នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមនិស្សិតសាកលវិទ្យាល័យជាតិគ្រប់គ្រងបង្កើតបច្ចេកវិទ្យា AI ជួយសម្រួលការងារវិស័យទេសចរណ៍ និងបដិសណ្ឋារកិច្ច
កិច្ចប្រជុំបច្ចេកទេសលើកទី៤២ នៃគណៈកម្មាធិការអាស៊ីស៊ី-អង្គរ និងសំបូរព្រៃគុក បន្ត​ជជែកលើ​បច្ចេកទេសការងារ​អភិរក្ស និងអភិវឌ្ឍន៍ប្រកបដោយចីរភាព
ទេសចរ៖ បរិស្ថានធម្មជាតិស្រស់ស្អាតរបស់កម្ពុជាបានរួមចំណែកខ្លាំងទាក់ទាញទេសចរអន្តរជាតិ
សាជីវកម្មហិរញ្ញវត្ថុអភិវឌ្ឍន៍អន្តរជាតិអាមេរិក-DFC អនុម័តទឹកប្រាក់ ១០០លានដុល្លារ គាំទ្រ​ដល់​កា​​រពង្រីក​ហេដ្ឋារចនាសម្ព័ន្ធអាកាសយានដ្ឋានអន្តរជាតិតេជោ

វប្បធម៌ និងទេសចរណ៍

កម្ពុជាស្ថិតនៅជួរមុខនៃការអភិរក្ស ប្រភេទសត្វត្រយងយក្សក្នុងពិភពលោក

2024/11/01 03:19:21 pm        812
Facebook Telegram Linkin
ក្រុមការងារអភិរក្សសត្វត្រយង នៅកម្ពុជា (CIWG) បានចេញផ្សាយរបាយការណ៍ប្រចាំឆ្នាំ២០២៣ នៅថ្ងៃសុក្រ ទី០១ ខែវិច្ឆិកា ឆ្នាំ២០២៤ ដើម្បីអបអរសាទរចំពោះកិច្ចសហការប្រឹងប្រែងលើការអភិរក្សយ៉ាងយកចិត្តទុកដាក់ចំពោះប្រភេទសត្វត្រយងជិតផុតពូជរបស់កម្ពុជា គឺសត្វត្រយងយក្ស (Thaumatibis gigantea) និងសត្វត្រយងចង្កំកស (Pseudibis davisoni)។ របាយការណ៍នេះបង្ហាញពីការសម្រេចបានសំខាន់ៗដែលបានធ្វើឡើងក្នុងកិច្ចការពារ និងអភិរក្សប្រភេទសត្វដែលជានិមិត្តរូបទាំងពីរនេះក្នុងកំឡុងពេលចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០២៣។នៅឆ្នាំ២០២៣ ក្រុមការងារសត្វត្រយងនៅកម្ពុជា ដែលមានសមាជិកពីស្ថាប័នរាជរដ្ឋាភិបាល និងអង្គការមិនមែនរដ្ឋាភិបាល សម្រេចបាននូវសមិទ្ធផលដ៏គួរឱ្យកត់សម្គាល់ក្នុងកិច្ចការអភិរក្ស ដែលក្នុងនោះមានដូចជាការបង្កាត់ពូជសត្វត្រយងចង្កំកស បានជោគជ័យជាលើកដំបូងសំរាប់កម្ពុជាក៏ដូចជាសម្រាប់សកលលោក និងកិច្ចខិតខំប្រឹងប្រែងនៅលើទីវាល បានរកឃើញសំបុកសត្វត្រយងយក្សច្រើនជាង៤០សំបុក។ ចំនួនសំបុកសត្វត្រយងយក្សដែលបានរកឃើញនេះ បានឆ្លុះបញ្ចាំងពីការកើនឡើងចំនួនសំបុកជោគជ័យកាលពីឆ្នាំមុន។ ការបន្តពូជរបស់សត្វត្រយងចង្កំកស ក៏មានការកើនឡើងគួរឱ្យកត់សម្គាល់ផងដែរ ដោយកូនកើតថ្មីចំនួន១៧៥ក្បាល បានហើរចេញពីសំបុកដោយជោគជ័យ។ ការធ្វើជំរឿនថ្នាក់ជាតិបានបញ្ជាក់បន្ថែមពីសារៈសំខាន់នៃកិច្ចខិតខំប្រឹងប្រែងរបស់ក្រុមការងារអភិរក្សសត្វត្រយងនៅកម្ពុជា ដោយបានកត់ត្រាសត្វត្រយងចង្កំកស ចំនួន ៧៨៤ក្បាល ដែលជាចំនួនច្រើនគួរឱ្យចាប់អារម្មណ៍ព្រោះវាស្មើនឹង៨៧ ទៅ៩៥% នៃចំនួនប្រជាសាស្ត្រសត្វត្រយងចង្កំកស ដែលមាននៅក្នុងពិភពលោក។ ការកត់ត្រាបានចំនួនដ៏ច្រើននេះបញ្ចាក់អំពីសមិទ្ធផលសម្រេចដ៏ធំនៃការងារអភិរក្សនាពេលកន្លងមក។ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងថា៖ «ប្រទេសកម្ពុជាស្ថិតនៅលំដាប់ជួរមុខ នៃកិច្ចខិតខំប្រឹងប្រែងជាសាកលក្នុងការអភិរក្សសត្វត្រយងយក្ស និងសត្វត្រយងចង្កំកស ដែលភាគច្រើននៃចំនួនប្រជាសាស្ត្ររបស់ប្រភេទសត្វទាំងនេះ មានវត្តមាននៅក្នុងព្រះរាជាណាចក្រកម្ពុជា ច្រើនជាងគេបំផុតនៅក្នុងពិភពលោក។ នេះជាភាពជោគជ័យនៃកិច្ចខិតខំប្រឹងប្រែងអភិរក្សរបស់កម្ពុជាយើង ក្នុងការធានាបានកិច្ចការពារ ថែរក្សា និងអភិរក្សធនធានធម្មជាតិទាំងអស់នៅក្នុងតំបន់ការពារធម្មជាតិ»។ អ្នកនាំពាក្យរូបនេះ បានឱ្យដឹងថា ក្រសួងបរិស្ថាន អ្នកពាក់ព័ន្ធ និងអង្គការដៃគូអភិរក្សចាំបាច់ណាស់ បន្តការចូលរួមអនុវត្តវិធានការ របស់រាជរដ្ឋាភិបាលកម្ពុជា ក្នុងការគ្រប់គ្រងធនធានធម្មជាតិ ក្នុងនោះ «យុទ្ធសាស្រ្តចក្រាវិស័យបរិស្ថាន» ដើម្បីកម្ពុជាមានភាពស្អាត ភាពបៃតង និងចីរភាព ជាពិសេសធានាថា សត្វស្លាបដែលជានិមិត្តរូបទាំងនេះ ត្រូវបានការពារពីការវិនាសផុតពូជ។ នៅក្នុងឆ្នាំ២០២៣ កិច្ចខិតខំប្រឹងប្រែងរបស់ក្រុមការងារអភិរក្សសត្វត្រយងនៅកម្ពុជា (CIWG) បានផ្តោតលើទីជម្រកសំខាន់ៗនៅភាគខាងកើត និងឦសាននៃប្រទេសកម្ពុជា រួមមាន៖ ក្នុងខេត្តព្រះវិហារ ស្ទឹងត្រែង ក្រចេះ មណ្ឌលគិរី និងខេត្តរតនគិរី។ តំបន់ទាំងនេះមានសារៈសំខាន់សម្រាប់ទ្រទ្រង់ការរស់រានមានជីវិតរបស់សត្វត្រយង ហើយក៏ជាទីតាំងដែលកំពុងមានសកម្មភាពអង្កេតតាមដាន សង្រ្គោះ និងការពារនៅក្នុងធម្មជាតិ។ក្រុមការងារអភិរក្សសត្វត្រយងនៅកម្ពុជា បានបញ្ជាក់ថា៖ «កិច្ចខិតខំប្រឹងប្រែងអភិរក្សរបស់ក្រុមការងារអភិរក្សសត្វត្រយង នៅកម្ពុជាក្នុងឆ្នាំ២០២៣ នៅមជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) បានបង្កាត់ពូជសត្វត្រយងចង្កំកស ដោយជោគជ័យ ដែលនេះជាប្រវត្តិសាស្ត្រនៃការសម្រេចបាននឹងកំពុងដំណើរការបន្តយ៉ាងល្អ។ ភាពជោគជ័យនេះបង្ហាញពីតួនាទីដ៏សំខាន់នៃកម្មភាពអភិរក្សនៅក្រៅទីជម្រកធម្មជាតិក្នុងការលើកកម្ពស់ការរស់រានមានជីវិតនៃប្រភេទសត្វជិតផុតពូជទាំងនេះ និងបញ្ជាក់អំពីតម្រូវការអភិរក្សរបៀបនេះបន្តទៀត។ ក្រុមការងារអភិរក្សសត្វត្រយងនៅកម្ពុជាត្រូវបានបង្កើតឡើងដើម្បីប្រមូលធនធាន និងបង្កើនកិច្ចសហការណ៍លើការងារអភិរក្សសត្វត្រយងជិតផុតពូជទាំងពីរប្រភេទនេះ ក្រុមការងារយើងពឹងផ្អែកលើរបាយការណ៍ នៃការអភិរក្សសត្វត្រយងថ្នាក់ជាតិប្រចាំឆ្នាំនេះដើម្បីតាមដានវឌ្ឍនភាពនៃការអភិរក្សឆ្លើយតបទៅនឹងផែនការសកម្មភាពអភិរក្សសត្វត្រយងដែលបានដាក់ចេញ។ លទ្ធផលដែលបានបង្ហាញក្នុងរបាយការណ៍ដែលផ្សព្វផ្សាយថ្ងៃនេះ គឺជាផ្លែផ្កានៃកិច្ចខិតខំប្រឹងប្រែងរួមគ្នា ហើយក៏ជាការលើកទឹកចិត្តដល់ក្រុមការងារយើង ក្នុងការអភិរក្ស និងការពារទីជម្រករបស់ពួកវាបន្តទៀតដើម្បីធានាវត្តមានរបស់ពួកវានៅក្នុងប្រទេសកម្ពុជា»។សត្វត្រយងយក្ស និងសត្វត្រយងចង្កំកស កំពុងប្រឈមនឹងកត្តាគំរាមកំហែងជាច្រើនរួមមាន ការបាត់បង់ទីជម្រក និងសកម្មភាពរបស់មនុស្សដូចជាការបរបាញ់ជាដើម។ សត្វត្រយងយក្សដែលមានចំនួនតិចជាង ២០០ក្បាល នៅទូទាំងពិភពលោកត្រូវបានចាត់ជាបក្សីតំណាងជាតិរបស់កម្ពុជា ខណៈសត្វត្រយងចង្កំកស បាននិងកំពុងរងគ្រោះកាន់តែខ្លាំងឡើងៗ ទាមទារជាបន្ទាន់នូវកិច្ចខិតខំប្រឹងប្រែងអភិរក្សជាបន្ត៕ 

៩ខែដើមឆ្នាំ២០២៤ មន្រ្តីអន្តោប្រវេសន៍កម្ពុជាទទួលភ្ញៀវអន្តរជាតិជាង៤លាននាក់ បដិសេធមិនឱ្យចូលប្រមាណមួយពាន់នាក់

2024/11/01 02:54:52 pm        829
Facebook Telegram Linkin
មិនទាន់មួយឆ្នាំផង ពោលគឺត្រឹមរយៈពេល៩ខែ ឆ្នាំ២០២៤នេះ មន្រ្តីអន្តោប្រវេសន៍ នៃ​ព្រះរាជា​ណា​ចក្រ​កម្ពុជា បានទទួលភ្ញៀវជាលក្ខណៈអន្តរជាតិចូលមកតាមបណ្ដាច្រកទ្វាព្រំដែនគោក និង​អាកាស​រហូត​ទៅដល់ ៤.៨៤៩.៩២២នាក់ ស្មើនឹង ២១៧សញ្ជាតិ កើនឡើង៦,៧៦% ក្នុងនោះ​ភ្ញៀវ​ទេសចរមានចំនួន ៣.៧៦៧.៥១៨នាក់ ស្មើនឹង ៧៧,៦៨%។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។ ដោយឡែក ក្នុងរយៈពេល៩ខែដើមឆ្នាំ២០២៤នោះដូចគ្នា លោកបណ្ឌិត ទូច សុឃៈ បាន​ឱ្យ​ដឹង​ទៀត​ថា ក៏មានជនបរទេសចំនួន ១.០២៤នាក់ ស្មើនឹង ៧៨សញ្ជាតិ ត្រូវបានមន្រ្តីអន្តោប្រវេសន៍ បដិសេធ​ការផ្តល់ទិដ្ឋាការ និងបដិសេធមិនឱ្យចូលព្រះរាជាណាចក្រកម្ពុជាផងដែរ។ បន្ទាប់ពី​បាន​រក​ឃើញ​ពាក់ព័ន្ធក្នុងបញ្ជីមុខសញ្ញា រកឃើញការប្រើប្រាស់លិខិតឆ្លងដែនមិនប្រក្រតី មានគោល​បំណង​មិន​ច្បាស់លាស់ និងមិនគ្រប់លក្ខណៈសម្បត្តិឱ្យចូលប្រទេស។ អ្នកនាំពាក្យរងក្រសួងមហាផ្ទៃបានឱ្យដឹងដែរលទ្ធផលការងារក្នុងរយៈពេល ៩ខែ ឆ្នាំ២០២៤នេះ បាន​សម្រេចឡើង បើទោះបីជាសភាពការណ៍សន្តិសុខពិភពលោកនៅតែបន្តភាពស្មុគស្មាញ ក្នុងនោះ​សង្គ្រាមរវាង រុស្សី-អ៊ុយក្រែន និងសង្គ្រាមរវាងអ៊ីស្រាអែល និងប្រទេស​ក្នុង​តំបន់​មជ្ឈិម​​បូព៌ា​មួយ​ចំនួនក៏បាននិងកំពុងបន្តការប្រយុទ្ធគ្នាយ៉ាងធ្ងន់ធ្ងរ។ បន្ថែមពីលើនេះ ប្រទេស ក្នុង​តំបន់​មួយ​ចំនួន​បានរងគ្រោះធម្មជាតិ។ វិបត្តិទាំងនេះ បានជះឥទ្ធិពល អវិជ្ជមានដល់​វិស័យ​ទេសចរណ៍​ជា​សកល រួមទាំងព្រះរាជាណាចក្រកម្ពុជាផងដែរ។ តែទោះជាយ៉ាងនេះក្តី លោកបណ្ឌិត ទូច សុឃៈ បានគូសបញ្ជាក់ថា ព្រះរាជាណាចក្រកម្ពុជា នៅ​តែ​បន្ត​រក្សាបាន សុខសន្តិភាព សន្តិសុខ សណ្តាប់ធ្នាប់សង្គម បង្កបរិយាកាស​ដល់​ដំណើរ​ការ​ប្រទេស​ទៅ​តាមវិស័យនីមួយៗ ប្រព្រឹត្តទៅដោយរលូន ស្របតាមកម្មវិធីនយោបាយ និង​យុទ្ធសាស្ត្រ​បញ្ច​កោណដំណាក់កាលទី១ របស់រាជរដ្ឋាភិបាល ក្រោមការដឹកនាំ​ប្រកប​ដោយ​ថាមពល ភាពឈ្លាសវៃ និងចក្ខុវិស័យច្បាស់លាស់ របស់ សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រី​ នៃព្រះរាជាណាចក្រកម្ពុជា។ជាមួយគ្នានោះដើម្បីសម្រួលដល់ការលំបាក និងដោះស្រាយរបាំងនានាដែលប៉ះពាល់​ដល់​អ្នក​ដំណើរ​ចេញ​ចូល រួមមាន ការពង្រឹងសេវាកម្មអន្តោប្រវេសន៍នៅតាមច្រកទ្វារអន្តរជាតិ លុប​បំបាត់​បាតុភាព​អសកម្ម និងការសម្រួលបែបបទអោយ បានងាយស្រួល ប្រមុខរាជរដ្ឋាភិបាល ការ​ដាក់​ឱ្យ​ដំណើរ​ការ​ប្រព័ន្ធ​សាល​ក្របត្រអេឡិចត្រូនិកចូលព្រះរាជាណាចក្រ កម្ពុជា (Cambodia e-Arrival) ដែលបានដាក់អោយអនុវត្តជំហានដំបូងនៅតាមច្រកទ្វារអាកាសយានដ្ឋាន អន្តរជាតិ នាថ្ងៃទី១ ខែកញ្ញា ឆ្នាំ២០២៤៕ 

ក្រសួងវប្បធម៌នឹងបើកមហោស្រពជាតិភាពយន្តខ្នាតខ្លីកម្ពុជាលើកទី៤ នៅចុងខែវិចិ្ឆកានេះ

2024/11/01 01:22:10 pm        294
Facebook Telegram Linkin
នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ គ្រោង​បើកមហោស្រពជាតិភាពយន្តខ្នាតខ្លីកម្ពុជាលើកទី៤ ក្រោមប្រធានបទ «ភាពយន្តខ្នាតខ្លី ជា​ជំហាន​ឆ្ពោះ​ទៅកាន់ភាពយន្តខ្នាតវែង» ដែលគ្រោងនឹងរៀបចំនាថ្ងៃទី២៥ ខែវិច្ឆិកា ឆ្នាំ​២០២៤​ខាង​មុខនេះ។លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានថ្លែងប្រាប់ BTV ព័ត៌មាននាព្រឹកថ្ងៃទី១ ខែវិចិ្ឆកា ឆ្នាំ២០២៤នេះថា តាមរយៈនៃ​មហោ​ស្រព​ជាតិ​ភាពយ​ន្ត​ខ្នាត​ខ្លី​នេះ​គឺ​ជា​ព្រឹត្តិការណ៍ដ៏មានសារសំខាន់ និងចាំបាច់ក្នុងការជំរុញលើកទឹកចិត្ត ដល់យុវជន​ដើម្បី​បញ្ចេញ​គំនិតច្នៃ​ប្រឌិត ចែករំលែកនូវព័ត៌មានដែលពួកគេមានតាមរយៈ អេក្រង់ ឬផ្ទាំងសំពត់ស និង​ជា​ជំហានដំបូងក្នុងការនាំពួកឲ្យក្លាយជាផលិតករភាពយន្ត។ លោកបន្តថា មហោស្រពនេះធ្វើ​ឡើង​ដើម្បី​ប្រកួត​ប្រជែង​វាស់​ស្ទង់​កម្រិត​សមត្ថភាព​របស់​យុវ​ផលិត​ករ​វ័យក្មេងព្រមទាំងចែករំលែកបទពិសោធន៍ថ្មីៗក្នុងគោលបំណងពង្រឹង និង​លើក​កម្ពស់​ធន​ធាន​មនុស្ស រួមចំណែកអភិវឌ្ឍន៍ឧស្សាហកម្មភាពយន្តកម្ពុជា ឲ្យកាន់តែប្រសើរឡើង និង​ដើម្បី​បង្កើននូវបរិយាកាសដ៏សំបូរបែប នៃព្រឹតិ្តការណ៍វប្បធម៌ និងបង្កើននូវផលិតផលវប្បធម៌ថ្មីៗ ដែល​មិនត្រឹមតែជួយអភិវឌ្ឍវិស័យភាពយន្តប៉ុណ្ណោះទេ តែថែមទាំង​រួម​ចំណែក​យ៉ាង​សំខាន់​ក្នុង​ការ​ផ្សព្វ​ផ្សាយពីវប្បធម៌ ប្រពៃណី កិត្យានុភាព និងអត្តសញ្ញាណជាតិ នៅលើឆាកអន្តរជាតិ​ផង​ដែរ​។លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយ​វប្បធម៌លើកឡើងថា ​«ការ​រៀប​ចំមហោស្រ​ពនេះ យើងនឹងគ្រោងធ្វើពិធីបើកនាថ្ងៃទី២៥ ខែវិចិ្ឆកា នៅសាលសន្និសីទចតុម្មុខ ហើយ​យើងរៀបចំពិធីបិទ និងប្រកាសជាផ្លូវការផ្តល់ពានរង្វាន់ នៅថ្ងៃទី៣០ ខែវិចិ្ឆកា ឆ្នាំ២០២៤ មក​ដល់​ថ្ងៃនេះយើងបានបិទបញ្ចប់ការទទួលពាក្យចូលរួមប្រកួតប្រជែងរបស់យុវជនផលិតករ ត្រឹម​ថ្ងៃទី៣១ ខែតុលា យើងបានបិទបញ្ចប់ការទទួលពាក្យរួចរាល់ហើយ។ តទៅនេះ​ក្នុង​ដំណើរ​ការ​រៀប​ចំ យើងយកស្នាដៃភាពយន្តសម្រាប់ចូលរួមប្រជែងទាំងអស់នេះ យកទៅសម្រាប់​គណៈ​កម្មាធិការ​មេ​ប្រយោគពិនិត្យវាយតម្លៃ និងធ្វើការជ្រើសរើសភាពយន្ត សម្រាប់ទៅក្នុងវ​គ្គ​ផ្តាច់​ព្រ័ត្រ។​ ហើយក្នុងអំឡុងពេលនៃការរៀបចំពិធីចន្លោះពីថ្ងៃទី២៦ រហូតដល់ថ្ងៃទី២៩ ក៏មានការ​ចាក់​បញ្ចាំង​ស្នាដៃភាពយន្តនៅតាមរោងភាពយន្តមួយចំនួនក្នុងរាជធានីភ្នំពេញ ដើម្បីឲ្យទស្សនិក​ជន​ មហាជនចូលទស្សនាគាំទ្រស្នាដៃផលិតកររបស់យើង ឬអាចបោះ​ឆ្នោត​ជ្រើស​រើស​ស្នាដៃ​ភាព​យន្ត​ណាដែ​លខ្លួនពេញចិត្ត ដែល ផ្តល់ជាពិន្ទុ ក្នុងន័យថា ផ្តល់ជារង្វាន់ដែល​ភាព​យន្ត​នោះ​មាន​មហា​ជន​គាំទ្រច្រើន ជាផ្នែកមួយផងដែរ»។សូមរំលឹកថា ចាប់តាំងពីការបង្កើតឡើងនៅឆ្នាំ២០១៦ មហោស្រពជាតិភាពយន្តខ្នាតខ្លីកម្ពុជា បាន​ដើរតួនាទីយ៉ាងសំខាន់ក្នុងការបង្កើតធនធានមនុស្សថ្មីៗ ប្រកបដោយ​សមត្ថភាព​ទេពកោសល្យ​ក្នុង​វិស័យភាពយន្ត សម្រាប់ពេលបច្ចុប្បន្ន និងអនាគត។ យុវជនទាំងអស់ បាន​ចូល​រួម​ចំណែកយ៉ាងសកម្មក្នុងការបង្កើតស្នាដៃភាពយន្តថ្មីៗ ប្រកបដោយគំនិតច្នៃប្រឌិត ព្រមទាំង​បាន​បង្គប់​នូវអត្ថន័យខ្លឹមសារអប់រំ សីលធម៌ គុណធម៌ និងអត្តសញ្ញាណជាតិ ដែលសកម្មភាព​ទាំង​នេះ មិនត្រឹមតែបានជួយអភិវឌ្ឍន៍ឧស្សាហកម្មភាពយន្តកម្ពុជាប៉ុណ្ណោះទេ តែថែមទាំង​បាន​ចូល​រួម​ចំណែកយ៉ាងសំខាន់ក្នុងការថែរក្សា ការពារវប្បធម៌ ប្រពៃណី​ទំនៀម​ទំលាប់​របស់​ជាតិ​យើង​៕ អត្ថបទ រដ្ឋា 

កម្ពុជា និងឥណ្ឌា រៀបចំវេទិកាទេសចរណ៍ឆ្នាំ២០២៤ ប្រធានបទ «សក្តានុពល​នៃ​ទីផ្សារទេសចរណ៍ឥណ្ឌាសម្រាប់វិស័យទេសចរណ៍កម្ពុជា៖ កាលានុវត្តភាព និងការត្រៀមលក្ខណៈសម្បត្តិ»

2024/10/31 11:31:10 am        184
Facebook Telegram Linkin
ក្រសួងទេសចរណ៍ និងស្ថានទូតឥណ្ឌាប្រចាំកមកម្ពុជា បានរៀបចំវេទិកាទេសចរណ៍កម្ពុជា ឥណ្ឌា ឆ្នាំ២០២៤ ដើម្បីលើកកម្ពស់វិស័យទេសចរណ៍នៃប្រទេសទាំងពីរ។ព្រឹត្តិការណ៍ទេសចរណ៍នេះក្រោមប្រធានបទ «សក្តានុពលនៃទីផ្សារទេសចរណ៍ឥណ្ឌាសម្រាប់វិស័យទេសចរណ៍កម្ពុជា៖ កាលានុវត្តភាព និងការត្រៀមលក្ខណៈសម្បត្តិ» ដែលធ្វើឡើង នៅខេត្តសៀមរាបនាថ្ងៃទី៣១ខែតុលាឆ្នាំ២០២៤នេះ ។ឯកឧត្តម ហួត ហាក់ រដ្ឋមន្រ្ដីក្រសួងទេសចរណ៍លើកឡើងថា ព្រឹត្តិការណ៍នេះ ក៏ជាសកម្មភាពមួយក្នុងចំណោមសកម្មភាពសំខាន់ៗ ដែលក្រសួងទេសចរណ៍ បានទទួលគោលការណ៍អនុញ្ញាតពីរាជរដ្ឋាភិបាល ក្នុងការអនុវត្តគាំទ្រដល់យុទ្ធនាការ «ឆ្នាំទេសចរណ៍ កម្ពុជា-ឥណ្ឌា លើកទី១ ឆ្នាំ២០២៤» ដែលត្រូវបានប្រកាសបើកជាផ្លូវការកាលពីថ្ងៃទី១៧ ខែមិថុនា ឆ្នាំ២០២៤ នៅទីក្រុងញូដេលី នៃសាធារណរដ្ឋឥណ្ឌា ស្របជាមួយការបើកជើងហោះហើរត្រង់ជាប្រវត្តិសាស្ត្ររវាងប្រទេសទាំងពីរដោយក្រុមហ៊ុនអាកាសចរណ៍ជាតិ កម្ពុជាអង្គរអ៊ែរ។ឯកឧត្ដមបន្ដថា កាលពីឆ្នាំ២០២៣កន្លងមក កម្ពុជាបានទទួលទេសចរអន្តរជាតិប្រមាណ៥,៤៥ លាននាក់ ក្នុងនោះ ភ្ញៀវទេសចរឥណ្ឌាមានចំនួនប្រមាណ ៦,៩ ម៉ឺននាក់ និងទេសចរជាតិប្រមាណ១៨,៥ លាននាក់។ ដោយឡែក សម្រាប់រយៈពេល ៨ខែ ដើមឆ្នាំ២០២៤ កម្ពុជាបានទទួលទេសចរអន្តរជាតិប្រមាណ៤,២៩ លាននាក់ កើនឡើង ២២,៥% ក្នុងនោះ ទេសចរឥណ្ឌាមានចំនួនប្រមាណ ៥ ម៉ឺននាក់ កើនឡើង ១៥,២%។វិស័យទេសចរណ៍កម្ពុជា ផ្សារភ្ជាប់យ៉ាងជិតស្និតជាមួយប្រទេសឥណ្ឌាដែលមានទាំងលំហូរទេសចរ និងវិនិយោគឥណ្ឌាផងដែរ។ឯកឧត្ដមបន្ដថា កំណើនទេសចរឥណ្ឌា គឺជាកាលានុវត្តន៍សំខាន់ ដែលមិនត្រឹមតែជំរុញនូវការអភិវឌ្ឍវិស័យទេសចរណ៍ប៉ុណ្ណោះទេ ប៉ុន្តែថែមទាំងបង្កើតនូវឱកាសវិនិយោគក្នុងវិស័យផ្សេងៗទៀតសម្រាប់មូលដ្ឋាននៃកំណើនសេដ្ឋកិច្ច និងការអភិវឌ្ឍប្រទេសជាតិរបស់កម្ពុជា។តាមរយៈព្រឹត្តិការណ៍នានារួមគ្នារវាងកម្ពុជា-ឥណ្ឌា ក្នុងក្របខណ្ឌនៃយុទ្ធនាការ “ឆ្នាំទេសចរណ៍ កម្ពុជា-ឥណ្ឌា លើកទី១ ឆ្នាំ២០២៤” នាពេលនេះ នឹងអាចផ្សព្វផ្សាយកាន់តែច្បាស់ពីវប្បធម៌ ប្រពៃណី និងសក្តានុពលទេសចរណ៍របស់ប្រទេសយើងទាំងពីរ ដែលនឹងមិនត្រឹមតែចូលរួមដល់ការពង្រឹងចំណងមិត្តភាព និងកិច្ចសហប្រតិបត្តិការល្អ ការបង្កើនទំនាក់ទំនងលើវិស័យទេសចរណ៍រវាងកម្ពុជា-ឥណ្ឌាប៉ុណ្ណោះទេ ប៉ុន្តែក៏បង្ហាញពីការយកចិត្តទុកដាក់ជាអាទិភាពយ៉ាងសំខាន់លើប្រភពទីផ្សារឥណ្ឌាសម្រាប់វិស័យទេសចរណ៍កម្ពុជាផងដែរ។ព្រឹត្តិការណ៍នេះក៏នឹងផ្តល់ឱកាសឱ្យអ្នកជំនាញទេសចរណ៍ វិស័យឯកជន ភាគីពាក់ព័ន្ធនៃប្រទេសទាំងពីរបានជួបជុំពិភាក្សា ចែករំលែកគំនិតថ្មីៗ ផ្លាស់ប្តូរបទពិសោធន៍ល្អៗ និងរិះរកយុទ្ធសាស្ត្រចូលរួមអភិវឌ្ឍទេសចរណ៍ប្រកបដោយចីរភាព និងភាពទទួលខុសត្រូវ និងផ្ដល់ឱកាសសម្រាប់វិស័យឯកជននៃប្រទេសទាំងពីរបានជួបជុំគ្នា ពង្រឹងទំនាក់ទំនងទៅវិញទៅមក។«ឆ្នាំទេសចរណ៍កម្ពុជា-ឥណ្ឌាលើកទី១» ត្រូវបានបើកនៅទីក្រុងញូវដេលី ប្រទេសឥណ្ឌារួចហើយកាលពីខែមិថុនា កន្លងទៅ៕

ក្រុមការងារចុះជួយស្រុកបាកានរៀបចំទស្សនកិច្ចកម្សាន្តទៅកាន់ខេត្តសៀមរាប ជូនសិស្សទី១២ ប្រមាណ ១០០០នាក់

2024/10/30 11:31:09 am        374
Facebook Telegram Linkin
ក្រុមការងារចុះជួយមូលដ្ឋានស្រុកបាកាន បានរៀបចំដំណើរ​ទស្សន​កិច្ច​កម្សាន្ត​ទៅ​កាន់​តំបន់​រមណីយដ្ឋាន​ប្រវត្តិសាស្ត្រខេត្តសៀមរាប ជូនដល់ លោកគ្រូអ្នកគ្រូ សិស្សានុសិស្សថ្នាក់ទី១២ ក្នុងស្រុកបាកាន ដែលបានប្រឡងបញ្ចប់សញ្ញាបត្រមធ្យមសិក្សាទុតិយភូមិ សរុបប្រមាណជិត១០០០នាក់ មកពីវិទ្យាល័យបាកាន វិទ្យាល័យអូរតាប៉ោង វិទ្យាល័យព្រះម្លូរ វិទ្យាល័យរំលេច និងសិស្សក្នុងឃុំស្នាមព្រះដែលរៀននៅវិទ្យាល័យទាចំរ៉ាត់ ។ ដំណើរទស្សនកិច្ចកម្សាន្តនេះ ទទួលបានការឧបត្ថម្ភទាំងស្រុងពី ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធានក្រុមការងារចុះជួយមូលដ្ឋានខេត្តពោធិ៍សាត់ និង ឯកឧត្តមបណ្ឌិត ទី នរិន្ទ ប្រធានក្រុមការងារចុះជួយមូលដ្ឋានស្រុកបាកាន និងដោយមានឯកឧត្តមបណ្ឌិត ទី ថានី អនុប្រធានក្រុមការងារចុះជួយស្រុកបាកាន ទទួលបន្ទុករៀបចំ ។ឯកឧត្តមបណ្ឌិត ទី នរិន្ទ មានប្រសាសន៍លើកឡើងថា ក្រុមការងារចុះជួយមូលដ្ឋានស្រុកបាកាន បានរៀបចំដំណើរទស្សនកិច្ចកម្សាន្តនេះ ក្នុងគោលបំណង ឱ្យសិស្សានុសិស្សជួបជុំគ្នាបង្កើតបានជាអនុស្សាវរីយ៍លើទឹកដីអង្គរ ក្រោយពេលបញ្ចប់ការសិក្សារយៈពេល១២ឆ្នាំ ហើយក៏ជាពេលដែលត្រូវបែកគ្នា ដើម្បីបន្តការសិក្សា និងស្វែងរកអនាគត់រៀងៗខ្លួន ហើយនេះក៏ជាការចូលរួមគាំទ្រទេសចរណ៍ក្នុងស្រុកផងដែរ ជាពិសេសឱ្យសិស្សានុសិស្សដែលជាយុវជនបានឃើញស្នាដៃមរតកដ៏អស្ចារ្យរបស់ដូនតាខ្មែរបានបន្សល់ទុកឱ្យកូនចៅជំនាន់ក្រោយ ។ ឯកឧត្តមបណ្ឌិត ទី នរិន្ទ បានបន្តថា ក្រុមការងារចុះជួយមូលដ្ឋានស្រុកបាកាន តែងតែយកចិត្តទុកដាក់រួមចំណែកចូលរួមជួយជម្រុញការសិក្សារបស់សិស្សានុសិស្ស ដោយបានឧបត្ថម្ភគាំទ្រដល់ការរៀបចំការប្រឡងតេស៍សមត្ថភាពសិស្សទី១២ ការបើកវគ្គបង្រៀនបំប៉ន់តៀមប្រឡង កម្មវិធីចែករំលែកបទពិសោធន៍ការជ្រើសរើសជំនាញនិងស្វែងរកអាហារូបកណ៍ រួមនិងកម្មវិធីលើកទឹកចិត្តផ្សេងៗ ដើម្បីធ្វើយ៉ាងណា ឱ្យសិស្សទទួលបានភាគខ្ពស់ក្នុងការប្រឡងជាប់ និងទទួលបានលទ្ធផលល្អ ។ ឯកឧត្តមបណ្ឌិត ទី នរិន្ទ បានបន្តថាក្រុមការងារចុះជួយស្រុកបាកាន ក៏បានតៀមរួចជាស្រេចក្នុងការផ្តល់អាហាររូបកណ៍ និងរៀបចំផ្ទះសម្រាប់ស្នាក់នៅដោយមិនគិតប្រាក់នៅក្រុងភ្នំពេញ ជូនដល់សិស្សានុសិស្សដែលមានជីវភាពខ្វះខាត់ផងដែរ ។ ក្នុងនោះ ឯកឧត្តមបណ្ឌិត ទី នរិន្ទ បានលើកទឹកចិត្តដល់សិស្សានុសិស្សត្រូវមានភាពក្លាហាន កុំឱ្យអស់សង្ឃឹមចំពោះលទ្ធផលប្រឡងជាប់ធ្លាក់ ឬបានលទ្ធផលល្អមិនល្អ ព្រោះបច្ចុប្បន្ន រាជរដ្ឋាភិបាលមានការយកចិត្តទុកដាក់ខ្ពស់ដល់យុវជន ហើយមានជម្រើសច្រើនដើម្បីបន្តអភិវឌ្ឍន៍ខ្លួនឱ្យក្លាយជាធនធានល្អមានគុណភាព ឆ្ពោះទៅរកអនាគត់ល្អភ្លឺស្វាង សម្រាប់ខ្លួនឯង គ្រួសារ និងសង្គមជាតិ ឱ្យតែមានការតាំងចិត្តកុំបោះបង់ កុំយករឿងអបាយមុខដាក់ខ្លួន ព្រោះនេះគ្រាន់តែជាដំណាកកាលដំបូង មិនប្រាកដថាអ្នកប្រឡងជាប់សុទ្ធតែមានអនាគត់ល្អ ហើយអ្នកធ្លាក់គ្មានអនាគតល្អនោះទេ ។ឯកឧត្តមបណ្ឌិត ទី ថានី អ្នកដឹកនាំរៀបចំដំណើរកម្សាន្តនេះ បានឱ្យដឹងថា នេះជាឆ្នាំទី២ហើយដែលក្រុមការងារចុះជួយស្រុកាបាន បានរៀបចំដំណើរកម្សាន្តមកកាន់ខេត្តសៀមរាបជូនដល់សិស្សប្រឡងចប់បាក់ឌុប ដោយឆ្នាំនេះសិស្សជិត១០០០នាក់ត្រូវបែងចែកជា៣ក្រុម ធ្វើដំណើរមកបន្តបន្ទាប់គ្នា ចំពោះទីតាំងជូនទស្សនាមានដូចជា បារាយណ៍ទឹកថ្លា ប្រាសាទអង្គវវត្ត ប្រាសាទនាគព័ន្ធ ប្រាសាទព្រះខ័ន ប្រាសាទបាយ័ន ព្រះពន្លាជល់ដំរី និងប្រាសាទជាច្រើនទៀត ហើយក៏មានរៀបចំអាហារសាមគ្គីជុំគ្នា និងផ្តិតរូបថតអនុស្សាវរីយ៍ជុំគ្នាជូនដល់សិស្សានុសិស្សដែលបានចូលរួមទាំងអស់ផងដែរ ៕ ភិរុណ ពៅ

នាវាទេសចរណ៍អន្តរជាតិផ្ទុកទេសចរជាងមួយពាន់នាក់ចូលចតធ្វើទស្សនកិច្ចក្នុងខេត្ដព្រះសីហនុ

2024/10/29 10:18:46 am        190
Facebook Telegram Linkin
នាយនគរបាលអន្ដោប្រវេសន៍ច្រកទ្វារកំពង់ផែអន្ដរជាតិក្រុងព្រះសីហនុ បានឱ្យដឹងថា នាវាទេស ចរណ៍​អន្តរជាតិមួយគ្រឿង ឈ្មោះ VIKING ORION សញ្ជាតិ NORWAY ផ្ទុកទេសចរ​បរទេស​ចម្រុះ​ជាតិសាសន៍ជាងមួយពាន់នាក់ បានចូលចតនៅកំពង់ផែស្វយ័តអន្ដរជាតិក្រុងព្រះសីហនុ ដើម្បី​ធ្វើទស្សនកិច្ច នៅ ខេត្ដព្រះសីហនុ ចាប់ពីថ្ងៃទី២៩ ដល់ថ្ងៃទី៣០ ខែតុលានេះ ។នាវា​ទេសចរណ៍មួយនេះ ផ្ទុកអ្នកដំណើរចម្រុះជាតិសាសន៍ ដោយ​ធ្វើ​ដំណើរ​មក​ពី​ប្រទេស​វៀត​ណាម និងបន្តដំណើរទៅប្រទេសថៃ នៅរសៀលថ្ងៃទី៣០ ខែតុលា នេះ ។ នាវានេះ មាន​ភ្ញៀវ​ទេសចរ​ចំនួន​៨៦៩ ដែលមានជនជាតិអាមេរិក កាណាដា និងអូស្រ្ដាលី ច្រើនជាងគេ ។ការ​ចូលចតនាវាទេសចណ៍ បានផ្ដល់​ឱកាស​ឱ្យ​ភ្ញៀវ​ទេសចរ​ចម្រុះ​ជា​តិ​សាសន៍​ទស្សនា​ពី​វឌ្ឍនភាព ខេត្ដព្រះសីហនុ និងបានស្វែងយល់ពីវប្បធម៌រស់នៅរបស់ប្រជាពលរដ្ឋខ្មែរ និងធន​ធាន​ធម្ម​ជាតិ​ដ៏សម្បូរបែប របស់ខេត្ដព្រះសីហនុ និងអាចឱ្យភ្ញៀវទេ​សចរ​បន្ដ​ផ្សព្វ​ផ្សាយ​ពី​ខេត្ដ​ព្រះសីហនុ ក៏ដូចជាប្រទេសកម្ពុជា ក្នុងការ ទាក់ទាញភ្ញៀវទេសចរ សម្រាប់លើក​កម្ពស់​វិស័យ​ទេសចរណ៍​។ ម្យ៉ាងវិញទៀត ការចូលចតនេះ បានផ្ដល់អត្ថ ប្រយោជន៍មួយចំនួន​ដល់​ប្រជា​ពលរដ្ឋ​ខេត្ដ​ព្រះសីហនុ ដែលជាអ្នកលក់ផលិតទេសចរណ៍ ពិសេសអ្នករត់ តាក់ស៊ី ឬម៉ូតូកង់បី និង​ម៉ូតូឌុប ។ល៕

ថ្ងៃនេះភ្ញៀវទេសចរចំនួន ២២៧ នាក់ពីប្រទេសកាហ្សាក់ស្ថាន និងរុស្ស៊ី មកសម្រាកលំហែកម្សាន្ត នៅខេត្តព្រះសីហនុ

2024/10/25 01:52:33 pm        143
Facebook Telegram Linkin
ព្រះសីហនុ៖ តាមហ្វេសប៊ុករបស់លោក ឡុង ឌីម៉ង់ អភិបាលរងខេត្តព្រះសីហនុនៅព្រឹកថ្ងៃទី២៥ ខែតុលានេះ មានភ្ញៀវទេសចរណ៍ចំនួន ២២៧ នាក់ពីប្រទេសកាហ្សាក់ស្ថាន និងរុស្ស៊ី មកសម្រាកលំហែកម្សាន្តតាមបណ្ដាឆ្នេរ និងកោះ នៅខេត្តព្រះសីហនុ។លោក ឡុង ឌីម៉ង់ បានលើកឡើងថា៖«ថ្ងៃនេះជាថ្ងៃពិសេសមួយដែលរដ្ឋបាលខេត្ត រួមជាមួយគណៈគ្រប់គ្រងព្រលានយន្តហោះអន្តរជាតិខេត្តព្រះសីហនុ ទទួលភ្ញៀវទេសចរណ៍ចំនួន ២២៧ នាក់ ដែលមកពីប្រទេសកាហ្សាក់ស្ថាន និងរុស្ស៊ី មកសម្រាកលំហែកំសាន្តនៅលើឆ្នេរខ្សាច់-ឆ្នេរកោះរបស់យើង »។លោក ឡុង ឌីម៉ង់ បញ្ជាក់ថា បើតាមការគ្រោងទុក កញ្ចប់ទេសចរណ៍មួយនេះ នឹងត្រូវបានបន្តដឹកជញ្ជូនមកខេត្តយើងដោយផ្ទាល់ប្រមាណជា ៣ ជើងក្នុងមួយសប្តាហ៍ពេញមួយខែវិច្ឆិកាខាងមុខនេះ៕ 

ក្រសួងវប្បធម៌ និងវិចិត្រសិល្បៈ នឹងប្រារព្ធព្រឹត្តិការណ៍វប្បធម៌តាមតំបន់ លើកទី២ នៅខេត្តកំពត

2024/10/24 02:31:31 pm        426
Facebook Telegram Linkin
ក្រសួងវប្បធម៌ និងវិចិត្រសិល្បៈ នឹងប្រារព្ធព្រឹត្តិការណ៍វប្បធម៌តាមតំបន់ លើកទី២ ឆ្នាំ២០២៤ ក្រោម​ប្រធានបទ«មរតកយើង» រៀបចំឡើងក្នុងបរិវេណវិទ្យាល័យទូកមាស ស្រុកបន្ទាយមាស នៅ​ខេត្តកំពត ប្រព្រឹត្តទៅនៅថ្ងៃទី២-៣ ខែវិច្ឆិកា ឆ្នាំ២០២៤ខាងមុខនេះ។នាយកដ្ឋានសិល្បៈសូនរូប និងសិល្បៈសិប្បកម្ម ដែលជាអង្គភាពជំនាញ​ក្នុង​រៀបចំ​ព្រឹតិ្តការណ៍​ខាង​លើ​នេះ បានជម្រាបជូនដំណឹងដល់សាធារណជនជ្រាបថា នៅថ្ងៃសៅរ៍ទី២ ដល់ថ្ងៃ​អាទិត្យ ទី៣ ខែវិច្ឆិកា ឆ្នាំ២០២៤ ក្រសួងនឹងរៀបចំប្រារព្ធ “ព្រឹត្តិការណ៍វប្បធម៌តាមតំបន់” លើកទី២ នៅ​ក្នុង​បរិវេណវិទ្យាល័យទូកមាស ក្នុងស្រុកបន្ទាយមាស ខេត្តកំពត ដោយមាន​កិច្ច​សហការ​យ៉ាង​យក​ចិត្ត​ទុកដាក់ពីរដ្ឋបាលស្រុកបន្ទាយមាស និងវិទ្យាល័យទូកមាស។ ក្នុងព្រឹត្តិការណ៍នេះ មាន​កម្ម​វិធីសំខាន់ៗដូចជា៖ កម្មវិធីស្វែងយល់អំពីបេតិកភណ្ឌវប្បធម៌ខ្មែរ, ការបង្ហា​ញ​ទេព​កោសល្យ​សិល្បៈ​របស់​យុវជន, កម្មវិធីដាល់អំបុក និងការបង្ហាញសិល្បៈចម្អិនម្ហូបអាហារខ្មែរ, ពិព័រណ៍​បង្ហាញ​ក​​ម្មវិធីបណ្តុះបណ្តាលជំនាញសិល្បៈ, ពិព័រណ៍វត្ថុសិប្បកម្មប្រពៃណី និងការ​សម្តែង​សិល្បៈ​ទស្សនីយ​ភាព​ចម្រុះជាច្រើនទម្រង់ដូចជា៖ ការសម្តែងចាប៉ីដងវែង, ការសម្តែងល្ខោនបុរាណ (ខេត្តកណ្តាល), ការបង្ហាញគុនល្បុក្កតោ (ខេត្តកំពត), ការសម្តែង​សៀក​របស់អ​ង្គការ​ហ្វាពន្លឺ​សិល្បៈ (ខេត្តបាត់ដំបង), ការបង្ហាញទេពកោសល្យ របស់ក្រុមសិល្បៈអង្គការអេពិកអាត (ខេត្តកំពត), និងការសម្តែងយីកេអង្គឃ្លៃ (ស្រុកឈូក ខេត្តកំពត) ព្រមទាំង​កម្ម​វិធី​សិល្បៈ​វប្បធម៌​ជាច្រើនទម្រង់ទៀត។គួរបញ្ជាក់ផងដែរថា កម្មវិធីនេះបានរៀបចំម្តងរួចទៅហើយ ដោយលើកទី១ ឆ្នាំ២០២៣ ប្រព្រឹត្ត​ទៅ​នៅ​ខេត្តពោធិ៍សាត់ ដែលបានបង្ហាញ និងសម្តែងសិល្បៈ ដើម្បីបណ្ដុះទឹក​ចិត្ត​ស្រឡាញ់​មរតក​វប្បធម៌​ខ្មែរ​។ ព្រឹត្តិការណ៍វប្បធម៌តាមតំបន់លើកទី១នេះ បានប្រព្រឹត្តទៅនៅថ្ងៃទី​៨ និ​ង​៩​ខែមេ​សា​ឆ្នាំ២០២៣នៅសួន១៤មករា និងសារមន្ទីរក្រុងពោធិ៍សាត់ ដែលក្នុងនោះមានកម្មវិធី និង​ទស្សនីយ​ភាពជាច្រើនដូចជាការតាំងពិព័រណ៍ការបង្រៀនគូររូបធ្វើម្ហូប ធ្វើខ្លែង និងបង្ហោះខ្លែង ការ​សម្តែងសៀក ល្ខោនស្បែកធំ ល្ខោនបុរាណ និងចាប៉ីដងវែងជាដើម៕ អត្ថបទ រដ្ឋា

កម្ពុជាកំពុងទទួលបានកំណើនភ្ញៀវទេសចរឡើងវិញជាបណ្តើរៗនៅចុងឆ្នាំនេះ

2024/10/21 12:59:20 pm        292
Facebook Telegram Linkin
កម្ពុជាកំពុងទទួលបានកំណើនភ្ញៀវទេសចរកើនឡើងវិញជាបណ្តើរៗ បើគិតក្នុងរយៈពេលជិត ១០ ខែ ឆ្នាំ ២០២៤ នេះ បានកើន ឡើងក្នុងរង្វង់ជិត ៣០ ភាគរយ ខណៈ​បច្ចុប្បន្ន​ឈាន​ដល់​រដូវ​វិស្សមកាល ដែលភ្ញៀវទេសចរបរទេសតែងតែចេញសម្រាក់លំហែកាយ ។លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានថ្លែងប្រាប់ BTV ស្តីពី​កំណើនភ្ញៀវទេសចរនៅ កម្ពុជា នេះថា ជុំវិញវិស័យទេសចរនេះ កម្ពុជា​បាន​រៀបចំ​ព្រឹត្តិការណ៍​ធំ​ៗមានជាបន្តបន្ទាប់ ជាក់ស្តែង Gumball3000 នៅពេលឈាន ចូលមកកម្ពុជា ព្រឹត្តិការណ៍​មួយនេះបានធ្វើឱ្យពិភពលោក ស្គាល់កម្ពុជាកាន់តែខ្លាំង ដោយសារ Gumball300 មាន​ក្រុមល្បីៗជាច្រើន ជាពិសេសក្រុមសារព័ត៌មានតាមព្រឹត្តិការណ៍ Gumball3000 រួមជា​មួយ​សារ​ព័ត៌មានក្នុងស្រុកផងដែរ បានផ្សព្វផ្សាយព្រឹត្តិការណ៍នេះ ឱ្យផ្ទុះឡើងល្បីរន្ធឺពាស​ពេញ​ពិភពលោក​។លោកជំទាវ បន្តថា ក្រៅពីព្រឹត្តិការណ៍ Gumball300 ខាងលើ ខណៈបច្ចុប្បន្នបាន​ឈាន​ដល់​រដូវ​វិស្សម​កាល ដែលភ្ញៀវ បរទេសតែងតែដើរកម្សាន្ត ទោះបីបច្ចុប្បន្នក​ម្ពុជា​កំពុង​ស្ថិត​នៅ​ក្នុង​រដូវ​ភ្លៀង​ធ្លាក់​ក៏ដោយ ក៏កម្ពុជានូវទទួលបានកំណើនភ្ញៀវទេសចរ ផងដែរ ជាក់ស្តែងគិតមក​ដល់​ពេល​នេះឃើញថា កំណើនភ្ញៀវទេសចរបានកើនឡើងក្នុងរង្វង់ជិត ៣០ ភាគរយ បើគិតក្នុង​រយៈពេល ជិត ១០ខែ ឆ្នាំ ២០២៤ នេះ ដោយក្នុងនោះភ្ញៀវ​បទេស​ដែល​ចូល​មក​ទស្សនា​ភាគ​ច្រើន​រួម​មាន៖ ភ្ញៀវទេសចរវៀតណាម, ថៃ និងភ្ញៀវ ទេសចរនៅប៉ែកអឺរ៉ុប និងរុស្សីជាដើម ទោះ​បី​មានកំណើនតិចតួចក៏ដោយ ក៏ជាការចូលរួមដល់កំណើនទេសចរក្នុងស្រុកផងដែរ ។ ទាក់​ទិន​និង​ទេសចរ​នេះ លោកជំទាវ រំពឹងថា កម្ពុជានឹងទទួលបានកំណើនទេសចរជាបន្តបន្ទាប់ទៀត ជាពិសេស​នៅពេលកម្ពុជា មានការរៀបចំព្រឹត្តិការណ៍ផ្សេងៗ។ទាក់ទិនវិស័យ​ដឹក​ជញ្ជូនវិញ, ឯកឧត្តម ស៊ីន ចាន់សិរីវត្ថា អ្នកនាំពាក្យនិង​ជា​អនុរដ្ឋលេខាធិការ​នៃ​អាកាសចរ​ស៊ីវិល ថ្លែងឱ្យ ដឹងថា ជុំវិញជើងហោះហើរជាអន្តរជាតិនេះ, បើគិតតាមការប៉ាន់ស្មាន នៅ​ក្នុងរយៈពេលជិត ១០ ខែ ឆ្នាំ ២០២៤ ការហោះហើរជា អន្តរជាតិ មានកំណើន​កើន​ឡើង​ក្នុង​រង្វង់​ប្រមាណ ២០ ដល់ ៣០ ភាគរយ បើធៀបទៅនិងរយៈពេលដូចគ្នានិងឆ្នាំ២០២៣ ដែលនេះ បាន​បង្ហាញនូវការងើបឡើងវិញជាបណ្តើរៗ ទោះបីកត្តា​ខាងក្រៅមិនទា​ន់​មានភាព​ប្រាកដ​ប្រជា​ក៏ដោយ​។ជុំវិញវិស័យទេសចរ, គណៈកម្មការគ្រប់គ្រងនិងអភិវឌ្ឍន៍ទេសចរណ៍សៀមរាបអង្គរ បានធ្វើ​បច្ចុប្បន្នភាពផែនការអភិវឌ្ឍន៍ទេសចរណ៍ ខេត្តសៀមរាប ឆ្នាំ២០២៥-២០២៨ ឱ្យ​កាន់​តែ​មាន​សង្គតិភាពទាំងលើទិដ្ឋភាពខ្លឹមសារ និងយន្តការអនុវត្ត សំដៅធានាប្រសិទ្ធភាព នៅពេល​ដែល​ផែនការ​នេះ​ត្រូវបានអនុម័ត នាពេលខាងមុខ។ ផែនការអភិវឌ្ឍន៍ សម្រាប់រយៈពេល៤ឆ្នាំនេះ នឹង​ចូលរួមចំណែកឆ្លើយ តបទៅនឹងបំណងប្រាថ្នានានារបស់រាជរដ្ឋាភិបាលមាន ឧស្សាហកម្ម​ទេសចរណ៍ឧស្សាហកម្មអាកាសចរណ៍ និងប្រជាពលរដ្ឋ ដូចដែល មានចែងក្នុង​ផែនការ​មេ​អភិវឌ្ឍន៍​ទេសចរណ៍ខេត្តសៀមរាប ឆ្នាំ២០២១-២០៣៥។ តាមរយៈនេះ, ខេត្តសៀមរាប​នឹង​ក្លាយ​ជា​គោលដៅទេសចរណ៍ស្នាក់នៅយូរ និងចំណាយច្រើន គ្រប់រដូវកាល ប្រកបដោយ​គុណ​ភាព ភាពធន់ និរន្តរភាព និងទាក់ទាញភ្ញៀវទេសចរអន្តរ ជាតិប្រមាណ ៧.៥ លាននាក់ និង​ភ្ញៀវ​ទេសចរ​ជាតិ ប្រមាណជាង ១០ លាននាក់ ដោយបង្កើតការងារសរុបប្រមាណ ១,៦ លាននាក់ ក្នុង​នោះការងារដោយផ្ទាល់ ក្នុងវិស័យទេសចរណ៍ប្រមាណ ៩៤ ម៉ឺននាក់ និងនាំមក​នូវ​ចំណូល​សេដ្ឋកិច្ច​ជាតិ​ប្រមាណ ៥.៩ ពាន់លាន ដុល្លារអាមេរិកនៅឆ្នាំ២០៣៥៕ អត្ថបទ៖ សុន រ៉ាឌី 

ការសម្តែងគុនល្បុក្កតោ-សៅលីញ នៅហឺណាន មានអ្នកចូលទស្សនាតាមអនឡាញ ១០០លាននាក់​នៅប្រទេសចិន

2024/10/21 11:45:37 am        186
Facebook Telegram Linkin
នៅក្នុងអំឡុង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ដឹកនាំ​ក្រុម​កីឡា​គុន​ល្បុក្កតោ ១២រូប ចូលរួម កម្មវិធី «ការសម្តែងក្បាច់គុនរួមគ្នា ល្បុក្កតោ-សៅលីញ ហឺណាន-កម្ពុជា» នៅ​ខេត្តហឺណាន ប្រទេសចិន ថ្ងៃទី១៩ ខែតុលានេះ បានទាក់​ទាញ​ប្រជាជន​ចិន​ចូលរួម​ទស្សនា​តាម​ប្រព័ន្ធ​ផ្សព្វផ្សាយបណ្តាញព័ត៌មានសង្គមចិនប្រមាណជាង១០០លាននាក់ ក្នុងរយៈពេល​ប្រមាណ​តែ​២៤ម៉ោង។នៅក្នុងឱកាសដឹកនាំប្រតិភូកម្ពុជា ត្រឡប់មកដល់មាតុប្រទេសវិញថ្ងៃទី២០ ខែតុលានេះ ឯកឧត្តមរដ្ឋមន្ត្រី ហួត ហាក់ មានថ្លែងថា នេះជាលើកដំបូង ក្រុមកីឡាគុនល្បុក្កតោកម្ពុជា បាន​សម្តែង​ក្បាច់​គុនរួមគ្នា ជាមួយក្រុមគុនសៅលីញ ក្នុងពិធីបុណ្យក្បាច់គុនសៅលីញវូស៊ូអន្តរជាតិ លើកទី១៣ (The 13th China Zhengzhou International Shaolin Wushu Festival) ដែល​តាមប្រតិភូ៥៦ប្រទេសចូលរួម នៅខេត្តហឺណាន។ឯកឧត្តម បន្តថា តាមរយៈកម្មវិធី «ការសម្តែងក្បាច់គុនរួមគ្នា ល្បុក្កតោ-សៅលីញ» មានអ្នក​ចូល​ទស្សនា​តាម​ប្រព័ន្ធផ្សាយផ្សាយបណ្តាញព័ត៌មានសង្គមអនឡាញចិនប្រមាណ ១០០លាននាក់ ពិសេ​ស​ជាងនេះ គឺកម្ពុជា ទទួលបានឱកាសផ្សព្វផ្សាយកាន់តែទូលំទូលាយនូវក្បាច់គុនខ្មែរ វប្បធម៌ ប្រពៃណី និងសក្តានុពលទេសចរណ៍ដ៏សម្បូរបែបរបស់ប្រទេសកម្ពុជា នៅក្នុងប្រទេសចិន និង​ទៅកាន់ពិភពលោកទាំងមូល។ ឯកឧត្តមរដ្ឋមន្ត្រី ហួត ហាក់ បញ្ជាក់ថា នេះជាលើកទី២ ដែលក្រុមកីឡាគុនល្បុក្កតោ បាន​សម្តែង​ក្បាច់​គុន​រួមគ្នា ជាមួយក្រុមកីឡាគុនសៅលីញ ខណៈ ការសម្តែងលើកទី១ គឺបានធ្វើឡើង​នៅ​ក្នុង​ពិធី​អបអរសាទរបើក «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» កាល​ពី​ខែ​មេសា ឆ្នាំ២០២៤ កន្លងទៅនេះ នៅលើទឹកដីសៀមរាប-អង្គរ ហើយកាលនោះ កម្ពុជា​យើង​ទទួល​បាន​ឱកាសផ្សព្វផ្សាយគោលដៅទេសចរណ៍កម្ពុជាច្រើនទៅកាន់ប្រទេសចិន និងទៅកាន់​ពិភព​លោក​ផងដែរ។សូមបញ្ជាក់ថា នៅក្នុងឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤នេះ កម្ពុជា ចិន សហការៀបចំព្រឹត្តិការណ៍ធំៗចំនួន៣ទៀត រួមមាន ទី១ ព្រឹត្តិការណ៍​តាំង​បង្ហាញ​ម្ហូប​អាហារ​កម្ពុជា ចិន នៅខេត្តសៀមរាប នៅថ្ងៃទី២៦ ដល់ថ្ងៃទី២៨ ខែតុលានេះ ទី២ ព្រឹត្តិការណ៍​ទេសចរណ៍ វប្បធម៌ សាសនា កម្ពុជា ចិន និងទី៣ ព្រឹត្តិការណ៍ពិព័រណ៌ទេសចរណ៍ កម្ពុជា ចិន ដែល​ព្រឹត្តិការណ៍នឹងរៀបចំក្នុងខែវិច្ឆិកាឆ្នាំ២០២៤ ហើយសម្រាប់កម្មវិធីបិទ ឆ្នាំនៃ​ការ​ផ្លាស់​ប្តូរ​ប្រជាជន និង​ប្រជាជន កម្ពុជា-ចិន ២០២៤ នឹងប្រារព្វពិធីបិទនៅដើមឆ្នាំ២០២៥ នៅខេត្តហឺណាន ប្រទេសចិន៕ អត្ថបទ ស៊ុម សុខជា 

បណ្ដាញសង្គម

ព័ត៌មានថ្មីៗ

កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦
06/13/2026 05:06 PM
Facebook Telegram Linkin
យន្តហោះចម្បាំងស៊ុយអែត ស្ទាក់យន្តហោះប្រយុទ្ធ​របស់​រុស្ស៊ី នៅជិតព្រំដែន
06/13/2026 05:06 PM
Facebook Telegram Linkin
លីបង់រាយការណ៍ពីការវាយប្រហាររបស់អ៊ីស្រាអែលនៅភាគខាងត្បូង ក្រោយ​មាន​ការព្រមានជម្លៀស
06/13/2026 05:06 PM
Facebook Telegram Linkin
ប៉ាគីស្ថាន និងអេហ្ស៊ីបស្វាគមន៍វឌ្ឍនភាព រវាងអាមេរិក និងអ៊ីរ៉ង់ ដោយសង្ឃឹមមាន​កិច្ចព្រមព្រៀងសន្តិភាពដំបូង
06/13/2026 05:06 PM
Facebook Telegram Linkin
ចំនួនអ្នកស្លាប់ដោយសារ​​រញ្ជួយដី នៅហ្វីលីពីន កើនឡើងដល់ ៦១នាក់ ខណៈប្រតិបត្តិការ​ជួយ​សង្គ្រោះកំពុង​បន្ត​
06/13/2026 05:06 PM
Facebook Telegram Linkin
នាយករដ្ឋមន្ត្រីឥណ្ឌា លោក Modi ចាប់ផ្តើមដំណើរទស្សនកិច្ចផ្លូវការទៅកាន់បារាំង និងស្លូវ៉ាគី
06/13/2026 05:06 PM
Facebook Telegram Linkin
[UPDATE] គ្រោះថ្នាក់ធ្លាក់យន្តហោះរបស់កងទ័ពអាកាសឥណ្ឌា មាន​អ្នកស្លាប់ ៥នាក់​
06/13/2026 05:06 PM
Facebook Telegram Linkin
យន្តហោះដឹកជញ្ជូនយោធាធ្លាក់ នៅឥណ្ឌា ខណៈចំនួនអ្នកស្លាប់ និងរបួស មិន​ទាន់​ដឹង​នៅ​ឡើយទេ
06/13/2026 04:06 PM
Facebook Telegram Linkin
ឱកាសការងារ ៣៥៥០កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវ​បាននាំ​យក​ទៅផ្សព្វផ្សាយជូន​ពលរដ្ឋដល់មូលដ្ឋានខេត្តសៀមរាប
06/13/2026 04:06 PM
Facebook Telegram Linkin
វិស័យរដ្ឋបញ្ជាក់ពីការ​ប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់ និងនីតិវិធីគយដល់វិស័យ SMEs
06/13/2026 04:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.