BTV NEWS

កម្ពុជាគ្រោងនឹងទិញយន្តហោះផលិតដោយចិនផ្ទាល់ ប្រភេទC909 regional ២០គ្រឿង ខណៈ១០គ្រឿងបានបញ្ជាទិញរួចហើយ

អាកាសយានដ្ឋានអន្តរជាតិតេជោ ស្វាគមន៍យ៉ាងកក់ក្ដៅភ្ញៀវទេសចរដំបូងគេមកពីប្រទេសចិននៅព្រឹកនេះ

ក្រសួងទេសចរណ៍៖ កម្ពុជានៅតែជាគោលដៅទេសចរណ៍សុវត្ថិភាព និងរាក់ទាក់ស្វាគមន៍

ប្រតិភូក្រសួងទេសចរណ៍ទស្សនកិច្ចសារមន្ទីរ ព្រះស្រីឦសានវរ្ម័ន ស្វែងយល់ពីប្រវត្តិសេដ្ឋកិច្ច និងរូបិយវត្ថុកម្ពុជា

វប្បធម៌ និងទេសចរណ៍

កម្ពុជាមានផ្ទៃដីគម្រប់ព្រៃឈើជាង ៨លានហិកតា និងមានសត្វព្រៃកម្ររស់នៅជាច្រើនប្រភេទ

ភ្នំពេញ៖ នាពេលបច្ចុប្បន្ននេះ ប្រទេសកម្ពុជាមានគម្របព្រៃឈើចំនួន ៤៦,៨៦ភាគរយ ដែលស្មើនឹង៨,៥លានហិកតា ហើយនៅក្នុងតំបន់ព្រៃឈើទាំងអស់នោះ មានសត្វព្រៃកម្រជាច្រើនប្រភេទកំពុងរស់នៅ រួមទាំងជីវចម្រុះជាច្រើនទៀត ដែលបម្រើដល់វិស័យទេសចរណ៍ផងដែរ ។ក្នុងសន្និសីទសារព័ត៌មានស្តីពី សមិទ្ធផលសម្រេចបានរយៈពេល៥ឆ្នាំ របស់ក្រសួងបរិស្ថាន រៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី៣០ ខែសីហា ឆ្នាំ២០២២ ឯកឧត្តម នេត ភក្ត្រា អ្នកនាំពាក្យក្រសួងបរិស្ថាន មានប្រសាសន៍ថា គិតត្រឹមខែសីហា ឆ្នាំ២០២២ កម្ពុជាមានតំបន់ការពារធម្មជាតិ និងរបៀងអភិរក្សជីវចម្រុះ ស្ថិតនៅក្រោមក្រសួងបរិស្ថាន មានចំនួន៧៦កន្លែង គឺមានន័យថាចាប់ពីឆ្នាំ២០១៦មក កំណើតផ្ទៃដីការពារធម្មជាតិកើនពី២៣ មក៧៦តំបន់ កើនពីផ្ទៃដីពី ៣លាន ២សែនហិកតា ទៅ៧លាន ៣សែនហិកតា ស្មើនឹង៤១ភាគរយ នៃផ្ទៃដីប្រទេសកម្ពុជា ។ឯកឧត្តមបន្តថា បើប្រៀបធៀបនឹងបណ្ដាប្រទេសផ្សេងៗទៀត នៅក្នុងតំបន់អាស៊ី កម្ពុជាដែលមានផ្ទៃដីអភិរក្ស ៤១ភាគរយនេះ គឺមានទំហំធំទី២ បន្ទាប់ពីប្រទេសប៊ូតង់ ហើយផ្ទៃដីនេះ បើប្រៀបធៀបទៅនឹងគោលការណ៍អភិរក្សជីវចម្រុះ ដែលកំណត់ដោយអាត់ស៊ី កម្ពុជាមានផ្ទៃដីអភិរក្សធំជាង ២ដង នៃការកំណត់ដោយគោលការណ៍អភិរក្សជីវចម្រុះ ដែលមានត្រឹមតែ១៧% ។ឯកឧត្តម នេត ភក្ត្រា បន្ថែមថា កម្ពុជាមានរបៀងអភិរក្សជីវចម្រុះមានចំនួន៣កន្លែង ហើយតំបន់ការពារធម្មជាតិ ៧៣កន្លែងនោះ មានឧទ្យាជាតិចំនួន ១០តំបន់, ដែនជម្រកសត្វព្រៃចំនួន ១៩តំបន់, តំបន់ការពារទេសភាព ១៤តំបន់, តំបន់ប្រើប្រាស់ច្រើនយ៉ាងចំនួន ១០តំបន់, តំបន់រ៉ាមសាចំនួន ៥តំបន់, តំបន់បេតិកភ័ណ្ឌធម្មជាតិចំនួន ១៣តំបន់ និងតំបន់ឧទ្យាជាតិសមុទ្រចំនួន ២តំបន់ ហើយគ្រោងបង្កើតឧទ្យាជាតិសមុទ្រមួយទៀត នៅក្នុងខេត្តកែប ដែលសម្បូរទៅដោយជីវចម្រុះជាច្រើនប្រភេទ ។អ្នកនាំពាក្យក្រសួងបរិស្ថាន បន្តទៀតថា រយៈពេល៥ឆ្នាំមកនេះ ក្រសួងបានផ្ដោតសំខាន់ទៅលើការការពារ និងអភិរក្ស ដោយផ្ដោតទៅលើប្រសិទ្ធភាព ការរៀបចំនៃការការពារតំបន់ ក្នុងនោះតំបន់ការពារធម្មជាតិ និងរបៀងជីវចម្រុះ ទាំង៧៦ គឺត្រូវរៀបចំជាប្រព័ន្ធយ៉ាងប្រទាក់ក្រឡា ស្របតាមគោលការណ៍គ្រឹះ នៃការរៀបចំតំបន់ការពារធម្មជាតិ សំដៅធានាសម្បូរបែប នៃជីវិតសត្វលោកជីវចម្រុះ និងការវិវឌ្ឍនៃជីវិត មុខងារសេវាកម្មរបស់អេកូឡូស៊ី ដែលរួមមាននិយ័តកម្មទឹក ជលផល ក៏ដូចជាគុណភាពដីជាដើម និងខឿនសេដ្ឋកិច្ច ។ឯកឧត្តម នេត ភក្ត្រា បានបញ្ជាក់ថា ចាប់ពីឆ្នាំ២០១៦មក រាជរដ្ឋាភិបាលបានផ្ទេរតំបន់អភិរក្សព្រៃឈើ ១៣កន្លែង និងតំបន់ព្រៃផ្ដល់ផលចំនួន ៥កន្លែង ពីក្រសួងកសិកម្ម រុក្ខាប្រមាញ់ និងនេសាទ មកក្រសួងបរិស្ថាន ហើយបានផ្ទេរគម្រោងដីសម្បទានសេដ្ឋកិច្ចចំនួន ៧៣កន្លែង ពីក្រសួងបរិស្ថាន ទៅក្រសួងកសិកម្ម ។ តាមសំណើររបស់ក្រសួងបរិស្ថាន រាជរដ្ឋាភិបាលបានដាក់តំបន់ទាំង១៨នេះ ទៅជាតំបន់ការពារធម្មជាតិ ៕ អត្ថបទ៖ បាន សុខរិទ្ធិ

កម្ពុជា-អង់គ្លេស ប្តេជ្ញាបង្កើនកិច្ចសហប្រតិបតិ្តការលើវិស័យវប្បធម៌ឲ្យកាន់តែប្រសើរ

ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអនុញ្ញាតឲ្យលោកជំទាវ Tina Redshaw ឯកអគ្គរាជទូតវិសាមញ្ញ និងពេញសមត្ថភាព នៃចក្រភពអង់គ្លេស ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងជម្រាបលា នៅរសៀលថ្ងៃទី១៨ ខែសីហា ឆ្នាំ២០២២ ខណៈដែលលោកជំទាវ បានបញ្ចប់អណតិ្តបេសកកម្មការទូតនៅកម្ពុជា។លោកជំទាវភឿង សកុណា បានសម្តែងនូវការស្វាគមន៍ និងថ្លែងអំណរគុណចំពោះចក្រភពអង់គ្លេស តាមរយៈស្ថានទូតចក្រភពអង់គ្លេស ប្រចាំព្រះរាជាណាចក្រកម្ពុជា ដែលបានផ្តល់ការគាំទ្រ និងបច្ចេកទេសដល់វិស័យវប្បធម៌នៅកម្ពុជា ជាពិសេសក្នុងកាលៈទេសៈ នៃការរាលដាលជំងឺកូវីដ-១៩ ដែលបានចូលរួមចំណែកអាចឲ្យកម្ពុជា បើកដំណើរការទាំងសេដ្ឋកិច្ច និងសង្គមឡើងវិញ។ទន្ទឹមនឹងនោះភាគីទាំងពីរ បានលើកឡើងអំពីសមិទ្ធផល នៃកិច្ចសហប្រតិបតិ្តវប្បធម៌រវាងកម្ពុជា-អង់គ្លេស ទាំងវប្បធម៌រូបី និងអរូបី ពិតមែនកម្ពុជា-អង់គ្លេស ឋិតនៅឆ្ងាយពីគ្នា ប៉ុន្តែយើងបានធ្វើកិច្ចការរួមគ្នាច្រើន លើវិស័យវប្បធម៌។ ជាក់ស្តែងអង់គ្លេស តែងបានរៀបចំព្រឹតិ្តការណ៍ប្រគុំតន្រី្ត រួមគ្នាជារៀងរាល់ឆ្នាំ ជាពិសេស គឺកិច្ចសហប្រតិបតិ្តរវាងរដ្ឋាភិបាល និងរដ្ឋាភិបាល នៃប្រទេសទាំងពីរ គឺមានវត្ថុបុរាណ ជាច្រើនបានបញ្ជូនពីអង់គ្លេស នូវសម្បតិ្តវប្បធម៌ទាំងនោះត្រឡប់មកមាតុភូមិកម្ពុជាវិញ។ លោកជំទាវ បណ្ឌិតសភាចារ្យ ភឿង សកុណា និងលោកជំទាវ Tina Redshaw សំណូមពរគ្នាទៅវិញទៅមក ដោយធ្វើយ៉ាងណា ឲ្យកិច្ចសហប្រតិបតិ្តការលើវិស័យវប្បធម៌រវាងប្រទេសពីរ រីកចម្រើនជាបន្តបន្ទាប់៕

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

ភ្នំពេញ៖ ការសម្ដែងរបាំក្បាច់បុរាណខ្មែរទ្រង់ទ្រាយធំ កាន់តែខិតមកដល់ ខណៈសិល្បករ-សិល្បការិនី ជិត ២០០នាក់ កំពុងហាត់សមយ៉ាងយកចិត្តទុកដាក់បំផុតទាំងយប់ទាំងថ្ងៃ ដើម្បីធ្វើយ៉ាងណាឱ្យការសម្ដែងដ៏កម្រមួយនេះ ប្រកបដោយភាពអស្ចារ្យសម្រាប់ទស្សនិកជនទាំងជាតិ និងអន្តរជាតិ។ក្រឡេកមកមើលលើបណ្ដាញសង្គមក្នុងប្រទេសកម្ពុជានាពេលនេះ សង្កេតឃើញថា មហាជនកំពុងចាប់អារម្មណ៍ខ្លាំង និងមានការជជែកគ្នាជាច្រើនពីមហោស្រពរបាំក្បាច់បុរាណខ្មែរ រឿង «ព្រះបាទជ័យរវ្ម័នទី៧ ដកស្រង់ត្រង់ឈុត ស្នាព្រះហស្ត និងសមិទ្ធផលនៃមហាវីរក្សត្រទាំង៣អង្គ»។ មហាជន និងអ្នកស្នេហាសិល្បៈវប្បធម៌ជាតិ បានធ្វើការចែករំលែកព្រោងព្រាតអំពាវនាវសូមឱ្យប្រជាជនខ្មែរទិញសំបុត្រចូលទស្សនាព្រឹត្តិការណ៍ដ៏កម្រមួយនេះ ខណៈដែលបច្ចុប្បន្ននេះមានប្រទេសជិតខាងកំពុងបញ្ជៀបវប្បធម៌របស់ពួកគេចូលមកក្នុងប្រទេសកម្ពុជា។ ដូច្នេះហើយមានតែគាំទ្រ សិល្បៈវប្បធម៌ជាតិរបស់ខ្លួនប៉ុណ្ណោះ ទើបអាចជួយលើកតម្កើនវប្បធម៌ជាតិឱ្យថ្កុំថ្កើន មិនអាចមានប្រទេសណាមកបន្លំបានឡើយ។លោក ឈី កុលបុត្រា ដែលជាប្រធានដឹកនាំក្រុមការងារនៃកម្មវិធីមហោស្រពរបាំក្បាច់បុរាណខ្មែរ បានបង្ហាញក្ដីសោមនស្សរីករាយយ៉ាងក្រៃលែង ក្នុងនាមជាអ្នកដឹកនាំរៀបចំកម្មវិធី ក្រោយឃើញសន្ទុះការគាំទ្រយ៉ាងផុលផុសនៅលើបណ្ដាញទំនាក់ទំនងសង្គមនានា។លោកបានមានប្រសាសន៍ថា ពិតជាសប្បាយរីករាយណាស់ ដែលឃើញយុវជន យុវនារី សម័យនេះ បានយល់ច្បាស់ពីអ្វីដែលជាសម្បត្តិវប្បធម៌ និងប្រពៃណីខ្មែរយើង។លោកបានបន្ថែមថា ដោយស្រុកមានសន្តិភាព នាំឱ្យយុវជនមានឱកាសនៅក្នុងការគិតគូរ និងថែរក្សា ការពារ សិល្បៈ វប្បធម៌ខ្មែរ បន្សល់ទុកពីបុព្វបុរសខ្មែរ តាមរយៈការចូលរួមចំណែកជួយលើកស្ទួយទាំងអស់គ្នា ដូចកម្មវិធីមហោស្រពសិល្បៈរបាំក្បាច់បុរាណខ្មែរនេះជាដើម។ដោយសារសន្ទុះនៃការគាំទ្រកាន់តែកើនឡើងខ្លាំង ការលក់សំបុត្រក៏ដាច់អស់ច្រើនដែរ។ ដូច្នេះឆ្លៀតក្នុងឱកាសនេះ លោក កុលបុត្រា ក៏បានអំពាវនាវផងដែរថា៖ «ដោយសារមានការគាំទ្រច្រើន សំបុត្រក៏បានលក់អស់ច្រើនដែរ ហើយកន្លែងអង្គុយទស្សនាមានកំណត់។ ដូច្នេះសូមបងប្អូនប្រញាប់រួសរាន់ឡើង ប្រញាប់ទិញសំបុត្រចូលទស្សនា ដើម្បីកុំឱ្យខកខានផ្ទាំងទស្សនីយភាពដ៏អស្ចារ្យនេះ»។គួរឱ្យដឹងថា ផ្ទាំងទស្សនីយភាពដ៏អស្ចារ្យនេះនឹងបង្ហាញខ្លួននៅសាលន្និសីទចតុម្មុខ នាថ្ងៃទី ២៧ និង ២៨ ខែសីហា ឆ្នាំ ២០២២ ខាងមុខនេះ ក្រោមកិច្ចផ្ដួចផ្ដើមពីសហភាពសហព័ន្ធយុវជនកម្ពុជាខេត្តស្វាយរៀង ជាមួយនឹងសាលារបាំនរោត្ដម បុប្ផាទេវី កំពុងតែបន្តលក់សំបុត្រជារៀងរាល់ថ្ងៃ។សំបុត្រមានលក់តាមរយៈអនឡាញតេឡេក្រាម ០៧៧ ៤៤៤ ៣៣៥ និងមានការលក់ផ្ទាល់នៅសាលសន្និសីទចតុម្មុខ ចាប់ពីថ្ងៃ២២ ដល់ថ្ងៃទី២៨ ខែសីហា ឆ្នាំ២០២២។ *កន្លែងមានកំណត់!តម្លៃសំបុត្រ៖សំបុត្រពិសេស (VIP) ១០០,០០០៛តំបន់ពណ៌បៃតង (Green Zone) ៤០,០០០៛តំបន់ពណ៌ខៀវ (Blue Zone) ២០,០០០៛សម្រាប់ព័ត៌មានលំអិតសូមទំនាក់ទំនងមកលេខ ០៧៧ ៤៤៤ ៣៣៥មិនត្រឹមតែជាការចូលរួមទស្សនា តែជាការគាំទ្រ លើកស្ទួយ និងរក្សាវប្បធម៌ខ្មែរយើងទាំងអស់គ្នា!!!

ឯកឧត្តម រដ្ឋ សារ៉ាវុធ ដឹកនាំឧត្តមមន្រ្តីសេដ្ឋកិច្ចអាស៊ាន បំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត

ភ្នំពេញ៖ កាលពីថ្ងៃទី១៩-២២ ខែកក្កដា ឆ្នាំ២០២២ ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ និងជាប្រធានកិច្ចប្រជុំឧត្តមមន្រ្តីសេដ្ឋកិច្ចអាស៊ានសម្រាប់ឆ្នាំ២០២២ បានដឹកនាំឧត្តមមន្រ្តីសេដ្ឋកិច្ចអាស៊ាន អមដំណើរដោយអគ្គលេខាធិការរងអាស៊ាននិងសហការី ទៅបំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត។បេសកកម្មនេះ មានគោលបំណងវាយតម្លៃនូវវឌ្ឍនភាពរបស់ទីម័រខាងកើតក្នុងដំណើរការស្នើសុំចូលជាសមាជិកអាស៊ាន ក្រោមសសរស្តម្ភសហគមន៍សេដ្ឋកិច្ចអាស៊ាន ដោយពិនិត្យមើលគោលនយោបាយជាតិ បទប្បញ្ញត្តិ និងគំនិតផ្តួចផ្តើមនានា ដើម្បីឱ្យមានអនុលោមភាពស្របតាមគោលការណ៍អាស៊ាន។ភាគីទាំង២ ក៏បានពិភាក្សាផ្លាស់ប្តូរយោបល់ក៏ដូចជាចែករំលែកបទពិសោធន៍ទៅវិញទៅមក ជាពិសេសឱកាស បញ្ហាប្រឈម សក្តានុពល ក៏ដូចជាចំណុចខ្វះខាតនានារបស់ទីម័រខាងកើតដើម្បីអាចឱ្យអាស៊ានជួយកសាងសមត្ថភាព និងជំនួយបច្ចេកទេសផងដែរ។ ក្នុងនោះមានក្រសួងនិងស្ថាប័នរបស់ទីម័រខាងកើតចំនួន៨ ដែលដឹកនាំដោយឯកឧត្តម Domingos Lopes Antunes អនុរដ្ឋមន្រ្តីក្រសួងទេសចរ ពាណិជ្ជកម្ម និងឧស្សាហកម្ម ក្នុងនាមជាសហប្រធាននៃកិច្ចប្រជុំ បានចូលរួមធ្វើបទបង្ហាញជូនដល់គណៈប្រតិភូដើម្បីទទួលបានព័ត៌មានបន្ថែម។ក្រសួងនិងស្ថាប័នទាំងនោះមានដូចជា ក្រសួងហិរញ្ញវត្ថុ ក្រសួងកសិកម្មនិងនេសាទ ក្រសួងសាធារណការនិងទំនាក់ទំនង ក្រសួងប្រេងកាត និងរ៉ែ ក្រសួងទេសចរណ៍ ពាណិជ្ជកម្ម និងឧស្សាហកម្ម សភាពាណិជ្ជកម្មនិងឧស្សាហកម្ម អាជ្ញាធរគយ សមាគមសណ្ឋាគារ ព្រមទាំងវិស័យឯកជននានាផងដែរ។ឯកឧត្តមអគ្គនាយក ក៏បានដឹកនាំគណៈប្រតិភូអាស៊ានធ្វើទស្សនកិច្ច នៅមជ្ឈមណ្ឌលជាតិសម្រាប់ការងារនិងការបណ្តុះបណ្តាលជំនាញ កំពង់ផែឌីលី និងកំពង់ផែ Tibar Bay ដើម្បីពិនិត្យ និងវាយតម្លៃលើការបណ្តុះបណ្តាលកសាងធនធានមនុស្ស ក៏ដូចជាសក្តានុពលនៃការដឹកជញ្ជូនទំនិញរបស់ទីម័រខាងកើត ផងដែរ។ក្នុងអំឡុងបេសកកម្មនេះដែរ ឯកឧត្តមអគ្គនាយក ក៏បានជួបពិភាក្សាទ្វេភាគីជាមួយលោកជំទាវ Adaljiza Magno រដ្ឋមន្រ្តីក្រសួងការបរទេសទីម័រខាងកើត លោកស្រីទីប្រឹក្សាធនាគារ ADB និងលោកស្រី Maika Oshikawa ប្រធាននាយកដ្ឋានពិនិត្យនិងវាយតម្លៃការចូលជាសមាជិកអង្គការពាណិជ្ជកម្មពិភពលោក ដើម្បីជំរុញកិច្ចសហប្រតិបត្តិការតំបន់ បន្ថែមទៀត។បេសកកម្មរយៈពេល៤ថ្ងៃនេះ បានប្រព្រឹត្តទៅដោយទទួលបានផ្លែផ្កាគាប់ប្រសើរ។ ប្រទេសទីម័រខាងកើត បានប្តេជ្ញាបន្តផ្តល់កិច្ចសហប្រតិបត្តិការលើវិស័យពាក់ព័ន្ធជាមួយអាស៊ាន ដើម្បីពន្លឿននីតិវិធីក្នុងការស្នើសុំចូលជាសមាជិកអាស៊ាន៕

សម្តេចតេជោ ហ៊ុន សែន ផ្ញើសារអបអរសាទរខួប៥ឆ្នាំ នៃការដាក់បញ្ចូលតំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោក

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី៨ ខែកក្កដា ឆ្នាំ២០២២នេះ បានផ្ញើសារអបអរសាទរខួប៥ឆ្នាំ នៃការដាក់បញ្ចូលតំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោក។សម្តេចតេជោ ហ៊ុន សែន មានប្រសាសន៍ថា នៅថ្ងៃទី៨ ខែកក្កដា ឆ្នាំ២០២២នេះជាខួប៥ឆ្នាំហើយ នៃការដាក់បញ្ចូលតំបន់ប្រាសាទសំបូរព្រៃគុក ជាសម្បត្តិបេតិកភណ្ឌពិភពលោក (៨ កក្កដា ២០១៧-៨ កក្កដា ២០២២)។ការដាក់សម្បត្តិវប្បធម៌ និងប្រាសាទបុរាណទាំងនេះ មិនត្រឹមតែទទួលបានការគាំពារជាអន្តរជាតិនោះទេ តែក៏បានជួយផ្សព្វផ្សាយសម្បត្តិវប្បធម៌ និងប្រាសាទបុរាណរបស់ខ្មែរទៅកាន់ឆាកអន្តរជាតិផងដែរ។ ក្រោយចុះបញ្ជីជាសម្បត្តិបេតិកភណ្ឌពិភពលោក ប្រាសាទសំបូរព្រៃគុក បានក្លាយជាតំបន់ទេសចរណ៍វប្បធម៌ប្រវត្តិសាស្ត្រដ៏ទាក់ទាញមួយផងដែរ។ទន្ទឹមនឹងនោះ សម្តេចតេជោ ហ៊ុន សែន អំពាវនាវសូមចូលរួមថែរក្សាការពារប្រាសាទបុរាណទាំងអស់នៅទូទាំងប្រទេសឲ្យបានគង់វង្ស ដើម្បីកូនចៅខ្មែរគ្រប់ៗជំនាន់៕

៥ឆ្នាំក្រោយសំបូរព្រៃគុក ចុះបញ្ជីសម្បត្តិបេតិកភណ្ឌពិភពលោកមន្រ្តីជំនាញរកឃើញប្រាសាទថ្មីៗជាបន្តបន្តាប់

ក្នុងរយៈពេល៥ឆ្នាំ បន្ទាប់ពីអង្គការយូណេស្គូ សម្រេចដាក់ប្រាសាទសំបូរព្រៃគុកចូលជាសម្បត្តិបេតិកភណ្ឌពិភពលោក នាថ្ងៃទី៨ ខែកក្កដា ឆ្នាំ២០១៧មក មន្រ្តីជំនាញបានបន្តរកឃើញប្រាង្គប្រាសាទបូរាណថ្មីៗបន្ថែមទៀត ខណៈបច្ចុប្បន្នអាជ្ញាធរជាតិសំបូរព្រៃគុកបានកំពុងជួសជុលប្រាសាទមួយចំនួន ដើម្បីអភិរក្សមជ្ឈមណ្ឌលអរិយធម៌ដ៏មានតម្លៃមួយនេះ។ នេះបើតាមការអះអាងរបស់លោក ហេង ថាន អគ្គនាយករងអាជ្ញាធរជាតិសំបូរព្រៃគុក។ថ្លែងនៅក្នុងកិច្ចសម្ភាសន៍ជាមួយទូរទស្សន៍BTV លោក ហេង ថាន បានលើកឡើងថា ប្រាសាទសំបូរព្រៃគុក គឺមានប្រាង្គប្រាសាទរាប់រយប្រាង្គ ដោយប្រាង្គនីមួយៗមានឆ្លាក់ចារឹកបែបប្រពៃណី វប្បធម៌ជាច្រើន ហើយបន្ទាប់ពីប្រាសាទនេះបានក្លាយទៅជាសម្បត្តិរបស់ពិភពលោកមក បានទាក់ទាញភ្ញៀវបរទេស ក្នុងមួយថ្ងៃៗជាងមួយពាន់នាក់ ខណៈភ្ញៀវជាតិជាច្រើនពាន់នាក់ មុនពិភពលោកផ្ទុះការឆ្លងរីករាលដាលនូវមេរោគកូវីដ១៩។ប្រាសាទសំបូរព្រៃគុកមានទីតាំងស្ថិតនៅក្នុងភូមិសម្បូរ ឃុំសម្បូរ ស្រុកសម្បូរ ខេត្តកំពង់ធំ។ ប្រាសាទនេះស្ថិតនៅតាមបណ្តោយស្ទឹងសែន ដែលមានចម្ងាយប្រហែល ២៨គីឡូម៉ែត្រភាគឦសាន នៃទីរួមខេត្តកំពង់ធំ និងមានចម្ងាយប្រហែល ១៨១គីឡូម៉ែត្រពីរាជធានីអង្គរនៃខេត្តសៀមរាប និងមានចម្ងាយប្រហែល ១៧០គីឡូម៉ែត្រពីប្រាសាទព្រះវិហារ នៃខេត្តព្រះវិហារ និងមានចម្ងាយប្រហែល ១៩៦គីឡូម៉ែត្រពីរាជធានីភ្នំពេញ។ ប្រាសាទសំបូរព្រៃគុកជារមណីយដ្ឋានវប្បធម៌ និងប្រវត្តិសាស្រ្ត ដែលមានចម្ងាយប្រមាណ ៣៧គីឡូម៉ែត្រ បត់តាមផ្លូវជាតិ៦៤ បត់ស្តាំតាមសាលាវិស័យ កាត់តាមផ្លូវបុសស្រមោច ផ្លូវនេះពេលរដូវវស្សាលិចទឹក តែយើងអាចធ្វើដំណើរឆ្ពោះទៅស្រុកសំបូរបានតែម្តង ដែលសង់លើដី រាបស្មើមានទំហំ ៣,០០០ ហិកតា ។ រមណីដ្ឋានសំបូរព្រៃគុក ជារាជធានីចាស់ឈ្មោះថាឥសានបុរៈ ពីសម័យនោះជាមជ្ឈមណ្ឌលនៃព្រាហ្មញ្ញសាសនា ដើម្បីឧទ្ទិសថ្វាយដល់ ព្រះសិវៈ ឬព្រះឥសូរនិយម។ ក្រុមប្រាសាទនេះសាងសង់អំពីឥដ្ឋតាន់ និង ថ្មបាយក្រៀមលំអរទៅដោយចម្លាក់ពីលើឥដ្ឋ ចាក់ពុម្ភដោយបាយអ ជាផ្ទាំងៗអំពីឥដ្ឋ តែបច្ចុប្បន្នរបេះអស់មួយចំនួន។ ក្បាច់ផ្តែរ និងការសរសេរជាពាក្យពេជ្រ ប្រអប់ទ្វារធ្វើអំពីថ្មភក់ទាំងអស់។ ប្រាសាទនេះកសាងឡើងនៅរជ្ជកាលព្រះបាទឥសានវរ្ម័នទី១ នៅក្នុង សតវត្សរ៍ទី៧ (គ.ស៦១៦-៦៣៥) នាស័យចេនឡា។បើតាម លោក ហេង ថាន បានប្រាប់ទូរទស្សន៍BTVទៀតថា នាពេលបច្ចុប្បន្នប្រាង្គប្រាសាទនានា កំពុងធ្វើការជួសជុល អភិរក្ស និងអភិវឌ្ឍបន្ថែមដើម្បីធ្វើយ៉ាងណាឲ្យរមណីយដ្ឋានមួយនេះ គង់វង្ស ស្ថិតស្ថេរយូរអង្វែងស្របទៅតាមគម្រោងរបស់រាជរដ្ឋាភិបាល ដើម្បីទាក់ទងទាញភ្ញៀវទេសចរជាតិ និងអន្តរជាតិកាន់តែច្រើន ខណៈប្រជាពលរដ្ឋដែលកំពុងរស់នៅក្បែរប្រាសាទនេះ ប្រកបដោយសុខដុមរមនាបន្ថែមទៀតផងដែរ។ ដើម្បីអបអរសាទរខួប៥ឆ្នាំ ក្នុងការដាក់ប្រាសាទចូលជាសម្បត្តិបេតិកភណ្ឌពិភពលោក(៨ កក្កដា ឆ្នាំ២០១៧-៨កក្កដា ឆ្នាំ២០២២) លោក ហេង ថាន ក៏បានឲ្យដឹងផងដែរថាអាជ្ញាធរនឹងធ្វើការបៀបចំខួបនេះនៅក្នុងបរិវេនប្រាសាទផងដែរ បន្ទាប់ពីអាក់ខានប្រារព្ធអស់រយៈពេលពីរឆ្នាំដោយសារ តែបញ្ហានៃការរីករាលដាលនូវមេរោគកូវីដ១៩៕ អត្ថបទ៖ បាន ចក់

សម្តេចតេជោ ហ៊ុន សែន ជូនពរបងប្អូនជនរួមជាតិ ព្រមទាំងពុទ្ធបរិស័ទទូទាំងប្រទេស ជួបតែសេចក្តីសុខចម្រើន ក្នុងថ្ងៃបុណ្យវិសាខបូជា

ដើម្បីទទួលបានព័ត៌មានថ្មីៗ រហ័ស សូមចុច Join Channel Telegram BTV Newsភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានជូនពរបងប្អូនជនរួមជាតិ ព្រមទាំងពុទ្ធបរិស័ទទូទាំងប្រទេស ជួបតែសេចក្តីសុខចម្រើន ក្នុងថ្ងៃបុណ្យវិសាខបូជា។ សារសម្តេចតេជោ ហ៊ុន សែន មានខ្លឹមសារថា ថ្ងៃអាទិត្យ ១៥កើត ខែពិសាខ ឆ្នាំខាល ចត្វាស័ក ព.ស. ២៥៦៥ ត្រូវនឹង ថ្ងៃទី១៥ ខែឧសភា ឆ្នាំ២០២២ នេះ គឺជាថ្ងៃបុណ្យវិសាខបូជា ។ មិនថាតែនៅកម្ពុជាទេ គឺនៅថ្ងៃនេះពុទ្ធសាសនិកជនទូទាំងពិភពលោក ក៏បាននាំគ្នាប្រារព្ធពិធីបុណ្យសាសនា ដ៏សំខាន់ខាងលើនេះផងដែរ។បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាដទៃៗទៀត ពីព្រោះពិធីបុណ្យនេះ គឺបានបង្ហាញនូវការគោរពរំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មា សម្ពុទ្ធសមណគោតម គឺថ្ងៃដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វានផងដែរ។ ព្រឹត្តិការណ៍ទាំងបីនេះគឺកើតឡើងចំថ្ងៃ ១៥កើត ខែពេញបូណ៌មី ដែលមានព្រះច័ន្ទពេញវង់ ក្នុងខែពិសាខដូចគ្នាខុសតែឆ្នាំតែប៉ុណ្ណោះ។ នៅថ្ងៃទី១៥ ខែធ្នូ ឆ្នាំ ១៩៩៩ អង្គការសហប្រជាជាតិ (UN) ក៏បានប្រកាសទទួលស្គាល់«វិសាខបូជា»ជាពិធីបុណ្យសាសនាអន្តរជាតិដែលបុគ្គលិកធ្វើការ និងសាធារណៈជនអាចប្រារព្ធធ្វើបាននៅទូទាំងពិភពលោកទៀតផង។សូមជូនពរបងប្អូនជនរួមជាតិ ព្រមទាំងពុទ្ធបរិស័ទទូទាំងប្រទេស ជួបតែសេចក្តីសុខចម្រើន និងពុទ្ធពរ៥ប្រការគឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕

ពលរដ្ឋឆ្លងដែនតាមច្រកប៉ោយប៉ែតកើនឡើង ខណៈអាជ្ញាធរខ្មែរ គ្រោងជួបថៃបើកច្រក ២ទៀត

ភ្នំពេញ៖ កំណើនប្រជាពលរដ្ឋ និងពលករខ្មែរ ឆ្លងដែនតាមច្រកទ្វារអន្តរជាតិប៉ោយប៉ែតបានកើនឡើងពីមួយថ្ងៃទៅមួយថ្ងៃ ហើយអាជ្ញាធរនៃខេត្តបន្ទាយមានជ័យ បានគ្រោងជួបពិភាក្សាជាមួយអាជ្ញាធរថៃ ដើម្បីបើកច្រកតំបន់ចំនួន ២ទៀត ។ឯកឧត្តម អ៊ុំ រាត្រី អភិបាលខេត្តបន្ទាយមានជ័យ នៅថ្ងៃទី១០ ខែឧសភា ឆ្នាំ២០២២ បានមានប្រសាសន៍ថា ចាប់ពីថ្ងៃបើកច្រកទ្វារអន្តរជាតិប៉ោយប៉ែត ការធ្វើដំណើររបស់ពលរដ្ឋឆ្លងដែនទៅមកប្រទេសធម្មតា ប៉ុន្តែនារយៈពេលចុងក្រោយមកនេះមានការកើនឡើង ដោយសារអាជ្ញាធរបានជួយសម្រួលនូវឯកសារគតិយុត្តផ្សេងៗ កាន់តែមានភាពងាយស្រួល ។ឯកឧត្តមបានបន្តថា សម្រាប់ការធ្វើប័ណ្ណព្រំដែន ក៏មានការកើនឡើង ព្រោះប្រជាពលរដ្ឋមានតម្រូវការឆ្លងទៅខេត្តស្រះកែវ នៃប្រទេសថៃ ពិសេសអ្នកទៅប្រកបរបរនៅក្នុងផ្សារថៃមួយឈ្មោះ “រោងក្លឿ” ហើយអាជ្ញាធរខេត្តបន្ទាយមានជ័យ គ្រោងជួបអាជ្ញាធរនៃប្រទេសថៃ បើកច្រកតំបន់ ២ទៀត គឺច្រកម៉ាឡៃ និងច្រកបឹងត្រកួន ដើម្បីសម្រួលដល់ការងារផ្សេងៗ របស់ពលរដ្ឋនៃប្រទេសទាំងពីរ ។អភិបាលខេត្តបន្ទាយមានជ័យ បានបញ្ជាក់ថា ទន្ទឹមនេះអាជ្ញាធរតាមបន្ទាត់ព្រំដែន នៅតែបន្តអនុវត្តនូវវិធានការផ្សេងៗ ក្នុងការទប់ស្កាត់ជំងឺកូវីដ១៩ រួមទាំងធ្វើការផ្សព្វផ្សាយ ដល់ពលករដែលចេញមកពីថៃ មិនទាន់ចាក់វ៉ាក់សាំង ឲ្យពួកគេទៅចាក់ឲ្យបានគ្រប់គ្នា ។ គួរបញ្ជាក់ថា អាជ្ញាធរនៃប្រទេសថៃ បានសម្រេចបើកច្រកទ្វារព្រំដែនមួយចំនួនឡើងវិញ ជាមួយកម្ពុជា ចាប់ពីថ្ងៃទី១ ខែឧសភា ឆ្នាំ២០២២ ក្នុងនោះមានច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដើម្បីឲ្យពលរដ្ឋអាចធ្វើដំណើរចេញចូលឡើងវិញ ដោយមានភ្ជាប់ជាមួយនូវលិខិតឆ្លងដែន (Passsport), ប័ណ្ណព្រំដែន (Border Pass) រួមទាំងមានប័ណ្ណបញ្ជាក់ការវ៉ាក់សាំងកូវីដ-១៩ ផងដែរ ៕ អត្ថបទ៖ បាន សុខរិទ្ធិ

ធនធានធម្មជាតិសមុទ្រ រមណីយដ្ឋានតាមកោះ ជាគោលដៅ ទេសចរណ៍ដ៏ទាក់ទាញ

ព្រះសីហនុ៖ ធនធានធម្មជាតិសម្បូរបែប កោះ ឆ្នេរសមុទ្រស្រស់ស្អាត ដ៏ល្អប្រណីត នៃឧទ្យានសមុទ្ររបស់ខេត្ដព្រះសីហនុ កំពុងក្លាយជាទីផ្សារ និងគោលដៅទេសចរណ៍ដ៏ទាក់ទាញសម្រាប់ភ្ញៀវទេសចរជាតិ និងអន្តរជាតិ។នៅថ្ងៃទី៤ ខែឧសភា ឆ្នាំ២០២២ ទោះបីមិនមែនជាថ្ងៃបុណ្យទាន ឬថ្ងៃឈប់សម្រាកចុងសប្តាហ៍ក្តី ក៏មានភ្ញៀវទេសចរជាតិ និងអន្តជាតិហូរហែធ្វើដំណើរទៅស្នាក់នៅលម្ហែកម្សាន្តនៅតាមបណ្តាកោះនានានៅក្រុងកោះរ៉ុង ខេត្តព្រះសីហនុ មានចំនួនច្រើនផងដែរ៕

ឯកឧត្តម គួច ចំរើន និងសំណេះសំណាល និងឧបត្ថម្ភដល់បុគ្គលិកសម្អាតបរិស្ថាន ឆ្មាំឆ្នេរសមុទ្រ និងបុគ្គលិកកម្មករប្រមូលសំរាម

ព្រះសីហនុ៖ នៅព្រឹកថ្ងៃទី១៧ ខែមេសា ឆ្នាំ២០២២ ឯកឧត្តម គួច ចំរើន អភិបាលខេត្តព្រះសីហនុ បានអញ្ជេីញសំណេះសំណាល ជាមួយបងប្អូនប្រជាការពារ ក្រុងព្រះសីហនុ បុគ្គលិកសម្អាតបរិស្ថាន ឆ្មាំឆ្នេរសមុទ្រ និងបងប្អូនបុគ្គលិកកម្មករប្រមូលសំរាម ក្នុងក្រុងព្រះសីហនុ មានចំនួនសរុប១៤៥នាក់។ ឯកឧត្តម គួច ចំរើន បានថ្លែងការកោតសរសើរ និងវាយតម្លៃខ្ពស់ដល់ថ្នាក់ដឹកនាំក្រុងព្រះសីហនុ និងប្រធានមន្ទីរអង្គភាពពាក់ព័ន្ធ ព្រមទាំងបងប្អូនប្រជាការពារ ក្រុងព្រះសីហនុ បុគ្គលិកសម្អាតបរិស្ថាន ឆ្មាំឆ្នេរសមុទ្រ និងបងប្អូនបុគ្គលិកកម្មករប្រមូលសំរាម ក្នុងក្រុងព្រះសីហនុ ដែលបានខិតខំប្រឹងប្រែងបំពេញការងារបានយ៉ាងល្អ ក្នុងឱកាសបុណ្បចូលឆ្នាំថ្មីប្រពៃណីជាតិខ្មែរ។ ក្នុងឱកាសនោះដែរ ឯកឧត្តម គួច ចំរើន បាននាំយកអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ឧបត្ថម្ភជូនដល់បងប្អូនប្រជាការពារ ក្រុងព្រះសីហនុ បុគ្គលិកសម្អាតបរិស្ថាន ឆ្មាំឆ្នេរសមុទ្រ និងបងប្អូនបុគ្គលិកកម្មករប្រមូលសំរាម ម្នាក់ៗទទួលបានថវិកាមួយចំនួន និងភេសជ្ជៈផងដែរ។

បណ្ដាញសង្គម

ព័ត៌មានថ្មីៗ

[UPDATE] ចំនួនអ្នកស្លាប់នៃការតវ៉ានៅប្រទេសនេប៉ាល់បន្តកើនឡើង ទោះមានការដាក់ពង្រាយទ័ពក៏ដោយ

កូរ៉េខាងត្បូង ស្នើសុំឱ្យអាមេរិកអនុញ្ញាតឱ្យកម្មករដែលជាប់ឃុំចាកចេញដោយដៃមិនជាប់ខ្នោះ

ផ្ទុះរថយន្តដឹកហ្គាសបណ្តាលឱ្យមនុស្សច្រើននាក់ស្លាប់និងរាប់សិបនាក់រងរបួសនៅរដ្ឋធានីម៉ិកស៊ិក

ប៉ូឡូញ ថាខ្លួនខិតជិតជម្លោះបើកចំហបំផុត ចាប់តាំងពីសង្គ្រាមលោកលើកទីពីរមក ក្រោយបាញ់ទម្លាក់ដ្រូនរុស្ស៊ី

ចលនាតវ៉ា «រាំងខ្ទប់គ្រប់យ៉ាង» រាលដាលទូទាំងប្រទេសបារាំង ដោយមនុស្សរាប់រយនាក់ត្រូវចាប់ខ្លួន

ឧបនាយករដ្ឋមន្រ្តីប្រចាំការ វង្សី វិស្សុត ដឹកនាំកិច្ចប្រជុំត្រួតពិនិត្យវឌ្ឍនភាព និងពង្រឹងប្រសិទ្ធភាពការងារក្រុមប្រឹក្សាអ្នកច្បាប់

ប្រជាជនប៉ាឡេស្ទីនរត់ទាំងភ័យស្លន់ស្លោ ក្រោយអ៊ីស្រាអែលវាយប្រហារលើអគារកម្ពស់ច្រើនជាន់ក្នុងទីក្រុងហ្កាហ្សា

មន្ត្រីអ៊ីស្រាអែល៖ អ៊ីស្រាអែល នឹងសម្លាប់មេដឹកនាំក្រុមហាម៉ាសពេលក្រោយទៀត បើពួកគេរួចផុតពីការវាយប្រហារនៅកាតា

រាជរដ្ឋាភិបាលត្រៀមរថយន្តក្រុងជិត៦០០គ្រឿង ដឹកពលរដ្ឋដោយឥតគិតថ្លៃ រយៈពេល៦ថ្ងៃ ក្នុងឱកាសបុណ្យភ្ជុំបិណ្ឌ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

វប្បធម៌ និងទេសចរណ៍

កម្ពុជាមានផ្ទៃដីគម្រប់ព្រៃឈើជាង ៨លានហិកតា និងមានសត្វព្រៃកម្ររស់នៅជាច្រើនប្រភេទ

កម្ពុជា-អង់គ្លេស ប្តេជ្ញាបង្កើនកិច្ចសហប្រតិបតិ្តការលើវិស័យវប្បធម៌ឲ្យកាន់តែប្រសើរ

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

៥ឆ្នាំក្រោយសំបូរព្រៃគុក ចុះបញ្ជីសម្បត្តិបេតិកភណ្ឌពិភពលោកមន្រ្តីជំនាញរកឃើញប្រាសាទថ្មីៗជាបន្តបន្តាប់

ពលរដ្ឋឆ្លងដែនតាមច្រកប៉ោយប៉ែតកើនឡើង ខណៈអាជ្ញាធរខ្មែរ គ្រោងជួបថៃបើកច្រក ២ទៀត

ធនធានធម្មជាតិសមុទ្រ រមណីយដ្ឋានតាមកោះ ជាគោលដៅ ទេសចរណ៍ដ៏ទាក់ទាញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

វប្បធម៌ និងទេសចរណ៍

កម្ពុជាមានផ្ទៃដីគម្រប់ព្រៃឈើជាង ៨លានហិកតា និងមានសត្វព្រៃកម្រ​រស់នៅជា​ច្រើន​ប្រភេទ

កម្ពុជា-អង់គ្លេស ប្តេជ្ញាបង្កើនកិច្ចសហប្រតិបតិ្តការលើវិស័យវប្បធម៌ឲ្យកាន់តែប្រសើរ

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

ពលរដ្ឋឆ្លងដែនតាមច្រកប៉ោយប៉ែតកើនឡើង ខណៈអាជ្ញាធរខ្មែរ គ្រោងជួបថៃបើកច្រក ២ទៀត

ធនធានធម្មជាតិសមុទ្រ រមណីយដ្ឋានតាមកោះ ជាគោលដៅ ទេសចរណ៍ដ៏ទាក់ទាញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កម្ពុជាមានផ្ទៃដីគម្រប់ព្រៃឈើជាង ៨លានហិកតា និងមានសត្វព្រៃកម្ររស់នៅជាច្រើនប្រភេទ