូ (Justin Trudeau)។ទំនាក់ទំនងការទូតទ្វេភាគីមានភាពជូរចត់កាលពីឆ្នាំមុន បន្ទាប់ពីលោក ទ្រូដូ បាននិយាយថា កាណាដា កំពុង «បន្តការចោទប្រកាន់ដ៏គួរឱ្យជឿជាក់» ដែលថាភ្នាក់ងារឥណ្ឌា អាចជាប់ទាក់ទងទៅនឹងការសម្លាប់មេដឹកនាំសាសនាស៊ីក ម្នាក់កាលពីខែមិថុនា ឆ្នាំ២០២៣ ដែលជាពលរដ្ឋសញ្ជាតិកាណាដា។ក្រសួងការបរទេសឥណ្ឌា បាននិយាយកាលពីថ្ងៃចន្ទ ថាខ្លួនបានបង្ហាញពី «ការព្រួយបារម្ភយ៉ាងខ្លាំង និងការតវ៉ា» ចំពោះសកម្មភាពបែបនេះ «ត្រូវបានអនុញ្ញាតឱ្យបន្តដោយមិនមានការត្រួតពិនិត្យនៅក្នុងព្រឹត្តិការណ៍ជួបជុំ ជាពិសេសជាមួយប្រមុខដឹកនាំ»។ពាក្យស្លោកជាច្រើនឃ្លាដែលគាំទ្រដល់ការងើបឡើងនៃរដ្ឋផ្ដាច់ខ្លួនមួយ ត្រូវបានលើកឡើងនៅក្នុងព្រឹត្តិការណ៍មួយក្នុងទីក្រុង តូរ៉ុនតូ (Toronto) នេះបើយោងតាមទីភ្នាក់ងារសារព័ត៌មាន ANI ដែលដកស្រង់សម្តីលោក ទ្រូដូ ដោយនិយាយថា «យើងនឹងនៅទីនោះជានិច្ចដើម្បីការពារសិទ្ធិ និងសេរីភាពរបស់អ្នក ហើយយើងនឹងការពារសហគមន៍របស់អ្នកប្រឆាំងនឹងការស្អប់ខ្ពើម និងការរើសអើង»។ប្រទេសកាណាដាមានប្រជាជនកាន់សាសនាស៊ីក ច្រើនជាងគេនៅខាងក្រៅរដ្ឋ ផុនចាប (Punjab) ដែលជាស្រុកកំណើតរបស់ពួកគេក្នុងប្រទេសឥណ្ឌា ហើយប្រទេសនេះបានក្លាយជាកន្លែងនៃបាតុកម្មជាច្រើនដែលបានធ្វើឱ្យប្រទេសឥណ្ឌាមានការខឹងសម្បារ៕

មនុស្ស២នាក់ស្លាប់ នៅឥណ្ឌាភាគខាងត្បូង ខណៈរលកកម្ដៅនិងសីតុណ្ហភាពហក់ឡើងដល់កម្រិតខ្ពស់បំផុត

សារព័ត៌មានក្នុងស្រុក បានរាយការណ៍កាលពីថ្ងៃចន្ទទី២៩មេសាសប្ដាហ៍នេះ ថា មនុស្សយ៉ាងហោចណាស់២នាក់ បានស្លាប់ដែលគេសង្ស័យថា ដោយសារតែក្ដៅខ្លាំងពេកឬជំងឺសុរិយរោគ នៅក្នុងរដ្ឋ កេរ៉ាឡា (Kerala) ភាគខាងត្បូងប្រទេសឥណ្ឌា ខណៈប្រទេសនេះ ព្យាយាមទប់ទល់ការកើនឡើងសីតុណ្ហភាពដល់កម្រិតខ្ពស់បំផុត។ សារព័ត៌មាន Hindu បានរាយការណ៍ថា ស្ត្រីចំណាស់វ័យ៩០ឆ្នាំម្នាក់ និងបុរសវ័យ៥៣ឆ្នាំ ម្នាក់ បានស្លាប់នៅក្នុងរដ្ឋកេរ៉ាឡា កាលពីថ្ងៃអាទិត្យ ស្របពេលសីតុណ្ហភាពហក់ឡើងខ្ពស់ដល់៤១,៩ អង្សាសេ កើនឡើងជិត៥,៥អង្សាសេ លើសពីកម្រិតធម្មតា ។ លោក សេកហា គូរីយ៉ាកូស (Shekhar Kuriakose) មន្ត្រីគ្រប់គ្រងគ្រោះមហន្តរាយរដ្ឋ បាននិយាយថា យើងពុំទាន់ផ្ដល់ការបញ្ជាក់ច្បាស់បានទេ ថាតើការស្លាប់ទាំងនោះ ដោយសារតែរលកកម្ដៅឬយ៉ាងណា ហើយដំណើរការតាមវេជ្ជសាស្ត្រកំពុងប្រព្រឹត្តទៅនាពេលបច្ចុប្បន្ននេះ ។ ក្រុមអ្នកវិទ្យាសាស្ត្រ បាននិយាយថា បម្រែបម្រួលអាកាសធាតុ នេះកំពុងរុញឲ្យមានរលកកម្ដៅកាន់តែញឹកញាប់ ធ្ងន់ធ្ងរ និងមានរយៈពេលកាន់តែយូរ អំឡុងខែរដូវក្ដៅនេះ៕

បណ្ដាញសង្គម

ព័ត៌មានថ្មីៗ

លោក ស៊ី ទំនងជាទៅទស្សនកិច្ចឥណ្ឌា ជាមួយគណៈប្រតិភូដ៏ធំ ជាលើកដំបូងក្នុងរយៈពេល ៧ឆ្នាំ

ប្រភព៖ ប្រមុខកងទ័ពប៉ាគីស្ថាន ពិភាក្សាអំពីសំណើថ្មីនៅទីក្រុងតេអេរ៉ង់ ដើម្បីស្ដារកិច្ចចរចាអាមេរិក-អ៊ីរ៉ង់

លោក Putin៖ ពាណិជ្ជកម្មរុស្ស៊ី-ឥណ្ឌា កើនឡើងនៅឆ្នាំនេះ ខណៈសហប្រតិបត្តិការ ពង្រីកក្នុងវិស័យថាមពល និងជី

អ្នកស្លាប់ដោយសាររញ្ជួយដី នៅភាគខាងកើតឥណ្ឌូនេស៊ី កើនឡើងដល់យ៉ាងតិច ១០០នាក់

សហភាពអឺរ៉ុបអនុម័តជំនួយការពារជាតិថ្មីចំនួន ៧,១ពាន់លានដុល្លារ សម្រាប់អ៊ុយក្រែន

សម្តេចតេជោ ហ៊ុន សែន អនុញ្ញាតឱ្យ ឯកឧត្តម Andrey RUDENKO អនុរដ្ឋមន្ត្រីការបរទេស នៃសហព័ន្ធរុស្ស៊ី ចូលជួបសម្តែងការគួរសម

ចិនប្ដេជ្ញាការពារសិទ្ធិរបស់ខ្លួន ខណៈសហរដ្ឋអាមេរិកកំពុងរៀបចំទណ្ឌកម្ម លើអ៊ីរ៉ង់

អ៊ីរ៉ង់បដិសេធថា ខ្លួនមិនបានទទួលការអញ្ជើញឲ្យចូលរួមកិច្ចព្រមព្រៀងការពារជាតិ នៅទីក្រុង Meccaទេ

លោកលោក Zelenskyy បញ្ជាក់ថា អ៊ុយក្រែនចង់បានសន្តិភាព ប៉ុន្តែមិនចុះចាញ់ឡើយ

អ៊ីរ៉ង់ប្រកាសថា បានរកឃើញតំបន់ឧស្ម័នធម្មជាតិដ៏ធំមួយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877